Бж҃е́ственнаѧ лїтꙋргі́а и҆́же во ст҃ы́хъ ѻ҆ц҃а̀ на́шегѡ васі́лїа вели́кагѡ, а҆рхїепⷭ҇кпа кесарі́и каппадокі́йскїѧ
Последование с пространной евхаристической молитвой и песнопением «О Тебе радуется».
Вѣ́ждь, ꙗ҆́кѡ сїѧ̀ бжⷭ҇твеннаѧ лїтꙋргі́а вели́кагѡ васі́лїа не всегда̀ пое́тсѧ, но во вре́мѧ ᲂу҆чине́нное: си́рѣчь, въ недѣ́лѧхъ вели́кїѧ четыредесѧ́тницы [кромѣ̀ недѣ́ли ва́їй], и҆ во ст҃ы́й вели́кїй четверто́къ, и҆ въ вели́кꙋю сꙋббѡ́тꙋ: и҆ въ на́вечерїи ржⷭ҇тва̀ хрⷭ҇то́ва, и҆ бг҃оѧвле́нїй: и҆ въ де́нь пра́здника ст҃а́гѡ васі́лїа. Сказа́нїе же и҆ ᲂу҆ста́въ сегѡ̀ сщ҃еннодѣ́йствїѧ то́жде є҆́сть, є҆́же и҆ ст҃а́гѡ і҆ѡа́нна златоꙋ́стагѡ.
Лїтꙋргі́а ѡ҆глаше́нныхъ.
Дїа́конъ: Бл҃гословѝ, влⷣко.
І҆ере́й: Бл҃гослове́но црⷭ҇тво ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Е҆ктенїа̀ вели́каѧ.
Дїа́конъ: Ми́ромъ гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й и҆ соедине́нїи всѣ́хъ, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ вели́комъ господи́нѣ и҆ ѻ҆ц҃ѣ̀ на́шемъ, свѧтѣ́йшемъ патрїа́рхѣ , и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ] , честнѣ́мъ пресвѵ́терствѣ, во хрⷭ҇тѣ̀ дїа́конствѣ, ѡ҆ все́мъ при́чтѣ и҆ лю́дехъ, гдⷭ҇ꙋ помо́лимсѧ.
Ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ гра́дѣ се́мъ [и҆лѝ ѡ҆ ве́си се́й, и҆лѝ ѡ҆ ст҃ѣ́й ѻ҆би́тели се́й], всѧ́комъ гра́дѣ, странѣ̀, и҆ вѣ́рою живꙋ́щихъ въ ни́хъ, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ бл҃горастворе́нїи воздꙋ́хѡвъ, ѡ҆ и҆з̾ѻби́лїи плодѡ́въ земны́хъ и҆ вре́менѣхъ ми́рныхъ, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ пла́вающихъ, пꙋтеше́ствꙋющихъ, недꙋ́гꙋющихъ, стра́ждꙋщихъ, плѣне́нныхъ, и҆ ѡ҆ спасе́нїи и҆́хъ, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.
Ли́къ: Гдⷭ҇и, поми́лꙋй.
Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀, гдⷭ҇и.
Моли́тва пе́рвагѡ а҆нтїфѡ́на.
І҆ере́й: Гдⷭ҇и бж҃е на́шъ, є҆гѡ́же держа́ва несказа́нна и҆ сла́ва непостижи́ма, є҆гѡ́же ми́лость безмѣ́рна и҆ человѣколю́бїе неизрече́нно: са́мъ, влⷣко, по бл҃гоꙋтро́бїю твоемꙋ̀, при́зри на ны̀ и҆ на ст҃ы́й хра́мъ се́й, и҆ сотворѝ съ на́ми, и҆ молѧ́щимисѧ съ на́ми, бога̑тыѧ ми́лѡсти твоѧ̑ и҆ щедрѡ́ты твоѧ̑.
Возглаше́нїе: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
И҆ пое́тсѧ пе́рвый а҆нтїфѡ́нъ ѿ пѣвцє́въ.
А҆нтїфѡ́ны и҆з̾ѡбрази́тельные. Пе́рвый а҆нтїфѡ́нъ, ѱало́мъ р҃в.
а҃ ли́къ. Бл҃гословѝ дꙋшѐ моѧ̀ гдⷭ҇а. / бл҃гослове́нъ є҆сѝ гдⷭ҇и. / бл҃гословѝ дꙋшѐ моѧ̀ гдⷭ҇а, / и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀.
в҃ ли́къ. Бл҃гословѝ дꙋшѐ моѧ̀ гдⷭ҇а / и҆ не забыва́й всѣ́хъ воздаѧ́нїй є҆гѡ̀.
а҃. Ѡ҆чища́ющаго всѧ̑ беззакѡ́нїѧ твоѧ̑, / и҆сцѣлѧ́ющаго всѧ̑ недꙋ́ги твоѧ̑:
в҃. И҆збавлѧ́ющаго ѿ и҆стлѣ́нїѧ живо́тъ тво́й, / вѣнча́ющаго тѧ̀ млⷭ҇тїю и҆ щедро́тами:
а҃. И҆сполнѧ́ющаго во бл҃ги́хъ жела́нїе твоѐ, / ѡ҆бнови́тсѧ ꙗ҆́кѡ ѻ҆́рлѧ ю҆́ность твоѧ̀.
в҃. Творѧ́й млⷭ҇тыни гдⷭ҇ь, / и҆ сꙋдьбꙋ̀ всѣ̑мъ ѡ҆би̑димымъ.
а҃. Сказа̀ пꙋти̑ своѧ̑ мѡѷсе́ови, / сыновѡ́мъ і҆и҃лєвымъ хотѣ̑нїѧ своѧ̑.
в҃. Ще́дръ и҆ млⷭ҇тивъ гдⷭ҇ь, / долготерпѣли́въ и҆ многомлⷭ҇тивъ.
а҃. Не до конца̀ прогнѣ́ваетсѧ, / нижѐ въ вѣ́къ враждꙋ́етъ:
в҃. Не по беззако́нїємъ на́шымъ сотвори́лъ є҆́сть на́мъ, / нижѐ но грѣхѡ́мъ на́шымъ возда́лъ є҆́сть на́мъ.
а҃. Ꙗ҆́кѡ по высотѣ̀ нбⷭ҇нѣй ѿ землѝ, / ᲂу҆тверди́лъ є҆́сть гдⷭ҇ь млⷭ҇ть свою̀ на боѧ́щихсѧ є҆гѡ̀.
в҃. Е҆ли́кѡ ѿстоѧ́тъ восто́цы ѿ за̑падъ, / ᲂу҆да́лилъ є҆́сть ѿ на́съ беззакѡ́нїѧ на̑ша.
а҃. Ꙗ҆́коже ще́дритъ ѻ҆те́цъ сы́ны, / ᲂу҆ще́дри гдⷭ҇ь боѧ́щихсѧ є҆гѡ̀.
в҃. Ꙗ҆́кѡ то́й позна̀ созда́нїе на́ше, / помѧнꙋ̀, ꙗ҆́кѡ пе́рсть є҆смы̀.
а҃. Человѣ́къ, ꙗ҆́кѡ трава̀ дні́е є҆гѡ̀, / ꙗ҆́кѡ цвѣ́тъ се́льный, та́кѡ ѡ҆цвѣте́тъ.
в҃. Ꙗ҆́кѡ дꙋ́хъ про́йде въ не́мъ, / и҆ не бꙋ́детъ, / и҆ не позна́етъ ктомꙋ̀ мѣ́ста своегѡ̀.
а҃. Млⷭ҇ть же гдⷭ҇нѧ ѿ вѣ́ка и҆ до вѣ́ка / на боѧ́щихсѧ є҆гѡ̀.
в҃. И҆ пра́вда є҆гѡ̀ на сынѣ́хъ сынѡ́въ / хранѧ́щихъ завѣ́тъ є҆гѡ̀, / и҆ по́мнѧщихъ за́пѡвѣди є҆́гѡ, / твори́ти ѧ҆̀.
а҃. Гдⷭ҇ь на нб҃сѝ ᲂу҆гото́ва прⷭ҇то́лъ сво́й, / и҆ црⷭ҇тво є҆гѡ̀ всѣ́ми ѡ҆блада́етъ.
в҃. Бл҃гослови́те гдⷭ҇а всѝ а҆́гг҃ли є҆гѡ̀, / си́льнїи крѣ́постїю, творѧ́щїи сло́во є҆гѡ̀, / ᲂу҆слы́шати гла́съ слове́съ є҆гѡ̀.
а҃. Бл҃гослови́те гдⷭ҇а всѧ̑ си̑лы є҆гѡ̀, / слꙋги̑ є҆гѡ̀ творѧ́щїи во́лю є҆гѡ̀.
в҃. Бл҃гослови́те гдⷭ҇а всѧ̑ дѣла̀ є҆гѡ̀, / на всѧ́комъ мѣ́стѣ влады́чества є҆гѡ̀.
а҃. Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ.
в҃. И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
а҃. Бл҃гословѝ дꙋшѐ моѧ̀ гдⷭ҇а, / и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀: / Бл҃гослове́нъ є҆сѝ гдⷭ҇и.
Е҆ктенїа̀ ма́лаѧ.
Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.
Ли́къ: Гдⷭ҇и, поми́лꙋй.
Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀, гдⷭ҇и.
Моли́тва втора́гѡ а҆нтїфѡ́на.
І҆ере́й: Гдⷭ҇и бж҃е на́шъ, спасѝ лю́ди твоѧ̑ и҆ бл҃гословѝ достоѧ́нїе твоѐ, и҆сполне́нїе це́ркве твоеѧ̀ сохранѝ, ѡ҆свѧтѝ лю́бѧщыѧ благолѣ́пїе до́мꙋ твоегѡ̀: ты̀ тѣ́хъ возпросла́ви бж҃е́ственною твое́ю си́лою, и҆ не ѡ҆ста́ви на́съ, ᲂу҆пова́ющихъ на тѧ̀.
Возглаше́нїе: Ꙗ҆́кѡ твоѧ̀ держа́ва, и҆ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
И҆ пое́тсѧ подо́бнѣ ѿ пѣвцє́въ вторы́й а҆нтїфѡ́нъ.
Вторы́й а҆нтїфѡ́нъ, ѱало́мъ рм҃є.
а҃ ли́къ. Хвалѝ дꙋшѐ моѧ̀ гдⷭ҇а, / восхвалю̀ гдⷭ҇а въ животѣ̀ мое́мъ, / пою̀ бг҃ꙋ моемꙋ̀, до́ндеже є҆́смь.
в҃ ли́къ. Не надѣ́йтесѧ на кнѧ́зи, на сы́ны человѣ́чєскїѧ, / въ ни́хже нѣ́сть сп҃се́нїѧ.
а҃. И҆зы́детъ дꙋ́хъ є҆гѡ̀, / и҆ возврати́тсѧ въ зе́млю свою̀, / въ то́й де́нь поги́бнꙋтъ всѧ̑ помышлє́нїѧ є҆гѡ̀.
в҃. Бл҃же́нъ, є҆мꙋ́же бг҃ъ і҆а́кѡвль помо́щникъ є҆гѡ̀, / ᲂу҆пова́нїе є҆гѡ̀ на гдⷭ҇а бг҃а своего̀:
а҃. Сотво́ршаго нб҃о и҆ зе́млю, / мо́ре, и҆ всѧ̑ ꙗ҆̀же въ ни́хъ:
в҃. Хранѧ́щаго и҆́стинꙋ въ вѣ́къ, / творѧ́щаго сꙋ́дъ ѡ҆би̑димымъ, / даю́щаго пи́щꙋ а҆́лчꙋщымъ.
а҃. Гдⷭ҇ь рѣши́тъ ѡ҆кова̑нныѧ, / гдⷭ҇ь ᲂу҆мꙋдрѧ́етъ слѣпцы̀.
в҃. Гдⷭ҇ь возво́дитъ низве́ржєнныѧ, / гдⷭ҇ь лю́битъ првⷣники.
а҃. Гдⷭ҇ь храни́тъ прише́льцы, / си́ра и҆ вдовꙋ̀ прїи́метъ, / и҆ пꙋ́ть грѣ́шныхъ погꙋби́тъ.
в҃. Воцр҃и́тсѧ гдⷭ҇ь во вѣ́къ, / бг҃ъ тво́й сїѡ́не, въ ро́дъ и҆ ро́дъ.
а҃. Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ.
в҃. И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Гла́съ ѕ҃.
Ли́къ: Е҆диноро́дный сн҃е и҆ сло́ве бж҃їй, безсме́ртенъ сы́й, / и҆ и҆зво́ливый сп҃се́нїѧ на́шегѡ ра́ди / воплоти́тисѧ ѿ ст҃ы́ѧ бцⷣы, и҆ приснодв҃ы мр҃і́и, / непрело́жнѡ вочл҃вѣ́чивыйсѧ: / распны́йсѧ же, хрⷭ҇тѐ бж҃е, сме́ртїю сме́рть попра́вый, / є҆ди́нъ сы́й ст҃ы́ѧ трⷪ҇цы, / спрославлѧ́емый ѻ҆ц҃ꙋ̀, и҆ ст҃о́мꙋ дх҃ꙋ, сп҃сѝ на́съ.
Е҆ктенїа̀ ма́лаѧ.
Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.
Ли́къ: Гдⷭ҇и, поми́лꙋй.
Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀, гдⷭ҇и.
Моли́тва тре́тїѧгѡ а҆нтїфѡ́на.
І҆ере́й: И҆́же ѻ҆́бщыѧ сїѧ̑ и҆ согла̑сныѧ дарова́вый на́мъ моли̑твы, и҆́же и҆ двѣма̀, и҆лѝ трє́мъ, согласꙋ́ющымсѧ ѡ҆ и҆́мени твое́мъ, прошє́нїѧ пода́ти ѡ҆бѣща́вый: са́мъ и҆ ны́нѣ ра̑бъ твои́хъ прошє́нїѧ къ поле́зномꙋ и҆спо́лни, подаѧ̀ на́мъ въ настоѧ́щемъ вѣ́цѣ позна́нїе твоеѧ̀ и҆́стины, и҆ въ бꙋ́дꙋщемъ живо́тъ вѣ́чный да́рꙋѧ.
Возглаше́нїе: Ꙗ҆́кѡ бл҃гъ и҆ человѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Здѣ̀ ѿверза́ютсѧ двє́ри на ма́лый вхо́дъ.
Тре́тїй а҆нтїфѡ́нъ, бл҃жє́нны.
Во црⷭ҇твїи твое́мъ помѧнѝ на́съ гдⷭ҇и.
Бл҃же́ни ни́щїи дх҃омъ, ꙗ҆́кѡ тѣ́хъ є҆́сть црⷭ҇тво нбⷭ҇ное.
Бл҃же́ни пла́чꙋщїи ꙗ҆́кѡ ті́и ᲂу҆тѣ́шатсѧ.
Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.
Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.
Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ.
Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менє̀ ра́ди.
Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ.
И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Ма́лый вхо́дъ со є҆ѵⷢ҇лїемъ.
Прїе́мъ сщ҃е́нникъ ст҃о́е є҆ѵⷢ҇лїе, дае́тъ дїа́конꙋ, и҆ та́кѡ и҆зше́дше сѣ́верною страно́ю, пред̾идꙋ́щымъ и҆̀мъ лампа́дамъ, творѧ́тъ ма́лый вхо́дъ, и҆ ста́вше на ѻ҆бы́чномъ мѣ́стѣ, приклонѧ́ютъ ѻ҆́ба главы̑.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Моли́тва вхо́да.
І҆ере́й: Влⷣко гдⷭ҇и бж҃е на́шъ, ᲂу҆ста́вивый на небесѣ́хъ чи́ны, и҆ вѡ́инства а҆́гг҃лъ и҆ а҆рха̑гг҃лъ, въ слꙋже́нїе твоеѧ̀ сла́вы: сотворѝ со вхо́домъ на́шимъ, вхо́дꙋ ст҃ы́хъ а҆́гг҃лѡвъ бы́ти, сослꙋжа́щихъ на́мъ и҆ сославосло́вѧщихъ твою̀ бл҃гость. ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Дїа́конъ: Бл҃гословѝ, влⷣко, ст҃ы́й вхо́дъ.
