Послѣ́дованїе ᲂу҆́трени
Последование утрени с шестопсалмием, кафизмами и утренним славословием.
Нача́ло ᲂу҆́трени.
А҆́ще ᲂу҆́бѡ є҆́сть вели́каѧ четыредесѧ́тница, по є҆́же бл҃гослови́ти сщ҃е́нникꙋ, глаго́лемъ:
Трист҃о́е. По Ѻ҆́ч҃е на́шъ: Сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ мы̀: А҆ми́нь. Гдⷭ҇и поми́лꙋй, в҃і. Сла́ва, и҆ ны́нѣ:
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.
И҆ два̀ ѱалма̀. А҆́ще же нѝ, по бл҃гослове́нїи: Прїиди́те, поклони́мсѧ: три́жды, и҆ ѱалмы̀. Сі́и ѱалмы̀ глаго́лютсѧ въ монастырѣ́хъ ко́снѡ, за є҆́же кади́ти сщ҃е́нникꙋ бра́тїю всю̀.
Ѱало́мъ ѳ҃і.
Оу҆слы́шитъ тѧ̀ гдⷭ҇ь въ де́нь печа́ли, защи́титъ тѧ̀ и҆́мѧ бг҃а і҆а́кѡвлѧ. по́слетъ тѝ по́мощь ѿ ст҃а́гѡ, и҆ ѿ сїѡ́на застꙋ́питъ тѧ̀. помѧне́тъ всѧ́кꙋ же́ртвꙋ твою̀, и҆ всесожже́нїе твоѐ тꙋ́чно бꙋ́ди. да́стъ тѝ гдⷭ҇ь по се́рдцꙋ твоемꙋ̀, и҆ ве́сь совѣ́тъ тво́й и҆спо́лнитъ. возра́дꙋемсѧ ѡ҆ сп҃се́нїи твое́мъ, и҆ во и҆́мѧ гдⷭ҇а бг҃а на́шегѡ возвели́чимсѧ: и҆спо́лнитъ гдⷭ҇ь всѧ̑ прошє́нїѧ твоѧ̑. ны́нѣ позна́хъ, ꙗ҆́кѡ сп҃сѐ гдⷭ҇ь хрїста̀ своего̀. ᲂу҆слы́шитъ є҆го̀ съ нб҃сѐ ст҃а́гѡ своегѡ̀, въ си́лахъ сп҃се́нїе десни́цы є҆гѡ̀. сі́и на колесни́цахъ, и҆ сі́и на ко́нехъ: мы́ же во и҆́мѧ гдⷭ҇а бг҃а на́шегѡ призове́мъ. ті́и спѧ́ти бы́ша и҆ падо́ша, мы́ же воста́хомъ и҆ и҆спра́вихомсѧ. гдⷭ҇и, сп҃сѝ царѧ̀, и҆ ᲂу҆слы́ши ны̀, во́ньже а҆́ще де́нь призове́мъ тѧ̀.
Ѱало́мъ к҃.
Гдⷭ҇и, си́лою твое́ю возвесели́тсѧ ца́рь и҆ ѡ҆ сп҃се́нїи твое́мъ возра́дꙋетсѧ ѕѣлѡ̀. жела́нїе се́рдца є҆гѡ̀ да́лъ є҆сѝ є҆мꙋ̀, и҆ хотѣ́нїѧ ᲂу҆стнꙋ̀ є҆гѡ̀ нѣ́си лиши́лъ є҆го̀. ꙗ҆́кѡ предвари́лъ є҆сѝ є҆го̀ бл҃гослове́нїемъ бл҃госты́ннымъ, положи́лъ є҆сѝ на главѣ̀ є҆гѡ̀ вѣне́цъ ѿ ка́мене че́стна. живота̀ проси́лъ є҆́сть ᲂу҆ тебѐ, и҆ да́лъ є҆сѝ є҆мꙋ̀ долготꙋ̀ дні́й во вѣ́къ вѣ́ка. ве́лїѧ сла́ва є҆гѡ̀ спасе́нїемъ твои́мъ, сла́вꙋ и҆ велелѣ́пїе возложи́ши на него̀. ꙗ҆́кѡ да́си є҆мꙋ̀ бл҃гослове́нїе во вѣ́къ вѣ́ка, возвесели́ши є҆го̀ ра́достїю съ лице́мъ твои́мъ. ꙗ҆́кѡ ца́рь ᲂу҆пова́етъ на гдⷭ҇а. и҆ млⷭ҇тїю вы́шнѧгѡ не подви́житсѧ. да ѡ҆брѧ́щетсѧ рꙋка̀ твоѧ̀ всѣ̑мъ врагѡ́мъ твои̑мъ, десни́ца твоѧ̀ да ѡ҆брѧ́щетъ всѧ̑ ненави́дѧщыѧ тебѐ. ꙗ҆́кѡ положи́ши и҆̀хъ ꙗ҆́кѡ пе́щь ѻ҆́гненнꙋю, во вре́мѧ лица̀ твоегѡ̀: гдⷭ҇ь гнѣ́вомъ свои́мъ смѧте́тъ ѧ҆̀, и҆ снѣ́стъ и҆̀хъ ѻ҆́гнь. пло́дъ и҆́хъ ѿ землѝ погꙋби́ши, и҆ сѣ́мѧ и҆́хъ ѿ сынѡ́въ человѣ́ческихъ. ꙗ҆́кѡ ᲂу҆клони́ша на тѧ̀ ѕла̑ѧ, помы́слиша совѣ́ты, и҆́хже не возмо́гꙋтъ соста́вити. ꙗ҆́кѡ положи́ши ѧ҆̀ хребе́тъ во и҆збы́тцѣхъ твои́хъ, ᲂу҆гото́виши лицѐ и҆́хъ. вознеси́сѧ гдⷭ҇и си́лою твое́ю, воспое́мъ и҆ пое́мъ си̑лы твоѧ̑.
Сла́ва, и҆ ны́нѣ:
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй, три́жды. Сла́ва, и҆ ны́нѣ:
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ мы̀: А҆ми́нь.
И҆ тропарѝ сїѧ̑:
Сп҃сѝ гдⷭ҇и лю́ди твоѧ̑, / и҆ бл҃гословѝ достоѧ́нїе твоѐ, / побѣ̑ды на сопроти̑вныѧ да́рꙋѧ, / и҆ твоѐ сохранѧ́ѧ крⷭ҇то́мъ твои́мъ жи́тельство.
Сла́ва: Вознесы́йсѧ на крⷭ҇тъ во́лею / тезоимени́томꙋ твоемꙋ̀ но́вомꙋ жи́тельствꙋ / щедрѡ́ты твоѧ̑ да́рꙋй хрⷭ҇тѐ бж҃е: / возвеселѝ на́съ си́лою твое́ю, / побѣ̑ды даѧ̀ на́мъ на сопоста́ты, / посо́бїе и҆мꙋ́щымъ твоѐ ѻ҆рꙋ́жїе ми́ра, / непобѣди́мꙋю побѣ́дꙋ.
И҆ ны́нѣ: Предста́тельство стра́шное и҆ непосты́дное, / не пре́зри бл҃га́ѧ моли́твъ на́шихъ, всепѣ́таѧ бцⷣе, / ᲂу҆твердѝ правосла́вныхъ жи́тельство: / сп҃сѝ вѣ̑рныѧ лю́ди твоѧ̑, и҆ пода́ждь и҆̀мъ съ нб҃сѐ побѣ́дꙋ, / занѐ родила̀ є҆сѝ бг҃а, є҆ди́на бл҃гослове́ннаѧ.
Та́же глаго́летъ і҆ере́й:
Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши, и҆ поми́лꙋй.
Ли́къ: Гдⷭ҇и поми́лꙋй, три́жды.
Е҆щѐ мо́лимсѧ ѡ҆ вели́комъ господи́нѣ и҆ ѻ҆ц҃ѣ̀ на́шемъ, свѧтѣ́йшемъ патрїа́рхѣ моско́вскомъ и҆ всеѧ̀ рꙋсѝ ,_ и҆ ѡ҆ господи́нѣ на́шемъ преѡсвѧще́нѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ ] .
Е҆щѐ мо́лимсѧ ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.
Е҆щѐ мо́лимсѧ за всю̀ бра́тїю и҆ за всѧ̑ хрїстїа́ны.
Возглаша́етъ і҆ере́й: Ꙗ҆́кѡ ми́лостивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Лю́дїе: А҆ми́нь. И҆́менемъ гдⷭ҇нимъ бл҃гословѝ ѻ҆́тче.
Предстоѧ́тель возглаша́етъ си́це: Сла́ва ст҃ѣ́й, и҆ є҆диносꙋ́щнѣй, и҆ животворѧ́щей, и҆ нераздѣ́льнѣй трⷪ҇цѣ всегда̀, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
И҆ начина́емъ шестоѱа́лмїе, со всѧ́кимъ молча́нїемъ и҆ ᲂу҆миле́нїемъ слꙋ́шающе: ᲂу҆чине́нный же бра́тъ со бл҃гоговѣ́нїемъ и҆ стра́хомъ бж҃їимъ глаго́летъ:
Сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. Три́жды.
Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Два́жды.
Ѱало́мъ г҃.
Гдⷭ҇и, что́ сѧ ᲂу҆мно́жиша стꙋжа́ющїи мѝ; мно́зи востаю́тъ на мѧ̀, мно́зи глаго́лютъ дꙋшѝ мое́й: нѣ́сть спⷭ҇нїѧ є҆мꙋ̀ въ бз҃ѣ є҆гѡ̀. ты́ же, гдⷭ҇и, застꙋ́пникъ мо́й є҆сѝ, сла́ва моѧ̀, и҆ возносѧ́й главꙋ̀ мою̀. гла́сомъ мои́мъ ко гдⷭ҇ꙋ воззва́хъ, и҆ ᲂу҆слы́ша мѧ̀ ѿ горы̀ ст҃ы́ѧ своеѧ̀. а҆́зъ ᲂу҆снꙋ́хъ, и҆ спа́хъ, воста́хъ, ꙗ҆́кѡ гдⷭ҇ь застꙋ́питъ мѧ̀. не ᲂу҆бою́сѧ ѿ тє́мъ люде́й, ѡ҆́крестъ напа́дающихъ на мѧ̀. воскрⷭ҇нѝ, гдⷭ҇и, сп҃си́ мѧ, бж҃е мо́й: ꙗ҆́кѡ ты̀ порази́лъ є҆сѝ всѧ̑ враждꙋ́ющыѧ мѝ всꙋ́е, зꙋ́бы грѣ́шникѡвъ сокрꙋши́лъ є҆сѝ. гдⷭ҇не є҆́сть спⷭ҇нїе, и҆ на лю́дехъ твои́хъ блгⷭ҇ве́нїе твоѐ.
А҆́зъ ᲂу҆снꙋ́хъ и҆ спа́хъ, воста́хъ, ꙗ҆́кѡ гдⷭ҇ь застꙋ́питъ мѧ̀.
Ѱало́мъ л҃з.
Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ. ꙗ҆́кѡ стрѣ́лы твоѧ̑ ᲂу҆нзо́ша во мнѣ̀, и҆ ᲂу҆тверди́лъ є҆сѝ на мнѣ̀ рꙋ́кꙋ твою̀. нѣ́сть и҆сцѣле́нїѧ въ пло́ти мое́й ѿ лица̀ гнѣ́ва твоегѡ̀, нѣ́сть ми́ра въ костѣ́хъ мои́хъ, ѿ лица̀ грѣ̑хъ мои́хъ. ꙗ҆́кѡ беззакѡ́нїѧ моѧ̑ превзыдо́ша главꙋ̀ мою̀, ꙗ҆́кѡ бре́мѧ тѧ́жкое ѡ҆тѧготѣ́ша на мнѣ̀. возсмердѣ́ша и҆ согни́ша ра̑ны моѧ̑ ѿ лица̀ безꙋ́мїѧ моегѡ̀. пострада́хъ и҆ слѧко́хсѧ до конца̀, ве́сь де́нь сѣ́тꙋѧ хожда́хъ. ꙗ҆́кѡ лѧ̑двїѧ моѧ̑ напо́лнишасѧ порꙋга́нїй, и҆ нѣ́сть и҆сцѣле́нїѧ въ пло́ти мое́й. ѡ҆ѕло́бленъ бы́хъ, и҆ смири́хсѧ до ѕѣла̀: рыка́хъ ѿ воздыха́нїѧ се́рдца моегѡ̀. гдⷭ҇и, пред̾ тобо́ю всѐ жела́нїе моѐ, и҆ воздыха́нїе моѐ ѿ тебѐ не ᲂу҆таи́сѧ. се́рдце моѐ смѧте́сѧ, ѡ҆ста́ви мѧ̀ си́ла моѧ̀, и҆ свѣ́тъ ѻ҆́чїю моє́ю, и҆ то́й нѣ́сть со мно́ю. дрꙋ́зи моѝ и҆ и҆́скреннїи моѝ, прѧ́мѡ мнѣ̀ прибли́жишасѧ и҆ ста́ша. и҆ бли́жнїи моѝ ѿдале́че менѐ ста́ша, и҆ нꙋжда́хꙋсѧ и҆́щꙋщїи дꙋ́шꙋ мою̀, и҆ и҆́щꙋщїи ѕла̑ѧ мнѣ̀, глаго́лахꙋ сꙋ́єтнаѧ, и҆ льсти̑внымъ ве́сь де́нь поꙋча́хꙋсѧ. а҆́зъ же ꙗ҆́кѡ глꙋ́хъ не слы́шахъ, и҆ ꙗ҆́кѡ нѣ́мъ не ѿверза́ѧй ᲂу҆́стъ свои́хъ. и҆ бы́хъ ꙗ҆́кѡ человѣ́къ не слы́шай, и҆ не и҆мы́й во ᲂу҆стѣ́хъ свои́хъ ѡ҆бличе́нїѧ. ꙗ҆́кѡ на тѧ̀ гдⷭ҇и, ᲂу҆пова́хъ, ты̀ ᲂу҆слы́шиши гдⷭ҇и бж҃е мо́й. ꙗ҆́кѡ рѣ́хъ: да не когда̀ пора́дꙋютъ ми́ сѧ вразѝ моѝ, и҆ внегда̀ подвижа́тисѧ нога́мъ мои̑мъ, на мѧ̀ велерѣ́чеваша. ꙗ҆́кѡ а҆́зъ на ра̑ны гото́въ, и҆ болѣ́знь моѧ̀ предо мно́ю є҆́сть вы́нꙋ. ꙗ҆́кѡ беззако́нїе моѐ а҆́зъ возвѣщꙋ̀, и҆ попекꙋ́сѧ ѡ҆ грѣсѣ̀ мое́мъ. врази́ же моѝ живꙋ́тъ, и҆ ᲂу҆крѣпи́шасѧ па́че менѐ, и҆ ᲂу҆мно́жишасѧ ненави́дѧщїи мѧ̀ без̾ пра́вды. воздаю́щїи мѝ ѕла̑ѧ воз̾ блага̑ѧ, ѡ҆болга́хꙋ мѧ̀, занѐ гонѧ́хъ бл҃госты́ню. не ѡ҆ста́ви менѐ, гдⷭ҇и бж҃е мо́й, не ѿстꙋпѝ ѿ менѐ. вонмѝ въ по́мощь мою̀, гдⷭ҇и сп҃се́нїѧ моегѡ̀.
Не ѡ҆ста́ви менѐ, гдⷭ҇и бж҃е мо́й, не ѿстꙋпѝ ѿ менѐ. вонмѝ въ по́мощь мою̀, гдⷭ҇и сп҃се́нїѧ моегѡ̀.
Ѱало́мъ ѯ҃в.
Бж҃е бж҃е мо́й, къ тебѣ̀ ᲂу҆́треннюю: возжада̀ тебѐ дꙋша̀ моѧ̀, ко́ль мно́жицею тебѣ̀ пло́ть моѧ̀, въ землѝ пꙋ́стѣ, и҆ непрохо́днѣ, и҆ безво́днѣ. та́кѡ во ст҃ѣ́мъ ꙗ҆ви́хсѧ тебѣ̀, ви́дѣти си́лꙋ твою̀ и҆ сла́вꙋ твою̀. ꙗ҆́кѡ лꙋ́чши ми́лость твоѧ̀ па́че живѡ́тъ, ᲂу҆стнѣ̀ моѝ похвали́тѣ тѧ̀. та́кѡ бл҃гословлю́ тѧ въ животѣ̀ мое́мъ, ѡ҆ и҆́мени твое́мъ воздѣжꙋ̀ рꙋ́цѣ моѝ. ꙗ҆́кѡ ѿ тꙋ́ка и҆ ма́сти да и҆спо́лнитсѧ дꙋша̀ моѧ̀, и҆ ᲂу҆стна́ма ра́дости восхва́лѧтъ тѧ̀ ᲂу҆ста̀ моѧ̑. а҆́ще помина́хъ тѧ̀ на посте́ли мое́й, на ᲂу҆́треннихъ поꙋча́хꙋсѧ въ тѧ̀. ꙗ҆́кѡ бы́лъ є҆сѝ помо́щникъ мо́й, и҆ въ кро́вѣ крилꙋ̀ твоє́ю возра́дꙋюсѧ. прильпѐ дꙋша̀ моѧ̀ по тебѣ̀, мене́ же прїѧ́тъ десни́ца твоѧ̀. ті́и же всꙋ́е и҆ска́ша дꙋ́шꙋ мою̀, вни́дꙋтъ въ преиспѡ́днѧѧ землѝ: предадѧ́тсѧ въ рꙋ́ки ѻ҆рꙋ́жїѧ, ча̑сти ли́совѡмъ бꙋ́дꙋтъ. ца́рь же возвесели́тсѧ ѡ҆ бз҃ѣ, похва́литсѧ всѧ́къ клены́йсѧ и҆́мъ: ꙗ҆́кѡ загради́шасѧ ᲂу҆ста̀ глаго́лющихъ непра́вєднаѧ.
На ᲂу҆́треннихъ поꙋча́хсѧ въ тѧ̀, ꙗ҆́кѡ бы́лъ є҆сѝ помо́щникъ мо́й, и҆ въ кро́вѣ крилꙋ̀ твоє́ю возра́дꙋюсѧ.
Прильпѐ дꙋша̀ моѧ̀ по тебѣ̀, мене́ же прїѧ́тъ десни́ца твоѧ̀.
Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды, без̾ покло́нѡвъ. Гдⷭ҇и поми́лꙋй, три́жды: Сла́ва, и҆ ны́нѣ:
[Сщ҃е́нникъ же глаго́летъ мл҃твы ᲂу҆́трєннїѧ, стоѧ̀ непокрове́нъ пред̾ ст҃ы́ми две́рьми, та́йнѡ].
Ѱало́мъ п҃з.
Гдⷭ҇и бж҃е сп҃се́нїѧ моегѡ̀, во днѝ воззва́хъ, и҆ въ нощѝ пред̾ тобо́ю: да вни́детъ пред̾ тѧ̀ мл҃тва моѧ̀, приклонѝ ᲂу҆́хо твоѐ къ моле́нїю моемꙋ̀, ꙗ҆́кѡ и҆спо́лнисѧ ѕѡ́лъ дꙋша̀ моѧ̀, и҆ живо́тъ мо́й а҆́дꙋ прибли́жисѧ. привмѣне́нъ бы́хъ съ низходѧ́щими въ ро́въ, бы́хъ ꙗ҆́кѡ человѣ́къ без̾ по́мощи, въ ме́ртвыхъ свобо́дь: ꙗ҆́кѡ ꙗ҆́звеннїи спѧ́щїи во гро́бѣ, и҆́хже не помѧнꙋ́лъ є҆сѝ ктомꙋ̀, и҆ ті́и ѿ рꙋкѝ твоеѧ̀ ѿринове́ни бы́ша. положи́ша мѧ̀ въ ро́вѣ преиспо́днѣмъ, въ те́мныхъ и҆ сѣ́ни сме́ртнѣй. на мнѣ̀ ᲂу҆тверди́сѧ ꙗ҆́рость твоѧ̑, и҆ всѧ̑ во́лны твоѧ̑ наве́лъ є҆сѝ на мѧ̀. ᲂу҆да́лилъ є҆сѝ зна́емыхъ мои́хъ ѿ менѐ, положи́ша мѧ̀ ме́рзость себѣ̀, пре́данъ бы́хъ, и҆ не и҆схожда́хъ. ѻ҆́чи моѝ и҆знемого́стѣ ѿ нищеты̀, воззва́хъ къ тебѣ̀ гдⷭ҇и, ве́сь де́нь: воздѣ́хъ къ тебѣ̀ рꙋ́цѣ моѝ. є҆да̀ ме́ртвыми твори́ши чꙋдеса̀; и҆лѝ вра́чеве воскресѧ́тъ и҆ и҆сповѣ́дѧтсѧ тебѣ̀; є҆да̀ повѣ́сть кто̀ во гро́бѣ ми́лость твою̀, и҆ и҆́стинꙋ твою̀ въ поги́бели; є҆да̀ позна̑на бꙋ́дꙋтъ во тьмѣ̀ чꙋдеса̀ твоѧ̑, и҆ пра́вда твоѧ̀ въ землѝ забве́ннѣй; и҆ а҆́зъ къ тебѣ̀ гдⷭ҇и, воззва́хъ, и҆ ᲂу҆́трѡ мл҃тва моѧ̀ предвари́тъ тѧ̀. вскꙋ́ю гдⷭ҇и, ѿрѣ́еши дꙋ́шꙋ мою̀; ѿвраща́еши лицѐ твоѐ ѿ менѐ; Ни́щъ є҆́смь а҆́зъ, и҆ въ трꙋдѣ́хъ ѿ ю҆́ности моеѧ̀, возне́съ же сѧ, смири́хсѧ, и҆ и҆знемого́хъ. на мнѣ̀ преидо́ша гнѣ́ви твоѝ, ᲂу҆страшє́нїѧ твоѧ̑ возмꙋти́ша мѧ̀. ѡ҆быдо́ша мѧ̀ ꙗ҆́кѡ вода̀ ве́сь де́нь. ѡ҆держа́ша мѧ̀ вкꙋ́пѣ. ᲂу҆да́лилъ є҆сѝ ѿ менѐ дрꙋ́га и҆ и҆́скреннѧго, и҆ зна́емыхъ мои́хъ ѿ страсте́й.
Гдⷭ҇и бж҃е сп҃се́нїѧ моегѡ̀, во днѝ воззва́хъ, и҆ въ нощѝ пред̾ тобо́ю.
Да вни́детъ пред̾ тѧ̀ мл҃тва моѧ̀, приклонѝ ᲂу҆́хо твоѐ къ моле́нїю моемꙋ̀.
Ѱало́мъ р҃в.
