Послѣ́дованїе ме́ртвенное мїрски́хъ тѣ́лъ

Сконча́вшꙋсѧ комꙋ̀ ѿ правосла́вныхъ, а҆́бїе призыва́ютъ срѡ́дницы є҆гѡ̀ сщ҃е́нника, и҆́же прише́дъ въ до́мъ, въ не́мже мо́щи ᲂу҆со́пшагѡ лежа́тъ, и҆ возложи́въ є҆пїтрахи́ль, и҆ вложи́въ ѳѷмїа́мъ въ кади́льницꙋ, кади́тъ тѣ́ло ме́ртвагѡ, и҆ предстоѧ́щихъ, и҆ начина́етъ ѻ҆бы́чнѡ:

Бл҃гослове́нъ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

И҆ начина́ютъ сопредстоѧ́щїи: Ст҃ы́й бж҃е: Прест҃а́ѧ трⷪ҇це: Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво:

И҆ а҆́бїе пою́тъ тропарѝ сїѧ̑. Гла́съ д҃:

Со дꙋ́хи првⷣныхъ сконча́вшихсѧ, / дꙋ́шꙋ раба̀ твоегѡ̀ сп҃се ᲂу҆поко́й, / сохранѧ́ѧ ю҆̀ во бл҃же́нной жи́зни, / ꙗ҆́же ᲂу҆ тебѐ чл҃вѣколю́бче.

Въ поко́ищи твое́мъ гдⷭ҇и, / и҆дѣ́же всѝ ст҃і́и твоѝ ᲂу҆покоева́ютсѧ, / ᲂу҆поко́й и҆ дꙋ́шꙋ раба̀ твоегѡ̀, / ꙗ҆́кѡ є҆ди́нъ є҆сѝ чл҃вѣколю́бецъ.

Сла́ва: Ты̀ є҆сѝ бг҃ъ соше́дый во а҆́дъ, и҆ ᲂу҆́зы ѡ҆кова́нныхъ разрѣши́вый, / са́мъ и҆ дꙋ́шꙋ раба̀ твоегѡ̀ ᲂу҆поко́й.

И҆ ны́нѣ: Е҆ди́на чⷭ҇таѧ и҆ непоро́чнаѧ дв҃о, бг҃а без̾ сѣ́мене ро́ждшаѧ, / молѝ сп҃сти́сѧ дꙋшѝ є҆гѡ̀.

Дїа́конъ глаго́летъ:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ ᲂу҆покое́нїи дꙋшѝ ᲂу҆со́пшагѡ раба̀ бж҃їѧ , и҆ ѡ҆ є҆́же прости́тисѧ є҆мꙋ̀ [є҆́й] всѧ́комꙋ прегрѣше́нїю, во́льномꙋ же и҆ нево́льномꙋ.

Ли́къ: Гдⷭ҇и поми́лꙋй, три́жды.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же првⷣнїи ᲂу҆покоѧ́ютсѧ.

Ли́къ: Гдⷭ҇и поми́лꙋй, три́жды.

Млⷭ҇ти бж҃їѧ, црⷭ҇тва нбⷭ҇нагѡ и҆ ѡ҆ставле́нїѧ грѣхѡ́въ є҆гѡ̀, ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ про́симъ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

Бж҃е дꙋхѡ́въ, и҆ всѧ́кїѧ пло́ти, сме́рть попра́вый и҆ дїа́вола ᲂу҆праздни́вый, и҆ живо́тъ мі́рꙋ твоемꙋ̀ дарова́вый: са́мъ гдⷭ҇и, ᲂу҆поко́й дꙋ́шꙋ ᲂу҆со́пшагѡ раба̀ твоегѡ̀ , въ мѣ́стѣ свѣ́тлѣ, въ мѣ́стѣ ѕла́чнѣ, въ мѣ́стѣ поко́йнѣ: ѿню́дꙋже ѿбѣжѐ болѣ́знь, печа́ль и҆ воздыха́нїе. всѧ́кое согрѣше́нїе, содѣ́ѧнное и҆́мъ сло́вомъ, и҆лѝ дѣ́ломъ, и҆лѝ помышле́нїемъ, ꙗ҆́кѡ бл҃гі́й чл҃вѣколю́бецъ бг҃ъ простѝ, ꙗ҆́кѡ нѣ́сть человѣ́къ, и҆́же жи́въ бꙋ́детъ, и҆ не согрѣши́тъ: ты́ бо є҆ди́нъ кромѣ̀ грѣха̀, пра́вда твоѧ̀ пра́вда во вѣ́ки, и҆ сло́во твоѐ и҆́стина.