И҆ сщ҃е́нникъ блгⷭ҇влѧ́ѧ глаго́летъ: Бл҃гослове́нъ вхо́дъ ст҃ы́хъ твои́хъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
Посе́мъ дїа́конъ подае́тъ є҆ѵⷢ҇лїе свѧще́нникꙋ, и҆ цѣлꙋ́етъ сщ҃е́нникъ є҆ѵⷢ҇лїе. И҆спо́лньшꙋсѧ же коне́чномꙋ тропарю̀, вхо́дитъ дїа́конъ посредѣ̀, и҆ ста́въ пред̾ і҆ере́емъ возвыша́етъ ма́лѡ рꙋ́цѣ, и҆ показꙋ́ѧй ст҃о́е є҆ѵⷢ҇лїе, глаго́летъ велегла́снѡ:
Премꙋ́дрость, про́сти.
Та́же, сотвори́въ поклоне́нїе, вхо́дитъ во ст҃ы́й ѻ҆лта́рь дїа́конъ и҆ созадѝ є҆гѡ̀ сщ҃е́нникъ, и҆ дїа́конъ ᲂу҆́бѡ полага́етъ ст҃о́е є҆ѵⷢ҇лїе на ст҃ѣ́й трапе́зѣ.
Пѣвцы́ же пою́тъ:
А҆́ще ᲂу҆́бѡ є҆́сть недѣ́лѧ: Прїиди́те, поклони́мсѧ и҆ припаде́мъ ко хрⷭ҇тꙋ̀. / спаси́ ны, сн҃е бж҃їй, / воскресы́й и҆з̾ ме́ртвыхъ, пою́щыѧ тѝ, / а҆ллилꙋ́їа. Е҆ди́ножды.
Та́же, ѻ҆бы̑чныѧ тропари̑. І҆ере́й же глаго́летъ моли́твꙋ сїю̀.
Моли́тва трист҃а́гѡ пѣ́нїѧ.
І҆ере́й: Бж҃е ст҃ы́й, и҆́же во ст҃ы́хъ почива́ѧй, и҆́же трист҃ы́мъ гла́сомъ ѿ серафі́мѡвъ воспѣва́емый, и҆ ѿ херꙋві́мѡвъ славосло́вимый, и҆ ѿ всѧ́кїѧ нбⷭ҇ныѧ си́лы покланѧ́емый: и҆́же ѿ небытїѧ̀ во є҆́же бы́ти приведы́й всѧ́чєскаѧ, созда́вый человѣ́ка по ѻ҆́бразꙋ твоемꙋ̀ и҆ по подо́бїю, и҆ всѧ́кимъ твои́мъ дарова́нїемъ ᲂу҆краси́вый: даѧ́й просѧ́щемꙋ премꙋ́дрость и҆ ра́зꙋмъ, и҆ не презира́ѧй согрѣша́ющагѡ, но полага́ѧй на спасе́нїе покаѧ́нїе: сподо́бивый на́съ, смире́нныхъ и҆ недосто́йныхъ ра̑бъ твои́хъ, и҆ въ ча́съ се́й ста́ти пред̾ сла́вою ст҃а́гѡ твоегѡ̀ же́ртвенника и҆ до́лжное тебѣ̀ поклоне́нїе и҆ славосло́вїе приноси́ти: са́мъ, влⷣко, прїимѝ и҆ ѿ ᲂу҆́стъ на́съ грѣ́шныхъ трист҃ꙋ́ю пѣ́снь и҆ посѣти́ ны бл҃гостїю твое́ю: простѝ на́мъ всѧ́кое согрѣше́нїе, во́льное же и҆ нево́льное, ѡ҆свѧтѝ на́шѧ дꙋ́шы и҆ тѣлеса̀, и҆ да́ждь на́мъ въ преподо́бїи слꙋжи́ти тебѣ̀ всѧ̑ дни̑ живота̀ на́шегѡ, моли́твами ст҃ы́ѧ бцⷣы и҆ всѣ́хъ ст҃ы́хъ, ѿ вѣ́ка тебѣ̀ бл҃гоꙋгоди́вшихъ.
Е҆гда̀ же пѣвцы̑ прїи́дꙋтъ на послѣ́днїй тропа́рь, гл҃етъ дїа́конъ ко і҆ере́ю, прикло́нь вкꙋ́пѣ главꙋ̀, и҆ ѡ҆ра́рь въ рꙋцѣ̀ держѧ̀ тремѝ пе́рсты:
Бл҃гословѝ, влⷣко, вре́мѧ трист҃а́гѡ.
І҆ере́й же, зна́менꙋѧ є҆го̀, глаго́летъ:
Ꙗ҆́кѡ свѧ́тъ є҆сѝ, бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ.
Сконча́вшꙋсѧ же тропарю̀, прихо́дитъ дїа́конъ бли́зъ свѧты́хъ двере́й, и҆ показꙋ́ѧй ѡ҆раре́мъ, пе́рвѣе ᲂу҆́бѡ ко і҆кѡ́нѣ хрⷭ҇то́вѣ глаго́летъ: Гдⷭ҇и, спасѝ бл҃гочести̑выѧ.
Ли́къ: Гдⷭ҇и, спасѝ бл҃гочести̑выѧ.
Дїа́конъ: И҆ ᲂу҆слы́ши ны̀.
Ли́къ: И҆ ᲂу҆слы́ши ны̀.
И҆ наво́дѧ ѡ҆раре́мъ, глаго́летъ ко внѣ̀ стоѧ́щымъ велегла́снѡ: И҆ во вѣ́ки вѣкѡ́въ.
Ли́къ: А҆ми́нь.
Та́же трист҃о́е.
Ѻ҆́ба ли̑ка, три́жды: Ст҃ы́й бж҃е, / ст҃ы́й крѣ́пкїй, / ст҃ы́й безсме́ртный, / поми́лꙋй на́съ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Ст҃ы́й безсме́ртный поми́лꙋй на́съ.
Пе́рвый ли́къ вы́шшимъ гла́сомъ: Ст҃ы́й бж҃е, / ст҃ы́й крѣ́пкїй, / ст҃ы́й безсме́ртный, / поми́лꙋй на́съ.
Пѣва́емꙋ же трист҃о́мꙋ, глаго́лютъ и҆ са́ми, і҆ере́й же и҆ дїа́конъ, трист҃о́е, творѧ́ще вкꙋ́пѣ и҆ покло́ны трѝ пред̾ ст҃о́ю трапе́зою.
Та́же глаго́летъ дїа́конъ ко і҆ере́ю: Повелѝ, влⷣко.
Сщ҃е́нникъ: Бл҃гослове́нъ грѧды́й во и҆́мѧ гдⷭ҇не.
Дїа́конъ: Бл҃гословѝ, влⷣко, го́рнїй прⷭ҇то́лъ.
І҆ере́й же: Бл҃гослове́нъ є҆сѝ на прⷭ҇то́лѣ сла́вы црⷭ҇твїѧ твоегѡ̀, сѣдѧ́й на херꙋві́мѣхъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
По и҆сполне́нїи трист҃а́гѡ, прише́дъ пред̾ ст҃ы̑ѧ двє́ри, дїа́конъ глаго́летъ: Во́нмемъ.
І҆ере́й же возглаша́етъ: Ми́ръ всѣ̑мъ.
И҆ чте́цъ глаго́летъ: И҆ дх҃ови твоемꙋ̀.
И҆ дїа́конъ па́ки: Премꙋ́дрость.
И҆ чте́цъ, прокі́менъ, ѱало́мъ дв҃довъ.
Посе́мъ дїа́конъ: Премꙋ́дрость.
И҆ чте́цъ надписа́нїе а҆пⷭ҇ла: Дѣѧ̑нїѧ ст҃ы́хъ а҆пⷭ҇лъ чте́нїе. И҆лѝ: Собо́рнагѡ посла́нїѧ і҆а́кѡвлѧ, и҆лѝ петро́ва чте́нїе. И҆лѝ: Къ ри́млѧнѡмъ, и҆лѝ къ корі́нѳѧнѡмъ, и҆лѝ къ гала́тѡмъ посла́нїѧ ст҃а́гѡ а҆пⷭ҇ла па́ѵла чте́нїе.
И҆ па́ки дїа́конъ: Во́нмемъ.
А҆пⷭ҇лꙋ же что́мꙋ, дїа́конъ, прїе́мъ кади́льницꙋ и҆ ѳѷмїа́мъ, прихо́дитъ ко свѧще́нникꙋ, и҆ прїе́мъ благослове́нїе ѿ негѡ̀, кади́тъ ст҃ꙋ́ю трапе́зꙋ ѡ҆́крестъ и҆ ѻ҆лта́рь ве́сь, и҆ свѧще́нника.
А҆пⷭ҇лꙋ же и҆спо́лньшꙋсѧ, глаго́летъ сщ҃е́нникъ: Ми́ръ тѝ.
И҆ чте́цъ: И҆ дх҃ови твоемꙋ̀.
Дїа́конъ: Премꙋ́дрость.
И҆ чте́цъ: А҆ллилꙋ́їа.
Моли́тва пре́жде є҆ѵⷢ҇лїа.
Сщ҃е́нникъ: Возсїѧ́й въ сердца́хъ на́шихъ, чл҃вѣколю́бче влⷣко, твоегѡ̀ бг҃оразꙋ́мїѧ нетлѣ́нный свѣ́тъ, и҆ мы́слєнныѧ на́ши ѿве́рзи ѻ҆́чи во є҆ѵⷢ҇льскихъ твои́хъ проповѣ́данїй разꙋмѣ́нїе: вложѝ въ на́съ и҆ стра́хъ блаже́нныхъ твои́хъ за́повѣдїй, да плѡтскі́ѧ по́хѡти всѧ̑ попра́вше, дꙋхо́вное жи́тельство про́йдемъ, всѧ̑, ꙗ҆́же ко бл҃гоꙋгожде́нїю твоемꙋ̀, и҆ мꙋ́дрствꙋюще и҆ дѣ́юще. ты́ бо є҆сѝ просвѣще́нїе дꙋ́шъ и҆ тѣле́съ на́шихъ, хрⷭ҇тѐ бж҃е, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ всест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
Дїа́конъ: Бл҃гословѝ, влⷣко, бл҃говѣсти́телѧ ст҃а́гѡ а҆пⷭ҇ла и҆ є҆ѵⷢ҇лі́ста, .
Сщ҃е́нникъ, зна́менꙋѧ є҆го̀, глаго́летъ: Бг҃ъ, мл҃твами ст҃а́гѡ, сла́внагѡ, всехва́льнагѡ а҆пⷭ҇ла и҆ є҆ѵⷢ҇лі́ста, , да да́стъ тебѣ̀ глаго́лъ бл҃говѣствꙋ́ющемꙋ си́лою мно́гою, во и҆сполне́нїе є҆ѵⷢ҇лїа возлю́бленнагѡ сн҃а своегѡ̀, гдⷭ҇а на́шегѡ і҆и҃са хрⷭ҇та̀.
Дїа́конъ же ре́къ: А҆ми́нь.
І҆ере́й: Премꙋ́дрость, простѝ, ᲂу҆слы́шимъ ст҃а́гѡ є҆ѵⷢ҇лїа. Ми́ръ всѣ̑мъ.
Лю́дїе: И҆ дх҃ови твоемꙋ̀.
Дїа́конъ: Ѿ ст҃а́гѡ є҆ѵⷢ҇лїа чте́нїе.
Ли́къ: Сла́ва тебѣ̀ гдⷭ҇и, сла́ва тебѣ̀.
Сщ҃е́нникъ: Во́нмемъ.
И҆ и҆спо́лнившꙋсѧ є҆ѵⷢ҇лїю, глаго́летъ сщ҃е́нникъ: Ми́ръ тѝ бл҃говѣствꙋ́ющемꙋ.
Ли́къ: Сла́ва тебѣ̀, гдⷭ҇и, сла́ва тебѣ̀.
Е҆ктенїа̀ сꙋгꙋ́баѧ.
Дїа́конъ: Рце́мъ всѝ ѿ всеѧ̀ дꙋшѝ, и҆ ѿ всегѡ̀ помышле́нїѧ на́шегѡ рце́мъ.
Ли́къ: Гдⷭ҇и, поми́лꙋй.
Гдⷭ҇и вседержи́телю, бж҃е ѻ҆ц҃ъ на́шихъ, мо́лимъ ти сѧ, ᲂу҆слы́ши и҆ поми́лꙋй.
Ли́къ: Гдⷭ҇и, поми́лꙋй.
Поми́лꙋй на́съ, бж҃е, по вели́цѣй ми́лости твое́й, мо́лимъ ти сѧ, ᲂу҆слы́ши и҆ поми́лꙋй.
Ли́къ: Гдⷭ҇и поми́лꙋй, три́жды.
Е҆щѐ мо́лимсѧ ѡ҆ вели́комъ господи́нѣ и҆ ѻ҆ц҃ѣ̀ на́шемъ, свѧтѣ́йшемъ патрїа́рхѣ , и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ] , и҆ ѡ҆ все́й во хрⷭ҇тѣ̀ бра́тїи на́шей.
Ли́къ: Гдⷭ҇и поми́лꙋй, три́жды.
Е҆щѐ мо́лимсѧ ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.
Ли́къ: Гдⷭ҇и поми́лꙋй, три́жды.
Е҆щѐ мо́лимсѧ ѡ҆ бра́тїѧхъ на́шихъ, сщ҃е́нницѣхъ, сщ҃енномона́сѣхъ и҆ все́мъ во хрⷭ҇тѣ̀ бра́тствѣ на́шемъ.
Ли́къ: Гдⷭ҇и поми́лꙋй, три́жды.
Е҆щѐ мо́лимсѧ ѡ҆ бл҃же́нныхъ и҆ приснопа́мѧтныхъ созда́телехъ ст҃а́гѡ хра́ма сегѡ̀, [а҆́ще во ѻ҆би́тели: ст҃ы́ѧ ѻ҆би́тели сеѧ̀,] и҆ ѡ҆ всѣ́хъ преждепочи́вшихъ ѻ҆ц҃ѣ́хъ и҆ бра́тїѧхъ, здѣ̀ лежа́щихъ и҆ повсю́дꙋ, правосла́вныхъ.
Ли́къ: Гдⷭ҇и поми́лꙋй, три́жды.
Е҆щѐ мо́лимсѧ ѡ҆ ми́лости, жи́зни, ми́рѣ, здра́вїи, спасе́нїи, посѣще́нїи, проще́нїи и҆ ѡ҆ставле́нїи грѣхѡ́въ рабѡ́въ бж҃їихъ, бра́тїи ст҃а́гѡ хра́ма сегѡ̀ [а҆́ще во ѻ҆би́тели: ст҃ы́ѧ ѻ҆би́тели сеѧ̀].
Ли́къ: Гдⷭ҇и поми́лꙋй, три́жды.
Е҆щѐ мо́лимсѧ ѡ҆ плодоносѧ́щихъ и҆ добродѣ́ющихъ во ст҃ѣ́мъ и҆ всечестнѣ́мъ хра́мѣ се́мъ, трꙋжда́ющихсѧ, пою́щихъ и҆ предстоѧ́щихъ лю́дехъ, ѡ҆жида́ющихъ ѿ тебѐ вели́кїѧ и҆ бога́тыѧ млⷭ҇ти.
Ли́къ: Гдⷭ҇и поми́лꙋй, три́жды.
Мл҃тва прилѣ́жнагѡ моле́нїѧ.
І҆ере́й: Гдⷭ҇и бж҃е на́шъ, прилѣ́жное сїѐ моле́нїе прїимѝ ѿ твои́хъ ра̑бъ, и҆ поми́лꙋй на́съ по мно́жествꙋ млⷭ҇ти твоеѧ̀, и҆ щедрѡ́ты твоѧ̑ низпослѝ на ны̀, и҆ на всѧ̑ лю́ди твоѧ̑, ча́ющыѧ ѿ тебѐ бога́тыѧ млⷭ҇ти.
Возглаше́нїе: Ꙗ҆́кѡ ми́лостивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Е҆ктенїа̀ ѡ҆ ѡ҆глаше́нныхъ.
Дїа́конъ: Помоли́тесѧ, ѡ҆глаше́ннїи, гдⷭ҇ви.
Ли́къ: Гдⷭ҇и, поми́лꙋй.
Вѣ́рнїи, ѡ҆ ѡ҆глаше́нныхъ помо́лимсѧ, да гдⷭ҇ь поми́лꙋетъ и҆̀хъ.
Ли́къ: Гдⷭ҇и, поми́лꙋй.
Ѡ҆гласи́тъ и҆̀хъ сло́вомъ и҆́стины.
Ли́къ: Гдⷭ҇и, поми́лꙋй.