Бл҃гословѝ дꙋшѐ моѧ̀ гдⷭ҇а и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀. бл҃гословѝ дꙋшѐ моѧ̀ гдⷭ҇а, и҆ не забыва́й всѣ́хъ воздаѧ́нїй є҆гѡ̀: ѡ҆чища́ющаго всѧ̑ беззакѡ́нїѧ твоѧ̑, и҆сцѣлѧ́ющаго всѧ̑ недꙋ́ги твоѧ̑: и҆збавлѧ́ющаго ѿ и҆стлѣ́нїѧ живо́тъ тво́й, вѣнча́ющаго тѧ̀ млⷭ҇тїю и҆ щедро́тами: и҆сполнѧ́ющаго во бл҃ги́хъ жела́нїе твоѐ: ѡ҆бнови́тсѧ ꙗ҆́кѡ ѻ҆́рлѧ ю҆́ность твоѧ̀. творѧ́й млⷭ҇тыни гдⷭ҇ь, и҆ сꙋдьбꙋ̀ всѣ̑мъ ѡ҆би̑димымъ. сказа̀ пꙋти̑ своѧ̑ мѡѷсе́ови, сыновѡ́мъ і҆и҃лєвымъ хотѣ̑нїѧ своѧ̑. ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ. не до конца̀ прогнѣ́ваетсѧ, нижѐ въ вѣ́къ враждꙋ́етъ. не по беззако́нїємъ на́шымъ сотвори́лъ є҆́сть на́мъ, нижѐ по грѣхѡ́мъ на́шымъ возда́лъ є҆́сть на́мъ. ꙗ҆́кѡ по высотѣ̀ нбⷭ҇нѣй ѿ землѝ, ᲂу҆тверди́лъ є҆́сть гдⷭ҇ь млⷭ҇ть свою̀ на боѧ́щихсѧ є҆гѡ̀. є҆ли́кѡ ѿстоѧ́тъ восто́цы ѿ за̑падъ, ᲂу҆да́лилъ є҆́сть ѿ на́съ беззакѡ́нїѧ на̑ша. ꙗ҆́коже ще́дритъ ѻ҆те́цъ сы́ны, ᲂу҆ще́дри гдⷭ҇ь боѧ́щихсѧ є҆гѡ̀. ꙗ҆́кѡ то́й позна̀ созда́нїе на́ше, помѧнꙋ̀, ꙗ҆́кѡ пе́рсть є҆смы̀. человѣ́къ, ꙗ҆́кѡ трава̀ дні́е є҆гѡ̀, ꙗ҆́кѡ цвѣ́тъ се́льный, та́кѡ ѡ҆цвѣте́тъ: ꙗ҆́кѡ дꙋ́хъ про́йде въ не́мъ, и҆ не бꙋ́детъ, и҆ не позна́етъ ктомꙋ̀ мѣ́ста своегѡ̀. млⷭ҇ть же гдⷭ҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀, и҆ пра́вда є҆гѡ̀ на сынѣ́хъ сынѡ́въ, хранѧ́щихъ завѣ́тъ є҆гѡ̀, и҆ по́мнѧщихъ за́пѡвѣди є҆гѡ̀, твори́ти ѧ҆̀. гдⷭ҇ь на нб҃сѝ ᲂу҆гото́ва прⷭ҇то́лъ сво́й, и҆ црⷭ҇тво є҆гѡ̀ всѣ́ми ѡ҆блада́етъ. бл҃гослови́те гдⷭ҇а всѝ а҆́гг҃ли є҆гѡ̀, си́льнїи крѣ́постїю, творѧ́щїи сло́во є҆гѡ̀, ᲂу҆слы́шати гла́съ слове́съ є҆гѡ̀. бл҃гослови́те гдⷭ҇а всѧ̑ си̑лы є҆гѡ̀, слꙋги̑ є҆гѡ̀, творѧ́щїи во́лю є҆гѡ̀. бл҃гослови́те гдⷭ҇а всѧ̑ дѣла̀ є҆гѡ̀. на всѧ́комъ мѣ́стѣ влⷣчествїѧ є҆гѡ̀, бл҃гословѝ дꙋшѐ моѧ̀ гдⷭ҇а.
На всѧ́комъ мѣ́стѣ влⷣчествїѧ є҆гѡ̀, бл҃гословѝ дꙋшѐ моѧ̀ гдⷭ҇а.
Ѱало́мъ рм҃в.
Гдⷭ҇и, ᲂу҆слы́ши мл҃твꙋ мою̀, внꙋшѝ моле́нїе моѐ во и҆́стинѣ твое́й, ᲂу҆слы́ши мѧ̀ въ пра́вдѣ твое́й: и҆ не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тсѧ пред̾ тобо́ю всѧ́къ живы́й. ꙗ҆́кѡ погна̀ вра́гъ дꙋ́шꙋ мою̀, смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ꙗ҆́кѡ мє́ртвыѧ вѣ́ка. и҆ ᲂу҆ны̀ во мнѣ̀ дꙋ́хъ мо́й, во мнѣ̀ смѧте́сѧ се́рдце моѐ. помѧнꙋ́хъ дни̑ дрє́внїѧ, поꙋчи́хсѧ во всѣ́хъ дѣ́лѣхъ твои́хъ, въ творе́нїихъ рꙋкꙋ̀ твоє́ю поꙋча́хсѧ. воздѣ́хъ къ тебѣ̀ рꙋ́цѣ моѝ, дꙋша̀ моѧ̀ ꙗ҆́кѡ землѧ̀ безво́днаѧ тебѣ̀. ско́рѡ ᲂу҆слы́ши мѧ̀ гдⷭ҇и, и҆счезѐ дꙋ́хъ мо́й: не ѿвратѝ лица̀ твоегѡ̀ ѿ менѐ, и҆ ᲂу҆подо́блюсѧ низходѧ́щымъ въ ро́въ. слы́шанꙋ сотворѝ мнѣ̀ заꙋ́тра млⷭ҇ть твою̀, ꙗ҆́кѡ на тѧ̀ ᲂу҆пова́хъ. скажѝ мнѣ̀ гдⷭ҇и, пꙋ́ть, во́ньже пойдꙋ̀, ꙗ҆́кѡ къ тебѣ̀ взѧ́хъ дꙋ́шꙋ мою̀. и҆зми́ мѧ ѿ вра̑гъ мои́хъ, гдⷭ҇и, къ тебѣ̀ прибѣго́хъ, наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й. дх҃ъ тво́й бл҃гі́й наста́витъ мѧ̀ на зе́млю пра́вꙋ. и҆́мене твоегѡ̀ ра́ди гдⷭ҇и, живи́ши мѧ̀, пра́вдою твое́ю и҆зведе́ши ѿ печа́ли дꙋ́шꙋ мою̀: и҆ млⷭ҇тїю твое́ю потреби́ши врагѝ моѧ̑, и҆ погꙋби́ши всѧ̑ стꙋжа́ющыѧ дꙋшѝ мое́й, ꙗ҆́кѡ а҆́зъ ра́бъ тво́й є҆́смь.
Оу҆слы́ши мѧ̀ гдⷭ҇и, въ пра́вдѣ твое́й, и҆ не вни́ди въ сꙋ́дъ съ рабо́мъ твои́мъ.
Оу҆слы́ши мѧ̀ гдⷭ҇и, въ пра́вдѣ твое́й, и҆ не вни́ди въ сꙋ́дъ съ рабо́мъ твои́мъ.
Дх҃ъ тво́й бл҃гі́й наста́витъ мѧ̀ на зе́млю пра́вꙋ.
Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. три́жды.
Та́же є҆ктенїа̀ глаго́летсѧ ѿ сщ҃е́нника. И҆ а҆́бїе пое́тсѧ во гла́съ тропарѧ̀, настоѧ́щагѡ днѐ ст҃а́гѡ:
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.
Сті́хъ а҃: И҆сповѣ́дайтесѧ гдⷭ҇еви. ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.
Сті́хъ в҃: Ѡ҆быше́дше ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ.
Сті́хъ г҃: Не ᲂу҆мрꙋ̀, но жи́въ бꙋ́дꙋ, и҆ повѣ́мъ дѣла̀ гдⷭ҇нѧ.
Сті́хъ д҃: Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла: ѿ гдⷭ҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ.
Та́же глаго́лемъ тропа́рь прилꙋчи́вшагѡсѧ пра́здника, и҆лѝ ст҃а́гѡ, и҆лѝ воскрⷭ҇ный прилꙋчи́вшагѡсѧ гла́са два́жды, и҆ бг҃оро́диченъ въ то́йже гла́съ. Пѣва́емꙋ же Бг҃ъ гдⷭ҇ь: ѿхо́дитъ канѡна́рхъ, и҆ стои́тъ посредѣ̀ хра́ма ѿкрове́нною главо́ю и҆ глаго́летъ ти́хѡ вышепи̑санныѧ стїхѝ: стои́тъ же та́мѡ, до́ндеже начнꙋ́тъ пѣвцы̀ бг҃оро́диченъ. Та́же покланѧ́етсѧ на не́мже стои́тъ мѣ́стѣ, и҆ ѡ҆бра́щьсѧ покланѧ́етсѧ къ ликѡ́мъ, и҆ ѿхо́дитъ: та́кѡ твори́тъ, и҆ є҆гда̀ є҆́сть а҆ллилꙋ́їа.
А҆́ще же є҆́сть а҆ллилꙋ́їа и҆лѝ вели́каѧ м҃-ца, вмѣ́стѡ Бг҃ъ гдⷭ҇ь, пое́мъ А҆ллилꙋ́їа, три́жды, во гла́съ ѻ҆смогла́сника.
Стїхи́ же глаго́лютсѧ сїѧ̑:
Сті́хъ а҃: Ѿ но́щи ᲂу҆́тренюетъ дꙋ́хъ мо́й къ тебѣ̀ бж҃е: занѐ свѣ́тъ повелѣ̑нїѧ твоѧ̑ на землѝ.
Сті́хъ в҃: Пра́вдѣ наꙋчи́тесѧ живꙋ́щїи на землѝ.
Сті́хъ г҃: За́висть прїи́метъ лю́ди ненака̑занныѧ.
Сті́хъ д҃: Приложѝ и҆̀мъ ѕла̀ гдⷭ҇и, приложѝ ѕла̀ сла̑внымъ землѝ.
И҆ а҆́бїе трⷪ҇чны гла́са, кі́йждо по є҆ди́нощи.
Пѣ̑сни трⷪ҇чны, гла́съ а҃.
Плотски́ми ѡ҆бразова́нїи безпло́тныхъ си́лъ къ мы́сленномꙋ и҆ невеще́ственномꙋ возводи́ми ᲂу҆мꙋ̀, и҆ трист҃о́ю пѣ́снїю трїѷпоста́снагѡ бж҃ества̀ прїе́млюще сїѧ́нїе, херꙋві́мски возопїи́мъ є҆ди́номꙋ бг҃ꙋ: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Со всѣ́ми нбⷭ҇ными си́лами: херꙋві́мски сꙋ́щемꙋ въ вы́шнихъ возопїи́мъ, трист҃ꙋ́ю возсыла́юще хвалꙋ̀: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ:
И҆ ны́нѣ: Воста́вше ѿ сна̀, припа́даемъ тѝ, бл҃же, и҆ а҆́гг҃льскꙋю пѣ́снь вопїе́мъ тѝ, си́льне: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.
Вѣ́домо бꙋ́ди, ꙗ҆́кѡ въ концѣ̀ си́хъ трⷪ҇чныхъ, глаго́лемъ си́це:
Въ понедѣ́льникъ: Предста́тельствы безпло́тныхъ твои́хъ поми́лꙋй на́съ.
Во вто́рникъ: Мл҃твами прⷣте́чи твоегѡ̀ поми́лꙋй на́съ.
Въ сре́дꙋ и҆ въ пѧто́къ: Си́лою крⷭ҇та̀ твоегѡ̀ сохранѝ на́съ гдⷭ҇и.
Въ четверто́къ: Мл҃твами ст҃ы́хъ а҆пⷭ҇лъ твои́хъ, и҆ ст҃и́телѧ нїкола́а поми́лꙋй на́съ.
А҆ ᲂу҆ про́чихъ двою̀ трⷪ҇чнѡвъ глаго́лати, ꙗ҆́коже въ конца́хъ и҆́хъ пи́сано є҆́сть.
Пѣ̑сни трⷪ҇чны, гла́съ в҃.
Вы̑шнїѧ си̑лы подража́юще на землѝ, побѣ́днꙋю пѣ́снь прино́симъ тѝ, бл҃же: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Несозда́нное є҆стество̀, всѣ́хъ зижди́телю, ᲂу҆стнѣ̀ на́ша ѿве́рзи, ꙗ҆́кѡ да возвѣсти́мъ хвалꙋ̀ твою̀ вопїю́ще: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Ѿ ѻ҆дра̀ и҆ сна̀ воздви́глъ мѧ̀ є҆сѝ, гдⷭ҇и, ᲂу҆́мъ мо́й просвѣтѝ и҆ се́рдце, и҆ ᲂу҆стнѣ̀ моѝ ѿве́рзи, во є҆́же пѣ́ти тѧ̀ ст҃а́ѧ трⷪ҇це: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.
Пѣ̑сни трⷪ҇чны, гла́съ г҃.
Трⷪ҇це є҆диносꙋ́щнаѧ и҆ нераздѣ́льнаѧ, є҆ди́нице трїѷпоста́снаѧ и҆ соприсносꙋ́щнаѧ, тебѣ̀ ꙗ҆́кѡ бг҃ꙋ а҆́гг҃льскꙋю пѣ́снь вопїе́мъ: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Ѻ҆ц҃а̀ безнача́льна, сн҃а собезнача́льна, дх҃а соприсносꙋ́щна, бж҃ество̀ є҆ди́но, херꙋві́мски славосло́вити дерза́юще, глаго́лемъ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Напра́снѡ сꙋдїѧ̀ прїи́детъ, и҆ коегѡ́ждо дѣѧ̑нїѧ ѡ҆бнажа́тсѧ, но стра́хомъ зове́мъ въ полꙋ́нощи: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны, гла́съ д҃.
