Молитва чадъ о родителехъ

Просьба о здоровье, долголетии и Божием благословении родителей.

Ѻ пра́ведный Го́споди Бо́же, Ты̀ заповѣ́далъ и повелѣ́лъ есѝ че́ствовати отца̀ и ма́терь, та́коже и Са́мъ воплоти́выйсѧ, смире́нно повинова́лсѧ есѝ роди́телемъ Твои́мъ на землѝ;

поко́рно молю́сѧ Тебѣ̀ Го́сподꙋ Бо́гꙋ моемꙋ̀: оуслы́ши гла́съ мо́й и поми́лꙋй мои́хъ роди́телей менѐ въ Твое́й благода́ти и любвѝ воспитꙋ́ющихъ,

ѿвратѝ ѿ ни́хъ всѧ́кꙋю вре́днꙋю стра́сть и недꙋ́гъ, да́рꙋй и́мъ здра́вїе, долгоде́нствїе, ми́рнꙋю жи́знь и изоби́льное Твоѐ благослове́нїе излі́й на ни́хъ милосе́рдно; благословѝ и́хъ трꙋды̀ и слꙋ́жбꙋ, поми́лꙋй и́хъ щедро́тами Твои́ми дабы̀ Тебѣ̀ вѣ́рно послꙋжи́вше и менѐ на Твою̀ сла́вꙋ и слꙋ́жбꙋ досто́йно воспита́вше, полꙋчи́ли благода́ть Твою̀ въ се́й жи́зни, по́слѣ же живо́тъ вѣ́чный, ами́нь.