Ча́съ шесты́й

Прїиди́те, поклони́мсѧ цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.

Ѱало́мъ н҃г.

Бж҃е, во и҆́мѧ твоѐ сп҃си́ мѧ, и҆ въ си́лѣ твое́й сꙋди́ ми: бж҃е, ᲂу҆слы́ши мл҃твꙋ мою̀, внꙋшѝ глаго́лы ᲂу҆́стъ мои́хъ. ꙗ҆́кѡ чꙋ́ждїи воста́ша на мѧ̀, и҆ крѣ́пцыи взыска́ша дꙋ́шꙋ мою̀, и҆ не предложи́ша бг҃а пред̾ собо́ю. се́ бо бг҃ъ помога́етъ мѝ, и҆ гдⷭ҇ь застꙋ́пникъ дꙋшѝ мое́й. ѿврати́тъ ѕла̑ѧ врагѡ́мъ мои̑мъ, и҆́стиною твое́ю потребѝ и҆̀хъ. во́лею пожрꙋ̀ тебѣ̀, и҆сповѣ́мсѧ и҆́мени твоемꙋ̀ гдⷭ҇и, ꙗ҆́кѡ бл҃го. ꙗ҆́кѡ ѿ всѧ́кїѧ печа́ли и҆зба́вилъ мѧ̀ є҆сѝ, и҆ на врагѝ моѧ̑ воззрѣ̀ ѻ҆́ко моѐ.

Ѱало́мъ н҃д.

Внꙋшѝ бж҃е мл҃твꙋ мою̀, и҆ не пре́зри моле́нїѧ моегѡ̀. вонми́ ми, и҆ ᲂу҆слы́ши мѧ̀: возскорбѣ́хъ печа́лїю мое́ю, и҆ смѧто́хсѧ ѿ гла́са вра́жїѧ и҆ ѿ стꙋже́нїѧ грѣ́шнича. ꙗ҆́кѡ ᲂу҆клони́ша на мѧ̀ беззако́нїе, и҆ во гнѣ́вѣ враждова́хꙋ мѝ. се́рдце моѐ смѧте́сѧ во мнѣ̀, и҆ боѧ́знь сме́рти нападѐ на мѧ̀. стра́хъ и҆ тре́петъ прїи́де на мѧ̀, и҆ покры́ мѧ тьма̀. и҆ рѣ́хъ: кто̀ да́стъ мѝ крилѣ̀ ꙗ҆́кѡ голꙋби́нѣ, и҆ полещꙋ̀ и҆ почі́ю; сѐ ᲂу҆дали́хсѧ бѣ́гаѧ, и҆ водвори́хсѧ въ пꙋсты́ни. ча́ѧхъ бг҃а, сп҃са́ющагѡ мѧ̀ ѿ малодꙋ́шїѧ и҆ ѿ бꙋ́ри. потопѝ гдⷭ҇и, и҆ раздѣлѝ ꙗ҆зы́ки и҆́хъ, ꙗ҆́кѡ ви́дѣхъ беззако́нїе, и҆ прерѣка́нїе во гра́дѣ. дне́мъ и҆ но́щїю ѡ҆бы́детъ и҆̀ по стѣна́мъ є҆гѡ̀: беззако́нїе и҆ трꙋ́дъ посредѣ̀ є҆гѡ̀, и҆ непра́вда: и҆ не ѡ҆скꙋдѣ̀ ѿ сто́гнъ є҆гѡ̀ ли́хва и҆ ле́сть. ꙗ҆́кѡ а҆́ще бы вра́гъ поноси́лъ мѝ, претерпѣ́лъ бы́хъ ᲂу҆̀бо: и҆ а҆́ще бы ненави́дѧй мѧ̀ на мѧ̀ велерѣ́чевалъ, ᲂу҆кры́лъ бы́хъ сѧ ѿ негѡ̀. ты́ же человѣ́че равнодꙋ́шне, влады́ко мо́й, и҆ зна́емый мо́й: и҆́же кꙋ́пнѡ наслажда́лсѧ є҆сѝ со мно́ю бра́шенъ, въ домꙋ̀ бж҃їи ходи́хомъ є҆диномышле́нїемъ. да прїи́детъ же сме́рть на нѧ̀, и҆ да сни́дꙋтъ во а҆́дъ жи́ви: ꙗ҆́кѡ лꙋка́вство въ жили́щахъ и҆́хъ, посредѣ̀ и҆̀хъ: а҆́зъ къ бг҃ꙋ воззва́хъ, и҆ гдⷭ҇ь ᲂу҆слы́ша мѧ̀. ве́черъ и҆ заꙋ́тра и҆ полꙋ́дне повѣ́мъ, и҆ возвѣщꙋ̀, и҆ ᲂу҆слы́шитъ гла́съ мо́й. и҆зба́витъ ми́ромъ дꙋ́шꙋ мою̀ ѿ приближа́ющихсѧ мнѣ̀: ꙗ҆́кѡ во мно́зѣ бѧ́хꙋ со мно́ю. ᲂу҆слы́шитъ бг҃ъ, и҆ смири́тъ ѧ҆̀, сы́й пре́жде вѣ̑къ: нѣ́сть бо и҆̀мъ и҆змѣне́нїѧ, ꙗ҆́кѡ не ᲂу҆боѧ́шасѧ бг҃а. прострѐ рꙋ́кꙋ свою̀ на воздаѧ́нїе, ѡ҆скверни́ша завѣ́тъ є҆гѡ̀. раздѣли́шасѧ ѿ гнѣ́ва лица̀ є҆гѡ̀, и҆ прибли́жишасѧ сердца̀ и҆́хъ: ᲂу҆мѧ́кнꙋша словеса̀ и҆́хъ па́че є҆ле́а, и҆ та̑ сꙋ́ть стрѣ́лы. возве́рзи на гдⷭ҇а печа́ль твою̀, и҆ то́й тѧ̀ препита́етъ, не да́стъ въ вѣ́къ молвы̀ пра́ведникꙋ. ты́ же бж҃е, низведе́ши ѧ҆̀ въ стꙋдене́цъ и҆стлѣ́нїѧ. мꙋ́жїе крове́й и҆ льстѝ не преполовѧ́тъ дне́й свои́хъ: а҆́зъ же гдⷭ҇и ᲂу҆пова́ю на тѧ̀.