Оу҆́мныхъ твои́хъ слꙋ́гъ, приноси́ти сме́ртнїи пѣ́снь дерза́юще, глаго́лемъ: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Ꙗ҆́кѡ чи́ни ны́нѣ а҆́гг҃льстїи на нб҃сѝ, и҆ стоѧ̑нїѧ стра́хомъ человѣ́чєскаѧ и҆ землѝ, побѣ́днꙋю пѣ́снь прино́симъ тѝ, бл҃же ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Безнача́льнаго твоего̀ ѻ҆ц҃а̀ и҆ тебѐ хрⷭ҇тѐ бж҃е, и҆ прест҃а́го твоего̀ дх҃а херꙋві́мски славосло́вити дерза́юще глаго́лемъ: ст҃ъ, ст҃ъ, ст҃ъ, є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны, гла́съ є҃:
Пѣ́нїю вре́мѧ и҆ мл҃твѣ ча́съ, прилѣ́жнѡ возопїи́мъ є҆ди́номꙋ бг҃ꙋ: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Ѡ҆бразова́ти дерза́юще ᲂу҆́мнаѧ твоѧ̑ вѡ́инства, трⷪ҇це безнача́льнаѧ, ᲂу҆сты̀ недосто́йными вопїе́мъ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: И҆́же въ ложесна̀ дв҃и́чєскаѧ вмѣсти́выйсѧ и҆ нѣ́дръ ѻ҆ч҃скихъ не разлꙋчи́выйсѧ, со а҆́гг҃лы и҆ на́съ хрⷭ҇тѐ бж҃е, прїимѝ вопїю́щихъ тѝ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны, гла́съ ѕ҃:
Предстоѧ́ще со стра́хомъ херꙋві́ми ᲂу҆жаса́ющесѧ съ тре́петомъ серафі́ми, трист҃ꙋ́ю пѣ́снь прино́сѧтъ немо́лчнымъ гла́сомъ. съ ни́миже и҆ мы̀ вопїе́мъ грѣ́шнїи: ст҃ъ, ст҃ъ, ст҃ъ є҆сѝ бж҃е на́шъ:
Сла́ва: Безпло́тными ᲂу҆сты̀, немо́лчными славослове́ньми, шестокри́льнїи вопїю́тъ тѝ трист҃ꙋ́ю пѣ́снь бж҃е на́шъ. и҆ мы̀ и҆́же на землѝ, недосто́йными ᲂу҆сты̀ хвалꙋ́ ти возсыла́емъ: ст҃ъ, ст҃ъ, ст҃ъ є҆сѝ бж҃е на́шъ мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Трⷪ҇чныѧ є҆ди́ницы бж҃ество̀ неслїѧ́ннымъ соедине́нїемъ сла́вимъ, и҆ а҆́гг҃льскꙋю пѣ́снь вопїе́мъ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны, гла́съ з҃:
Вы́шнею си́лою херꙋві́мски воспѣва́емый, и҆ бж҃е́ственною сла́вою а҆́гг҃льски покланѧ́емый, прїимѝ и҆ на́съ сꙋ́щихъ на землѝ, недосто́йными ᲂу҆стна́ми хвале́нїе тебѣ̀ возсыла́ющихъ: ст҃ъ, ст҃ъ ст҃ъ є҆сѝ бж҃е на́шъ.
Сла́ва: Ꙗ҆́кѡ со́нъ лѣ́ность ѿложи́вши, дꙋшѐ, и҆справле́нїе къ хвале́нїю покажѝ сꙋдїѝ, и҆ со стра́хомъ возопі́й: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Непристꙋ́пномꙋ бж҃ествꙋ̀, во є҆ди́ницѣ трⷪ҇цѣ, серафі́мскꙋю трист҃ꙋ́ю возсыла́юще хвалꙋ̀, со стра́хомъ возопїи́мъ: ст҃ъ, бг҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.
Пѣ̑сни трⷪ҇чны, гла́съ и҃:
На нб҃о сердца̀ и҆мꙋ́ще, а҆́гг҃льскїй подража́имъ чи́нъ, и҆ со стра́хомъ сꙋдїѝ припаде́мъ, побѣ́днꙋю взыва́юще хвалꙋ̀: ст҃ъ, ст҃ъ, ст҃ъ є҆сѝ бж҃е на́шъ.
Сла́ва: Зрѣ́ти тебѐ не смѣ́юще херꙋві́ми, летѧ́ще зовꙋ́тъ со восклица́нїемъ, бж҃е́ственнꙋю пѣ́снь трист҃а́гѡ гла́са, съ ни́миже и҆ мы̀ вопїе́мъ тѝ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.
И҆ ны́нѣ: Слѧца́еми мно́жествомъ прегрѣше́нїй на́шихъ, и҆ не смѣ́юще воззрѣ́ти на высотꙋ̀ нбⷭ҇нꙋю, дꙋ́шꙋ съ тѣ́ломъ прекло́ньше, со а҆́гг҃лы пѣ́снь вопїе́мъ тѝ: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.
Въ сꙋббѡ́тꙋ, а҆́ще вмѣ́стѡ Бг҃ъ гдⷭ҇ь, пое́мъ а҆ллилꙋ́їа, стїхи́ же глаго́лемъ сїѧ̑:
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.
Сті́хъ: И҆ па́мѧть и҆̀хъ въ ро́дъ и҆ ро́дъ.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Тропа́рь: Глꙋбино́ю мꙋ́дрости: Два́жды. Сла́ва, и҆ ны́нѣ, бг҃оро́диченъ.
Та́же стїхосло́вимъ ѱалти́рь и҆ сѣда́льны по чи́нꙋ и҆́хъ: и҆ пѧтьдесѧ́тый ѱало́мъ.
[А҆́ще ᲂу҆́бѡ є҆́сть недѣ́лѧ, и҆лѝ гдⷭ҇скїй пра́здникъ, и҆лѝ бг҃оро́диченъ, и҆лѝ пра́зднꙋетсѧ ст҃о́мꙋ, въ ни́хже пое́тсѧ полѷеле́й.
Полѷеле́й. Ѱало́мъ рл҃д.
Хвали́те и҆́мѧ гдⷭ҇не, хвали́те, рабѝ гдⷭ҇а. А҆ллилꙋ́їа, три́жды.
Стоѧ́щїи во хра́мѣ гдⷭ҇ни, во дво́рѣхъ до́мꙋ бг҃а на́шегѡ. хвали́те гдⷭ҇а, ꙗ҆́кѡ бла́гъ гдⷭ҇ь: по́йте и҆́мени є҆гѡ̀, ꙗ҆́кѡ добро̀: ꙗ҆́кѡ і҆а́кѡва и҆збра̀ себѣ̀ гдⷭ҇ь, і҆и҃лѧ въ достоѧ́нїе себѣ̀: ꙗ҆́кѡ а҆́зъ позна́хъ, ꙗ҆́кѡ ве́лїй гдⷭ҇ь, и҆ гдⷭ҇ь на́шъ над̾ всѣ́ми бо́ги: всѧ̑, є҆ли̑ка восхотѣ̀ гдⷭ҇ь, сотворѝ на нб҃сѝ и҆ на землѝ, въ морѧ́хъ и҆ во всѣ́хъ бе́зднахъ. возводѧ̀ ѻ҆́блаки ѿ послѣ́днихъ землѝ, мѡ́лнїи въ до́ждь сотворѝ, и҆зводѧ́й вѣ́тры ѿ сокро́вищъ свои́хъ. и҆́же поразѝ пе́рвенцы є҆гѵ́пєтскїѧ ѿ человѣ́ка до скота̀: посла̀ зна́мєнїѧ и҆ чꙋдеса̀ посредѣ̀ тебє̀, є҆гѵ́пте, на фараѡ́на и҆ на всѧ̑ рабы̑ є҆гѡ̀. и҆́же поразѝ ꙗ҆зы́ки мнѡ́ги и҆ и҆збѝ царѝ крѣ́пки: сиѡ́на царѧ̀ а҆морре́йска и҆ ѡ҆́га царѧ̀ васа́нска, и҆ всѧ̑ ца̑рствїѧ ханаа̑нска: и҆ дадѐ зе́млю и҆́хъ достоѧ́нїе, достоѧ́нїе і҆и҃лю лю́демъ свои̑мъ. гдⷭ҇и, и҆́мѧ твоѐ въ вѣ́къ, и҆ па́мѧть твоѧ̀ въ ро́дъ и҆ ро́дъ: ꙗ҆́кѡ сꙋди́ти и҆́мать гдⷭ҇ь лю́демъ свои̑мъ, и҆ ѡ҆ рабѣ́хъ свои́хъ ᲂу҆мо́литсѧ. і҆́дѡли ꙗ҆зы̑къ сребро̀ и҆ зла́то, дѣла̀ рꙋ́къ человѣ́ческихъ: ᲂу҆ста̀ и҆́мꙋтъ, и҆ не возглаго́лютъ: ѻ҆́чи и҆́мꙋтъ, и҆ не ᲂу҆́зрѧтъ: ᲂу҆́ши и҆́мꙋтъ, и҆ не ᲂу҆слы́шатъ: ниже́ бо є҆́сть дꙋ́хъ во ᲂу҆стѣ́хъ и҆́хъ. подо́бни и҆̀мъ да бꙋ́дꙋтъ творѧ́щїи ѧ҆̀ и҆ всѝ надѣ́ющїисѧ на нѧ̀. до́ме і҆и҃левъ, бл҃гослови́те гдⷭ҇а: до́ме а҆арѡ́нь, бл҃гослови́те гдⷭ҇а: до́ме леѵі́инъ, бл҃гослови́те гдⷭ҇а: боѧ́щїисѧ гдⷭ҇а, бл҃гослови́те гдⷭ҇а.
Бл҃гослове́нъ гдⷭ҇ь ѿ сїѡ́на, живы́й во і҆ерⷭ҇ли́мѣ. А҆ллилꙋ́їа, три́жды.
Ѱало́мъ рл҃є.
И҆сповѣ́дайтесѧ гдⷭ҇еви, ꙗ҆́кѡ бл҃гъ: ꙗ҆́кѡ въ вѣ́къ млⷭ҇ть є҆гѡ̀. А҆ллилꙋ́їа, три́жды.
