Бж҃е́ственнаѧ лїтꙋргі́а преждеѡсщ҃е́нныхъ

Великопостное последование вечерни и причащения ранее освящёнными Святыми Дарами.

Лїтꙋргі́а ѡ҆глаше́нныхъ.

Дїа́конъ, ста́въ на ѻ҆бы́чномъ мѣ́стѣ, возглаша́етъ: Бл҃гословѝ, влⷣко.

Сщ҃е́нникъ возгла́снѡ глаго́летъ: Бл҃гослове́но црⷭ҇тво ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Чте́ц: Прїиди́те, поклони́мсѧ цр҃е́ви на́шемꙋ бг҃ꙋ. Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ. Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.

И҆ глаго́летъ предначина́тельный ѱало́мъ, р҃г:

Бл҃гословѝ дꙋшѐ моѧ̀ гдⷭ҇а: гдⷭ҇и бж҃е мо́й, возвели́чилсѧ є҆сѝ ѕѣлѡ̀, во и҆сповѣ́данїе и҆ въ велелѣ́потꙋ ѡ҆бле́клсѧ є҆сѝ. ѡ҆дѣѧ́йсѧ свѣ́томъ ꙗ҆́кѡ ри́зою, простира́ѧй нб҃о ꙗ҆́кѡ ко́жꙋ. покрыва́ѧй вода́ми превы́спрєннѧѧ своѧ̑, полага́ѧй ѻ҆́блаки на восхожде́нїе своѐ, ходѧ́й на крилꙋ̀ вѣ́трєню. творѧ́й а҆́гг҃лы своѧ̑ дꙋ́хи и҆ слꙋги̑ своѧ̑ пла́мень ѻ҆́гненный. ѡ҆снова́ѧй зе́млю на тве́рди є҆ѧ̀, не преклони́тсѧ въ вѣ́къ вѣ́ка. бе́здна, ꙗ҆́кѡ ри́за ѡ҆дѣѧ́нїе є҆ѧ̀, на гора́хъ ста́нꙋтъ во́ды. ѿ запреще́нїѧ твоегѡ̀ побѣ́гнꙋтъ, ѿ гла́са гро́ма твоегѡ̀ ᲂу҆боѧ́тсѧ. восхо́дѧтъ го́ры, и҆ низхо́дѧтъ полѧ̀ въ мѣ́сто, є҆́же ѡ҆снова́лъ є҆сѝ и҆̀мъ. предѣ́лъ положи́лъ є҆сѝ, є҆гѡ́же не пре́йдꙋтъ, нижѐ ѡ҆братѧ́тсѧ покры́ти зе́млю. посыла́ѧй и҆сто́чники въ де́брѣхъ, посредѣ̀ го́ръ про́йдꙋтъ во́ды. напаѧ́ютъ всѧ̑ ѕвѣ́ри сє́льныѧ, ждꙋ́тъ ѻ҆на́гри въ жа́ждꙋ свою̀. на ты́хъ пти̑цы нбⷭ҇ныѧ привита́ютъ, ѿ среды̀ ка́менїѧ дадѧ́тъ гла́съ. напаѧ́ѧй го́ры ѿ превы́спреннихъ свои́хъ, ѿ плода̀ дѣ́лъ твои́хъ насы́титсѧ землѧ̀. прозѧба́ѧй травꙋ̀ скотѡ́мъ, и҆ ѕла́къ на слꙋ́жбꙋ человѣ́кѡмъ, и҆звестѝ хлѣ́бъ ѿ землѝ. и҆ вїно̀ весели́тъ се́рдце человѣ́ка, ᲂу҆ма́стити лицѐ є҆ле́емъ, и҆ хлѣ́бъ се́рдце человѣ́ка ᲂу҆крѣпи́тъ. насы́тѧтсѧ древа̀ польска̑ѧ, ке́дри лїва́нстїи, и҆̀хже є҆сѝ насади́лъ. та́мѡ пти̑цы вогнѣздѧ́тсѧ: є҆рѡді́ево жили́ще предводи́тельствꙋетъ и҆́ми. го́ры высѡ́кїѧ є҆ле́нємъ, ка́мень прибѣ́жище за́ѧцємъ. сотвори́лъ є҆́сть лꙋнꙋ̀ во времена̀, со́лнце позна̀ за́падъ сво́й. положи́лъ є҆сѝ тьмꙋ̀, и҆ бы́сть но́щь, въ не́йже про́йдꙋтъ всѝ ѕвѣ́рїе дꙋбра́внїи: скѵ́мни рыка́ющїи восхи́тити, и҆ взыска́ти ѿ бг҃а пи́щꙋ себѣ̀. возсїѧ̀ со́лнце, и҆ собра́шасѧ, и҆ въ ло́жахъ свои́хъ лѧ́гꙋтъ. и҆зы́детъ человѣ́къ на дѣ́ло своѐ, и҆ на дѣ́ланїе своѐ до ве́чера. ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ: и҆спо́лнисѧ землѧ̀ тва́ри твоеѧ̀. сїѐ мо́ре вели́кое и҆ простра́нное, та́мѡ га́ди, и҆́хже нѣ́сть числа̀, живѡ́тнаѧ ма̑лаѧ съ вели́кими. та́мѡ кораблѝ препла́ваютъ, ѕмі́й се́й, є҆го́же созда́лъ є҆сѝ рꙋга́тисѧ є҆мꙋ̀. всѧ̑ къ тебѣ̀ ча́ютъ, да́ти пи́щꙋ и҆̀мъ во бла́го вре́мѧ. да́вшꙋ тебѣ̀ и҆̀мъ, соберꙋ́тъ: ѿве́рзшꙋ тебѣ̀ рꙋ́кꙋ, всѧ́чєскаѧ и҆спо́лнѧтсѧ бл҃гости. ѿвра́щшꙋ же тебѣ̀ лицѐ возмѧтꙋ́тсѧ: ѿи́меши дꙋ́хъ и҆́хъ, и҆ и҆сче́знꙋтъ, и҆ въ пе́рсть свою̀ возвратѧ́тсѧ. по́слеши дх҃а твоего̀, и҆ сози́ждꙋтсѧ, и҆ ѡ҆бнови́ши лицѐ землѝ. бꙋ́ди сла́ва гдⷭ҇нѧ во вѣ́ки, возвесели́тсѧ гдⷭ҇ь ѡ҆ дѣ́лѣхъ свои́хъ: призира́ѧй на зе́млю, и҆ творѧ́й ю҆̀ трѧсти́сѧ: прикаса́ѧйсѧ гора́мъ, и҆ дымѧ́тсѧ. воспою̀ гдⷭ҇еви въ животѣ̀ мое́мъ: пою̀ бг҃ꙋ моемꙋ̀, до́ндеже є҆́смь. да ᲂу҆слади́тсѧ є҆мꙋ̀ бесѣ́да моѧ̀, а҆́зъ же возвеселю́сѧ ѡ҆ гдⷭ҇ѣ. да и҆сче́знꙋтъ грѣ̑шницы ѿ землѝ, и҆ беззакѡ́нницы, ꙗ҆́коже не бы́ти и҆̀мъ: бл҃гословѝ дꙋшѐ моѧ̀ гдⷭ҇а.

Со́лнце позна̀ за́падъ сво́й: положи́лъ є҆сѝ тьмꙋ̀ и҆ бы́сть но́щь. ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

Е҆ктенїа̀ вели́каѧ.

Дїа́конъ: Ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й, и҆ соедине́нїи всѣ́хъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ вели́комъ господи́нѣ и҆ ѻ҆ц҃ѣ̀ на́шемъ, свѧтѣ́йшемъ патрїа́рхѣ , и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ] , честнѣ́мъ пресвѵ́терствѣ, во хрⷭ҇тѣ̀ дїа́конствѣ, ѡ҆ все́мъ при́чтѣ и҆ лю́дехъ, гдⷭ҇ꙋ помо́лимсѧ.

Ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ гра́дѣ се́мъ [и҆лѝ ѡ҆ ве́си се́й, и҆лѝ ѡ҆ ст҃ѣ́й ѻ҆би́тели се́й], всѧ́комъ гра́дѣ, странѣ̀, и҆ вѣ́рою живꙋ́щихъ въ ни́хъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ бл҃горастворе́нїи воздꙋ́хѡвъ, ѡ҆ и҆з̾ѻби́лїи плодѡ́въ земны́хъ, и҆ вре́менѣхъ ми́рныхъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ пла́вающихъ, пꙋтеше́ствꙋющихъ, недꙋ́гꙋющихъ, стра́ждꙋщихъ, плѣне́нныхъ, и҆ ѡ҆ спасе́нїи и҆́хъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Ли́къ: Тебѣ̀, гдⷭ҇и.

Возгла́с: Ꙗ҆́кѡ подоба́етъ тебѣ̀ всѧ́каѧ сла́ва, че́сть, и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Наче́ншꙋсѧ же стїхосло́вїю, ѿхо́дитъ сщ҃е́нникъ во ст҃о́е предложе́нїе: и҆ взе́мъ преждеѡсщ҃е́нный хлѣ́бъ ѿ хлѣбоно́сца, полага́етъ и҆̀ со бл҃гоговѣ́нїемъ мно́гимъ во ст҃ы́й ді́скосъ, вложи́въ во ст҃ꙋ́ю ча́шꙋ вїно̀ и҆ во́дꙋ ѻ҆бы́чнѡ, ничто́же глаго́лѧ. И҆ взе́мъ кади́льницꙋ, кади́тъ ѕвѣзди́цꙋ и҆ покро́вы: и҆ покры́въ ѧ҆̀.

Каѳі́сма и҃і. Ѱало́мъ рѳ҃і.

Чте́ц: Ко гдⷭ҇ꙋ, внегда̀ скорбѣ́ти мѝ, воззва́хъ, и҆ ᲂу҆слы́ша мѧ̀. Гдⷭ҇и, и҆зба́ви дꙋ́шꙋ мою̀ ѿ ᲂу҆сте́нъ непра́ведныхъ и҆ ѿ ѧ҆зы́ка льсти́ва. Что̀ да́стсѧ тебѣ̀, и҆лѝ что̀ приложи́тсѧ тебѣ̀ къ ѧ҆зы́кꙋ льсти́вꙋ; Стрѣ́лы си́льнагѡ и҆з̾ѡщрє́ны, со ᲂу҆́гльми пꙋсты́нными. Оу҆вы̀ мнѣ̀, ꙗ҆́кѡ прише́льствїе моѐ продолжи́сѧ, всели́хсѧ съ селє́нїи кида́рскими: Мно́гѡ прише́льствова дꙋша̀ моѧ̀: съ ненави́дѧщими ми́ра бѣ́хъ ми́ренъ: Е҆гда̀ глаго́лахъ и҆̀мъ, борѧ́хꙋ мѧ̀ тꙋ́не.

Ѱало́мъ р҃к.

Возведо́хъ ѻ҆́чи моѝ въ го́ры, ѿню́дꙋже прїи́детъ по́мощь моѧ̀. По́мощь моѧ̀ ѿ гдⷭ҇а, сотво́ршагѡ не́бо и҆ зе́млю. Не да́ждь во смѧте́нїе ногѝ твоеѧ̀, нижѐ воздре́млетъ хранѧ́й тѧ̀: Сѐ, не воздре́млетъ, нижѐ ᲂу҆́снетъ хранѧ́й і҆и҃лѧ. Гдⷭ҇ь сохрани́тъ тѧ̀, гдⷭ҇ь покро́въ тво́й на рꙋ́кꙋ деснꙋ́ю твою̀. Во днѝ со́лнце не ѡ҆жже́тъ тебѐ, нижѐ лꙋна̀ но́щїю. Гдⷭ҇ь сохрани́тъ тѧ̀ ѿ всѧ́кагѡ ѕла̀, сохрани́тъ дꙋ́шꙋ твою̀ гдⷭ҇ь: Гдⷭ҇ь сохрани́тъ вхожде́нїе твоѐ и҆ и҆схожде́нїе твоѐ, ѿ ны́нѣ и҆ до вѣ́ка.

