Литургия Преждеосвященных Даров

Литургия оглашаемых

Диакон, по обычаю, став на амвоне, возглашает:

Благослови́ Влады́ко.

Священник, стоя пред святою трапезою во олтари, возгласно глаголет: Благослове́но Ца́рство Отца́ и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Чтец: Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, его́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На тых пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, его́же созда́л еси́ руга́тися ему́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Ектения великая

Диакон: Ми́ром Го́споду помо́лимся.

Лик: Го́споди, поми́луй.

О свы́шнем ми́ре и спасе́нии душ на́ших, Го́споду помо́лимся.

Лик: Го́споди, поми́луй.

О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.

Лик: Го́споди, поми́луй.

О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

Лик: Го́споди, поми́луй.

О Вели́ком Господи́не и отце́ на́шем Святе́йшем Патриа́рхе (имя), и о господи́не на́шем преосвяще́ннейшем митрополи́те (или архиепи́скопе, или епи́скопе) (имя), честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.

Лик: Го́споди, поми́луй.

О Богохрани́мей стране́ на́шей, власте́х и во́инстве ея́, Го́споду помо́лимся.

Лик: Го́споди, поми́луй.

О гра́де сем (или о ве́си сей, или о святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.

Лик: Го́споди, поми́луй.

О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.

Лик: Го́споди, поми́луй.

О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.

Лик: Го́споди, поми́луй.

О изба́витися нам от вся́кия ско́рби, гне́ва и ну́жды, Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник возглашает: Я́ко подоба́ет Тебе́ вся́кая сла́ва, честь, и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Наченшуся же стихословию, отходит священник во святое предложение и взем Преждеосвященный Хлеб от хлебоносца, полагает и со благоговением многим во святый дискос, вложив во святую чашу вино и воду обычно. И взем кадильницу, кадит звездицу и покровы, и покрывает я.

Первая статия 18 кафизмы. Псалом 119

Чтец: Ко Го́споду, внегда́ скорбе́ти ми, воззва́х, и услы́ша мя. Го́споди, изба́ви ду́шу мою́ от усте́н непра́ведных и от язы́ка льсти́ва. Что да́стся тебе́, или́ что приложи́тся тебе́ к язы́ку льсти́ву? Стре́лы си́льнаго изощре́ны, со у́гльми пусты́нными. Увы́ мне, я́ко прише́льствие мое́ продолжи́ся, всели́хся с селе́нии Кида́рскими. Мно́го прише́льствова душа́ моя́, с ненави́дящими ми́ра бех ми́рен: егда́ глаго́лах им, боря́ху мя ту́не.

Псалом 120

Возведо́х о́чи мои́ в го́ры, отню́дуже прии́дет по́мощь моя́. По́мощь моя́ от Го́спода, сотво́ршаго не́бо и зе́млю. Не даждь во смяте́ние ноги́ твоея́, ниже́ воздре́млет храня́й тя, се не воздре́млет, ниже́ у́снет храня́й Изра́иля. Госпо́дь сохрани́т тя, Госпо́дь покро́в твой на ру́ку десну́ю твою́. Во дни со́лнце не ожже́т тебе́, ниже́ луна́ но́щию. Госпо́дь сохрани́т тя от вся́каго зла, сохрани́т ду́шу твою́ Госпо́дь. Госпо́дь сохрани́т вхожде́ние твое́ и исхожде́ние твое́, отны́не и до ве́ка.

Псалом 121

Возвесели́хся о ре́кших мне: в дом Госпо́день по́йдем. Стоя́ще бя́ху но́ги на́ша во дво́рех твои́х, Иерусали́ме. Иерусали́м зи́ждемый я́ко град, ему́же прича́стие его́ вку́пе. Та́мо бо взыдо́ша коле́на, коле́на Госпо́дня, свиде́ние Изра́илево, испове́датися и́мени Госпо́дню, я́ко та́мо седо́ша престо́ли на суд, престо́ли в дому́ Дави́дове. Вопроси́те же я́же о ми́ре Иерусали́ма: и оби́лие лю́бящым тя. Бу́ди же мир в си́ле твое́й и оби́лие в столпостена́х твои́х. Ра́ди бра́тий мои́х и бли́жних мои́х глаго́лах у́бо мир о тебе́. До́му ра́ди Го́спода Бо́га на́шего взыска́х блага́я тебе́.

Псалом 122

К Тебе́ возведо́х о́чи мои́, живу́щему на Небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны. Поми́луй нас, Го́споди, поми́луй нас, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Псалом 123

Я́ко а́ще не Госпо́дь бы был в нас, да рече́т у́бо Изра́иль, я́ко а́ще не Госпо́дь бы был в нас, внегда́ воста́ти челове́ком на ны, у́бо живы́х поже́рли бы́ша нас, внегда́ прогне́ватися я́рости их на ны, у́бо вода́ потопи́ла бы нас. Пото́к пре́йде душа́ на́ша, у́бо пре́йде душа́ на́ша во́ду непостоя́нную. Благослове́н Госпо́дь, И́же не даде́ нас в лови́тву зубо́м их. Душа́ на́ша, я́ко пти́ца изба́вися от се́ти ловя́щих: сеть сокруши́ся, и мы изба́влени бы́хом. По́мощь на́ша во и́мя Го́спода, сотво́ршаго не́бо и зе́млю.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Ектения малая

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Молитва первого антифона

Иерей: Го́споди ще́дрый и ми́лостивый, долготерпели́ве и многоми́лостиве, внуши́ моли́тву на́шу и вонми́ гла́су моле́ния на́шего. Сотвори́ с на́ми зна́мение во бла́го, наста́ви нас на путь Твой, е́же ходи́ти во и́стине Твое́й, возвесели́ се́рдца на́ша, во е́же боя́тися и́мене Твоего́ свята́го. Зане́ ве́лий еси́ и творя́й чудеса́, Ты еси́ Бог еди́н, и несть подо́бен Тебе́ в бозе́х, Го́споди, си́лен в ми́лости, и благ в кре́пости, во е́же помога́ти, и утеша́ти, и спаса́ти вся упова́ющия во и́мя свято́е Твое́.

