Канѡ́нъ ᲂу҆мили́тельный ко гдⷭ҇ꙋ на́шемꙋ і҆и҃сꙋ хрⷭ҇тꙋ̀
Канон с молитвами ко Христу о покаянии, прощении грехов и исцелении душевных ран.
Канѡ́нъ, гла́съ в҃. Пѣ́снь а҃.
І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
Припѣ́въ: І҆и҃се сладча́йшїй, спаси́ мѧ.
І҆и҃се сладча́йшїй хрⷭ҇тѐ, і҆и҃се долготерпѣли́ве, дꙋшѝ моеѧ̀ ꙗ҆́звы и҆сцѣлѝ і҆и҃се, и҆ ᲂу҆сладѝ се́рдце моѐ, многомлⷭ҇тиве, молю́сѧ, і҆и҃се сп҃се мо́й, да велича́ю тѧ̀ сп҃са́емый.
Припѣ́въ: І҆и҃се сладча́йшїй, спаси́ мѧ.
І҆и҃се сладча́йшїй хрⷭ҇тѐ, і҆и҃се ѿве́рзи покаѧ́нїѧ мѝ две́рь, чл҃вѣколю́бче і҆и҃се, и҆ прїими́ мѧ тебѣ̀ припа́дающа, и҆ те́плѣ просѧ́ща, і҆и҃се сп҃се мо́й, согрѣше́нїй проще́нїѧ.
Сла́ва: І҆и҃се сладча́йшїй хрⷭ҇тѐ, і҆и҃се и҆схити́ мѧ и҆з̾ рꙋкѝ льсти́вагѡ велїа́ра, і҆и҃се, и҆ сотворѝ десна́го предстоѧ́телѧ сла́вы твоеѧ̀, і҆и҃се сп҃се мо́й, ча́сти шꙋ́їѧ мѧ̀ и҆збавлѧ́ѧй.
И҆ ны́нѣ: І҆и҃са ро́ждшаѧ бг҃а, влⷣчце, молѝ ѡ҆ непотре́бныхъ рабѣ́хъ пречⷭ҇таѧ, ꙗ҆́кѡ да мꙋ́ки мл҃твами твои́ми и҆зба́вимсѧ, нескве́рнаѧ, ѡ҆скверне́ннїи, сла́вы присносꙋ́щныѧ наслажда́ющесѧ.
Пѣ́снь г҃.
І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑. возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ ꙗ҆́коже бг҃ъ на́шъ, и҆ нѣ́сть првⷣнъ па́че тебѐ гдⷭ҇и.
Припѣ́въ: І҆и҃се сладча́йшїй, спаси́ мѧ.
Оу҆слы́ши чл҃вѣколю́бче і҆и҃се мо́й раба̀ твоего̀, вопїю́ща во ᲂу҆миле́нїи: и҆ и҆зба́ви мѧ̀ і҆и҃се ѡ҆сꙋжде́нїѧ и҆ мꙋ́ки, є҆ди́не долготерпѣли́ве, і҆и҃се сладча́йшїй многомлⷭ҇тиве.
Припѣ́въ: І҆и҃се сладча́йшїй, спаси́ мѧ.
Под̾имѝ раба̀ твоего̀ і҆и҃се мо́й, припа́дающа со слеза́ми, і҆и҃се мо́й, и҆ сп҃сѝ і҆и҃се мо́й ка́ющагосѧ мѧ̀, и҆ гее́нны влⷣко и҆зба́ви, і҆и҃се сладча́йшїй многомлⷭ҇тиве.
Сла́ва: Вре́мѧ, і҆и҃се мо́й, є҆́же да́лъ мѝ є҆сѝ, во стра́сти и҆жди́хъ, і҆и҃се мо́й. тѣ́мже і҆и҃се мо́й, не ѿве́ржи мѧ̀, но воззовѝ, молю́сѧ, влⷣко, і҆и҃се сладча́йшїй, и҆ сп҃сѝ.
И҆ ны́нѣ: Дв҃о ро́ждшаѧ і҆и҃са моего̀, молѝ и҆зба́вити мѧ̀ гее́нны, є҆ди́но предста́тельство ѡ҆скорблѧ́емыхъ, бг҃обл҃года́тнаѧ, и҆ сподо́би мѧ̀ жи́зни, всенепоро́чнаѧ, нестарѣ́ющїѧсѧ.