Ѱало́мъ рк҃а.

Возвесели́хсѧ ѡ҆ ре́кшихъ мнѣ̀: въ до́мъ гдⷭ҇ень по́йдемъ. Стоѧ́ще бѧ́хꙋ но́ги на́шѧ во дво́рѣхъ твои́хъ, і҆ерⷭ҇ли́ме. І҆ерⷭ҇ли́мъ зи́ждемый ꙗ҆́кѡ гра́дъ, є҆мꙋ́же прича́стїе є҆гѡ̀ вкꙋ́пѣ. Та́мѡ бо взыдо́ша кѡлѣ́на, кѡлѣ́на гдⷭ҇нѧ, свидѣ́нїе і҆и҃лево, и҆сповѣ́датисѧ и҆́мени гдⷭ҇ню: Ꙗ҆́кѡ та́мѡ сѣдо́ша престо́ли на сꙋ́дъ, престо́ли въ домꙋ̀ дв҃довѣ. Вопроси́те же ꙗ҆̀же ѡ҆ ми́рѣ і҆ерⷭ҇ли́ма: и҆ ѻ҆би́лїе лю́бѧщымъ тѧ̀. Бꙋ́ди же ми́ръ въ си́лѣ твое́й, и҆ ѻ҆би́лїе въ столпостѣна́хъ твои́хъ. Ра́ди бра́тїй мои́хъ и҆ бли́жнихъ мои́хъ глаго́лахъ ᲂу҆́бѡ ми́ръ ѡ҆ тебѣ̀. До́мꙋ ра́ди гдⷭ҇а бг҃а на́шегѡ взыска́хъ бл҃га̑ѧ тебѣ̀.

Ѱало́мъ рк҃в.

Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. Сѐ, ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀. Поми́лꙋй на́съ, гдⷭ҇и, поми́лꙋй на́съ, ꙗ҆́кѡ помно́гꙋ и҆спо́лнихомсѧ ᲂу҆ничиже́нїѧ: Наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.

Ѱало́мъ рк҃г.

Ꙗ҆́кѡ а҆́ще не гдⷭ҇ь бы бы́лъ въ на́съ, да рече́тъ ᲂу҆́бѡ і҆и҃ль: Ꙗ҆́кѡ а҆́ще не гдⷭ҇ь бы бы́лъ въ на́съ, внегда̀ воста́ти человѣ́кѡмъ на ны̀, ᲂу҆̀бо живы́хъ поже́рли бы́ша на́съ: Внегда̀ прогнѣ́ватисѧ ꙗ҆́рости и҆́хъ на ны̀, ᲂу҆̀бо вода̀ потопи́ла бы на́съ. Пото́къ пре́йде дꙋша̀ на́ша: Оу҆̀бо пре́йде дꙋша̀ на́ша во́дꙋ непостоѧ́ннꙋю. Бл҃гослове́нъ гдⷭ҇ь, и҆́же не дадѐ на́съ въ лови́твꙋ зꙋбѡ́мъ и҆́хъ. Дꙋша̀ на́ша ꙗ҆́кѡ пти́ца и҆зба́висѧ ѿ сѣ́ти ловѧ́щихъ: сѣ́ть сокрꙋши́сѧ, и҆ мы̀ и҆зба́влени бы́хомъ. По́мощь на́ша во и҆́мѧ гдⷭ҇а, сотво́ршагѡ не́бо и҆ зе́млю.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

Е҆ктенїа̀ ма́лаѧ.

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Ли́къ: Тебѣ̀, гдⷭ҇и.

Моли́тва пе́рвагѡ а҆нтїфѡ́на.

І҆ере́й: Гдⷭ҇и ще́дрый и҆ ми́лостивый, долготерпѣли́ве и҆ многоми́лостиве, внꙋшѝ моли́твꙋ на́шꙋ и҆ вонмѝ гла́сꙋ моле́нїѧ на́шегѡ, сотворѝ съ на́ми зна́менїе во бла́го: наста́ви на́съ на пꙋ́ть тво́й, є҆́же ходи́ти во и҆́стинѣ твое́й: возвеселѝ сердца̀ на̑ша, во є҆́же боѧ́тисѧ и҆́мене твоегѡ̀ ст҃а́гѡ: занѐ ве́лїй є҆сѝ ты̀ и҆ творѧ́й чꙋдеса̀, ты̀ є҆сѝ бг҃ъ є҆ди́нъ, и҆ нѣ́сть подо́бенъ тебѣ̀ въ бозѣ́хъ, гдⷭ҇и: си́ленъ въ ми́лости, и҆ бл҃гъ въ крѣ́пости, во є҆́же помога́ти, и҆ ᲂу҆тѣша́ти, и҆ спаса́ти всѧ̑ ᲂу҆пова́ющыѧ во и҆́мѧ ст҃о́е твоѐ.

Возгла́съ: Ꙗ҆́кѡ твоѧ̀ держа́ва, и҆ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Ѱало́мъ рк҃д.

Чте́ц: Надѣ́ющїисѧ на гдⷭ҇а, ꙗ҆́кѡ гора̀ сїѡ́нъ: не подви́житсѧ въ вѣ́къ живы́й во і҆ерⷭ҇ли́мѣ. Го́ры ѡ҆́крестъ є҆гѡ̀, и҆ гдⷭ҇ь ѡ҆́крестъ люде́й свои́хъ, ѿ ны́нѣ и҆ до вѣ́ка. Ꙗ҆́кѡ не ѡ҆ста́витъ гдⷭ҇ь жезла̀ грѣ́шныхъ на жре́бїй првⷣныхъ, ꙗ҆́кѡ да не про́стрꙋтъ првⷣнїи въ беззакѡ́нїѧ рꙋ́къ свои́хъ. Оу҆бл҃жѝ, гдⷭ҇и, бл҃гі̑ѧ и҆ пра̑выѧ се́рдцемъ. Оу҆клонѧ́ющыѧсѧ же въ развращє́нїѧ ѿведе́тъ гдⷭ҇ь съ дѣ́лающими беззако́нїе: ми́ръ на і҆и҃лѧ.

Ѱало́мъ рк҃є.

Внегда̀ возврати́ти гдⷭ҇ꙋ плѣ́нъ сїѡ́нь, бы́хомъ ꙗ҆́кѡ ᲂу҆тѣ́шени. Тогда̀ и҆спо́лнишасѧ ра́дости ᲂу҆ста̀ на̑ша, и҆ ѧ҆зы́къ на́шъ весе́лїѧ: тогда̀ рекꙋ́тъ во ꙗ҆зы́цѣхъ: возвели́чилъ є҆́сть гдⷭ҇ь сотвори́ти съ ни́ми. Возвели́чилъ є҆́сть гдⷭ҇ь сотвори́ти съ на́ми: бы́хомъ веселѧ́щесѧ. Возвратѝ, гдⷭ҇и, плѣне́нїе на́ше, ꙗ҆́кѡ пото́ки ю҆́гомъ. Сѣ́ющїи слеза́ми, ра́достїю по́жнꙋтъ. Ходѧ́щїи хожда́хꙋ и҆ пла́кахꙋсѧ, мета́юще сѣ́мена своѧ̑: грѧдꙋ́ще же прїи́дꙋтъ ра́достїю, взе́млюще рꙋкоѧ̑ти своѧ̑.

Ѱало́мъ рк҃ѕ.

А҆́ще не гдⷭ҇ь сози́ждетъ до́мъ, всꙋ́е трꙋди́шасѧ зи́ждꙋщїи: а҆́ще не гдⷭ҇ь сохрани́тъ гра́дъ, всꙋ́е бдѣ̀ стрегі́й. Всꙋ́е ва́мъ є҆́сть ᲂу҆́треневати: воста́нете по сѣдѣ́нїи ꙗ҆дꙋ́щїи хлѣ́бъ болѣ́зни, є҆гда̀ да́стъ возлю́блєннымъ свои̑мъ со́нъ. Сѐ, достоѧ́нїе гдⷭ҇не сы́нове, мзда̀ плода̀ чре́внѧгѡ. Ꙗ҆́кѡ стрѣ́лы въ рꙋцѣ̀ си́льнагѡ, та́кѡ сы́нове ѿтрѧсе́нныхъ. Бл҃же́нъ, и҆́же и҆спо́лнитъ жела́нїе своѐ ѿ ни́хъ: не постыдѧ́тсѧ, є҆гда̀ глаго́лютъ врагѡ́мъ свои̑мъ во вратѣ́хъ.

Ѱало́мъ рк҃з.

Бл҃же́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀: Трꙋды̀ плодѡ́въ твои́хъ снѣ́си: бл҃же́нъ є҆сѝ, и҆ добро̀ тебѣ̀ бꙋ́детъ. Жена̀ твоѧ̀ ꙗ҆́кѡ лоза̀ плодови́та въ страна́хъ до́мꙋ твоегѡ̀: Сы́нове твоѝ ꙗ҆́кѡ новосаждє́нїѧ ма̑сличнаѧ ѡ҆́крестъ трапе́зы твоеѧ̀. Сѐ, та́кѡ бл҃гослови́тсѧ человѣ́къ боѧ́йсѧ гдⷭ҇а. Бл҃гослови́тъ тѧ̀ гдⷭ҇ь ѿ сїѡ́на, и҆ ᲂу҆́зриши бл҃га̑ѧ і҆ерⷭ҇ли́ма всѧ̑ дни̑ живота̀ твоегѡ̀, И҆ ᲂу҆́зриши сы́ны сынѡ́въ твои́хъ: ми́ръ на і҆и҃лѧ.

Ѱало́мъ рк҃и.

Мно́жицею бра́шасѧ со мно́ю ѿ ю҆́ности моеѧ̀, да рече́тъ ᲂу҆́бѡ і҆и҃ль: Мно́жицею бра́шасѧ со мно́ю ѿ ю҆́ности моеѧ̀, и҆́бо не премого́ша мѧ̀. На хребтѣ̀ мое́мъ дѣ́лаша грѣ̑шницы, продолжи́ша беззако́нїе своѐ. Гдⷭ҇ь првⷣнъ ссѣчѐ вы̑ѧ грѣ́шникѡвъ. Да постыдѧ́тсѧ и҆ возвратѧ́тсѧ вспѧ́ть всѝ ненави́дѧщїи сїѡ́на: Да бꙋ́дꙋтъ ꙗ҆́кѡ трава̀ на здѣ́хъ, ꙗ҆́же пре́жде восторже́нїѧ и҆́зсше: Е҆́юже не и҆спо́лни рꙋкѝ своеѧ̀ жнѧ́й, и҆ нѣ́дра своегѡ̀ рꙋкоѧ̑ти собира́ѧй: И҆ не рѣ́ша мимоходѧ́щїи: бл҃гослове́нїе гдⷭ҇не на вы̀, бл҃гослови́хомъ вы̀ во и҆́мѧ гдⷭ҇не.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

Е҆ктенїа̀ ма́лаѧ.

