Молитва родителей о чадѣхъ

Молитва Богу Отцу о воспитании, защите и спасении детей.

Ѻтче Свѧты́й, предвѣ́чный Бо́же, ѿ Него́же исхо́дитъ всѧ́къ да́ръ и всѧ́кое бла́го: Тебѣ̀ прилѣ́жно молю́сѧ о ча́дѣхъ, ꙗ́же дарова̀ мнѣ̀ бла́гость Твоѧ̀. Ты̀ да́лъ есѝ и́мъ бытїѐ, оживотвори́лъ есѝ ѧ̀ дꙋше́ю безсме́ртною, и отроди́лъ свѧты́мъ креще́нїемъ, во̀ е́же жи́ти и́мъ сообра́зно съ во́лею Твое́ю и наслѣ́дити ца́рствїе небе́сное: сохранѝ ѧ̀ въ благода́ти Твое́й до конца̀ жи́зни и́хъ и освѧща́й Твое́ю и́стиною, да свѧти́тсѧ въ ни́хъ и́мѧ Твоѐ.

Содѣ́йствꙋй мнѣ̀ Твое́ю благода́тїю, да̀ бы́хъ воспита́лъ ѧ̀ во сла́вꙋ Твоегѡ̀ и́мене и въ по́льзꙋ бли́жнихъ. Пода́ждь мнѣ̀ къ семꙋ̀ потре́бнаѧ сре́дства, терпѣ́нїе и си́лꙋ.

Го́споди, просвѣща́й ѧ̀ свѣ́томъ премꙋ́дрости Твоеѧ̀, да лю́бѧтъ Тѧ̀ все́ю дꙋше́ю и всѣ́мъ помышле́нїемъ свои́мъ. Насадѝ въ се́рдцѣ и́хъ стра́хъ и ѿвраще́нїе ѿ всѧ́кагѡ беззако́нїѧ, да бꙋ́дꙋтъ непоро́чна въ пꙋте́хъ свои́хъ. Оукрасѝ дꙋ́шꙋ и́хъ цѣломꙋ́дрїемъ, трꙋдолю́бїемъ, долготерпѣ́нїемъ, оудово́льствїемъ и всѧ́кою честно́тою. Ѻградѝ оуста̀ и́хъ пра́вдою, да всѧ́ка клевета̀, ло́жь и ле́сть бꙋ́детъ ме́рзостна и́мъ. Ѻкропѝ ѧ̀ росо́ю благода́ти Твоеѧ̀, да преꙋспѣва́ютъ въ добродѣ́телехъ и свѧ́тости, и да возраста́ютъ въ благоволе́нїи Твое́мъ и въ любвѝ благочести́выхъ человѣ́къ.

А́нгелъ Храни́тель да пребыва́етъ съ ни́ми всегда̀ и соблюда́етъ ю́ность и́хъ ѿ помышле́нїй сꙋ́етныхъ, ѿ пре́лести и собла́зна мї́ра сего̀, и ѿ всѧ́кихъ навѣ́товъ лꙋка́вагѡ.

Аще же когда̀ и согрѣша́тъ пре́дъ Тобо́ю, не ѿвратѝ лица̀ Твоегѡ̀ ѿ ни́хъ, но бꙋ́ди и́мъ ми́лостивъ; возбꙋдѝ сокрꙋше́нїе въ се́рдцѣ и́хъ, и по мно́жествꙋ щедро́тъ Твои́хъ очи́сти согрѣше́нїѧ и́хъ. Не лишѝ и́хъ и земны́хъ Твои́хъ бла́гъ, но пода́ждь и́мъ всѧ̀ нꙋ́жнаѧ во вре́мени, въ прїобрѣте́нїе блаже́нныѧ вѣ́чности. Сохранѧ́й ѧ̀ ѿ всѧ́кїѧ болѣ́зни, гнѣ́ва и напа́сти, бѣды̀ и ско́рби, и осѣнѧ́й Твое́ю ми́лостїю во̀ всѧ̀ дни живота̀ и́хъ.

Бо́же благи́й! ещѐ молю́сѧ Тебѣ̀: да́ждь мнѣ̀ весе́лїе и ра́дость о ча́дѣхъ мои́хъ и сподо́би мѧ̀ предста́ти съ ни́ми на стра́шнѣмъ сꙋдѣ̀ Твое́мъ и съ непосты́днымъ дерзнове́нїемъ рещѝ: Сѐ а́зъ и ча́да моѧ̀, ꙗ́же да́лъ мнѣ̀ есѝ, Го́споди; да кꙋ́пнѡ съ ни́ми, прославлѧ́ѧ неизрече́ннꙋю Твою̀ бла́гость и вѣ́чнꙋю любо́вь, превозно́шꙋ пресвѧто́е и́мѧ Твоѐ, Ѻтца̀, и Сы́на, и Свѧта́гѡ Дꙋ́ха, во вѣ́ки вѣкѡ́въ, ами́нь.