Молитва родителей о чадах

Эту молитву может читать как отец, так и мать.

О́тче Святы́й, Предве́чный Бо́же, от Него́ же исхо́дит всяк дар и вся́кое бла́го, Тебе́ приле́жно молю́ся о ча́дех, я́же дарова́ ми бла́гость Твоя́. Ты дал еси́ им бытие́, оживотвори́л еси́ я душе́ю бессме́ртною, огради́л святы́м Креще́нием во е́же жи́ти им сообра́зно с во́лею Твое́ю и насле́довати Ца́рствие Небе́сное. Сохрани́ я в благода́ти Твоея́ до конца́ жи́зни их и освяща́й Твое́ю и́стиною, да святи́тся в них и́мя Твое́.

Соде́йствуй ми Твое́ю благода́тию, да́бы воспита́л я во сла́ву Твоего́ и́мени и в по́льзу бли́жним. Пода́ждь ми к сему́ потре́бные сре́дства, терпе́ние и си́лу.

Го́споди! Просвяща́й я Све́том Прему́дрости Твоея́, да лю́бят Тя все́ю душе́ю и всем помышле́нием свои́м. Насади́ в сердца́х их страх и отвраще́ние от вся́кого беззако́ния, да бу́дут непоро́чны в путя́х свои́х. Го́споди! Украси́ ду́ши их целому́дрием, долготерпе́нием и вся́кою че́стностию. Да вся́ка клевета́, ложь и лесть бу́дет ме́рзостна им. Окропи́ я росо́ю благода́ти Твоея́, да преуспева́ют в доброде́тели и свя́тости, да возраста́ют в любви́ Твое́й и в любви́ благочести́вых челове́к.

А́нгел Храни́тель да пребыва́ет с ни́ми всегда́ и соблюда́ет ю́ность их от помышле́ний су́етных, от пре́лестей и собла́знов ми́ра сего́ и от вся́ких наве́тов лука́ваго.

А́ще же когда́ и согреша́т пред Тобо́ю, не отврати́ лица́ Твоего́ от них, но бу́ди им ми́лостив, возбуди́ сокруше́ние в сердца́х их и, по мно́жеству щедро́т Твои́х, очи́сти согреше́ния их. Не лиши́ я и земны́х Твои́х благ, но пошли́ им вся ну́жная во вре́мени во приобрете́ние блаже́нныя ве́чности. Сохрани́ я от вся́кия боле́зни, гне́ва и напа́сти, беды́ и ско́рби и осеня́й Твое́ю ми́лостию во вся дни живота́ их.

Бо́же Благи́й! Еще́ молю́ся Ти. Даждь ми весе́лие и ра́дость о ча́дех мои́х и сподо́би мя предста́ти на Стра́шном Суде́ Твое́м и с непосты́дным дерзнове́нием рещи́: Се аз и ча́да моя́ я́же ми дал еси́, Го́споди, да ку́пно с ни́ми прославля́я неизрече́нную Твою́ бла́гость и ве́чную любо́вь, превозношу́ пресвято́е и́мя Твое́, Отца́ и Сы́на и Свята́го Ду́ха и ны́не и при́сно и во ве́ки веко́в. Ами́нь.