Послѣ́дованїе панѷхі́ды

І҆ере́й начина́етъ: Бл҃гослове́нъ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

Чте́цъ: А҆ми́нь. Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.

Гдⷭ҇и поми́лꙋй, три́жды. Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.

І҆ере́й возглаша́етъ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Чте́цъ: А҆ми́нь. Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды.

Ѱало́мъ ч҃:

Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ, рече́тъ гдⷭ҇еви: застꙋ́пникъ мо́й є҆сѝ и҆ прибѣ́жище моѐ, бг҃ъ мо́й, и҆ ᲂу҆пова́ю на него̀. Ꙗ҆́кѡ то́й и҆зба́витъ тѧ̀ ѿ сѣ́ти ло́вчи и҆ ѿ словесѐ мѧте́жна: плещма̀ свои́ма ѡ҆сѣни́тъ тѧ̀, и҆ под̾ крилѣ̑ є҆гѡ̀ надѣ́ешисѧ: ѻ҆рꙋ́жїемъ ѡ҆бы́детъ тѧ̀ и҆́стина є҆гѡ̀. Не ᲂу҆бои́шисѧ ѿ стра́ха нощна́гѡ, ѿ стрѣлы̀ летѧ́щїѧ во днѝ, ѿ ве́щи во тьмѣ̀ преходѧ́щїѧ, ѿ срѧ́ща и҆ бѣ́са полꙋ́деннагѡ. Паде́тъ ѿ страны̀ твоеѧ̀ ты́сѧща, и҆ тьма̀ ѡ҆деснꙋ́ю тебє̀, къ тебѣ́ же не прибли́житсѧ: ѻ҆ба́че ѻ҆чи́ма твои́ма смо́триши и҆ воздаѧ́нїе грѣ́шникѡвъ ᲂу҆́зриши. Ꙗ҆́кѡ ты̀, гдⷭ҇и, ᲂу҆пова́нїе моѐ: вы́шнѧго положи́лъ є҆сѝ прибѣ́жище твоѐ. Не прїи́детъ къ тебѣ̀ ѕло̀, и҆ ра́на не прибли́житсѧ тѣлесѝ твоемꙋ̀: ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пꙋте́хъ твои́хъ. На рꙋка́хъ во́змꙋтъ тѧ̀, да не когда̀ преткне́ши ѡ҆ ка́мень но́гꙋ твою̀: на а҆́спїда и҆ васїлі́ска настꙋ́пиши, и҆ попере́ши льва̀ и҆ ѕмі́ѧ. Ꙗ҆́кѡ на мѧ̀ ᲂу҆пова̀, и҆ и҆зба́влю и҆̀: покры́ю и҆̀, ꙗ҆́кѡ позна̀ и҆́мѧ моѐ. Воззове́тъ ко мнѣ̀, и҆ ᲂу҆слы́шꙋ є҆го̀: съ ни́мъ є҆́смь въ ско́рби, и҆змꙋ̀ є҆го̀ и҆ просла́влю є҆го̀: долгото́ю дні́й и҆спо́лню є҆го̀ и҆ ꙗ҆влю̀ є҆мꙋ̀ спⷭ҇нїе моѐ.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѐ, бж҃е, три́жды.

Посе́мъ є҆ктенїа̀:

Ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.

Ѡ҆ ѡ҆ставле́нїи согрѣше́нїй, во блаже́ннѣй па́мѧти преста́вльшихсѧ, гдⷭ҇ꙋ помо́лимсѧ.

Ѡ҆ приснопа́мѧтныхъ рабѣ́хъ бж҃їихъ, , поко́ѧ, тишины̀, бл҃же́нныѧ па́мѧти и҆́хъ, гдⷭ҇ꙋ помо́лимсѧ.

Ѡ҆ прости́ти и҆̀мъ всѧ́кое прегрѣше́нїе во́льное и҆ нево́льное, гдⷭ҇ꙋ помо́лимсѧ.

Ѡ҆ неѡсꙋждє́ннымъ предста́ти ᲂу҆ стра́шнагѡ прⷭ҇то́ла гдⷭ҇а сла́вы, гдⷭ҇ꙋ помо́лимсѧ.

Ѡ҆ пла́чꙋщихъ и҆ болѣ́знꙋющихъ, ча́ющихъ хрⷭ҇то́ва ᲂу҆тѣше́нїѧ, гдⷭ҇ꙋ помо́лимсѧ.