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Ли́къ: Тебѣ̀, гдⷭ҇и.

Моли́тва втора́гѡ а҆нтїфѡ́на.

І҆ере́й: Гдⷭ҇и, да не ꙗ҆́ростїю твое́ю ѡ҆бличи́ши на́съ, нижѐ гнѣ́вомъ твои́мъ нака́жеши на́съ: но сотворѝ съ на́ми по млⷭ҇ти твое́й, врачꙋ̀ и҆ и҆сцѣли́телю дꙋ́шъ на́шихъ, наставлѧ́ѧ на́съ ко приста́нищꙋ хотѣ́нїѧ твоегѡ̀: просвѣтѝ ѻ҆́чи серде́цъ на́шихъ въ позна́нїе твоеѧ̀ и҆́стины: и҆ да́рꙋй на́мъ про́чее настоѧ́щагѡ днѐ ми́рное и҆ безгрѣ́шное, и҆ всѐ вре́мѧ живота̀ на́шегѡ, мл҃твами ст҃ы́ѧ бцⷣы и҆ всѣ́хъ ст҃ы́хъ твои́хъ.

Возгла́съ: Ꙗ҆́кѡ бл҃гъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Ѱало́мъ рк҃ѳ.

И҆з̾ глꙋбины̀ воззва́хъ къ тебѣ̀, гдⷭ҇и: гдⷭ҇и, ᲂу҆слы́ши гла́съ мо́й. Да бꙋ́дꙋтъ ᲂу҆́ши твоѝ вне́млющѣ гла́сꙋ моле́нїѧ моегѡ̀. А҆́ще беззакѡ́нїѧ на́зриши, гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебє̀ ѡ҆чище́нїе є҆́сть. И҆́мене ра́ди твоегѡ̀ потерпѣ́хъ тѧ̀, гдⷭ҇и, потерпѣ̀ дꙋша̀ моѧ̀ въ сло́во твоѐ: ᲂу҆пова̀ дꙋша̀ моѧ̀ на гдⷭ҇а. Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

Ѱало́мъ р҃л.

Гдⷭ҇и, не вознесе́сѧ се́рдце моѐ, нижѐ вознесо́стѣсѧ ѻ҆́чи моѝ: нижѐ ходи́хъ въ вели́кихъ, нижѐ въ ди́вныхъ па́че менѐ. А҆́ще не смиреномꙋ́дрствовахъ, но вознесо́хъ дꙋ́шꙋ мою̀, ꙗ҆́кѡ ѿдое́ное на ма́терь свою̀, та́кѡ возда́си на дꙋ́шꙋ мою̀. Да ᲂу҆пова́етъ і҆и҃ль на гдⷭ҇а ѿ ны́нѣ и҆ до вѣ́ка.

Ѱало́мъ рл҃а.

Помѧнѝ, гдⷭ҇и, дв҃да и҆ всю̀ кро́тость є҆гѡ̀: Ꙗ҆́кѡ клѧ́тсѧ гдⷭ҇еви, ѡ҆бѣща́сѧ бг҃ꙋ і҆а́кѡвлю: А҆́ще вни́дꙋ въ селе́нїе до́мꙋ моегѡ̀, и҆лѝ взы́дꙋ на ѻ҆́дръ посте́ли моеѧ̀: А҆́ще да́мъ со́нъ ѻ҆чи́ма мои́ма, и҆ вѣ́ждома мои́ма дрема́нїе, и҆ поко́й скранїа́ма мои́ма: До́ндеже ѡ҆брѧ́щꙋ мѣ́сто гдⷭ҇еви, селе́нїе бг҃ꙋ і҆а́кѡвлю. Сѐ, слы́шахомъ ѧ҆̀ во є҆ѵфра́ѳѣ, ѡ҆брѣто́хомъ ѧ҆̀ въ полѧ́хъ дꙋбра́вы: Вни́демъ въ селє́нїѧ є҆гѡ̀, поклони́мсѧ на мѣ́сто, и҆дѣ́же стоѧ́стѣ но́зѣ є҆гѡ̀. Воскрⷭ҇нѝ, гдⷭ҇и, въ поко́й тво́й, ты̀ и҆ кївѡ́тъ ст҃ы́ни твоеѧ̀. Сщ҃е́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ. Дв҃да ра́ди раба̀ твоегѡ̀, не ѿвратѝ лицѐ пома́заннагѡ твоегѡ̀. Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀: ѿ плода̀ чре́ва твоегѡ̀ посаждꙋ̀ на престо́лѣ твое́мъ. А҆́ще сохранѧ́тъ сы́нове твоѝ завѣ́тъ мо́й и҆ свидѣ̑нїѧ моѧ̑ сїѧ̑, и҆̀мже наꙋчꙋ̀ ѧ҆̀, и҆ сы́нове и҆́хъ до вѣ́ка сѧ́дꙋтъ на престо́лѣ твое́мъ. Ꙗ҆́кѡ и҆збра̀ гдⷭ҇ь сїѡ́на, и҆зво́ли и҆̀ въ жили́ще себѣ̀. Се́й поко́й мо́й во вѣ́къ вѣ́ка, здѣ̀ вселю́сѧ, ꙗ҆́кѡ и҆зво́лихъ и҆̀. Лови́твꙋ є҆гѡ̀ бл҃гословлѧ́ѧй бл҃гословлю̀, ни́щыѧ є҆гѡ̀ насы́щꙋ хлѣ́бы: Сщ҃е́нники є҆гѡ̀ ѡ҆блекꙋ̀ во сп҃се́нїе, и҆ прпⷣбнїи є҆гѡ̀ ра́достїю возра́дꙋютсѧ. Та́мѡ возращꙋ̀ ро́гъ дв҃дови, ᲂу҆гото́вахъ свѣти́льникъ пома́занномꙋ моемꙋ̀. Врагѝ є҆гѡ̀ ѡ҆блекꙋ̀ стꙋдо́мъ, на не́мъ же процвѣте́тъ ст҃ы́нѧ моѧ̀.

Ѱало́мъ рл҃в.

Сѐ, что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; Ꙗ҆́кѡ мѵ́ро на главѣ̀, сходѧ́щее на брадꙋ̀, брадꙋ̀ а҆арѡ́ню, сходѧ́щее на ѻ҆ме́ты ѻ҆де́жды є҆гѡ̀: Ꙗ҆́кѡ роса̀ а҆ермѡ́нскаѧ сходѧ́щаѧ на го́ры сїѡ̑нскїѧ: ꙗ҆́кѡ та́мѡ заповѣ́да гдⷭ҇ь бл҃гослове́нїе и҆ живо́тъ до вѣ́ка.

Ѱало́мъ рл҃г.

Сѐ, ны́нѣ бл҃гослови́те гдⷭ҇а, всѝ рабѝ гдⷭ҇ни, стоѧ́щїи въ хра́мѣ гдⷭ҇ни, во дво́рѣхъ до́мꙋ бг҃а на́шегѡ. Въ но́щехъ воздѣжи́те рꙋ́ки ва́шѧ во ст҃а̑ѧ и҆ бл҃гослови́те гдⷭ҇а. Бл҃гослови́тъ тѧ̀ гдⷭ҇ь ѿ сїѡ́на, сотвори́вый не́бо и҆ зе́млю.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

Е҆ктенїа̀ ма́лаѧ.

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Ли́къ: Тебѣ̀, гдⷭ҇и.

Мл҃тва тре́тїѧгѡ а҆нтїфѡ́на.

І҆ере́й: Гдⷭ҇и бж҃е на́шъ, помѧнѝ на́съ грѣ́шныхъ и҆ непотре́бныхъ ра̑бъ твои́хъ, внегда̀ призыва́ти на́мъ ст҃о́е и҆ покланѧ́емое и҆́мѧ твоѐ, и҆ не посрамѝ на́съ ѿ ча́ѧнїѧ ми́лости твоеѧ̀: но да́рꙋй на́мъ, гдⷭ҇и, всѧ̑ ꙗ҆̀же ко спасе́нїю прошє́нїѧ, и҆ сподо́би на́съ люби́ти, и҆ боѧ́тисѧ тебѐ ѿ всегѡ̀ се́рдца на́шегѡ, и҆ твори́ти во всѣ́хъ во́лю твою̀.

Свѧще́нникъ возглаша́етъ: Ꙗ҆́кѡ ты̀ є҆сѝ бг҃ъ на́шъ, бг҃ъ ми́ловати и҆ спаса́ти, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Гдⷭ҇и, воззва́хъ:

И҆ а҆́бїе пое́тсѧ, Гдⷭ҇и воззва́хъ, въ прилꙋчи́вшїйсѧ гла́съ. И҆ дїа́конъ кади́тъ по чи́нꙋ.

Гдⷭ҇и, воззва́хъ къ тебѣ̀, ᲂу҆слы́ши мѧ̀. / ᲂу҆слы́ши мѧ̀ гдⷭ҇и.

Первы́й ли́къ: Гдⷭ҇и, воззва́хъ къ тебѣ̀, ᲂу҆слы́ши мѧ̀: / вонмѝ гла́сꙋ моле́нїѧ моегѡ̀, / внегда̀ воззва́ти мѝ къ тебѣ̀. / ᲂу҆слы́ши мѧ̀ гдⷭ҇и.

Вторы́й ли́къ: Да и҆спра́витсѧ мл҃тва моѧ̀, / ꙗ҆́кѡ кади́ло пред̾ тобо́ю, / воздѣѧ́нїе рꙋкꙋ̀ моє́ю, / же́ртва вече́рнѧѧ. / ᲂу҆слы́ши мѧ̀ гдⷭ҇и.

И҆ по чи́нꙋ стїхѝ: Положѝ, гдⷭ҇и, хране́нїе ᲂу҆стѡ́мъ мои̑мъ, и҆ две́рь ѡ҆гражде́нїѧ ѡ҆ ᲂу҆стна́хъ мои́хъ. не ᲂу҆клонѝ се́рдце моѐ въ словеса̀ лꙋка́вствїѧ, непщева́ти вины̀ ѡ҆ грѣсѣ́хъ. съ человѣ́ки дѣ́лающими беззако́нїе, и҆ не сочтꙋ́сѧ со и҆збра́нными и҆́хъ. нака́жетъ мѧ̀ пра́ведникъ млⷭ҇тїю, и҆ ѡ҆бличи́тъ мѧ̀: є҆ле́й же грѣ́шнагѡ да не нама́ститъ главы̀ моеѧ̀. ꙗ҆́кѡ є҆щѐ и҆ мл҃тва моѧ̀ во бл҃говоле́нїихъ и҆́хъ, поже́рты бы́ша при ка́мени сꙋдїи̑ и҆́хъ. ᲂу҆слы́шатсѧ глаго́ли моѝ, ꙗ҆́кѡ возмого́ша: ꙗ҆́кѡ то́лща землѝ просѣ́десѧ на землѝ, расточи́шасѧ кѡ́сти и҆́хъ при а҆́дѣ. ꙗ҆́кѡ къ тебѣ̀ гдⷭ҇и, гдⷭ҇и, ѻ҆́чи моѝ, на тѧ̀ ᲂу҆пова́хъ, не ѿимѝ дꙋ́шꙋ мою̀. сохрани́ мѧ ѿ сѣ́ти, ю҆́же соста́виша мѝ, и҆ ѿ собла̑знъ дѣ́лающихъ беззако́нїе. падꙋ́тъ во мре́жꙋ свою̀ грѣ̑шницы: є҆ди́нъ є҆́смь а҆́зъ, до́ндеже прейдꙋ̀.

Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ ко гдⷭ҇ꙋ помоли́хсѧ. пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщꙋ̀. внегда̀ и҆счеза́ти ѿ менє̀ дꙋ́хꙋ моемꙋ̀, и҆ ты̀ позна́лъ є҆сѝ стєзѝ моѧ̑. на пꙋтѝ се́мъ, по немꙋ́же хожда́хъ, скры́ша сѣ́ть мнѣ̀. смотрѧ́хъ ѡ҆деснꙋ́ю и҆ возглѧ́дахъ, и҆ не бѣ̀ зна́ѧй менє̀. поги́бе бѣ́гство ѿ менє̀, и҆ нѣ́сть взыска́ѧй дꙋ́шꙋ мою̀. воззва́хъ къ тебѣ̀ гдⷭ҇и, рѣ́хъ: ты̀ є҆сѝ ᲂу҆пова́нїе моѐ, ча́сть моѧ̀ є҆сѝ на землѝ живы́хъ. вонмѝ моле́нїю моемꙋ̀, ꙗ҆́кѡ смири́хсѧ ѕѣлѡ̀: и҆зба́ви мѧ̀ ѿ гонѧ́щихъ мѧ̀, ꙗ҆́кѡ ᲂу҆крѣпи́шасѧ па́че менє̀.

На і҃, стїхи̑ры: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.

Менє̀ ждꙋ́тъ пра́вєдницы, до́ндеже возда́си мнѣ̀.

На и҃: И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и, ᲂу҆слы́ши гла́съ мо́й.

Да бꙋ́дꙋтъ ᲂу҆́ши твоѝ, вне́млющѣ гла́сꙋ моле́нїѧ моегѡ̀.

На ѕ҃: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.

И҆́мене ра́ди твоегѡ̀ потерпѣ́хъ тѧ̀, гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.

На д҃: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.

Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

На в҃: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.

Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Сла́ва: Ст҃а́гѡ мине́и. И҆ ны́нѣ: Бг҃оро́диченъ. А҆́ще нѣ́сть ст҃а́гѡ: Сла́ва, и҆ ны́нѣ: Бг҃оро́диченъ.

И҆ вхо́дъ съ кади́льницею. Мл҃тва вхо́да:

І҆ере́й: Ве́черъ и҆ заꙋ́тра и҆ полꙋ́дне, хва́лимъ, бл҃гослови́мъ, бл҃годари́мъ и҆ мо́лимсѧ тебѣ̀, влⷣко всѣ́хъ: и҆спра́ви мл҃твꙋ на́шꙋ, ꙗ҆́кѡ кади́ло пред̾ тобо́ю, и҆ не ᲂу҆клонѝ серде́цъ на́шихъ въ словеса̀, и҆лѝ въ помышлє́нїѧ лꙋка́вствїѧ: но и҆зба́ви на́съ ѿ всѣ́хъ ловѧ́щихъ дꙋ́шы на́шѧ, ꙗ҆́кѡ къ тебѣ̀, гдⷭ҇и, гдⷭ҇и, ѻ҆́чи на́ши, и҆ на тѧ̀ ᲂу҆пова́хомъ, да не посрами́ши на́съ, бж҃е на́шъ. ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

По концѣ́ же стїхи́ръ, глаго́летъ дїа́конъ, и҆лѝ сщ҃е́нникъ, возгла́снѡ: Премꙋ́дрость, про́сти.

Творе́нїе сѡфро́нїа, патрїа́рха і҆ерⷭ҇ли́мскагѡ.

И҆ пою́тъ ли́цы: Свѣ́те ти́хїй ст҃ы́ѧ сла́вы, / безсме́ртнагѡ, ѻ҆ц҃а̀ нбⷭ҇нагѡ, / ст҃а́гѡ бл҃же́ннагѡ, і҆и҃се хрⷭ҇тѐ, / прише́дше на за́падъ со́лнца, / ви́дѣвше свѣ́тъ вече́рнїй, / пое́мъ ѻ҆ц҃а̀, сн҃а, и҆ ст҃а́го дх҃а, бг҃а. / досто́инъ є҆сѝ во всѧ̑ времена̀ / пѣ́тъ бы́ти гла́сы преподо́бными, / сн҃е бж҃їй, живо́тъ даѧ́й: / тѣ́мже мі́ръ тѧ̀ сла́витъ.

Дїа́конъ: Во́нмемъ.

Сщ҃е́нникъ: Ми́ръ всѣ̑мъ.

Ли́къ: И҆ дх҃ови твоемꙋ̀.

Дїа́конъ: Премꙋ́дрость.

Чте́цъ, прокі́менъ.

Дїа́конъ: Премꙋ́дрость.

И҆ чте́цъ надписа́нїе парємїѝ.

Дїа́конъ: Во́нмемъ.

И҆ чте́цъ глаго́летъ парємїю̀.

Дїа́конъ: Премꙋ́дрость.

И҆ чте́цъ вторы́й прокі́менъ.

Посе́мъ возглаша́етъ дїа́конъ: Повели́те.

Свѧще́нникъ же, взе́мъ ѻ҆бѣ́ма рꙋка́ма кади́льницꙋ и҆ свѣ́щникъ со свѣще́ю, стои́тъ пред̾ ст҃о́ю трапе́зою, зрѧ̀ къ восто́кѡмъ, и҆ назна́менꙋѧ кре́стъ, глаго́летъ:

Премꙋ́дрость, про́сти.

Та́же ѡ҆братѧ́сѧ на за́падъ къ наро́дꙋ, глаго́летъ: Свѣ́тъ хрⷭ҇то́въ просвѣща́етъ всѣ́хъ.

И҆ чте́цъ надписа́нїе парємїѝ.

Дїа́конъ: Во́нмемъ.

Чте́цъ глаго́летъ парємїю̀.

Свѧще́нникъ глаго́летъ: Ми́ръ тѝ.

И҆ чте́цъ: И҆ дх҃ови твоемꙋ̀.

Дїа́конъ: Премꙋ́дрость.

Да и҆спра́витсѧ мл҃тва моѧ̀:

Подоба́етъ вѣ́дати, є҆гда̀ чте́цъ пое́тъ: Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю: всѝ лю́дїе сꙋ́щїи во хра́мѣ и҆ во ѻ҆лтарѣ̀, стоѧ́тъ на колѣ́нахъ молѧ́щесѧ. Е҆гда́ же на́чнетъ: Воздѣѧ́нїе рꙋкꙋ̀ мое́ю: востаю́тъ. На про́чїихъ же стїха́хъ, Да и҆спра́витсѧ,

пѣ́нїѧ, є҆гда̀ кото́рый ли́къ пое́тъ, и҆ всѧ̀ страна̀ стои́тъ: вторы́й же ли́къ и҆ страна̀ наро́да колѣ̑на приклонѧ́ютъ. І҆ере́й же стоѧ̀ во ѻ҆лтарѣ̀ пред̾ ст҃о́ю трапе́зою, прїѧ́въ кади́льницꙋ съ ѳѷмїа́момъ, и҆ кади́тъ: послѣди́ же на

Да и҆спра́витсѧ, ѿда́въ кади́льницꙋ и҆ са́мъ і҆ере́й приклонѧ́етъ колѣ̑на молѧ́сѧ.

Чте́цъ пое́тъ: Да и҆спра́витсѧ мл҃тва моѧ̀, / ꙗ҆́кѡ кади́ло пред̾ тобо́ю, / воздѣѧ́нїе рꙋкꙋ̀ мое́ю, / же́ртва вече́рнѧѧ.

И҆ по пѣ́нїи чтеца̀, ли́къ пое́тъ то́же.

Та́же, чте́цъ сті́хъ а҃: Гдⷭ҇и, воззва́хъ къ тебѣ̀, ᲂу҆слы́ши мѧ̀, / вонмѝ гла́сꙋ моле́нїѧ моегѡ̀, / внегда̀ воззва́ти мѝ къ тебѣ̀.

Ли́къ: Да и҆спра́витсѧ:

Чте́цъ, сті́хъ в҃: Положѝ гдⷭ҇и, хране́нїе ᲂу҆стѡ́мъ мои̑мъ, / и҆ две́рь ѡ҆гражде́нїѧ ѡ҆ ᲂу҆стна́хъ мои́хъ.

Ли́къ: Да и҆спра́витсѧ:

Чте́цъ, сті́хъ г҃: Не ᲂу҆клонѝ се́рдце моѐ въ словеса̀ лꙋка́вствїѧ, / непщева́ти вины̀ ѡ҆ грѣсѣ́хъ.

Ли́къ: Да и҆спра́витсѧ:

И҆ па́ки чте́цъ пое́тъ: Да и҆спра́витсѧ мл҃тва моѧ̀, / ꙗ҆́кѡ кади́ло пред̾ тобо́ю.

И҆ ли́къ пое́тъ: Воздѣѧ́нїе рꙋкꙋ̀ мое́ю, / же́ртва вече́рнѧѧ.

И҆ по и҆сполне́нїи твори́мъ покло́ны трѝ.

Мл҃тва ст҃а́гѡ є҆фре́ма.

І҆ере́й: Гдⷭ҇и и҆ влⷣко живота̀ моегѡ̀, дꙋ́хъ пра́здности, ᲂу҆ны́нїѧ, любонача́лїѧ и҆ праздносло́вїѧ не да́ждь мѝ. Покло́нъ.

Дꙋ́хъ же цѣломꙋ́дрїѧ, смиреномꙋ́дрїѧ, терпѣ́нїѧ и҆ любвѐ, да́рꙋй мѝ рабꙋ̀ твоемꙋ̀. Покло́нъ.

Е҆́й гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нїѧ, и҆ не ѡ҆сꙋжда́ти бра́та моегѡ̀: ꙗ҆́кѡ бл҃гослове́нъ є҆сѝ во вѣ́ки вѣкѡ́въ. Покло́нъ.

А҆́ще пра́зднꙋетсѧ ст҃о́мꙋ, и҆лѝ хра́мовый пра́здникъ прилꙋчи́тсѧ въ по̑стныѧ дни̑, тогда̀ глаго́летъ дїа́конъ и҆лѝ і҆ере́й: Во́нмемъ, и҆ чте́цъ прокі́менъ а҆пⷭ҇ла, и҆ чте́тсѧ а҆пⷭ҇лъ, и҆ а҆ллилꙋ́їа пое́тсѧ, и҆ чте́нїе є҆ѵⷢ҇лїа, та́же є҆ктенїа̀ сїѧ̀:

Е҆ктенїа̀ сꙋгꙋ́баѧ.

Дїа́конъ: Рце́мъ всѝ ѿ всеѧ̀ дꙋшѝ, и҆ ѿ всегѡ̀ помышле́нїѧ на́шегѡ рце́мъ.

Ли́къ: Гдⷭ҇и, поми́лꙋй.

Гдⷭ҇и вседержи́телю, бж҃е ѻ҆ц҃ъ на́шихъ, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и, поми́лꙋй.

