Акафист священномученику Киприану

Кондак 1

Избра́нный от диа́вольскаго служе́ния на служе́ние и́стинному Бо́гу и к ли́ку святы́х сопричте́нный, священному́чениче Киприа́не, моли́ Христа́ Бо́га изба́витися нам от се́тей лука́ваго и победи́ти мир, плоть и диа́вола, да зове́м ти:

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Икос 1

А́нгельския Си́лы удиви́шася, ка́ко от худо́жества волше́бнаго обрати́лся еси́, богому́дре Киприа́не, к позна́нию Боже́ственному, покая́нием обре́л еси́ а́нгельское безстра́стное житие́. Мы же, обраще́нию твоему́ дивя́щеся, вопие́м ти такова́я:

Ра́дуйся, обраще́нием твои́м А́нгелов удиви́вый; ра́дуйся, лик святы́х возвесели́вый.

Ра́дуйся, му́дрость свою́ показа́вый; ра́дуйся, за Христа́ вене́ц прия́вый.

Ра́дуйся, я́ко тобо́ю бе́си отгоня́ются; ра́дуйся, я́ко тобо́ю вся боле́зни исцеля́ются.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 2

Ви́дя Госпо́дь, ка́ко от лет ма́лых о́тдан бысть Киприа́н нечести́выми роди́тели на обуче́ние де́монскому служе́нию, восхоте́ обрати́ти его́ к Себе́, да со А́нгелы и все́ми святы́ми воспева́ет: Аллилу́ия.

Икос 2

Ра́зум несоверше́н име́я к вы́шнему разуме́нию, усе́рдно труди́лся еси́, свя́те Киприа́не, изуча́я де́монския лжехи́трости, но, позна́в сла́бость бесо́вскую, я́ко ти́и боя́тся Христа́, обрати́лся еси́ к позна́нию Бо́га и́стиннаго. Те́мже у́бо тя велича́ем:

Ра́дуйся, хи́трости де́монския препобеди́вый; ра́дуйся, пре́лесть служе́ния его́ обличи́вый.

Ра́дуйся, зми́я лука́ваго посрами́вый; ра́дуйся, христиа́н просла́вивый.

Ра́дуйся, му́дрых ми́ра сего́ мудре́йший; ра́дуйся, разу́мных разу́мнейший.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 3

Си́ла Вы́шняго просвети́ ум твой, блаже́нне Киприа́не, егда́, не успе́вше в чароде́йстве про́тив Иусти́ны, бе́си реко́ша тебе́: мы бои́мся и трепе́щем си́лы Креста́, и́мже отгоня́ет нас де́ва Иусти́на. Ты же отвеща́л еси́: вы Креста́ бои́теся, но Распя́тый на Кресте́ сильне́й Креста́ есть. Сего́ ра́ди прише́л еси́ в храм Госпо́день пе́ти со все́ми ве́рными: Аллилу́ия.

Икос 3

Име́я ум просвеще́н си́лою свы́ше, прише́д Киприа́н к пресви́теру, про́сит креще́ния, оба́че той, убоя́вся кова́рства волхва́, отгна́ его́. Киприа́н же тече́ в храм Госпо́день, и та́мо, литурги́и бы́вшей, внегда́ диа́кон возгласи́: оглаше́ннии, изыди́те, рече́: не изы́ду из хра́ма, до́ндеже прииму́ креще́ние. Мы же, твоему́ вразумле́нию ра́дующеся, воспева́ем ти такова́я:

Ра́дуйся, си́лою свы́ше просвеще́нный; ра́дуйся, Го́сподом вразумле́нный.

Ра́дуйся, си́лу Креста́ позна́вый; ра́дуйся, де́монов от себе́ отгна́вый.

Ра́дуйся, жизнь свою́ испра́вивый; ра́дуйся, стопы́ в це́рковь напра́вивый.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 4

Бу́ря помышле́ний одержа́ Киприа́на, ка́ко прия́ти ему́ креще́ние. Те́мже у́бо пре́жде, взяв своя́ чароде́йския кни́ги, принесе́ их на среди́ну гра́да и та́мо пожже́, поя́ Бо́гу: Аллилу́ия.