Ѡ҆ ѿпꙋсти́тисѧ и҆̀мъ ѿ всѧ́кїѧ болѣ́зни, и҆ печа́ли, и҆ воздыха́нїѧ, и҆ всели́ти и҆̀хъ, и҆дѣ́же присѣща́етъ свѣ́тъ лица̀ бж҃їѧ, гдⷭ҇ꙋ помо́лимсѧ.

Ѡ҆ ꙗ҆́кѡ да гдⷭ҇ь бг҃ъ на́шъ ᲂу҆чини́тъ дꙋ́шы и҆́хъ въ мѣ́стѣ свѣ́тлѣ, въ мѣ́стѣ ѕла́чнѣ, въ мѣ́стѣ поко́йнѣ, и҆дѣ́же всѝ првⷣнїи пребыва́ютъ, гдⷭ҇ꙋ помо́лимсѧ.

Ѡ҆ причте́нїи и҆́хъ въ нѣ́дрѣхъ а҆враа́ма, и҆ і҆саа́ка, и҆ і҆а́кѡва, гдⷭ҇ꙋ помо́лимсѧ.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.

Застꙋпѝ, сп҃сѝ, поми́лꙋй и҆ сохранѝ на́съ бж҃е твое́ю блгⷣтїю.

Млⷭ҇ти бж҃їѧ, црⷭ҇тва нбⷭ҇нагѡ, и҆ ѡ҆ставле́нїѧ грѣхѡ́въ и҆спроси́вше тѣ̑мъ, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Мы́ же рече́мъ: Тебѣ̀ гдⷭ҇и.

І҆ере́й возгла́съ: Ꙗ҆́кѡ ты̀ є҆сѝ воскрⷭ҇нїе, и҆ живо́тъ, и҆ поко́й ᲂу҆со́пшихъ ра̑бъ твои́хъ, , хрⷭ҇тѐ бж҃е на́шъ: и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ со прест҃ы́мъ и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

Та́же, А҆ллилꙋ́їа, три́жды, на гла́съ и҃.

Сті́хъ а҃: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.

Сті́хъ в҃: Па́мѧть и҆́хъ въ ро́дъ и҆ ро́дъ.

Сті́хъ г҃: Дꙋ́шы и҆́хъ во бл҃ги́хъ водворѧ́тсѧ.

Та́же тропа́рь, гла́съ и҃:

Глꙋбино́ю мꙋ́дрости человѣколю́бнѡ всѧ̀ стро́ѧй, / и҆ поле́зное всѣ̑мъ подава́ѧй, / є҆ди́не содѣ́телю, ᲂу҆поко́й гдⷭ҇и дꙋ́шы ра̑бъ твои́хъ: / на тѧ́ бо ᲂу҆пова́нїе возложи́ша, / творца̀ и҆ зижди́телѧ и҆ бг҃а на́шего.

Сла́ва, и҆ ны́нѣ, бг҃оро́диченъ, гла́съ то́йже: Тебѐ и҆ стѣ́нꙋ, и҆ приста́нище и҆́мамы, / и҆ моли́твенницꙋ благопрїѧ́тнꙋ къ бг҃ꙋ, / є҆го́же родила̀ є҆сѝ, бцⷣе безневѣ́стнаѧ, вѣ́рныхъ спасе́нїе.

И҆ а҆́бїе тропарѝ, на гла́съ є҃:

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Ст҃ы́хъ ли́къ ѡ҆брѣ́те и҆сто́чникъ жи́зни и҆ две́рь ра́йскꙋю, / да ѡ҆брѧ́щꙋ и҆ а҆́зъ пꙋ́ть покаѧ́нїемъ. / поги́бшее ѻ҆вча̀ а҆́зъ є҆́смь: / воззови́ мѧ сп҃се, и҆ сп҃си́ мѧ.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