Ѱало́мъ ч҃.

Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ. рече́тъ гдⷭ҇еви: застꙋ́пникъ мо́й є҆сѝ, и҆ прибѣ́жище моѐ, бг҃ъ мо́й, и҆ ᲂу҆пова́ю на него̀. ꙗ҆́кѡ то́й и҆зба́витъ тѧ̀ ѿ сѣ́ти ло́вчи, и҆ ѿ словесѐ мѧте́жна. плещма̀ свои́ма ѡ҆сѣни́тъ тѧ̀, и҆ под̾ крилѣ̀ є҆гѡ̀ надѣ́ешисѧ. ѻ҆рꙋ́жїемъ ѡ҆бы́детъ тѧ̀ и҆́стина є҆гѡ̀, не ᲂу҆бои́шисѧ ѿ стра́ха нощна́гѡ, ѿ стрѣлы̀ летѧ́щїѧ во днѝ, ѿ ве́щи во тьмѣ̀ преходѧ́щїѧ, ѿ срѧ́ща и҆ бѣ́са полꙋ́деннагѡ. паде́тъ ѿ страны̀ твоеѧ̀ ты́сѧща, и҆ тьма̀ ѡ҆деснꙋ́ю тебѐ, къ тебѣ́ же не прибли́житсѧ. ѻ҆ба́че ѻ҆чи́ма твои́ма смо́триши, и҆ воздаѧ́нїе грѣ́шникѡвъ ᲂу҆́зриши. ꙗ҆́кѡ ты̀ гдⷭ҇и, ᲂу҆пова́нїе моѐ, вы́шнѧго положи́лъ є҆сѝ прибѣ́жище твоѐ. не прїи́детъ къ тебѣ̀ ѕло̀, и҆ ра́на не прибли́житсѧ тѣлесѝ твоемꙋ̀. ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пꙋте́хъ твои́хъ. на рꙋка́хъ во́змꙋтъ тѧ̀, да не когда̀ преткне́ши ѡ҆ ка́мень но́гꙋ твою̀. на а҆́спїда и҆ васїлі́ска настꙋ́пиши, и҆ попере́ши льва̀ и҆ ѕмі́ѧ. ꙗ҆́кѡ на мѧ̀ ᲂу҆пова̀, и҆ и҆зба́влю и҆̀: покры́ю и҆̀, ꙗ҆́кѡ позна̀ и҆́мѧ моѐ: воззове́тъ ко мнѣ̀, и҆ ᲂу҆слы́шꙋ є҆го̀: съ ни́мъ є҆́смь въ ско́рби, и҆змꙋ̀ є҆го̀: и҆ просла́влю є҆го̀: долгото́ю дне́й и҆спо́лню є҆го̀, и҆ ꙗ҆влю̀ є҆мꙋ̀ сп҃се́нїе моѐ.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. три́жды.

