Моли́тва сироты́

Просьба о Божией заботе после потери родителей, помощи благодетелям и упокоении отца и матери.

Бо́же многоми́лостивый! Ты̀ сохраня́еши бытїѐ всѧ́кїѧ тва́ри. Твои́мъ всеблаги́мъ про́мысломъ живе́тъ, дви́жется и соде́ржится всѧ́кое созда́нїе Твоѐ; Ты̀ не забыва́еши и малѣ́йшагѡ че́рвѧ земна́гѡ, но промышлѧ́еши о не́мъ и пита́еши егѡ̀: Тебѣ̀ ꙋсе́рдно молю́сѧ, не оста́ви и менѐ бе́зъ по́мощи Твоеѧ̀.

По неизслѣди́мымъ сꙋдьба́мъ Твои́мъ оте́цъ и ма́ти моѧ̀ оста́виста мѧ̀, и а́зъ лише́нъ е́смь роди́тельскагѡ попече́нїѧ и защище́нїѧ: прїимѝ же Ты̀, небе́сный Ѻ́тче, менѐ въ Сво́й покро́въ, и бꙋ́ди мѝ защи́тникъ во̀ все́мъ житїѝ мое́мъ, Пода́ждь ѿра́дꙋ печа́льномꙋ се́рдцꙋ моемꙋ̀ благода́тнымъ ꙋтѣше́нїемъ Твои́мъ, и ꙋкрѣпѝ мѧ̀ терпѣ́нїемъ въ лише́нїѧхъ и нꙋ́ждѣ.

Возбꙋдѝ въ сердца́хъ сро́дниковъ и бли́жнихъ мои́хъ сострада́нїе и ми́лость ко̀ мнѣ̀, да подадꙋ́тъ мѝ рꙋ́кꙋ по́мощи въ сиро́тствѣ мое́мъ, и наꙋча́тъ мѧ̀ всѧ́комꙋ дѣ́лꙋ благоꙋго́дномꙋ Тебѣ̀, и ведꙋ́тъ по пꙋтѝ за́повѣдей Твои́хъ.

Соблюдѝ мѧ̀ ѿ всѧ́кихъ дїа́вольскихъ и человѣ́ческихъ искꙋше́нїй, да не когда̀ прельще́нъ бꙋ́дꙋ мїрско́ю сꙋето́ю и приклоню́сѧ на пꙋ́ть беззако́нїѧ. Потребѝ во̀ мнѣ̀ всѧ́кїй по́мыслъ лꙋка́вый и жела́нїе грѣхо́вное, да не лишꙋ́сѧ Твоеѧ̀ ми́лости и любвѐ.

Насадѝ трꙋдолю́бїе въ се́рдцѣ мое́мъ и бꙋ́ди мѝ помо́щникъ въ дѣ́лѣхъ мои́хъ и вѣнча́й ѧ̀ благи́мъ ꙋспѣ́хомъ, а́ще бꙋ́дꙋтъ ꙋго́дна Тебѣ̀. Сохранѝ мѧ̀ ѿ нꙋ́жды, бѣды̀, ско́рби и всѧ́кїѧ напа́сти.

Благослови́, всеми́лостиве человѣколю́бче, Го́споди, покрови́тели и наста́вники моѧ̀, и всѧ̀ ми́лꙋющїѧ мѧ̀ и благотворѧ́щїѧ мнѣ̀. Возда́ждь и́мъ ще́дрыми Твои́ми да́рами, земны́ми и небе́сными, за всѧ̀ ми́лости и благодѣѧ́нїѧ и́хъ, ꙋсо́пшимъ же роди́телѧмъ мои́мъ да́рꙋй оставле́нїе всѣ́хъ прегрѣше́нїй и́хъ, вчинѝ и́хъ въ ски́нїѧхъ свѧты́хъ и съ пра́ведными въ небе́сныхъ Твои́хъ дворѣ́хъ вселѝ.

Твоѐ бо̀ е́сть ми́ловати и спаса́ти на́съ Бо́же на́шъ, и Тебѣ̀ сла́вꙋ возсыла́ю Отцꙋ̀, и Сы́нꙋ, и Свѧто́мꙋ Дꙋ́хꙋ, ны́нѣ и при́снѡ, и во вѣ́ки вѣко́въ, ами́нь.