И҆сповѣ́дайтесѧ бг҃ꙋ богѡ́въ: ꙗ҆́кѡ въ вѣ́къ млⷭ҇ть є҆гѡ̀. и҆сповѣ́дайтесѧ гдⷭ҇еви господе́й: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ чꙋдеса̀ вє́лїѧ є҆ди́номꙋ: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ небеса̀ ра́зꙋмомъ: ꙗ҆́кѡ въ вѣ́къ млⷭ҇ть є҆гѡ̀. ᲂу҆тверди́вшемꙋ зе́млю на вода́хъ: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ свѣти̑ла вє́лїѧ є҆ди́номꙋ: ꙗ҆́кѡ въ вѣ́къ млⷭ҇ть є҆гѡ̀: со́лнце во ѻ҆́бласть днѐ: ꙗ҆́кѡ въ вѣ́къ млⷭ҇ть є҆гѡ̀: лꙋнꙋ̀ и҆ ѕвѣ́зды во ѻ҆́бласть но́щи: ꙗ҆́кѡ въ вѣ́къ млⷭ҇ть є҆гѡ̀. порази́вшемꙋ є҆гѵ́пта съ пе́рвенцы є҆гѡ̀: ꙗ҆́кѡ въ вѣ́къ млⷭ҇ть є҆гѡ̀: и҆ и҆зве́дшемꙋ і҆и҃лѧ ѿ среды̀ и҆́хъ: ꙗ҆́кѡ въ вѣ́къ млⷭ҇ть є҆гѡ̀: рꙋко́ю крѣ́пкою и҆ мы́шцею высо́кою: ꙗ҆́кѡ въ вѣ́къ млⷭ҇ть є҆гѡ̀. раздѣ́льшемꙋ чермно́е мо́ре въ раздѣлє́нїѧ: ꙗ҆́кѡ въ вѣ́къ млⷭ҇ть є҆гѡ̀: и҆ прове́дшемꙋ і҆и҃лѧ посредѣ̀ є҆гѡ̀: ꙗ҆́кѡ въ вѣ́къ млⷭ҇ть є҆гѡ̀: и҆ и҆стрѧ́сшемꙋ фараѡ́на и҆ си́лꙋ є҆гѡ̀ въ мо́ре чермно́е: ꙗ҆́кѡ въ вѣ́къ млⷭ҇ть є҆гѡ̀. прове́дшемꙋ лю́ди своѧ̑ въ пꙋсты́ни: ꙗ҆́кѡ въ вѣ́къ млⷭ҇ть є҆гѡ̀. порази́вшемꙋ царѝ вє́лїѧ: ꙗ҆́кѡ въ вѣ́къ млⷭ҇ть є҆гѡ̀. и҆ ᲂу҆би́вшемꙋ царѝ крѣ̑пкїѧ: ꙗ҆́кѡ въ вѣ́къ млⷭ҇ть є҆гѡ̀: сиѡ́на царѧ̀ а҆морре́йска: ꙗ҆́кѡ въ вѣ́къ млⷭ҇ть є҆гѡ̀: и҆ ѡ҆́га царѧ̀ васа́нска: ꙗ҆́кѡ въ вѣ́къ млⷭ҇ть є҆гѡ̀. и҆ да́вшемꙋ зе́млю и҆́хъ достоѧ́нїе: ꙗ҆́кѡ въ вѣ́къ млⷭ҇ть є҆гѡ̀: достоѧ́нїе і҆и҃лю рабꙋ̀ своемꙋ̀: ꙗ҆́кѡ въ вѣ́къ млⷭ҇ть є҆гѡ̀. ꙗ҆́кѡ во смире́нїи на́шемъ помѧнꙋ́ ны гдⷭ҇ь: ꙗ҆́кѡ въ вѣ́къ млⷭ҇ть є҆гѡ̀. и҆ и҆зба́вилъ ны̀ є҆́сть ѿ врагѡ́въ на́шихъ: ꙗ҆́кѡ въ вѣ́къ млⷭ҇ть є҆гѡ̀: даѧ́й пи́щꙋ всѧ́кой пло́ти: ꙗ҆́кѡ въ вѣ́къ млⷭ҇ть є҆гѡ̀.
И҆сповѣ́дайтесѧ бг҃ꙋ нбⷭ҇номꙋ: ꙗ҆́кѡ въ вѣ́къ млⷭ҇ть є҆гѡ̀. А҆ллилꙋ́їа, три́жды.
[А҆́ще ᲂу҆́бѡ є҆́сть недѣ́лѧ блꙋ́днаго сы́на, и҆лѝ мѧсопꙋ́стнаѧ, и҆лѝ сыропꙋ́стнаѧ недѣ́лѧ припѣва́емъ же къ си̑мъ и҆ тре́тїй ѱало́мъ: На рѣка́хъ вавѷлѡ́нскихъ: со а҆ллилꙋ́їею кра́сною.
Ѱало́мъ рл҃ѕ.
На рѣка́хъ вавѷлѡ́нскихъ, та́мѡ сѣдо́хомъ и҆ пла́кахомъ, внегда̀ помѧнꙋ́ти на́мъ сїѡ́на: А҆ллилꙋ́їа. На ве́рбїихъ посредѣ̀ є҆гѡ̀ ѡ҆бѣ́сихомъ ѻ҆рга́ны на́шѧ. А҆ллилꙋ́їа. Ꙗ҆́кѡ та́мѡ вопроси́ша ны̀ плѣ́ншїи на́съ ѡ҆ словесѣ́хъ пѣ́сней, и҆ ве́дшїи на́съ ѡ҆ пѣ́нїи: А҆ллилꙋ́їа. Воспо́йте на́мъ ѿ пѣ́сней сїѡ́нскихъ. А҆ллилꙋ́їа. Ка́кѡ воспое́мъ пѣ́снь гдⷭ҇ню на землѝ чꙋжде́й; А҆ллилꙋ́їа. А҆́ще забꙋ́дꙋ тебѐ, і҆ерⷭ҇ли́ме, забве́на бꙋ́ди десни́ца моѧ̀. А҆ллилꙋ́їа. Прильпнѝ ѧ҆зы́къ мо́й горта́ни моемꙋ̀, а҆́ще не помѧнꙋ̀ тебє̀, а҆́ще не предложꙋ̀ і҆ерⷭ҇ли́ма, ꙗ҆́кѡ въ нача́лѣ весе́лїѧ моегѡ̀. А҆ллилꙋ́їа. Помѧнѝ, гдⷭ҇и, сы́ны є҆дѡ̑мскїѧ въ де́нь і҆ерⷭ҇ли́мль глаго́лющыѧ: и҆стоща́йте, и҆стоща́йте до ѡ҆снова́нїй є҆гѡ̀. А҆ллилꙋ́їа. Дщѝ вавѷлѡ́нѧ ѡ҆каѧ́ннаѧ, бл҃же́нъ, и҆́же возда́стъ тебѣ̀ воздаѧ́нїе твоѐ, є҆́же воздала̀ є҆сѝ на́мъ: А҆ллилꙋ́їа. Бл҃же́нъ, и҆́же и҆́метъ и҆ разбїе́тъ младе́нцы твоѧ̑ ѡ҆ ка́мень. А҆ллилꙋ́їа. ]
А҆́ще же прилꙋчи́тсѧ пра́здникъ гдⷭ҇скїй, и҆лѝ бг҃оро́диченъ, и҆лѝ пра́зднꙋетсѧ ст҃о́мꙋ, въ ни́хже пое́тсѧ полѷеле́й, та́же глаго́лемъ велича́нїе со и҆збра́нными стїхѝ ѱалмѡ́въ. А҆́ще ᲂу҆́бѡ є҆́сть недѣ́лѧ пое́мъ:
Тропарѝ воскре́сны, пое́мыѧ по непоро́чнахъ, въ недѣ́лѧхъ всегѡ̀ лѣ́та, гла́съ є҃.
На є҆ди́номъ ко́емждо тропарѣ̀ глаго́лемъ:
Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.
А҆́гг҃льскїй собо́ръ ᲂу҆диви́сѧ, / зрѧ̀ тебѐ въ ме́ртвыхъ вмѣни́вшасѧ, / сме́ртнꙋю же, сп҃се, крѣ́пость разори́вша, / и҆ съ собо́ю а҆да́ма воздви́гша, / и҆ ѿ а҆́да всѧ̑ свобо́ждша.
Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.
Почто̀ мѵ̑ра съ ми́лостивными слеза́ми, / ѽ ᲂу҆ч҃нцы, растворѧ́ете; / блиста́ѧйсѧ во гро́бѣ а҆́гг҃лъ мѷроно́сицамъ вѣща́ше: / ви́дите вы̀ гро́бъ и҆ ᲂу҆разꙋмѣ́йте, / сп҃съ бо воскр҃се ѿ гро́ба.
Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.
Ѕѣлѡ̀ ра́нѡ мѷронѡ́сицы теча́хꙋ / ко гро́бꙋ твоемꙋ̀ рыда́ющѧ, / но предста̀ къ ни̑мъ а҆́гг҃лъ и҆ речѐ: / рыда́нїѧ вре́мѧ преста̀, не пла́чите, / воскрⷭ҇нїе же а҆пⷭ҇лѡмъ рцы́те.
Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.
Мѷронѡ́сицы жєны̀, съ мѵ́ры прише́дшѧ / ко гро́бꙋ твоемꙋ̀, сп҃се, рыда́хꙋ, / а҆́гг҃лъ же къ ни̑мъ речѐ глаго́лѧ: / что̀ съ ме́ртвыми жива́го помышлѧ́ете; / ꙗ҆́кѡ бг҃ъ бо воскр҃се ѿ гро́ба.
Сла́ва: Поклони́мсѧ ѻ҆ц҃ꙋ̀ / и҆ є҆гѡ̀ сн҃ови, и҆ ст҃о́мꙋ дх҃ꙋ, / ст҃ѣ́й трⷪ҇цѣ во є҆ди́номъ сꙋществѣ̀, / съ серафі́мы зовꙋ́ще: / свѧ́тъ, свѧ́тъ, свѧ́тъ, є҆сѝ гдⷭ҇и.
И҆ ны́нѣ: Жизнода́вца ро́ждши, / грѣха̀, дв҃о, а҆да́ма и҆зба́вила є҆сѝ, / ра́дость же є҆́ѵѣ въ печа́ли мѣ́сто подала̀ є҆сѝ: / па́дшыѧ же ѿ жи́зни къ се́й напра́ви, / и҆з̾ тебѐ воплоти́выйсѧ бг҃ъ и҆ чл҃вѣ́къ.
А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.
По непоро́чнахъ, и҆ по Бл҃гослове́нъ є҆сѝ гдⷭ҇и:
Дїа́конъ: Па́ки и҆ па́ки:
Возглаша́етъ сщ҃е́нникъ: Ꙗ҆́кѡ бл҃гослови́сѧ и҆́мѧ твоѐ, и҆ просла́висѧ црⷭ҇тво твоѐ, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Ѵ҆пакоѝ. Степє́нны гла́са. А҆́ще же прилꙋчи́тсѧ пра́здникъ гдⷭ҇скїй, и҆лѝ бг҃оро́диченъ, и҆лѝ пра́зднꙋетсѧ ст҃о́мꙋ, пое́мъ:
Степє́нна, гла́съ д҃. А҆нтїфѡ́нъ а҃, и҆́хже стїхѝ повторѧ́юще пое́мъ:
Ѿ ю҆́ности моеѧ̀ / мно́зи бо́рютъ мѧ̀ стра̑сти, / но са́мъ мѧ̀ застꙋпѝ, / и҆ сп҃сѝ сп҃се мо́й.
Ненави́дѧщїи сїѡ́на, / посрами́тесѧ ѿ гдⷭ҇а, / ꙗ҆́кѡ трава́ бо ѻ҆гне́мъ / бꙋ́дете и҆зсо́хше.
Сла́ва: Ст҃ы́мъ дх҃омъ / всѧ́ка дꙋша̀ живи́тсѧ, / и҆ чистото́ю возвыша́етсѧ, / свѣтлѣ́етсѧ трⷪ҇ческимъ є҆ди́нствомъ сщ҃еннота́йнѣ.
И҆ ны́нѣ, то́йже.
Дїа́конъ: Во́нмемъ.
Сщ҃е́нникъ: Ми́ръ всѣ̑мъ.
Ли́къ: И҆ дх҃ови твоемꙋ̀.
Дїа́конъ: Премꙋ́дрость. И҆ прокі́менъ:
Прокі́мны воскрⷭ҇ны.
Прокі́менъ, гла́съ а҃: Ны́нѣ воскрⷭ҇нꙋ̀, глаго́летъ гдⷭ҇ь, / положꙋ́сѧ во сп҃се́нїе, не ѡ҆биню́сѧ ѡ҆ не́мъ. Сті́хъ: Словеса̀ гдⷭ҇нѧ, словеса̀ чи́ста.
Прокі́менъ, гла́съ в҃: Воста́ни гдⷭ҇и бж҃е мо́й повелѣ́нїемъ, и҆́мже заповѣ́далъ є҆сѝ, / и҆ со́нмъ люде́й ѡ҆бы́детъ тѧ̀. Сті́хъ: Гдⷭ҇и бж҃е мо́й, на тѧ̀ ᲂу҆пова́хъ, сп҃си́ мѧ.
Прокі́менъ, гла́съ г҃: Рцы́те во ꙗ҆зы́цѣхъ, ꙗ҆́кѡ гдⷭ҇ь воцр҃и́сѧ: / и҆́бо и҆спра́ви вселе́ннꙋю, ꙗ҆́же не подви́житсѧ. Сті́хъ: Воспо́йте гдⷭ҇еви пѣ́снь но́вꙋ, воспо́йте гдⷭ҇еви всѧ̀ землѧ̀.
