Молитва чад о родителях

О пра́ведный Го́споди Бо́же, Ты запове́дал и повеле́л еси́ че́ствовать отца́ и ма́тери, та́ко же и Сам воплоти́вшийся, смире́нно повинова́лся еси́ роди́телям Твои́м на земли́.

Поко́рно молю́ся Тебе́, Го́споду Бо́гу моему́, услы́ши глас мой, поми́луй мои́х роди́телей, мене́ в Твое́й бла́гости и любви́ воспита́ющих.

Отврати́ от них вся́кую вре́дную страсть и неду́г, да́руй им здра́вие, долгоде́нствие, ми́рную жизнь и изоби́льное Твое́ благослове́ние изле́й на них милосе́рдно; благослови́ их труды́ и слу́жбу, поми́луй и щедро́тами Твои́ми, да́бы тебе́ ве́рно послужи́вши и мене́ на Твою́ сла́ву и слу́жбу досто́йно воспита́вши, получи́ли благода́ть Твою́ в сей жи́зни, по́сле же живо́т ве́чный. Ами́нь.