Молитвы о болящих
Тропарь, глас 4
Ско́рый в заступле́нии Еди́н сый, Христе́, ско́рое свы́ше покажи́ посеще́ние стра́ждущей рабе́ Твое́й , и изба́ви от неду́г и го́рьких боле́зней; и воздви́гни во е́же пе́ти Тя и сла́вити непреста́нно, моли́твами Богоро́дицы, Еди́не Человеколю́бче.
Кондак, глас 2
На одре́ боле́зни лежа́щую и сме́ртною ра́ною уя́звленную, я́коже иногда́ воздви́гл еси́, Спа́се, Петро́ву те́щу, и рассла́бленнаго, на одре́ носи́маго, си́це и ны́не, Милосе́рде, стра́ждущую посети́ и исцели́ : Ты бо Еди́н еси́ неду́ги и боле́зни ро́да на́шего понесы́й, и вся моги́й, я́ко Многоми́лостив.
Молитва Пресвятой Троице, Богородице со святыми и ангелам
О Премилосе́рдый Бо́же, О́тче, Сы́не и Святы́й Ду́ше, в Неразде́льней Тро́ице покланя́емый и сла́вимый, при́зри благоутро́бно на рабу́ Твою́ , боле́знию одержи́мую. Отпусти́ ей вся́ согреше́ния ея́; пода́й ей исцеле́ние от боле́зни; возврати́ ей здра́вие и си́лы теле́сные; пода́й ей долгоде́нственное и благоде́нственное житие́, ми́рныя Твои́ и преми́рныя бла́га, что́бы она́ вме́сте с на́ми приноси́ла благода́рныя мольбы́ Тебе́, Всеще́дрому Бо́гу и Созда́телю на́шему. Пресвята́я Богоро́дица, всеси́льным заступле́нием Твои́м помоги́ мне умоли́ть Сы́на Твоего́, Бо́га моего́, об исцеле́нии рабы́ Бо́жией . Все святы́е и а́нгелы Госпо́дни, моли́те Бо́га о больно́й рабе́ Его́ . Ами́нь.
Молитва 1-я ко Господу
Влады́ко, Вседержи́телю, Святы́й Царю́, наказу́яй и не умерщвля́яй, утвержда́яй низпа́дающия и возводя́й низве́рженныя, теле́сныя челове́ков ско́рби исправля́яй, мо́лимся Тебе́, Бо́же наш, рабу́ Твою́ немощству́ющу посети́ ми́лостию Твое́ю, прости́ ей вся́кое согреше́ние во́льное и нево́льное. Ей, Го́споди, враче́бную Твою́ си́лу с Небесе́ низпосли́, прикосни́ся телеси́, угаси́ огне́вицу, укроти́ стра́сть и вся́кую не́мощь тая́щуюся, бу́ди врач рабы́ Твоея́ , воздви́гни ю от одра́ боле́зненнаго и от ло́жа озлобле́ния це́лу и всесоверше́нну, да́руй ю Це́ркви Твое́й благоугожда́ющу и творя́щу во́лю Твою́. Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
Молитва 2-я ко Господу
Влады́ко Вседержи́телю, Врачу́ ду́ш и теле́с на́ших, смиря́яй и вознося́й, наказу́яй и па́ки исцеля́яй! Рабу́ Твою́ немощству́ющу посети́ и исцели́ ю, возста́вив от одра́ и не́мощи. Запрети́ ду́ху не́мощи, отста́ви от нея́ вся́ку я́зву, вся́ку боле́знь, и е́же е́сть в не́й согреше́ние или́ беззако́ние, осла́би, оста́ви, прости́ Твоего́ ра́ди человеколю́бия. Е́й, Го́споди, пощади́ созда́ние Твое́ во Христе́ Иису́се, Го́споде на́шем, с Ни́м же благослове́н еси́, со Пресвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в. Ами́нь.