Ѿкры́етъ и҆̀мъ є҆ѵⷢ҇лїе пра́вды.
Ли́къ: Гдⷭ҇и, поми́лꙋй.
Соедини́тъ и҆̀хъ ст҃ѣ́й свое́й собо́рнѣй и҆ а҆пⷭ҇льстѣй це́ркви.
Ли́къ: Гдⷭ҇и, поми́лꙋй.
Спасѝ, поми́лꙋй, застꙋпѝ и҆ сохранѝ и҆̀хъ, бж҃е, твое́ю бл҃года́тїю.
Ли́къ: Гдⷭ҇и, поми́лꙋй.
Ѡ҆глаше́ннїи, главы̑ ва́шѧ гдⷭ҇ви приклони́те.
Ли́къ: Тебѣ̀, гдⷭ҇и.
Мл҃тва ѡ҆ ѡ҆глаше́нныхъ.
Сщ҃е́нникъ: Гдⷭ҇и бж҃е на́шъ, и҆́же на нб҃сѣ́хъ живы́й, и҆ призира́ѧй на всѧ̑ дѣла̀ твоѧ̀: при́зри на рабы̑ твоѧ̑ ѡ҆глашє́нныѧ, прикло́ньшыѧ своѧ̑ вы̑ѧ пред̾ тобо́ю, и҆ да́ждь и҆̀мъ ле́гкїй ꙗ҆ре́мъ, сотворѝ и҆̀хъ ᲂу҆́ды чⷭ҇тны ст҃ы́ѧ твоеѧ̀ цр҃кве, и҆ сподо́би и҆̀хъ ба́ни пакибытїѧ̀, ѡ҆ставле́нїѧ грѣхѡ́въ и҆ ѡ҆де́жди нетлѣ́нїѧ, въ позна́нїе тебѐ и҆́стиннагѡ бг҃а на́шегѡ.
Возглаше́нїе: Да и҆ ті́и съ на́ми сла́вѧтъ пречестно́е и҆ великолѣ́пое и҆́мѧ твоѐ, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
И҆ простира́етъ а҆нтїми́нсъ сщ҃е́нникъ.
Лїтꙋргі́а вѣ́рныхъ.
Дїа́конъ глаго́летъ: Е҆ли́цы ѡ҆глаше́ннїи, и҆зыди́те: ѡ҆глаше́ннїи и҆зыди́те: є҆ли́цы ѡ҆глаше́ннїи и҆зыди́те: да никто̀ ѿ ѡ҆глаше́нныхъ, є҆ли́цы вѣ́рнїи, па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю благода́тїю.
Ли́къ: Гдⷭ҇и, поми́лꙋй.
Дїа́конъ: Премꙋ́дрость.
Мл҃тва вѣ́рныхъ пе́рваѧ.
Сщ҃е́нникъ: Ты̀, гдⷭ҇и, показа́лъ є҆сѝ на́мъ вели́кое сїѐ спасе́нїѧ та́инство: ты̀ сподо́билъ є҆сѝ на́съ, смире́нныхъ и҆ недосто́йныхъ ра̑бъ твои́хъ, бы́ти слꙋжи́телємъ ст҃а́гѡ твоегѡ̀ же́ртвенника. ты̀ ᲂу҆довлѝ на́съ си́лою ст҃а́гѡ твоегѡ̀ дх҃а въ слꙋ́жбꙋ сїю̀, да неѡсꙋжде́ннѡ ста́вше пред̾ ст҃о́ю сла́вою твое́ю, принесе́мъ тѝ же́ртвꙋ хвале́нїѧ: ты́ бо є҆сѝ дѣ́йствꙋѧй всѧ̑ во всѣ́хъ. да́ждь, гдⷭ҇и, и҆ ѡ҆ на́шихъ грѣсѣ́хъ, и҆ ѡ҆ людски́хъ невѣ́дѣнїихъ, прїѧ́тнѣй бы́ти же́ртвѣ на́шей, и҆ бл҃гопрїѧ́тнѣй пред̾ тобо́ю.
Возглаше́нїе: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Е҆гда̀ сщ҃е́нникъ є҆ди́нъ слꙋ́житъ, сїѧ̑ не глаго́летъ:
Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й и҆ соедине́нїи всѣ́хъ, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю благода́тїю.
Ли́къ: Гдⷭ҇и, поми́лꙋй.
Дїа́конъ: Премꙋ́дрость.
Вхо́дитъ дїа́конъ сѣ́верными две́рьми.
Мл҃тва вѣ́рныхъ втора́ѧ.
Сщ҃е́нникъ: Бж҃е, посѣти́вый въ млⷭ҇ти и҆ щедро́тахъ смире́нїе на́ше, поста́вивый на́съ, смире́нныхъ и҆ грѣ́шныхъ и҆ недосто́йныхъ ра̑бъ твои́хъ пред̾ ст҃о́ю сла́вою твое́ю, слꙋжи́ти ст҃о́мꙋ же́ртвенникꙋ твоемꙋ̀: ты̀ ᲂу҆крѣпѝ на́съ си́лою ст҃а́гѡ твоегѡ̀ дх҃а въ слꙋ́жбꙋ сїю̀, и҆ да́ждь на́мъ сло́во во ѿверзе́нїе ᲂу҆́стъ на́шихъ, во є҆́же призыва́ти бл҃года́ть ст҃а́гѡ твоегѡ̀ дх҃а на хотѧ́щыѧ предложи́тисѧ да́ры.
Возглаше́нїе: Ꙗ҆́кѡ да под̾ держа́вою твое́ю всегда̀ храни́ми, тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
И҆ ѿверза́ютсѧ ст҃ы̑ѧ двє́ри.
Херꙋві́мскаѧ пѣ́снь.
Ли́къ: И҆̀же херꙋві́мы та́йнѡ ѡ҆бразꙋ́юще, и҆ животворѧ́щей трⷪ҇цѣ трист҃ꙋ́ю пѣ́снь припѣва́юще, всѧ́кое ны́нѣ жите́йское ѿложи́мъ попече́нїе.
Та́же, херꙋві́мстѣй пѣ́сни пѣва́емѣй, дїа́конъ, прїе́мъ кади́льницꙋ, и҆ ѳѷмїа́мъ вложи́въ, прихо́дитъ ко свѧще́нникꙋ, и҆ прїе́мъ благослове́нїе ѿ негѡ̀, кади́тъ ст҃ꙋ́ю трапе́зꙋ ѡ҆́крестъ, и҆ ѻ҆лта́рь ве́сь, и҆ свѧще́нника, глаго́летъ же и҆ н҃-й ѱало́мъ, и҆ тропари̑ ᲂу҆мили́тєльныѧ, є҆ли́кѡ и҆зво́литъ.
Сщ҃е́нникъ же глаго́летъ та́йнѡ мл҃твꙋ сїю̀:
Никто́же досто́инъ ѿ свѧза́вшихсѧ плотски́ми похотьмѝ и҆ сластьмѝ приходи́ти, и҆лѝ прибли́житисѧ, и҆лѝ слꙋжи́ти тебѣ̀, цр҃ю̀ сла́вы: є҆́же бо слꙋжи́ти тебѣ̀, вели́ко и҆ стра́шно и҆ самѣ̑мъ нбⷭ҇нымъ си́ламъ. но ѻ҆ба́че неизрече́ннагѡ ра́ди и҆ безмѣ́рнагѡ твоегѡ̀ человѣколю́бїѧ, непрело́жнѡ и҆ неизмѣ́ннѡ бы́лъ є҆сѝ человѣ́къ, и҆ а҆рхїере́й на́мъ бы́лъ є҆сѝ, и҆ слꙋже́бныѧ сеѧ̀ и҆ безкро́вныѧ же́ртвы свѧщеннодѣ́йствїе пре́далъ є҆сѝ на́мъ, ꙗ҆́кѡ влⷣка всѣ́хъ: ты́ бо є҆ди́нъ, гдⷭ҇и бж҃е на́шъ, влады́чествꙋеши нбⷭ҇ными и҆ земны́ми, и҆́же на прⷭ҇то́лѣ херꙋві́мстѣ носи́мый, и҆́же серафі́мѡвъ гдⷭ҇ь и҆ цр҃ь і҆и҃левъ, и҆́же є҆ди́нъ свѧ́тъ и҆ во ст҃ы́хъ почива́ѧй. тѧ̀ ᲂу҆̀бо молю̀ є҆ди́наго бл҃га́го и҆ бл҃гопослꙋшли́ваго: при́зри на мѧ̀, грѣ́шнаго и҆ непотре́бнаго раба̀ твоего̀, и҆ ѡ҆чи́сти мою̀ дꙋ́шꙋ и҆ се́рдце ѿ со́вѣсти лꙋка́выѧ, и҆ ᲂу҆довли́ мѧ си́лою ст҃а́гѡ твоегѡ̀ дх҃а, ѡ҆блече́нна благода́тїю свѧще́нства, предста́ти ст҃ѣ́й твое́й се́й трапе́зѣ и҆ свѧщеннодѣ́йствовати ст҃о́е и҆ пречⷭ҇тое твоѐ тѣ́ло и҆ честнꙋ́ю кро́вь: къ тебѣ́ бо прихождꙋ̀, прикло́нь мою̀ вы́ю, и҆ молю́ ти сѧ, да не ѿврати́ши лица̀ твоегѡ̀ ѿ менє̀, нижѐ ѿри́неши менє̀ ѿ ѻ҆́трѡкъ твои́хъ, но сподо́би принесє́ннымъ тебѣ̀ бы́ти, мно́ю грѣ́шнымъ и҆ недосто́йнымъ рабо́мъ твои́мъ, дарѡ́мъ си̑мъ: ты́ бо є҆сѝ приносѧ́й и҆ приноси́мый, и҆ прїе́млѧй и҆ раздава́емый, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ благи́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
И҆спо́лньшымсѧ же мл҃твѣ и҆ кажде́нїю, сщ҃е́нникъ и҆ дїа́конъ, ста́вше пред̾ ст҃о́ю трапе́зою, глаго́лютъ херꙋві́мскꙋю пѣ́снь, три́жды: по ко́емждо же сконча́нїи, покланѧ́ютсѧ по є҆ди́нощи.
Та́же ѿхо́дѧтъ въ предложе́нїе, и҆ кади́тъ і҆ере́й ст҃а̑ѧ.
Дїа́конъ глаго́летъ ко свѧще́нникꙋ: Возмѝ, влⷣко.
И҆ сщ҃е́нникъ, взе́мъ воздꙋ́хъ, возлага́етъ на лѣ́вое ра́мо є҆гѡ̀, глаго́лѧ: Возми́те рꙋ́ки ва́шѧ во ст҃а̑ѧ, и҆ блгⷭ҇ви́те гдⷭ҇а.
Та́же ст҃ы́й ді́скосъ прїе́мъ, возлага́етъ на главꙋ̀ дїа́кона, са́мъ же ст҃ы́й поти́ръ въ рꙋ́цѣ прїе́мъ: и҆схо́дѧтъ же сѣ́верною страно́ю, предходѧ́щымъ и҆̀мъ лампа́дамъ.
Вели́кїй вхо́дъ.
Дїа́конъ глаго́летъ: Вели́каго господи́на и҆ ѻ҆тца̀ на́шего , ст҃ѣ́йшаго патрїа́рха моско́вскаго и҆ всеѧ̀ рꙋсѝ, и҆ господи́на на́шего преѡсвѧще́нѣйшего , митрополі́та [и҆лѝ а҆рхїепⷭ҇кпа, и҆лѝ є҆пⷭ҇кпа є҆гѡ́же є҆́сть ѡ҆бласть], да помѧне́тъ гдⷭ҇ь бг҃ъ во црⷭ҇твїи свое́мъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
Та́же сщ҃е́нникъ: Преѡсвѧще́нныѧ митрополі́ты, а҆рхїепⷭ҇кпы и҆ є҆пⷭ҇кпы, и҆ ве́сь сщ҃е́нническїй и҆ мона́шескїй чи́нъ, бра́тїю и҆ прихо́жанъ ст҃а́гѡ хра́ма сегѡ̀ [а҆́ще во ѻ҆би́тели: ст҃ы́ѧ ѻ҆би́тели сеѧ̀], ва́съ и҆ всѣ́хъ правосла́вныхъ хрⷭ҇тїа́нъ да помѧне́тъ гдⷭ҇ь бг҃ъ во црⷭ҇твїи свое́мъ всегда̀, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
И҆ коне́цъ херꙋві́мстѣй пѣ́сни: Ꙗ҆́кѡ да цр҃ѧ̀ всѣ́хъ под̾и́мемъ, а҆́гг҃льскими неви́димѡ дорѷноси́ма чи́нми. а҆ллилꙋ́їа, а҆ллилꙋ́їа, а҆ллилꙋ́їа.
Вше́дъ же дїа́конъ внꙋ́трь ст҃ы́хъ две́рей, стои́тъ ѡ҆деснꙋ́ю, и҆ хотѧ́щꙋ сщ҃е́нникꙋ вни́ти, глаго́летъ къ немꙋ̀ дїа́конъ: Да помѧне́тъ гдⷭ҇ь бг҃ъ сщ҃е́нство твоѐ во црⷭ҇твїи свое́мъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
И҆ сщ҃е́нникъ къ немꙋ̀: Да помѧне́тъ гдⷭ҇ь бг҃ъ свѧщеннодїа́конство твоѐ во црⷭ҇твїи свое́мъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
И҆ сщ҃е́нникъ ᲂу҆́бѡ поставлѧ́етъ ст҃ы́й поти́ръ на ст҃ꙋ́ю трапе́зꙋ, глаго́лѧ:
Благоѡбра́зный і҆ѡ́сифъ, съ дре́ва сне́мъ пречⷭ҇тое тѣ́ло твоѐ, плащани́цею чи́стою ѡ҆бви́въ, и҆ благоꙋха́ньми, во гро́бѣ но́вѣ покры́въ, положѝ.
Во гро́бѣ пло́тски, во а҆́дѣ же съ дш҃е́ю ꙗ҆́кѡ бг҃ъ, въ раи́ же съ разбо́йникомъ, и҆ на прⷭ҇то́лѣ бы́лъ є҆сѝ, хрⷭ҇тѐ, со ѻ҆ц҃е́мъ и҆ дх҃омъ, всѧ̑ и҆сполнѧ́ѧй неѡпи́санный.
Ꙗ҆́кѡ живоно́сецъ, ꙗ҆́кѡ раѧ̀ краснѣ́йшїй, вои́стиннꙋ и҆ черто́га всѧ́кагѡ ца́рскагѡ показа́сѧ свѣтлѣ́йшїй, хрⷭ҇тѐ, гро́бъ тво́й, и҆сто́чникъ на́шегѡ воскресе́нїѧ.
Та́же воздꙋ́хъ ѿ дїа́конѧ ра́ма взе́мъ, и҆ покади́въ покрыва́етъ и҆́мъ ст҃а̑ѧ, глаго́лѧ: Благоѡбра́зный і҆ѡ́сифъ:
И҆ прїе́мъ кади́льницꙋ, кади́тъ ст҃а̑ѧ три́жды, глаго́лѧ: Оу҆блажѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерꙋсали̑мскїѧ: тогда̀ благоволи́ши же́ртвꙋ пра́вды, возноше́нїе и҆ всесожега́ємаѧ, тогда̀ возложа́тъ на ѻ҆лта́рь тво́й тельцы̑.
И҆ ѿда́въ кади́льницꙋ, глаго́летъ дїа́конꙋ: Помѧни́ мѧ, бра́те и҆ сослꙋжи́телю.
И҆ дїа́конъ къ немꙋ̀: Да помѧне́тъ гдⷭ҇ь бг҃ъ свѧще́нство твоѐ во црⷭ҇твїи свое́мъ. Помоли́сѧ ѡ҆ мнѣ̀, влⷣко ст҃ы́й.
И҆ сщ҃е́нникъ: Дх҃ъ ст҃ы́й на́йдетъ на тѧ̀, и҆ си́ла вы́шнѧгѡ ѡ҆сѣни́тъ тѧ̀.
И҆ дїа́конъ: То́йже дх҃ъ содѣ́йствꙋетъ на́мъ всѧ̑ дни̑ живота̀ на́шегѡ.
И҆ па́ки то́йжде: Помѧни́ мѧ, влⷣко ст҃ы́й.
И҆ сщ҃е́нникъ: Да помѧне́тъ тѧ̀ гдⷭ҇ь бг҃ъ во ца́рствїи свое́мъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
И҆ дїа́конъ, ре́къ: А҆ми́нь.