Гдⷭ҇и поми́лꙋй, три́жды.

И҆ а҆́ще пое́тсѧ, Бг҃ъ гдⷭ҇ь, глаго́лемъ: Сла́ва, тропа́рь днѐ.

А҆́ще же а҆ллилꙋ́їа, глаго́лемъ настоѧ́щїй тропа́рь, во гла́съ в҃:

И҆́же въ шесты́й де́нь же и҆ ча́съ, / на крⷭ҇тѣ̀ пригвожде́й / въ раѝ дерзнове́нный а҆да́мовъ грѣ́хъ, / и҆ согрѣше́нїй на́шихъ рꙋкописа́нїе раздерѝ / хрⷭ҇тѐ бж҃е, и҆ сп҃сѝ на́съ.

Сті́хъ а҃: Внꙋшѝ бж҃е, мл҃твꙋ мою̀, и҆ не пре́зри моле́нїѧ моегѡ̀.

Сті́хъ в҃: А҆́зъ къ бг҃ꙋ воззва́хъ, и҆ гдⷭ҇ь ᲂу҆слы́ша мѧ̀.

Сла́ва, и҆ ны́нѣ, бг҃оро́диченъ:

Ꙗ҆́кѡ не и҆́мамы дерзнове́нїѧ за премнѡ́гїѧ грѣхѝ на́шѧ, / ты̀ и҆́же ѿ тебѐ ро́ждшагосѧ молѝ бцⷣе дв҃о: / мно́гѡ бо мо́жетъ моле́нїе мт҃рнее ко бл҃госе́рдїю влⷣки. / не пре́зри грѣ́шныхъ мольбы̑ всечⷭ҇таѧ, / ꙗ҆́кѡ млⷭ҇тивъ є҆́сть, и҆ сп҃стѝ могі́й, / и҆́же и҆ страда́ти ѡ҆ на́съ и҆зво́ливый.

Ско́рѡ да предварѧ́тъ ны̀ щедрѡ́ты твоѧ̑ гдⷭ҇и, / ꙗ҆́кѡ ѡ҆бнища́хомъ ѕѣлѡ̀: / помозѝ на́мъ бж҃е сп҃се на́шъ, / сла́вы ра́ди и҆́мене твоегѡ̀ гдⷭ҇и, и҆зба́ви на́съ, / и҆ ѡ҆чи́сти грѣхѝ на́шѧ, и҆́мене ра́ди твоегѡ̀.

Та́же, Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.

Гдⷭ҇и поми́лꙋй, три́жды. Сла́ва, и҆ ны́нѣ:

Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.

Сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ мы̀: А҆ми́нь.

Конда́къ днѐ ст҃а́гѡ.

А҆́ще по́стъ, въ понедѣ́льникъ, во вто́рникъ и҆ четверто́къ глаго́лемъ тропарѝ сїѧ̑, во гла́съ в҃:

Сп҃се́нїе содѣ́лалъ є҆сѝ посредѣ̀ землѝ хрⷭ҇тѐ бж҃е, / на крⷭ҇тѣ̀ пречи́стѣи рꙋ́цѣ твоѝ просте́рлъ є҆сѝ, / собира́ѧ всѧ̑ ꙗ҆зы́ки зовꙋ́щыѧ: / гдⷭ҇и, сла́ва тебѣ̀.