Икос 4

Услы́шав пресви́тер, я́ко и́маши, всему́дре, наме́рение благо́е бы́ти христиани́н, крести́ тя и поста́ви чтеца́ во хра́ме. Сего́ ра́ди вопие́м ти:

Ра́дуйся, духо́в зло́бы победи́вый; ра́дуйся, чароде́йския кни́ги попали́вый.

Ра́дуйся, бы́ти христиани́н возжела́вый; ра́дуйся, свято́е креще́ние прия́вый.

Ра́дуйся, по́двиги и доброде́тельми украси́выйся; ра́дуйся, пресви́тером наста́вленный.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 5

Боготка́нную оде́жду свята́го креще́ния прия́в, Киприа́не всехва́льне, те́пле моли́лся еси́ Бо́гу о проще́нии грехо́в, пре́жде соверше́нных, от всех христиа́н воспева́я Бо́гу: Аллилу́ия.

Икос 5

Ви́дев пресви́тер по́двиги и труды́ твоя́, священному́чениче Киприа́не, пост, многоно́щное бде́ние, коленопреклоне́ние, покая́ние, сле́зы, моли́твы, и по испыта́нии поста́ви тя во диа́кона. Мы же, благодаря́ще Бо́га, восхваля́ем тя:

Ра́дуйся, день и нощь с покая́нием к Бо́гу взыва́вый; ра́дуйся, о проще́нии грехо́в моли́выйся.

Ра́дуйся, приме́р исправле́ния показа́вый; ра́дуйся, сле́зныя моли́твы Го́споду приноси́вый.

Ра́дуйся, путь ко спасе́нию позна́вый; ра́дуйся, пла́менную любо́вь ко Христу́ яви́вый.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 6

О́бразом благоче́стия христиа́нскаго подража́я де́ве Иусти́не, священному́чениче Киприа́не, вои́стину христиани́н соверше́н яви́лся еси́, отклони́л бо еси́ нечести́вое уче́ние, крести́вся, и усты́ свои́ми и чи́стым се́рдцем благода́рственно воспева́л еси́ Бо́гу: Аллилу́ия.

Икос 6

Возсия́ в се́рдце твое́м свет Боже́ственнаго соверше́нства, богому́дре Киприа́не, и дости́гл еси́ са́на свяще́нника, по́слежде же и епи́скопа. Мо́лим тя, моли́твами твои́ми просвети́ и на́ша сердца́, те́пле моля́щаяся тебе́:

Ра́дуйся, в сан епи́скопа посвяще́нный; ра́дуйся, на высоту́ орла́ вознесе́нный.

Ра́дуйся, гра́де, верху́ горы́ стоя́й; ра́дуйся, свети́льниче, пред Бо́гом горя́й.

Ра́дуйся, моли́твенниче ко Христу́ неуста́нный; ра́дуйся, учи́телю, Бо́гом дарова́нный.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 7

Хотя́ Госпо́дь всем спасти́ся, дарова́ нам сего́ моли́твенника, засту́пника и цели́теля от духо́в зло́бы поднебе́сныя. Уче́нием бо и словесы́ твои́ми, богогла́се, приводи́л еси́ мно́гих к покая́нию и исправле́нию грехо́вныя жи́зни, науча́я всех пе́ти Бо́гу: Аллилу́ия.

Икос 7

Но́вый мудре́йший врач показа́лся еси́ ми́ру, священному́чениче Киприа́не, я́ко моли́тве твое́й чароде́йския ко́зни противоста́ти не мо́гут, а́бие разруша́ются и прогоня́ются наведе́ния злых челове́к и лука́вых бесо́в. Мы же, ви́дяще дарова́нную тебе́ Бо́жию си́лу, вопие́м ти такова́я:

Ра́дуйся, волше́бных ко́зней разруши́телю; ра́дуйся, стра́шных бесо́в прогони́телю.

Ра́дуйся, от него́же ду́си зло́бы, я́ко дым, исчеза́ют; ра́дуйся, тяжкому́чимым ско́ро помога́яй.

Ра́дуйся, от бед и скорбе́й избавля́яй; ра́дуйся, страда́ния в ра́дость обраща́яй.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 8

Стра́нное чу́до явля́ется притека́ющим к тебе́ с ве́рою, священному́чениче Киприа́не, и́бо да́нною тебе́ от Бо́га благода́тию бе́си изгоня́ются, му́чащии челове́ка, больни́и же исцеля́ются, взыва́ющии Бо́гу: Аллилу́ия.