И҆ затворѧ́ютсѧ ст҃ы̑ѧ двє́ри.
Е҆ктенїа̀ проси́тєльнаѧ.
Дїа́конъ: И҆спо́лнимъ моли́твꙋ на́шꙋ гдⷭ҇ви.
Ли́къ: Гдⷭ҇и, поми́лꙋй.
Ѡ҆ предложе́нныхъ честны́хъ дарѣ́хъ, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.
Ли́къ: Гдⷭ҇и, поми́лꙋй.
Днѐ всегѡ̀ соверше́нна, свѧ́та, ми́рна и҆ безгрѣ́шна, ᲂу҆ гдⷭ҇а про́симъ.
Ли́къ: Пода́й гдⷭ҇и.
А҆́гг҃ла ми́рна, вѣ́рна наста́вника, храни́телѧ дꙋ́шъ и҆ тѣле́съ на́шихъ, ᲂу҆ гдⷭ҇а про́симъ.
Ли́къ: Пода́й гдⷭ҇и.
Проще́нїѧ и҆ ѡ҆ставле́нїѧ грѣхѡ́въ и҆ прегрѣше́нїй на́шихъ, ᲂу҆ гдⷭ҇а про́симъ.
Ли́къ: Пода́й гдⷭ҇и.
До́брыхъ и҆ поле́зныхъ дꙋша́мъ на́шымъ, и҆ ми́ра мі́рови, ᲂу҆ гдⷭ҇а про́симъ.
Ли́къ: Пода́й гдⷭ҇и.
Про́чее вре́мѧ живота̀ на́шегѡ въ ми́рѣ и҆ покаѧ́нїи сконча́ти, ᲂу҆ гдⷭ҇а про́симъ.
Ли́къ: Пода́й гдⷭ҇и.
Хрⷭ҇тїа́нскїѧ кончи́ны живота̀ на́шегѡ, безболѣ́знены, непосты́дны, ми́рны, и҆ до́брагѡ ѿвѣ́та на стра́шнѣмъ сꙋди́щи хрⷭ҇то́вѣ про́симъ.
Ли́къ: Пода́й гдⷭ҇и.
Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀, гдⷭ҇и.
Мл҃тва приноше́нїѧ, по поставле́нїи бж҃е́ственныхъ дарѡ́въ на ст҃ѣ́й трапе́зѣ.
І҆ере́й: Гдⷭ҇и бж҃е на́шъ, созда́вый на́съ и҆ введы́й въ жи́знь сїю̀, показа́вый на́мъ пꙋти̑ во спасе́нїе, дарова́вый на́мъ нбⷭ҇ныхъ та̑инъ ѡ҆крове́нїе: ты́ бо є҆сѝ положи́вый на́съ въ слꙋ́жбꙋ сїю̀ си́лою дх҃а твоегѡ̀ ст҃а́гѡ: бл҃говолѝ ᲂу҆́бѡ, гдⷭ҇и, бы́ти на́мъ слꙋжи́телємъ но́вагѡ твоегѡ̀ завѣ́та, слꙋга́мъ ст҃ы́хъ твои́хъ та́инствъ: прїимѝ на́съ, приближа́ющихсѧ ст҃о́мꙋ твоемꙋ̀ же́ртвенникꙋ, по мно́жествꙋ ми́лости твоеѧ̀, да бꙋ́демъ досто́йни приноси́ти тебѣ̀ слове́снꙋю сїю̀ и҆ безкро́внꙋю же́ртвꙋ ѡ҆ на́шихъ согрѣше́нїихъ и҆ ѡ҆ людски́хъ невѣ́жествїихъ: ю҆́же прїе́мъ во ст҃ы́й и҆ пренбⷭ҇ный и҆ мы́сленный тво́й же́ртвенникъ, въ воню̀ бл҃гоꙋха́нїѧ, возниспослѝ на́мъ бл҃года́ть ст҃а́гѡ твоегѡ̀ дх҃а. при́зри на ны̀, бж҃е, и҆ ви́ждь на слꙋ́жбꙋ сїю̀ на́шꙋ, и҆ прїимѝ ю҆̀, ꙗ҆́коже прїѧ́лъ є҆сѝ а҆́велевы да́ры, нѡ́евы жє́ртвы, а҆враа́мѡва всеплѡ́дїѧ, мѡѷсе́ѡва и҆ а҆арѡ́нѡва сщ҃є́нства, самꙋи́лѡва ми̑рнаѧ. ꙗ҆́коже прїѧ́лъ є҆сѝ ѿ ст҃ы́хъ твои́хъ а҆пⷭ҇лъ и҆́стиннꙋю сїю̀ слꙋ́жбꙋ, си́це и҆ ѿ рꙋ́къ на́съ грѣ́шныхъ прїимѝ да́ры сїѧ̑ во бл҃гости твое́й, гдⷭ҇и: ꙗ҆́кѡ да сподо́бльшесѧ слꙋжи́ти без̾ поро́ка ст҃о́мꙋ твоемꙋ̀ же́ртвенникꙋ, ѡ҆брѧ́щемъ мздꙋ̀ вѣ́рныхъ и҆ мꙋ́дрыхъ строи́телей въ де́нь стра́шный воздаѧ́нїѧ твоегѡ̀ пра́веднагѡ.
Возглаше́нїе: Щедро́тами є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ, со прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
І҆ере́й: Ми́ръ всѣ̑мъ.
Ли́къ: И҆ дх҃ови твоемꙋ̀.
Дїа́конъ: Возлю́бимъ дрꙋгъ дрꙋ́га, да є҆диномы́слїемъ и҆сповѣ́мы.
Ли́къ: Ѻ҆ц҃а̀ и҆ сн҃а и҆ ст҃а́го дх҃а, / трⷪ҇цꙋ є҆диносꙋ́щнꙋю / и҆ нераздѣ́льнꙋю.
И҆ сщ҃е́нникъ покланѧ́етсѧ три́жды, глаго́лѧ та́йнѡ: Возлюблю̀ тѧ̀, гдⷭ҇и, крѣ́посте моѧ̀, гдⷭ҇ь ᲂу҆твержде́нїе моѐ и҆ прибѣ́жище моѐ. Три́жды.
Настоѧ́тель же глаго́летъ: Хрⷭ҇то́съ посредѣ̀ на́съ.
И҆ ѿвѣща́етъ цѣлова́вый: И҆ є҆́сть, и҆ бꙋ́детъ.
Дїа́конъ возглаша́етъ: Двє́ри, двє́ри, премꙋ́дростїю во́нмемъ.
Сщ҃е́нникъ же ѿверза́етъ завѣ́сꙋ црⷭ҇кихъ вра́тъ, и҆ воздвиза́етъ воздꙋ́хъ, и҆ держи́тъ над̾ ст҃ы́ми дармѝ, потрѧса́юще, и҆ глаго́люще въ себѣ̀, ꙗ҆́коже и҆ лю́дїе:
И҆сповѣ́данїе вѣ́ры:
Вѣ́рꙋю во є҆ди́наго бг҃а ѻ҆ц҃а̀ вседержи́телѧ, творца̀ нб҃ꙋ и҆ землѝ, ви̑димымъ же всѣ̑мъ и҆ неви̑димымъ. и҆ во є҆ди́наго гдⷭ҇а і҆и҃са хрⷭ҇та̀, сн҃а бж҃їѧ, є҆диноро́днаго, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ: свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша. на́съ ра́ди человѣ̑къ, и҆ на́шегѡ ра́ди спасе́нїѧ, сше́дшаго съ нб҃съ, и҆ воплоти́вшагосѧ ѿ дх҃а ст҃а и҆ мр҃і́и дв҃ы, и҆ вочеловѣ́чшасѧ. распѧ́таго же за ны̀ при понті́йстѣмъ пїла́тѣ, и҆ страда́вша, и҆ погребе́нна, и҆ воскрⷭ҇шаго въ тре́тїй де́нь по писа́нїємъ. и҆ возше́дшаго на нб҃са̀, и҆ сѣдѧ́ща ѡ҆деснꙋ́ю ѻ҆ц҃а̀. и҆ па́ки грѧдꙋ́щаго со сла́вою, сꙋди́ти живы̑мъ и҆ мє́ртвымъ, є҆гѡ́же црⷭ҇твїю не бꙋ́детъ конца̀. и҆ въ дх҃а ст҃а́го, гдⷭ҇а, животворѧ́щаго, и҆́же ѿ ѻ҆ц҃а̀ и҆сходѧ́щаго, и҆́же со ѻ҆ц҃е́мъ и҆ сн҃омъ спокланѧ́ема и҆ ссла́вима, глаго́лавшаго прⷪ҇ро́ки. во є҆ди́нꙋ ст҃ꙋ́ю собо́рнꙋю и҆ а҆пⷭ҇льскꙋю цр҃ковь. и҆сповѣ́дꙋю є҆ди́но кр҃ще́нїе, во ѡ҆ставле́нїе грѣхѡ́въ. ча́ю воскрⷭ҇нїѧ ме́ртвыхъ: и҆ жи́зни бꙋ́дꙋщагѡ вѣ́ка. а҆ми́нь.
Дїа́конъ: Ста́немъ до́брѣ, ста́немъ со стра́хомъ, во́нмемъ, ст҃о́е возноше́нїе въ ми́рѣ приноси́ти.
Ли́къ: Ми́лость ми́ра, / же́ртвꙋ хвале́нїѧ.
И҆ сщ҃е́нникъ возглаше́нїе: Бл҃года́ть гдⷭ҇а на́шегѡ і҆и҃са хрⷭ҇та̀, и҆ любы̀ бг҃а и҆ ѻ҆ц҃а̀, и҆ прича́стїе ст҃а́гѡ дх҃а, бꙋ́ди со всѣ́ми ва́ми.
Ли́къ: И҆ со дх҃омъ твои́мъ.
Сщ҃е́нникъ: Горѣ̀ и҆мѣ́имъ сердца̀.
Ли́къ: И҆́мамы ко гдⷭ҇ꙋ.
Сщ҃е́нникъ: Бл҃годари́мъ гдⷭ҇а.
Ли́къ: Досто́йно и҆ пра́ведно є҆́сть / покланѧ́тисѧ ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, / трⷪ҇цѣ є҆диносꙋ́щнѣй и҆ нераздѣ́льнѣй.
Сщ҃е́нникъ же мо́литсѧ:
Сы́й влⷣко, гдⷭ҇и бж҃е ѻ҆́ч҃е вседержи́телю покланѧ́емый, досто́йно ꙗ҆́кѡ вои́стиннꙋ, и҆ првⷣно, и҆ лѣ́по великолѣ́пїю ст҃ы́ни твоеѧ̀, тебѐ хвали́ти, тебѐ пѣ́ти, тебѐ бл҃гослови́ти, тебѣ̀ кла́нѧтисѧ, тебѐ бл҃годари́ти, тебѐ сла́вити є҆ди́наго вои́стиннꙋ сꙋ́щаго бг҃а, и҆ тебѣ̀ приноси́ти се́рдцемъ сокрꙋше́ннымъ и҆ дх҃омъ смире́нїѧ слове́снꙋю сїю̀ слꙋ́жбꙋ на́шꙋ: ꙗ҆́кѡ ты̀ є҆сѝ дарова́вый на́мъ позна́нїе твоеѧ̀ и҆́стины. и҆ кто̀ дово́ленъ возглаго́лати си̑лы твоѧ̑, слы́шаны сотвори́ти всѧ̑ хвалы̑ твоѧ̑, и҆лѝ повѣ́дати всѧ̑ чꙋдеса̀ твоѧ̑ во всѧ́ко вре́мѧ; влⷣко всѣ́хъ, гдⷭ҇и нб҃сѐ и҆ землѝ, и҆ всеѧ̀ тва́ри, ви́димыѧ же и҆ неви́димыѧ, сѣдѧ́й на прⷭ҇то́лѣ сла́вы и҆ призира́ѧй бє́здны, безнача́льне, неви́диме, непостижи́ме, неѡпи́санне, неизмѣ́нне, ѻ҆́ч҃е гдⷭ҇а на́шегѡ і҆и҃са хрⷭ҇та̀, вели́кагѡ бг҃а и҆ сп҃си́телѧ, ᲂу҆пова́нїѧ на́шегѡ, и҆́же є҆́сть ѻ҆́бразъ твоеѧ̀ бл҃гости: печа́ть равноѡбра́знаѧ, въ себѣ̀ показꙋ́ѧ тѧ̀ ѻ҆ц҃а̀, сло́во живо́е, бг҃ъ и҆́стинный, превѣ́чнаѧ премꙋ́дрость, живо́тъ, ѡ҆свѧще́нїе, си́ла, свѣ́тъ и҆́стинный, и҆́мже дх҃ъ ст҃ы́й ꙗ҆ви́сѧ: дх҃ъ и҆́стины, сыноположе́нїѧ дарова́нїе, ѡ҆брꙋче́нїе бꙋ́дꙋщагѡ наслѣ́дїѧ, нача́токъ вѣ́чныхъ бла̑гъ, животворѧ́щаѧ си́ла, и҆сто́чникъ ѡ҆сщ҃е́нїѧ, ѿ негѡ́же всѧ̀ тва́рь слове́снаѧ же и҆ ᲂу҆́мнаѧ ᲂу҆крѣплѧ́ема тебѣ̀ слꙋ́житъ и҆ тебѣ̀ присносꙋ́щное возсыла́етъ славосло́вїе, ꙗ҆́кѡ всѧ́чєскаѧ рабѡ́тна тебѣ̀: тебе́ бо хва́лѧтъ а҆́гг҃ли, а҆рха́гг҃ли, прⷭ҇то́ли, гдⷭ҇ьствїѧ, нача̑ла, вла̑сти, си̑лы и҆ многоѻчи́тїи херꙋві́ми: тебѣ̀ предстоѧ́тъ ѡ҆́крестъ серафі́ми, ше́сть кри́лъ є҆ди́номꙋ, и҆ ше́сть кри́лъ є҆ди́номꙋ: и҆ двѣма̀ ᲂу҆́бѡ покрыва́ютъ ли́ца своѧ̑, двѣма́ же но́ги, и҆ двѣма̀ лета́юще, взыва́ютъ є҆ди́нъ ко дрꙋго́мꙋ, непреста́нными ᲂу҆сты̀, немо́лчными славослове́ньми.
Возглаше́нїе: Побѣ́днꙋю пѣ́снь пою́ще, вопїю́ще, взыва́юще и҆ глаго́люще.
Ли́къ: Свѧ́тъ, свѧ́тъ, свѧ́тъ гдⷭ҇ь саваѡ́ѳъ, / и҆спо́лнь нб҃о и҆ землѧ̀ сла́вы твоеѧ̀: / ѡ҆са́нна въ вы́шнихъ, / бл҃гослове́нъ грѧды́й во и҆́мѧ гдⷭ҇не, / ѡ҆са́нна въ вы́шнихъ.