Гдⷭ҇и, поми́лꙋй. [Три́жды.]
Сѣда́ленъ, гла́съ а҃. Подо́бенъ: Гро́бъ тво́й:
Сп҃се мо́й і҆и҃се, блꙋ́днаго сп҃сы́й, сп҃се мо́й і҆и҃се, прїе́мый блꙋдни́цꙋ, и҆ менѐ ны́нѣ поми́лꙋй, і҆и҃се многомлⷭ҇тиве: сп҃сѝ, ᲂу҆ще́дри, ѽ і҆и҃се бл҃годѣ́телю, ꙗ҆́коже, бл҃гоꙋтро́бне, манассі́ю, і҆и҃се мо́й, ꙗ҆́кѡ є҆ди́нъ чл҃вѣколю́бецъ.
Пѣ́снь д҃.
І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
Припѣ́въ: І҆и҃се сладча́йшїй, спаси́ мѧ.
И҆сцѣлѝ і҆и҃се мо́й дꙋшѝ моеѧ̀ ꙗ҆́звы, і҆и҃се мо́й, молю́сѧ, и҆ рꙋки́ мѧ и҆схитѝ, і҆и҃се мо́й бл҃гоꙋтро́бне, дꙋшетлѣ́ннагѡ велїа́ра, и҆ сп҃сѝ.
Припѣ́въ: І҆и҃се сладча́йшїй, спаси́ мѧ.
Согрѣши́хъ, і҆и҃се мо́й сладча́йшїй бл҃гоꙋтро́бне: і҆и҃се мо́й, сп҃си́ мѧ прибѣга́ющаго къ покро́вꙋ твоемꙋ̀, і҆и҃се долготерпѣли́ве, и҆ црⷭ҇твїѧ твоегѡ́ мѧ сподо́би.
Сла́ва: Никто́же согрѣшѝ, і҆и҃се мо́й, ꙗ҆́коже согрѣши́хъ а҆́зъ ѻ҆каѧ́нный: но припа́даю молѧ́сѧ, і҆и҃се мо́й, сп҃си́ мѧ, и҆ жи́зни, і҆и҃се мо́й, наслѣ́дїе мѝ да́рꙋй.
И҆ ны́нѣ: Всепѣ́таѧ, і҆и҃са ро́ждшаѧ гдⷭ҇а, того̀ молѝ и҆зба́вити мꙋ́ки всѧ̑ пою́щыѧ тѧ̀, и҆ бцⷣꙋ вои́стиннꙋ и҆менꙋ́ющыѧ.
Пѣ́снь є҃.
І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.
Припѣ́въ: І҆и҃се сладча́йшїй, спаси́ мѧ.
Ты̀ просвѣще́нїе, і҆и҃се мо́й, ᲂу҆ма̀ моегѡ̀, ты̀ сп҃се́нїе ѿча́ѧнныѧ дꙋшѝ моеѧ̀, сп҃се, ты̀ і҆и҃се мо́й мꙋ́ки и҆зба́ви и҆ гее́нны мѧ̀ зовꙋ́ща: сп҃сѝ, і҆и҃се мо́й хрⷭ҇тѐ, мѧ̀ ѻ҆каѧ́ннаго.
Припѣ́въ: І҆и҃се сладча́йшїй, спаси́ мѧ.
Всеконе́чнѡ, і҆и҃се мо́й, къ стра́сти безче́стїѧ низве́рженъ ны́нѣ зовꙋ̀: ты̀ і҆и҃се мо́й, по́мощи мѝ рꙋ́кꙋ низпосла́въ, и҆сто́ргни зовꙋ́ща: сп҃сѝ і҆и҃се мо́й хрⷭ҇те́ мѧ ѻ҆каѧ́ннаго.
Сла́ва: Ѡ҆скверне́нъ ᲂу҆́мъ, і҆и҃се мо́й, ѡ҆бносѧ̀, взыва́ю тѝ: ѡ҆чи́сти мѧ̀ ѿ скве́рны прегрѣше́нїй, и҆ и҆зба́ви мѧ̀ во глꙋбины̑ ѕло́бы ѿ невѣ́дѣнїѧ низпопо́лзшагосѧ, сп҃се і҆и҃се мо́й, и҆ сп҃си́ мѧ, молю́сѧ.
