Молитвы трапезы
Молитвословия перед завтраком
Прежде всего полагаем три поклона с покаянными молитвами:
Бо́же, ми́лостив бу́ди мне, гре́шному. (Поклон.)
Созда́вый мя, Го́споди, поми́луй мя. (Поклон.)
Без числа́ согреши́х, Го́споди, поми́луй и прости́ мя, гре́шнаго. (Поклон.)
И затем молитва перед трапезой:
О́чи все́х на Тя, Го́споди, упова́ют, и Ты дае́ши им пи́щу во благовреме́нии. Отверза́еши Ты ще́друю ру́ку Твою́ и исполня́еши вся́кое живо́тно благоволе́ния.
Сла́ва, и ны́не: Го́споди, поми́луй, (трижды). Благослови́.
Священник: Христе Боже, благослови́ я́стие и питие́ рабо́м Твои́м, я́ко свят еси́ всегда́, ны́не и при́сно, и во ве́ки веко́в.
Мы же: Аминь.
По окончании трапезы:
Благодари́м Тя, Христе́ Бо́же наш, я́ко насы́тил еси́ нас земны́х Твои́х благ, не лиши́ нас и Небе́снаго Твоего́ Ца́рствия: но я́ко посреде́ ученико́в Твои́х прише́л еси́, Спа́се, мир дая́ им, прииди́ и к нам, и спаси́ нас.
Сла́ва, и ны́не: Го́споди, поми́луй, (трижды). Благослови́.
Священник: С на́ми Бо́г, Свое́ю благода́тию и человеколю́бием, всегда́, ны́не и при́сно, и во ве́ки веко́в.
Мы же: Аминь.
Молитвословия перед обедом
Три кратких покаянных молитвы с поклонами. Затем:
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хле́б наш насу́щный да́ждь нам днесь; и оста́ви нам до́лги на́ша, я́коже и мы́ оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Сла́ва, и ны́не: Го́споди, поми́луй, (трижды). Благослови́.
Священник: Христе Боже, благослови́ я́стие и питие́ рабо́м Твои́м, я́ко свят еси́ всегда́, ны́не и при́сно, и во ве́ки веко́в.
Мы же: Аминь.
По окончании трапезы творим отпуст:
Моли́твами святы́х оте́ц на́ших, Го́споди, Иису́се Христе́, Бо́же наш, поми́луй нас.
Мы же: Аминь.
Благодари́м Тя, Христе́ Бо́же наш, я́ко насы́тил еси́ нас земны́х Твои́х благ, не лиши́ нас и Небе́снаго Твоего́ Ца́рствия: но я́ко посреде́ ученико́в Твои́х прише́л еси́, Спа́се, мир дая́ им, прииди́ и к нам, и спаси́ нас.
Сла́ва, и ны́не: Го́споди, поми́луй, (трижды). Благослови́.
Священник: Благослове́н Бо́г, милуя́й и пита́яй нас от Свои́х бога́тых даро́в, Свое́ю благода́тию и человеколю́бием, всегда́, ны́не и при́сно, и во ве́ки веко́в.
Мы же: Аминь.
Молитвословия перед неуставными трапезами
Три кратких покаянных молитвы с поклонами. Затем:
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Сла́ва, и ны́не: Го́споди, поми́луй, (трижды). Благослови́.
Священник: Христе Боже, благослови́ я́стие и питие́ рабо́м Твои́м, я́ко свят еси́ всегда́, ны́не и при́сно, и во ве́ки веко́в.
Мы же: Аминь.
По окончании трапезы:
Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.
Сла́ва, и ны́не: Го́споди, поми́луй, (трижды). Благослови́.
Священник: С на́ми Бо́г, Свое́ю благода́тию и человеколю́бием, всегда́, ны́не и при́сно, и во ве́ки веко́в.
Мы же: Аминь.
И снова три поклона с теми же молитвами, что и в начале.