Акафист преподобному Силуану Афонскому

Кондак 1

Избра́нный подви́жниче и земны́й а́нгеле Христо́в, всеблаже́нне о́тче Силуа́не! В непреста́нном бде́нии, посте́ и смире́нии отце́в афо́нских преизря́дный подража́телю, жа́ждею по Бо́зе и горе́нием любве́ к Нему́ благода́ть оби́льную душе́ твое́й стяжа́л еси́, всеблаже́нне. Христу́ подража́я, за томя́щихся во а́де, живы́х и гряду́щих моли́твою сле́зною сраспина́лся еси́. Сицевы́я любве́ твоея́ не лиши́ и нас, во юдо́ли грехо́вней твоего́ предста́тельства пред Бо́гом прося́щих и уми́льно зову́щих:

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Икос 1

А́нгелов Творе́ц и Госпо́дь Сил из чре́ва ма́тере твоея́ предъизбра́ тя, и, по глаго́лу Псалмопе́вца, се́рдце глубоко́ дарова́ ти, богоно́сне о́тче Силуа́не, да, я́ко в черто́зе преизря́днем, вмести́вши невмести́мое и́мя Бо́га Вы́шняго и си́лою Бо́жиею и Бо́жиею Прему́дростию житию́ а́нгельскому всеусе́рдно после́дуеши. Мы же, похваля́юще чу́дный по́двиг земны́х трудо́в твои́х, благогове́йно зове́м ти:

Ра́дуйся, роди́телей благочести́вых плод целому́дренныя чистоты́;

Ра́дуйся, благово́нное цвете́ние их по́двига ве́ры, неувяда́емыя красоты́.

Ра́дуйся, благоче́стие роди́телей твои́х душе́вне возлюби́вый;

Ра́дуйся, целому́дрию и боголю́бию их уподо́битися благоволи́вый.

Ра́дуйся, измла́да ра́дости в Бо́зе иска́ти ди́вно умудри́выйся;

Ра́дуйся, а́ки еле́нь к исто́чнику благода́ти Бо́жия устреми́выйся.

Ра́дуйся, сло́вом Бо́жиим, а́ки сла́дким ме́дом, ра́зум ю́ности твоея́ услади́вый:

Ра́дуйся, се́рдце твое́ во́ле Бо́жией всеце́ло покори́вый.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 2

Ви́де тя Преблагослове́нная Богоро́дица, в пучи́не грехо́вней погружа́ема, егда́ сла́дость грехо́вная, а́ки змий злосмра́дный, вни́де во утро́бу ю́ности твоея́, Ма́терски печа́лующися, ди́вно воззва́ ти: ча́до, приско́рбно Ми есть ви́дети тя во грехо́внем де́лании оскверня́ющася. Ю́же, состра́ждущу о твое́м грехопаде́нии уразуме́в, зми́я грехо́внаго мужему́дренно изри́нул еси́, покая́нием и моли́твою того́ побежда́я, лю́бящему же нас Го́споду при́сно воспева́я о Пречи́стей Ма́тери Его́ благода́рную песнь: Аллилу́иа.

Икос 2

Ра́зум Боже́ственный осени́ тя, егда́ глас Ма́тере Го́спода Сил услы́шати сподо́бился еси́, избра́нниче Бо́жий Силуа́не, и благода́ть Свята́го Ду́ха испо́лни се́рдце твое́. Тоя́ же де́йствием, а́ки се́рна из тене́т, в вертогра́д ди́вно призва́вшия тя Бо́жия Ма́тере — Го́ру Афо́нскую, от мирски́я суеты́ устреми́лся еси́, во е́же прилепи́тися Бо́гу сынолю́бне. Мы же, ви́дяще чу́дное изволе́ние о тебе́ ми́ра Влады́чицы, уми́льно зове́м ти:

Ра́дуйся, от мра́ка грехо́внаго к све́ту И́стины Христо́вы Само́ю Пречи́стою призва́нный;

Ра́дуйся, бы́ти ве́рным де́лателем Ея́ земна́го вертогра́да ди́вно избра́нный.

Ра́дуйся, земли́ Росси́йския гро́зде сладкоте́чный, на Горе́ Афо́нстей изоби́льно произра́стший;

Ра́дуйся, со́весте недре́млющая, покая́нною моли́твою жа́ло грехо́вное притупи́вшая.

Ра́дуйся, во Святе́й Пантелеи́моновей оби́тели а́нгельски Бо́гу послужи́вый:

Ра́дуйся, в труде́, посте́ и безмо́лвии врага́, борю́щаго тя, сла́вно покори́вый.