А҆́гнца бж҃їѧ проповѣ́давше, / и҆ закла́ни бы́вше ꙗ҆́коже а҆́гнцы, / и҆ къ жи́зни нестарѣ́емѣй ст҃і́и, / и҆ присносꙋ́щнѣй преста́вльшесѧ, / того̀ прилѣ́жнѡ мч҃нцы моли́те, / долгѡ́въ разрѣше́нїе на́мъ дарова́ти.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Въ пꙋ́ть ᲂу҆́зкїй хо́ждшїи приско́рбный, / всѝ въ житїѝ крⷭ҇тъ ꙗ҆́кѡ ꙗ҆ре́мъ взе́мшїи, / и҆ мнѣ̀ послѣ́довавшїи вѣ́рою, / прїиди́те наслади́тесѧ, / и҆́хже ᲂу҆гото́вахъ ва́мъ по́честей / и҆ вѣнцє́въ нбⷭ҇ныхъ.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Ѡ҆́бразъ є҆́смь неизрече́нныѧ твоеѧ̀ сла́вы, / а҆́ще и҆ ꙗ҆́звы ношꙋ̀ прегрѣше́нїй, / ᲂу҆ще́дри твоѐ созда́нїе влⷣко, / и҆ ѡ҆чи́сти твои́мъ бл҃гоꙋтро́бїемъ, / и҆ возжелѣ́нное ѻ҆те́чество пода́ждь мѝ, / раѧ̀ па́ки жи́телѧ мѧ̀ сотворѧ́ѧ.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Дре́вле ᲂу҆́бѡ ѿ не сꙋ́щихъ созда́вый мѧ̀, / и҆ ѡ҆́бразомъ твои́мъ бж҃е́ственнымъ почты́й, / престꙋпле́нїемъ же за́повѣди, / па́ки мѧ̀ возврати́вый въ зе́млю, ѿ неѧ́же взѧ́тъ бы́хъ, / на є҆́же по подо́бїю возведѝ, / дре́внею добро́тою воз̾ѡбрази́тисѧ.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Оу҆поко́й бж҃е рабы̑ твоѧ̑, / и҆ ᲂу҆чинѝ ѧ҆̀ въ раѝ, / и҆дѣ́же ли́цы ст҃ы́хъ гдⷭ҇и, / и҆ првⷣницы сїѧ́ютъ ꙗ҆́кѡ свѣти̑ла, / ᲂу҆со́пшыѧ рабы̑ твоѧ̑ ᲂу҆поко́й, / презира́ѧ и҆́хъ всѧ̑ согрѣшє́нїѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ:

Трⷪ҇ченъ: Трисїѧ́тельное є҆ди́нагѡ бж҃ества̀ бл҃гоче́стнѡ пое́мъ, вопїю́ще: / ст҃ъ є҆сѝ ѻ҆́ч҃е безнача́льный, / собезнача́льный сн҃е, и҆ бж҃е́ственный дш҃е, / просвѣтѝ на́съ вѣ́рою тебѣ̀ слꙋжа́щихъ / и҆ вѣ́чнагѡ ѻ҆гнѧ̀ и҆схитѝ.

И҆ ны́нѣ, и҆ при́снѡ, и҆ во вѣ́ки вѣкѡ́въ, а҆ми́нь.

Бг҃оро́диченъ: Ра́дꙋйсѧ чⷭ҇таѧ, бг҃а пло́тїю ро́ждшаѧ во сп҃се́нїе всѣ́хъ, / є҆́юже ро́дъ человѣ́ческїй ѡ҆брѣ́те сп҃се́нїе, / тобо́ю да ѡ҆брѧ́щемъ ра́й, / бцⷣе чтⷭ҇аѧ, бл҃гослове́ннаѧ.

А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

Посе́мъ є҆ктенїа̀:

Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Е҆щѐ мо́лимсѧ ѡ҆ ᲂу҆покое́нїи дꙋ́шъ ᲂу҆со́пшихъ рабѡ́въ бж҃їихъ, , и҆ ѡ҆ є҆́же прости́тисѧ и҆̀мъ всѧ́комꙋ прегрѣше́нїю, во́льномꙋ же и҆ нево́льномꙋ.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шы и҆́хъ, и҆дѣ́же пра́веднїи ᲂу҆покоѧ́ютсѧ.

