Послѣ́дованїе ѻ҆́бщаго моле́бна

Общее последование молебного пения с прошениями о помощи, здравии и спасении.

Дїа́конъ: Бл҃гословѝ влⷣко.

І҆ере́й начина́етъ: Бл҃гослове́нъ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

И҆ пое́тъ: Цр҃ю̀ нбⷭ҇ный, ᲂу҆тѣ́шителю, дꙋ́ше и҆́стины, и҆́же вездѣ̀ сы́й и҆ всѧ̑ и҆сполнѧ́ѧй, сокро́вище благи́хъ и҆ жи́зни пода́телю: прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ спасѝ, бла́же, дꙋ́шы на́шѧ.

Чте́цъ: Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.

Гдⷭ҇и поми́лꙋй, три́жды.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.

Сщ҃е́нникъ возглаша́етъ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Та́же, Гдⷭ҇и поми́лꙋй, в҃і.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Прїиди́те, поклони́мсѧ цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.

Покло́ны трѝ.

И҆ ѱало́мъ рм҃в:

Гдⷭ҇и, ᲂу҆слы́ши мл҃твꙋ мою̀, внꙋшѝ моле́нїе моѐ во и҆́стинѣ твое́й, ᲂу҆слы́ши мѧ̀ въ пра́вдѣ твое́й. И҆ не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тсѧ пред̾ тобо́ю всѧ́къ живы́й. Ꙗ҆́кѡ погна̀ вра́гъ дꙋ́шꙋ мою̀, смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ꙗ҆́кѡ мє́ртвыѧ вѣ́ка. И҆ ᲂу҆ны̀ во мнѣ̀ дꙋ́хъ мо́й, во мнѣ̀ смѧте́сѧ се́рдце моѐ. Помѧнꙋ́хъ дни̑ дрє́внїѧ: поꙋчи́хсѧ во всѣ́хъ дѣ́лѣхъ твои́хъ, въ творе́нїихъ рꙋкꙋ̀ твоє́ю поꙋча́хсѧ. Воздѣ́хъ къ тебѣ̀ рꙋ́цѣ моѝ, дꙋша̀ моѧ̀ ꙗ҆́кѡ землѧ̀ безво́днаѧ тебѣ̀. Ско́рѡ ᲂу҆слы́ши мѧ̀ гдⷭ҇и, и҆счезѐ дꙋ́хъ мо́й: не ѿвратѝ лица̀ твоегѡ̀ ѿ менѐ, и҆ ᲂу҆подо́блюсѧ низходѧ́щымъ въ ро́въ. Слы́шанꙋ сотворѝ мнѣ̀ заꙋ́тра млⷭ҇ть твою̀, ꙗ҆́кѡ на тѧ̀ ᲂу҆пова́хъ: скажѝ мнѣ̀ гдⷭ҇и пꙋ́ть, во́ньже пойдꙋ̀, ꙗ҆́кѡ къ тебѣ̀ взѧ́хъ дꙋ́шꙋ мою̀. И҆зми́ мѧ ѿ вра̑гъ мои́хъ, гдⷭ҇и, къ тебѣ̀ прибѣго́хъ. Наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й: дх҃ъ тво́й бл҃гі́й наста́витъ мѧ̀ на зе́млю пра́вꙋ. И҆́мене твоегѡ̀ ра́ди, гдⷭ҇и, живи́ши мѧ̀, пра́вдою твое́ю и҆зведе́ши ѿ печа́ли дꙋ́шꙋ мою̀: И҆ млⷭ҇тїю твое́ю потреби́ши врагѝ моѧ̑, и҆ погꙋби́ши всѧ̑ стꙋжа́ющыѧ дꙋшѝ мое́й: ꙗ҆́кѡ а҆́зъ ра́бъ тво́й є҆́смь.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]

По гла́сꙋ тропарѧ̀.

Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.

Сті́хъ а҃: И҆сповѣ́дайтесѧ гдⷭ҇еви, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.

Сті́хъ в҃: Ѡ҆быше́дше ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ.

Сті́хъ г҃: Не ᲂу҆мрꙋ̀, но жи́въ бꙋ́дꙋ, и҆ повѣ́мъ дѣла̀ гдⷭ҇нѧ.

Сті́хъ д҃: Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла: ѿ гдⷭ҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ.