И҆ ны́нѣ: І҆и҃са ро́ждшаѧ ѻ҆трокови́це бг҃ороди́тельнице, того̀ ᲂу҆молѝ сп҃стѝ всѧ̑ правосла̑вныѧ, мона́хи и҆ мїрскі̑ѧ, и҆ гее́нны и҆зба́вити зовꙋ́щыѧ: ра́звѣ тебє̀ предста́тельства тве́рдагѡ не зна́емъ.
Пѣ́снь ѕ҃.
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.
Припѣ́въ: І҆и҃се сладча́йшїй, спаси́ мѧ.
І҆и҃се мо́й хрⷭ҇тѐ многомлⷭ҇тиве, и҆сповѣ́дающасѧ прїими́ мѧ влⷣко, ѽ і҆и҃се, и҆ сп҃си́ мѧ, и҆ ѿ тлѝ, і҆и҃се, мѧ̀ и҆схитѝ.
Припѣ́въ: І҆и҃се сладча́йшїй, спаси́ мѧ.
І҆и҃се мо́й, никто́же бы́сть и҆́нъ блꙋдни́къ, ꙗ҆́коже а҆́зъ стра́стный, ѽ і҆и҃се чл҃вѣколю́бче: но ты̀ і҆и҃се мѧ̀ сп҃сѝ.
Сла́ва: І҆и҃се мо́й, блꙋдни́цꙋ и҆ блꙋ́днаго, и҆ манассі́ю и҆ мытарѧ̀ преидо́хъ, ѽ і҆и҃се мо́й, страстьмѝ, и҆ разбо́йника, і҆и҃се, и҆ нїнеѵі́тѧны.
И҆ ны́нѣ: І҆и҃са хрⷭ҇та̀ моего̀ ро́ждшаѧ пречⷭ҇таѧ дв҃о, є҆ди́на нескве́рнаѧ, ѡ҆скверне́на сꙋ́ща мѧ̀, мл҃твъ твои́хъ ѵ҆ссѡ́помъ ны́нѣ ѡ҆чи́сти.
Та́же, чтѝ кондакѝ и҆ і҆́косы:
Пѣ́снь з҃.
І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Припѣ́въ: І҆и҃се сладча́йшїй, спаси́ мѧ.
Хрⷭ҇тѐ і҆и҃се, никто́же согрѣшѝ на землѝ ѿ вѣ́ка, ѽ і҆и҃се мо́й, ꙗ҆́коже согрѣши́хъ а҆́зъ ѻ҆каѧ́нный и҆ блꙋ́дный. тѣ́мже і҆и҃се мо́й, вопїю́ ти: пою́ща мѧ̀ ᲂу҆ще́дри, бл҃гослове́нъ є҆сѝ бж҃е ѻ҆тє́цъ на́шихъ.
Припѣ́въ: І҆и҃се сладча́йшїй, спаси́ мѧ.
Хрⷭ҇тѐ і҆и҃се, ко стра́хꙋ твоемꙋ̀ вопїю̀, пригвозди́ мѧ, ѽ і҆и҃се мо́й, и҆ ѡ҆кормѝ ны́нѣ ко приста́нищꙋ бл҃гоѡти́шномꙋ, ꙗ҆́кѡ да, і҆и҃се мо́й ще́дре, пою́ ти сп҃са́емый: бл҃гослове́нъ є҆сѝ бж҃е ѻ҆тє́цъ на́шихъ.
Сла́ва: Хрⷭ҇тѐ і҆и҃се, тьма́ми ѡ҆бѣща́хъ тебѣ̀ стра́стный, ѽ і҆и҃се мо́й, покаѧ́нїе, но солга́хъ ѻ҆каѧ́нный. Тѣ́мже і҆и҃се мо́й вопїю́ ти: нечꙋ́вственнѣ пребыва́ющꙋю дꙋ́шꙋ мою̀ просвѣтѝ хрⷭ҇тѐ, ѻ҆тцє́въ бж҃е бл҃гослове́нъ є҆сѝ.