Возглас: Я́ко Твоя́ держа́ва и Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Вторая статия 18 кафизмы Псалом 124

Чтец: Наде́ющиися на Го́спода, я́ко гора́ Сио́н: не подви́жится в век живы́й во Иерусали́ме. Го́ры о́крест его́, и Госпо́дь о́крест люде́й Свои́х отны́не и до ве́ка. Я́ко не оста́вит Госпо́дь жезла́ гре́шных на жре́бий пра́ведных, я́ко да не про́струт пра́веднии в беззако́ния рук свои́х. Ублажи́, Го́споди, благи́я и пра́выя се́рдцем. Уклоня́ющыяся же в развраще́ния отведе́т Госпо́дь с де́лающими беззако́ние. Мир на Изра́иля.

Псалом 125

Внегда́ возврати́ти Го́споду плен Сио́нь, бы́хом я́ко уте́шени. Тогда́ испо́лнишася ра́дости уста́ на́ша и язы́к наш весе́лия, тогда́ реку́т во язы́цех: возвели́чил есть Госпо́дь сотвори́ти с ни́ми. Возвели́чил есть Госпо́дь сотвори́ти с на́ми: бы́хом веселя́щеся. Возврати́, Го́споди, плене́ние на́ше, я́ко пото́ки ю́гом. Се́ющии слеза́ми, ра́достию по́жнут. Ходя́щии хожда́ху и пла́кахуся, мета́юще се́мена своя́, гряду́ще же прии́дут ра́достию, взе́млюше рукоя́ти своя́.

Псалом 126

А́ще не Госпо́дь сози́ждет дом, всу́е труди́шася зи́ждущии. А́ще не Госпо́дь сохрани́т град, всу́е бде стреги́й. Всу́е вам есть у́треневати, воста́нете по седе́нии, яду́щии хлеб боле́зни, егда́ даст возлю́бленным Свои́м сон. Се достоя́ние Госпо́дне сы́нове, мзда плода́ чре́вняго. Я́ко стре́лы в руце́ си́льнаго, та́ко сы́нове оттрясе́нных. Блаже́н, и́же испо́лнит жела́ние свое́ от них. Не постыдя́тся, егда́ глаго́лют враго́м свои́м во врате́х.

Псалом 127

Блаже́ни вси боя́щиися Го́спода, ходя́щии в путе́х Его́. Труды́ плодо́в Твои́х сне́си: блаже́н еси́, и добро́ тебе́ бу́дет. Жена́ твоя́, я́ко лоза́, плодови́та в страна́х до́му твоего́, сы́нове твои́, я́ко новосажде́ния ма́сличная, о́крест трапе́зы твоея́. Се та́ко благослови́тся челове́к боя́йся Го́спода. Благослови́т тя Госпо́дь от Сио́на, и у́зриши блага́я Иерусали́ма вся дни живота́ твоего́, и у́зриши сы́ны сыно́в твои́х. Мир на Изра́иля.

Псалом 128

Мно́жицею бра́шася со мно́ю от ю́ности моея́, да рече́т у́бо Изра́иль: мно́жицею бра́шася со мно́ю от ю́ности моея́, и́бо не премого́ша мя. На хребте́ мое́м де́лаша гре́шницы, продолжи́ша беззако́ние свое́. Госпо́дь Пра́веден ссече́ вы́я гре́шников. Да постыдя́тся и возвратя́тся вспять вси ненави́дящии Сио́на. Да бу́дут, я́ко трава́ на здех, я́же пре́жде восторже́ния и́зсше, е́юже не испо́лни руки́ своея́ жняй, и не́дра своего́ рукоя́ти собира́яй, и не ре́ша мимоходя́щии: благослове́ние Госпо́дне на вы, благослови́хом вы во и́мя Госпо́дне.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Ектения малая

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Молитва второго антифона

Иерей: Го́споди, да не я́ростию Твое́ю обличи́ши нас, ниже́ гне́вом Твои́м нака́жеши нас, но сотвори́ с на́ми по ми́лости Твое́й, врачу́ и исцели́телю душ на́ших, наставля́я нас ко приста́нищу хоте́ния Твоего́. Просвети́ о́чи серде́ц на́ших в позна́ние Твоея́ и́стины; и да́руй нам про́чее настоя́щаго дне ми́рное и безгре́шное, и все вре́мя живота́ на́шего, моли́твами святы́я Богоро́дицы, и всех святы́х Твои́х.

Возглас: Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Третья статия 18 кафизмы Псалом 129

Чтец: Из глубины́ воззва́х к Тебе́, Го́споди, Го́споди, услы́ши глас мой. Да бу́дут у́ши Твои́ вне́млюще гла́су моле́ния моего́. А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть. И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода. От стра́жи у́тренния до но́щи, от стра́жи у́тренния да упова́ет Изра́иль на Го́спода. Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний его́.

Псалом 130

Го́споди, не вознесе́ся се́рдце мое́, ниже́ вознесо́стеся о́чи мои́, ниже́ ходи́х в вели́ких, ниже́ в ди́вных па́че мене́. А́ще не смиреному́дрствовах, но вознесо́х ду́шу мою́, я́ко отдое́ное на ма́терь свою́, та́ко возда́си на ду́шу мою́. Да упова́ет Изра́иль на Го́спода, отны́не и до ве́ка.