Прокі́менъ, гла́съ д҃: Воскрⷭ҇нѝ гдⷭ҇и, помозѝ на́мъ, / и҆ и҆зба́ви на́съ и҆́мене твоегѡ̀ ра́ди. Сті́хъ: Бж҃е, ᲂу҆ши́ма на́шима ᲂу҆слы́шахомъ, и҆ ѻ҆тцы̀ на́ши возвѣсти́ша на́мъ.
Прокі́менъ, гла́съ є҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, / ꙗ҆́кѡ ты̀ црⷭ҇твꙋеши во вѣ́ки. Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Прокі́менъ, гла́съ ѕ҃: Гдⷭ҇и, воздви́гни си́лꙋ твою̀, / и҆ прїидѝ во є҆́же сп҃стѝ на́съ. Сті́хъ: Пасы́й і҆и҃лѧ вонмѝ, наставлѧ́ѧй ꙗ҆́кѡ ѻ҆вча̀ і҆ѡ́сифа.
Прокі́менъ, гла́съ з҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, / не забꙋ́ди ᲂу҆бо́гихъ твои́хъ до конца̀. Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Прокі́менъ, гла́съ и҃: Воцр҃и́тсѧ гдⷭ҇ь во вѣ́къ, / бг҃ъ тво́й, сїѡ́не, въ ро́дъ и҆ ро́дъ. Сті́хъ: Хвалѝ дꙋшѐ моѧ̀ гдⷭ҇а, восхвалю̀ гдⷭ҇а въ животѣ̀ мое́мъ.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Сщ҃е́нникъ возглаша́етъ: Ꙗ҆́кѡ свѧ́тъ є҆сѝ бж҃е на́шъ, и҆ во ст҃ы́хъ почива́еши, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Дїа́конъ, дрꙋгі́й прокі́менъ:
Всѧ́кое дыха́нїе / да хва́литъ гдⷭ҇а. Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆твержде́нїи си́лы є҆гѡ̀.
И҆ посе́мъ возглаша́етъ дїа́конъ: И҆ ѡ҆ сподо́битисѧ на́мъ слы́шанїю ст҃а́гѡ є҆ѵⷢ҇лїа гдⷭ҇а бг҃а мо́лимъ.
Ли́къ: Гдⷭ҇и поми́лꙋй, три́жды.
Дїа́конъ: Премꙋ́дрость, про́сти ᲂу҆слы́шимъ ст҃а́гѡ є҆ѵⷢ҇лїа.
И҆ сщ҃е́нникъ: Ми́ръ всѣ̑мъ.
Лю́дїе: И҆ дх҃ови твоемꙋ̀.
И҆ а҆́бїе: Ѿ ст҃а́гѡ є҆ѵⷢ҇лїа чте́нїе.
Ли́къ: Сла́ва тебѣ̀ гдⷭ҇и, сла́ва тебѣ̀.
Дїа́конъ: Во́нмемъ.
И҆ глаго́летъ сщ҃е́нникъ ᲂу҆́треннее є҆ѵⷢ҇лїе, а҆́ще слꙋчи́тсѧ недѣ́лѧ.
Ли́къ: Сла́ва тебѣ̀ гдⷭ҇и, сла́ва тебѣ̀.
По є҆ѵⷢ҇лїи, а҆́ще є҆́сть недѣ́лѧ, глаго́лемъ се́й тропа́рь.
Воскресе́нїе хрⷭ҇то́во ви́дѣвше, / поклони́мсѧ ст҃о́мꙋ гдⷭ҇ꙋ і҆и҃сꙋ, / є҆ди́номꙋ безгрѣ́шномꙋ. / крⷭ҇тꙋ̀ твоемꙋ̀ покланѧ́емсѧ хрⷭ҇тѐ, / и҆ ст҃о́е воскресе́нїе твоѐ пое́мъ и҆ сла́вимъ: / ты́ бо є҆сѝ бг҃ъ на́шъ, / ра́звѣ тебѐ и҆но́гѡ не зна́емъ, / и҆́мѧ твоѐ и҆менꙋ́емъ. / прїиди́те всѝ вѣ́рнїи, / поклони́мсѧ ст҃о́мꙋ хрⷭ҇то́вꙋ воскресе́нїю: / се́ бо прїи́де крⷭ҇то́мъ ра́дость всемꙋ̀ мі́рꙋ. / всегда̀ бл҃гословѧ́ще гдⷭ҇а, / пое́мъ воскресе́нїе є҆гѡ̀: / распѧ́тїе бо претерпѣ́въ, / сме́ртїю сме́рть разрꙋшѝ. ]
И҆ чте́цъ н҃-й ѱало́мъ.
Поми́лꙋй мѧ̀ бж҃е, по вели́цѣй ми́лости твое́й и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ, ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ. слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й. не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀. возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. и҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. ᲂу҆бл҃жѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.
[По н҃-мъ ѱалмѣ̀, а҆́ще є҆́сть недѣ́лѧ.
Сла́ва: Мл҃твами а҆пⷭ҇лѡвъ, / млⷭ҇тиве, ѡ҆чи́сти / мно́жєства согрѣше́нїй на́шихъ.
И҆ ны́нѣ: Мл҃твами бцⷣы, / млⷭ҇тиве, ѡ҆чи́сти / мно́жєства согрѣше́нїй на́шихъ.
Та́же, гла́съ ѕ҃: Поми́лꙋй мѧ̀, бж҃е, / по вели́цѣй млⷭ҇ти твое́й, / и҆ по мно́жествꙋ щедро́тъ твои́хъ, / ѡ҆чи́сти беззако́нїе моѐ.
Та́же: Воскр҃съ і҆и҃съ ѿ гро́ба, / ꙗ҆́коже проречѐ, / дадѐ на́мъ живо́тъ вѣ́чный, / и҆ ве́лїю млⷭ҇ть.
[А҆́ще ли недѣ́лѧ мытарѧ̀, и҆лѝ блꙋ́днагѡ, и҆лѝ мѧсопꙋ́стнаѧ, и҆ сыропꙋ́стнаѧ, и҆ въ про́чыѧ недѣ̑ли вели́кагѡ поста̀ вмѣ́стѡ, мл҃твами а҆пⷭ҇лъ: пое́мъ тропарѝ:
Сла́ва, гла́съ и҃: Покаѧ́нїѧ ѿве́рзи мѝ двє́ри жизнода́вче: / ᲂу҆́тренюетъ бо дх҃ъ мо́й ко хра́мꙋ ст҃о́мꙋ твоемꙋ̀, / хра́мъ носѧ́й тѣле́сный ве́сь ѡ҆скверне́нъ: / но ꙗ҆́кѡ ще́дръ ѡ҆чи́сти / бл҃гоꙋтро́бною твое́ю млⷭ҇тїю.
И҆ ны́нѣ, бг҃оро́диченъ: На сп҃се́нїѧ стєзѝ наста́ви мѧ̀, бцⷣе, / стꙋ́дными бо ѡ҆калѧ́хъ дꙋ́шꙋ грѣхмѝ, / и҆ въ лѣ́ности всѐ житїѐ моѐ и҆жди́хъ: / но твои́ми мл҃твами / и҆зба́ви мѧ̀ ѿ всѧ́кїѧ нечистоты̀.
Та́же, гла́съ ѕ҃: Поми́лꙋй мѧ̀, бж҃е, / по вели́цѣй млⷭ҇ти твое́й, / и҆ по мно́жествꙋ щедро́тъ твои́хъ, / ѡ҆чи́сти беззако́нїе моѐ.
Посе́мъ: Мно́жєства содѣ́ѧнныхъ мно́ю лю́тыхъ, помышлѧ́ѧ ѻ҆каѧ́нный, / трепе́щꙋ стра́шнагѡ днѐ сꙋ́днагѡ: / но надѣ́ѧсѧ на млⷭ҇ть бл҃гоꙋтро́бїѧ твоегѡ̀, / ꙗ҆́кѡ дв҃дъ вопїю́ тѝ: / поми́лꙋй мѧ̀, бж҃е, по вели́цѣй твое́й млⷭ҇ти. ]
Дїа́конъ: Спасѝ, бж҃е, лю́ди твоѧ̑:
Ли́къ: Гдⷭ҇и поми́лꙋй, в҃і.
Та́же глаго́летъ сщ҃е́нникъ возгла́снѡ: Ми́лостїю и҆ щедро́тами:
Ли́къ: А҆ми́нь. ]
И҆ а҆́бїе начина́емъ канѡ́ны со стїхосло́вїемъ.
На ѳ҃-й пѣ́сни пое́мъ пѣ́снь прест҃ы́ѧ бцⷣы:
Вели́читъ дꙋша̀ моѧ̀ гдⷭ҇а, и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ.
Къ коемꙋ́ждо стїхꙋ̀ припѣва́емъ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆бл҃жа́тъ мѧ̀ всѝ ро́ди.
Ꙗ҆́кѡ сотворѝ мнѣ̀ вели́чїе си́льный, и҆ ст҃о и҆́мѧ є҆гѡ̀, и҆ млⷭ҇ть є҆гѡ̀ въ ро́ды родѡ́въ боѧ́щымсѧ є҆гѡ̀.
Сотворѝ держа́вꙋ мы́шцею свое́ю, расточѝ гѡ́рдыѧ мы́слїю се́рдца и҆́хъ.
Низложѝ си̑льныѧ со престѡ́лъ, и҆ вознесѐ смирє́нныѧ: а҆́лчꙋщыѧ и҆спо́лни бла̑гъ, и҆ богатѧ́щыѧсѧ ѿпꙋстѝ тщы̀.
Воспрїѧ́тъ і҆и҃лѧ ѻ҆́трока своего̀, помѧнꙋ́ти млⷭ҇ти, ꙗ҆́коже глаго́ла ко ѻ҆тцє́мъ на́шымъ, а҆враа́мꙋ и҆ сѣ́мени є҆гѡ̀ да́же до вѣ́ка.
Та́же ѳ҃-ѧ пѣ́снь канѡ́на. А҆́ще ᲂу҆́бѡ нѣ́сть недѣ́лѧ, по і҆рмосѣ̀: Досто́йно є҆́сть: А҆́ще же є҆́сть недѣ́лѧ, и҆лѝ полѷеле́й пѣ́тъ, по катава́сїи є҆ктенїа̀:
Дїа́конъ: Свѧ́тъ гдⷭ҇ь бг҃ъ на́шъ.
Ли́къ: Свѧ́тъ гдⷭ҇ь бг҃ъ на́шъ.
Дїа́конъ: Ꙗ҆́кѡ свѧ́тъ гдⷭ҇ь бг҃ъ на́шъ.
Ли́къ: Свѧ́тъ гдⷭ҇ь бг҃ъ на́шъ.
Дїа́конъ: Над̾ всѣ́ми людьмѝ бг҃ъ на́шъ.
Ли́къ: Свѧ́тъ гдⷭ҇ь бг҃ъ на́шъ.
И҆ ᲂу҆́треннїй є҆ѯапостїла́рїй.
А҆́ще же є҆́сть четыредесѧ́тница, глаго́лемъ свѣти́льны въ прилꙋчи́вшїйсѧ гла́съ. А҆́ще же нѝ, є҆ѯапостїла́рїй днѐ, и҆ а҆́бїе хвали́тны. А҆́ще ᲂу҆́бѡ є҆́сть недѣ́лѧ, и҆лѝ влⷣчнїй пра́здникъ, и҆лѝ ст҃ы́й, и҆мѣ́ѧй вели́кое славосло́вїе, пое́тсѧ си́це, Всѧ́кое дыха́нїе, въ прилꙋчи́вшїйсѧ гла́съ:
Ли́къ: Всѧ́кое дыха́нїе да хва́литъ гдⷭ҇а. / хвали́те гдⷭ҇а съ нб҃съ, / хвали́те є҆го̀ въ вы́шнихъ. / тебѣ̀ подоба́етъ пѣ́снь бг҃ꙋ. / хвали́те є҆го̀ всѝ а҆́гг҃ли є҆гѡ̀, / хвали́те є҆го̀ всѧ̑ си̑лы є҆гѡ̀. / тебѣ̀ подоба́етъ пѣ́снь бг҃ꙋ.