Ра́дуйся, вся ко́зни диа́вола смиренному́дренно попра́вый;

Ра́дуйся, жа́ждею по Бо́зе ве́ру непоро́чную сла́вне стяжа́вый.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 3

Си́ла Вы́шняго вои́стину храня́ше тя, егда́ дух а́да и сме́рти претя́ше ти и ду́шу твою́ прельще́ньми грехо́вными обурева́ше, боголюби́ве о́тче Силуа́не. Изнемога́яй же, Бо́га неумоли́ма помы́слил еси́ бы́ти, тогда́ Человеколю́бец Госпо́дь, в неизрече́нном Фаво́рстем блиста́нии, тя посети́ и огне́м благода́ти Свята́го Ду́ха укрепи́ тя, всеблаже́нне. Ты же, а́ки Па́вел, но́вое рожде́ние восприя́в, со стра́хом и ра́достию взыва́л еси́ Бо́гу: Аллилу́иа.

Икос 3

Име́я бога́тство благода́ти, Ду́хом на Небеса́ возведе́н был еси́ и та́мо неизрече́нныя глаго́лы слы́шал еси́. Вои́стину ра́дости тоя́ кто испове́сть, о́тче преблаже́нне Силуа́не. Егда́ бо, вне образо́в ми́ра, в созерца́нии Божества́, добро́ты несказа́нныя, безме́рно лю́бящаго и всепроща́ющаго Христа́ Бо́га Лице́ ви́дети сподо́бился еси́, неизрече́нныя любве́ Бо́жия преиспо́лнился еси́. Мы же, чудя́щеся твоему́ неизглаго́ланному боговиде́нию, вопие́м:

Ра́дуйся, в по́двизе ве́ры Христо́ва посеще́ния и утеше́ния сподо́бивыйся;

Ра́дуйся, добро́ту неизрече́нныя сла́вы Его́ лицезре́ти удосто́ивыйся.

Ра́дуйся, в Еде́м Небе́сный ди́вныя красоты́ Ду́хом Святы́м возведе́нный;

Ра́дуйся, та́мо благода́тными да́рами Свята́го Уте́шителя Ду́ха преизоби́льно напое́нный.

Ра́дуйся, прича́стниче неизрече́нныя ра́йския красоты́;

Ра́дуйся, Бо́гом возлю́бленный и Им облагода́тствованный щедро́тами Небе́сныя добро́ты.

Ра́дуйся, тоя́ благода́ти всему́ челове́чу ро́ду приле́жно хода́тайствующий;

Ра́дуйся, я́ко страж недре́млющий, ко у́тру жи́зни ве́чныя нас пробужда́ющий.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 4

Бу́рю лю́тых искуше́ний воздви́же на тя человекоуби́йца диа́вол, искони́ и́щущий погуби́ти, но ты, о́тче Силуа́не, Ду́хом Святы́м наставля́емый: держа́ти ум твой во а́де и не отчаява́тися, в непреста́нном бде́нии и смире́нии ко́зни диа́вола предваря́я, того́ победи́л еси́. Он же, тобо́ю посра́мленный, не обину́яся, рече́ ти, я́ко лжец есть. Та́ко от се́тей врага́ ду́шу твою́, а́ки голуби́цу кро́ткую, Бог соблю́л еси́, непреста́нно воспева́я Ему́: Аллилу́иа.

Икос 4

Слы́шаще о тебе́, я́ко ди́вно от мирски́я суеты́ к и́ноческому по́двигу при́звана бы́вша и благода́тию Бо́жиею добр плод творя́ща, преподо́бне, не то́кмо млади́и и́ноцы, но и ста́рцы, в по́двизе зело́ иску́снии, к тебе́ притека́ху и а́ки ме́дом, де́лы и словесы́ твои́ми услажда́хуся и та́ко равноа́нгельнаго жития́ достига́юще, Го́споду подобя́хуся. Мы же, ви́дяще тя смиренному́дрием укра́шена, с ра́достию зове́м ти:

Ра́дуйся, смиренному́дрия и целому́дрия кла́дезю неисчерпа́емый;

Ра́дуйся, земна́го Еде́ма кри́не благоуха́нный и неувяда́емый.

Ра́дуйся, благо́е и́го Христо́во в по́двизе твое́м с любо́вию носи́вый;

Ра́дуйся, ум твой, се́рдце и во́лю в Бо́зе моли́твою утверди́вый.

Ра́дуйся, чистоты́ душе́вныя и теле́сныя храни́телю усе́рдный;

Ра́дуйся, непреста́нною моли́твою на высоту́ безстра́стия возше́дый.

Ра́дуйся, святооте́ческим пра́вилам усе́рднейший подража́телю;

Ра́дуйся, Небе́снаго Оте́чества и любве́ Бо́жия к нам непрестаю́щий глаша́таю.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 5

Звезду́, путь указу́ющую и ум просвеща́ющую, — Боже́ственную благода́ть дарова́ ти Госпо́дь, боголю́бче о́тче Силуа́не, и то́ю, а́ки проро́ка Илию́ у пото́ка Хора́фа, на спаси́тельный по́двиг укрепля́ше тя. Ты же, ди́вно пита́емый от неиждива́емых сокро́вищ Ду́ха Свята́го, в ю́ности и престаре́нии, от стра́жи у́тренния до но́щи, в моли́твах за всю вселе́нную, а́ки свире́ль сладкопе́сненная, непреста́нно взыва́л еси́ Бо́гу: Аллилу́иа.