Псалом 131

Помяни́, Го́споди, Дави́да и всю кро́тость его́: я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́, или́ взы́ду на одр посте́ли моея́, а́ще дам сон очи́ма мои́ма и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се слы́шахом я во Евфра́фе, обрето́хом я в поля́х дубра́вы. Вни́дем в селе́ния Его́, поклони́мся на ме́сто, иде́же стоя́сте но́зе Его́. Воскресни́, Го́споди, в поко́й Твой, Ты и киво́т святы́ни Твоея́. Свяще́нницы Твои́ облеку́тся пра́вдою, и преподо́бнии Твои́ возра́дуются. Дави́да ра́ди раба́ Твоего́ не отврати́ лице́ пома́заннаго Твоего́. Кля́тся Госпо́дь Дави́ду и́стиною и не отве́ржется ея́: от плода́ чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мой, и свиде́ния Моя́ сия́, и́мже научу́ я, и сы́нове их до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и в жили́ще Себе́. Сей поко́й Мой во век ве́ка, зде вселю́ся, я́ко изво́лих и. Лови́тву его́ благословля́яй благословлю́, ни́щыя его́ насы́щу хле́бы, свяще́нники его́ облеку́ во спасе́ние, и преподо́бнии его́ ра́достию возра́дуются. Та́мо возращу́ рог Дави́дови, угото́вах свети́льник пома́занному Моему́. Враги́ его́ облеку́ студо́м, на не́мже процвете́т святы́ня Моя́.

Псалом 132

Се что добро́, или́ что красно́? Но е́же жи́ти бра́тии вку́пе. Я́ко ми́ро на главе́, сходя́щее на браду́, браду́ Ааро́ню, сходя́щее на оме́ты оде́жды его́, я́ко роса́ Аермо́нская сходя́щая на го́ры Сио́нския, я́ко та́мо запове́да Госпо́дь благослове́ние и живо́т до ве́ка.

Псалом 133

Се ны́не благослови́те Го́спода вси раби́ Госпо́дни, стоя́щии в хра́ме Госпо́дни, во дво́рех до́му Бо́га на́шего, В но́щех воздежи́те руки́ ва́ша во свята́я, и благослови́те Го́спода. Благослови́т тя Госпо́дь от Сио́на, сотвори́вый не́бо и зе́млю.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Ектения малая

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Молитва третьего антифона

Иерей: Го́споди Бо́же наш, помяни́ нас, гре́шных и непотре́бных раб Твои́х, внегда́ призыва́ти нам свято́е и покланя́емое и́мя Твое́, и не посрами́ нас от ча́яния ми́лости Твоея́; но да́руй нам, Го́споди, вся я́же ко спасе́нию проше́ния, и сподо́би нас люби́ти и боя́тися Тебе́ от всего́ се́рдца на́шего, и твори́ти во всех во́лю Твою́.

Возглас: Я́ко Ты еси́ Бог наш, Бог ми́ловати и спаса́ти, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

«Господи, воззвах:»

И абие поется, Го́споди, воззва́х, в прилучившийся глас. Псалмы 140, 141, 129, 116. И диакон кадит по чину.

Го́споди, воззва́х к Тебе́, услы́ши мя. / Услы́ши мя, Го́споди.

Первый лик: Го́споди, воззва́х к Тебе́, услы́ши мя: / вонми́ гла́су моле́ния моего́, / внегда́ воззва́ти ми к Тебе́. / Услы́ши мя, Го́споди.

Вторый лик: Да испра́вится моли́тва моя́, / я́ко кади́ло пред Тобо́ю, / воздея́ние руку́ мое́ю / – же́ртва вече́рняя. / Услы́ши мя, Го́споди.

И по чину стихи: Положи́, Го́споди, хране́ние усто́м мои́м, и дверь огражде́ния о устна́х мои́х. Не уклони́ се́рдце мое́ в словеса́ лука́вствия, непщева́ти вины́ о гресе́х, с челове́ки де́лающими беззако́ние, и не сочту́ся со избра́нными их. Нака́жет мя пра́ведник ми́лостию и обличи́т мя, еле́й же гре́шнаго да не нама́стит главы́ моея́, я́ко еще́ и моли́тва моя́ во благоволе́ниих их. Поже́рты бы́ша при ка́мени судии́ их: услы́шатся глаго́ли мои́, я́ко возмого́ша. Я́ко то́лща земли́ просе́деся на земли́, расточи́шася ко́сти их при а́де. Я́ко к Тебе́, Го́споди, Го́споди, о́чи мои́: на Тя упова́х, не отыми́ ду́шу мою́. Сохрани́ мя от се́ти, ю́же соста́виша ми, и от собла́зн де́лающих беззако́ние. Паду́т во мре́жу свою́ гре́шницы: еди́н есмь аз, до́ндеже прейду́.

Гла́сом мои́м ко Го́споду воззва́х, гла́сом мои́м ко Го́споду помоли́хся. Пролию́ пред Ним моле́ние мое́, печа́ль мою́ пред Ним возвещу́. Внегда́ исчеза́ти от мене́ ду́ху моему́: и Ты позна́л еси́ стези́ моя́: на пути́ сем, по нему́же хожда́х, скры́ша сеть мне. Смотря́х одесну́ю и возгля́дах, и не бе зна́яй мене́: поги́бе бе́гство от мене́, и несть взыска́яй ду́шу мою́. Воззва́х к Тебе́, Го́споди, рех: Ты еси́ упова́ние мое́, часть моя́ еси́ на земли́ живы́х. Вонми́ моле́нию моему́, я́ко смири́хся зело́, изба́ви мя от гоня́щих мя, я́ко укрепи́шася па́че мене́.

На 10, стихиры: Изведи́ из темни́цы ду́шу мою́, испове́датися и́мени Твоему́.

Мене́ ждут пра́ведницы, до́ндеже возда́си мне.

На 8: Из глубины́ воззва́х к Тебе́, Го́споди, Го́споди, услы́ши глас мой.

Да бу́дут у́ши Твои́ вне́млюще гла́су моле́ния моего́.