Млⷭ҇ти бж҃їѧ, црⷭ҇тва нбⷭ҇нагѡ и҆ ѡ҆ставле́нїѧ грѣхѡ́въ и҆́хъ, ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ про́симъ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ та́йнѡ:

Бж҃е дх҃ѡ́въ, и҆ всѧ́кїѧ пло́ти, сме́рть попра́вый, и҆ дїа́вола ᲂу҆праздни́вый, и҆ живо́тъ мі́рꙋ твоемꙋ̀ дарова́вый: са́мъ гдⷭ҇и, ᲂу҆поко́й дꙋ́шы ᲂу҆со́пшихъ рабѡ́въ твои́хъ, , въ мѣ́стѣ свѣ́тлѣ, въ мѣ́стѣ ѕла́чнѣ, въ мѣ́стѣ поко́йнѣ, ѿню́дꙋже ѿбѣжѐ болѣ́знь, печа́ль и҆ воздыха́нїе: всѧ́кое согрѣше́нїе, содѣ́ѧнное и҆́ми сло́вомъ, и҆лѝ дѣ́ломъ, и҆лѝ помышле́нїемъ, ꙗ҆́кѡ бл҃гі́й чл҃вѣколю́бецъ бг҃ъ простѝ, ꙗ҆́кѡ нѣ́сть человѣ́къ и҆́же жи́въ бꙋ́детъ, и҆ не согрѣши́тъ: ты́ бо є҆ди́нъ кромѣ̀ грѣха̀, пра́вда твоѧ̀ пра́вда во вѣ́ки, и҆ сло́во твоѐ и҆́стина.

Возгла́съ: Ꙗ҆́кѡ ты̀ є҆сѝ воскрⷭ҇нїе, и҆ живо́тъ, и҆ поко́й ᲂу҆со́пшихъ ра̑бъ твои́хъ, , хрⷭ҇тѐ бж҃е на́шъ: и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ со прест҃ы́мъ и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

И҆ глаго́лемъ сѣда́ленъ, гла́съ є҃:

Поко́й сп҃се на́шъ / съ пра́ведными рабы̑ твоѧ̑, / и҆ сїѧ̑ вселѝ во дворы̀ твоѧ̑, / ꙗ҆́коже є҆́сть пи́сано, / презира́ѧ ꙗ҆́кѡ бл҃гъ прегрѣшє́нїѧ и҆́хъ, / вѡ́льнаѧ и҆ невѡ́льнаѧ, / и҆ всѧ̑ ꙗ҆̀же въ вѣ́дѣнїи и҆ не въ вѣ́дѣнїи, чл҃вѣколю́бче.

Сла́ва, и҆ ны́нѣ: Ѿ дв҃ы возсїѧ́вый мі́рꙋ хрⷭ҇тѐ бж҃е, / сы́ны свѣ́та то́ю показа́вый, / поми́лꙋй на́съ.

Та́же, ѱало́мъ н҃.

Поми́лꙋй мѧ̀ бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. Наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. Ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши внегда̀ сꙋди́ти тѝ. Се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀ и҆ па́че снѣ́га ᲂу҆бѣлю́сѧ. Слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й. Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ. Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. Оу҆блажѝ гдⷭ҇и бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

И҆ а҆́бїе канѡ́нъ, гла́съ ѕ҃. Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, / по бе́зднѣ стопа́ми, / гони́телѧ фараѡ́на / ви́дѧ потоплѧ́ема, / бг҃ꙋ побѣ́днꙋю пѣ́снь / пои́мъ, вопїѧ́ше.

Запѣвы:

Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Пѣ́снь г҃.

І҆рмо́съ: Нѣ́сть ст҃ъ, / ꙗ҆́коже ты̀ гдⷭ҇и бж҃е мо́й, / вознесы́й ро́гъ вѣ́рныхъ твои́хъ бл҃же, / и҆ ᲂу҆тверди́вый на́съ на ка́мени / и҆сповѣ́данїѧ твоегѡ̀.

Запѣвы:

Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Катава́сїа: Нѣ́сть ст҃ъ:

Посе́мъ є҆ктенїа̀:

Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шы и҆́хъ, и҆дѣ́же пра́веднїи ᲂу҆покоѧ́ютсѧ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ та́йнѡ:

Ли́къ: А҆ми́нь.

Посе́мъ сѣда́ленъ, гла́съ ѕ҃:

Вои́стиннꙋ сꙋета̀ всѧ́чєскаѧ, / житїе́ же сѣ́нь, и҆ со́нїе: / и҆́бо всꙋ́е мѧте́тсѧ всѧ́къ земноро́дный, / ꙗ҆́коже речѐ писа́нїе: / є҆гда̀ мі́ръ прїѡбрѧ́щемъ. / тогда̀ во гро́бъ всели́мсѧ, / и҆дѣ́же вкꙋ́пѣ ца́рїе и҆ ни́щїи. / тѣ́мже хрⷭ҇тѐ бж҃е, / преста́вльшыѧсѧ ᲂу҆поко́й, / ꙗ҆́кѡ чл҃вѣколю́бецъ.

