Тропарѝ и҆ кондакѝ воскрⷭ҇ны

Песнопения восьми гласов о Воскресении Христовом.

.structured-reader > :not(noscript) { display: none !important; } .structured-reader, .prayer-reference-fallback { visibility: visible !important; }

Гла́съ а҃.

Тропа́рь: Ка́мени запеча́танꙋ ѿ і҆ꙋдє́й, / и҆ во́инѡмъ стрегꙋ́щымъ пречⷭ҇тое тѣ́ло твоѐ, / воскрⷭ҇лъ є҆сѝ тридне́вный сп҃се, / да́рꙋѧй мі́рови жи́знь. / сегѡ̀ ра́ди си̑лы нбⷭ҇ныѧ вопїѧ́хꙋ тѝ, жизнода́вче: / сла́ва воскрⷭ҇нїю твоемꙋ̀ хрⷭ҇тѐ: / сла́ва црⷭ҇твїю твоемꙋ̀: / сла́ва смотре́нїю твоемꙋ̀, є҆ди́не чл҃вѣколю́бче.

Бг҃оро́диченъ: Гаврїи́лꙋ вѣща́вшꙋ тебѣ̀, дв҃о, ра́дꙋйсѧ, / со гласомъ воплоща́шесѧ всѣ́хъ влⷣка, / въ тебѣ̀ ст҃ѣ́мъ кївѡ́тѣ, / ꙗ҆́коже речѐ првⷣный дв҃дъ: / ꙗ҆ви́ласѧ є҆сѝ ши́ршаѧ нб҃съ, / поноси́вши зижди́телѧ твоего̀. / сла́ва все́льшемꙋсѧ въ тѧ̀: / сла́ва проше́дшемꙋ и҆з̾ тебѐ: / сла́ва свободи́вшемꙋ на́съ ржⷭ҇тво́мъ твои́мъ.

Конда́къ. Подо́бенъ: Е҆гда̀ прїи́деши: Воскрⷭ҇лъ є҆сѝ ꙗ҆́кѡ бг҃ъ и҆з̾ гро́ба во сла́вѣ, / и҆ мі́ръ совоскр҃си́лъ є҆сѝ, / и҆ є҆стество̀ человѣ́ческое ꙗ҆́кѡ бг҃а воспѣва́етъ тѧ̀, и҆ сме́рть и҆счезѐ: / а҆да́мъ же ликꙋ́етъ влⷣко, / є҆́ѵа ны́нѣ ѿ ᲂу҆́зъ и҆збавлѧ́ема ра́дꙋетсѧ зовꙋ́щи: / ты̀ є҆сѝ, и҆́же всѣ̑мъ подаѧ̀ хрⷭ҇тѐ воскрⷭ҇нїе.

Гла́съ в҃.

Тропа́рь: Е҆гда̀ снизше́лъ є҆сѝ къ сме́рти, животѐ безсме́ртный, / тогда̀ а҆́дъ ᲂу҆мертви́лъ є҆сѝ блиста́нїемъ бж҃ества̀. / є҆гда́ же и҆ ᲂу҆ме́ршыѧ ѿ преиспо́днихъ воскр҃си́лъ є҆сѝ, / всѧ̑ си̑лы нбⷭ҇ныѧ взыва́хꙋ: / жизнода́вче хрⷭ҇тѐ бж҃е на́шъ, сла́ва тебѣ̀.

Бг҃оро́диченъ: Всѧ̑ па́че смы́сла, / всѧ̑ пресла̑внаѧ твоѧ̑ бцⷣе, та̑инства, / чистотѣ̀ запеча́танной, и҆ дѣ́вствꙋ храни́мꙋ, / мт҃и позна́ласѧ є҆сѝ нело́жна, / бг҃а ро́ждши и҆́стиннаго: / того̀ молѝ сп҃сти́сѧ дꙋша́мъ на́шымъ.

