Молитва сироты

Бо́же многоми́лостивый! Ты сохраня́еши бытие́ вся́кия тва́ри. Твои́м всеблаги́м про́мыслом живе́т, дви́жется и соде́ржится вся́кое созда́ние Твое́; Ты не забыва́еши и мале́йшаго че́рвя земна́го, но промышля́еши о нем и пита́еши его́: Тебе́ усе́рдно молю́ся, не оста́ви и мене́ без по́мощи Твоея́.

По неизследи́мым судьба́м Твои́м отец и ма́ти моя́ оста́виста мя, и аз лише́н есмь роди́тельскаго попече́ния и защище́ния: приими́ же Ты, небе́сный О́тче, мене́ в Свой покро́в, и бу́ди ми защи́тник во всем житии́ мое́м, Пода́ждь отра́ду печа́льному се́рдцу моему́ благода́тным утеше́нием Твои́м, и укрепи́ мя терпе́нием в лише́ниях и ну́жде.

Возбуди́ в сердца́х сро́дников и бли́жних мои́х сострада́ние и ми́лость ко мне, да подаду́т ми ру́ку по́мощи в сиро́тстве мое́м, и науча́т мя вся́кому де́лу благоуго́дному Тебе́, и веду́т по пути́ за́поведей Твои́х.

Соблюди́ мя от вся́ких диа́вольских и челове́ческих искуше́ний, да не когда́ прельще́н бу́ду мирско́ю суето́ю и приклоню́ся на путь беззако́ния. Потреби́ во мне вся́кий по́мысл лука́вый и жела́ние грехо́вное, да не лишу́ся Твоея́ ми́лости и любве́.

Насади́ трудолю́бие в се́рдце мое́м и бу́ди ми помо́щник в де́лех мои́х и венча́й я благи́м успе́хом, а́ще бу́дут уго́дна Тебе́. Сохрани́ мя от ну́жды, беды́, ско́рби и вся́кия напа́сти.

Благослови́, всеми́лостиве человеколю́бче, Го́споди, покрови́тели и наста́вники моя́, и вся ми́лующия мя и благотворя́щия мне. Возда́ждь им ще́дрыми Твои́ми да́рами, земны́ми и небе́сными, за вся ми́лости и благодея́ния их, усо́пшим же роди́телям мои́м да́руй оставле́ние всех прегреше́ний их, вчини́ их в ски́ниях святы́х и с пра́ведными в небе́сных Твои́х дворе́х всели́.

Твое́ бо есть ми́ловати и спаса́ти нас Бо́же наш, и Тебе́ сла́ву возсыла́ю Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.