Сла́ва, и҆ ны́нѣ, бг҃оро́диченъ: Всест҃а́ѧ бцⷣе, / во вре́мѧ живота̀ моегѡ̀ не ѡ҆ста́ви менѐ, / человѣ́ческомꙋ предста́тельствꙋ не ввѣ́ри мѧ̀: / но сама̀ застꙋпѝ, и҆ поми́лꙋй мѧ̀.

Пѣ́снь д҃.

І҆рмо́съ: Хрⷭ҇то́съ моѧ̀ си́ла, / бг҃ъ и҆ гдⷭ҇ь, чⷭ҇тна́ѧ цр҃ковь / бг҃олѣ́пнѡ пое́тъ взыва́ющи, / ѿ смы́сла чи́ста ѡ҆ гдⷭ҇ѣ пра́зднꙋющи.

Запѣвы:

Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Пѣ́снь є҃.

І҆рмо́съ: Бж҃їимъ / свѣ́томъ твои́мъ бл҃же, / ᲂу҆́тренюющихъ тѝ дꙋ́ши / любо́вїю ѡ҆зарѝ молю́сѧ, / тѧ̀ вѣ́дѣти сло́ве бж҃їй, / и҆́стиннаго бг҃а, / ѿ мра́ка грѣхо́внагѡ взыва́юща.

Запѣвы:

Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Пѣ́снь ѕ҃.

І҆рмо́съ: Жите́йское мо́ре / воздвиза́емое зрѧ̀ напа́стей бꙋ́рею, / къ ти́хомꙋ приста́нищꙋ твоемꙋ̀ прите́къ, вопїю́ ти: / возведѝ ѿ тлѝ живо́тъ мо́й, / многомлⷭ҇тиве.

Запѣвы:

Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Катава́сїа: Жите́йское мо́ре:

Посе́мъ є҆ктенїа̀:

Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шы и҆́хъ, и҆дѣ́же пра́веднїи ᲂу҆покоѧ́ютсѧ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ та́йнѡ:

Ли́къ: А҆ми́нь.

Конда́къ, гла́съ и҃:

Со ст҃ы́ми ᲂу҆поко́й / хрⷭ҇тѐ, дꙋ́шы ра̑бъ твои́хъ, / и҆дѣ́же нѣ́сть болѣ́знь, ни печа́ль, / ни воздыха́нїе, / но жи́знь безконе́чнаѧ.

І҆́косъ: Са́мъ є҆ди́нъ є҆сѝ безсме́ртный, / сотвори́вый и҆ созда́вый человѣ́ка, / земні́и ᲂу҆́бѡ ѿ землѝ созда́хомсѧ, / и҆ въ зе́млю тꙋ́южде по́йдемъ, / ꙗ҆́коже повелѣ́лъ є҆сѝ созда́вый мѧ̀ и҆ рекі́й мѝ: / ꙗ҆́кѡ землѧ̀ є҆сѝ и҆ въ зе́млю ѿи́деши, / а҆́може всѝ человѣ́цы по́йдемъ, / надгро́бное рыда́нїе творѧ́ще пѣ́снь: / а҆ллилꙋ́їа.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь / содѣ́ла а҆́гг҃лъ, / прпⷣбнымъ ѻ҆трокѡ́мъ, / халдє́и же ѡ҆палѧ́ющее / велѣ́нїе бж҃їе, / мꙋчи́телѧ ᲂу҆вѣща̀ вопи́ти: / бл҃гослове́нъ є҆сѝ бж҃е ѻ҆тє́цъ на́шихъ.

Запѣвы:

Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Пѣ́снь и҃.

І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, / и҆ пра́веднагѡ же́ртвꙋ водо́ю попали́лъ є҆сѝ: / всѧ̑ бо твори́ши хрⷭ҇тѐ, то́кмѡ є҆́же хотѣ́ти. / тѧ̀ превозно́симъ во всѧ̑ вѣ́ки.

Запѣвы:

Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.

Бл҃гослови́мъ ѻ҆ц҃а̀ и҆ сн҃а и҆ ст҃а́го дх҃а, гдⷭ҇а.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Пѣ́снь ѳ҃.

