Мл҃твы в трапе́зѣ

Пе́редъ ѻ҆бѣ̀домъ

Ѻ҆́ч҃е на́шъ:

И҆лѝ:

Ѻ҆́чи всѣ́хъ на тѧ̀, гдⷵи, ᲂу҆пова́ютъ, и҆ ты̀ дае́ши и҆̀мъ пи́щꙋ во бл҃говре́менїи: Ѿверза́еши ты̀ ще́дрꙋю рꙋ́кꙋ твою̀, и҆ и҆сполнѧ́еши всѧ́кое живо́тно бл҃говоле́нїѧ.

Сла́ва, и҆ ны́нѣ: Гдⷵи, поми́лꙋй, три́жды. Бл҃гословѝ.

Хрⷵтѐ бж҃е, бл҃гословѝ ꙗ҆́стїе и҆ питїѐ рабѡ́мъ твои̑мъ, ꙗ҆́кѡ ст҃ъ є҆сѝ всегда̀, ны́нѣ и҆ при́снѡ и҆ вовѣ́ки вѣкѡ́въ, а҆ми́нь.

По ѻ҆бѣ́дѣ

Бл҃годари́мъ тѧ̀, хрⷵтѐ бж҃е на́шъ, ꙗ҆́кѡ насы́тилъ є҆сѝ на́съ земны́хъ твои́хъ бла̑гъ, не лишѝ на́съ и҆ нбⷵнагѡ твоегѡ црⷵтвїѧ: но ꙗ҆́кѡ посредѣ̀ ᲂу҆ченикѡ́въ твои́хъ прише́лъ є҆сѝ сп҃се, ми́ръ даѧ̀ иⷨмъ, прїидѝ и҆ къ на́мъ, и҆ сп҃сѝ на́съ.

Сла́ва, и҆ ны́нѣ: Гдⷵи, поми́лꙋй, три́жды. Бл҃гословѝ.

Сщ҃е́нникъ глаго́летъ:

Бл҃гослове́нъ бг҃ъ, ми́лꙋѧй и҆ пита́ѧй на́съ ѿ свои́хъ бога́тыхъ дарѡ́въ, свое́ю бл҃года́тїю и҆ чл҃вѣколю́бїемъ, всегда̀, ны́нѣ и҆ при́снѡ и҆ во вѣ́ки вѣкѡ́въ, а҆ми́нь

Пе́редъ ве́черей

Вше́дше же въ трапе́зꙋ, глаго́лемъ:

Ѩ҆дѧ́тъ ᲂу҆бо́зїи, и̑ насы́тѧтсѧ, и҆ восхва́лѧтъ гдⷵа взыска́ющїи є҆гѡ̀, жива̑ бꙋ́дꙋтъ сердца̀ и҆́хъ въ вѣ́къ вѣ́ка.

Сла́ва, и҆ ны́нѣ.

Гдⷵи, поми́лꙋй, три́жды. Бл҃гословѝ.

И҆ бл҃гословлѧ́етъ сщ҃е́нникъ трапе́зꙋ.

По ве́чери

По ꙗ҆де́нїи же, Сла́ва, и҆ ны́нѣ:

Бы́сть чре́во твоѐ ст҃а́ѧ трапе́за, и҆мꙋ́щаѧ нбⷵнаго хлѣ́ба, хрⷵта̀ бг҃а на́шего, ѿ негѡ́же всѧ́къ ꙗ҆ды́й не ᲂу҆мира́етъ, ꙗ҆́коже речѐ всѣ́хъ, бг҃ороди́тельнице, пита́тель.

И҆ посе́мъ:

Чтⷵнѣ́йшꙋю херꙋві̑мъ:

Та́же:

Возвесели́лъ ны̀ є҆сѝ гдⷵи въ творе́нїихъ твои́хъ, и҆ въ дѣ́лѣхъ рꙋкꙋ̀ твоє́ю возра́дꙋемсѧ. зна́менасѧ на на́съ свѣ́тъ лица̀ твоегѡ̀ гдⷵи, да́лъ є҆сѝ весе́лїе въ се́рдцѣ мое́мъ, ѿ плода̀ пшени́цы, вїна̀ и҆ є҆ле́а своегѡ̀ ᲂу҆мно́жишасѧ. Въ ми́рѣ вкꙋ́пѣ ᲂу҆снꙋ̀ и҆ почі́ю: ꙗ҆́кѡ ты̀ гдⷵи, є҆ди́наго на ᲂу҆пова́нїи всели́лъ мѧ̀ є҆сѝ.

Сла́ва, и҆ ны́нѣ:

Гдⷵи, поми́лꙋй, три́жды. Бл҃гословѝ.

Сщ҃е́нникъ: Съ на́ми бг҃ъ, свое́ю бл҃годатїю и҆ чл҃вѣколю́бїемъ, всегда̀, ны́нѣ и҆ при́снѡ и҆ во вѣ́ки вѣкѡвъ, а҆ми́нь.