Послѣ́дованїе вече́рни

Нача́ло вече́рни.

Глаго́летъ сщ҃е́нникъ: Бл҃гослове́нъ бг҃ъ на́шъ:

И҆ начина́етъ предстоѧ́тель, и҆лѝ ᲂу҆чине́нный чте́цъ:

Прїиди́те, поклони́мсѧ цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀ цр҃е́ви и҆ бг҃ꙋ на́шемꙋ.

[На бдѣ́нїи всено́щномъ дїа́конъ: Воста́ните!

Ли́къ: Гдⷭ҇и бл҃гословѝ.

Предстоѧ́тель возглаша́етъ си́це: Сла́ва ст҃ѣ́й, и҆ є҆диносꙋ́щнѣй, и҆ животворѧ́щей, и҆ нераздѣ́льнѣй трⷪ҇цѣ, всегда̀, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

И҆ начина́етъ предстоѧ́тель, спою́щей и҆ про́чей бра́тїи:

Прїиди́те, поклони́мсѧ цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀ цр҃е́ви и҆ бг҃ꙋ на́шемꙋ.

Прїиди́те, поклони́мсѧ и҆ припаде́мъ є҆мꙋ̀.

Ли́къ: Бл҃гословѝ дꙋшѐ моѧ̀ гдⷭ҇а: / Бл҃гослове́нъ є҆сѝ гдⷭ҇и. / Гдⷭ҇и бж҃е мо́й, возвели́чилсѧ є҆сѝ ѕѣлѡ̀: / Бл҃гослове́нъ є҆сѝ гдⷭ҇и. / Во и҆сповѣ́данїе и҆ въ велелѣ́потꙋ ѡ҆бле́клсѧ є҆сѝ. / Бл҃гослове́нъ є҆сѝ гдⷭ҇и. / Посредѣ̀ го́ръ про́йдꙋтъ во́ды. / Ди́вна дѣла̀ твоѧ̑ гдⷭ҇и. / Всѧ̑ премꙋ́дростїю сотвори́лъ є҆сѝ: / Сла́ва тѝ, гдⷭ҇и сотвори́вшемꙋ всѧ̑. ]

Ѱало́мъ р҃г.

Бл҃гословѝ дꙋшѐ моѧ̀ гдⷭ҇а: гдⷭ҇и бж҃е мо́й, возвели́чилсѧ є҆сѝ ѕѣлѡ̀, во и҆сповѣ́данїе и҆ въ велелѣ́потꙋ ѡ҆бле́клсѧ є҆сѝ. ѡ҆дѣѧ́йсѧ свѣ́томъ ꙗ҆́кѡ ри́зою, простира́ѧй нб҃о ꙗ҆́кѡ ко́жꙋ. покрыва́ѧй вода́ми превы́спрєннѧѧ своѧ̑, полага́ѧй ѻ҆́блаки на восхожде́нїе своѐ, ходѧ́й на крилꙋ̀ вѣ́трєню. творѧ́й а҆́гг҃лы своѧ̑ дꙋ́хи и҆ слꙋги̑ своѧ̑ пла́мень ѻ҆́гненный. ѡ҆снова́ѧй зе́млю на тве́рди є҆ѧ̀, не преклони́тсѧ въ вѣ́къ вѣ́ка. бе́здна, ꙗ҆́кѡ ри́за ѡ҆дѣѧ́нїе є҆ѧ̀, на гора́хъ ста́нꙋтъ во́ды. ѿ запреще́нїѧ твоегѡ̀ побѣ́гнꙋтъ, ѿ гла́са гро́ма твоегѡ̀ ᲂу҆боѧ́тсѧ. восхо́дѧтъ го́ры, и҆ низхо́дѧтъ полѧ̀ въ мѣ́сто, є҆́же ѡ҆снова́лъ є҆сѝ и҆̀мъ. предѣ́лъ положи́лъ є҆сѝ, є҆гѡ́же не пре́йдꙋтъ, нижѐ ѡ҆братѧ́тсѧ покры́ти зе́млю. посыла́ѧй и҆сто́чники въ де́брѣхъ, посредѣ̀ го́ръ про́йдꙋтъ во́ды. напаѧ́ютъ всѧ̑ ѕвѣ́ри сє́льныѧ, ждꙋ́тъ ѻ҆на́гри въ жа́ждꙋ свою̀. на ты́хъ пти̑цы нбⷭ҇ныѧ привита́ютъ, ѿ среды̀ ка́менїѧ дадѧ́тъ гла́съ. напаѧ́ѧй го́ры ѿ превы́спреннихъ свои́хъ, ѿ плода̀ дѣ́лъ твои́хъ насы́титсѧ землѧ̀. прозѧба́ѧй травꙋ̀ скотѡ́мъ, и҆ ѕла́къ на слꙋ́жбꙋ человѣ́кѡмъ, и҆звестѝ хлѣ́бъ ѿ землѝ. и҆ вїно̀ весели́тъ се́рдце человѣ́ка, ᲂу҆ма́стити лицѐ є҆ле́емъ, и҆ хлѣ́бъ се́рдце человѣ́ка ᲂу҆крѣпи́тъ. насы́тѧтсѧ древа̀ польска̑ѧ, ке́дри лїва́нстїи, и҆̀хже є҆сѝ насади́лъ. та́мѡ пти̑цы вогнѣздѧ́тсѧ: є҆рѡді́ево жили́ще предводи́тельствꙋетъ и҆́ми. го́ры высѡ́кїѧ є҆ле́нємъ, ка́мень прибѣ́жище за́ѧцємъ. сотвори́лъ є҆́сть лꙋнꙋ̀ во времена̀, со́лнце позна̀ за́падъ сво́й. положи́лъ є҆сѝ тьмꙋ̀, и҆ бы́сть но́щь, въ не́йже про́йдꙋтъ всѝ ѕвѣ́рїе дꙋбра́внїи: скѵ́мни рыка́ющїи восхи́тити, и҆ взыска́ти ѿ бг҃а пи́щꙋ себѣ̀. возсїѧ̀ со́лнце, и҆ собра́шасѧ, и҆ въ ло́жахъ свои́хъ лѧ́гꙋтъ. и҆зы́детъ человѣ́къ на дѣ́ло своѐ, и҆ на дѣ́ланїе своѐ до ве́чера. ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ: и҆спо́лнисѧ землѧ̀ тва́ри твоеѧ̀. сїѐ мо́ре вели́кое и҆ простра́нное, та́мѡ га́ди, и҆́хже нѣ́сть числа̀, живѡ́тнаѧ ма̑лаѧ съ вели́кими. та́мѡ кораблѝ препла́ваютъ, ѕмі́й се́й, є҆го́же созда́лъ є҆сѝ рꙋга́тисѧ є҆мꙋ̀. всѧ̑ къ тебѣ̀ ча́ютъ, да́ти пи́щꙋ и҆̀мъ во бл҃го вре́мѧ. да́вшꙋ тебѣ̀ и҆̀мъ, соберꙋ́тъ: ѿве́рзшꙋ тебѣ̀ рꙋ́кꙋ, всѧ́чєскаѧ и҆спо́лнѧтсѧ бл҃гости. ѿвра́щшꙋ же тебѣ̀ лицѐ возмѧтꙋ́тсѧ: ѿи́меши дꙋ́хъ и҆́хъ, и҆ и҆сче́знꙋтъ, и҆ въ пе́рсть свою̀ возвратѧ́тсѧ. по́слеши дх҃а твоего̀, и҆ сози́ждꙋтсѧ, и҆ ѡ҆бнови́ши лицѐ землѝ. бꙋ́ди сла́ва гдⷭ҇нѧ во вѣ́ки, возвесели́тсѧ гдⷭ҇ь ѡ҆ дѣ́лѣхъ свои́хъ: призира́ѧй на зе́млю, и҆ творѧ́й ю҆̀ трѧсти́сѧ: прикаса́ѧйсѧ гора́мъ, и҆ дымѧ́тсѧ. воспою̀ гдⷭ҇еви въ животѣ̀ мое́мъ: пою̀ бг҃ꙋ моемꙋ̀, до́ндеже є҆́смь. да ᲂу҆слади́тсѧ є҆мꙋ̀ бесѣ́да моѧ̀, а҆́зъ же возвеселю́сѧ ѡ҆ гдⷭ҇ѣ. да и҆сче́знꙋтъ грѣ̑шницы ѿ землѝ, и҆ беззакѡ́нницы, ꙗ҆́коже не бы́ти и҆̀мъ: бл҃гословѝ дꙋшѐ моѧ̀ гдⷭ҇а.