І҆рмо́съ: Бг҃а / человѣ́кѡмъ не возмо́жно ви́дѣти, / на него́же не смѣ́ютъ чи́ни а҆́гг҃льстїи взира́ти: / тобо́ю же всечⷭ҇таѧ, ꙗ҆ви́сѧ человѣ́кѡмъ / сло́во воплоще́нно. / є҆го́же велича́юще, / съ нбⷭ҇ными во́и, тѧ̀ ᲂу҆бл҃жа́емъ.

Запѣвы:

Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.

Бл҃гослови́мъ ѻ҆ц҃а̀ и҆ сн҃а и҆ ст҃а́го дх҃а, гдⷭ҇а.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Та́же і҆ере́й: Бцⷣꙋ и҆ мт҃рь свѣ́та въ пѣ́снехъ возвели́чимъ.

Ли́къ: Дꙋ́си и҆ дꙋ́шы првⷣныхъ восхва́лѧтъ тѧ̀, гдⷭ҇и.

Катава́сїа: Бг҃а человѣ́кѡмъ:

Чте́ц: Трист҃о́е. И҆ по Ѻ҆́ч҃е на́шъ:

Глаго́лемъ и҆ тропарѝ сїѧ̑, гла́съ д҃:

Со дꙋ́хи првⷣныхъ сконча́вшихсѧ / дꙋ́шы ра̑бъ твои́хъ сп҃се ᲂу҆поко́й, / сохранѧ́ѧ и҆́хъ во бл҃же́нной жи́зни, / ꙗ҆́же ᲂу҆ тебѐ чл҃вѣколю́бче.

Въ поко́ищи твое́мъ гдⷭ҇и, / и҆дѣ́же всѝ ст҃і́и твоѝ ᲂу҆покоева́ютсѧ, / ᲂу҆поко́й и҆ дꙋ́шы ра̑бъ твои́хъ, / ꙗ҆́кѡ є҆ди́нъ є҆сѝ чл҃вѣколю́бецъ.

Сла́ва: Ты̀ є҆сѝ бг҃ъ соше́дый во а҆́дъ, и҆ ᲂу҆́зы ѡ҆кова́нныхъ разрѣши́вый, / са́мъ и҆ дꙋ́шы ра̑бъ твои́хъ ᲂу҆поко́й.

И҆ ны́нѣ: бг҃оро́диченъ: Е҆ди́на чⷭ҇таѧ, и҆ непоро́чнаѧ дв҃о, бг҃а без̾ сѣ́мене ро́ждшаѧ, / молѝ сп҃сти́сѧ дꙋша́мъ и҆́хъ.

Посе́мъ є҆ктенїа̀:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шы и҆́хъ, и҆дѣ́же првⷣнїи ᲂу҆покоѧ́ютсѧ.

Ли́къ: Гдⷭ҇и поми́лꙋй, три́жды.

Млⷭ҇ти бж҃їѧ, црⷭ҇тва нбⷭ҇нагѡ и҆ ѡ҆ставле́нїѧ грѣхѡ́въ и҆́хъ ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ про́симъ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

Ли́къ: А҆ми́нь.

Посе́мъ дїа́конъ: Премꙋ́дрость.

Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

І҆ере́й: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Мы́ же: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

І҆ере́й ѿпꙋ́стъ:

Живы́ми и҆ ме́ртвыми ѡ҆блада́ѧй, воскр҃сы́й и҆з̾ ме́ртвыхъ хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ свои́хъ, дꙋ́шы ѡ҆ на́съ преста́вльшихсѧ ра̑бъ свои́хъ , въ селе́нїихъ ст҃ы́хъ всели́тъ, и҆ съ првⷣными причте́тъ, и҆ на́съ поми́лꙋетъ, ꙗ҆́кѡ бл҃гъ и҆ чл҃вѣколю́бецъ.

И҆ по ѿпꙋ́стѣ глаша́етъ дїа́конъ си́це:

Во бл҃же́нномъ ᲂу҆спе́нїи вѣ́чный поко́й пода́ждь гдⷭ҇и ᲂу҆́спшымъ рабѡ́мъ твои̑мъ, , и҆ сотворѝ и҆̀мъ вѣ́чнꙋю па́мѧть.

И҆ пѣвцы̀ пою́тъ: Вѣ́чнаѧ па́мѧть, три́жды. А҆ и҆дѣ́же нѣ́сть дїа́кона, пою́тъ пѣвцы̀: Рабѡ́мъ бж҃їимъ, , ᲂу҆́спшымъ вѣ́чнаѧ па́мѧть.