На 6: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

На 4: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний его́.

На 2: Хвали́те Го́спода вси язы́цы, похвали́те Его́ вси лю́дие.

Я́ко утверди́ся ми́лость Его́ на нас, и и́стина Госпо́дня пребыва́ет во век.

Сла́ва: Святаго минеи.

И ны́не: Богородичен.

Аще несть святаго Сла́ва, и ны́не: Богородичен.

Вход с кадилом или с Евангелием. Молитва входа

Иерей: Ве́чер и зау́тра и полу́дне, хва́лим, благослови́м, благодари́м и мо́лимся Тебе́, Влады́ко всех: испра́ви моли́тву на́шу, я́ко кади́ло пред Тобо́ю, и не уклони́ серде́ц на́ших в словеса́ или́ в помышле́ния лука́вствия, но изба́ви нас от всех ловя́щих ду́ши на́ша, я́ко к Тебе́, Го́споди Го́споди, о́чи на́ши, и на Тя упова́хом, да не посрами́ши нас, Бо́же наш. Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

По конце же стихир, глаголет диакон, или священник возгласно: Прему́дрость, прости́.

Вечерняя песнь Сыну Божию

Лик: Све́те ти́хий святы́я сла́вы, / Безсме́ртнаго, Отца́ Небе́снаго, / Свята́го Блаже́ннаго, Иису́се Христе́. / Прише́дше на за́пад со́лнца, / ви́девше свет вече́рний, / пое́м Отца́, Сы́на и Свята́го Ду́ха, Бо́га. / Досто́ин еси́ во вся времена́ / пет бы́ти гла́сы преподо́бными, / Сы́не Бо́жий, живо́т дая́й, / те́мже мир Тя сла́вит.

Диакон: Во́нмем.

Священник: Мир всем.

Лик: И ду́хови твоему́.

Диакон: Прему́дрость.

Чтец: Проки́мен:

Диакон: Прему́дрость.

Чтец: Бытия́ чте́ние:

Диакон: Во́нмем.

И читаем Бытие

Диакон: Прему́дрость.

И вторый прокимен.

Посем возглашает диакон: Повели́те.

И по исполнении сего, держа священник свещник со свещею и с кадильницею обема рукама, глаголет возгласно, зря к востоком:

Прему́дрость, прости́.

Таже обратяся на запад к народу, глаголет: Свет Христо́в просвеща́ет всех.

Чтец: При́тчей чте́ние.

И чтец глаголет паримию: аще во утрий день кому имать быти бдение, или полиелей, чтутся паримии празднику, или святому. По Да испра́вится: же, глаголет диакон ектению.

Диакон: Во́нмем.

Чтение Притчей

И по исполнении, глаголет священник: Мир ти.

И чтец: И ду́хови твоему́.

Диакон: Прему́дрость.

«Да направится молитва моя:»

Подобает ведати, егда чтец поет: Да испра́вится моли́тва моя́, я́ко кади́ло пред Тобо́ю: вси людие сущии во храме и во олтаре, стоят на коленах молящеся. Егда же начнет: Воздея́ние руку́ мое́ю: востают. На прочиих же стисех, при пении Да испра́вится: егда который лик поет, и вся страна стоит, вторый же лик и страна народа колена приклоняют. Иерей же, стоя во олтаре пред святою трапезою, прием кадильницу с фимиамом, кадит. Егда же чтец поет последнее Да испра́вится, тогда и сам иерей, отдав кадильницу диакону, приклоняет колена, моляся.

Чтец поет: Да испра́вится моли́тва моя́, / я́ко кади́ло пред Тобо́ю, / воздея́ние руку́ мое́ю, / же́ртва вече́рняя.

Лик поет тоже: Да испра́вится моли́тва моя́:

Таже чтец, стих 1: Го́споди, воззва́х к Тебе́, услы́ши мя, / вонми́ гла́су моле́ния моего́, / внегда́ воззва́ти ми к Тебе́.

Лик: Да испра́вится моли́тва моя́:

Чтец, стих 2: Положи́, Го́споди, хране́ние усто́м мои́м, / и дверь огражде́ния о устна́х мои́х.

Лик: Да испра́вится моли́тва моя́:

Чтец, стих 3: Не уклони́ се́рдце мое́ в словеса́ лука́вствия, / непщева́ти вины́ о гресе́х.

Лик: Да испра́вится моли́тва моя́:

И паки чтец поет: Да испра́вится моли́тва моя́, / я́ко кади́ло пред Тобо́ю.

И лик поет: Воздея́ние руку́ мое́ю, / же́ртва вече́рняя.

И по исполнении творим поклоны три:

Молитва св. Ефрема Сирина

Иерей: Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Поклон.

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Поклон.

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Поклон.

Аще празднуется святому, или храмовый праздник прилучится в постныя дни, тогда глаголет диакон, или иерей:

Во́нмем, и чтец прокимен Апостола, и чтется Апостол, и Аллилуиа поется, и чтение Евангелия, таже ектения сия:

Ектения сугубая

Диакон: Рцем вси от всея́ души́, и от всего́ помышле́ния на́шего рцем.

Лик: Го́споди, поми́луй.

Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.

Лик: Го́споди, поми́луй.

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о Вели́ком Господи́не и отце́ на́шем, Святе́йшем Патриа́рхе (имя), и о господи́не на́шем преосвяще́ннейшем митрополи́те (или архиепи́скопе, или епи́скопе ) (имярек), и о всей во Христе́ бра́тии на́шей.

Лик: Го́споди, поми́луй, трижды.

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Лик: Го́споди, поми́луй, трижды.

Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.

Лик: Го́споди, поми́луй, трижды.

Еще́ мо́лимся о блаже́нных и приснопа́мятных святе́йших патриа́рсех правосла́вных и созда́телех свята́го хра́ма сего́ (аще во обители: святы́я оби́тели сея́), и о всех пре́жде почи́вших отце́х и бра́тиях, зде лежа́щих и повсю́ду, правосла́вных.