Икос 8

Всем се́рдцем возвы́сивыйся к Бо́гу, пресла́вне, и все́ю душе́ю Того́ возлюби́вый, име́л еси́ тща́ние и жела́ние твори́ти во́лю Его́ и, я́ко па́стырь до́брый, не отри́нул еси́ беда́ми отягоще́нных, но предста́тельствуеши в моли́твах пред Бо́гом, да́руя нам исцеле́ние и утеше́ние. Сего́ ра́ди, восхваля́юще любо́вь твою́ ко Го́споду, вопие́м ти си́це:

Ра́дуйся, всем се́рдцем Христа́ возлюби́вый; ра́дуйся, вся доброде́тели стяжа́вый.

Ра́дуйся, неду́гующим и разсла́бленным вспоможе́ние; ра́дуйся, в ско́рбех и печа́лех утеше́ние.

Ра́дуйся, наве́тов и искуше́ний, от ми́ра, пло́ти и диа́вола находя́щих, прогони́телю; ра́дуйся, всех боле́зней душе́вных и теле́сных исцели́телю.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 9

Все а́нгельское во́инство возвесели́ся, о́тче, ви́дя тя, во́ина Царя́ Небе́снаго, непоколеби́ма и со дерзнове́нием пропове́дующа Христа́, егда́ веде́н был еси́ на ме́чное усече́ние вку́пе с Иусти́ною. Ты же, боле́знуя о ней, да не отрече́тся от Христа́, узре́вши тя усе́кнута, глаго́ла ей: да усе́кнут пре́жде тя. И, преклони́вше под меч главы́ своя́, воспе́ша Бо́гу: Аллилу́ия.

Икос 9

Вети́и многовеща́ннии не возмо́гут по достоя́нию страда́ния ва́ша за Христа́ воспе́ти, я́ко не убоя́лися есте́ преще́ний лю́тых, но со све́тлыми ли́ки предста́ли есте́ суди́лищу царе́ву, воздвиза́юще всех ве́рных глаго́лати вам сицева́я:

Ра́дуйтеся, ве́ры Христо́вы непоколеби́мии испове́дницы; ра́дуйтеся, Пресвяты́я Тро́ицы дерзнове́ннии пропове́дницы.

Ра́дуйтеся, за Христа́ ду́ши своя́ положи́вшии; ра́дуйтеся, муче́ния лю́тая ни во что же вмени́вшии.

Ра́дуйтеся, я́ко страда́ния ва́ша ве́рными прославля́ются; ра́дуйтеся, я́ко имена́ ва́ша в хра́мех Бо́жиих велича́ются.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 10

Спасти́ хотя́ ду́ши всех одержи́мых нечи́стыми ду́хи, не преста́й взыва́ти при́сно ко Го́споду, Киприа́не богоглаго́льниче, тебе́ бо даде́ся благода́ть моли́тися за ны, да поми́лованнии и очи́щеннии, воспое́м Бо́гу: Аллилу́ия.

Икос 10

Стена́ тве́рда и кре́пкая огра́да бу́ди нам, священному́чениче Киприа́не, с те́плою ве́рою и любо́вию к тебе́ прибега́ющим, огражда́еми бо от враг ви́димых и неви́димых, изба́влени тобо́ю, просла́вим тя та́ко:

Ра́дуйся, ду́ха зло́бы смире́нием победи́вый; ра́дуйся, огне́м моли́твы стре́лы вра́жия попали́вый.

Ра́дуйся, от враго́в ви́димых и неви́димых стено́ и огражде́ние; ра́дуйся, Правосла́вныя Це́ркве пресла́вное украше́ние.

Ра́дуйся, оста́вленных врачми́ преди́вное поможе́ние; ра́дуйся, прелюби́мое скорбя́щим утеше́ние и увеселе́ние.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 11

Пе́ние непреста́нное Пресвяте́й Тро́ице па́че ины́х прине́сл еси́, священному́чениче Киприа́не, И́же ми́лости ра́ди к па́дшим гре́шником благоволи́ недосто́йным досто́йным ста́ти и сочи́слитися свято́му ста́ду. Мы же, благодаря́ще Бо́га за такову́ю ми́лость Его́ к нам, гре́шным, зове́м Ему́: Аллилу́ия.