Икос 5

Ви́дим тя, о, преблаже́нне о́тче Силуа́не, в по́двизе благо́м, а́ки младе́нец млека́ ма́тере любве́ Бо́жия и́щуща и к Тому́ любо́вию пламене́юща, и сле́зно взыва́юща: помяни́, душа́ моя́, любо́вь Госпо́дню, и согре́яся се́рдце мое́: кто бо даст ми толи́кий жар, е́же не зна́ти ми поко́я во дни, ниже́ в но́щи от любве́ Бо́жия? Сего́ ра́ди содрога́емся се́рдцем и умиля́емся душе́ю о толи́ком горе́нии любве́ твоея́ ко Всеще́дрому Бо́гу, и уми́льно зове́м ти:

Ра́дуйся, па́че сла́дка ме́да неутоли́мо пра́вды Бо́жия жа́ждущий;

Ра́дуйся, в любви́ твое́й ко Го́споду А́нгелом подража́ющий.

Ра́дуйся, вознося́й кади́ло моли́твы чи́стыя, а́ки пла́мень о́гненный;

Ра́дуйся, красото́ю а́нгельскаго благогове́ния украси́вший го́рняя и до́льняя.

Ра́дуйся, я́ко огню́ купины́ несгора́емыя се́рдце твое́ уподобля́шеся;

Ра́дуйся, я́ко ру́це твои́, а́ки Моисе́овы, за наро́д избра́нный, за всех пред Го́сподем простира́шася.

Ра́дуйся, ты бо возлюби́л еси́ возжела́ти судьбы́ Бо́жии на вся́кое вре́мя и взыска́л еси́ оправда́ний Его́;

Ра́дуйся, я́ко непреста́нно Ему́ взыва́л еси́: спаси́, Бо́же, лю́ди Твоя́ и благослови́ достоя́ние Твое́.

Ра́дуйся о́тче Силуа́не, в моли́тве за мир горе́ние любве́ неугаса́ющее.

Кондак 6

Пропове́дник немо́лчен безмо́лвия яви́лся еси́, уго́дниче Бо́жий, егда́ Человеколю́бец Госпо́дь восхоте́ в любви́ испыта́ти и посеще́ния Всесвята́го Ду́ха лиши́ тя. Ты же, уразуме́в себе́ лише́на бы́ти Того́ благода́ти, а́ки Ада́м, лише́ния рая́ рыда́вый, се́рдцем сокруше́нным сле́зно взыва́л еси́: Го́споди! Ты пре́жде взыска́л еси́ мя и дал ми еси́ наслади́тися Ду́хом Твои́м Святы́м, и душа́ моя́ возлюби́ Тя. Ны́не же ту́жит душа́ моя́ по Тебе́. Си́це рыда́я, оба́че на милосе́рдие Бо́жие упова́я, взыва́л еси́ Ему́: Аллилу́иа.

Икос 6

Возсия́л еси́, боголюби́ве о́тче Силуа́не, я́ко но́вый тайнови́дец, отне́лиже смире́нием и моли́твою со слеза́ми благода́ть Свята́го Ду́ха па́ки стяжа́л еси́, от нея́ же любве́ неизрече́нныя преиспо́лнися се́рдце твое́. Ты же, уразуме́в благода́ти сея́ си́лу, дерзнове́нием Илиины́м воззва́л еси́: Го́споди! Не то́кмо мне, всему́ ми́ру да́руй позна́ти любо́вь Твою́ и спасти́ся! Мы же, иму́ще тя моли́твенника пред Бо́гом неусы́пна, со умиле́нием зове́м ти:

Ра́дуйся, я́ко моли́твенным сраспина́нием за уме́рших, живы́х и гряду́щих был еси́ не́бо отве́рстое;

Ра́дуйся, я́ко сицево́ю любо́вию исхода́тайствовал еси́ душе́ твое́й Ца́рство Небе́сное.

Ра́дуйся, чистоты́ ве́ры и беззло́бия ди́вное воплоще́ние;

Ра́дуйся, к грехопаде́ниям бли́жних твои́х стяжа́вый Христо́во всепроще́ние.

Ра́дуйся, ди́внаго святи́лища ми́ра — уго́дников Бо́жиих ве́рный сподви́жниче;

Ра́дуйся, Преблагослове́нныя Игу́мении Афо́на ве́рный послу́шниче и даро́в Свята́го Ду́ха вмести́лище.