Со́лнце позна̀ за́падъ сво́й: положи́лъ є҆сѝ тьмꙋ̀ и҆ бы́сть но́щь. ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. три́жды.

Та́же є҆ктенїа̀ вели́каѧ. Та́же стїхосло́вїе ѱалти́рѧ.

[А҆́ще же є҆́сть сꙋббѡ́та ве́чера стїхосло́вимъ каѳі́смꙋ а҃, Бл҃же́нъ мꙋ́жъ: А҆́ще ᲂу҆́бѡ є҆́сть гдⷭ҇скїй пра́здникъ, и҆лѝ бг҃оро́диченъ, и҆лѝ ст҃а́гѡ вели́кагѡ, въ ни́хже пое́тсѧ полѷеле́й, пое́мъ стїхѝ ѱалмѡ́въ сїѧ̑:

Бл҃же́нъ мꙋ́жъ:

Бл҃же́нъ мꙋ́жъ, и҆́же не и҆́де на совѣ́тъ нечести́выхъ: А҆ллилꙋ́їа. Три́жды.

Ꙗ҆́кѡ вѣ́сть гдⷭ҇ь пꙋ́ть првⷣныхъ, и҆ пꙋ́ть нечести́выхъ поги́бнетъ. А҆ллилꙋ́їа. Три́жды.

Рабо́тайте гдⷭ҇еви со стра́хомъ, и҆ ра́дꙋйтесѧ є҆мꙋ̀ со тре́петомъ. А҆ллилꙋ́їа. Три́жды.

Бл҃же́ни всѝ надѣ́ющїисѧ на́нь. А҆ллилꙋ́їа. Три́жды.

Воскрⷭ҇нѝ, гдⷭ҇и, сп҃си́ мѧ, бж҃е мо́й: А҆ллилꙋ́їа. Три́жды.

Гдⷭ҇не є҆́сть сп҃се́нїе, и҆ на лю́дехъ твои́хъ бл҃гослове́нїе твоѐ. А҆ллилꙋ́їа. Три́жды.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.]

По стїхосло́вїи є҆ктенїа̀ ма́лаѧ.

И҆ а҆́бїе, Гдⷭ҇и воззва́хъ, въ прилꙋчи́вшїйсѧ гла́съ:

Гдⷭ҇и, воззва́хъ къ тебѣ̀, ᲂу҆слы́ши мѧ̀. / ᲂу҆слы́ши мѧ̀ гдⷭ҇и.

Первы́й ли́къ: Гдⷭ҇и, воззва́хъ къ тебѣ̀, ᲂу҆слы́ши мѧ̀: / вонмѝ гла́сꙋ моле́нїѧ моегѡ̀, / внегда̀ воззва́ти мѝ къ тебѣ̀. / ᲂу҆слы́ши мѧ̀ гдⷭ҇и.

Вторы́й ли́къ: Да и҆спра́витсѧ мл҃тва моѧ̀, / ꙗ҆́кѡ кади́ло пред̾ тобо́ю, / воздѣѧ́нїе рꙋкꙋ̀ моє́ю, / же́ртва вече́рнѧѧ. / ᲂу҆слы́ши мѧ̀ гдⷭ҇и.