Икос 11

Светоза́рная свеща́ был еси́, богому́дре, в Це́ркви Христо́ве, просвеща́я невеще́ственным све́том ду́ши ве́рных. Мо́лимся ти, просвети́ и на́ша грехми́ омраче́нная сердца́, во е́же пе́ти тебе́ такова́я:

Ра́дуйся, Трисия́нным Све́том озаре́нный; ра́дуйся, к со́нму святы́х сопричте́нный.

Ра́дуйся, я́ко све́том невеще́ственным ду́ши ве́рных просвеща́еши; ра́дуйся, я́ко заблу́ждших на путь пра́вый наставля́еши.

Ра́дуйся, из ро́ва поги́бели, я́ко овча́, Спаси́телем изъя́тый; ра́дуйся, бесо́в посрамле́ние и челове́ком ра́дование.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 12

Благода́ть дана́ ти от Бо́га попира́ти си́лу вра́жию и вся́кое сатани́нское нахожде́ние, победи́л бо еси́ враги́ твоя́ и му́ченическим по́двигом запечатле́л еси́ ве́ру во Христа́. Ны́не же, предстоя́ Престо́лу Царя́ сла́вы, моли́ся, Киприа́не всеблаже́нне, да изба́вимся от плене́ния диа́вольскаго и воскли́кнем Бо́гу: Аллилу́ия.

Икос 12

Пою́ще твою́ ве́рность по Бо́зе и ди́вная пресла́вная чудеса́, велича́ем и восхваля́ем тя, священному́чениче Киприа́не, прия́л бо еси́ от Бо́га такову́ю благода́ть. Те́мже мо́лим тя: егда́ в час сме́рти на́шея де́монская по́лчища обы́дут ду́ши на́ша, яви́ нам заступле́ние твое́, да изба́влени тобо́ю, воззовём ти си́це:

Ра́дуйся, от находя́щих вра́жиих сил ско́рое защище́ние; ра́дуйся, от всевозмо́жных ско́рбей и печа́лей избавле́ние.

Ра́дуйся, Христа́ до конца́ возлюби́вый; ра́дуйся, ду́шу свою́ за Него́ положи́вый.

Ра́дуйся, в кро́ви А́гнчей омы́выйся; ра́дуйся, во дво́рех Госпо́дних всели́выйся.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 13

О пречу́дный и пресла́вный уго́дниче Бо́жий, священному́чениче Киприа́не, ско́рый помо́щниче всем к тебе́ прибега́ющим, приими́ от нас, недосто́йных, хвале́бное пе́ние на́ше. Ей, мо́лим тя, святи́телю, от многообра́зных неду́гов исцели́, от враг ви́димых и неви́димых заступи́ и ве́чнаго муче́ния изба́витися нам Го́спода умоли́, да с тобо́ю воспева́ем: Аллилу́ия.

Сей кондак глаголи трижды. Затем икос 1 и кондак 1.

Икос 1

А́нгельския Си́лы удиви́шася, ка́ко от худо́жества волше́бнаго обрати́лся еси́, богому́дре Киприа́не, к позна́нию Боже́ственному, покая́нием обре́л еси́ а́нгельское безстра́стное житие́. Мы же, обраще́нию твоему́ дивя́щеся, вопие́м ти такова́я:

Ра́дуйся, обраще́нием твои́м А́нгелов удиви́вый; ра́дуйся, лик святы́х возвесели́вый.

Ра́дуйся, му́дрость свою́ показа́вый; ра́дуйся, за Христа́ вене́ц прия́вый.

Ра́дуйся, я́ко тобо́ю бе́си отгоня́ются; ра́дуйся, я́ко тобо́ю вся боле́зни исцеля́ются.

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.

Кондак 1

Избра́нный от диа́вольскаго служе́ния на служе́ние и́стинному Бо́гу и к ли́ку святы́х сопричте́нный, священному́чениче Киприа́не, моли́ Христа́ Бо́га изба́витися нам от се́тей лука́ваго и победи́ти мир, плоть и диа́вола, да зове́м ти:

Ра́дуйся, священному́чениче Киприа́не, ско́рый помо́щниче и моли́твенниче о душа́х на́ших.