И҆ ны́нѣ: Хрⷭ҇та̀ і҆и҃са ро́ждшаѧ стра́ннѡ, и҆ па́че є҆стества̀, того̀ молѝ всенепоро́чнаѧ, ꙗ҆̀же чрез̾ є҆стество̀ моѧ̑ прегрѣшє́нїѧ всѧ̑ прости́ти мѝ, ѻ҆трокови́це, да зовꙋ̀ сп҃са́емь: бл҃гослове́на є҆сѝ бг҃а пло́тїю ро́ждшаѧ.
Пѣ́снь и҃.
І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Припѣ́въ: І҆и҃се сладча́йшїй, спаси́ мѧ.
Тѧ̀ і҆и҃се мо́й молю̀, ꙗ҆́коже блꙋдни́цꙋ, і҆и҃се мо́й, и҆зба́вилъ є҆сѝ мно́гихъ согрѣше́нїй: та́кѡ и҆ менѐ, і҆и҃се хрⷭ҇тѐ мо́й, и҆зба́ви, и҆ ѡ҆чи́сти ѡ҆скверне́ннꙋю дꙋ́шꙋ мою̀, і҆и҃се мо́й.
Припѣ́въ: І҆и҃се сладча́йшїй, спаси́ мѧ.
Преклони́всѧ, і҆и҃се, безслове́сными сластьмѝ, безслове́сенъ ꙗ҆ви́хсѧ, и҆ скотѡ́мъ вои́стиннꙋ, ѽ і҆и҃се мо́й, стра́стнѡ ѻ҆каѧ́нный ᲂу҆подо́бихсѧ, сп҃се: тѣ́мже, і҆и҃се, безслове́сїѧ мѧ̀ и҆зба́ви.
Сла́ва: Впа́дъ, ѽ і҆и҃се, въ дꙋшетлѣ̑нныѧ разбо́йники, ѡ҆бнажи́хсѧ ѻ҆де́жды, і҆и҃се мо́й, бг҃отка́нныѧ ны́нѣ, и҆ лежꙋ̀ ра́нами ᲂу҆ѧ́звленъ: є҆ле́й, хрⷭ҇тѐ мо́й, возле́й на мѧ̀ и҆ вїно̀.
И҆ ны́нѣ: І҆и҃са моего̀ и҆ бг҃а носи́вшаѧ хрⷭ҇та̀ несказа́ннѡ, бцⷣе мр҃і́е, того̀ молѝ при́снѡ ѿ бѣ́дъ сп҃сти́сѧ рабѡ́мъ твои̑мъ, и҆ пѣвцє́мъ твои̑мъ, неискꙋсомꙋ́жнаѧ дв҃о.
Пѣ́снь ѳ҃.
І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Припѣ́въ: І҆и҃се сладча́йшїй, спаси́ мѧ.
Манассі́ю, і҆и҃се мо́й, мытарѧ̀, блꙋдни́цꙋ, блꙋ́днаго, ще́дре і҆и҃се, и҆ разбо́йника преидо́хъ, і҆и҃се мо́й, въ дѣ́лѣхъ стꙋ́дныхъ и҆ безмѣ́стныхъ, і҆и҃се: но ты̀ і҆и҃се мо́й, предвари́въ мѧ̀ сп҃сѝ.
Припѣ́въ: І҆и҃се сладча́йшїй, спаси́ мѧ.
Ѿ а҆да́ма, і҆и҃се мо́й, согрѣши́вшыѧ всѧ̑, пре́жде зако́на и҆ въ зако́нѣ, і҆и҃се, и҆ по зако́нѣ ѻ҆каѧ́нный и҆ бл҃года́ти, і҆и҃се мо́й, побѣди́хъ страстьмѝ ѻ҆каѧ́ннѡ: но ты̀ і҆и҃се мо́й, сꙋдьба́ми твои́ми сп҃си́ мѧ.
Сла́ва: Да не ѿлꙋче́нъ бꙋ́дꙋ, і҆и҃се мо́й, неизрече́нныѧ твоеѧ̀ сла́вы, да не ᲂу҆лꙋчꙋ̀ ча́сти, і҆и҃се, шꙋ́їѧ, сладча́йшїй і҆и҃се: но ты́ мѧ дєсны́мъ ѻ҆вца́мъ твои̑мъ, хрⷭ҇тѐ і҆и҃се мо́й, сочета́въ ᲂу҆поко́й, ꙗ҆́кѡ бл҃гоꙋтро́бенъ.