И҆ по чи́нꙋ стїхѝ: Положѝ, гдⷭ҇и, хране́нїе ᲂу҆стѡ́мъ мои̑мъ, и҆ две́рь ѡ҆гражде́нїѧ ѡ҆ ᲂу҆стна́хъ мои́хъ. не ᲂу҆клонѝ се́рдце моѐ въ словеса̀ лꙋка́вствїѧ, непщева́ти вины̀ ѡ҆ грѣсѣ́хъ. съ человѣ́ки дѣ́лающими беззако́нїе, и҆ не сочтꙋ́сѧ со и҆збра́нными и҆́хъ. нака́жетъ мѧ̀ пра́ведникъ млⷭ҇тїю, и҆ ѡ҆бличи́тъ мѧ̀: є҆ле́й же грѣ́шнагѡ да не нама́ститъ главы̀ моеѧ̀. ꙗ҆́кѡ є҆щѐ и҆ мл҃тва моѧ̀ во бл҃говоле́нїихъ и҆́хъ, поже́рты бы́ша при ка́мени сꙋдїи̑ и҆́хъ. ᲂу҆слы́шатсѧ глаго́ли моѝ, ꙗ҆́кѡ возмого́ша: ꙗ҆́кѡ то́лща землѝ просѣ́десѧ на землѝ, расточи́шасѧ кѡ́сти и҆́хъ при а҆́дѣ. ꙗ҆́кѡ къ тебѣ̀ гдⷭ҇и, гдⷭ҇и, ѻ҆́чи моѝ, на тѧ̀ ᲂу҆пова́хъ, не ѿимѝ дꙋ́шꙋ мою̀. сохрани́ мѧ ѿ сѣ́ти, ю҆́же соста́виша мѝ, и҆ ѿ собла̑знъ дѣ́лающихъ беззако́нїе. падꙋ́тъ во мре́жꙋ свою̀ грѣ̑шницы: є҆ди́нъ є҆́смь а҆́зъ, до́ндеже прейдꙋ̀.

Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ ко гдⷭ҇ꙋ помоли́хсѧ. пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщꙋ̀. внегда̀ и҆счеза́ти ѿ менє̀ дꙋ́хꙋ моемꙋ̀, и҆ ты̀ позна́лъ є҆сѝ стєзѝ моѧ̑. на пꙋтѝ се́мъ, по немꙋ́же хожда́хъ, скры́ша сѣ́ть мнѣ̀. смотрѧ́хъ ѡ҆деснꙋ́ю и҆ возглѧ́дахъ, и҆ не бѣ̀ зна́ѧй менє̀. поги́бе бѣ́гство ѿ менє̀, и҆ нѣ́сть взыска́ѧй дꙋ́шꙋ мою̀. воззва́хъ къ тебѣ̀ гдⷭ҇и, рѣ́хъ: ты̀ є҆сѝ ᲂу҆пова́нїе моѐ, ча́сть моѧ̀ є҆сѝ на землѝ живы́хъ. вонмѝ моле́нїю моемꙋ̀, ꙗ҆́кѡ смири́хсѧ ѕѣлѡ̀: и҆зба́ви мѧ̀ ѿ гонѧ́щихъ мѧ̀, ꙗ҆́кѡ ᲂу҆крѣпи́шасѧ па́че менє̀.

На і҃, стїхи̑ры: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.

Менє̀ ждꙋ́тъ пра́вєдницы, до́ндеже возда́си мнѣ̀.

На и҃: И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и, ᲂу҆слы́ши гла́съ мо́й.

Да бꙋ́дꙋтъ ᲂу҆́ши твоѝ, вне́млющѣ гла́сꙋ моле́нїѧ моегѡ̀.

На ѕ҃: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.

И҆́мене ра́ди твоегѡ̀ потерпѣ́хъ тѧ̀, гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.

На д҃: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.

Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

На в҃: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.

Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Сла́ва: Ст҃а́гѡ мине́и. И҆ ны́нѣ: Бг҃оро́диченъ. А҆́ще нѣ́сть ст҃а́гѡ: Сла́ва, и҆ ны́нѣ: Бг҃оро́диченъ.

Творе́нїе сѡфро́нїа, патрїа́рха і҆ерⷭ҇ли́мскагѡ.

Свѣ́те ти́хїй ст҃ы́ѧ сла́вы, / безсме́ртнагѡ, ѻ҆ц҃а̀ нбⷭ҇нагѡ, / ст҃а́гѡ бл҃же́ннагѡ, і҆и҃се хрⷭ҇тѐ, / прише́дше на за́падъ со́лнца, / ви́дѣвше свѣ́тъ вече́рнїй, / пое́мъ ѻ҆ц҃а̀, сн҃а, и҆ ст҃а́го дх҃а, бг҃а. / досто́инъ є҆сѝ во всѧ̑ времена̀ / пѣ́тъ бы́ти гла́сы преподо́бными, / сн҃е бж҃їй, живо́тъ даѧ́й: / тѣ́мже мі́ръ тѧ̀ сла́витъ.

Въ недѣ́лю же и҆ въ пѧто́къ ве́чера, никогда́же пое́тсѧ а҆ллилꙋ́їа. А҆́ще же є҆́сть Бг҃ъ гдⷭ҇ь, пою́тсѧ прокі́мены сїѧ̑.

Въ сꙋббѡ́тꙋ ве́чера, на гла́съ ѕ҃:

Гдⷭ҇ь воцр҃и́сѧ, / въ лѣ́потꙋ ѡ҆блече́сѧ.

Сті́хъ: Ѡ҆блече́сѧ гдⷭ҇ь въ си́лꙋ, и҆ препоѧ́сасѧ.

Сті́хъ: И҆́бо ᲂу҆твердѝ вселе́ннꙋю, ꙗ҆̀же не подви́житсѧ.

Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.