Та́же тропа́рь два́жды: Сла́ва, и҆ ны́нѣ: бг҃оро́диченъ є҆гѡ̀.

А҆́ще же моле́бенъ бг҃оро́дицѣ, тропа́рь се́й, гла́съ д҃:

Къ бцⷣѣ прилѣ́жнѡ ны́нѣ притеце́мъ / грѣ́шнїи и҆ смире́ннїи и҆ припаде́мъ, / въ покаѧ́нїи зовꙋ́ще и҆з̾ глꙋбины̀ дꙋшѝ: / влⷣчце, помозѝ на ны̀ млⷭ҇рдовавши: / потщи́сѧ, погиба́емъ ѿ мно́жества прегрѣше́нїй, / не ѿвратѝ твоѧ̑ рабы̑ тщы̀: / тѧ́ бо и҆ є҆ди́нꙋ наде́ждꙋ и҆́мамы. [Два́жды.]

Сла́ва, и҆ ны́нѣ: Не ᲂу҆молчи́мъ никогда̀ бцⷣе, / си̑лы твоѧ̑ глаго́лати недосто́йнїи: / а҆́ще бо ты̀ не бы̀ предстоѧ́ла молѧ́щи, / кто̀ бы на́съ и҆зба́вилъ ѿ толи́кихъ бѣ́дъ; / кто́же бы сохрани́лъ до ны́нѣ свобо́дны; / не ѿстꙋ́пимъ влⷣчце ѿ тебѐ: / твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.

А҆́ще моле́бствꙋемъ ѡ҆ недꙋ́жныхъ, тропа́рь се́й гла́съ то́йже:

Ско́рый въ застꙋпле́нїи є҆ди́нъ сы́й хрⷭ҇тѐ, / ско́рое свы́ше покажѝ посѣще́нїе стра́ждꙋщымъ рабѡ́мъ твои̑мъ, [и҆лѝ стра́ждꙋщемꙋ рабꙋ̀ твоемꙋ̀,] / и҆ и҆зба́ви ѿ недꙋ̑гъ и҆ го́рькихъ болѣ́зней, / и҆ воздви́гни є҆́же пѣ́ти тѧ̀, и҆ сла́вити непреста́ннѡ, / мл҃твами бцⷣы, є҆ди́не чл҃вѣколю́бче.

Сла́ва, и҆ ны́нѣ: конда́къ, гла́съ в҃:

На ѻ҆дрѣ̀ болѣ́зни лежа́щихъ, [и҆лѝ лежа́щаго,] / и҆ сме́ртною ра́ною ᲂу҆ѧ́звленныхъ, [и҆лѝ ᲂу҆ѧ́звленнаго,] / ꙗ҆́коже и҆ногда̀ воздви́глъ є҆сѝ сп҃се, петро́вꙋ те́щꙋ, / и҆ разсла́бленнаго на ѻ҆дрѣ̀ носи́маго: / си́це и҆ ны́нѣ млⷭ҇рде, / стра́ждꙋщихъ, [и҆лѝ стра́ждꙋщаго,] посѣтѝ и҆ и҆сцѣлѝ: / ты́ бо є҆ди́нъ є҆сѝ недꙋ́ги и҆ болѣ̑зни ро́да на́шегѡ понесы́й, / и҆ всѧ̑ могі́й ꙗ҆́кѡ многомлⷭ҇тивъ.

Та́же ѱало́мъ н҃-ый.

Поми́лꙋй мѧ̀ бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. Наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. Ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши внегда̀ сꙋди́ти тѝ. Се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀ и҆ па́че снѣ́га ᲂу҆бѣлю́сѧ. Слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й. Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ. Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. Оу҆блажѝ гдⷭ҇и бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

По се́мъ канѡ́нъ, є҆гѡ́же припѣ́вы:

І҆и҃се сладча́йшїй, сп҃сѝ на́съ, и҆лѝ: Прест҃а́ѧ бцⷣе, сп҃сѝ на́съ, и҆лѝ: Ст҃и́телю ѻ҆́тче нико́лае, молѝ бг҃а ѡ҆ на́съ, и҆лѝ: ко́емꙋ-ли́бо ст҃о́мꙋ.