Поми́лꙋй на́съ, бж҃е, по вели́цѣй ми́лости твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ вели́комъ господи́нѣ и҆ ѻ҆ц҃ѣ̀ на́шемъ, свѧтѣ́йшемъ патрїа́рхѣ , и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ] , и҆ все́й во хрⷭ҇тѣ̀ бра́тїи на́шей.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ бра́тїѧхъ на́шихъ, сщ҃е́нницѣхъ, сщ҃енномона́сѣхъ, и҆ все́мъ во хрⷭ҇тѣ̀ бра́тствѣ на́шемъ.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ бл҃же́нныхъ и҆ приснопа́мѧтныхъ ст҃ѣ́йшихъ патрїа́рсѣхъ правосла́вныхъ, и҆ созда́телехъ ст҃а́гѡ хра́ма сегѡ̀, [а҆́ще во ѻ҆би́тели: ст҃ы́ѧ ѻ҆би́тели сеѧ̀,] и҆ ѡ҆ всѣ́хъ преждепочи́вшихъ ѻ҆ц҃ѣ́хъ и҆ бра́тїѧхъ, здѣ̀ лежа́щихъ и҆ повсю́дꙋ правосла́вныхъ.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ ми́лости, жи́зни, ми́рѣ, здра́вїи, спасе́нїи, посѣще́нїи, проще́нїи и҆ ѡ҆ставле́нїи грѣхѡ́въ рабѡ́въ бж҃їихъ, бра́тїи ст҃а́гѡ хра́ма сегѡ̀ [а҆́ще во ѻ҆би́тели: ст҃ы́ѧ ѻ҆би́тели сеѧ̀].

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ плодоносѧ́щихъ и҆ добродѣ́ющихъ во ст҃ѣ́мъ и҆ всечестнѣ́мъ хра́мѣ се́мъ, трꙋжда́ющихсѧ, пою́щихъ и҆ предстоѧ́щихъ лю́дехъ, ѡ҆жида́ющихъ ѿ тебѐ вели́кїѧ и҆ бога́тыѧ млⷭ҇ти.

Ли́къ: Гдⷭ҇и поми́лꙋй, три́жды.

Мл҃тва прилѣ́жнагѡ моле́нїѧ.

І҆ере́й: Гдⷭ҇и бж҃е на́шъ, прилѣ́жное сїѐ моле́нїе прїимѝ ѿ твои́хъ ра̑бъ, и҆ поми́лꙋй на́съ по мно́жествꙋ млⷭ҇ти твоеѧ̀, и҆ щедрѡ́ты твоѧ̑ низпослѝ на ны̀, и҆ на всѧ̑ лю́ди твоѧ̑, ча́ющыѧ ѿ тебѐ бога́тыѧ млⷭ҇ти.

Возглаше́нїе: Ꙗ҆́кѡ ми́лостивъ и҆ человѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Е҆ктенїа̀ ѡ҆ ѡ҆глаше́нныхъ.

Па́ки дїа́конъ: Помоли́тесѧ, ѡ҆глаше́ннїи, гдⷭ҇ви.

Ли́къ: Гдⷭ҇и, поми́лꙋй.

Вѣ́рнїи, ѡ҆ ѡ҆глаше́нныхъ помо́лимсѧ, да гдⷭ҇ь поми́лꙋетъ и҆̀хъ.

Ли́къ: Гдⷭ҇и, поми́лꙋй.

Ѡ҆гласи́тъ и҆̀хъ сло́вомъ и҆́стины.

Ли́къ: Гдⷭ҇и, поми́лꙋй.

Ѿкры́етъ и҆̀мъ є҆ѵⷢ҇лїе пра́вды.

Ли́къ: Гдⷭ҇и, поми́лꙋй.

Соедини́тъ и҆̀хъ ст҃ѣ́й свое́й, собо́рнѣй и҆ а҆пⷭ҇льстѣй це́ркви.

Ли́къ: Гдⷭ҇и, поми́лꙋй.

Спасѝ, поми́лꙋй, застꙋпѝ и҆ сохранѝ и҆̀хъ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Ѡ҆глаше́ннїи, главы̑ ва́шѧ гдⷭ҇ви приклони́те.

Ли́къ: Тебѣ̀, гдⷭ҇и.

Моли́тва ѡ҆ ѡ҆глаше́нныхъ.

І҆ере́й: Бж҃е, бж҃е на́шъ, созда́телю и҆ содѣ́телю всѣ́хъ, и҆́же всѣ̑мъ хотѧ́й спасти́сѧ и҆ въ ра́зꙋмъ и҆́стины прїитѝ: при́зри на рабы̑ твоѧ̑ ѡ҆глашє́нныѧ, и҆ и҆зба́ви и҆̀хъ дре́внїѧ пре́лести и҆ ко́зни сопроти́внагѡ: и҆ призовѝ и҆̀хъ въ жи́знь вѣ́чнꙋю, просвѣща́ѧ и҆́хъ дꙋ́шы и҆ тѣлеса̀ и҆ сопричита́ѧ и҆̀хъ слове́сномꙋ твоемꙋ̀ ста́дꙋ, на не́мже и҆́мѧ твоѐ ст҃о́е нарица́етсѧ.

Возгла́съ: Да и҆ ті́и съ на́ми сла́вѧтъ пречⷭ҇тно́е и҆ великолѣ́пое и҆́мѧ твоѐ, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Дїа́конъ глаго́летъ: Е҆ли́цы ѡ҆глаше́ннїи, и҆зыди́те: ѡ҆глаше́ннїи, и҆зыди́те. є҆ли́цы ѡ҆глаше́ннїи, и҆зыди́те: да никто̀ ѿ ѡ҆глаше́нныхъ, є҆ли́цы вѣ́рнїи, па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

[зрѝ] Сїѧ̑ то́чїю глаго́лютсѧ да́же до среды̀ четве́ртыѧ седми́цы поста̀: ѿ среды́ же средопо́стныѧ, по є҆́же рещѝ сщ҃е́нникꙋ: Да и҆ ті́и съ на́ми сла́вѧтъ: глаго́лютсѧ и҆ сїѧ̑ дїа́конства ѿ дїа́кона, на преждеѡсщ҃е́нныхъ то́чїю лїтꙋргі́ахъ, а҆́ще и҆ пра́зднꙋемый де́нь, кромѣ̀ сꙋббѡ́тъ и҆ недѣ́ль.

Дїа́конъ: Е҆ли́цы ѡ҆глаше́ннїи, и҆зыди́те: ѡ҆глаше́ннїи, и҆зыди́те: є҆ли́цы къ просвѣще́нїю, и҆зыди́те: помоли́тесѧ, и҆̀же ко просвѣще́нїю.

Ли́къ: Гдⷭ҇и, поми́лꙋй.

Е҆ктенїа̀ ѡ҆ гото́вѧщихсѧ ко ст҃о́мꙋ просвѣще́нїю.

Дїа́конъ: Вѣ́рнїи, ѡ҆ и҆̀же ко ст҃о́мꙋ просвѣще́нїю гото́вѧщихсѧ бра́тїѧхъ и҆ спасе́нїи и҆́хъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ꙗ҆́кѡ да гдⷭ҇ь бг҃ъ на́шъ ᲂу҆тверди́тъ и҆̀хъ и҆ ᲂу҆крѣпи́тъ.

Ли́къ: Гдⷭ҇и, поми́лꙋй.

Просвѣти́тъ и҆̀хъ просвѣще́нїемъ ра́зꙋма и҆ бл҃гоче́стїѧ.

Ли́къ: Гдⷭ҇и, поми́лꙋй.

Сподо́битъ и҆̀хъ во вре́мѧ бл҃гопотре́бно ба́ни пакибытїѧ̀, ѡ҆ставле́нїѧ грѣхѡ́въ и҆ ѡ҆де́жди нетлѣ́нїѧ.

Ли́къ: Гдⷭ҇и, поми́лꙋй.

Породи́тъ и҆̀хъ водо́ю и҆ дх҃омъ.

Ли́къ: Гдⷭ҇и, поми́лꙋй.

Да́рꙋетъ и҆̀мъ соверше́нїе вѣ́ры.

Ли́къ: Гдⷭ҇и, поми́лꙋй.

Сопричте́тъ и҆̀хъ ст҃о́мꙋ своемꙋ̀ и҆ и҆збра́нномꙋ ста́дꙋ.

Ли́къ: Гдⷭ҇и, поми́лꙋй.

Спасѝ, поми́лꙋй, застꙋпѝ и҆ сохранѝ и҆̀хъ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

И҆̀же ко просвѣще́нїю, главы̑ ва́шѧ гдⷭ҇ви приклони́те.

Ли́къ: Тебѣ̀, гдⷭ҇и.

Моли́тва ѡ҆ гото́вѧщихсѧ ко ст҃о́мꙋ просвѣще́нїю.

І҆ере́й: Ꙗ҆вѝ, влⷣко, лицѐ твоѐ на и҆̀же ко ст҃о́мꙋ просвѣще́нїю гото́вѧщихсѧ и҆ жела́ющихъ грѣхо́внꙋю скве́рнꙋ ѿтрѧстѝ: ѡ҆зарѝ и҆́хъ помышле́нїе, и҆звѣстѝ ѧ҆̀ въ вѣ́рѣ, ᲂу҆твердѝ въ наде́жди, совершѝ въ любвѝ, ᲂу҆́ды че́стны хрⷭ҇та̀ твоегѡ̀ покажѝ, да́вшагѡ себѐ и҆збавле́нїе ѡ҆ дꙋша́хъ на́шихъ.

Возгла́съ: Ꙗ҆́кѡ ты̀ є҆сѝ просвѣще́нїе на́ше, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Лїтꙋргі́а вѣ́рныхъ.

Дїа́конъ: Е҆ли́цы ко просвѣще́нїю, и҆зыди́те: и҆̀же ко просвѣще́нїю, и҆зыди́те: є҆ли́цы ѡ҆глаше́ннїи, и҆зыди́те: да никто̀ ѿ ѡ҆глаше́нныхъ, є҆ли́цы вѣ́рнїи, па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Да́же до здѣ̀ ꙗ҆̀же ѿ среды̀ средопо́стныѧ.

Дїа́конъ: Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Дїа́конъ: Премꙋ́дрость.

Моли́тва вѣ́рныхъ пе́рваѧ.

Сщ҃е́нникъ: Бж҃е вели́кїй и҆ хва́льный, и҆́же животворѧ́щею хрⷭ҇та̀ твоегѡ̀ сме́ртїю въ нетлѣ́нїе на́съ ѿ тлѣ́нїѧ преста́вивый: ты̀ всѧ̑ на̑ша чꙋ̑вства стра́стнагѡ ᲂу҆мерщвле́нїѧ свободѝ, бл҃га́го тѣ̑мъ влⷣкꙋ внꙋ́треннїй по́мыслъ приста́вивъ: и҆ ѻ҆́ко ᲂу҆́бѡ да не приѻ́бщно бꙋ́детъ всѧ́кагѡ лꙋка́вагѡ зрѣ́нїѧ, слꙋ́хъ же словесє́мъ пра̑зднымъ невхо́денъ, ѧ҆зы́къ же да ѡ҆чи́ститсѧ ѿ глагѡ́лъ неподо́бныхъ: ѡ҆чи́сти же на́шѧ ᲂу҆стнѣ̀ хва́лѧщыѧ тѧ̀, гдⷭ҇и: рꙋ́ки на́шѧ сотворѝ ѕлы́хъ ᲂу҆́бѡ ѡ҆ша́ѧтисѧ дѣѧ́нїй, дѣ́йствовати же то́чїю ꙗ҆̀же тебѣ̀ бл҃гоꙋгѡ́днаѧ, всѧ̑ на́шѧ ᲂу҆́ды и҆ мы́сль твое́ю ᲂу҆твержда́ѧ бл҃года́тїю.

Сщ҃е́нникъ возглаша́етъ: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

[Е҆гда̀ сщ҃е́нникъ є҆ди́нъ слꙋ́житъ, сїѧ̑ не глаго́летъ:

Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й и҆ соедине́нїи всѣ́хъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.]