Ра́дуйся, Горы́ Афо́нския свире́ль сладкопе́сненная, о гряду́щей жи́зни возвеща́ющая;

Ра́дуйся, Тоя́ вертогра́да тру́дниче неусы́пный, в по́двиге изнемога́ющих укрепля́ющий.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 7

Хотя́ Человеколю́бец Госпо́дь яви́ти в тебе́ но́вое благосве́тлое свети́ло, преподо́бне о́тче Силуа́не, я́ко ветвь ма́сличную, от ко́рене земли́ Росси́йския, в пусты́ни Афо́нстей насади́, и Ду́ха Свята́го благода́тию ороша́я, многопло́дна тя сотвори́: де́лы бо и словесы́ твои́ми, а́ки еле́ем животво́рным, чистоте́ и целому́дрию, благоче́стию и братолю́бию всех наставля́л еси́. они́ же, сою́зом любве́ связу́еми, покаря́юще ху́дшее лу́чшему, воспева́ху Бо́гу: Аллилу́иа.

Икос 7

Но́ваго пустынножи́телем сподви́жника, мона́хом и мирски́м наста́вника и учи́теля яви́ тя Госпо́дь, преблаже́нне Силуа́не. Ты бо, еще́ в ми́ре жив, не́коего во́ина о грехопаде́нии жены́ своея́ соблазни́вшагося и во гне́ве яря́щася, Христо́ву всепроще́нию научи́л еси́, и сим Та́инство Бра́ка — ма́лая Це́рковь от разруше́ния сохрани́ся: и́ноков же, в уны́ние впа́дших, к стяжа́нию душе́внаго ми́ра призыва́я и стра́ху Бо́жию наставля́я, к покая́нию приводи́л еси́, и та́ко рая́ жи́телей бы́ти всех приуготовля́л еси́. Ве́дуще тя та́ко о спасе́нии всех печа́лящася, достодо́лжно с любо́вию вопие́м ти:

Ра́дуйся, пустыннолю́бцев в иска́нии Бо́га усе́рдный сподви́жниче;

Ра́дуйся, братолю́бия приле́жный строи́телю и те́плый о всех моли́твенниче,

Ра́дуйся, на пути́ жите́йском, в беда́х и напа́стех сопу́тниче ве́рный;

Ра́дуйся, в боле́знех, и печа́лех, и ско́рбех душе́вных служи́телю нелицеме́рный.

Ра́дуйся, ве́стниче любве́ Бо́жия, к примире́нию с Бо́гом и бли́жним свои́м всех призыва́ющий;

Ра́дуйся, свиде́тельством, я́ко благ Госпо́дь, ду́ши от греха́ изнемога́ющия в наде́жде проще́ния подкрепля́ющий.

Ра́дуйся, ве́рный подви́жниче земна́го Еде́ма, спасе́ния ми́ру сле́зно хода́тайствующий;

Ра́дуйся, за всех нераска́янных гре́шников во ад сни́ти жела́ющий.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 8

Стра́нное чу́до яви́ тебе́ Госпо́дь, преблаже́нне о́тче Силуа́не, егда́ ста́рца-духовника́ Авраа́мия, преображе́нна во о́бразе Свое́м, невырази́мо сия́юща, ди́вно ти показа́ и та́ко че́стне почита́ти Та́инство Покая́ния нас наста́ви. Мы же, ви́дяще тя, во́лю свою́, я́ко Самому́ Го́споду, духо́вному отцу́ своему́ вверя́юща и та́ко смире́нием и покая́нием злы́я хоте́ния своя́ отсека́юща, во́ле Бо́жией, чрез па́стырей Це́ркве Христо́вы, науча́емся вве́ритися, и си́це, пре́жде исхо́да на́шего, гне́ва Бо́жия и Суда́ гряду́щаго избежа́ти, вопию́ще Триеди́ному Бо́гу: Аллилу́иа.

Икос 8

Всем се́рдцем и душе́ю смире́ние Христо́во стяжа́вый, преди́вный уго́дниче Бо́жий, и Тому́, Возлю́бленному, за мир сраспина́яйся, сле́зно взыва́л еси́: Сладча́йший Иису́се! Ты воскреси́л еси́ ду́шу мою́ люби́ти Тя и бли́жняго своего́. Да́руй ми у́бо источа́ти сле́зы за всю вселе́нную, да вси лю́дие позна́ют Тя и да насладя́тся ми́ром Твои́м и у́зрят свет Лица́ Твоего́. Мы же, во гресе́х житие́ на́ше ижди́вшии и тобо́ю спаса́еми, ублажа́ем тя си́це:

Ра́дуйся, Засту́пницы Усе́рдныя в моли́твах за мир сподви́жниче неутоми́мый;

Ра́дуйся, я́ко Иереми́я о наро́де пла́чущий, Го́ру Святу́ю слеза́ми ороси́вый.

Ра́дуйся, преди́вный афо́нский подви́жниче, всю вселе́нную моли́твою освяща́ющий;

Ра́дуйся, я́ко оте́ц чадолюби́вый, за всех, во гресе́х погиба́ющих, сле́зно пред Бо́гом хода́тайствующий.

Ра́дуйся, Христу́ Бо́гу возлю́бленне уго́дниче, А́нгелам ра́дость и удивле́ние;

Ра́дуйся, Се́вера све́тлое сия́ние, в Афо́нстей пусты́ни Святы́я Руси́ чи́стое отображе́ние.