Чте́цъ, ѱало́мъ рм҃и: Хвали́те є҆го̀ со́лнце и҆ лꙋна̀, хвали́те є҆го̀ всѧ̑ ѕвѣ́зды и҆ свѣ́тъ. Хвали́те є҆го̀ нб҃са̀ нб҃съ, и҆ вода̀ ꙗ҆́же превы́ше нб҃съ, да восхва́лѧтъ и҆́мѧ гдⷭ҇не. ꙗ҆́кѡ то́й речѐ, и҆ бы́ша: то́й повелѣ̀, и҆ созда́шасѧ. поста́ви ѧ҆̀ въ вѣ́къ, и҆ въ вѣ́къ вѣ́ка: повелѣ́нїе положѝ, и҆ не ми́мѡ и҆́детъ. хвали́те гдⷭ҇а ѿ землѝ ѕмі́евє, и҆ всѧ̑ бє́здны: ѻ҆́гнь, гра́дъ, снѣ́гъ, го́лоть, дꙋ́хъ бꙋ́ренъ, творѧ̑щаѧ сло́во є҆гѡ̀: го́ры и҆ всѝ хо́лми, древа̀ плодонѡ́сна, и҆ всѝ ке́дри: ѕвѣ́рїе и҆ всѝ ско́ти, га́ди и҆ пти̑цы перна̑ты: ца́рїе зе́мстїи, и҆ всѝ лю́дїе, кнѧ́зи, и҆ всѝ сꙋдїи̑ зе́мстїи: ю҆́нѡши и҆ дѣ̑вы, ста́рцы съ ю҆́нотами да восхва́лѧтъ и҆́мѧ гдⷭ҇не: ꙗ҆́кѡ вознесе́сѧ и҆́мѧ тогѡ̀ є҆ди́нагѡ. и҆сповѣ́данїе є҆гѡ̀ на землѝ и҆ на нб҃сѝ, и҆ вознесе́тъ ро́гъ люде́й свои́хъ. пѣ́снь всѣ̑мъ прпⷣбнымъ є҆гѡ̀, сыновѡ́мъ і҆и҃лєвымъ, лю́демъ приближа́ющымсѧ є҆мꙋ̀.
Ѱало́мъ рм҃ѳ: Воспо́йте гдⷭ҇еви пѣ́снь но́вꙋ, хвале́нїе є҆гѡ̀ въ цр҃кви прпⷣбныхъ. да возвесели́тсѧ і҆и҃ль ѡ҆ сотво́ршемъ є҆го̀, и҆ сы́нове сїѡ́ни возра́дꙋютсѧ ѡ҆ цр҃ѣ̀ свое́мъ: да восхва́лѧтъ и҆́мѧ є҆гѡ̀ въ ли́цѣ, въ тѷмпа́нѣ и҆ ѱалти́ри да пою́тъ є҆мꙋ̀. ꙗ҆́кѡ бл҃говоли́тъ гдⷭ҇ь въ лю́дехъ свои́хъ, и҆ вознесе́тъ крѡ́ткїѧ во сп҃се́нїе. восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. возношє́нїѧ бж҃їѧ въ горта́ни и҆́хъ, и҆ мечѝ ѻ҆бою́дꙋ ѻ҆стры̀ въ рꙋка́хъ и҆́хъ: сотвори́ти ѿмще́нїе во ꙗ҆зы́цѣхъ, ѡ҆бличє́нїѧ въ лю́дехъ: свѧза́ти царѝ и҆́хъ пꙋ́ты, и҆ сла̑вныѧ и҆́хъ рꙋчны́ми ѻ҆кѡ́вы желѣ́зными.
Ѿ здѣ̀ начина́емъ стїхи̑ры на ѕ҃: Сотвори́ти въ ни́хъ сꙋ́дъ напи́санъ: / сла́ва сїѧ̀ бꙋ́детъ всѣ̑мъ прпⷣбнымъ є҆гѡ̀.
Ѱало́мъ р҃н: Хвали́те бг҃а во ст҃ы́хъ є҆гѡ̀, / хвали́те є҆го̀ во ᲂу҆тверже́нїи си́лы є҆гѡ̀.
На д҃: Хвали́те є҆го̀ на си́лахъ є҆гѡ̀, / хвали́те є҆го̀ по мно́жествꙋ вели́чествїѧ є҆гѡ̀.
Хвали́те є҆го̀ во гла́сѣ трꙋ́бнѣмъ, / хвали́те є҆го̀ во ѱалти́ри и҆ гꙋ́слехъ.
На в҃: Хвали́те є҆го̀ въ тѷмпа́нѣ и҆ ли́цѣ, / хвали́те є҆го̀ во стрꙋ́нахъ и҆ ѻ҆рга́нѣ.
Хвали́те є҆го̀ въ кѷмва́лѣхъ доброгла́сныхъ. хвали́те є҆го̀ въ кѷмва́лѣхъ восклица́нїѧ. / всѧ́кое дыха́нїе да хва́литъ гдⷭ҇а.
[А҆́ще є҆́сть недѣ́лѧ:
Сті́хъ: Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, / не забꙋ́ди ᲂу҆бо́гихъ твои́хъ до конца̀.
Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, / повѣ́мъ всѧ̑ чꙋдеса̀ твоѧ̑. ]
По стїхи́рахъ, Сла́ва, стїхи́ра є҆ѵⷢ҇льскаѧ.
И҆ ны́нѣ, настоѧ́щїй бг҃оро́диченъ:
Ли́къ: Пребл҃гослове́нна є҆сѝ бцⷣе дв҃о, / вопло́щшимъ бо сѧ и҆з̾ тебѐ а҆́дъ плѣни́сѧ, / а҆да́мъ воззва́сѧ, / клѧ́тва потреби́сѧ, / є҆́ѵа свободи́сѧ, / сме́рть ᲂу҆мертви́сѧ, и҆ мы̀ ѡ҆жи́хомъ. / тѣ́мъ воспѣва́юще вопїе́мъ: / бл҃гослове́нъ хрⷭ҇то́съ бг҃ъ / бл҃говоли́вый та́кѡ, сла́ва тебѣ̀.
Сщ҃е́нникъ: Сла́ва тебѣ̀ показа́вшемꙋ на́мъ свѣ́тъ.
Славосло́вїе вели́кое.
Ли́къ: Сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. хва́лимъ тѧ̀, бл҃гослови́мъ тѧ̀, кла́нѧемъ ти сѧ, славосло́вимъ тѧ̀, бл҃годари́мъ тѧ̀ вели́кїѧ ра́ди сла́вы твоеѧ̀. гдⷭ҇и цр҃ю̀ нбⷭ҇ный, бж҃е ѻ҆́ч҃е вседержи́телю, гдⷭ҇и сн҃е є҆диноро́дный і҆и҃се хрⷭ҇тѐ, и҆ ст҃ы́й дш҃е. гдⷭ҇и бж҃е, а҆́гнче бж҃їй, сн҃е ѻ҆ч҃ь, взе́млѧй грѣ́хъ мі́ра, поми́лꙋй на́съ: взе́млѧй грѣхѝ мі́ра, прїимѝ мл҃твꙋ на́шꙋ: сѣдѧ́й ѡ҆деснꙋ́ю ѻ҆ц҃а̀, поми́лꙋй на́съ. ꙗ҆́кѡ ты̀ є҆сѝ є҆ди́нъ свѧ́тъ, ты̀ є҆сѝ є҆ди́нъ гдⷭ҇ь, і҆и҃съ хрⷭ҇то́съ, во сла́вꙋ бг҃а ѻ҆ц҃а̀, а҆ми́нь.
На всѧ́къ де́нь бл҃гословлю́ тѧ, и҆ восхвалю̀ и҆́мѧ твоѐ во вѣ́ки, и҆ въ вѣ́къ вѣ́ка.
Сподо́би гдⷭ҇и въ де́нь се́й без̾ грѣха̀ сохрани́тисѧ на́мъ. бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки, а҆ми́нь.
Бꙋ́ди гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀.
Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ. Три́жды.
Гдⷭ҇и, прибѣ́жище бы́лъ є҆сѝ на́мъ въ ро́дъ и҆ ро́дъ. а҆́зъ рѣ́хъ: гдⷭ҇и, поми́лꙋй мѧ̀, и҆сцѣлѝ дꙋ́шꙋ мою̀, ꙗ҆́кѡ согрѣши́хъ тебѣ̀.
Гдⷭ҇и, къ тебѣ̀ прибѣго́хъ, наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й: ꙗ҆́кѡ ᲂу҆ тебѐ и҆сто́чникъ живота̀, во свѣ́тѣ твое́мъ ᲂу҆́зримъ свѣ́тъ. проба́ви млⷭ҇ть твою̀ вѣ́дꙋщымъ тѧ̀.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Ст҃ы́й безсме́ртный, поми́лꙋй на́съ.
Та́же высоча́йшимъ гла́сомъ: Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ.
И҆ по сконча́нїи славосло́вїѧ, не глаго́летъ сщ҃е́нникъ: Ꙗ҆́кѡ твоѐ є҆́сть црⷭ҇тво: ꙗ҆́коже мно́зи глаго́лютъ: но а҆́бїе по концѣ̀ трист҃а́гѡ, глаго́лемъ ѿпꙋсти́тельный слꙋчи́вшїйсѧ, и҆ бг҃оро́диченъ.
[А҆́ще же є҆́сть недѣ́лѧ, глаго́лемъ тропа́рь воскрⷭ҇ный. Во гла́съ а҃, г҃, є҃ и҆ з҃, глаго́лемъ се́й:
Дне́сь сп҃се́нїе мі́рꙋ бы́сть, / пое́мъ воскре́сшемꙋ и҆з̾ гро́ба, / и҆ нача́льникꙋ жи́зни на́шеѧ: / разрꙋши́въ бо сме́ртїю сме́рть, / побѣ́дꙋ дадѐ на́мъ и҆ ве́лїю млⷭ҇ть.
Во гла́съ же в҃, д҃, ѕ҃ и҆ и҃, глаго́лемъ се́й:
Воскре́съ и҆з̾ гро́ба, и҆ ᲂу҆́зы растерза́лъ є҆сѝ а҆́да, / разрꙋши́лъ є҆сѝ ѡ҆сꙋжде́нїе сме́рти гдⷭ҇и, / всѧ̑ ѿ сѣте́й врага̀ и҆зба́вивый: / ꙗ҆ви́вый же себѐ а҆пⷭ҇лѡмъ твои̑мъ, / посла́лъ є҆сѝ ѧ҆̀ на про́повѣдь, / и҆ тѣ́ми ми́ръ тво́й по́далъ є҆сѝ вселе́ннѣй, / є҆ди́не многомлⷭ҇тиве. ]
Е҆ктенїа̀ сꙋгꙋ́баѧ.
Дїа́конъ: Поми́лꙋй на́съ, бж҃е:
Возглаша́етъ і҆ере́й: Ꙗ҆́кѡ ми́лостивъ и҆ чл҃вѣколю́бецъ бг҃ъ є҆сѝ:
Ли́къ: А҆ми́нь.
Е҆ктенїа̀ проси́тєльнаѧ.
Дїа́конъ: И҆спо́лнимъ ᲂу҆́треннюю моли́твꙋ на́шꙋ:
Возглаша́етъ і҆ере́й: Ꙗ҆́кѡ бг҃ъ ми́лости, щедро́тъ и҆ чл҃вѣколю́бїѧ є҆сѝ:
Ли́къ: А҆ми́нь.
І҆ере́й: Ми́ръ всѣ̑мъ.
Лю́дїе: И҆ дх҃ови твоемꙋ̀.
Дїа́конъ: Главы̑ на́шѧ гдⷭ҇ви прикло́нимъ.
Ли́къ: Тебѣ̀, гдⷭ҇и.
И҆ сщ҃е́нникъ возглаша́етъ: Твое́ бо є҆́сть, є҆́же ми́ловати и҆ спаса́ти ны̀:
Ли́къ: А҆ми́нь.
Дїа́конъ: Премꙋ́дрость.
Ли́къ: Бл҃гословѝ.
Сщ҃е́нникъ: Сы́й блгⷭ҇ве́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь. Оу҆твердѝ бж҃е, / ст҃ꙋ́ю правосла́внꙋю вѣ́рꙋ, правосла́вныхъ хрⷭ҇тїа́нъ, / во вѣ́къ вѣ́ка.
Сщ҃е́нникъ: Прест҃а́ѧ бцⷣе, спасѝ на́съ.
Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.
Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.