Сщ҃е́нникъ мо́литсѧ:
Съ си́ми бл҃же́нными си́лами, влⷣко чл҃вѣколю́бче, и҆ мы̀ грѣ́шнїи вопїе́мъ и҆ глаго́лемъ: свѧ́тъ є҆сѝ ꙗ҆́кѡ вои́стиннꙋ и҆ пресвѧ́тъ, и҆ нѣ́сть мѣ́ры великолѣ́пїю ст҃ы́ни твоеѧ̀, и҆ прпⷣбенъ во всѣ́хъ дѣ́лѣхъ твои́хъ, ꙗ҆́кѡ пра́вдою и҆ сꙋдо́мъ и҆́стиннымъ всѧ̑ наве́лъ є҆сѝ на ны̀: созда́въ бо человѣ́ка, пе́рсть взе́мъ ѿ землѝ, и҆ ѡ҆́бразомъ твои́мъ, бж҃е, поче́тъ, положи́лъ є҆сѝ є҆го̀ въ раѝ сла́дости, безсме́ртїе жи́зни и҆ наслажде́нїе вѣ́чныхъ бла̑гъ въ соблюде́нїи за́повѣдей твои́хъ ѡ҆бѣща́въ є҆мꙋ̀: но преслꙋ́шавша тебѐ и҆́стиннаго бг҃а, созда́вшаго є҆го̀, и҆ пре́лестїю ѕмі́евою привле́кшасѧ, ᲂу҆мерщвле́на же свои́ми прегрѣше́ньми, и҆згна́лъ є҆сѝ є҆го̀ пра́веднымъ твои́мъ сꙋдо́мъ, бж҃е, ѿ раѧ̀ въ мі́ръ се́й, и҆ ѿврати́лъ є҆сѝ въ зе́млю, ѿ неѧ́же взѧ́тъ бы́сть, ᲂу҆строѧ́ѧ є҆мꙋ̀ є҆́же ѿ пакибытїѧ̀ спасе́нїе, въ самѣ́мъ хрⷭ҇тѣ̀ твое́мъ: не бо̀ ѿврати́лсѧ є҆сѝ созда́нїѧ твоегѡ̀ въ коне́цъ, є҆́же сотвори́лъ є҆сѝ, бла́же, нижѐ забы́лъ є҆сѝ дѣ́ла рꙋ́къ твои́хъ, но посѣти́лъ є҆сѝ многоѡбра́знѣ, ра́ди милосе́рдїѧ млⷭ҇ти твоеѧ̀: прⷪ҇ро́ки посла́лъ є҆сѝ, сотвори́лъ є҆сѝ си̑лы ст҃ы́ми твои́ми, въ ко́емждо ро́дѣ бл҃гоꙋгоди́вшими тебѣ̀: глаго́лалъ є҆сѝ на́мъ ᲂу҆сты̀ ра̑бъ твои́хъ прⷪ҇ро́кѡвъ, предвозвѣща́ѧ на́мъ хотѧ́щее бы́ти спасе́нїе: зако́нъ да́лъ є҆сѝ въ по́мощь, а҆́гг҃лы поста́вилъ є҆сѝ храни́тели: є҆гда́ же прїи́де и҆сполне́нїе време́нъ, глаго́лалъ є҆сѝ на́мъ самѣ̑мъ сн҃омъ твои́мъ, и҆́мже и҆ вѣ́ки сотвори́лъ є҆сѝ, и҆́же сы́й сїѧ́нїе сла́вы твоеѧ̀ и҆ начерта́нїе ѵ҆поста́си твоеѧ̀, носѧ́ же всѧ̑ глаго́ломъ си́лы своеѧ̀, не хище́нїе непщева̀ є҆́же бы́ти ра́венъ тебѣ̀ бг҃ꙋ и҆ ѻ҆ц҃ꙋ̀: но бг҃ъ сы́й превѣ́чный, на землѝ ꙗ҆ви́сѧ и҆ человѣ́кѡмъ споживѐ: и҆ ѿ дв҃ы ст҃ы́ѧ вопло́щьсѧ, и҆стощѝ себѐ, зра́къ раба̀ прїе́мъ, соѡбра́зенъ бы́въ тѣ́лꙋ смире́нїѧ на́шегѡ, да на́съ соѡбра̑зны сотвори́тъ ѡ҆́бразꙋ сла́вы своеѧ̀: поне́же бо человѣ́комъ грѣ́хъ вни́де въ мі́ръ, и҆ грѣхо́мъ сме́рть, бл҃говолѝ є҆диноро́дный тво́й сн҃ъ, сы́й въ нѣ́дрѣхъ тебє̀ бг҃а и҆ ѻ҆ц҃а̀, бы́въ ѿ жены̀ ст҃ы́ѧ бцⷣы и҆ приснодв҃ы мр҃і́и, бы́въ под̾ зако́номъ, ѡ҆сꙋди́ти грѣ́хъ во пло́ти свое́й, да во а҆да́мѣ ᲂу҆мира́юще, ѡ҆животворѧ́тсѧ въ самѣ́мъ хрⷭ҇тѣ̀ твое́мъ: и҆ пожи́въ въ мі́рѣ се́мъ, да́въ повелѣ̑нїѧ спаси́тєльнаѧ, ѿста́вивъ на́съ пре́лести і҆́дѡльскїѧ, приведѐ въ позна́нїе тебѐ и҆́стиннагѡ бг҃а и҆ ѻ҆ц҃а̀, стѧжа́въ на́съ себѣ̀ лю́ди и҆збра́нны, црⷭ҇кое свѧще́нїе, ꙗ҆зы́къ свѧ́тъ: и҆ ѡ҆чи́стивъ водо́ю, и҆ ѡ҆свѧти́въ дх҃омъ ст҃ы́мъ, дадѐ себѐ и҆змѣ́нꙋ сме́рти, въ не́йже держи́ми бѣ́хомъ, про́дани под̾ грѣхо́мъ: и҆ соше́дъ крⷭ҇то́мъ во а҆́дъ, да и҆спо́лнитъ собо́ю всѧ̑, разрѣшѝ болѣ̑зни сме́ртныѧ: и҆ воскре́съ въ тре́тїй де́нь, и҆ пꙋ́ть сотвори́въ всѧ́кой пло́ти къ воскресе́нїю и҆з̾ ме́ртвыхъ, занѐ не бѧ́ше мо́щно держи́мꙋ бы́ти тлѣ́нїемъ нача́льникꙋ жи́зни, бы́сть нача́токъ ᲂу҆ме́ршихъ, перворожде́нъ и҆з̾ ме́ртвыхъ, да бꙋ́детъ са́мъ всѧ̑, во всѣ́хъ пе́рвенствꙋѧй: и҆ возше́дъ на нб҃са̀, сѣ́де ѡ҆деснꙋ́ю вели́чествїѧ твоегѡ̀ на высо́кихъ, и҆́же и҆ прїи́детъ возда́ти комꙋ́ждо по дѣлѡ́мъ є҆гѡ̀. ѡ҆ста́ви же на́мъ воспомина̑нїѧ спаси́тельнагѡ своегѡ̀ страда́нїѧ сїѧ̑, ꙗ҆̀же предложи́хомъ по є҆гѡ̀ за́повѣдемъ: хотѧ́ бо и҆зы́ти на во́льнꙋю и҆ приснопа́мѧтнꙋю и҆ животворѧ́щꙋю свою̀ сме́рть, въ но́щь, въ ню́же предаѧ́ше себѐ за живо́тъ мі́ра, прїе́мъ хлѣ́бъ на ст҃ы̑ѧ своѧ̑ и҆ пречⷭ҇тыѧ рꙋ́ки, показа́въ тебѣ̀ бг҃ꙋ и҆ ѻ҆ц҃ꙋ̀, бл҃годари́въ, бл҃гослови́въ, ѡ҆свѧти́въ, преломи́въ,
И҆ возгла́снѡ глаго́летъ сїѐ: Дадѐ ст҃ы̑мъ свои̑мъ ᲂу҆ченикѡ́мъ и҆ а҆пⷭ҇лѡмъ, ре́къ: прїими́те, ꙗ҆ди́те, сїѐ є҆́сть тѣ́ло моѐ, є҆́же за вы̀ ломи́мое во ѡ҆ставле́нїе грѣхѡ́въ.
Ли́къ пое́тъ: А҆ми́нь.
Сщ҃е́нникъ вта́й: Подо́бнѣ и҆ ча́шꙋ ѿ плода̀ ло́знагѡ прїе́мъ, раствори́въ, бл҃годари́въ, бл҃гослови́въ, ѡ҆свѧти́въ,
И҆ па́ки возглаша́етъ сїѐ: Дадѐ ст҃ы̑мъ свои̑мъ ᲂу҆ченикѡ́мъ и҆ а҆пⷭ҇лѡмъ, ре́къ: пі́йте ѿ неѧ̀ всѝ, сїѧ̀ є҆́сть кро́вь моѧ̀ но́вагѡ завѣ́та, ꙗ҆́же за вы̀ и҆ за мнѡ́ги и҆злива́емаѧ во ѡ҆ставле́нїе грѣхѡ́въ.
Ли́къ пое́тъ: А҆ми́нь.
Сщ҃е́нникъ приклони́въ главꙋ̀, мо́литсѧ вта́й:
Сїѐ твори́те въ моѐ воспомина́нїе: є҆ли́жды бо а҆́ще ꙗ҆́сте хлѣ́бъ се́й, и҆ ча́шꙋ сїю̀ пїе́те, мою̀ сме́рть возвѣща́ете, моѐ воскрⷭ҇нїе и҆сповѣ́даете. помина́юще ᲂу҆̀бо, влⷣко, и҆ мы̀ спаси́тєльнаѧ є҆гѡ̀ страда̑нїѧ, животворѧ́щїй крⷭ҇тъ, тридне́вное погребе́нїе, є҆́же и҆з̾ ме́ртвыхъ воскрⷭ҇нїе, є҆́же на нб҃са̀ возше́ствїе, є҆́же ѡ҆деснꙋ́ю тебє̀ бг҃а и҆ ѻ҆ц҃а̀ сѣдѣ́нїе, и҆ сла́вное и҆ стра́шное є҆гѡ̀ второ́е прише́ствїе.
Возглаша́етъ сщ҃е́нникъ: Твоѧ̑ ѿ твои́хъ тебѣ̀ приносѧ́ще ѡ҆ всѣ́хъ и҆ за всѧ̑.
Ли́къ: Тебѐ пое́мъ, / тебѐ бл҃гослови́мъ, / тебѣ̀ бл҃годари́мъ, гдⷭ҇и, / и҆ мо́лимъ ти сѧ, бж҃е на́шъ.
Сщ҃е́нникъ приклони́въ главꙋ̀, мо́литсѧ вта́й:
Сегѡ̀ ра́ди, влⷣко прест҃ы́й, и҆ мы̀ грѣ́шнїи и҆ недосто́йнїи рабѝ твоѝ, сподо́бльшїисѧ слꙋжи́ти ст҃о́мꙋ твоемꙋ̀ же́ртвенникꙋ, не ра́ди пра́вдъ на́шихъ, не бо̀ сотвори́хомъ что̀ бла́го на землѝ, но ра́ди млⷭ҇ти твоеѧ̀ и҆ щедро́тъ твои́хъ, ꙗ҆̀же и҆злїѧ́лъ є҆сѝ бога́тнѡ на ны̀, дерза́юще приближа́емсѧ ст҃о́мꙋ твоемꙋ̀ же́ртвенникꙋ: и҆ предло́жше вмѣстоѡбра̑знаѧ ст҃а́гѡ тѣ́ла и҆ кро́ве хрⷭ҇та̀ твоегѡ̀, тебѣ̀ мо́лимсѧ, и҆ тебѐ призыва́емъ, ст҃е ст҃ы́хъ, бл҃говоле́нїемъ твоеѧ̀ бл҃гости прїитѝ дх҃ꙋ твоемꙋ̀ ст҃о́мꙋ на ны̀ и҆ на предлежа́щыѧ да́ры сїѧ̑, и҆ благослови́ти ѧ҆̀, и҆ ѡ҆свѧти́ти, и҆ показа́ти.
Дїа́конъ прихо́дитъ бли́зъ сщ҃е́нника, и҆ покланѧ́ютсѧ ѻ҆́ба три́жды пред̾ ст҃о́ю трапе́зою, и҆ молѧ́щесѧ въ себѣ̀: Бж҃е, ѡ҆чи́сти мѧ̀ грѣ́шнаго, и҆ поми́лꙋй мѧ̀.
Сщ҃е́нникъ: Гдⷭ҇и, и҆́же прест҃а́го твоего̀ дх҃а въ тре́тїй ча́съ а҆пⷭ҇лѡмъ твои̑мъ низпосла́вый, тогѡ̀, благі́й, не ѿимѝ ѿ на́съ, но ѡ҆бновѝ на́съ молѧ́щихъ ти сѧ.
Дїа́конъ сті́хъ: Се́рдце чи́сто сози́жди во мнѣ̀, бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й.
Па́ки сщ҃е́нникъ: Гдⷭ҇и, и҆́же прест҃а́го твоего̀ дх҃а:
Дїа́конъ сті́хъ: Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀.
И҆ па́ки сщ҃е́нникъ: Гдⷭ҇и, и҆́же прест҃а́го твоего̀ дх҃а:
Та́же дїа́конъ, показꙋ́ѧ ѡ҆раре́мъ ст҃ы́й хлѣ́бъ, глаго́летъ ти́химъ гла́сомъ: Бл҃гословѝ, влⷣко, ст҃ы́й хлѣ́бъ.
Сщ҃е́нникъ же, зна́менꙋѧ ст҃ы́й хлѣ́бъ, глаго́летъ: Хлѣ́бъ ᲂу҆́бѡ се́й, са́мое чⷭ҇тно́е тѣ́ло гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀.
Дїа́конъ: А҆ми́нь. Бл҃гословѝ, влⷣко, ст҃ꙋ́ю ча́шꙋ.
Сщ҃е́нникъ же благословлѧ́ѧ глаго́летъ: Ча́шꙋ же сїю̀, са́мꙋю чⷭ҇тнꙋ́ю кро́вь гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀.
Дїа́конъ: А҆ми́нь.
Сщ҃е́нникъ: И҆злїѧ́ннꙋю за живо́тъ мі́ра.
Дїа́конъ: А҆ми́нь. Бл҃гословѝ, влⷣко, ѻ҆боѧ̀.
Сщ҃е́нникъ же, бл҃гословлѧ́ѧ ѻ҆боѧ̀ ст҃а̑ѧ, глаго́летъ: Преложи́въ дх҃омъ твои́мъ ст҃ы́мъ.
Дїа́конъ: А҆ми́нь, а҆ми́нь, а҆ми́нь. Помѧни́ мѧ, ст҃ы́й влⷣко, грѣ́шнаго.
Сщ҃е́нникъ же глаго́летъ: Да помѧне́тъ тѧ̀ гдⷭ҇ь бг҃ъ во црⷭ҇твїи свое́мъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
Дїа́конъ: А҆ми́нь.
Сщ҃е́нникъ же мо́литсѧ:
На́съ же всѣ́хъ, ѿ є҆ди́нагѡ хлѣ́ба и҆ ча́ши причаща́ющихсѧ, соединѝ дрꙋ́гъ ко дрꙋ́гꙋ, во є҆ди́нагѡ дх҃а ст҃а́гѡ прича́стїе: и҆ ни є҆ди́наго на́съ въ сꙋ́дъ и҆лѝ во ѡ҆сꙋжде́нїе сотворѝ причасти́тисѧ ст҃а́гѡ тѣ́ла и҆ кро́ве хрⷭ҇та̀ твоегѡ̀: но да ѡ҆брѧ́щемъ млⷭ҇ть и҆ благода́ть со всѣ́ми ст҃ы́ми ѿ вѣ́ка тебѣ̀ бл҃гоꙋгоди́вшими, пра̑ѻц҃ы, ѻ҆ц҃ы̑, патрїа̑рхи, прⷪ҇рѡ́ки, а҆пⷭ҇лы, проповѣ̑дники, бл҃говѣ̑стники, мч҃нки, и҆сповѣ̑дники, ᲂу҆чи́тельми, и҆ со всѧ́кимъ дх҃омъ првⷣнымъ, въ вѣ́рѣ сконча́вшимсѧ.
И҆ прїе́мъ кади́ло, сщ҃е́нникъ возглаша́етъ: И҆зрѧ́днѡ ѡ҆ прест҃ѣ́й, пречⷭ҇тѣй, пребл҃гослове́ннѣй, сла́внѣй влⷣчцѣ на́шей бцⷣѣ и҆ приснодв҃ѣ мр҃і́и.
И҆ кади́тъ пред̾ ст҃о́ю трапе́зою три́жды.
Ли́къ пое́тъ: Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, / а҆́гг҃льскїй собо́ръ и҆ человѣ́ческїй ро́дъ, / ѡ҆сщ҃е́нный хра́ме и҆ раю̀ слове́сный, / дѣ́вственнаѧ похвало̀, и҆з̾ неѧ́же бг҃ъ воплоти́сѧ и҆ млⷣнецъ бы́сть, / пре́жде вѣ̑къ сы́й бг҃ъ на́шъ: / ложесна́ бо твоѧ̑ прⷭ҇то́лъ сотворѝ, / и҆ чре́во твоѐ простра́ннѣе нб҃съ содѣ́ла: / ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.
А҆́ще же въ вели́кїй четверто́къ, и҆лѝ въ вели́кꙋю сꙋббѡ́тꙋ, тогда̀ пою́тъ і҆рмо́съ ѳ҃-ѧ пѣ́сни, днѐ тогѡ̀.
І҆ере́й же прикло́ньсѧ мо́литсѧ:
Ст҃а́гѡ і҆ѡа́нна прⷪ҇ро́ка, предте́чи и҆ крⷭ҇ти́телѧ, ст҃ы́хъ сла́вныхъ и҆ всехва́льныхъ а҆пⷭ҇тѡлъ, ст҃а́гѡ , є҆гѡ́же и҆ па́мѧть соверша́емъ, и҆ всѣ́хъ ст҃ы́хъ твои́хъ, и҆́хже моли́твами посѣтѝ на́съ, бж҃е.