Лик: Го́споди, поми́луй, трижды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́ (аще во обители: святы́я оби́тели сея́).

Лик: Го́споди, поми́луй, трижды.

Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Лик: Го́споди, поми́луй, трижды.

Молитва усердного моления

Иерей: Го́споди Бо́же наш, приле́жное сие́ моле́ние приими́ от Твои́х раб, и поми́луй нас по мно́жеству ми́лости Твоея́, и щедро́ты Твоя́ низпосли́ на ны и на вся лю́ди Твоя́, ча́ющыя от Тебе́ бога́тыя ми́лости.

Возглашение: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Ектения об оглашаемых

Таже диакон: Помоли́теся, оглаше́ннии, Го́сподеви.

Лик: Го́споди, поми́луй.

Ве́рнии, о оглаше́нных помо́лимся, да Госпо́дь поми́лует их.

Лик: Го́споди, поми́луй.

Огласи́т их сло́вом и́стины.

Лик: Го́споди, поми́луй.

Откры́ет им Ева́нгелие пра́вды.

Лик: Го́споди, поми́луй.

Соедини́т их святе́й Свое́й собо́рней и апо́стольстей Це́ркви.

Лик: Го́споди, поми́луй.

Спаси́, поми́луй, заступи́ и сохрани́ их, Бо́же, Твое́ю благода́тию.

Лик: Го́споди, поми́луй.

Оглаше́ннии, главы́ ва́ша Го́сподеви приклони́те.

Лик: Тебе́, Го́споди.

Молитва об оглашаемых

Иерей: Бо́же, Бо́же наш, созда́телю и соде́телю всех, и́же всем хотя́й спасти́ся и в ра́зум и́стины приити́, при́зри на рабы́ Твоя́ оглаше́нныя, и изба́ви их дре́вния пре́лести и ко́зни сопроти́внаго: и призови́ их в жизнь ве́чную, просвеща́я их ду́ши и телеса́, и сопричита́я их слове́сному Твоему́ ста́ду, на не́мже и́мя Твое́ свято́е нарица́ется.

Возгласно: Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

И диакон глаголет: Ели́цы оглаше́ннии, изыди́те, оглаше́ннии изыди́те, ели́цы оглаше́ннии, изыди́те. Да никто́ от оглаше́нных, ели́цы ве́рнии, па́ки и па́ки ми́ром Го́споду помо́лимся.

Лик: Го́споди, поми́луй.

Зри. Сия точию глаголются до среды четвертыя седмицы поста. От среды же средопостныя, по еже рещи священнику:

Да и ти́и с на́ми сла́вят: глаголются и сия диаконства от диакона, на Преждеосвященных точию Литургиах, аще и празднуемый день, кроме суббот и недель.

Диакон: Ели́цы оглаше́ннии, изыди́те, оглаше́ннии изыди́те. Ели́цы ко просвеще́нию, изыди́те. Помоли́теся и́же ко просвеще́нию.

Лик: Го́споди, поми́луй.

Ектения о просвещаемых

Диакон: Ве́рнии, о и́же ко свято́му Просвеще́нию гото́вящихся бра́тиях и спасе́нии их, Го́споду помо́лимся.

Лик: Го́споди, поми́луй.

Я́ко да Госпо́дь Бог наш утверди́т их и укрепи́т.

Лик: Го́споди, поми́луй.

Просвети́т их просвеще́нием ра́зума и благоче́стия.

Лик: Го́споди, поми́луй.

Сподо́бит их во вре́мя благопотре́бно ба́ни пакибытия́, оставле́ния грехо́в и оде́жди нетле́ния.

Лик: Го́споди, поми́луй.

Породи́т их водо́ю и Ду́хом.

Лик: Го́споди, поми́луй.

Да́рует им соверше́ние ве́ры.

Лик: Го́споди, поми́луй.

Сопричте́т их свято́му Своему́ и избра́нному ста́ду.

Лик: Го́споди, поми́луй.

Спаси́, поми́луй, заступи́ и сохрани́ их, Бо́же, Твое́ю благода́тию.

Лик: Го́споди, поми́луй.

И́же ко Просвеще́нию, главы́ ва́ша Го́сподеви приклони́те.

Лик: Тебе́, Го́споди.

Молитва о готовящихся ко святому Просвещению

Иерей: Яви́, Влады́ко, лице́ Твое́ на и́же ко свято́му Просвеще́нию гото́вящихся и жела́ющих грехо́вную скве́рну оттрясти́. Озари́ их помышле́ние, извести́ я в ве́ре, утверди́ в наде́жди, соверши́ в любви́, у́ды че́стны Христа́ Твоего́ покажи́, да́вшаго Себе́ избавле́ние о душа́х на́ших.

Возглас: Я́ко Ты еси́ просвеще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Литургия верных

Диакон: Ели́цы ко Просвеще́нию, изыди́те, и́же ко Просвеще́нию, изыди́те, ели́цы оглаше́ннии, изыди́те. Да никто́ от оглаше́нных, ели́цы ве́рнии, па́ки и па́ки ми́ром Го́споду помо́лимся.

Лик: Го́споди, поми́луй.

Даже до зде, яже от среды средопостныя.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Прему́дрость.

Молитва верных первая

Священник: Бо́же вели́кий и хва́льный, и́же животворя́щею Христа́ Твоего́ сме́ртию в нетле́ние нас от тле́ния преста́вивый, Ты вся на́ша чу́вства стра́стнаго умерщвле́ния свободи́, блага́го тем влады́ку вну́тренний по́мысл приста́вив; и о́ко у́бо да неприо́бщно бу́дет вся́каго лука́ваго зре́ния, слух же словесе́м пра́здным невхо́ден, язы́к же да очи́стится от глаго́л неподо́бных. Очи́сти же на́ша устне́, хва́лящия Тя, Го́споди; ру́ки на́ша сотвори́ злых у́бо оша́ятися дея́ний, де́йствовати же то́чию я́же Тебе́ благоуго́дная, вся на́ша у́ды и мысль Твое́ю утвержда́я благода́тию.