Ра́дуйся, в смире́нии и послуша́нии яви́вый ми́ру о́браз а́нгельския красоты́;

Ра́дуйся, теплото́ю моли́твы твоея́ и нас до́мом Ду́ха Боже́ственнаго хотя́й сотвори́ти.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 9

Все естество́ а́нгельское и подви́жников мно́жество удиви́шася смире́нию и человеколю́бию твоему́, о́тче наш Силуа́не, егда́ иконо́мства послуша́ние восприя́в, целому́дренному Ио́сифу во Еги́пте уподо́бился еси́. И не то́кмо о бра́тии святы́я оби́тели, но и о мирски́х де́лателех, та́мо труди́вшихся, я́ко о ча́дех Бо́жиих, попече́ние име́вый, Бо́гу, лю́бящему вся́кое Свое́ созда́ние, о тех взыва́л еси́: Го́споди, посли́ Ду́ха Свята́го Твоего́ и уте́ши ско́рбныя ду́ши бе́дных люде́й сих. Та́ко бо во вся́ком послуша́нии смиренному́дрия красоту́ показу́я, непреста́нно взыва́л еси́ Бо́гу: Аллилу́иа.

Икос 9

Вети́и многовеща́нии не возмо́гут изрещи́ си́лу любве́ твоея́, преди́вне о́тче Силуа́не, ты бо сле́зно жа́ждал еси́ вся́ку вражду́ и нестрое́ние в лю́дех угаси́ти и вся́ческая с Бо́гом примири́ти, взыва́я Влады́це ми́ра: Го́споди! Твои́м жа́жду бы́ти и с Тобо́ю за всю вселе́нную сораспя́тися, да вси спасе́ни бу́дут. К бра́тии же взыва́л еси́: ча́да, моли́теся за враго́в свои́х, они́ бо суть бра́тия ва́ша — жизнь ва́ша, враг же ми́ра то́кмо диа́вол есть. Мы же, та́ко к братолю́бию и человеколю́бию тобо́ю наставля́еми, зове́м ти:

Ра́дуйся, добро́тою твое́ю Христу́ на Голго́фе уподо́бивыйся;

Ра́дуйся, не рука́ми бо, се́рдцем и душе́ю за враго́в свои́х сраспина́выйся.

Ра́дуйся, о бли́жних пеки́йся и красоту́ благода́тнаго безмо́лвия не утра́тивый;

Ра́дуйся, любя́ бли́жних свои́х, си́лу непреста́нныя моли́твы стяжа́вый.

Ра́дуйся, посто́м и моли́твою стре́лы лука́ваго до конца́ отрази́вый;

Ра́дуйся, злоловле́ния и ухищре́ния диа́вола препобежда́ти нас научи́вый.

Ра́дуйся, в ме́льнице Христо́вой плоть трудо́м изнуря́я, а́ки хле́бом свяще́нным, се́рдце моли́твою услажда́вый;

Ра́дуйся, де́лателей вертогра́да Цари́цы Небе́сныя хле́бом жи́зни изоби́льно пита́вый.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 10

Спасе́ния души́ твоея́ ища́ и Христу́ Сладча́йшему прилепи́тися жела́я, от земли́ оте́ц твои́х на Го́ру Святу́ю смире́нне прите́кл еси́, иде́же в воздержа́нии и безмо́лвии, трудолю́бии и человеколю́бии равноа́нгельную красоту́ стяжа́л еси́, всеблаже́нне. И та́ко преблагослове́ннаго у́тра, егда́ вси пустыннолю́бцы оби́телей Афо́нских полу́нощную песнь Творцу́ воспева́ху, благи́я кончи́ны дости́гл еси́ и ду́шу твою́, Животворя́щим Те́лом и Кро́вию Госпо́днею напита́нную, в Боже́ственныя ру́ки Того́ пре́дал еси́, во е́же непреста́нно со все́ми святы́ми воспева́ти святы́х Святе́йшему Сло́ву: Аллилу́иа.

Икос 10

Царя́ Небе́снаго, Его́же славосло́вят Херуви́ми и Серафи́ми и святы́х собо́ри, житие́м, ве́рою и любо́вию всеусе́рднейший служи́тель был еси́, преподо́бне и, я́ко крин благоуха́нный, со все́ми избра́нниками Пречи́стыя Богоро́дицы, у Престо́ла Всесвяты́я Тро́ицы предста́л еси́. Бу́ди же, всеблаже́нне, о благоде́нственном ми́ре земли́ оте́ц твои́х усе́рдный пред Бо́гом хода́тай, о Це́ркве же Святе́й — а́нгел неусы́пныя моли́твы и те́плый предста́тель, да тобо́ю от бед избавля́еми, благода́рне зове́м ти:

Ра́дуйся, а́нгеле земли́ Росси́йския, на Святе́й Горе́ преизря́дно потруди́выйся;

Ра́дуйся, моли́твенниче тепле́йший, у Престо́ла Бо́жия за нас любо́вию сраспе́ншийся.