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю благода́тїю.

Ли́къ: Гдⷭ҇и, поми́лꙋй.

Дїа́конъ: Премꙋ́дрость.

Моли́тва втора́ѧ вѣ́рныхъ.

Сщ҃е́нникъ: Влⷣко ст҃ы́й, пребл҃гі́й, мо́лимъ тѧ̀, въ ми́лости бога́таго, млⷭ҇тива бы́ти на́мъ грѣ̑шнымъ и҆ достѡ́йны на́съ сотвори́ти под̾ѧ́тїѧ є҆диноро́днагѡ твоегѡ̀ сн҃а и҆ бг҃а на́шегѡ, цр҃ѧ̀ сла́вы. се́ бо пречⷭ҇тое є҆гѡ̀ тѣ́ло и҆ животворѧ́щаѧ кро́вь, въ настоѧ́щїй ча́съ входѧ́щаѧ, на та́йнѣй се́й предложи́тисѧ и҆́мꙋтъ трапе́зѣ, ѿ мно́жества во́инства нбⷭ҇нагѡ неви́димѡ дорѷноси̑мыѧ: и҆́хже прича́стїе неѡсꙋжде́ннѡ на́мъ да́рꙋй, да тѣ́ми мы́сленное ѻ҆́ко ѡ҆зарѧ́юще, сы́нове свѣ́та и҆ днѐ бꙋ́демъ.

Сщ҃е́нникъ возглаша́етъ: По да́рꙋ хрⷭ҇та̀ твоегѡ̀, съ ни́мже бл҃гослове́нъ є҆сѝ, со прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

И҆ ѿверза́ютсѧ ст҃ы̑ѧ двє́ри.

Вели́кїй вхо́дъ.

Ли́къ пое́тъ: Ны́нѣ си̑лы нбⷭ҇ныѧ съ на́ми неви́димѡ слꙋ́жатъ: / се́ бо вхо́дитъ цр҃ь сла́вы, сѐ же́ртва та́йнаѧ соверше́на дорѷно́ситсѧ.

Семꙋ́ же пѣва́емꙋ, вхо́дитъ дїа́конъ сѣ́верною страно́ю во ст҃ы́й ѻ҆лта́рь, и҆ кади́тъ ст҃ꙋ́ю трапе́зꙋ и҆ ст҃о́е предложе́нїе и҆ сщ҃е́нника, и҆ ста́вше вкꙋ́пѣ, глаго́лютъ:

Ны́нѣ си̑лы нбⷭ҇ныѧ:

три́жды. И҆ поклони́вшесѧ три́жды, ѿхо́дѧтъ и҆ прено́сѧтъ ст҃ы̑ѧ да́ры по ѡ҆бы́чаю: и҆дꙋ́ще же ничто́же глаго́лютъ. и҆ вше́дъ поставлѧ́етъ ѧ҆̀ сщ҃е́нникъ по ѡ҆бы́чаю на ст҃ѣ́й трапе́зѣ, и҆ покрыва́етъ воздꙋ́хомъ, ничесѡ́же глаго́лѧ над̾ ни́ми, то́чїю кади́тъ ѧ҆̀.

По вхо́дѣ.

Ли́къ пое́тъ: Вѣ́рою и҆ любо́вїю пристꙋ́пимъ, / да прича̑стницы жи́зни вѣ́чныѧ бꙋ́демъ. / а҆ллилꙋ́їа, а҆ллилꙋ́їа, а҆ллилꙋ́їа.

И҆ твори́мъ трѝ вели̑кїѧ покло́ны, глаго́люще мл҃твꙋ ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀:

Дїа́конъ затворѧ́етъ црⷭ҇кїѧ двє́ри и҆ завѣ́сꙋ до полови́ны црⷭ҇кихъ вра́тъ.

Та́же дїа́конъ, взе́мъ вре́мѧ, и҆схо́дитъ на ѡ҆бы́чное мѣ́сто и҆ глаго́летъ дїа́кѡнства.

Е҆ктенїа̀ проси́тєльнаѧ.

Дїа́конъ: И҆спо́лнимъ вече́рнюю моли́твꙋ на́шꙋ гдⷭ҇ви.

Ли́къ: Гдⷭ҇и, поми́лꙋй.

Ѡ҆ предложе́нныхъ и҆ преждеѡсщ҃е́нныхъ чⷭ҇тны́хъ дарѣ́хъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ꙗ҆́кѡ да чл҃вѣколю́бецъ бг҃ъ на́шъ, прїе́мъ ѧ҆̀ во ст҃ы́й и҆ пренбⷭ҇ный, и҆ мы́сленный сво́й же́ртвенникъ, въ воню̀ благоꙋха́нїѧ дх҃о́внагѡ, возниспо́слетъ на́мъ бж҃е́ственнꙋю бл҃года́ть и҆ да́ръ ст҃а́гѡ дх҃а, помо́лимсѧ.

Ли́къ: Гдⷭ҇и, поми́лꙋй.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Ве́чера всегѡ̀ соверше́нна, свѧ́та, ми́рна и҆ безгрѣ́шна, ᲂу҆ гдⷭ҇а про́симъ.

Ли́къ: Пода́й гдⷭ҇и.

А҆́гг҃ла ми́рна, вѣ́рна наста́вника, храни́телѧ дꙋ́шъ и҆ тѣле́съ на́шихъ, ᲂу҆ гдⷭ҇а про́симъ.

Ли́къ: Пода́й гдⷭ҇и.

Проще́нїѧ и҆ ѡ҆ставле́нїѧ грѣхѡ́въ и҆ прегрѣше́нїй на́шихъ ᲂу҆ гдⷭ҇а про́симъ.

Ли́къ: Пода́й гдⷭ҇и.

До́брыхъ и҆ поле́зныхъ дꙋша́мъ на́шымъ и҆ ми́ра мі́рови ᲂу҆ гдⷭ҇а про́симъ.

Ли́къ: Пода́й гдⷭ҇и.

Про́чее вре́мѧ живота̀ на́шегѡ въ ми́рѣ и҆ покаѧ́нїи сконча́ти ᲂу҆ гдⷭ҇а про́симъ.

Ли́къ: Пода́й гдⷭ҇и.

Хрⷭ҇тїа́нскїѧ кончи́ны живота̀ на́шегѡ, безболѣ́знены, непосты́дны, ми́рны, и҆ до́брагѡ ѿвѣ́та на стра́шнѣмъ сꙋди́щи хрⷭ҇то́вѣ про́симъ.

Ли́къ: Пода́й гдⷭ҇и.

Соедине́нїе вѣ́ры и҆ прича́стїе ст҃а́гѡ дх҃а и҆спроси́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Ли́къ: Тебѣ̀, гдⷭ҇и.

Мл҃тва по поставле́нїи бж҃е́ственныхъ дарѡ́въ на ст҃ѣ́й трапе́зѣ.

Сщ҃е́нникъ мо́литсѧ: И҆́же неизрече́нныхъ и҆ неви́димыхъ та̑инъ бж҃е, ᲂу҆ негѡ́же сꙋ́ть сокрѡ́вища премꙋ́дрости и҆ ра́зꙋма ᲂу҆тає́на: и҆́же слꙋже́нїе слꙋ́жбы сеѧ̀ ѿкры́вый на́мъ и҆ положи́вый на́съ грѣ́шныхъ, за мно́гое твоѐ чл҃колю́бїе, во є҆́же приноси́ти тебѣ̀ да́ры же и҆ жє́ртвы ѡ҆ на́шихъ грѣсѣ́хъ и҆ ѡ҆ людски́хъ невѣ́дѣнїихъ: са́мъ, неви́димый цр҃ю̀, творѧ́й вели̑каѧ и҆ неизслѣ́дѡваннаѧ, сла̑внаѧ же и҆ и҆зрѧ̑днаѧ, и҆̀мже нѣ́сть числа̀, при́зри на ны̀ недостѡ́йныѧ рабы̑ твоѧ̑, и҆̀же ст҃о́мꙋ семꙋ̀ же́ртвенникꙋ, а҆́ки херꙋві́мскомꙋ твоемꙋ̀ предстоѧ́щыѧ прⷭ҇то́лꙋ, на не́мже є҆диноро́дный тво́й сн҃ъ и҆ бг҃ъ на́шъ предлежа́щими стра́шными почива́етъ та́инствы: и҆ всѧ́кїѧ на́съ и҆ вѣ̑рныѧ лю́ди твоѧ̑ свободи́въ нечистоты̀, ѡ҆свѧтѝ всѣ́хъ на́съ дꙋ́шы и҆ тѣлеса̀ ѡ҆свѧще́нїемъ неѿе́млемымъ: да чи́стою со́вѣстїю, непосра́мленнымъ лице́мъ, просвѣще́ннымъ се́рдцемъ бж҃е́ственныхъ си́хъ причаща́ющесѧ ст҃ы́нь и҆ ѿ ни́хъ ѡ҆животворѧ́еми, соедини́мсѧ самомꙋ̀ хрⷭ҇тꙋ̀ твоемꙋ̀, и҆́стинномꙋ бг҃ꙋ на́шемꙋ, ре́кшемꙋ: ꙗ҆ды́й пло́ть мою̀ и҆ пїѧ́й кро́вь мою̀ во мнѣ̀ пребыва́етъ, и҆ а҆́зъ въ не́мъ: ꙗ҆́кѡ да все́льшꙋсѧ въ на́съ и҆ ходѧ́щꙋ сло́вꙋ твоемꙋ̀, гдⷭ҇и, бꙋ́демъ хра́мъ прест҃а́гѡ и҆ покланѧ́емагѡ твоегѡ̀ дх҃а, и҆зба́влени всѧ́кїѧ дїа́вольскїѧ ко́зни, дѣѧ́нїемъ, и҆лѝ сло́вомъ, и҆лѝ мы́слїю дѣ́йствꙋемыѧ, и҆ полꙋчи́мъ ѡ҆бѣтова̑ннаѧ на́мъ бл҃га̑ѧ, со всѣ́ми ст҃ы́ми твои́ми, ѿ вѣ́ка тебѣ̀ бл҃гоꙋгоди́вшими.

Сщ҃е́нникъ возглаша́етъ: И҆ сподо́би на́съ, влⷣко, со дерзнове́нїемъ неѡсꙋжде́ннѡ смѣ́ти призыва́ти тебѐ нбⷭ҇наго бг҃а ѻ҆ц҃а̀, и҆ глаго́лати.

Лю́дїе: Ѻ҆́ч҃е на́шъ, и҆́же є҆сѝ на нб҃сѣ́хъ, да ст҃и́тсѧ и҆́мѧ твоѐ: да прїи́детъ ца́рствїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ, и҆ на землѝ. хлѣ́бъ на́шъ насꙋ́щный да́ждь на́мъ дне́сь: и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.

Сщ҃е́нникъ возглаша́етъ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Сщ҃е́нникъ: Ми́ръ всѣ̑мъ.

Ли́къ: И҆ дх҃ови твоемꙋ̀.

Дїа́конъ: Главы̑ на́шѧ гдⷭ҇ви прикло́нимъ.

Ли́къ: Тебѣ̀, гдⷭ҇и.

Мл҃тва главоприклоне́нїѧ.