По г҃-й пѣ́сни припѣ́въ:

Сп҃си́телю: И҆зба́ви ѿ бѣ́дъ рабы̑ твоѧ̑ многомлⷭ҇тиве, / ꙗ҆́кѡ мы̀ ᲂу҆се́рднѡ къ тебѣ̀ прибѣга́емъ, / ми́лостивомꙋ и҆зба́вителю, всѣ́хъ влⷣцѣ гдⷭ҇ꙋ і҆и҃сꙋ.

Бцⷣе: Сп҃сѝ ѿ бѣ́дъ рабы̑ твоѧ̑ бцⷣе, / ꙗ҆́кѡ всѝ по бз҃ѣ къ тебѣ̀ прибѣга́емъ, / ꙗ҆́кѡ къ нерꙋши́мѣй стѣнѣ̀ и҆ предста́тельствꙋ.

При́зри бл҃госе́рдїемъ, всепѣ́таѧ бцⷣе, / на моѐ лю́тое тѣлесѐ ѡ҆ѕлобле́нїе, / и҆ и҆сцѣлѝ дꙋшѝ моеѧ̀ болѣ́знь.

Ст҃о́мꙋ: Молѝ бг҃а ѡ҆ на́съ , / ꙗ҆́кѡ мы̀ ᲂу҆се́рднѡ къ тебѣ̀ прибѣга́емъ, / ско́ромꙋ помо́щникꙋ и҆ моли́твенникꙋ ѡ҆ дꙋша́хъ на́шихъ.

По ѕ҃-й пѣ́сни: припѣ́вы, ꙗ҆́коже и҆ по г҃-й пѣ́сни.

Та́же, Па́ки и҆ па́ки ми́ромъ гдⷭ҇ꙋ помо́лимсѧ.

Застꙋпѝ, сп҃сѝ, поми́лꙋй и҆ сохранѝ на́съ бж҃е, твое́ю бл҃года́тїю.

Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчицꙋ на́шꙋ бцⷣꙋ, и҆ приснодв҃ꙋ мр҃і́ю со всѣ́ми ст҃ы́ми помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Ли́къ: Тебѣ̀ гдⷭ҇и.

Возгла́съ: Ты́ бо є҆сѝ цр҃ь ми́ра, и҆ сп҃съ дꙋ́шъ на́шихъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃омꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

Та́же, а҆́ще хо́щетъ і҆ере́й, чте́тъ а҆ка́ѳїстъ.

Та́же: Во́нмемъ, премꙋ́дрость, во́нмемъ. Прокі́менъ.

И҆ пое́тъ ли́къ прокі́менъ.

Дїа́конъ: Гдⷭ҇ꙋ помо́лимсѧ.

Сщ҃е́нникъ возгла́съ: Ꙗ҆́кѡ ст҃ъ є҆сѝ, бж҃е на́шъ, и҆ во ст҃ы́хъ почива́еши, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

Дїа́конъ: Всѧ́кое дыха́нїе да хва́литъ гдⷭ҇а.

Сті́хъ: Хвали́те бг҃а во ст҃ы́хъ є҆гѡ̀, хвали́те є҆гѡ̀ во ᲂу҆тверже́нїи си́лы є҆гѡ̀.

И҆ по се́мъ возглаша́етъ дїа́конъ:

И҆ ѡ҆ сподо́битисѧ на́мъ слы́шанїю ст҃а́гѡ є҆ѵⷢ҇лїа, гдⷭ҇а бг҃а мо́лимъ.

Ли́къ: Гдⷭ҇и, поми́лꙋй, три́жды.

Дїа́конъ: Премꙋ́дрость, про́сти, ᲂу҆слы́шимъ ст҃а́гѡ є҆ѵⷢ҇лїа.

Сщ҃е́нникъ: Ми́ръ всѣ̑мъ.

Ли́къ: И҆ дꙋ́хови твоемꙋ̀.

Ѿ и҆м҃рекъ, ст҃а́гѡ є҆ѵⷢ҇лїа чте́нїе.

Ли́къ: Сла́ва тебѣ̀ гдⷭ҇и, сла́ва тебѣ̀.

Дїа́конъ: Во́нмемъ.

І҆ере́й чте́тъ прилꙋчи́вшеесѧ є҆ѵⷢ҇лїе.

По є҆ѵⷢ҇лїи, па́ки припѣ́вы канѡ́на пѣ́сней з҃, и҃, ѳ҃.