Ра́дуйся, о лю́дех земли́ отце́в твои́х усе́рдный пред Бо́гом хода́таю;

Ра́дуйся, бра́тии афо́нскаго вертогра́да, в по́двизе изнемога́ющих, ско́рый предста́телю.

Ра́дуйся, я́звы Го́спода твоего́ на те́ле твое́м безро́потно носи́вый;

Ра́дуйся, ду́шу твою́, покая́нными слеза́ми убеле́ну, чи́сту Тому́ вве́ривый.

Ра́дуйся, ве́рный де́лателю виногра́да Христо́ва, к Го́рнему Сио́ну Го́сподем призва́нный;

Ра́дуйся, я́ко та́мо собесе́дуеши со святы́ми и А́нгелы, сла́вою и че́стию увенча́нный.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 11

Песнь благохва́льную прино́сим ти, уго́дниче Бо́жий, о́тче Силуа́не, горе́нием бо любве́ ко Го́споду, за спасе́ние ми́ра взалка́вшему и смире́нием Свои́м диа́вола посрами́вшему, ве́рно после́дуя, пусты́ню афо́нскую моли́твою чи́стою облагоуха́л еси́, о́браз равноа́нгельнаго жития́, многопло́дными да́рами Свята́го Ду́ха укра́шенный, благода́тно нам показу́я. Си́це бо Го́ру Святу́ю рае́ви уподобля́я, врага́ посрами́л еси́, души́ же твое́й Ца́рствие Небе́сное стяжа́л еси́, подвиза́я и нас любо́вию к Бо́гу прилепля́тися, вопию́ще Ему́: Аллилу́иа.

Икос 11

Светопода́тельнаго Све́та и благода́ти Свята́го Ду́ха носи́теля в житии́ и по сме́рти всему́ ми́ру яви́ тя Госпо́дь во днех на́ших, преподо́бне, во е́же взира́юще на тя, нетле́нною красото́ю земны́х по́двигов блиста́юща и херуви́мски у Престо́ла Бо́жия за нас моли́твы творя́ща, в наде́жди спасе́ния на́шего уве́римся и благонра́вному житию́ всеусе́рднейше после́дуем, во́лю же свою́ любви́ Бо́жией сла́дко покори́м, та́кожде и в телесе́х и душа́х на́ших прославле́ние и́мене лю́бящаго нас Го́спода да утверди́тся. Те́мже, тобо́ю в ве́ре укрепля́еми, с любо́вию зове́м ти:

Ра́дуйся, по́двигом жи́зни благонра́вныя в любви́ к Бо́гу нас укрепля́ющий;

Ра́дуйся, усе́рдный облича́телю злонра́вия, Та́инства и пра́вила ве́ры правосла́вныя храни́ти нас наставля́ющий.

Ра́дуйся, пустынножи́тельством Петру́ Афо́нскому в посте́ и безмо́лвии приле́жно ревнова́вый;

Ра́дуйся, попече́нием о благонра́вии и́ночествующих а́вве Афана́сию ве́рно подража́вый.

Ра́дуйся, но́вый свети́льниче ве́ры, в дни на́ши ве́рный путь к Бо́гу указу́ющий;

Ра́дуйся, о неоскуде́нии благода́ти Свята́го Ду́ха в Це́ркви Правосла́вней всем ди́вно свиде́тельствующий.

Ра́дуйся, ве́рный ра́бе Христо́в, досто́йно у Престо́ла Сла́вы Его́ предстоя́щий;

Ра́дуйся, благи́я кончи́ны и до́браго отве́та на Стра́шнем Суди́щи Христо́ве нам усе́рдно прося́щий.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 12

Благода́ти неисповеди́мую си́лу излия́ на тя Христо́с Бог наш, преподо́бне, во е́же на Небесе́х, иде́же все живе́т и дви́жется в ра́дости Ду́ха Свято́го, яви́ти в лице́ афо́нских подви́жников, со все́ми святы́ми о всех земноро́дных моли́твы творя́ща. Та́ко ве́дуще тя, мо́лимся: проле́й, о, всеблаже́нне, те́плую моли́тву ко Го́споду, да милосе́рдовав, Це́рковь Свою́ Святу́ю, во спасе́ние на́ше, во ве́ки утверди́т, пустыннолю́бцев земна́го Еде́ма, вся́ко сохрани́т и укрепи́т, да во ве́ки славосло́вится и́мя Бо́жие от земны́х и Небе́сных, пою́щих: Аллилу́иа.