Конда́къ: Воскрⷭ҇лъ є҆сѝ ѿ гро́ба всеси́льне сп҃се, / и҆ а҆́дъ ви́дѣвъ чꙋ́до, ᲂу҆жасе́сѧ, / и҆ ме́ртвїи воста́ша: / тва́рь же ви́дѧщи сра́дꙋетсѧ тебѣ̀, / и҆ а҆да́мъ свесели́тсѧ, / и҆ мі́ръ сп҃се мо́й воспѣва́етъ тѧ̀ при́снѡ.

Гла́съ г҃.

Тропа́рь: Да веселѧ́тсѧ нбⷭ҇наѧ, / да ра́дꙋютсѧ земна̑ѧ: / ꙗ҆́кѡ сотворѝ держа́вꙋ мы́шцею свое́ю гдⷭ҇ь, / попра̀ сме́ртїю сме́рть, / пе́рвенецъ ме́ртвыхъ бы́сть, / и҆з̾ чре́ва а҆́дова и҆зба́ви на́съ, / и҆ подадѐ мі́рови ве́лїю млⷭ҇ть.

Бг҃оро́диченъ: Тѧ̀ хода́тайствовавшꙋю сп҃се́нїе ро́да на́шегѡ, / воспѣва́емъ бцⷣе дв҃о: / пло́тїю бо ѿ тебѐ воспрїѧ́тою сн҃ъ тво́й, и҆ бг҃ъ на́шъ, / крⷭ҇то́мъ воспрїи́мъ стрⷭ҇ть, / и҆зба́ви на́съ ѿ тлѝ ꙗ҆́кѡ чл҃вѣколю́бецъ.

Конда́къ. Подо́бенъ: Дв҃а дне́сь: Воскрⷭ҇лъ є҆сѝ дне́сь и҆з̾ гро́ба ще́дре, / и҆ на́съ возве́лъ є҆сѝ ѿ вра́тъ сме́ртныхъ: / дне́сь а҆да́мъ ликꙋ́етъ, и҆ ра́дꙋетсѧ є҆́ѵа, / вкꙋ́пѣ же и҆ прⷪ҇ро́цы съ патрїа́рхи воспѣва́ютъ непреста́ннѡ / бж҃е́ственнꙋю держа́вꙋ вла́сти твоеѧ̀.

Гла́съ д҃.

Тропа́рь: Свѣ́тлꙋю воскрⷭ҇нїѧ про́повѣдь / ѿ а҆́гг҃ла ᲂу҆вѣ́дѣвшѧ гдⷭ҇ни ᲂу҆ч҃нцы, / и҆ пра́дѣднее ѡ҆сꙋжде́нїе ѿве́ргшѧ, / а҆пⷭ҇лѡмъ хва́лѧщѧсѧ глаго́лахꙋ: / и҆спрове́ржесѧ сме́рть, / воскр҃се хрⷭ҇то́съ бг҃ъ, / да́рꙋѧй мі́рови ве́лїю млⷭ҇ть.

Бг҃оро́диченъ: Е҆́же ѿ вѣ́ка ᲂу҆тае́ное, / и҆ а҆́гг҃лѡмъ несвѣ́домое та́инство: / тобо́ю бцⷣе сꙋ́щымъ на землѝ ꙗ҆ви́сѧ бг҃ъ, / въ несли́тномъ соедине́нїи воплоща́емь, / и҆ крⷭ҇тъ во́лею на́съ ра́ди воспрїи́мъ, / и҆́мже воскр҃си́въ первозда́ннаго, / сп҃сѐ ѿ сме́рти дꙋ́шы на́шѧ.

Конда́къ. Подо́бенъ: Ꙗ҆ви́лсѧ є҆сѝ дне́сь: Сп҃съ и҆ и҆зба́витель мо́й, / и҆з̾ гро́ба ꙗ҆́кѡ бг҃ъ воскр҃сѝ ѿ ᲂу҆́зъ земнорѡ́дныѧ, / и҆ врата̀ а҆́дѡва сокрꙋшѝ, / и҆ ꙗ҆́кѡ влⷣка / воскр҃се тридне́венъ.