Та́же, Досто́йно є҆́сть, ꙗ҆́кѡ вои́стиннꙋ, / бл҃жи́ти тѧ̀ бцⷣꙋ, / приснобл҃же́ннꙋю и҆ пренепоро́чнꙋю, / и҆ мт҃рь бг҃а на́шегѡ. / чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

Чте́цъ: Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Гдⷭ҇и поми́лꙋй, три́жды.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

І҆ере́й возглаша́етъ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

И҆ тропарѝ.

По тропарѣ̀, є҆ктенїа̀:

Поми́лꙋй на́съ, бж҃е, по вели́цѣй ми́лости твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ вели́комъ господи́нѣ и҆ ѻ҆ц҃ѣ̀ на́шемъ, свѧтѣ́йшемъ патрїа́рхѣ , и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ] , и҆ ѡ҆ все́й во хрⷭ҇тѣ̀ бра́тїи на́шей.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ ми́лости, жи́зни, ми́рѣ, здра́вїи, спасе́нїи, посѣще́нїи, проще́нїи и҆ ѡ҆ставле́нїи грѣхѡ́въ рабѡ́въ бж҃їихъ, бра́тїи ст҃а́гѡ хра́ма сегѡ̀ [а҆́ще во ѻ҆би́тели: ст҃ы́ѧ ѻ҆би́тели сеѧ̀].

Ли́къ: Гдⷭ҇и, поми́лꙋй, три́жды.

Приложѝ и҆ сїѐ:

Е҆щѐ мо́лимсѧ тебѣ̀, гдⷭ҇ꙋ бг҃ꙋ на́шемꙋ, є҆́же ᲂу҆слы́шатисѧ гла́сꙋ моле́нїѧ на́шегѡ, и҆ моли́твѣ, и҆ поми́ловати раба̀ твоего̀ [и҆лѝ, рабѡ́въ твои́хъ] : благода́тїю и҆ щедро́тами твои́ми, и҆ и҆спо́лнити всѧ̑ проше́нїѧ є҆гѡ̀ [и҆лѝ и҆̀хъ], и҆ прости́ти є҆мꙋ̀ [и҆ли и҆̀мъ̀] всѧ̑ согрѣше́нїѧ вѡ́льнаѧ и҆ нево́льнаѧ: благопрїѧ́тнымъ же бы́ти мольба́мъ и҆ ми́лостынѧмъ є҆гѡ̀ [и҆лѝ и҆̀хъ] предъ престо́ломъ влⷣчествїѧ твоегѡ̀, и҆ покры́ти є҆гѡ̀ [и҆лѝ и҆̀хъ] ѿ вра́гъ ви́димыхъ и҆ неви́димыхъ, ѿ всѧ́кїѧ напа́сти, вѣды̀ и҆ ско́рби, и҆ недꙋ́гѡвъ и҆зба́вити, и҆ пода́ти здра́вїе съ долгоде́нствїемъ: рце́мъ всѝ, гдⷭ҇и, ᲂу҆слы́ши и҆ поми́лꙋй.

Ли́къ: Гдⷭ҇и, поми́лꙋй, три́жды.

При́зри, влⷣко человѣколю́бче, ми́лостивнымъ тѝ ѻ҆́комъ на раба̀ твоего̀ [и҆лѝ, рабѡ́въ твои́хъ] : и҆ ᲂу҆слы́ши молє́нїѧ на́ша съ вѣ́рою приноси́маѧ, ꙗ҆́кѡ са́мъ ре́клъ є҆сѝ: всѧ̀ є҆ли́ка молѧ́щесѧ про́сити, вѣ́рꙋйте, ꙗ҆́кѡ прїи́мете, и҆ бꙋ́детъ ва́мъ, и҆ па́ки: проси́те и҆ да́стсѧ ва́мъ: сегѡ̀ ра́ди и҆ мы̀, а҆́ще и҆ недосто́йнїи, ᲂу҆пова́юще на ми́лость твою̀, про́симъ: пода́ждь бла́гость твою̀, рабꙋ̀ твоемꙋ̀ [и҆лѝ рабѡ́мъ твои́мъ] : и҆ и҆спо́лни блага́ѧ жела́нїѧ є҆гѡ̀ [и҆лѝ и҆̀хъ], ми́рнѡ же и҆ ти́хѡ въ здра́вїи, и҆ долгоде́нствїи всѧ̀ днѝ є҆гѡ̀ [и҆лѝ, и҆̀хъ] соблюдѝ: рце́мъ всѝ, ско́рѡ ᲂу҆слы́ши и҆ ми́лостивнѡ поми́лꙋй.