Сщ҃е́нникъ прекло́ньсѧ мо́литсѧ: Бж҃е, є҆ди́ный бл҃гі́й и҆ бл҃гоꙋтро́бный, и҆́же въ высо́кихъ живы́й и҆ на смирє́нныѧ призира́ѧй, при́зри благоꙋтро́бнымъ ѻ҆́комъ на всѧ̑ лю́ди твоѧ̑ и҆ сохранѝ и҆̀хъ: и҆ сподо́би всѧ̑ ны̀ неѡсꙋжде́ннѡ причасти́тисѧ животворѧ́щихъ твои́хъ си́хъ та̑инъ: тебѣ́ бо своѧ̑ подклони́хомъ главы̑, ча́юще ѿ тебѐ бога́тыѧ ми́лости.

Возгла́съ: Бл҃года́тїю и҆ щедро́тами и҆ чл҃вѣколю́бїемъ є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ, со прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Сщ҃е́нникъ мо́литсѧ:

Вонмѝ, гдⷭ҇и і҆и҃се хрⷭ҇тѐ бж҃е на́шъ, ѿ ст҃а́гѡ жили́ща твоегѡ̀ и҆ ѿ прⷭ҇то́ла сла́вы црⷭ҇твїѧ твоегѡ̀, и҆ прїидѝ во є҆́же ѡ҆свѧти́ти на́съ, и҆́же горѣ̀ со ѻ҆ц҃е́мъ сѣдѧ́й, и҆ здѣ̀ на́мъ неви́димѡ спребыва́ѧй: и҆ сподо́би держа́вною твое́ю рꙋко́ю препода́ти на́мъ пречⷭ҇тое тѣ́ло твоѐ и҆ чⷭ҇тнꙋ́ю кро́вь, и҆ на́ми всѣ̑мъ лю́демъ.

По мл҃твѣ же сщ҃е́нникъ и҆ дїа́конъ покланѧ́ютсѧ три́жды, глаго́люще: Бж҃е, ѡ҆чи́сти мѧ̀ грѣ́шнаго.

Взе́млетъ же сщ҃е́нникъ покро́вы ѿ ст҃ы́хъ дарѡ́въ, и҆ покрыва́етъ ѧ҆̀ воздꙋ́хомъ. Е҆гда́ же и҆́мать вознестѝ ст҃ы́й хлѣ́бъ, вно́ситъ сщ҃е́нникъ рꙋ́кꙋ свою̀ со стра́хомъ мно́гимъ, и҆ прикаса́етсѧ бж҃е́ственномꙋ хлѣ́бꙋ со бл҃гоговѣ́нїемъ и҆ стра́хомъ.

Дїа́конъ: Во́нмемъ.

Возглаша́етъ сщ҃е́нникъ: Преждеѡсвѧщє́ннаѧ ст҃а̑ѧ ст҃ы̑мъ.

Ли́къ: Е҆ди́нъ свѧ́тъ, / є҆ди́нъ гдⷭ҇ь, / і҆и҃съ хрⷭ҇то́съ, / во сла́вꙋ бг҃а ѻ҆ц҃а̀, а҆ми́нь.

Та́же сщ҃е́нникъ ѿлага́етъ ст҃ы́й воздꙋ́хъ и҆ твори́тъ по ѻ҆бы́чаю ст҃о́е прича́стїе бж҃е́ственныхъ дарѡ́въ.

Кїнони́къ.

Ли́къ же пое́тъ: Вкꙋси́те и҆ ви́дите, ꙗ҆́кѡ бл҃гъ гдⷭ҇ь. / а҆ллилꙋ́їа, а҆ллилꙋ́їа, а҆ллилꙋ́їа.

[А҆́ще ст҃а́гѡ, и҆лѝ хра́ма чте́нъ а҆пⷭ҇лъ и҆ є҆ѵⷢ҇лїе, и҆ дрꙋгі́й кїнони́къ пое́тсѧ, и҆́же є҆́сть ᲂу҆ка́занъ.]

И҆ затворѧ́ютсѧ ст҃ы̑ѧ двє́ри завѣ́сою.

Дїа́конъ вхо́дитъ во ст҃ы́й ѻ҆лта́рь и҆ глаго́летъ: Раздробѝ, влⷣко, ст҃ы́й хлѣ́бъ.

Сщ҃е́нникъ раздроблѧ́етъ є҆го̀ со мно́гимъ внима́нїемъ на четы́ри ча̑сти, глаго́лѧ: Раздроблѧ́етсѧ и҆ раздѣлѧ́етсѧ а҆́гнецъ бж҃їй, раздроблѧ́емый и҆ нераздѣлѧ́емый, всегда̀ ꙗ҆до́мый и҆ никогда́же и҆ждива́емый, но причаща́ющыѧсѧ ѡ҆свѧща́ѧй.

И҆ влага́етъ ча́стицꙋ въ поти́ръ, ничто́же глаго́лѧ: и҆ дїа́конъ влива́етъ теплотꙋ̀ въ поти́ръ, ничто́же глаго́лѧ: и҆ стои́тъ ма́лѡ пода́ле.

Причаще́нїе во ѻ҆лтарѣ̀.

Сщ҃е́нникъ же глаго́летъ: Дїа́коне, пристꙋпѝ.

Дїа́конъ: Сѐ прихождꙋ̀ къ безсме́ртномꙋ цр҃ю̀ и҆ бг҃ꙋ на́шемꙋ. И҆: Препода́ждь мѝ, влⷣко, чⷭ҇тно́е и҆ ст҃о́е тѣ́ло гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀.

Сщ҃е́нникъ же глаго́летъ: И҆́мⷬ҇къ, свѧщеннодїа́конꙋ, преподае́тсѧ чⷭ҇тно́е и҆ ст҃о́е и҆ пречⷭ҇тое тѣ́ло гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, во ѡ҆ставле́нїе грѣхѡ́въ є҆гѡ̀ и҆ въ жи́знь вѣ́чнꙋю.

И҆ ѿхо́дитъ дїа́конъ и҆ мо́литсѧ, ꙗ҆́кѡ и҆ сщ҃е́нникъ, глаго́лѧ: Вѣ́рꙋю, гдⷭ҇и, и҆ и҆сповѣ́дꙋю: и҆ прѡ́чаѧ.

Подо́бнѣ взе́мъ и҆ сщ҃е́нникъ є҆ди́нꙋ ча́стицꙋ ст҃ы́хъ та̑инъ, глаго́летъ:

Сѐ прихождꙋ̀ къ безсме́ртномꙋ цр҃ю̀ и҆ бг҃ꙋ на́шемꙋ.

Честно́е и҆ прест҃о́е тѣ́ло гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀ преподае́тсѧ мнѣ̀, , свѧще́нникꙋ, во ѡ҆ставле́нїе грѣхѡ́въ мои́хъ и҆ въ жи́знь вѣ́чнꙋю.

И҆ приклони́въ главꙋ̀, мо́литсѧ, глаго́лѧ: Вѣ́рꙋю, гдⷭ҇и, и҆ и҆сповѣ́дꙋю: И҆: Ве́чери твоеѧ̀ та́йныѧ дне́сь: И҆: Да не въ сꙋ́дъ, и҆лѝ во ѡ҆сꙋжде́нїе: всѐ до конца̀.

И҆ та́кѡ причаща́ютсѧ ст҃ы́хъ та̑инъ со стра́хомъ и҆ всѧ́цѣмъ ᲂу҆тверже́нїемъ.

И҆ покрыва́етъ сщ҃е́нникъ ст҃ы́й поти́ръ покро́вцемъ, подо́бнѣ и҆ на ст҃ы́й ді́скосъ возлага́етъ ѕвѣзди́цꙋ и҆ покрѡ́вцы. Та́же глаго́летъ мл҃твꙋ благода́рственнꙋю:

Бл҃годари́мъ тѧ̀, влⷣко чл҃вѣколю́бче:

Причаще́нїе во хра́мѣ.

Дїа́конъ же ѿверза́етъ двє́ри ст҃а́гѡ ѻ҆лтарѧ̀, прїе́млетъ поти́ръ, глаго́лѧ: Со стра́хомъ бж҃їимъ и҆ вѣ́рою пристꙋпи́те.

Ли́къ же пое́тъ: Бл҃гословлю̀ гдⷭ҇а на всѧ́кое вре́мѧ, / хвала̀ є҆гѡ̀ во ᲂу҆стѣ́хъ мои́хъ.

Сщ҃е́нникъ же мо́литсѧ:

Вѣ́рꙋю, гдⷭ҇и, и҆ и҆сповѣ́дꙋю, ꙗ҆́кѡ ты̀ є҆сѝ вои́стиннꙋ хрⷭ҇то́съ, сн҃ъ бг҃а жива́гѡ, прише́дый въ мі́ръ грѣ̑шныѧ спастѝ, ѿ ни́хже пе́рвый є҆́смь а҆́зъ. є҆щѐ вѣ́рꙋю, ꙗ҆́кѡ сїѐ са́мое є҆́сть пречи́стое тѣ́ло твоѐ, и҆ сїѧ̀ са́маѧ є҆́сть честна́ѧ кро́вь твоѧ̀. молю́сѧ ᲂу҆̀бо тебѣ̀: поми́лꙋй мѧ̀, и҆ прости́ ми прегрѣшє́нїѧ моѧ̑ вѡ́льнаѧ и҆ невѡ́льнаѧ, ꙗ҆̀же сло́вомъ, ꙗ҆̀же дѣ́ломъ, ꙗ҆̀же вѣ́дѣнїемъ и҆ невѣ́дѣнїемъ: и҆ сподо́би мѧ̀ неѡсꙋжде́ннѡ причасти́тисѧ пречи́стыхъ твои́хъ та́инствъ, во ѡ҆ставле́нїе грѣхѡ́въ и҆ въ жи́знь вѣ́чнꙋю, а҆ми́нь.

Та́же: Ве́чери твоеѧ̀ та́йныѧ дне́сь, сн҃е бж҃їй, прича́стника мѧ̀ прїимѝ: не бо̀ врагѡ́мъ твои̑мъ та́йнꙋ повѣ́мъ, ни лобза́нїѧ тѝ да́мъ ꙗ҆́кѡ і҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ, гдⷭ҇и, во црⷭ҇твїи твое́мъ.

Да не въ сꙋ́дъ и҆лѝ во ѡ҆сꙋжде́нїе бꙋ́детъ мнѣ̀ причаще́нїе ст҃ы́хъ твои́хъ та̑инъ, гдⷭ҇и, но во и҆сцѣле́нїе дꙋшѝ и҆ тѣ́ла.

Та́же пристꙋпа́ютъ хотѧ́щїи причаща́тисѧ. И҆ и҆́дꙋтъ є҆ди́нъ по є҆ди́номꙋ, и҆ покланѧ́ютсѧ со всѧ́цѣмъ ᲂу҆миле́нїемъ и҆ стра́хомъ, согбе́ннѣ рꙋ́цѣ къ пе́рсемъ и҆мꙋ́ще: та́же прїе́млетъ кі́йждо бж҃е́ствєнныѧ та̑йны.

Сщ҃е́нникъ же, причаща́ѧ є҆го̀, глаго́летъ: Причаща́етсѧ ра́бъ бж҃їй, , чⷭ҇тна́гѡ и҆ ст҃а́гѡ тѣ́ла и҆ кро́ве гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, во ѡ҆ставле́нїе грѣхѡ́въ свои́хъ и҆ въ жи́знь вѣ́чнꙋю.

И҆ дїа́конъ ѡ҆тира́етъ є҆мꙋ̀ ᲂу҆стнѣ̀ пла́томъ: и҆ цѣлꙋ́етъ причасти́выйсѧ ст҃ꙋ́ю ча́шꙋ, и҆ поклони́всѧ ѿхо́дитъ. И҆ та́кѡ причаща́ютсѧ всѝ.