Гла́съ є҃.

Тропа́рь: Собезнача́льное сло́во ѻ҆ц҃ꙋ̀ и҆ дх҃ови, / ѿ дв҃ы ро́ждшеесѧ на сп҃се́нїе на́ше, / воспои́мъ вѣ́рнїи и҆ поклони́мсѧ: / ꙗ҆́кѡ бл҃говолѝ пло́тїю взы́ти на крⷭ҇тъ, / и҆ сме́рть претерпѣ́ти, / и҆ воскр҃си́ти ᲂу҆ме́ршыѧ / сла́внымъ воскрⷭ҇нїемъ свои́мъ.

Бг҃оро́диченъ: Ра́дꙋйсѧ две́ре гдⷭ҇нѧ непроходи́маѧ: / ра́дꙋйсѧ стѣно̀ и҆ покро́ве притека́ющихъ къ тебѣ̀. / ра́дꙋйсѧ, неѡбꙋрева́емое приста́нище, и҆ неискꙋсобра́чнаѧ, / ро́ждшаѧ пло́тїю творца̀ твоего̀ и҆ бг҃а: / молѧ́щи не ѡ҆скꙋдѣва́й ѡ҆ воспѣва́ющихъ, / и҆ кла́нѧющихсѧ ржⷭ҇твꙋ̀ твоемꙋ̀.

Конда́къ. Подо́бенъ: Собезнача́льное сло́во: Ко а҆́дꙋ сп҃се мо́й соше́лъ є҆сѝ, / и҆ врата̀ сокрꙋши́вый ꙗ҆́кѡ всеси́ленъ, / ᲂу҆ме́ршихъ ꙗ҆́кѡ созда́тель совоскр҃си́лъ є҆сѝ, / и҆ сме́рти жа́ло сокрꙋши́лъ є҆сѝ, / и҆ а҆да́мъ ѿ клѧ́твы и҆зба́вленъ бы́сть, чл҃вѣколю́бче. / тѣ́мже всѝ зове́мъ: / сп҃сѝ на́съ гдⷭ҇и.

Гла́съ ѕ҃.

Тропа́рь: А҆́гг҃льскїѧ си̑лы на гро́бѣ твое́мъ, / и҆ стрегꙋ́щїи ѡ҆мертвѣ́ша: / и҆ стоѧ́ше мр҃і́а во гро́бѣ, / и҆́щꙋщи пречⷭ҇тагѡ тѣ́ла твоегѡ̀. / плѣни́лъ є҆сѝ а҆́дъ, не и҆скꙋси́всѧ ѿ негѡ̀: / срѣ́тилъ є҆сѝ дв҃ꙋ да́рꙋѧй живо́тъ. / воскр҃сы́й и҆з̾ ме́ртвыхъ, гдⷭ҇и, сла́ва тебѣ̀.

Бг҃оро́диченъ: Бл҃гослове́ннꙋю нарекі́й твою̀ мт҃рь, / прише́лъ є҆сѝ на стрⷭ҇ть во́льнымъ хотѣ́нїемъ, / возсїѧ́въ на крⷭ҇тѣ̀, взыска́ти хотѧ̀ а҆да́ма, / глаго́лѧ а҆́гг҃лѡмъ: сра́дꙋйтесѧ мнѣ̀, / ꙗ҆́кѡ ѡ҆брѣ́тесѧ поги́бшаѧ дра́хма, / всѧ̑ мꙋ́дрѣ ᲂу҆стро́ивый бж҃е на́шъ, сла́ва тебѣ̀.

Конда́къ: Живонача́льною дла́нїю, / ᲂу҆ме́ршыѧ ѿ мра́чныхъ ᲂу҆до́лїй, / жизнода́вецъ воскр҃си́въ всѣ́хъ хрⷭ҇то́съ бг҃ъ, / воскрⷭ҇нїе подадѐ человѣ́ческомꙋ ро́дꙋ: / є҆́сть бо всѣ́хъ сп҃си́тель, / воскрⷭ҇нїе и҆ живо́тъ, и҆ бг҃ъ всѣ́хъ.