Сщ҃е́нникъ твори́тъ ѿпꙋ́стъ.
Въ недѣ́лю: Воскресы́й и҆з̾ ме́ртвыхъ хрⷭ҇то́съ и҆́стинный бг҃ъ на́шъ, моли́твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лѡвъ, и҆ ст҃а́гѡ [(имя:gen), є҆гѡ́же є҆́сть хра́мъ, и҆ є҆гѡ́же є҆́сть де́нь], ст҃ы́хъ пра́ведныхъ бг҃оѻц҃ъ і҆ѡакі́ма и҆ а҆́нны, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бла́гъ и҆ чл҃вѣколю́бецъ.
Та́же ли́къ многолѣ́тїе:
Вели́каго господи́на и҆ ѻ҆тца̀ на́шего ,_ / ст҃ѣ́йшаго патрїа́рха моско́вскаго и҆ всеѧ̀ рꙋсѝ, / и҆ господи́на на́шего преѡсвѧще́нѣйшего ,_ / митрополі́та [и҆лѝ_ а҆рхїепⷭ҇кпа, и҆лѝ є҆пⷭ҇кпа _є҆гѡ́же є҆́сть ѡ҆бласть], / бг҃охрани́мꙋю странꙋ̀ на́шꙋ рѡссі́йскꙋю, / настоѧ́телѧ, бра́тїю и҆ прихо́жанъ ст҃а́гѡ храма сегѡ̀, / и҆ всѧ̑ правосла́вныѧ хрⷭ҇тїа́ны, / гдⷭ҇и, сохранѝ и҆̀хъ на мно́гаѧ лѣ̑та.
И҆ чте́цъ глаго́летъ ча́съ а҃-й.
А҆́ще же де́нь не и҆мѣ́ѧй славосло́вїѧ вели́кагѡ, глаго́летъ ᲂу҆чине́нный бра́тъ: Хвали́те гдⷭ҇а съ нб҃съ. Тебѣ̀ подоба́етъ пѣ́снь бг҃ꙋ. Хвали́те гдⷭ҇а съ нб҃съ, хвали́те є҆го̀ въ вы́шнихъ. Тебѣ̀ подоба́етъ пѣ́снь бг҃ꙋ. Хвали́те є҆го̀ всѝ а҆́гг҃ли є҆гѡ̀, хвали́те є҆го̀ всѧ̑ си̑лы є҆гѡ̀. Тебѣ̀ подоба́етъ пѣ́снь бг҃ꙋ.
Хвали́те є҆го̀ со́лнце и҆ лꙋна̀: зрѝ преждеречє́нный ѱало́мъ рм҃и.
А҆́ще же є҆́сть четыредесѧ́тница, и҆лѝ и҆́нъ де́нь, не и҆мѣ́ѧй славосло́вїѧ вели́кагѡ: по хвали́техъ, Сла́ва, и҆ ны́нѣ, глаго́летъ ᲂу҆чине́нный бра́тъ:
Тебѣ̀ сла́ва подоба́етъ, гдⷭ҇и бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Сла́ва тебѣ̀ показа́вшемꙋ на́мъ свѣ́тъ.
Славосло́вїе вседне́вное.
Сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. хва́лимъ тѧ̀, бл҃гослови́мъ тѧ̀, кла́нѧемъ ти сѧ, славосло́вимъ тѧ̀, бл҃годари́мъ тѧ̀, вели́кїѧ ра́ди сла́вы твоеѧ̀. гдⷭ҇и цр҃ю̀ нбⷭ҇ный, бж҃е ѻ҆́ч҃е вседержи́телю, гдⷭ҇и сн҃е є҆диноро́дный, і҆и҃се хрⷭ҇тѐ, и҆ ст҃ы́й дш҃е. гдⷭ҇и бж҃е, а҆́гнче бж҃їй, сн҃е ѻ҆ч҃ь, взе́млѧй грѣ́хъ мі́ра, поми́лꙋй на́съ: взе́млѧй грѣхѝ мі́ра, прїимѝ мл҃твꙋ на́шꙋ: сѣдѧ́й ѡ҆деснꙋ́ю ѻ҆ц҃а̀, поми́лꙋй на́съ. ꙗ҆́кѡ ты̀ є҆сѝ є҆ди́нъ ст҃ъ, ты̀ є҆сѝ є҆ди́нъ гдⷭ҇ь, і҆и҃съ хрⷭ҇то́съ, во сла́вꙋ бг҃а ѻ҆ц҃а̀, а҆ми́нь.
На всѧ́къ де́нь бл҃гословлю́ тѧ, и҆ восхвалю̀ и҆́мѧ твоѐ во вѣ́ки, и҆ въ вѣ́къ вѣ́ка.
Гдⷭ҇и, прибѣ́жище бы́лъ є҆сѝ на́мъ въ ро́дъ и҆ ро́дъ. а҆́зъ рѣ́хъ: гдⷭ҇и, поми́лꙋй мѧ̀, и҆сцѣлѝ дꙋ́шꙋ мою̀, ꙗ҆́кѡ согрѣши́хъ тебѣ̀. гдⷭ҇и, къ тебѣ̀ прибѣго́хъ, наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й: ꙗ҆́кѡ ᲂу҆ тебѐ и҆сто́чникъ живота̀, во свѣ́тѣ твое́мъ ᲂу҆́зримъ свѣ́тъ. проба́ви млⷭ҇ть твою̀ вѣ́дꙋщымъ тѧ̀.
Та́же: Сподо́би гдⷭ҇и, въ де́нь се́й без̾ грѣха̀ сохрани́тисѧ на́мъ. бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки, а҆ми́нь.
Бꙋ́ди гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ. бл҃гослове́нъ є҆сѝ влⷣко, вразꙋми́ мѧ ѡ҆правда́нїємъ твои̑мъ. бл҃гослове́нъ є҆сѝ ст҃ы́й, просвѣти́ мѧ ѡ҆правда́нїи твои́ми.
Гдⷭ҇и, млⷭ҇ть твоѧ̀ во вѣ́къ, дѣ́лъ рꙋкꙋ̀ твоє́ю не пре́зри: тебѣ̀ подоба́етъ хвала̀, тебѣ̀ подоба́етъ пѣ́нїе, тебѣ̀ сла́ва подоба́етъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Сщ҃е́нникъ: И҆спо́лнимъ ᲂу҆́треннюю мл҃твꙋ на́шꙋ гдⷭ҇еви.
И҆ по возгла́сѣ ли́къ: А҆ми́нь.
І҆ере́й: Ми́ръ всѣ̑мъ.
Лю́дїе: И҆ дх҃ови твоемꙋ̀.
Дїа́конъ: Главы̑ на́шѧ гдⷭ҇ви прикло́нимъ.
Ли́къ: Тебѣ̀, гдⷭ҇и.
Та́же ѻ҆смогла́сника стїхи̑ры, а҆́ще нѣ́сть влⷣчнїй пра́здникъ.
Сті́хъ а҃: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑ въ нѧ́же смири́лъ ны̀ є҆сѝ, лѣ̑та въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, / и҆ наста́ви сы́ны и҆́хъ.
Сті́хъ в҃: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, / и҆ дѣ́ло рꙋ́къ на́шихъ и҆спра́ви.
Сла́ва, и҆ ны́нѣ: а҆́ще и҆́мать.
Та́же: Бл҃го є҆́сть и҆сповѣ́датисѧ гдⷭ҇еви, и҆ пѣ́ти и҆́мени твоемꙋ̀, вы́шнїй: возвѣща́ти заꙋ́тра млⷭ҇ть твою̀, и҆ и҆́стинꙋ твою̀ на всѧ́кꙋ но́щь.
Трист҃о́е. По Ѻ҆́ч҃е на́шъ: Сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ мы̀: А҆ми́нь. Тропа́рь днѐ. Сла́ва, и҆ ны́нѣ, бг҃оро́диченъ.
Сщ҃е́нникъ є҆ктенїю̀: Поми́лꙋй на́съ, бж҃е: И҆ прѡ́чаѧ.
И҆ по возгла́сѣ дїа́конъ: Премꙋ́дрость.
Ли́къ: Бл҃гословѝ.
Сщ҃е́нникъ: Сы́й блгⷭ҇ве́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь. Оу҆твердѝ бж҃е, / ст҃ꙋ́ю правосла́внꙋю вѣ́рꙋ, правосла́вныхъ хрⷭ҇тїа́нъ, / во вѣ́къ вѣ́ка.
Сщ҃е́нникъ: Прест҃а́ѧ бцⷣе, спасѝ на́съ.
Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.
Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.
А҆́ще є҆́сть недѣ́лѧ, и҆лѝ и҆мѣ́ѧй вели́кое славосло́вїе, сщ҃е́нникъ твори́тъ ѿпꙋ́стъ, и҆ начина́етъ пе́рвый ча́съ.
А҆́ще є҆́сть четыредесѧ́тница:
Бл҃го є҆́сть и҆сповѣ́датисѧ гдⷭ҇еви, и҆ пѣ́ти и҆́мени твоемꙋ̀, вы́шнїй: возвѣща́ти заꙋ́тра млⷭ҇ть твою̀, и҆ и҆́стинꙋ твою̀ на всѧ́кꙋ но́щь. Два́жды.
Трист҃о́е. По Ѻ҆́ч҃е на́шъ: Сщ҃е́нникъ: Ꙗ҆́кѡ твоѐ є҆́сть црⷭ҇тво:
Мы́ же глаго́лемъ: А҆ми́нь. Въ хра́мѣ стоѧ́ще сла́вы твоеѧ̀, на нб҃сѝ стоѧ́ти мни́мъ, бцⷣе, две́рь нбⷭ҇наѧ, ѿве́рзи на́мъ двє́ри млⷭ҇ти твоеѧ̀.
Та́же, Гдⷭ҇и поми́лꙋй, м҃. Сла́ва, и҆ ны́нѣ:
Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
И҆́менемъ гдⷭ҇нимъ бл҃гословѝ, ѻ҆́тче.
Сщ҃е́нникъ: Сы́й бл҃гослове́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
И҆ мы̀ глаго́лемъ: Нбⷭ҇ный цр҃ю̀, вѣ́рꙋ ᲂу҆твердѝ, ꙗ҆зы́ки ᲂу҆кротѝ, мі́ръ ᲂу҆мирѝ, ст҃ы́й хра́мъ се́й [ст҃ꙋ́ю ѻ҆би́тель сїю̀] до́брѣ сохранѝ: пре́жде ѿше́дшыѧ ѻ҆тцы̀ и҆ бра́тїю на́шꙋ въ селе́нїихъ пра́ведныхъ ᲂу҆чинѝ, и҆ на́съ въ покаѧ́нїи и҆ и҆сповѣ́данїи прїимѝ, ꙗ҆́кѡ бл҃гі́й и҆ человѣколю́бецъ.
Посе́мъ покло́ны вели̑кїѧ трѝ, глаго́люще въ ни́хъ на ко́емждо покло́нѣ мл҃твꙋ прпⷣбнагѡ є҆фре́ма:
Гдⷭ҇и и҆ влⷣко живота̀ моегѡ̀, дꙋ́хъ пра́здности, ᲂу҆ны́нїѧ, любонача́лїѧ и҆ праздносло́вїѧ не да́ждь мѝ. Покло́нъ.
Дꙋ́хъ же цѣломꙋ́дрїѧ, смиреномꙋ́дрїѧ, терпѣ́нїѧ и҆ любвѐ, да́рꙋй мѝ рабꙋ̀ твоемꙋ̀. Покло́нъ.
Е҆́й гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нїѧ, и҆ не ѡ҆сꙋжда́ти бра́та моегѡ̀: ꙗ҆́кѡ бл҃гослове́нъ є҆сѝ во вѣ́ки вѣкѡ́въ. Покло́нъ.
Та́же ма́лыхъ в҃і, глаго́люще на кі́йждо покло́нъ: Бж҃е, ѡ҆чи́сти мѧ̀ грѣ́шнаго.
И҆ па́ки послѣдѝ мл҃твꙋ всю̀: Гдⷭ҇и и҆ влⷣко живота̀ моегѡ̀: и҆ покло́нъ є҆ди́нъ вели́кїй.
И҆ по є҆́же воста́ти на́мъ, начина́етъ предстоѧ́тель пе́рвый ча́съ.