Ли́къ: Гдⷭ҇и, поми́лꙋй, три́жды.

Е҆щѐ мо́лимсѧ ѡ҆ плодоносѧ́щихъ и҆ добродѣ́ющихъ во ст҃ѣ́мъ и҆ всечестнѣ́мъ хра́мѣ се́мъ, трꙋжда́ющихсѧ, пою́щихъ и҆ предстоѧ́щихъ лю́дехъ, ѡ҆жида́ющихъ ѿ тебѐ вели́кїѧ и҆ бога́тыѧ млⷭ҇ти.

Ли́къ: Гдⷭ҇и, поми́лꙋй, три́жды.

Е҆ктенїа̀ ѡ҆ болѧ́щихъ:

Врачꙋ̀ дꙋ́шъ и҆ тѣле́съ, со ᲂу҆миле́нїемъ въ се́рдцѣ сокрꙋше́нномъ къ тебѣ̀ припа́даемъ, и҆ стенѧ́ще вопїе́мъ тѝ: и҆сцѣлѝ болѣ̑зни, ᲂу҆врачꙋ́й стра̑сти дꙋ́шъ и҆ тѣле́съ рабѡ́въ твои́хъ, [и҆лѝ дꙋшѝ и҆ тѣ́ла раба̀ твоегѡ̀,] : и҆ простѝ и҆̀мъ, [и҆лѝ є҆мꙋ̀,] ꙗ҆́кѡ благосе́рдъ, всѧ̑ прегрѣшє́нїѧ, вѡ́льнаѧ и҆ невѡ́льнаѧ, и҆ ско́рѡ воздви́гни ѿ ѻ҆дра̀ болѣ́зни, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и, поми́лꙋй, три́жды.

Не хотѧ́й сме́рти грѣ́шныхъ, но є҆́же ѡ҆брати́тисѧ, и҆ живы́мъ и҆̀мъ бы́ти, пощадѝ и҆ поми́лꙋй рабѡ́въ твои́хъ [и҆лѝ раба̀ твоего̀] , ми́лостиве: запретѝ болѣ́зни, ѿста́ви всю̀ стра́сть, и҆ ве́сь недꙋ́гъ, и҆ прострѝ крѣ́пкꙋю твою̀ рꙋ́кꙋ, и҆ ꙗ҆́коже і҆аі́ровꙋ дще́рь ѿ ѻ҆дра̀ болѣ́зни воздви́гни, и҆ здра́выхъ [и҆лѝ здра́ва] предста́ви, мо́лимтисѧ ᲂу҆слы́ши и҆ поми́лꙋй.

Ли́къ: Гдⷭ҇и, поми́лꙋй, три́жды.

Ѻ҆́гненнꙋю болѣ́знь петро́вой те́щи прикоснове́нїемъ твои́мъ и҆сцѣли́вый, и҆ ны́нѣ лю́тѣ стра́ждꙋщихъ рабѡ́въ твои́хъ, [и҆лѝ лю́тѣ стра́ждꙋщагѡ раба̀ твоего̀,] , болѣ́знь благосе́рдїемъ твои́мъ и҆сцѣлѝ, здра́вїе и҆̀мъ [и҆лѝ є҆мꙋ̀] ско́рѡ подава́ѧ, прилѣ́жнѡ мо́лимътисѧ, и҆сто́чниче цѣльба́мъ, ᲂу҆слы́ши и҆ поми́лꙋй.

Ли́къ: Гдⷭ҇и, поми́лꙋй, три́жды.

Е҆щѐ мо́лимсѧ гдⷭ҇ꙋ бг҃ꙋ на́шемꙋ, ѡ҆ є҆́же ᲂу҆слы́шати гла́съ моле́нїѧ на́съ грѣ́шныхъ, и҆ поми́ловати рабѡ́въ свои́хъ, и҆ покры́ти и҆̀хъ ѿ всѧ́кїѧ ско́рби, бѣды̀, гнѣ́ва и҆ нꙋ́жды, и҆ ѿ всѧ́кїѧ болѣ́зни дꙋше́вныѧ и҆ тѣле́сныѧ, дарова́ти же и҆̀мъ здра́вїе съ долгоде́нствїемъ, рце́мъ всѝ: ско́рѡ ᲂу҆слы́ши и҆ ми́лостивнѡ поми́лꙋй.