Сла́ва: Пречи́стомꙋ ѡ҆́бразꙋ твоемꙋ̀ покланѧ́емсѧ бл҃гі́й, / просѧ́ще проще́нїѧ прегрѣше́нїй на́шихъ, хрⷭ҇тѐ бж҃е: / во́лею бо бл҃говоли́лъ є҆сѝ пло́тїю взы́ти на крⷭ҇тъ, / да и҆зба́виши, ꙗ҆̀же созда́лъ є҆сѝ, ѿ рабо́ты вра́жїѧ. / тѣ́мъ бл҃года́рственнѡ вопїе́мъ тѝ: / ра́дости и҆спо́лнилъ є҆сѝ всѧ̑, сп҃се на́шъ, / прише́дый сп҃стѝ мі́ръ.

И҆ ны́нѣ: Млⷭ҇рдїѧ сꙋ́щи и҆сто́чникъ, / млⷭ҇ти сподо́би на́съ бцⷣе, / при́зри на лю́ди согрѣши́вшыѧ, / ꙗ҆вѝ ꙗ҆́кѡ при́снѡ си́лꙋ твою̀: / на тѧ́ бо ᲂу҆пова́юще, ра́дꙋйсѧ, вопїе́мъ тѝ, / ꙗ҆́коже и҆ногда̀ гаврїи́лъ, безпло́тныхъ а҆рхїстрати́гъ.

Въ сре́дꙋ и҆ пѧто́къ, вмѣ́стѡ: Млⷭ҇рдїѧ сꙋ́щи: гла́съ в҃, крⷭ҇тобг҃оро́диченъ:

Препросла́влена є҆сѝ бцⷣе дв҃о, пое́мъ тѧ̀: / крⷭ҇то́мъ бо сн҃а твоегѡ̀ низложи́сѧ а҆́дъ, и҆ сме́рть ᲂу҆мертви́сѧ, / ᲂу҆мерщвле́ннїи воста́хомъ, и҆ живота̀ сподо́бихомсѧ, / ра́й воспрїѧ́хомъ дре́внее наслажде́нїе. / тѣ́мъ бл҃годарѧ́ще, славосло́вимъ ꙗ҆́кѡ держа́внаго хрⷭ҇та̀ бг҃а на́шего, / и҆ є҆ди́наго многомлⷭ҇тиваго.

Гдⷭ҇и поми́лꙋй, м҃.

И҆́же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ, покланѧ́емый и҆ сла́вимый хрⷭ҇тѐ бж҃е, долготерпѣли́ве, многоми́лостиве, многобл҃гоꙋтро́бне, и҆́же пра́вєдныѧ любѧ́й, и҆ грѣ̑шныѧ ми́лꙋѧй, и҆́же всѧ̑ зовы́й ко спасе́нїю ѡ҆бѣща́нїѧ ра́ди бꙋ́дꙋщихъ бла̑гъ: са́мъ гдⷭ҇и, прїимѝ и҆ на́шѧ въ ча́съ се́й моли̑твы, и҆ и҆спра́ви живо́тъ на́шъ къ за́повѣдемъ твои̑мъ, дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней. ѡ҆градѝ на́съ свѧты́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.

Посе́мъ: Гдⷭ҇и поми́лꙋй, три́жды. Сла́ва, и҆ ны́нѣ:

Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

И҆́менемъ гдⷭ҇нимъ бл҃гословѝ, ѻ҆́тче.

Сщ҃е́нникъ: Мл҃твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ.

И҆ мы̀: А҆ми́нь.

И҆ а҆́ще є҆́сть а҆ллилꙋ́їа, твори́мъ покло́ны трѝ вели̑кїѧ, глаго́люще мл҃твꙋ сїю̀ та́йнѡ ст҃а́гѡ є҆фре́ма, раздѣлѧ́юще ю҆̀ въ трѝ ча̑сти:

Гдⷭ҇и и҆ влⷣко живота̀ моегѡ̀, дꙋ́хъ пра́здности, ᲂу҆ны́нїѧ, любонача́лїѧ и҆ праздносло́вїѧ не да́ждь мѝ. Покло́нъ.

Дꙋ́хъ же цѣломꙋ́дрїѧ, смиреномꙋ́дрїѧ, терпѣ́нїѧ и҆ любвѐ, да́рꙋй мѝ рабꙋ̀ твоемꙋ̀. Покло́нъ.