Въ недѣ́лю ве́чера, гла́съ и҃:

Сѐ ны́нѣ бл҃гослови́те гдⷭ҇а / всѝ рабѝ гдⷭ҇ни.

Сті́хъ: Стоѧ́щїи во хра́мѣ гдⷭ҇ни, во дво́рѣхъ до́мꙋ бг҃а на́шегѡ.

Въ понедѣ́льникъ ве́чера, гла́съ д҃:

Гдⷭ҇ь ᲂу҆слы́шитъ мѧ̀, / внегда̀ воззва́ти мѝ къ немꙋ̀.

Сті́хъ: Внегда̀ призва́ти мѝ, ᲂу҆слы́ша мѧ̀ бг҃ъ пра́вды моеѧ̀.

Во вто́рникъ ве́чера, гла́съ а҃:

Ми́лость твоѧ̀, гдⷭ҇и, / пожене́тъ мѧ̀ всѧ̑ дни̑ живота̀ моегѡ̀.

Сті́хъ: Гдⷭ҇ь пасе́тъ мѧ̀, и҆ ничто́же мѧ̀ лиши́тъ, на мѣ́стѣ ѕла́чнѣ та́мѡ всели́ мѧ.

Въ сре́дꙋ ве́чера, гла́съ є҃:

Бж҃е, во и҆́мѧ твоѐ спаси́ мѧ, / и҆ въ си́лѣ твое́й сꙋди́ ми.

Сті́хъ: Бж҃е, ᲂу҆слы́ши моли́твꙋ мою̀, внꙋшѝ глаго́лы ᲂу҆́стъ мои́хъ.

Въ четверто́къ ве́чера, гла́съ ѕ҃:

По́мощь моѧ̀ ѿ гдⷭ҇а / сотво́ршагѡ нб҃о и҆ зе́млю.

Сті́хъ: Возведо́хъ ѻ҆́чи моѝ въ го́ры, ѿню́дꙋже прїи́детъ по́мощь моѧ̀.

Въ пѧто́къ ве́чера, гла́съ з҃:

Бж҃е, застꙋ́пникъ мо́й є҆сѝ ты̀, / и҆ ми́лость твоѧ̀ предвари́тъ мѧ̀.

Сті́хъ: И҆зми́ мѧ ѿ вра̑гъ мои́хъ бж҃е, и҆ ѿ востаю́щихъ на мѧ̀ и҆зба́ви мѧ̀.

Подоба́етъ вѣ́дати, ꙗ҆́кѡ а҆́ще прилꙋчи́тсѧ м҃-ца, и҆лѝ А҆ллилꙋ́їа, вмѣ́стѡ прокі́менѡвъ седми́цы, пое́мъ сїѧ̑.

Въ пнⷣльникъ ве́чера: А҆ллилꙋ́їа, три́жды, во гла́съ ѕ҃.

Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ. А҆ллилꙋ́їа.

Сті́хъ: И҆ во вѣ́ки вѣкѡ́въ.

Мы́ же высоча́йшимъ гла́сомъ: А҆ллилꙋ́їа.

Во вто́рникъ и҆ въ четверто́къ ве́чера: А҆ллилꙋ́їа.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю но́гꙋ є҆гѡ̀, ꙗ҆́кѡ ст҃о є҆́сть. А҆ллилꙋ́їа.

Сті́хъ: И҆ во вѣ́ки вѣкѡ́въ. А҆ллилꙋ́їа.

Въ сре́дꙋ ве́чера: А҆ллилꙋ́їа.

Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. А҆ллилꙋ́їа.

Сті́хъ: И҆ во вѣ́ки вѣкѡ́въ. А҆ллилꙋ́їа.

[А҆́ще комꙋ̀ и҆́мать бы́ти бдѣ́нїе, и҆лѝ полѷеле́й, чтꙋ́тсѧ парємїѝ пра́здникꙋ и҆лѝ ст҃о́мꙋ.

Дїа́конъ: Премꙋ́дрость.

И҆ чте́цъ надписа́нїе парємїѝ.

И҆ па́ки дїа́конъ: Во́нмемъ.

И҆ чте́цъ глаго́летъ парємїю̀.

Глаго́летъ сщ҃е́нникъ: Ми́ръ тѝ.

И҆ чте́цъ: И҆ дх҃ови твоемꙋ̀.

Е҆ктенїа̀ сꙋгꙋ́баѧ: Рце́мъ всѝ ѿ всеѧ̀ дꙋшѝ: ]

Та́же: Сподо́би, гдⷭ҇и:

Ли́къ: Сподо́би гдⷭ҇и въ ве́черъ се́й без̾ грѣха̀ сохрани́тисѧ на́мъ. / бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, / и҆ хва́льно и҆ просла́влено и҆́мѧ твоѐ во вѣ́ки, а҆ми́нь. / бꙋ́ди гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. / бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ. / бл҃гослове́нъ є҆сѝ влⷣко, вразꙋми́ мѧ ѡ҆правда́нїємъ твои̑мъ. / бл҃гослове́нъ є҆сѝ ст҃ы́й, просвѣти́ мѧ ѡ҆правда́нїи твои́ми. / гдⷭ҇и, млⷭ҇ть твоѧ̀ во вѣ́къ, дѣ́лъ рꙋкꙋ̀ твоє́ю не пре́зри: / тебѣ̀ подоба́етъ хвала̀, тебѣ̀ подоба́етъ пѣ́нїе, / тебѣ̀ сла́ва подоба́етъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, / ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Сщ҃е́нникъ: И҆спо́лнимъ вече́рнюю мл҃твꙋ на́шꙋ: И҆ прѡ́чаѧ.

[Сщ҃е́нникъ: Ми́ръ всѣ̑мъ.

Ли́къ: И҆ дх҃ови твоемꙋ̀.

Дїа́конъ: Главы̑ на́шѧ гдⷭ҇ви прикло́нимъ.

Ли́къ: Тебѣ̀, гдⷭ҇и.