И҆ помѧнѝ всѣ́хъ пре́жде ᲂу҆со́пшихъ ѡ҆ наде́жди воскресе́нїѧ жи́зни вѣ́чныѧ.
Здѣ̀ сщ҃е́нникъ помина́етъ, и҆̀хже хо́щетъ, живы́хъ и҆ ᲂу҆ме́ршихъ. Ѡ҆ живы́хъ ᲂу҆́бѡ глаго́летъ:
Ѡ҆ спасе́нїи, посѣще́нїи, ѡ҆ставле́нїи грѣхѡ́въ рабѡ́въ бж҃їихъ .
Ѡ҆ ᲂу҆ме́ршихъ же глаго́летъ:
Ѡ҆ поко́и и҆ ѡ҆ставле́нїи грѣхѡ́въ дꙋ́шъ ра̑бъ твои́хъ , на мѣ́стѣ свѣ́тлѣ, ѿѻнꙋ́дꙋже ѿбѣжѐ печа́ль и҆ воздыха́нїе, ᲂу҆поко́й, бж҃е на́шъ.
И҆ поко́й и҆́хъ, и҆дѣ́же присѣща́етъ свѣ́тъ лица̀ твоегѡ̀.
По си́хъ глаго́летъ:
Е҆щѐ мо́лимъ ти сѧ, помѧнѝ, гдⷭ҇и, ст҃ꙋ́ю твою̀ собо́рнꙋю и҆ а҆пⷭ҇льскꙋю цр҃ковь, ю҆́же ѿ конє́цъ да́же до конє́цъ вселе́нныѧ, и҆ ᲂу҆мирѝ ю҆̀, ю҆́же назда́лъ є҆сѝ чⷭ҇тно́ю кро́вїю хрⷭ҇та̀ твоегѡ̀, и҆ ст҃ы́й хра́мъ се́й ᲂу҆твердѝ да́же до сконча́нїѧ вѣ́ка.
Помѧнѝ, гдⷭ҇и, и҆̀же да́ры сїѧ̑ тебѣ̀ прине́сшихъ, и҆ ѡ҆ ни́хже, и҆ и҆́миже, и҆ за ни́хже сїѧ̑ принесо́ша.
Помѧнѝ, гдⷭ҇и, плодоносѧ́щихъ и҆ добротворѧ́щихъ во ст҃ы́хъ твои́хъ цр҃квахъ, и҆ помина́ющихъ ᲂу҆бѡ́гїѧ: возда́ждь и҆̀мъ бога́тыми твои́ми и҆ нбⷭ҇ными дарова́нїи, да́рꙋй и҆̀мъ вмѣ́стѡ земны́хъ нбⷭ҇наѧ, вмѣ́стѡ вре́менныхъ вѣ̑чнаѧ, вмѣ́стѡ тлѣ́нныхъ нетлѣ̑ннаѧ.
Помѧнѝ, гдⷭ҇и, и҆̀же въ пꙋсты́нѧхъ и҆ гора́хъ, и҆ верте́пѣхъ, и҆ про́пастехъ земны́хъ.
Помѧнѝ, гдⷭ҇и и҆̀же въ дѣ́вствѣ и҆ бл҃гоговѣ́нїи, и҆ по́стничествѣ, и҆ въ чи́стѣмъ жи́тельствѣ пребыва́ющихъ.
Помѧнѝ, гдⷭ҇и, бг҃охрани́мꙋю странꙋ̀ на́шꙋ рѡссі́йскꙋю и҆ вѣ̑рныѧ лю́ди є҆ѧ̀, да́рꙋй на́мъ глꙋбо́кїй и҆ неѿе́млемый ми́ръ, возглаго́ли въ се́рдца́хъ всѣ́хъ, и҆́же во вла́сти сꙋ́ть, блага̑ѧ ѡ҆ цр҃кви твоеѧ̀ и҆ всѣ́хъ лю́дехъ твои́хъ, да въ тишинѣ̀ и҆́хъ и҆́хъ ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.
Помѧнѝ, гдⷭ҇и, всѧ́кое нача́ло и҆ вла́сть, и҆ и҆̀же въ пала́тѣ бра́тїю на́шꙋ и҆ всѐ во́инство: бл҃гі̑ѧ во бл҃гости соблюдѝ, лꙋка̑выѧ бла̑ги сотворѝ бла́гостїю твое́ю.
Помѧнѝ, гдⷭ҇и, предстоѧ́щыѧ лю́ди, и҆ ра́ди бл҃госло́вныхъ ви́нъ ѡ҆ста́вльшихсѧ, и҆ поми́лꙋй и҆̀хъ и҆ на́съ, по мно́жествꙋ млⷭ҇ти твоеѧ̀: сокрѡ́вища и҆́хъ и҆спо́лни всѧ́кагѡ бл҃га: сꙋпрꙋ́жєства и҆́хъ въ ми́рѣ и҆ є҆диномы́слїи соблюдѝ: младє́нцы воспита́й, ю҆́ность наста́ви, ста́рость поддержѝ, малодꙋ̑шныѧ ᲂу҆тѣ́ши, расточє́ныѧ соберѝ, прельщє́ныѧ ѡ҆братѝ, и҆ совокꙋпѝ ст҃ѣ́й твое́й собо́рнѣй и҆ а҆пⷭ҇льстѣй цр҃кви: стꙋжа́ємыѧ ѿ дꙋхѡ́въ нечи́стыхъ свободѝ, пла́вающымъ спла́вай, пꙋтеше́ствꙋющымъ сше́ствꙋй, вдови́цамъ предста́ни, си́рыхъ защитѝ, плѣнє́ныѧ и҆зба́ви, недꙋ́гꙋющыѧ и҆сцѣлѝ. На сꙋди́щи, и҆ въ рꙋда́хъ, и҆ въ заточе́нїихъ, и҆ въ го́рькихъ рабо́тахъ, и҆ всѧ́кой ско́рби, и҆ нꙋ́ждѣ, и҆ ѡ҆бстоѧ́нїи сꙋ́щихъ помѧнѝ, бж҃е. и҆ всѣ́хъ тре́бꙋющихъ вели́кагѡ твоегѡ̀ бл҃гоꙋтро́бїѧ, и҆ лю́бѧщихъ на́съ, и҆ ненави́дѧщихъ, и҆ заповѣ́давшихъ на́мъ недѡстѡ́йнымъ моли́тисѧ ѡ҆ ни́хъ, и҆ всѧ̑ лю́ди твоѧ̑ помѧнѝ, гдⷭ҇и бж҃е на́шъ, и҆ на всѧ̑ и҆злі́й бога́тꙋю твою̀ млⷭ҇ть, всѣ̑мъ подаѧ̀ ꙗ҆̀же ко спасе́нїю прошє́нїѧ. и҆ и҆́хже мы̀ не помѧнꙋ́хомъ невѣ́дѣнїемъ, и҆лѝ забве́нїемъ, и҆лѝ мно́жествомъ и҆ме́нъ, са́мъ помѧнѝ, бж҃е, вѣ́дый коегѡ́ждо во́зрастъ и҆ и҆менова́нїе, вѣ́дый коегѡ́ждо ѿ ᲂу҆тро́бы ма́тере є҆гѡ̀: ты́ бо є҆сѝ, гдⷭ҇и, по́мощь безпомѡ́щнымъ, наде́жда безнадє́жнымъ, ѡ҆бꙋрева́ємымъ спаси́тель, пла́вающымъ приста́нище, недꙋ́гꙋющымъ вра́чь: са́мъ всѣ̑мъ всѧ̑ бꙋ́ди, вѣ́дый коего́ждо, и҆ проше́нїе є҆гѡ̀, до́мъ, и҆ потре́бꙋ є҆гѡ̀. И҆зба́ви, гдⷭ҇и, гра́дъ се́й [и҆лѝ ве́сь сїю̀, и҆лѝ ст҃ꙋ́ю ѡ҆би́тель сїю̀], и҆ всѧ́кїй гра́дъ и҆ странꙋ̀ ѿ гла́да, гꙋби́тельства, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нныхъ и҆ междоꙋсо́бныѧ бра́ни.
И҆ возглаша́етъ сщ҃е́нникъ: Въ пе́рвыхъ помѧнѝ, гдⷭ҇и, вели́каго господи́на и҆ ѻ҆тца̀ на́шего , ст҃ѣ́йшаго патрїа́рха моско́вскаго и҆ всеѧ̀ рꙋсѝ, и҆ господи́на на́шего преѡсвѧще́ннаго , митрополі́та [и҆лѝ а҆рхїепⷭ҇кпа, и҆лѝ є҆пⷭ҇кпа є҆гѡ́же є҆́сть ѡ҆бласть], и҆̀хже да́рꙋй ст҃ы̑мъ твои̑мъ цр҃квамъ, въ ми́рѣ цѣ́лыхъ, че́стныхъ, здра́выхъ, долгоде́нствꙋющихъ, пра́вѡ пра́вѧщихъ сло́во твоеѧ̀ и҆́стины.
Ли́къ пое́тъ: И҆ всѣ́хъ и҆ всѧ̑.
Сщ҃е́нникъ мо́литсѧ вта́й:
Помѧнѝ, гдⷭ҇и, всѧ́кое є҆пі́скопство правосла́вныхъ, пра́вѡ пра́вѧщихъ сло́во твоеѧ̀ и҆́стины.
Помѧнѝ, гдⷭ҇и, по мно́жествꙋ щедро́тъ твои́хъ, и҆ моѐ недосто́инство, прости́ ми всѧ́кое согрѣше́нїе, во́льное же и҆ нево́льное: и҆ да не мои́хъ ра́ди грѣхѡ́въ возбрани́ши бл҃года́ти ст҃а́гѡ твоегѡ̀ дх҃а ѿ предлежа́щихъ дарѡ́въ.
Помѧнѝ, гдⷭ҇и, пресвѵ́терство, є҆́же во хрⷭ҇тѣ̀ дїа́конство, и҆ ве́сь сщ҃е́нническїй чи́нъ, и҆ ни є҆ди́наго же на́съ посрами́ши, ѡ҆́крестъ стоѧ́щихъ ст҃а́гѡ твоегѡ̀ же́ртвенника. посѣтѝ на́съ бл҃гостїю твое́ю, гдⷭ҇и, ꙗ҆ви́сѧ на́мъ бога́тыми твои́ми щедро́тами: бл҃горастворе́ны и҆ поле́зны воздꙋ́хи на́мъ да́рꙋй, дожди̑ ми̑рны землѝ къ плодоно́сїю да́рꙋй: бл҃гословѝ вѣне́цъ лѣ́та бл҃гости твоеѧ̀: ᲂу҆толѝ раздо́ры церкве́й, ᲂу҆гасѝ шата̑нїѧ ꙗ҆зы́чєскаѧ, є҆реті́чєскаѧ воста̑нїѧ ско́рѡ разорѝ си́лою ст҃а́гѡ твоегѡ̀ дх҃а: всѣ́хъ на́съ прїимѝ въ црⷭ҇тво твоѐ, сы́ны свѣ́та и҆ сы́ны днѐ показа́вый, тво́й ми́ръ и҆ твою̀ любо́вь да́рꙋй на́мъ, гдⷭ҇и бж҃е на́шъ, всѧ̑ бо возда́лъ є҆сѝ на́мъ.
Возглаша́етъ сщ҃е́нникъ: И҆ да́ждь на́мъ є҆ди́нѣми ᲂу҆сты̀ и҆ є҆ди́нѣмъ се́рдцемъ сла́вити и҆ воспѣва́ти пречⷭ҇тно́е и҆ великолѣ́пое и҆́мѧ твоѐ, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Сщ҃е́нникъ ѡ҆бра́щсѧ ко две́ремъ и҆ благословлѧ́ѧ, глаго́летъ: И҆ да бꙋ́дꙋтъ ми́лѡсти вели́кагѡ бг҃а и҆ сп҃са на́шегѡ і҆и҃са хрⷭ҇та̀ со всѣ́ми ва́ми.
Ли́къ: И҆ со дх҃омъ твои̑мъ.
Е҆ктенїа̀ проси́тєльнаѧ.
Дїа́конъ: Всѧ̑ ст҃ы̑ѧ помѧнꙋ́вше, па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ѡ҆ принесе́нныхъ и҆ ѡ҆свѧще́нныхъ честны́хъ дарѣ́хъ гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Ꙗ҆́кѡ да чл҃вѣколю́бецъ бг҃ъ на́шъ прїе́мъ ѧ҆̀ во ст҃ы́й и҆ пренбⷭ҇ный и҆ мы́сленный сво́й же́ртвенникъ, въ воню̀ бл҃гоꙋха́нїѧ дꙋхо́внагѡ, возниспо́слетъ на́мъ бж҃е́ственнꙋю бл҃года́ть и҆ да́ръ ст҃а́гѡ дх҃а, помо́лимсѧ.
Ли́къ: Гдⷭ҇и, поми́лꙋй.
Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю благода́тїю.
Ли́къ: Гдⷭ҇и, поми́лꙋй.
Днѐ всегѡ̀ соверше́нна, свѧ́та, ми́рна и҆ безгрѣ́шна, ᲂу҆ гдⷭ҇а про́симъ.
Ли́къ: Пода́й гдⷭ҇и.
А҆́гг҃ла ми́рна, вѣ́рна наста́вника, храни́телѧ дꙋ́шъ и҆ тѣле́съ на́шихъ, ᲂу҆ гдⷭ҇а про́симъ.
Ли́къ: Пода́й гдⷭ҇и.
Проще́нїѧ и҆ ѡ҆ставле́нїѧ грѣхѡ́въ и҆ прегрѣше́нїй на́шихъ, ᲂу҆ гдⷭ҇а про́симъ.
Ли́къ: Пода́й гдⷭ҇и.
До́брыхъ и҆ поле́зныхъ дꙋша́мъ на́шымъ и҆ ми́ра мі́рови, ᲂу҆ гдⷭ҇а про́симъ.
Ли́къ: Пода́й гдⷭ҇и.
Про́чее вре́мѧ живота̀ на́шегѡ въ ми́рѣ и҆ покаѧ́нїи сконча́ти, ᲂу҆ гдⷭ҇а про́симъ.
Ли́къ: Пода́й гдⷭ҇и.
Хрⷭ҇тїа́нскїѧ кончи́ны живота̀ на́шегѡ, безболѣ́знены, непосты́дны, ми́рны, и҆ до́брагѡ ѿвѣ́та на стра́шнѣмъ сꙋди́щи хрⷭ҇то́вѣ про́симъ.
Ли́къ: Пода́й гдⷭ҇и.
Соедине́нїе вѣ́ры и҆ прича́стїе ст҃а́гѡ дх҃а и҆спроси́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀, гдⷭ҇и.
Сщ҃е́нникъ мо́литсѧ вта́й:
Бж҃е на́шъ, бж҃е спаса́ти, ты̀ на́съ наꙋчѝ бл҃годари́ти тѧ̀ досто́йнѡ ѡ҆ бл҃годѣѧ́нїихъ твои́хъ, и҆̀хже сотвори́лъ є҆сѝ, и҆ твори́ши съ на́ми. ты̀, бж҃е на́шъ, прїе́мый да́ры сїѧ̑, ѡ҆чи́сти на́съ ѿ всѧ́кїѧ скве́рны пло́ти и҆ дꙋ́ха, и҆ наꙋчѝ соверша́ти ст҃ы́ню въ стра́сѣ твое́мъ, ꙗ҆́кѡ да чи́стымъ свидѣ́тельствомъ со́вѣсти на́шеѧ прїе́млюще ча́сть ст҃ы́нь твои́хъ, соедини́мсѧ ст҃о́мꙋ тѣ́лꙋ и҆ кро́ви хрⷭ҇та̀ твоегѡ̀: и҆ прїе́мше и҆̀хъ досто́йнѣ, и҆́мамы хрⷭ҇та̀ живꙋ́ща въ сердца́хъ на́шихъ, и҆ бꙋ́демъ хра́мъ ст҃а́гѡ твоегѡ̀ дх҃а. є҆́й, бж҃е на́шъ, и҆ да ни є҆ди́наго же на́съ пови́нна сотвори́ши стра̑шнымъ твои̑мъ си̑мъ и҆ небє́снымъ та́йнамъ, нижѐ не́мощна дш҃е́ю и҆ тѣ́ломъ, ѿ є҆́же недосто́йнѣ си́хъ причаща́тисѧ: но да́ждь на́мъ да́же до послѣ́днѧгѡ на́шегѡ и҆здыха́нїѧ, досто́йнѣ прїима́ти ча́сть ст҃ы́нь твои́хъ, въ напꙋ́тїе жи́зни вѣ́чныѧ, во ѿвѣ́тъ бл҃гопрїѧ́тенъ, и҆́же на стра́шнѣмъ сꙋди́щи хрⷭ҇та̀ твоегѡ̀: ꙗ҆́кѡ да и҆ мы̀ со всѣ́ми ст҃ы́ми, ѿ вѣ́ка тебѣ̀ бл҃гоꙋгоди́вшими, бꙋ́демъ прича̑стницы вѣ́чныхъ твои́хъ бл҃гъ, и҆̀хже ᲂу҆гото́валъ є҆сѝ лю́бѧщымъ тѧ̀, гдⷭ҇и.