Икос 12

Пою́ще пресла́вную па́мять твою́, богоно́сне о́тче Силуа́не, досто́йно ублажа́ем боле́зни и труды́ твоя́, я́же во бде́нии и поще́нии со все́ми избра́нниками Бо́жия Ма́тере всеусе́рдне поне́сл еси́. Кто бо изочте́т труды́ и воздыха́ния ва́ша, в моли́твах за мир сле́зно приноси́мыя, и́миже Госпо́дь гнев Свой, грехо́в ра́ди на́ших, на ми́лование преложи́ и человеколю́бием Свои́м кля́тву, е́юже кля́тся — Це́ркви Святе́й до сконча́ния ве́ка утвержде́нней бы́ти — не разори́. Мы же, благода́рни су́ще сицево́му предста́тельству твоему́, уми́льно зове́м ти:

Ра́дуйся, води́тельству Свята́го Ду́ха усе́рдный после́дователю;

Ра́дуйся, Христа́ — Бла́гость и Прему́дрость Бо́жию — теле́сными очи́ма лицезри́телю.

Ра́дуйся, Христо́в смире́нный подви́жниче, Ма́тери Бо́жией пред все́ми Небе́сными и земны́ми ра́дость и похвале́ние;

Ра́дуйся, неусы́пный о ми́ре моли́твенниче, на́шего спасе́ния наде́ждо и утеше́ние.

Ра́дуйся, насле́дниче Ца́рства Христо́ва, по́двигом свои́м Го́ру Афо́нскую украси́вый;

Ра́дуйся, на́шего спасе́ния ве́рный сподви́жниче, путь, веду́щий к Бо́гу, нам освяти́вый.

Ра́дуйся, златоко́ванная трубо́, со все́ми святы́ми и А́нгелами сла́ву Бо́жию возвеща́ющая;

Ра́дуйся, венце́м безсме́ртия Бо́гом увенча́нный, в моли́твах свои́х нас не оставля́ющий.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 13

О преди́вный уго́дниче Бо́жий Силуа́не, земли́ Росси́йския благода́тное рожде́ние, пустыннолю́бцев Горы́ Афо́нския похвало́ и украше́ние! Приими́ от нас ма́лое сие́ моле́ние и испроси́ у Распе́ншагося за мир Христа́ Бо́га на́шего, да поми́лует всех нас, чад Свои́х, и благода́тию Свята́го Ду́ха в сою́з любве́ Своея́ свя́жет нас и, и́миже весть судьба́ми, к Себе́ приведе́т, во е́же твои́ми моли́твами непосты́дно яви́тися нам в день Су́дный пред Лице́м сла́вы Его́ и сподо́битися со все́ми святы́ми и А́нгелами воспева́ти побе́дную песнь: Аллилу́иа.

Этот кондак читается трижды, затем икос 1 и кондак 1

Икос 1

А́нгелов Творе́ц и Госпо́дь Сил из чре́ва ма́тере твоея́ предъизбра́ тя, и, по глаго́лу Псалмопе́вца, се́рдце глубоко́ дарова́ ти, богоно́сне о́тче Силуа́не, да, я́ко в черто́зе преизря́днем, вмести́вши невмести́мое и́мя Бо́га Вы́шняго и си́лою Бо́жиею и Бо́жиею Прему́дростию житию́ а́нгельскому всеусе́рдно после́дуеши. Мы же, похваля́юще чу́дный по́двиг земны́х трудо́в твои́х, благогове́йно зове́м ти:

Ра́дуйся, роди́телей благочести́вых плод целому́дренныя чистоты́;

Ра́дуйся, благово́нное цвете́ние их по́двига ве́ры, неувяда́емыя красоты́.

Ра́дуйся, благоче́стие роди́телей твои́х душе́вне возлюби́вый;

Ра́дуйся, целому́дрию и боголю́бию их уподо́битися благоволи́вый.

Ра́дуйся, измла́да ра́дости в Бо́зе иска́ти ди́вно умудри́выйся;

Ра́дуйся, а́ки еле́нь к исто́чнику благода́ти Бо́жия устреми́выйся.

Ра́дуйся, сло́вом Бо́жиим, а́ки сла́дким ме́дом, ра́зум ю́ности твоея́ услади́вый;

Ра́дуйся, се́рдце твое́ во́ле Бо́жией всеце́ло покори́вый.

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Кондак 1

Избра́нный подви́жниче и земны́й а́нгеле Христо́в, всеблаже́нне о́тче Силуа́не! В непреста́нном бде́нии, посте́ и смире́нии отце́в афо́нских преизря́дный подража́телю, жа́ждею по Бо́зе и горе́нием любве́ к Нему́ благода́ть оби́льную душе́ твое́й стяжа́л еси́, всеблаже́нне. Христу́ подража́я, за томя́щихся во а́де, живы́х и гряду́щих моли́твою сле́зною сраспина́лся еси́. Сицевы́я любве́ твоея́ не лиши́ и нас, во юдо́ли грехо́вней твоего́ предста́тельства пред Бо́гом прося́щих и уми́льно зову́щих:

Ра́дуйся, о́тче Силуа́не, в моли́тве за мир горе́ние любве́ неугаса́ющее.