Моли́тва главоприклоне́нїѧ. А҆́ще комꙋ̀ и҆́мать бы́ти бдѣ́нїе, и҆лѝ полѷеле́й,Та́же и҆схо́димъ въ притво́ръ, пою́ще стїхи́рꙋ хра́ма и҆лѝ пра́здника, соверша́юще лїті́ю. Сщ҃е́нникъ же и҆ дїа́конъ съ кади́льницею и҆схо́дѧтъ вкꙋ́пѣ сѣ́верною страно́ю, пред̾и́дꙋтъ же и҆̀мъ со двѣма̀ лампа́дома: ст҃ы̑мъ же две́ремъ затворє́нымъ сꙋ́щымъ. Сла́ва, ст҃а́гѡ: И҆ ны́нѣ, бг҃оро́диченъ. Та́же начина́емъ стїхи̑ры стїхо́вны, и҆ пою́ще вхо́димъ въ хра́мъ.]

И҆ по возгла́сѣ стїхи̑ры стїхо́вны, въ ни́хже глаго́лемъ настоѧ́щыѧ стїхѝ.

Сті́хъ а҃: Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.

Сті́хъ в҃: Поми́лꙋй на́съ, гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.

Сла́ва, и҆ ны́нѣ, бг҃оро́диченъ.

[А҆́ще же є҆́сть сꙋббѡ́та ве́чера, глаго́лемъ настоѧ́щыѧ стїхѝ:

Сті́хъ: Гдⷭ҇ь воцр҃и́сѧ, / въ лѣ́потꙋ ѡ҆блече́сѧ.

Сті́хъ: И҆́бо ᲂу҆твердѝ вселе́ннꙋю, / ꙗ҆́же не подви́житсѧ.

Сті́хъ: До́мꙋ твоемꙋ̀ подоба́етъ ст҃ы́нѧ / гдⷭ҇и, въ долготꙋ̀ дні́й.

Сла́ва, и҆ ны́нѣ, бг҃оро́диченъ.]

Мл҃тва ст҃а́гѡ сѷмеѡ́на бг҃опрїи́мца:

Ны́нѣ ѿпꙋща́еши раба̀ твоего̀, влⷣко, / по глаго́лꙋ твоемꙋ̀, съ ми́ромъ: / ꙗ҆́кѡ ви́дѣста ѻ҆́чи моѝ сп҃се́нїе твоѐ, / є҆́же є҆сѝ ᲂу҆гото́валъ пред̾ лице́мъ всѣ́хъ люде́й, / свѣ́тъ во ѿкрове́нїе ꙗ҆зы́кѡвъ, / и҆ сла́вꙋ люде́й твои́хъ і҆и҃лѧ.

Чте́цъ глаго́летъ Трист҃о́е. По Ѻ҆́ч҃е на́шъ: Возглаша́етъ сщ҃е́нникъ: Ꙗ҆́кѡ твоѐ є҆́сть црⷭ҇тво: Ли́къ: А҆ми́нь. Тропа́рь прилꙋчи́вшагѡсѧ пра́здника, и҆лѝ ст҃а́гѡ, и҆лѝ днѐ. Сла́ва, и҆ ны́нѣ, бг҃оро́диченъ: и҆ ѿпꙋ́стъ.

[Въ сꙋббѡ́тꙋ ве́чера:

Бцⷣе дв҃о ра́дꙋйсѧ, / бл҃года́тнаѧ мр҃і́е, гдⷭ҇ь съ тобо́ю: / бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀, / ꙗ҆́кѡ сп҃са родила̀ є҆сѝ дꙋ́шъ на́шихъ. Глаго́лемъ три́жды.

Посе́мъ ли́къ: Бꙋ́ди и҆́мѧ гдⷭ҇не блгⷭ҇ве́но ѿ ны́нѣ и҆ до вѣ́ка. Три́жды.

И҆ глаго́лемъ ѱало́мъ л҃г.

Бл҃гословлю̀ гдⷭ҇а на всѧ́кое вре́мѧ, вы́нꙋ хвала̀ є҆гѡ̀ во ᲂу҆стѣ́хъ мои́хъ. ѡ҆ гдⷭ҇ѣ похва́литсѧ дꙋша̀ моѧ̀, да ᲂу҆слы́шатъ кро́тцыи, и҆ возвеселѧ́тсѧ. возвели́чите гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ. взыска́хъ гдⷭ҇а, и҆ ᲂу҆слы́ша мѧ̀, и҆ ѿ всѣ́хъ скорбе́й мои́хъ и҆зба́ви мѧ̀. пристꙋпи́те къ немꙋ̀, и҆ просвѣти́тесѧ, и҆ ли́ца ва̑ша не постыдѧ́тсѧ. се́й ни́щїй воззва̀, и҆ гдⷭ҇ь ᲂу҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀. ѡ҆полчи́тсѧ а҆́гг҃лъ гдⷭ҇нь ѡ҆́крестъ боѧ́щихсѧ є҆гѡ̀, и҆ и҆зба́витъ и҆̀хъ. вкꙋси́те и҆ ви́дите, ꙗ҆́кѡ бл҃гъ гдⷭ҇ь: бл҃же́нъ мꙋ́жъ, и҆́же ᲂу҆пова́етъ на́нь. бо́йтесѧ гдⷭ҇а всѝ ст҃і́и є҆гѡ̀, ꙗ҆́кѡ нѣ́сть лише́нїѧ боѧ́щымсѧ є҆гѡ̀. бога́тїи ѡ҆бнища́ша и҆ взалка́ша, взыска́ющїи же гдⷭ҇а не лиша́тсѧ всѧ́кагѡ бл҃га.

Сщ҃е́нникъ къ наро́дꙋ глаго́летъ: Бл҃гослове́нїе гдⷭ҇не на ва́съ, тогѡ̀ бл҃года́тїю и҆ человѣколю́бїемъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

И҆ мы̀: А҆ми́нь.