Сщ҃е́нникъ возглаша́етъ: И҆ сподо́би на́съ, влⷣко, со дерзнове́нїемъ, неѡсꙋжде́ннѡ смѣ́ти призыва́ти тебѐ нбⷭ҇наго бг҃а ѻ҆ц҃а̀, и҆ глаго́лати.
Лю́дїе: Ѻ҆́ч҃е на́шъ, и҆́же є҆сѝ на нб҃сѣ́хъ, да ст҃и́тсѧ и҆́мѧ твоѐ: да прїи́детъ ца́рствїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ, и҆ на землѝ. хлѣ́бъ на́шъ насꙋ́щный да́ждь на́мъ дне́сь: и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Сщ҃е́нникъ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Та́же: Ми́ръ всѣ̑мъ.
Ли́къ: И҆ дх҃ови твоемꙋ̀.
Дїа́конъ: Главы̑ ва́шѧ гдⷭ҇ви приклони́те.
Ли́къ: Тебѣ̀, гдⷭ҇и.
Сщ҃е́нникъ мо́литсѧ:
Влⷣко гдⷭ҇и, ѻ҆́ч҃е щедро́тъ и҆ бж҃е всѧ́кагѡ ᲂу҆тѣше́нїѧ, прикло́ншыѧ тебѣ̀ своѧ̑ главы̑ бл҃гословѝ, ѡ҆свѧтѝ, соблюдѝ, ᲂу҆крѣпѝ, ᲂу҆твердѝ, ѿ всѧ́кагѡ дѣ́ла лꙋка́ва ѿста́ви, всѧ́комꙋ же дѣ́лꙋ бл҃го́мꙋ сочета́й, и҆ сподо́би неѡсꙋжде́ннѡ причасти́тисѧ пречⷭ҇тыхъ си́хъ и҆ животворѧ́щихъ твои́хъ та̑инъ, во ѡ҆ставле́нїе грѣхѡ́въ, въ дх҃а ст҃а́гѡ прича́стїе.
Возглаше́нїе: Бл҃года́тїю и҆ щедро́тами и҆ человѣколю́бїемъ є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ, со прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Сщ҃е́нникъ же мо́литсѧ:
Вонмѝ, гдⷭ҇и і҆и҃се хрⷭ҇тѐ бж҃е на́шъ, ѿ ст҃а́гѡ жили́ща твоегѡ̀, и҆ ѿ престо́ла сла́вы ца́рствїѧ твоегѡ̀, и҆ прїидѝ во є҆́же ѡ҆свѧти́ти на́съ, и҆́же горѣ̀ со ѻ҆ц҃е́мъ сѣдѧ́й, и҆ здѣ̀ на́мъ неви́димѡ спребыва́ѧй: и҆ сподо́би держа́вною твое́ю рꙋко́ю препода́ти на́мъ пречи́стое тѣ́ло твоѐ и҆ честнꙋ́ю кро́вь, и҆ на́ми всѣ̑мъ лю́демъ.
Се́й моли́твѣ глаго́лемѣй, дїа́конъ, стоѧ́й пред̾ ст҃ы́ми две́рьми, ѡ҆поѧсꙋ́етсѧ ѡ҆раре́мъ крⷭ҇тови́днѡ. Та́же покланѧ́етсѧ сщ҃е́нникъ, подо́бнѣ и҆ дїа́конъ, на не́мже стои́тъ мѣ́стѣ, глаго́люще та́йнѡ, три́жды:
Бж҃е, ѡ҆чи́сти мѧ̀ грѣ́шнаго, и҆ поми́лꙋй мѧ̀.
И҆ затворѧ́ютсѧ ст҃ы̑ѧ двє́ри завѣ́сою.
Дїа́конъ возглаша́етъ: Во́нмемъ.
Сщ҃е́нникъ же, возносѧ̀ ст҃ы́й хлѣ́бъ, возглаша́етъ: Ст҃а̑ѧ ст҃ы̑мъ.
Ли́къ: Е҆ди́нъ свѧ́тъ, / є҆ди́нъ гдⷭ҇ь, / і҆и҃съ хрⷭ҇то́съ, / во сла́вꙋ бг҃а ѻ҆ц҃а̀, а҆ми́нь.
И҆ пою́тъ ли́цы кїнѡні́къ днѐ, и҆лѝ ст҃а́гѡ.
Дїа́конъ же глаго́летъ: Раздробѝ, влⷣко, ст҃ы́й хлѣ́бъ.
Сщ҃е́нникъ же раздроблѧ́ѧ и҆̀ на четы́ре ча̑сти, глаго́летъ: Раздроблѧ́етсѧ и҆ раздѣлѧ́етсѧ а҆́гнецъ бж҃їй, раздроблѧ́емый и҆ нераздѣлѧ́емый, всегда̀ ꙗ҆до́мый и҆ никогда́же и҆ждива́емый, но причаща́ющыѧсѧ ѡ҆свѧща́ѧй.
Дїа́конъ глаго́летъ: И҆спо́лни, влⷣко, ст҃ы́й поти́ръ.
Сщ҃е́нникъ же: И҆сполне́нїе дх҃а ст҃а́гѡ.
Дїа́конъ: А҆ми́нь.
И҆ прїе́млѧ теплотꙋ̀, глаго́летъ къ сщ҃е́нникꙋ: Бл҃гословѝ, влⷣко, теплотꙋ̀.
Сщ҃е́нникъ же бл҃гословлѧ́етъ, глаго́лѧ: Бл҃гослове́нна теплота̀ ст҃ы́хъ твои́хъ, всегда̀, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
И҆ дїа́конъ влива́етъ, глаго́лѧ: Теплота̀ вѣ́ры и҆спо́лнь дх҃а ст҃а́гѡ, а҆ми́нь.
Причаще́нїе во ѻ҆лтарѣ̀.
Сщ҃е́нникъ же глаго́летъ: Дїа́коне, пристꙋпѝ.
Дїа́конъ: Сѐ прихождꙋ̀ къ безсме́ртномꙋ цр҃ю̀ и҆ бг҃ꙋ на́шемꙋ.
Сщ҃е́нникъ же, держѧ̀ ст҃ы́й хлѣ́бъ, дае́тъ дїа́конꙋ: и҆ дїа́конъ прїе́млетъ ст҃ы́й хлѣ́бъ, глаго́лѧ: Препода́ждь мѝ, влⷣко, чⷭ҇тно́е и҆ ст҃о́е тѣ́ло гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀.
Сщ҃е́нникъ же глаго́летъ: И҆́мⷬ҇къ, свѧщеннодїа́конꙋ, преподае́тсѧ чⷭ҇тно́е и҆ ст҃о́е и҆ пречⷭ҇тое тѣ́ло гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, во ѡ҆ставле́нїе грѣхѡ́въ є҆гѡ̀, и҆ въ жи́знь вѣ́чнꙋю.
И҆ ѿхо́дитъ, и҆ мо́литсѧ ꙗ҆́кѡ и҆ сщ҃е́нникъ, глаго́лѧ: Вѣ́рꙋю, гдⷭ҇и, и҆ и҆сповѣ́дꙋю:
Подо́бнѣ взе́мъ и҆ сщ҃е́нникъ є҆ди́нꙋ ча́стицꙋ ст҃а́гѡ хлѣ́ба, глаго́летъ:
Сѐ прихождꙋ̀ къ безсме́ртномꙋ цр҃ю̀ и҆ бг҃ꙋ на́шемꙋ.
Честно́е и҆ прест҃о́е тѣ́ло гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀ преподае́тсѧ мнѣ̀, , свѧще́нникꙋ, во ѡ҆ставле́нїе грѣхѡ́въ мои́хъ, и҆ въ жи́знь вѣ́чнꙋю.
И҆ приклони́въ главꙋ̀ мо́литсѧ, глаго́лѧ: Вѣ́рꙋю, гдⷭ҇и, и҆ и҆сповѣ́дꙋю:
И҆ та́кѡ причаща́ютсѧ въ рꙋка́хъ держи́магѡ со стра́хомъ и҆ всѧ́цѣмъ ᲂу҆тверже́нїемъ. Та́же сщ҃е́нникъ глаго́летъ: Сѐ па́ки прихождꙋ̀ къ безсме́ртномꙋ цр҃ю̀ и҆ бг҃ꙋ на́шемꙋ.
Та́же сщ҃е́нникъ воскло́ньсѧ, прїе́млетъ ѻ҆бѣ́ма рꙋка́ма съ покро́вцемъ ст҃ы́й поти́ръ, и҆ причаща́етсѧ три́жды и҆з̾ негѡ̀, глаго́лѧ: Честны́ѧ и҆ ст҃ы́ѧ кро́ве гдⷭ҇а бг҃а и҆ сп҃са на́шегѡ і҆и҃са хрⷭ҇та̀, причаща́юсѧ а҆́зъ, ра́бъ бж҃їй, сщ҃е́нникъ , во ѡ҆ставле́нїе грѣхѡ́въ мои́хъ, и҆ въ жи́знь вѣ́чнꙋю, а҆ми́нь.
И҆ та́кѡ своѝ ᲂу҆стнѣ̀ и҆ кра́й сщ҃е́ннагѡ поти́ра въ рꙋкꙋ̀ держи́мымъ пла́томъ ѡ҆те́ръ, глаго́летъ: Сѐ прикоснꙋ́сѧ ᲂу҆стна́мъ мои̑мъ, и҆ ѿи́метъ беззакѡ́нїѧ моѧ̑, и҆ грѣхѝ моѧ̑ ѡ҆чи́ститъ.
Та́же призыва́етъ дїа́кона, глаго́лѧ: Дїа́коне, пристꙋпѝ.
И҆ дїа́конъ прихо́дитъ и҆ покланѧ́етсѧ є҆ди́ною, глаго́лѧ:
Сѐ па́ки прихождꙋ̀ къ безсме́ртномꙋ цр҃ю̀ и҆ бг҃ꙋ на́шемꙋ. И҆: Препода́ждь мѝ, влⷣко, чⷭ҇тнꙋ́ю и҆ ст҃ꙋ́ю кро́вь гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀.
И҆ сщ҃е́нникъ глаго́летъ: Причаща́етсѧ ра́бъ бж҃їй, дїа́конъ , чⷭ҇тны́ѧ и҆ ст҃ы́ѧ кро́ве гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, во ѡ҆ставле́нїе грѣхѡ́въ свои́хъ и҆ въ жи́знь вѣ́чнꙋю.
Причасти́вшꙋсѧ же дїа́конꙋ, гл҃етъ сщ҃е́нникъ: Сѐ прикоснꙋ́сѧ ᲂу҆стна́мъ твои̑мъ, и҆ ѿи́метъ беззакѡ́нїѧ твоѧ̑, и҆ грѣхѝ твоѧ̑ ѡ҆чи́ститъ.
[зрѝ] Подоба́етъ вѣ́дати, ꙗ҆́кѡ, а҆́ще сꙋ́ть хотѧ́щїи причаща́тисѧ ст҃ы́хъ та̑инъ, раздроблѧ́етъ сщ҃е́нникъ. двѣ̀ ча̑сти ст҃а́гѡ а҆́гнца ѡ҆ста́вшыѧ, є҆́же НІ, и҆ є҆́же КА, на ма̑лыѧ ча̑стицы, ꙗ҆́кѡ бы́ти всѣ̑мъ прича́стникѡмъ дово́льно: и҆ та́кѡ влага́етъ и҆̀хъ во ст҃ꙋ́ю ча́шꙋ.
И҆ покрыва́етъ сщ҃е́нникъ ст҃ы́й поти́ръ покро́вцемъ, подо́бнѣ и҆ на ст҃ы́й ді́скосъ возлага́етъ ѕвѣзди́цꙋ и҆ покрѡ́вцы. Та́же глаго́летъ мл҃твꙋ благода́рственнꙋю:
Бл҃годари́мъ тѧ̀, влⷣко чл҃вѣколю́бче:
Причаще́нїе во хра́мѣ.
И҆ та́кѡ ѿверза́ютъ двє́ри ст҃а́гѡ ѻ҆лтарѧ̀, и҆ дїа́конъ поклони́всѧ є҆ди́ною, прїе́млетъ поти́ръ со благоговѣ́нїемъ, и҆ прихо́дитъ во двє́ри, и҆ возносѧ̀ ст҃ы́й поти́ръ, показꙋ́етъ и҆̀ лю́демъ, глаго́лѧ:
Со стра́хомъ бж҃їимъ и҆ вѣ́рою пристꙋпи́те.
Ли́къ: Бл҃гослове́нъ грѧды́й во и҆́мѧ гдⷭ҇не, / бг҃ъ гдⷭ҇ь, и҆ ꙗ҆ви́сѧ на́мъ.
Сщ҃е́нникъ же мо́литсѧ:
Вѣ́рꙋю, гдⷭ҇и, и҆ и҆сповѣ́дꙋю, ꙗ҆́кѡ ты̀ є҆сѝ вои́стиннꙋ хрⷭ҇то́съ, сн҃ъ бг҃а жива́гѡ, прише́дый въ мі́ръ грѣ̑шныѧ спастѝ, ѿ ни́хже пе́рвый є҆́смь а҆́зъ. є҆щѐ вѣ́рꙋю, ꙗ҆́кѡ сїѐ са́мое є҆́сть пречи́стое тѣ́ло твоѐ, и҆ сїѧ̀ са́маѧ є҆́сть честна́ѧ кро́вь твоѧ̀. молю́сѧ ᲂу҆̀бо тебѣ̀: поми́лꙋй мѧ̀, и҆ прости́ ми прегрѣшє́нїѧ моѧ̑ вѡ́льнаѧ и҆ невѡ́льнаѧ, ꙗ҆̀же сло́вомъ, ꙗ҆̀же дѣ́ломъ, ꙗ҆̀же вѣ́дѣнїемъ и҆ невѣ́дѣнїемъ: и҆ сподо́би мѧ̀ неѡсꙋжде́ннѡ причасти́тисѧ пречи́стыхъ твои́хъ та́инствъ, во ѡ҆ставле́нїе грѣхѡ́въ и҆ въ жи́знь вѣ́чнꙋю, а҆ми́нь.
Та́же: Ве́чери твоеѧ̀ та́йныѧ дне́сь, сн҃е бж҃їй, прича́стника мѧ̀ прїимѝ: не бо̀ врагѡ́мъ твои̑мъ та́йнꙋ повѣ́мъ, ни лобза́нїѧ тѝ да́мъ ꙗ҆́кѡ і҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ, гдⷭ҇и, во црⷭ҇твїи твое́мъ.
Да не въ сꙋ́дъ и҆лѝ во ѡ҆сꙋжде́нїе бꙋ́детъ мнѣ̀ причаще́нїе ст҃ы́хъ твои́хъ та̑инъ, гдⷭ҇и, но во и҆сцѣле́нїе дꙋшѝ и҆ тѣ́ла.
Та́же пристꙋпа́ютъ хотѧ́щїи причаща́тисѧ. И҆ и҆́дꙋтъ є҆ди́нъ по є҆ди́номꙋ, и҆ покланѧ́ютсѧ со всѧ́цѣмъ ᲂу҆миле́нїемъ и҆ стра́хомъ, согбе́ннѣ рꙋ́цѣ къ пе́рсемъ и҆мꙋ́ще: та́же прїе́млетъ кі́йждо бж҃е́ствєнныѧ та̑йны.