Молитва

О, преди́вный уго́дниче Бо́жий, о́тче Силуа́не! По благода́ти, тебе́ от Бо́га да́нной, — сле́зно моли́тися о всей вселе́нней — ме́ртвых, живы́х и гряду́щих — не премолчи́ за нас ко Го́споду, к тебе́ усе́рдно припа́дающих и твоего́ предста́тельства уми́льно прося́щих. Подви́гни, о, всеблаже́нне, на моли́тву Усе́рдную Засту́пницу ро́да христиа́нскаго, Преблагослове́нную Богоро́дицу и Присноде́ву Мари́ю, чу́дно призва́вшую тя бы́ти ве́рным де́лателем в Ея́ земно́м вертогра́де, иде́же избра́нницы Бо́жии о гресе́х на́ших ми́лостива и долготерпели́ва бы́ти Бо́га умоля́ют, во е́же не помяну́ти непра́вд и беззако́ний на́ших, но, по неизрече́нней бла́гости Го́спода на́шего Иису́са Христа́, уще́дрити и спасти́ нас по вели́цей Его́ ми́лости.

Ей, уго́дниче Бо́жий, с Преблагослове́нною Влады́чицею ми́ра — Святе́йшею Игу́мениею Афо́на и святы́ми подви́жниками Ея́ земна́го жре́бия испроси́ у святы́х Святе́йшаго Сло́ва Святе́й Горе́ Афо́нстей и боголюби́вым пустынножи́телем ея́ от всех бед и наве́тов вра́жиих в ми́ре сохрани́тися. Да А́нгелы святы́ми от зол избавля́еми и Ду́хом Святы́м в ве́ре и братолю́бии укрепля́еми, до сконча́ния ве́ка о Еди́ней, Святе́й, Собо́рней и Апо́стольстей Це́ркви моли́твы творя́т и всем спаси́тельный путь указу́ют, да Це́рковь Земна́я и Небе́сная непреста́нно славосло́вит Творца́ и Отца́ Све́тов, просвеща́ющи и освяща́ющи мир в ве́чней пра́вде и бла́гости Бо́жией.

Наро́дам земли́ всей испроси́ благоде́нствие и ми́рное житие́, дух смиренному́дрия и братолю́бия, добронра́вия и спасе́ния, дух стра́ха Бо́жия. Да не зло́ба и беззако́ние ожесточа́ют сердца́ людски́я, могу́щия истреби́ти любо́вь Бо́жию в челове́цех и низве́ргнуть их в богопроти́вныя вражду́ и братоуби́йства, но в си́ле Боже́ственныя любве́ и пра́вды, я́коже на Небеси́ и на земли́ да святи́тся и́мя Бо́жие, да бу́дет во́ля Его́ свята́я в челове́цех, и да воцаря́тся мир и Ца́рствие Бо́жие на земли́.

Та́кожде и земно́му Оте́честву твоему́ — земли́ Росси́йстей испроси́, уго́дниче Бо́жий, вожделе́нный мир и небе́сное благослове́ние, во е́же, всемо́щным омофо́ром Ма́тере Бо́жия покрыва́емому, изба́витися ему́ от гла́да, губи́тельства, тру́са, огня́, меча́, наше́ствия иноплеме́нников и междоусо́бныя бра́ни и от всех враг ви́димых и неви́димых, и та́ко святе́йшим до́мом Преблагослове́нныя Богоро́дицы до сконча́ния ве́ка ему́ пребы́ти Креста́ Животворя́щаго си́лою и в любви́ Бо́жией неоскудева́ему утверди́тися.

Нам же всем, во тьму грехо́в погружа́емым и покая́ния те́пла, ниже́ стра́ха Бо́жия не иму́щим и си́це безме́рно лю́бящаго нас Го́спода непреста́нно оскорбля́ющим, испроси́, о, всеблаже́нне, у Всеще́драго Бо́га на́шего, да Свое́ю Всеси́льною благода́тию боже́ственне посети́т и оживотвори́т ду́ши на́ша, и вся́ку зло́бу и го́рдость жите́йскую, уны́ние и нераде́ние в сердца́х на́ших да упраздни́т.

Еще́ мо́лимся, о е́же и нам, благода́тию Всесвята́го Ду́ха укрепля́емым и любо́вию Бо́жиею согрева́емым, в человеколю́бии и братолю́бии, смиренному́дрии и моли́твенном сраспина́нии друг за дру́га и за всех, в пра́вде Бо́жией утверди́тися и в благода́тней любви́ Бо́жией благонра́вно укрепи́тися, и сынолю́бне Тому́ прибли́житися. Да та́ко, творя́ще Его́ всесвяту́ю во́лю, во вся́ком благоче́стии и чистоте́ вре́меннаго жития́ путь непосты́дно пре́йдем и со все́ми святы́ми Небе́снаго Ца́рствия и Его́ А́гнчаго бра́ка сподо́бимся. Ему́ же от всех земны́х и небе́сных да бу́дет сла́ва, честь и поклоне́ние, со Безнача́льным Его́ Отце́м, Пресвяты́м и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.