И҆ начина́емъ шестоѱа́лмїе.]

А҆́ще же є҆́сть Бг҃ъ гдⷭ҇ь, по трист҃о́мъ ѿпꙋсти́тельный тропа́рь днѐ. Дїа́конъ: Премꙋ́дрость. Ли́къ: Бл҃гословѝ. Сщ҃е́нникъ: Сы́й блгⷭ҇ве́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ. Ли́къ: А҆ми́нь. Оу҆твердѝ бж҃е, / ст҃ꙋ́ю правосла́внꙋю вѣ́рꙋ, правосла́вныхъ хрⷭ҇тїа́нъ, / во вѣ́къ вѣ́ка. Сщ҃е́нникъ: Прест҃а́ѧ бцⷣе, спасѝ на́съ. Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ. Сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀. Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

Сщ҃е́нникъ твори́тъ ѿпꙋ́стъ:

Въ недѣ́лю: Воскресы́й и҆з̾ ме́ртвыхъ:

А҆́ще же нѝ: Хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лѡвъ, и҆ ст҃а́гѡ [(имя:gen), є҆гѡ́же є҆́сть хра́мъ, и҆ є҆гѡ́же є҆́сть де́нь], ст҃ы́хъ и҆ пра́ведныхъ бг҃оѻц҃ъ і҆ѡакі́ма и҆ а҆́нны, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бла́гъ и҆ чл҃вѣколю́бецъ.

Многолѣ́тїе.

Ли́къ: Вели́каго господи́на и҆ ѻ҆тца̀ на́шего (имя),_ / ст҃ѣ́йшаго патрїа́рха моско́вскаго и҆ всеѧ̀ рꙋсѝ, / и҆ господи́на на́шего преѡсвѧще́нѣйшего (имя),_ / митрополі́та [и҆лѝ_ а҆рхїепⷭ҇кпа, и҆лѝ є҆пⷭ҇кпа _є҆гѡ́же є҆́сть ѡ҆бласть], / бг҃охрани́мꙋю странꙋ̀ на́шꙋ рѡссі́йскꙋю, / настоѧ́телѧ, бра́тїю и҆ прихо́жанъ ст҃а́гѡ храма сегѡ̀, / и҆ всѧ̑ правосла́вныѧ хрⷭ҇тїа́ны, / гдⷭ҇и, сохранѝ и҆̀хъ на мно́гаѧ лѣ̑та.

А҆́ще же є҆́сть м҃-ца, и҆лѝ и҆́нъ по́стъ, и҆ А҆ллилꙋ́їа пѣ́то, глаго́ли тропарѝ сїѧ̑, во гла́съ д҃:

Бцⷣе дв҃о ра́дꙋйсѧ, / бл҃года́тнаѧ мр҃і́е, гдⷭ҇ь съ тобо́ю: / бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀, / ꙗ҆́кѡ сп҃са родила̀ є҆сѝ дꙋ́шъ на́шихъ. Покло́нъ а҃.

Сла́ва: Крⷭ҇ти́телю хрⷭ҇то́въ, всѣ́хъ на́съ помѧнѝ, / да и҆зба́вимсѧ ѿ беззако́нїй на́шихъ: / тебѣ́ бо даде́сѧ бл҃года́ть моли́тисѧ за ны̀. Покло́нъ а҃.

И҆ ны́нѣ: Моли́те за ны̀ ст҃і́и а҆пⷭ҇ли, ст҃і́и всѝ, / да и҆зба́вимсѧ ѿ бѣ́дъ и҆ скорбе́й: / ва́съ бо тє́плыѧ предста́тели ко сп҃сꙋ стѧжа́хомъ. Покло́нъ а҃.

Под̾ твоѐ бл҃гоꙋтро́бїе прибѣга́емъ бцⷣе, / молє́нїѧ на̑ша не пре́зри во ѡ҆бстоѧ́нїи, / но ѿ бѣ́дъ и҆зба́ви ны̀ є҆ди́на чⷭ҇таѧ, є҆ди́на бл҃гослове́ннаѧ. Без̾ покло́на.

Гдⷭ҇и поми́лꙋй, м҃. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

И҆́менемъ гдⷭ҇нимъ бл҃гословѝ, ѻ҆́тче.

Сщ҃е́нникъ: Сы́й бл҃гослове́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

Вѣ́домо бꙋ́ди, ꙗ҆́кѡ ᲂу҆ гре́кѡвъ сїю̀ мл҃твꙋ предстоѧ́тель глаго́летъ:

Нбⷭ҇ный цр҃ю̀, вѣ́рꙋ ᲂу҆твердѝ, ꙗ҆зы́ки ᲂу҆кротѝ, мі́ръ ᲂу҆мирѝ, ст҃ы́й хра́мъ се́й [ст҃ꙋ́ю ѻ҆би́тель сїю̀] до́брѣ сохранѝ: пре́жде ѿше́дшыѧ ѻ҆тцы̀ и҆ бра́тїю на́шꙋ въ селе́нїихъ пра́ведныхъ ᲂу҆чинѝ, и҆ на́съ въ покаѧ́нїи и҆ и҆сповѣ́данїи прїимѝ, ꙗ҆́кѡ бл҃гі́й и҆ человѣколю́бецъ.

Посе́мъ покло́ны вели̑кїѧ трѝ, глаго́люще въ себѣ̀ на ко́емждо покло́нѣ мл҃твꙋ прпⷣбнагѡ є҆фре́ма.

Гдⷭ҇и и҆ влⷣко живота̀ моегѡ̀, дꙋ́хъ пра́здности, ᲂу҆ны́нїѧ, любонача́лїѧ и҆ праздносло́вїѧ не да́ждь мѝ. Покло́нъ вели́кїй.

Дх҃ъ же цѣломꙋ́дрїѧ, смиреномꙋ́дрїѧ, терпѣ́нїѧ и҆ любвѐ да́рꙋй мѝ рабꙋ̀ твоемꙋ̀. Покло́нъ вели́кїй.