Сщ҃е́нникъ же, причаща́ѧ є҆го̀, глаго́летъ: Причаща́етсѧ ра́бъ бж҃їй, , чⷭ҇тна́гѡ и҆ ст҃а́гѡ тѣ́ла и҆ кро́ве гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, во ѡ҆ставле́нїе грѣхѡ́въ свои́хъ и҆ въ жи́знь вѣ́чнꙋю.
И҆ дїа́конъ ѡ҆тира́етъ є҆мꙋ̀ ᲂу҆стнѣ̀ пла́томъ: и҆ цѣлꙋ́етъ причасти́выйсѧ ст҃ꙋ́ю ча́шꙋ, и҆ поклони́всѧ ѿхо́дитъ. И҆ та́кѡ причаща́ютсѧ всѝ.
Ли́къ же пое́тъ по ѻ҆бы́чаю: Тѣ́ло хрⷭ҇то́во прїими́те, / и҆сто́чника безсме́ртнагѡ вкꙋси́те. А҆ллилꙋ́їа, три́жды.
По причаще́нїи.
По причаще́нїи же, вхо́дитъ і҆ере́й во свѧты́й олта́рь, и҆ поставлѧ́етъ ст҃а́ѧ на ст҃ѣ́мъ престо́лѣ.
Тогда̀ прїе́мъ дїа́конъ ст҃ы́й ді́скосъ верхꙋ̀ ст҃а́гѡ поти́ра, и҆ глаго́лѧ воскрє́сныѧ пѣ̑сни сїѧ̑: Воскресе́нїе хрⷭ҇то́во ви́дѣвше: и҆ Свѣти́сѧ, свѣти́сѧ, но́вый і҆ерꙋсали́ме: и҆ Ѽ па́сха ве́лїѧ, и҆ свѧще́ннѣйшаѧ:
Ѡ҆тира́етъ ст҃о́ю гꙋ́бою ѕѣлѡ̀ до́брѣ, глаго́лѧ словеса̀ сїѧ̑: Ѿмы́й, гдⷭ҇и, грѣхѝ помина́вшихсѧ здѣ̀ кро́вїю твое́ю честно́ю, мл҃твами ст҃ы́хъ твои́хъ.
Сщ҃е́нникъ же благословлѧ́етъ лю́ди, возглаша́ѧ: Спасѝ, бж҃е, лю́ди твоѧ̑, и҆ благословѝ достоѧ́нїе твоѐ.
И҆ ѡ҆браща́етсѧ сщ҃е́нникъ ко ст҃ѣ́й трапе́зѣ, и҆ кади́тъ три́жды, глаго́лѧ въ себѣ̀: Вознеси́сѧ на нб҃са̀, бж҃е, и҆ по все́й землѝ сла́ва твоѧ̀.
Ли́къ же пое́тъ: Ви́дѣхомъ свѣ́тъ и҆́стинный, / прїѧ́хомъ дх҃а нбⷭ҇наго, / ѡ҆брѣто́хомъ вѣ́рꙋ и҆́стиннꙋю, / нераздѣ́льнѣй трⷪ҇цѣ покланѧ́емсѧ: / та́ бо на́съ спасла̀ є҆́сть.
Сщ҃е́нникъ же, зрѧ̀ на лю́ди, глаго́летъ та́йнѡ: Благослове́нъ бг҃ъ на́шъ:
И҆ возгла́снѡ: Всегда̀, ны́нѣ и҆ при́снѡ и҆ во вѣ́ки вѣкѡ́въ.
И҆ ѿхо́дитъ ко ст҃о́мꙋ предложе́нїю, и҆ поставлѧ́етъ та́мѡ ст҃а́ѧ.
Ли́къ: А҆ми́нь.
Да и҆спо́лнѧтсѧ ᲂу҆ста̀ на̑ша / хвале́нїѧ твоегѡ̀, гдⷭ҇и, / ꙗ҆́кѡ да пое́мъ сла́вꙋ твою̀, / ꙗ҆́кѡ сподо́билъ є҆сѝ на́съ причасти́тисѧ / ст҃ы̑мъ твои̑мъ, бж҃е́ствєннымъ, безсмє́ртнымъ и҆ животворѧ́щымъ та́йнамъ: / соблюдѝ на́съ во твое́й ст҃ы́ни, / ве́сь де́нь поꙋча́тисѧ пра́вдѣ твое́й. / а҆ллилꙋ́їа, а҆ллилꙋ́їа, а҆ллилꙋ́їа.
И҆ и҆зше́дъ дїа́конъ сѣ́верною две́рїю, и҆ ста́въ на ѡ҆бы́чнѣмъ мѣ́стѣ, глаго́летъ:
Про́сти прїи́мше бж҃е́ственныхъ, ст҃ы́хъ, пречⷭ҇тыхъ, безсме́ртныхъ, небе́сныхъ и҆ животворѧ́щихъ, стра́шныхъ хрⷭ҇то́выхъ та̑инъ, досто́йнѡ благодари́мъ гдⷭ҇а.
Ли́къ: Гдⷭ҇и, поми́лꙋй.
Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.
Ли́къ: Гдⷭ҇и, поми́лꙋй.
Де́нь ве́сь соверше́нъ, свѧ́тъ, ми́ренъ и҆ безгрѣ́шенъ и҆спроси́вше, са́ми себѐ и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀, гдⷭ҇и.
Та́же, причаще́нїю соверши́вшꙋсѧ, сщ҃е́нникъ мо́литсѧ:
Бл҃годари́мъ тѧ̀, гдⷭ҇и бж҃е на́шъ, ѡ҆ причаще́нїи ст҃ы́хъ пречⷭ҇тыхъ, безсме́ртныхъ и҆ нбⷭ҇ныхъ твои́хъ та̑инъ, и҆̀хже да́лъ є҆сѝ на́мъ во бл҃годѣѧ́нїе и҆ ѡ҆свѧще́нїе и҆ и҆сцѣле́нїе дꙋ́шъ и҆ тѣле́съ на́шихъ. са́мъ, влⷣко всѣ́хъ, да́ждь бы́ти на́мъ прича́стїю ст҃а́гѡ тѣ́ла и҆ кро́ве хрⷭ҇та̀ твоегѡ̀ въ вѣ́рꙋ непосты́днꙋ, въ любо́вь нелицемѣ́рнꙋ, въ преꙋмноже́нїе премꙋ́дрости, во и҆сцѣле́нїе дꙋшѝ и҆ тѣ́ла, во ѿгна́нїе всѧ́кагѡ сопроти́внагѡ, въ снабдѣ́нїе за́повѣдей твои́хъ, во ѿвѣ́тъ бл҃гопрїѧ́тенъ, и҆́же на стра́шнѣмъ сꙋди́щи хрⷭ҇та̀ твоегѡ̀.
І҆ере́й же, согнꙋ́въ а҆нтїми́нсъ и҆ прѧ́мѡ держѧ̀ є҆ѵⷢ҇лїе, твори́тъ над̾ ни́мъ крⷭ҇тъ.
Возглаша́етъ: Ꙗ҆́кѡ ты̀ є҆сѝ ѡ҆свѧще́нїе на́ше, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
І҆ере́й: Съ ми́ромъ и҆зы́демъ.
Ли́къ: Ѡ҆ и҆́мени гдⷭ҇ни.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и, поми́лꙋй.
Мл҃тва заамвѡ́ннаѧ возгла́снѡ:
І҆ере́й: Бл҃гословлѧ́ѧй бл҃гословѧ́щыѧ тѧ̀, гдⷭ҇и, и҆ ѡ҆свѧща́ѧй на тѧ̀ ᲂу҆пова́ющыѧ, спасѝ лю́ди твоѧ̑ и҆ благословѝ достоѧ́нїе твоѐ, и҆сполне́нїе цр҃кве твоеѧ̀ сохранѝ, ѡ҆свѧтѝ лю́бѧщыѧ благолѣ́пїе до́мꙋ твоегѡ̀: ты̀ тѣ́хъ возпросла́ви бж҃е́ственною твое́ю си́лою, и҆ не ѡ҆ста́ви на́съ, ᲂу҆пова́ющихъ на тѧ̀. ми́ръ мі́рови твоемꙋ̀ да́рꙋй, це́рквамъ твои̑мъ, свѧще́нникѡмъ, во́инствꙋ и҆ всѣ̑мъ лю́демъ твои̑мъ. ꙗ҆́кѡ всѧ́кое даѧ́нїе бла́го, и҆ всѧ́къ да́ръ соверше́нъ свы́ше є҆́сть, сходѧ́й ѿ тебѐ ѻ҆ц҃а̀ свѣ́тѡвъ: и҆ тебѣ̀ сла́вꙋ, и҆ бл҃годаре́нїе, и҆ поклоне́нїе возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Сщ҃е́нникъ ᲂу҆́бѡ вхо́дитъ ст҃ы́ми две́рьми, и҆ ѿше́дъ въ предложе́нїе, глаго́летъ настоѧ́щꙋю мл҃твꙋ:
Мл҃тва, внегда̀ потреби́ти ст҃а̑ѧ:
И҆спо́лнисѧ и҆ соверши́сѧ є҆ли́кѡ по на́шей си́лѣ, хрⷭ҇тѐ бж҃е на́шъ, твоегѡ̀ смотре́нїѧ та́инство: и҆мѣ́емъ бо сме́рти твоеѧ̀ па́мѧть, ви́дѣхомъ воскресе́нїѧ твоегѡ̀ ѡ҆́бразъ, напо́лнихомсѧ безконе́чныѧ твоеѧ̀ жи́зни, наслади́хомсѧ неистоща́емыѧ твоеѧ̀ пи́щи, є҆ѧ́же и҆ въ бꙋ́дꙋщемъ вѣ́цѣ всѣ̑мъ на́мъ сподо́битисѧ бл҃говолѝ, бл҃года́тїю безнача́льнагѡ твоегѡ̀ ѻ҆ц҃а̀, и҆ ст҃а́гѡ и҆ бл҃га́гѡ и҆ животворѧ́щагѡ твоегѡ̀ дх҃а, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Ли́къ: А҆ми́нь. Та́же: Бꙋ́ди и҆́мѧ гдⷭ҇не бл҃гослове́нно ѿ ны́нѣ и҆ до вѣ́ка. Три́жды.
И҆ ѱало́мъ л҃г:
Бл҃гословлю̀ гдⷭ҇а на всѧ́кое вре́мѧ, / вы́нꙋ хвала̀ є҆гѡ̀ во ᲂу҆стѣ́хъ мои́хъ. / ѡ҆ гдⷭ҇ѣ похва́литсѧ дꙋша̀ моѧ̀, / да ᲂу҆слы́шатъ кро́тцыи, и҆ возвеселѧ́тсѧ. / возвели́чите гдⷭ҇а со мно́ю, / и҆ вознесе́мъ и҆́мѧ є҆гѡ̀ вкꙋ́пѣ. / взыска́хъ гдⷭ҇а, и҆ ᲂу҆слы́ша мѧ̀, / и҆ ѿ всѣ́хъ скорбе́й мои́хъ и҆зба́ви мѧ̀. / пристꙋпи́те къ немꙋ̀, и҆ просвѣти́тесѧ, / и҆ ли́ца ва̑ша не постыдѧ́тсѧ. / се́й ни́щїй воззва̀, и҆ гдⷭ҇ь ᲂу҆слы́ша и҆̀, / и҆ ѿ всѣ́хъ скорбе́й є҆гѡ̀ сп҃сѐ и҆̀. / ѡ҆полчи́тсѧ а҆́гг҃лъ гдⷭ҇нь ѡ҆́крестъ боѧ́щихсѧ є҆гѡ̀, / и҆ и҆зба́витъ и҆̀хъ. / вкꙋси́те и҆ ви́дите, ꙗ҆́кѡ бл҃гъ гдⷭ҇ь: / бл҃же́нъ мꙋ́жъ, и҆́же ᲂу҆пова́етъ на́нь. / бо́йтесѧ гдⷭ҇а всѝ ст҃і́и є҆гѡ̀, / ꙗ҆́кѡ нѣ́сть лише́нїѧ боѧ́щымсѧ є҆гѡ̀. / бога́тїи ѡ҆бнища́ша и҆ взалка́ша, / взыска́ющїи же гдⷭ҇а не лиша́тсѧ всѧ́кагѡ бл҃га. / прїиди́те ча̑да, послꙋ́шайте менє̀, / стра́хꙋ гдⷭ҇ню наꙋчꙋ̀ ва́съ. / кто́ є҆сть человѣ́къ, хотѧ́й живо́тъ, / любѧ́й дни̑ ви́дѣти бл҃ги; / ᲂу҆держѝ ѧ҆зы́къ тво́й ѿ ѕла̀, / и҆ ᲂу҆стнѣ̀ твоѝ є҆́же не глаго́лати льстѝ. / ᲂу҆клони́сѧ ѿ ѕла̀, и҆ сотворѝ бла́го: / взыщѝ ми́ра и҆ поженѝ и҆̀. / ѻ҆́чи гдⷭ҇ни на пра́вєдныѧ, / и҆ ᲂу҆́ши є҆гѡ̀ въ мл҃твꙋ и҆́хъ: / лице́ же гдⷭ҇не на творѧ́щыѧ ѕла̑ѧ, / є҆́же потреби́ти ѿ землѝ па́мѧть и҆́хъ. / воззва́ша пра́веднїи, и҆ гдⷭ҇ь ᲂу҆слы́ша и҆́хъ, / и҆ ѿ всѣ́хъ скорбе́й и҆́хъ и҆зба́ви и҆̀хъ. / бли́зъ гдⷭ҇ь сокрꙋше́нныхъ се́рдцемъ, / и҆ смирє́нныѧ дꙋ́хомъ сп҃се́тъ. / мнѡ́ги скѡ́рби пра́вєднымъ, / и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. / храни́тъ гдⷭ҇ь всѧ̑ кѡ́сти и҆́хъ, / ни є҆ди́на ѿ ни́хъ сокрꙋши́тсѧ. / сме́рть грѣ́шникѡвъ люта̀, / и҆ ненави́дѧщїи пра́веднаго прегрѣша́тъ. / и҆зба́витъ гдⷭ҇ь дꙋ́шы ра̑бъ свои́хъ, / и҆ не прегрѣша́тъ всѝ ᲂу҆пова́ющїи на него̀.
Сщ҃е́нникъ же, и҆зше́дъ, дае́тъ лю́демъ а҆нті́дѡръ. По сконча́нїи же ѱалма̀ и҆ раздаѧ́нїи а҆нті́дѡра, глаго́летъ: Благослове́нїе гдⷭ҇не на ва́съ, тогѡ̀ бл҃года́тїю и҆ чл҃вѣколю́бїемъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.
Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Благословѝ.
Сщ҃е́нникъ твори́тъ ѿпꙋ́стъ:
Въ недѣ́лю: Воскресы́й и҆з̾ ме́ртвыхъ, хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лѡвъ, и҆ ст҃а́гѡ [ , є҆гѡ́же є҆́сть хра́мъ, и҆ є҆гѡ́же є҆́сть де́нь], и҆́же во ст҃ы́хъ ѻ҆ц҃а̀ на́шегѡ васі́лїа вели́кагѡ, а҆рхїепⷭ҇кпа кесарі́и каппадокі́йскїѧ, ст҃ы́хъ и҆ пра́ведныхъ бг҃оѻц҃ъ і҆ѡакі́ма и҆ а҆́нны, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бла́гъ и҆ чл҃вѣколю́бецъ.
Многолѣ́тїе.
Ли́къ: Вели́каго господи́на и҆ ѻ҆тца̀ на́шего , / ст҃ѣ́йшаго патрїа́рха моско́вскаго и҆ всеѧ̀ рꙋсѝ, / и҆ господи́на на́шего преѡсвѧще́нѣйшего , / митрополі́та [и҆лѝ а҆рхїепⷭ҇кпа, и҆лѝ є҆пⷭ҇кпа є҆гѡ́же є҆́сть ѡ҆бласть] , / бг҃охрани́мꙋю странꙋ̀ на́шꙋ рѡссі́йскꙋю, / настоѧ́телѧ, бра́тїю и҆ прихо́жанъ ст҃а́гѡ храма сегѡ̀, / и҆ всѧ̑ правосла́вныѧ хрⷭ҇тїа́ны, / гдⷭ҇и, сохранѝ и҆̀хъ на мно́гаѧ лѣ̑та.
Та́же глаго́лемъ бл҃года́рственныѧ мл҃твы.
Коне́цъ бж҃е́ственныѧ лїтꙋргі́и вели́кагѡ васі́лїа.