Ли́къ: Гдⷭ҇и, поми́лꙋй, три́жды.

Е҆щѐ мо́лимсѧ ѡ҆ є҆́же сохрани́тисѧ гра́дꙋ семꙋ̀ [и҆лѝ ве́си се́й], и҆ ст҃о́мꙋ хра́мꙋ семꙋ̀ [а҆́ще во ѻ҆би́тели: ст҃ѣ́й ѻ҆би́тели се́й], и҆ всѧ́комꙋ гра́дꙋ и҆ странѣ̀ ѿ гла́да, гꙋби́тельства, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ, и҆ междоꙋсо́бныѧ бра́ни: ѡ҆ є҆́же ми́лостивꙋ и҆ благоꙋвѣ́тливꙋ бы́ти бл҃го́мꙋ и҆ чл҃вѣколюби́вомꙋ бг҃ꙋ на́шемꙋ, ѿврати́ти всѧ́кїй гнѣ́въ на ны̀ дви́жимый, и҆ и҆зба́вити ны̀ ѿ належа́щагѡ и҆ пра́веднагѡ своегѡ̀ преще́нїѧ, и҆ поми́ловати ны̀.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ и҆ ѡ҆ є҆́же ᲂу҆слы́шати гдⷭ҇ꙋ бг҃ꙋ гла́съ моле́нїѧ на́съ грѣ́шныхъ, и҆ поми́ловати на́съ.

Ли́къ: Гдⷭ҇и поми́лꙋй, три́жды.

І҆ере́й возгла́съ: Оу҆слы́ши ны̀, бж҃е сп҃си́телю на́шъ, ᲂу҆пова́нїе всѣ́хъ концє́въ землѝ и҆ сꙋ́щихъ въ мо́ри дале́че: и҆ ми́лостивъ, ми́лостивъ бꙋ́ди, влⷣко, ѡ҆ грѣсѣ́хъ на́шихъ, и҆ поми́лꙋй ны̀. Ми́лостивъ бо и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

По є҆ктенїѝ мл҃тва, комꙋ̀ слꙋ́житсѧ моле́бенъ.

А҆́ще прест҃ѣй бцⷣѣ, і҆ере́й: Ко прест҃ѣ́й влⷣчицѣ дв҃ѣ бцⷣѣ помо́лимсѧ.

Ли́къ: Прест҃а́ѧ бцⷣе, сп҃сѝ на́съ.

Моли́тва:

Цр҃и́це на́ша пребл҃га́ѧ, наде́ждо на́ша бцⷣе, прїѧ́телище си́рыхъ, и҆ стра́нныхъ предста́тельнице, скорбѧ́щихъ ра́досте, ѡ҆би́димыхъ покрови́тельнице, зри́ши на́шꙋ бѣдꙋ̀, зри́ши на́шꙋ ско́рбь: помозѝ на́мъ ꙗ҆́кѡ не́мощнымъ, ѡ҆кормѝ на́съ ꙗ҆́кѡ стра́нныхъ: ѡ҆би́дꙋ на́шꙋ вѣ́си, разрѣшѝ тꙋ̀, ꙗ҆́кѡ во́лиши, ꙗ҆́кѡ не и҆́мамы и҆ны́ѧ по́мощи ра́звѣ тебє̀, ни и҆ны́ѧ предста́тельницы, ни бл҃гі́ѧ ᲂутѣ́шительницы, то́кмѡ тебє̀, ѽ бг҃ома́ти, ꙗ҆́кѡ да сохрани́ши на́съ и҆ покры́еши, во вѣ́ки вѣкѡ́въ.

Ли́къ: А҆ми́нь.

Моли́тва ѡ҆ недꙋ́жныхъ:

Влⷣко вседержи́телю, ст҃ы́й цр҃ю̀, наказꙋ́ѧй и҆ не ᲂу҆мерщвлѧ́ѧй, ᲂу҆твержда́ѧй низпа́дающыѧ, и҆ возводѧ́й низве́ржєнныѧ, тѣлє́сныѧ человѣ́кѡвъ скѡ́рби и҆справлѧ́ѧй, мо́лимсѧ тебѣ̀ бж҃е на́шъ, рабѡ́въ твои́хъ, [и҆лѝ раба̀ твоего̀,] , немощствꙋ́юща посѣтѝ млⷭ҇тїю твое́ю, простѝ и҆̀мъ [и҆лѝ є҆мꙋ̀] всѧ́кое согрѣше́нїе во́льное и҆ нево́льное. є҆́й, гдⷭ҇и, враче́бнꙋю твою̀ си́лꙋ съ нб҃сѐ низпослѝ, прикосни́сѧ тѣлесѝ, ᲂу҆гасѝ ѻ҆гне́вицꙋ, ᲂу҆кротѝ стра́сть и҆ всѧ́кꙋю не́мощь таѧ́щꙋюсѧ: бꙋ́ди вра́чь рабѡ́въ твои́хъ, [и҆лѝ раба̀ твоего̀,] , воздви́гни и҆̀хъ [и҆лѝ є҆го̀] ѿ ѻ҆дра̀ болѣ́зненнагѡ, и҆ ѿ ло́жа ѡ҆ѕлобле́нїѧ цѣ́ла и҆ всесоверше́нна, да́рꙋй и҆̀хъ [и҆лѝ є҆го̀] цр҃кви твое́й бл҃гоꙋгожда́юща и҆ творѧ́ща во́лю твою̀. твое́ бо є҆́сть, є҆́же ми́ловати и҆ сп҃са́ти ны̀ бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Ли́къ: А҆ми́нь.

І҆ере́й: Премꙋ́дрость. Прест҃а́ѧ бцⷣе, сп҃сѝ на́съ.

Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

І҆ере́й: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Гдⷭ҇и поми́лꙋй, три́жды. Бл҃гословѝ.

І҆ере́й ѿпꙋ́стъ:

Хрⷭ҇то́съ и҆́стинный бг҃ъ на́шъ, мл҃твамѝ пречи́стыѧ своеѧ̀ мт҃ре, преподо́бныхъ и҆ бг҃оно́сныхъ ѻ҆ц҃ъ на́шихъ, [и҆́мѧ-рекъ ст҃агѡ, є҆мꙋ́же моле́бенъ], и҆ всѣ́хъ ст҃ы́хъ, поми́лꙋетъ и҆ сп҃се́тъ на́съ, ꙗ҆́кѡ бл҃гъ и҆ чл҃вѣколю́бецъ.

Ли́къ: А҆ми́нь.

Прокі́мны. Спаси́телю:

Гла́съ д҃: Гдⷭ҇и, ᲂу҆слы́ши моли́твꙋ мою̀, / внꙋшѝ моле́нїе моѐ во и҆́стинѣ твое́й.

Сті́хъ: Хвали́те гдⷭ҇а, ꙗ҆́кѡ бл҃гъ гдⷭ҇ь.

Прест҃ѣ́й бцⷣѣ:

Гла́съ д҃: Помѧнꙋ̀ и҆́мѧ твоѐ / во всѧ́комъ ро́дѣ и҆ ро́дѣ.

Сті́хъ: Ѿры́гнꙋ се́рдце моѐ сло́во бла́го.

А҆гг҃лѡ́мъ:

Гла́съ д҃: Творѧ́й а҆́гг҃лы своѧ̑ дꙋ́хи, / и҆ слꙋги̑ своѧ̑ пла́мень ѻ҆́гненный.

Сті́хъ: Благословѝ, дꙋшѐ моѧ̀, гдⷭ҇а, гдⷭ҇и бж҃е мо́й, возвели́чилсѧ є҆сѝ ѕѣлѡ̀.

Проро́кѡмъ:

Гла́съ д҃: Ты̀ і҆ере́й во вѣ́къ / по чи́нꙋ мелхїседе́ковꙋ.

Стїхъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀, до́ндеже положꙋ̀ врагѝ твоѧ̑ подно́жїе но́гъ твои́хъ.

А҆по́столѡмъ:

Гла́съ д҃: Во всю̀ зе́млю и҆зы́де вѣща́нїе и҆́хъ, / и҆ въ концы̑ вселе́нныѧ глаго́лы и҆́хъ.

Стїхъ: Нб҃еса̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.

Свѧти́телю:

Гла́съ а҃: Оу҆ста̀ моѧ̑ возглаго́лютъ премꙋ́дрость, / и҆ поꙋче́нїе се́рдца моегѡ̀ ра́зꙋмъ.

Сті́хъ: Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй.