Е҆́й гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нїѧ, и҆ не ѡ҆сꙋжда́ти бра́та моегѡ̀: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь. Покло́нъ вели́кїй.

Та́же ма́лыхъ покло́нѡвъ в҃і, глаго́люще себѣ̀ вта́й на кі́йждо покло́нъ:

Бж҃е, ѡ҆чи́сти мѧ̀ грѣ́шнаго.

И҆ па́ки, сконча́въ покло́ны, глаго́лемъ мл҃твꙋ всю̀ вышепи́саннꙋю:

Гдⷭ҇и и҆ влⷣко живота̀ моегѡ̀: И҆ покло́нъ є҆ди́нъ вели́кїй.

Та́же, Трист҃о́е. По Ѻ҆́ч҃е на́шъ: Сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ мы̀: А҆ми́нь. Гдⷭ҇и поми́лꙋй, в҃і.

Та́же мл҃твꙋ:

Всест҃а́ѧ трⷪ҇це, є҆диносꙋ́щнаѧ держа́во, нераздѣ́льное црⷭ҇тво, всѣ́хъ бл҃ги́хъ вина̀, бл҃говоли́ же и҆ ѡ҆ мнѣ̀ грѣ́шнѣмъ, ᲂу҆твердѝ, вразꙋмѝ се́рдце моѐ, и҆ всю̀ мою̀ ѿимѝ скве́рнꙋ. просвѣтѝ мою̀ мы́сль, да вы́нꙋ сла́влю, пою̀ и҆ покланѧ́юсѧ, и҆ глаго́лю: є҆ди́нъ ст҃ъ, є҆ди́нъ гдⷭ҇ь, і҆и҃съ хрⷭ҇то́съ, въ сла́вꙋ бг҃а ѻ҆ц҃а̀, а҆ми́нь.

Посе́мъ: Бꙋ́ди и҆́мѧ гдⷭ҇не бл҃гослове́но ѿ ны́нѣ и҆ до вѣ́ка. три́жды. И҆ покло́ны г҃.

Сла́ва, и҆ ны́нѣ:

Та́же ѱало́мъ л҃г.

Бл҃гословлю̀ гдⷭ҇а на всѧ́кое вре́мѧ, вы́нꙋ хвала̀ є҆гѡ̀ во ᲂу҆стѣ́хъ мои́хъ. ѡ҆ гдⷭ҇ѣ похва́литсѧ дꙋша̀ моѧ̀, да ᲂу҆слы́шатъ кро́тцыи, и҆ возвеселѧ́тсѧ. возвели́чите гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ. взыска́хъ гдⷭ҇а, и҆ ᲂу҆слы́ша мѧ̀, и҆ ѿ всѣ́хъ скорбе́й мои́хъ и҆зба́ви мѧ̀. пристꙋпи́те къ немꙋ̀, и҆ просвѣти́тесѧ, и҆ ли́ца ва̑ша не постыдѧ́тсѧ. се́й ни́щїй воззва̀, и҆ гдⷭ҇ь ᲂу҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀. ѡ҆полчи́тсѧ а҆́гг҃лъ гдⷭ҇нь ѡ҆́крестъ боѧ́щихсѧ є҆гѡ̀, и҆ и҆зба́витъ и҆̀хъ. вкꙋси́те и҆ ви́дите, ꙗ҆́кѡ бл҃гъ гдⷭ҇ь: бл҃же́нъ мꙋ́жъ, и҆́же ᲂу҆пова́етъ на́нь. бо́йтесѧ гдⷭ҇а всѝ ст҃і́и є҆гѡ̀, ꙗ҆́кѡ нѣ́сть лише́нїѧ боѧ́щымсѧ є҆гѡ̀. бога́тїи ѡ҆бнища́ша и҆ взалка́ша, взыска́ющїи же гдⷭ҇а не лиша́тсѧ всѧ́кагѡ бл҃га.

И҆ ѱало́мъ рм҃д.