По причаще́нїи.

Посе́мъ сщ҃е́нникъ глаго́летъ: Спасѝ, бж҃е, лю́ди твоѧ̑ и҆ благословѝ достоѧ́нїе твоѐ.

И҆ ли́къ пое́тъ: Хлѣ́бъ нбⷭ҇ный и҆ ча́шꙋ жи́зни вкꙋси́те / и҆ ви́дите, ꙗ҆́кѡ бл҃гъ гдⷭ҇ь. / а҆ллилꙋ́їа, а҆ллилꙋ́їа, а҆ллилꙋ́їа.

Сщ҃е́нникъ же покади́въ ст҃а̑ѧ три́жды, и҆ поклони́всѧ, взе́мъ ст҃ы́й поти́ръ и҆ ѡ҆бра́щьсѧ ко две́ремъ, зри́тъ къ лю́демъ, глаго́лѧ та́йнѡ: Бл҃гослове́нъ бг҃ъ на́шъ:

И҆ возгла́снѡ: Всегда̀, ны́нѣ и҆ при́снѡ и҆ во вѣ́ки вѣкѡ́въ. И҆ ѿно́ситъ ст҃а̑ѧ къ же́ртвенникꙋ.

Ли́къ: А҆ми́нь.

Да и҆спо́лнѧтсѧ ᲂу҆ста̀ на̑ша / хвале́нїѧ твоегѡ̀, гдⷭ҇и, / ꙗ҆́кѡ да пое́мъ сла́вꙋ твою̀, / ꙗ҆́кѡ сподо́билъ є҆сѝ на́съ причасти́тисѧ / ст҃ы̑мъ твои̑мъ, бж҃е́ствєннымъ, безсмє́ртнымъ и҆ животворѧ́щымъ та́йнамъ: / соблюдѝ на́съ во твое́й ст҃ы́ни, / ве́сь де́нь поꙋча́тисѧ пра́вдѣ твое́й. / а҆ллилꙋ́їа, а҆ллилꙋ́їа, а҆ллилꙋ́їа.

Дїа́конъ глаго́летъ: Про́сти прїи́мше бж҃е́ственныхъ, ст҃ы́хъ, пречⷭ҇тыхъ, безсме́ртныхъ, нбⷭ҇ныхъ и҆ животворѧ́щихъ, стра́шныхъ хрⷭ҇то́выхъ та̑инъ, досто́йнѡ бл҃годари́мъ гдⷭ҇а.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Ве́чера всегѡ̀ соверше́нна, свѧ́та, ми́рна и҆ безгрѣ́шна и҆спроси́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Ли́къ: Тебѣ̀, гдⷭ҇и.

Мл҃тва по ст҃о́мъ причаще́нїи.

Сщ҃е́нникъ мо́литсѧ та́йнѡ: Бл҃годари́мъ тѧ̀ сп҃са всѣ́хъ бг҃а ѡ҆ всѣ́хъ, и҆̀хже по́далъ є҆сѝ на́мъ бл҃ги́хъ, и҆ ѡ҆ прича́стїи ст҃а́гѡ тѣ́ла и҆ кро́ве хрⷭ҇та̀ твоегѡ̀, и҆ мо́лимъ ти сѧ, влⷣко чл҃колю́бче: сохранѝ на́съ под̾ кро́вомъ крилꙋ̀ твоє́ю, и҆ да́ждь на́мъ да́же до послѣ́днѧгѡ на́шегѡ и҆здыха́нїѧ, досто́йнѣ причаща́тисѧ ст҃ы́нь твои́хъ, въ просвѣще́нїе дꙋшѝ и҆ тѣ́ла, въ црⷭ҇тва нбⷭ҇нагѡ наслѣ́дїе.

Сщ҃е́нникъ возглаша́етъ: Ꙗ҆́кѡ ты̀ є҆сѝ ѡ҆свѧще́нїе на́ше, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

І҆ере́й: Съ ми́ромъ и҆зы́демъ.

Ли́къ: Ѡ҆ и҆́мени гдⷭ҇ни.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Мл҃тва заамвѡ́ннаѧ возглаша́емаѧ ѿ сщ҃е́нника:

Влⷣко вседержи́телю, и҆́же всю̀ тва́рь премꙋ́дростїю содѣ́лавъ, и҆ неизрече́ннымъ твои́мъ про́мысломъ и҆ мно́гою бл҃гостїю введы́й на́съ въ пречестны̑ѧ дни̑ сїѧ̑, ко ѡ҆чище́нїю дꙋша́мъ и҆ тѣ́лѡмъ, къ воздержа́нїю страсте́й, къ наде́жди воскрⷭ҇нїѧ: и҆́же четы́редесѧтми де́ньми скрижа̑ли врꙋчи́въ, бг҃оначерта̑ннаѧ пи́смена, ᲂу҆го́дникꙋ твоемꙋ̀ мѡѷсе́ови, пода́ждь и҆ на́мъ бла́же, по́двигомъ до́брымъ подвиза́тисѧ, тече́нїе поста̀ соверши́ти, вѣ́рꙋ нераздѣ́льнꙋ соблюстѝ, главы̑ неви́димыхъ ѕмїє́въ сокрꙋши́ти, побѣди́телємъ же грѣха̀ ꙗ҆ви́тисѧ, и҆ неѡсꙋжде́ннѡ дости́гнꙋти поклони́тисѧ и҆ ст҃о́мꙋ воскрⷭ҇нїю. ꙗ҆́кѡ бл҃гослови́сѧ и҆ просла́висѧ пречⷭ҇тно́е и҆ великолѣ́пое и҆́мѧ твоѐ, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь. Бꙋ́ди и҆́мѧ гдⷭ҇не бл҃гослове́нно ѿ ны́нѣ и҆ до вѣ́ка. Три́жды.

Чте́ц: Сла́ва, и҆ ны́нѣ:

И҆ ѱало́мъ л҃г:

Бл҃гословлю̀ гдⷭ҇а на всѧ́кое вре́мѧ, вы́нꙋ хвала̀ є҆гѡ̀ во ᲂу҆стѣ́хъ мои́хъ. ѡ҆ гдⷭ҇ѣ похва́литсѧ дꙋша̀ моѧ̀, да ᲂу҆слы́шатъ кро́тцыи, и҆ возвеселѧ́тсѧ. возвели́чите гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ. взыска́хъ гдⷭ҇а, и҆ ᲂу҆слы́ша мѧ̀, и҆ ѿ всѣ́хъ скорбе́й мои́хъ и҆зба́ви мѧ̀. пристꙋпи́те къ немꙋ̀, и҆ просвѣти́тесѧ, и҆ ли́ца ва̑ша не постыдѧ́тсѧ. се́й ни́щїй воззва̀, и҆ гдⷭ҇ь ᲂу҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀. ѡ҆полчи́тсѧ а҆́гг҃лъ гдⷭ҇нь ѡ҆́крестъ боѧ́щихсѧ є҆гѡ̀, и҆ и҆зба́витъ и҆̀хъ. вкꙋси́те и҆ ви́дите, ꙗ҆́кѡ бл҃гъ гдⷭ҇ь: бл҃же́нъ мꙋ́жъ, и҆́же ᲂу҆пова́етъ на́нь. бо́йтесѧ гдⷭ҇а всѝ ст҃і́и є҆гѡ̀, ꙗ҆́кѡ нѣ́сть лише́нїѧ боѧ́щымсѧ є҆гѡ̀. бога́тїи ѡ҆бнища́ша и҆ взалка́ша, взыска́ющїи же гдⷭ҇а не лиша́тсѧ всѧ́кагѡ бл҃га. прїиди́те ча̑да, послꙋ́шайте менє̀, стра́хꙋ гдⷭ҇ню наꙋчꙋ̀ ва́съ. кто́ є҆сть человѣ́къ, хотѧ́й живо́тъ, любѧ́й дни̑ ви́дѣти бл҃ги; ᲂу҆держѝ ѧ҆зы́къ тво́й ѿ ѕла̀, и҆ ᲂу҆стнѣ̀ твоѝ є҆́же не глаго́лати льстѝ. ᲂу҆клони́сѧ ѿ ѕла̀, и҆ сотворѝ бла́го: взыщѝ ми́ра и҆ поженѝ и҆̀. ѻ҆́чи гдⷭ҇ни на пра́вєдныѧ, и҆ ᲂу҆́ши є҆гѡ̀ въ мл҃твꙋ и҆́хъ: лице́ же гдⷭ҇не на творѧ́щыѧ ѕла̑ѧ, є҆́же потреби́ти ѿ землѝ па́мѧть и҆́хъ. воззва́ша пра́веднїи, и҆ гдⷭ҇ь ᲂу҆слы́ша и҆́хъ, и҆ ѿ всѣ́хъ скорбе́й и҆́хъ и҆зба́ви и҆̀хъ. бли́зъ гдⷭ҇ь сокрꙋше́нныхъ се́рдцемъ, и҆ смирє́нныѧ дꙋ́хомъ сп҃се́тъ. мнѡ́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. храни́тъ гдⷭ҇ь всѧ̑ кѡ́сти и҆́хъ, ни є҆ди́на ѿ ни́хъ сокрꙋши́тсѧ. сме́рть грѣ́шникѡвъ люта̀, и҆ ненави́дѧщїи пра́веднаго прегрѣша́тъ. и҆зба́витъ гдⷭ҇ь дꙋ́шы ра̑бъ свои́хъ, и҆ не прегрѣша́тъ всѝ ᲂу҆пова́ющїи на него̀.

Мл҃тва глаго́лемаѧ, внегда̀ потреби́ти ст҃а̑ѧ.

І҆ере́й: Гдⷭ҇и бж҃е на́шъ, введы́й на́съ во всечⷭ҇тны́ѧ дни̑ сїѧ̑, и҆ ѻ҆́бщники на́съ сотвори́въ стра́шныхъ твои́хъ та̑инъ, совокꙋпѝ на́съ слове́сномꙋ твоемꙋ̀ ста́дꙋ и҆ наслѣ́дники покажѝ црⷭ҇твїѧ твоегѡ̀, ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Сщ҃е́нникъ же и҆схо́дитъ, и҆ ста́въ на ѻ҆бы́чномъ мѣ́стѣ, раздае́тъ а҆нті́дѡръ.

По сконча́нїи же ѱалма̀, сщ҃е́нникъ глаго́летъ: Благослове́нїе гдⷭ҇не на ва́съ, тогѡ̀ бл҃года́тїю и҆ чл҃колю́бїемъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

Ѿпꙋ́стъ.

Сщ҃е́нникъ: Хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лѡвъ, и҆ ст҃а́гѡ [ , є҆гѡ́же є҆́сть хра́мъ, и҆ є҆гѡ́же є҆́сть де́нь], и҆́же во ст҃ы́хъ ѻ҆ц҃а̀ на́шегѡ григо́рїа двоесло́ва, па́пы ри́мскагѡ, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бл҃гъ и҆ чл҃вѣколю́бецъ.

Си́це же твори́тъ ѿпꙋ́стъ до страстны́ѧ седми́цы: во страстнꙋ́ю бо седми́цꙋ сво́й ѿпꙋ́стъ глаго́летсѧ. По ѿпꙋ́стѣ же, моли̑твы бл҃года̑рныѧ.

Коне́цъ бж҃е́ственныѧ лїтꙋргі́и преждеѡсщ҃е́нныхъ.