Гла́съ з҃.

Тропа́рь: Разрꙋши́лъ є҆сѝ крⷭ҇то́мъ твои́мъ сме́рть, / ѿве́рзлъ є҆сѝ разбо́йникꙋ ра́й: / мѷроно́сицамъ пла́чь преложи́лъ є҆сѝ, / и҆ а҆пⷭ҇лѡмъ проповѣ́дати повелѣ́лъ є҆сѝ: / ꙗ҆́кѡ воскрⷭ҇лъ є҆сѝ хрⷭ҇тѐ бж҃е, / да́рꙋѧй мі́рови ве́лїю млⷭ҇ть.

Бг҃оро́диченъ: Ꙗ҆́кѡ на́шегѡ воскрⷭ҇нїѧ сокро́вище, / на тѧ̀ надѣ́ющыѧсѧ всепѣ́таѧ, / ѿ ро́ва и҆ глꙋбины̀ прегрѣше́нїй возведѝ: / ты́ бо пови̑нныѧ грѣхꙋ̀ сп҃сла̀ є҆сѝ, / ро́ждши сп҃се́нїе на́ше: / ꙗ҆́же пре́жде ржⷭ҇тва̀ дв҃а, и҆ въ ржⷭ҇твѣ̀ дв҃а, / и҆ по ржⷭ҇твѣ̀ па́ки пребыва́еши дв҃а.

Конда́къ: Не ктомꙋ̀ держа́ва сме́ртнаѧ / возмо́жетъ держа́ти человѣ́ки: / хрⷭ҇то́съ бо сни́де сокрꙋша́ѧ и҆ разорѧ́ѧ си̑лы є҆ѧ̀. / свѧзꙋ́емь быва́етъ а҆́дъ, / прⷪ҇ро́цы согла́снѡ ра́дꙋютсѧ: / предста̀, глаго́люще, сп҃съ сꙋ́щымъ въ вѣ́рѣ, / и҆зыди́те вѣ́рнїи въ воскрⷭ҇нїе.

Гла́съ и҃.

Тропа́рь: Съ высоты̀ снизше́лъ є҆сѝ бл҃гоꙋтро́бне, / погребе́нїе прїѧ́лъ є҆сѝ тридне́вное, / да на́съ свободи́ши страсте́й, / животѐ и҆ воскрⷭ҇нїе на́ше, гдⷭ҇и сла́ва тебѣ̀.

Бг҃оро́диченъ: И҆́же на́съ ра́ди рожде́йсѧ ѿ дв҃ы, / и҆ распѧ́тїе претерпѣ́въ бл҃гі́й, / и҆спрове́ргїй сме́ртїю сме́рть, / и҆ воскрⷭ҇нїе ꙗ҆вле́й ꙗ҆́кѡ бг҃ъ, / не пре́зри ꙗ҆̀же созда́лъ є҆сѝ рꙋко́ю твое́ю: / ꙗ҆вѝ чл҃вѣколю́бїе твоѐ млⷭ҇тиве, / прїимѝ ро́ждшꙋю тѧ̀ бцⷣꙋ молѧ́щꙋюсѧ за ны̀: / и҆ сп҃сѝ сп҃се на́шъ, лю́ди ѿча̑ѧнныѧ.

Конда́къ. Подо́бенъ: Ꙗ҆́кѡ нача́тки: Воскр҃съ и҆з̾ гро́ба, ᲂу҆ме́ршыѧ воздви́глъ є҆сѝ, / и҆ а҆да́ма воскр҃си́лъ є҆сѝ, / и҆ є҆́ѵа ликꙋ́етъ во твое́мъ воскрⷭ҇нїи, / и҆ мїрсті́и концы̀ торжествꙋ́ютъ, / є҆́же и҆з̾ ме́ртвыхъ воста́нїемъ твои́мъ, многомлⷭ҇тиве.