Священник возглашает: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

[Егда священник един служит, сия не глаголет:

О свы́шнем ми́ре и спасе́нии душ на́ших, Го́споду помо́лимся.

О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.

О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

О изба́витися нам от вся́кия ско́рби, гне́ва и ну́жды, Го́споду помо́лимся. ]

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Прему́дрость.

Молитва верных вторая

Иерей: Влады́ко святы́й, преблаги́й, мо́лим Тя, в ми́лости бога́таго, ми́лостива бы́ти нам, гре́шным, и досто́йны нас сотвори́ подъя́тия Единоро́днаго Твоего́ Сы́на и Бо́га на́шего, Царя́ Сла́вы. Се бо пречи́стое Его́ Те́ло и животворя́щая Кровь, в настоя́щий час входя́щия, на та́йней сей предложи́тися и́мут трапе́зе, от мно́жества Во́инства небе́снаго неви́димо дориноси́ма. И́хже прича́стие неосужде́нно нам да́руй, да те́ми мы́сленным о́ком озаря́еми, сы́нове све́та и дне бу́дем.

Священник возглашает: По да́ру Христа́ Твоего́, с Ни́мже благослове́н еси́, со Пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

И отверзаются святыя двери.

Великий вход

Лик поет: Ны́не Си́лы Небе́сныя с на́ми неви́димо слу́жат, / се бо вхо́дит Царь Сла́вы, се же́ртва та́йная соверше́на дорино́сится.

Сему же певаему, входит диакон северною страною во святый олтарь и кадит святую трапезу, и святое предложение, и священника, и ставше вкупе, глаголют:

Ны́не Си́лы Небе́сныя: трижды. И поклонившеся трижды, отходят и преносят Святыя Дары по обычаю, идуще же ничтоже глаголют. И вшед поставляет я священник по обычаю на святей трапезе, и покрывает воздухом, ничесоже глаголя над ними, точию кадит я.

После входа в алтарь

Лик поет: Ве́рою и любо́вию присту́пим, / да прича́стницы жи́зни ве́чныя бу́дем. / Аллилу́иа, аллилу́иа, аллилу́иа.

Посем поклоны великия три, глаголюще в них на коемждо поклоне молитву преподобнаго Ефрема:

Молитва св. Ефрема Сирина

Иерей: Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Поклон.

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Поклон.

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Поклон.

Диакон затворяет Царские врата и завесу наполовину, таже исходит на обычное место и глаголет диаконства:

Ектения просительная

Диакон: Испо́лним вече́рнюю моли́тву на́шу Го́сподеви.

Лик: Го́споди, поми́луй.

О предложе́нных и Преждеосвяще́нных Честны́х Даре́х, Го́споду помо́лимся.

Лик: Го́споди, поми́луй.

Я́ко да человеколю́бец Бог наш, прие́м я во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.

Лик: Го́споди, поми́луй.

О изба́витися нам от вся́кия ско́рби, гне́ва и ну́жды, Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Ве́чера всего́ соверше́нна, свя́та, ми́рна и безгре́шна, у Го́спода про́сим.

Лик: Пода́й, Го́споди.

А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.

Лик: Пода́й, Го́споди.

Проще́ния и оставле́ния грехо́в и прегреше́ний на́ших, у Го́спода про́сим.

Лик: Пода́й, Го́споди.

До́брых и поле́зных душа́м на́шим, и ми́ра ми́рови, у Го́спода про́сим.

Лик: Пода́й, Го́споди.

Про́чее вре́мя живота́ на́шего в ми́ре и покая́нии сконча́ти, у Го́спода про́сим.

Лик: Пода́й, Го́споди.

Христиа́нския кончи́ны живота́ на́шего, безболе́знены, непосты́дны, ми́рны, и до́браго отве́та на стра́шнем суди́щи Христо́ве про́сим.

Лик: Пода́й, Го́споди.

Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Молитва после поставления Св. Даров на престол и перед причащением

Священник молится: И́же неизрече́нных и неви́димых Та́ин Бо́же, у Него́же суть сокро́вища прему́дрости и ра́зума утае́на. И́же служе́ние слу́жбы сея́ откры́вый нам, и положи́вый нас, гре́шных, за мно́гое Твое́ человеколю́бие, во е́же приноси́ти Тебе́ да́ры же и же́ртвы о на́ших гресе́х и о людски́х неве́дениих. Сам, неви́димый Царю́, творя́й вели́кая и неизсле́дованная, сла́вная же и изря́дная, и́мже несть числа́, при́зри на ны, недосто́йныя рабы́ Твоя́, и́же свято́му сему́ же́ртвеннику, а́ки херуви́мскому Твоему́ предстоя́щия престо́лу, на не́мже Единоро́дный Твой Сын и Бог наш, предлежа́щими стра́шными почива́ет Та́инствы. И вся́кия нас и ве́рныя лю́ди Твоя́ свободи́в нечистоты́, освяти́ всех нас ду́ши и телеса́ освяще́нием неотъе́млемым. Да чи́стою со́вестию, непосра́мленным лице́м, просвеще́нным се́рдцем Боже́ственных сих причаща́ющеся Святы́нь, и от них оживотворя́еми, соедини́мся самому́ Христу́ Твоему́, и́стинному Бо́гу на́шему, ре́кшему: яды́й Плоть Мою́ и пия́й Кровь Мою́ во Мне пребыва́ет, и Аз в нем. Я́ко да все́льшуся в нас и ходя́щу Сло́ву Твоему́, Го́споди, бу́дем храм Пресвята́го и покланя́емаго Твоего́ Ду́ха, изба́влени вся́кия диа́вольския ко́зни, дея́нием, или́ сло́вом, или́ мы́слию де́йствуемыя, и получи́м обетова́нная нам блага́я, со все́ми святы́ми Твои́ми, от ве́ка Тебе́ благоугоди́вшими.