И҆ ны́нѣ: І҆и҃са, бцⷣе, є҆го́же носи́ла є҆сѝ, є҆ди́на неискꙋсомꙋ́жнаѧ дв҃о мр҃і́е, того̀ чⷭ҇таѧ ᲂу҆ми́лостиви, ꙗ҆́кѡ сн҃а твоего̀ и҆ зижди́телѧ, и҆зба́вити притека́ющыѧ къ тебѣ̀ и҆скꙋше́нїй и҆ бѣ́дъ, и҆ ѻ҆гнѧ̀ бꙋ́дꙋщагѡ.
Свѣти́ленъ:
І҆и҃се, премꙋ́дрости и҆ смы́сла пода́телю, ни́щымъ корми́телю, си̑рымъ застꙋ́пниче, болѧ́щымъ врачꙋ̀, и҆сцѣлѝ и҆ просвѣтѝ моѐ се́рдце і҆и҃се, стрꙋ́пы грѣхо́вными и҆ страсте́й тле́ю покрове́нное і҆и҃се, и҆ сп҃си́ мѧ.
Бг҃оро́диченъ:
Сїѧ́нїемъ дв҃о и҆з̾ тебѐ возсїѧ́вшагѡ свѣ́та, ᲂу҆́мъ мо́й ѡ҆зарѝ, се́рдце просвѣтѝ, тьмꙋ̀ грѣхо́внꙋю ѿгонѧ́ющи, и҆ мглꙋ̀ лѣ́ности моеѧ̀ потреблѧ́ющи.
Мл҃тва ко гдⷭ҇ꙋ на́шемꙋ і҆и҃сꙋ хрⷭ҇тꙋ̀:
Влⷣко гдⷭ҇и і҆и҃се хрⷭ҇тѐ бж҃е на́шъ, и҆́же неизрече́ннагѡ ра́ди твоегѡ̀ чл҃вѣколю́бїѧ на коне́цъ вѣкѡ́въ во пло́ть ѡ҆болкі́йсѧ ѿ приснодв҃ы мр҃і́и! Сла́вимъ ѡ҆ на́съ твоѐ сп҃си́тельное промышле́нїе рабѝ твоѝ, влⷣко: пѣсносло́вимъ тѧ̀, ꙗ҆́кѡ тебє̀ ра́ди ѻ҆ц҃а̀ позна́хомъ: бл҃гослови́мъ тѧ̀, є҆гѡ́же ра́ди и҆ дх҃ъ ст҃ы́й въ мі́ръ прїи́де: покланѧ́емсѧ твое́й по пло́ти пречⷭ҇тѣй мт҃ри, таковѣ́й стра́шнѣй та́йнѣ послꙋжи́вшей: восхвалѧ́емъ твоѧ̑ а҆́гг҃льскаѧ ликостоѧ̑нїѧ, ꙗ҆́кѡ воспѣва́тели и҆ слꙋжи́тели твоегѡ̀ вели́чествїѧ: ᲂу҆бл҃жа́емъ прⷣте́чꙋ і҆ѡа́нна, тебѐ крести́вшаго, гдⷭ҇и: почита́емъ и҆ провозвѣсти́вшыѧ тѧ̀ прⷪ҇ро́ки: прославлѧ́емъ а҆пⷭ҇лы твоѧ̑ ст҃ы̑ѧ: торжествꙋ́емъ же и҆ мч҃нки, сщ҃е́нники же твоѧ̑ сла́вимъ, и҆ покланѧ́емсѧ прпⷣбнымъ твои̑мъ, и҆ всѧ̑ твоѧ̑ првⷣники пѣ́стꙋнствꙋемъ. Такова́го и҆ толи́кѡ мно́гаго и҆ неизрече́ннаго ли́ка бжⷭ҇твеннаго въ мл҃твꙋ приво́димъ тебѣ̀ всеще́дромꙋ бг҃ꙋ рабѝ твоѝ, и҆ сегѡ̀ ра́ди про́симъ на́шымъ согрѣше́нїємъ проще́нїѧ, є҆́же да́рꙋй на́мъ всѣ́хъ твои́хъ ра́ди ст҃ы́хъ, и҆зрѧ́днѣе же ст҃ы́хъ твои́хъ щедро́тъ: ꙗ҆́кѡ бл҃гослове́нъ є҆сѝ во вѣ́ки. А҆ми́нь.