Молитвы перед чтением Евангелия

Молитва 1

Возсия́й в сердца́х на́ших, Человеколю́бче Го́споди, Твоего́ богове́дения нетле́нный свет, и мы́сленная на́ша отве́рзи о́чи во ева́нгельских Твои́х пропове́даний разуме́ние, вложи́ в нас и блаже́нных Твои́х за́поведей страх, да плотски́я по́хоти вся попра́вше, духо́вное жи́тельство про́йдем, вся я́же ко благоугожде́нию Твоему́ и му́дрствующе и де́юще. Ты бо еси́ просвеще́ние душ и теле́с на́ших, Христе́ Бо́же, и Тебе́ сла́ву возсыла́ем, со Безнача́льным Твои́м Отце́м и Всесвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Молитва 2

Го́споди Иису́се Христе́, отве́рзи ми у́ши серде́чныя услы́шати сло́во Твое́, и разуме́ти и твори́ти во́лю Твою́, я́ко пришле́ц есмь на земли́: не скры́й от мене́ за́поведей Твои́х, но откры́й о́чи мои́, да разуме́ю чудеса́ от зако́на Твоего́; скажи́ мне безве́стная и та́йная прему́дрости Твоея́.

На Тя упова́ю, Бо́же мой, да ми просвети́ши ум и смысл све́том ра́зума Твоего́ не то́кмо чести напи́санная, но и твори́ти я, да не в грех себе́ святы́х жития́ и словесе́ прочита́ю, но в обновле́ние, и просвеще́ние, и в святы́ню, и в спасе́ние души́, и в насле́дие жи́зни ве́чныя. Я́ко Ты еси́ просвеща́яй лежа́щих во тьме и от Тебе́ есть вся́кое дая́ние бла́го и всяк дар соверше́н. Ами́нь.