Священник возглашает: И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати.

Людие: О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник возглашает: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Священник: Мир всем.

Лик: И ду́хови твоему́.

Диакон: Главы́ на́ша Го́сподеви прикло́ним.

Лик: Тебе́, Го́споди.

Молитва главопреклонения

Священник преклоняся молится: Бо́же, еди́ный благи́й и благоутро́бный, и́же в высо́ких живы́й и на смире́нныя призира́яй, при́зри благоутро́бным о́ком на вся лю́ди Твоя́, и сохрани́ их. И сподо́би вся ны неосужде́нно причасти́тися животворя́щих Твои́х сих Та́ин. Тебе́ бо своя́ подклони́хом главы́, ча́юще от Тебе́ бога́тыя ми́лости.

Возглас: Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Священник молится

Вонми́, Го́споди Иису́се Христе́, Бо́же наш, от свята́го жили́ща Твоего́, и от престо́ла сла́вы Ца́рствия Твоего́, и прииди́ во е́же освяти́ти нас, и́же горе́ со Отце́м седя́й, и зде нам неви́димо спребыва́яй. И сподо́би держа́вною Твое́ю руко́ю препода́ти нам пречи́стое Те́ло Твое́ и Честну́ю Кровь, и на́ми всем лю́дем.

По молитве же священник и диакон покланяются трижды, глаголюще: Бо́же, очи́сти мя, гре́шнаго.

Вземлет же священник покровы от Святых Даров, и покрывает я воздухом. Егда же имать вознести Святый Хлеб, вносит священник руку свою со страхом многим, и прикасается Божественному Хлебу со благоговением и страхом.

Диакон: Во́нмем.

Возглашает священник: Преждеосвяще́нная Свята́я святы́м.

Лик: Еди́н свят, / еди́н Госпо́дь / Иису́с Христо́с, / во сла́ву Бо́га Отца́. / Ами́нь.

Таже священник отлагает святый воздух и творит по обычаю святое причастие Божественных Даров.

Причастен

Лик же поет: Вкуси́те и ви́дите, я́ко благ Госпо́дь. Аллилу́иа, аллилу́иа, аллилу́иа.

Аще святаго, или храма чтен Апостол и Евангелие, и другий киноник поется, иже указан.

Причащение в алтаре

Затворяется завеса до конца. Диакон входит во святый олтарь, и глаголет: Раздроби́, влады́ко, Святы́й Хлеб.

Священник раздробляет его со многим вниманием, на четыри части, глаголя: Раздробля́ется и разделя́ется А́гнец Бо́жий, раздробля́емый и неразделя́емый, всегда́ ядо́мый и никогда́же иждива́емый, но причаща́ющияся освяща́яй.

И влагает частицу в потир, ничтоже глаголя, и диакон вливает теплоту в потир, ничтоже глаголя, и стоит мало подале.

Священник же глаголет: Диа́коне приступи́.

И пришед диакон, творит поклон благоговейно, прося прощения, и глаголет: Се прихожду́ к безсме́ртному Царю́ и Бо́гу на́шему. И: Препода́ждь ми, влады́ко, честно́е и свято́е Те́ло и Кровь Го́спода и Бо́га и Спа́са на́шего Иису́са Христа́.

Священник же, взем Святых Таин едину частицу, дает диакону, глаголя: имярек, священнодиа́кону, преподае́тся честно́е и свято́е и пречи́стое Те́ло и Кровь Го́спода и Бо́га и Спа́са на́шего Иису́са Христа́, во оставле́ние грехо́в его́ и в жизнь ве́чную.

И целовав диакон подающую ему руку, отходит и стоит созади святыя трапезы, и приклонив главу, молится, яко и священник, глаголя:

Ве́рую, Го́споди, и прочая.

Подобне взем и священник едину частицу Святых Таин, глаголет: Честно́е и пресвято́е Те́ло и Кровь Го́спода и Бо́га и Спа́са на́шего Иису́са Христа́ преподае́тся мне, (имя), свяще́ннику, во оставле́ние грехо́в мои́х и в жизнь ве́чную.

И приклонив главу, молится, глаголя: Ве́рую, Го́споди, и испове́дую: И: Ве́чери Твоея́ та́йныя: И: Да не в суд, или́ во осужде́ние: все до конца.

И тако причащаются Святых Таин, со страхом и всяцем утверждением. Таже взем священник губу, отирает руку, глаголя:

Сла́ва Тебе́ Бо́же: трижды.

И прием анафору умывает руки и устне, и глаголет молитву благодарения: Благодари́м Тя, Спа́са всех Бо́га: до конца.

Причащение народа в храме

Диакон же отверзает царская врата, и взем святый потир, глаголет: Со стра́хом Бо́жиим и ве́рою приступи́те.

Лик же поет: Благословлю́ Го́спода на вся́кое вре́мя, / хвала́ Его́ во усте́х мои́х.

Священник же молится: Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причасти́тися пречи́стых Твои́х Та́инств, во оставле́ние грехо́в и в жизнь ве́чную. Ами́нь.

Таже: Ве́чери Твоея́ та́йныя днесь, Сы́не Бо́жий, / прича́стника мя приими́; / не бо враго́м Твои́м та́йну пове́м, ни лобза́ния Ти дам, я́ко Иу́да, / но я́ко разбо́йник испове́даю Тя: / помяни́ мя, Го́споди, во Ца́рствии Твое́м.

Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.