Вознесꙋ́ тѧ, бж҃е мо́й, цр҃ю̀ мо́й, и҆ бл҃гословлю̀ и҆́мѧ твоѐ въ вѣ́къ и҆ въ вѣ́къ вѣ́ка. на всѧ́къ де́нь бл҃гословлю́ тѧ, и҆ восхвалю̀ и҆́мѧ твоѐ въ вѣ́къ и҆ въ вѣ́къ вѣ́ка. ве́лїй гдⷭ҇ь и҆ хва́ленъ ѕѣлѡ̀, и҆ вели́чїю є҆гѡ̀ нѣ́сть конца̀. ро́дъ и҆ ро́дъ восхва́лѧтъ дѣла̀ твоѧ̑ и҆ си́лꙋ твою̀ возвѣстѧ́тъ: великолѣ́пїе сла́вы ст҃ы́ни твоеѧ̀ возглаго́лютъ и҆ чꙋдеса̀ твоѧ̑ повѣ́дѧтъ: и҆ си́лꙋ стра́шныхъ твои́хъ рекꙋ́тъ и҆ вели́чїе твоѐ повѣ́дѧтъ: па́мѧть мно́жества бл҃гости твоеѧ̀ ѿры́гнꙋтъ и҆ пра́вдою твое́ю возра́дꙋютсѧ. ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ. бл҃гъ гдⷭ҇ь всѧ́чєскимъ, и҆ щедрѡ́ты є҆гѡ̀ на всѣ́хъ дѣ́лѣхъ є҆гѡ̀. да и҆сповѣ́дѧтсѧ тебѣ̀, гдⷭ҇и, всѧ̑ дѣла̀ твоѧ̑, и҆ прпⷣбнїи твоѝ да бл҃гословѧ́тъ тѧ̀: сла́вꙋ црⷭ҇твїѧ твоегѡ̀ рекꙋ́тъ и҆ си́лꙋ твою̀ возглаго́лютъ, сказа́ти сыновѡ́мъ человѣ́чєскимъ си́лꙋ твою̀ и҆ сла́вꙋ великолѣ́пїѧ црⷭ҇твїѧ твоегѡ̀. црⷭ҇тво твоѐ црⷭ҇тво всѣ́хъ вѣкѡ́въ, и҆ влⷣчество твоѐ во всѧ́комъ ро́дѣ и҆ ро́дѣ. вѣ́ренъ гдⷭ҇ь во всѣ́хъ словесѣ́хъ свои́хъ и҆ прпⷣбенъ во всѣ́хъ дѣ́лѣхъ свои́хъ. ᲂу҆твержда́етъ гдⷭ҇ь всѧ̑ низпа́дающыѧ и҆ возставлѧ́етъ всѧ̑ низве́ржєнныѧ. ѻ҆́чи всѣ́хъ на тѧ̀ ᲂу҆пова́ютъ, и҆ ты̀ дае́ши и҆̀мъ пи́щꙋ во бл҃говре́менїи: ѿверза́еши ты̀ рꙋ́кꙋ твою̀ и҆ и҆сполнѧ́еши всѧ́кое живо́тно бл҃говоле́нїѧ. првⷣнъ гдⷭ҇ь во всѣ́хъ пꙋте́хъ свои́хъ и҆ прпⷣбенъ во всѣ́хъ дѣ́лѣхъ свои́хъ. бли́з̾ гдⷭ҇ь всѣ̑мъ призыва́ющымъ є҆го̀, всѣ̑мъ призыва́ющымъ є҆го̀ во и҆́стинѣ: во́лю боѧ́щихсѧ є҆гѡ̀ сотвори́тъ, и҆ моли́твꙋ и҆́хъ ᲂу҆слы́шитъ, и҆ сп҃се́тъ ѧ҆̀. храни́тъ гдⷭ҇ь всѧ̑ лю́бѧщыѧ є҆го̀, и҆ всѧ̑ грѣ́шники потреби́тъ. хвалꙋ̀ гдⷭ҇ню возглаго́лютъ ᲂу҆ста̀ моѧ̑: и҆ да бл҃гослови́тъ всѧ́ка пло́ть и҆́мѧ ст҃о́е є҆гѡ̀ въ вѣ́къ и҆ въ вѣ́къ вѣ́ка.

И҆ посе́мъ дїа́конъ: Премꙋ́дрость.

Ли́къ: Досто́йно є҆́сть, ꙗ҆́кѡ вои́стиннꙋ, бл҃жи́ти тѧ̀ бцⷣꙋ, / приснобл҃же́ннꙋю и҆ пренепоро́чнꙋю, и҆ мт҃рь бг҃а на́шегѡ.

Сщ҃е́нникъ: Прест҃а́ѧ бцⷣе, спасѝ на́съ.

Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

Сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

И҆ быва́етъ коне́чный ѿпꙋ́стъ. Сїѧ̑ же быва́ютъ, є҆гда̀ є҆́сть вели́кїй по́стъ.

А҆́ще же є҆́сть и҆́нъ по́стъ, и҆ пѣ́то А҆ллилꙋ́їа, по покло́нѣхъ, и҆ трист҃о́мъ, и҆ по возгла́сѣ: Ꙗ҆́кѡ твоѐ є҆́сть црⷭ҇тво: И҆ мы̀: А҆ми́нь. Гдⷭ҇и поми́лꙋй, в҃і. Сла́ва, и҆ ны́нѣ: И҆ па́ки, Гдⷭ҇и поми́лꙋй, три́жды. Бл҃гословѝ. И҆ ѿпꙋ́стъ.

А҆́ще же хо́щеши, по концѣ̀ вече́рни глаго́ли мл҃твꙋ сїю̀ вели́кагѡ васі́лїа:

Бл҃гослове́нъ є҆сѝ влⷣко вседержи́телю, просвѣти́вый де́нь свѣ́томъ со́лнечнымъ, и҆ но́щь ᲂу҆ѧсни́вый зарѧ́ми ѻ҆́гненными, є҆́же долготꙋ̀ днѐ прейтѝ на́съ сподо́билъ є҆сѝ, и҆ прибли́житисѧ нача́лѡмъ но́щи: ᲂу҆слы́ши моле́нїе на́ше, и҆ всѣ́хъ люде́й твои́хъ, и҆ всѣ́хъ на́съ простѝ вѡ́льнаѧ и҆ невѡ́льнаѧ согрѣшє́нїѧ. прїимѝ вечє́рнѧѧ на̑ша молє́нїѧ, и҆ низпослѝ мно́жество млⷭ҇ти твоѧ̀, и҆ щедро́тъ твои́хъ на достоѧ́нїе твоѐ: ѡ҆стѣнѝ на́съ ст҃ы́ми твои́ми а҆́гг҃лы: воѡрꙋжѝ на́съ ѻ҆рꙋ́жїемъ пра́вды: ѡ҆градѝ на́съ и҆́стиною твое́ю: соблюдѝ на́съ си́лою твое́ю: и҆зба́ви на́съ ѿ всѧ́кагѡ ѡ҆бстоѧ́нїѧ, и҆ всѧ́кагѡ навѣ́та сопроти́внагѡ. пода́ждь же на́мъ и҆ настоѧ́щїй ве́черъ съ приходѧ́щею но́щїю соверше́нъ, ст҃ъ, ми́ренъ, безгрѣ́шенъ, безбла́зненъ, безмечта́ненъ, и҆ всѧ̑ дни̑ живота̀ на́шегѡ. мл҃твами ст҃ы́ѧ бцⷣы. и҆ всѣ́хъ ст҃ы́хъ ѿ вѣ́ка бл҃гоꙋгоди́вшихъ, а҆ми́нь.

Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

И҆ быва́етъ ѿпꙋ́стъ.