Ст҃и́телємъ, прпⷣбнымъ, сщ҃енномꙋ́ченикѡмъ и҆ хрⷭ҇та̀ ра́ди ю҆рѡ́дивымъ:

Гла́съ д҃: Честна̀ предъ гдⷭ҇емъ / сме́рть препо́добныхъ є҆гѡ̀.

Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆́же воздаде́ ми.

Мꙋ́ченикꙋ:

Гла́съ д҃: Возвесели́тсѧ пра́ведникъ ѡ҆ гдⷭ҇ѣ / и҆ ᲂу҆пова́етъ на него̀.

Сті́хъ: Оу҆слы́ши, бж҃е, гла́съ мо́й, внегда̀ моли́ти ми сѧ къ тебѣ̀.

Мч҃еникѡмъ и҆ безме́здникѡмъ:

Гла́съ д҃: Ст҃ы́мъ, и҆́же сꙋ́ть на землѝ є҆гѡ̀, / ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ.

Сті́хъ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менє̀ є҆́сть, да не подви́жꙋсѧ.

Сщ҃енномꙋ́ченикꙋ, и҆сповѣ́дникѡмъ и҆ прпⷣбномꙋ́ченикѡмъ:

Гла́съ и҃: Восхва́лѧтсѧ прпⷣбнїи во сла́вѣ / и҆ возра́дꙋютсѧ на ло́жахъ свои́хъ.

Сті́хъ: Воспо́йте гдⷭ҇еви пѣ́снь но́вꙋ, хвале́нїе є҆гѡ̀ въ цр҃кви прпⷣбныхъ.

Мꙋ́ченицамъ и҆ прпⷣбнымъ женамъ:

Гла́съ д҃: Ди́венъ бг҃ъ во ст҃ы́хъ свои́хъ, / бг҃ъ і҆и҃левъ.

Сті́хъ: Въ це́рквахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.

За болѧ́щаго:

Гла́съ д҃: Поми́лꙋй мѧ̀, гдⷭ҇и, ꙗ҆́кѡ не́мощенъ є҆́смь, / и҆сцѣли́ мѧ, ꙗ҆́кѡ смѧто́шасѧ кѡ̑сти моѧ̑.

Сті́хъ: Ꙗ҆́кѡ нѣ́сть въ сме́рти помина́ѧй тебѐ.

Е҆ва́нгелїѧ.

На всѧ́кое проше́нїе, мѳ. к҃ зач. ѿ полꙋ̀.

Прест҃ѣ́й бцⷣѣ, лꙋкѝ д҃ зач.

За болѧ́щаго, матѳ. к҃є.

А҆гг҃лѡ́мъ, лꙋкѝ н҃а, и҆лѝ матѳ. н҃в.

Проро́кѡмъ, матѳ. ч҃ѕ и҆лѝ лꙋкѝ ѯ҃в.

А҆по́столꙋ, матѳ. л҃д.

А҆по́столѡмъ, лꙋкѝ н҃ и҆лѝ н҃а.

Свѧти́телю, і҆ѡа́нна л҃ѕ.

Ст҃и́телємъ, матѳ. а҃і, и҆лѝ і҆ѡа́н. л҃є ѿ полꙋ̀.

Прпⷣбнымъ и҆ ю҆рѡ́див., матѳ. м҃г, и҆лѝ лꙋкѝ к҃д.

Мꙋ́ченикꙋ, лꙋкѝ ѯ҃г и҆лѝ і҆ѡа́нна н҃в.

Мꙋ́ченикѡмъ, матѳ. л҃ѕ и҆лѝ лꙋкѝ р҃ѕ.

Сщ҃енномꙋ́ченикꙋ, лꙋкѝ ѯ҃з.

Сщ҃енномч҃еникѡмъ, лꙋкѝ к҃д, н҃в и ѻ҃з.

Прпⷣбномꙋ́ченикꙋ, ма́рка л҃з.

Преподобномч҃еникѡмъ, матѳ. л҃и и҆лѝ лꙋкѝ ѯ҃д.

Мꙋ́ченицѣ, матѳ. ѯ҃в и҆лѝ ма́рка к҃а.

Прпⷣбнымъ жена̑мъ, матѳ. р҃д, и҆лѝ лꙋкѝ л҃г.

И҆сповѣ́дникѡмъ, лꙋкѝ ѯ҃д.

Безме́здникѡмъ, матѳ. л҃д.