Таже приступают хотящии причащатися. И идут един по единому, и покланяются со всяцем умилением и страхом, согбенне руце к персем имуще, таже приемлет кийждо Божественныя Тайны. Священник же, причащая его, глаголет:

Причаща́ется раб Бо́жий, (имя), честна́го и свята́го Те́ла и Кро́ве Го́спода и Бо́га и Спа́са на́шего Иису́са Христа́, во оставле́ние грехо́в свои́х и в жизнь ве́чную.

И диакон отирает ему устне платом. И целует причастивыйся святую чашу, и поклонився отходит. И тако причащаются вси.

По причащении

Посем священник глаголет: Спаси́, Бо́же, лю́ди Твоя́ и благослови́ достоя́ние Твое́.

И лик поет: Хлеб Небе́сный и Ча́шу Жи́зни вкуси́те / и ви́дите, я́ко благ Госпо́дь. / Аллилу́иа, аллилу́иа, аллилу́иа.

Священник же, покадив Святая трижды, и поклонився, взем святый потир, и обращься ко дверем, зрит к людем, глаголя тайно:

Благослове́н Бог наш:

И возгласно: Всегда́, ны́не и при́сно, и во ве́ки веко́в.

И относят Святая к жертвеннику.

Лик: Ами́нь.

Да испо́лнятся уста́ на́ша / хвале́ния Твоего́ Го́споди, / я́ко да пое́м сла́ву Твою́, / я́ко сподо́бил еси́ нас причасти́тися / святы́м Твои́м, Боже́ственным, безсме́ртным и животворя́щим Та́йнам, / соблюди́ нас во Твое́й святы́ни / весь день поуча́тися пра́вде Твое́й. / Аллилу́иа, аллилу́иа, аллилу́иа.

Диакон глаголет: Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Ве́чера всего́ соверше́нна, свя́та, ми́рна и безгре́шна испроси́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Благодарственная молитва

Священник молится тайно: Благодари́м Тя, Спа́са всех Бо́га, о всех, и́хже по́дал еси́ нам благи́х, и о прича́стии свята́го Те́ла и Кро́ве Христа́ Твоего́, и мо́лим Ти ся, Влады́ко человеколю́бче: сохрани́ нас под кро́вом крилу́ Твое́ю, и даждь нам да́же до после́дняго на́шего издыха́ния, досто́йне причаща́тися святы́нь Твои́х, в просвеще́ние души́ и те́ла, в Ца́рства Небе́снаго насле́дие.

Священник возглашает: Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Иерей: С ми́ром изы́дем.

Лик: О и́мени Госпо́дни.

Диакон: Го́споду помо́лимся.

Лик: Го́споди, поми́луй.

Молитва заамвонная, возглашаемая священником

Влады́ко Вседержи́телю, и́же всю тварь прему́дростию соде́лавый, и неизрече́нным Твои́м про́мыслом и мно́гою бла́гостию введы́й нас в пречестны́я дни сия́, ко очище́нию душа́м и те́лом, к воздержа́нию страсте́й, к наде́жди воскресе́ния. И́же четыредеся́тми де́ньми скрижа́ли вручи́в, богоначерта́нная писмена́, уго́днику Твоему́ Моисе́ови, пода́ждь и нам, Бла́же, по́двигом до́брым подвиза́тися, тече́ние поста́ соверши́ти, ве́ру неразде́льну соблюсти́, главы́ неви́димых зми́ев сокруши́ти, победи́телем же греха́ яви́тися, и неосужде́нно дости́гнути поклони́тися и свято́му воскресе́нию. Я́ко благослови́ся и просла́вися пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь. Бу́ди и́мя Госпо́дне благослове́но от ны́не и до ве́ка. Трижды.

Чтец: Сла́ва, и ны́не:

Псалом 33

Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю и вознесе́м и́мя Его́ вку́пе. Взыска́х Го́спода и услы́ша мя, и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и, и от всех скорбе́й его́ спа́се и. Ополчи́тся А́нгел Госпо́день о́крест боя́щихся Его́, и изба́вит их. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси святи́и Его́, я́ко несть лише́ния боя́щимся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто есть челове́к хотя́й живо́т, любя́й дни ви́дети бла́ги? Удержи́ язы́к твой от зла, и устне́ твои́, е́же не глаго́лати льсти. Уклони́ся от зла, и сотвори́ бла́го. Взыщи́ ми́ра, и пожени́ и. О́чи Госпо́дни на пра́ведныя, и у́ши Его́ в моли́тву их. Лице́ же Госпо́дне на творя́щия зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их, и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегреша́т. Изба́вит Госпо́дь ду́шы раб Свои́х, и не прегреша́т вси, упова́ющии на Него́.

Молитва на потребление святых Даров

Иерей: Го́споди Бо́же наш, введы́й нас во всечестны́я дни сия́, и о́бщники нас сотвори́в стра́шных Твои́х Та́ин, совокупи́ нас слове́сному Твоему́ ста́ду и насле́дники покажи́ Ца́рствия Твоего́, ны́не и при́сно, и во ве́ки веко́в. Ами́нь.

Священник же исходит, и став на обычном месте, раздает антидор.

По скончании же псалма, священник глаголет: Благослове́ние Госпо́дне на вас, Того́ благода́тию и человеколю́бием, всегда́, ны́не и при́сно, и во ве́ки веко́в.

Лик: Ами́нь.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй, трижды. Благослови́.

Затем священник произносит отпуст

Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, (и прочая по дни: и святаго имярек, егоже есть храм, и егоже есть день), и́же во святы́х отца́ на́шего Григо́рия Двоесло́ва, Па́пы Ри́мскаго, и всех святы́х, поми́лует и спасе́т нас, я́ко благ и человеколю́бец.

Сице же творит отпуст до Страстныя седмицы: во Страстную бо седмицу свой отпуст глаголется. По отпусте же, молитвы Благодарныя.

Конец Божественныя Литургии Преждеосвященных.