Е҆́й гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нїѧ, и҆ не ѡ҆сꙋжда́ти бра́та моегѡ̀: ꙗ҆́кѡ бл҃гослове́нъ є҆сѝ во вѣ́ки вѣкѡ́въ. Покло́нъ.

Та́же ма́лыхъ в҃і, глаго́люще на кі́йждо покло́нъ: Бж҃е, ѡ҆чи́сти мѧ̀ грѣ́шнаго.

Та́же мл҃тва ст҃а́гѡ вели́кагѡ васі́лїа:

Бж҃е и҆ гдⷭ҇и си́лъ, и҆ всеѧ̀ тва́ри содѣ́телю, и҆́же за млⷭ҇рдїе безприкла́дныѧ млⷭ҇ти твоеѧ̀, є҆диноро́днаго сн҃а твоего̀, гдⷭ҇а на́шего і҆и҃са хрⷭ҇та̀, низпосла́вый на сп҃се́нїе ро́да на́шегѡ, и҆ чⷭ҇тны́мъ є҆гѡ̀ крⷭ҇то́мъ рꙋкописа́нїе грѣ̑хъ на́шихъ растерза́вый, и҆ побѣди́вый тѣ́мъ нача̑ла и҆ вла̑сти тьмы̀: са́мъ влⷣко чл҃вѣколю́бче, прїимѝ и҆ на́съ грѣ́шныхъ бл҃года́рствєнныѧ сїѧ̑ и҆ молє́бныѧ мл҃твы, и҆ и҆зба́ви на́съ ѿ всѧ́кагѡ всегꙋби́тельнагѡ и҆ мра́чнагѡ прегрѣше́нїѧ, и҆ всѣ́хъ ѡ҆ѕло́бити на́съ и҆́щꙋщихъ, ви́димыхъ и҆ неви́димыхъ вра̑гъ. пригвоздѝ стра́хꙋ твоемꙋ̀ плѡ́ти на́шѧ, и҆ не ᲂу҆клонѝ серде́цъ на́шихъ въ словеса̀ и҆лѝ помышлє́нїѧ лꙋка́вствїѧ: но любо́вїю твое́ю ᲂу҆ѧзвѝ дꙋ́шы на́шѧ, да къ тебѣ̀ всегда̀ взира́юще, и҆ є҆́же ѿ тебѐ свѣ́томъ наставлѧ́еми, тебѐ непристꙋ́пнаго и҆ присносꙋ́щнаго зрѧ́ще свѣ́та, непреста́нное тебѣ̀ и҆сповѣ́данїе и҆ бл҃годаре́нїе возсыла́емъ, безнача́льномꙋ ѻ҆ц҃ꙋ̀ со є҆диноро́днымъ твои́мъ сн҃омъ, и҆ всест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

И҆ а҆́ще ᲂу҆́бѡ Бг҃ъ гдⷭ҇ь пѣ́то є҆́сть, и҆з̾ѡбрази́тєльнаѧ глаго́лемъ здѣ̀. А҆́ще же а҆ллилꙋ́їа, глаго́ли ѧ҆̀ по девѧ́томъ часѣ̀, а҆ девѧ́тый ча́съ по шесто́мъ начина́етсѧ си́це: Ст҃ы́й бж҃е: По Ѻ҆́ч҃е на́шъ: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды. И҆ ѱалмы̀, и҆ прѡ́чаѧ.

Вѣ́домо бꙋ́ди, ꙗ҆́кѡ во ст҃ѣ́й горѣ̀ а҆ѳѡ́нской, и҆ въ про́чихъ монастырѣ́хъ, въ часѣ́хъ глаго́лютъ всегда̀ вмѣ́стѡ кондака̀ предпи̑санныѧ тропарѝ на рѧдꙋ̀, си́рѣчь: Бл҃гослове́нъ є҆сѝ, хрⷭ҇тѐ бж҃е на́шъ: и҆ прѡ́чаѧ. А҆ конда́къ глаго́лютъ то́кмѡ на и҆з̾ѡбрази́тельныхъ, кромѣ̀ влⷣчнихъ пра́здникѡвъ и҆ ст҃ы́хъ, є҆гда̀ пѣ́тъ полѷеле́й и҆ вели́кое славосло́вїе: тогда́ бо глаго́летсѧ вездѣ̀ конда́къ.