Возгла́съ: Ꙗ҆́кѡ ты̀ є҆сѝ воскрⷭ҇нїе и҆ живо́тъ, и҆ поко́й ᲂу҆со́пшагѡ раба̀ твоегѡ̀ , хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Дїа́конъ: Премꙋ́дрость.

Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

І҆ере́й: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

И҆ а҆́бїе быва́етъ ѿ сщ҃е́нника сицевы́й ѿпꙋ́стъ:

Живы́ми и҆ ме́ртвыми ѡ҆блада́ѧй хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ свои́хъ, дꙋ́шꙋ ѿ на́съ преста́вльшагѡсѧ раба̀ своегѡ̀ , въ селе́нїихъ ст҃ы́хъ всели́тъ, и҆ съ првⷣными причте́тъ, и҆ на́съ поми́лꙋетъ, ꙗ҆́кѡ бл҃гъ и҆ чл҃вѣколю́бецъ.

И҆ а҆́ще ᲂу҆́бѡ готѡ́ва сꙋ́ть всѧ̑, ꙗ҆̀же ко и҆схо́дꙋ, твори́тъ па́ки сщ҃е́нникъ нача́ло: Бл҃гослове́нъ бг҃ъ на́шъ.

И҆ начина́емъ пѣ́ти: Ст҃ы́й бж҃е: состра́хомъ, и҆ всѧ́кимъ ᲂу҆миле́нїемъ. И҆ взе́мше мо́щи ᲂу҆со́пшагѡ, ѿхо́димъ въ хра́мъ, пред̾идꙋ́щымъ сщ҃е́нникѡмъ со свѣща́ми, дїа́конꙋ съ кади́льницею. Е҆гда́ же прїи́дꙋтъ въ хра́мъ, мо́щи ᲂу҆́бѡ полага́ютсѧ въ па́перти, [и҆лѝ въ хра́мѣ, ꙗ҆́коже здѣ̀ въ вели́цѣй рѡссі́и ѡ҆бы́че.]

И҆ начина́ютъ:

Ѱало́мъ ч҃:

Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ, рече́тъ гдⷭ҇еви: застꙋ́пникъ мо́й є҆сѝ и҆ прибѣ́жище моѐ, бг҃ъ мо́й, и҆ ᲂу҆пова́ю на него̀. Ꙗ҆́кѡ то́й и҆зба́витъ тѧ̀ ѿ сѣ́ти ло́вчи и҆ ѿ словесѐ мѧте́жна: плещма̀ свои́ма ѡ҆сѣни́тъ тѧ̀, и҆ под̾ крилѣ̑ є҆гѡ̀ надѣ́ешисѧ: ѻ҆рꙋ́жїемъ ѡ҆бы́детъ тѧ̀ и҆́стина є҆гѡ̀. Не ᲂу҆бои́шисѧ ѿ стра́ха нощна́гѡ, ѿ стрѣлы̀ летѧ́щїѧ во днѝ, ѿ ве́щи во тьмѣ̀ преходѧ́щїѧ, ѿ срѧ́ща и҆ бѣ́са полꙋ́деннагѡ. Паде́тъ ѿ страны̀ твоеѧ̀ ты́сѧща, и҆ тьма̀ ѡ҆деснꙋ́ю тебє̀, къ тебѣ́ же не прибли́житсѧ: ѻ҆ба́че ѻ҆чи́ма твои́ма смо́триши и҆ воздаѧ́нїе грѣ́шникѡвъ ᲂу҆́зриши. Ꙗ҆́кѡ ты̀, гдⷭ҇и, ᲂу҆пова́нїе моѐ: вы́шнѧго положи́лъ є҆сѝ прибѣ́жище твоѐ. Не прїи́детъ къ тебѣ̀ ѕло̀, и҆ ра́на не прибли́житсѧ тѣлесѝ твоемꙋ̀: ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пꙋте́хъ твои́хъ. На рꙋка́хъ во́змꙋтъ тѧ̀, да не когда̀ преткне́ши ѡ҆ ка́мень но́гꙋ твою̀: на а҆́спїда и҆ васїлі́ска настꙋ́пиши, и҆ попере́ши льва̀ и҆ ѕмі́ѧ. Ꙗ҆́кѡ на мѧ̀ ᲂу҆пова̀, и҆ и҆зба́влю и҆̀: покры́ю и҆̀, ꙗ҆́кѡ позна̀ и҆́мѧ моѐ. Воззове́тъ ко мнѣ̀, и҆ ᲂу҆слы́шꙋ є҆го̀: съ ни́мъ є҆́смь въ ско́рби, и҆змꙋ̀ є҆го̀ и҆ просла́влю є҆го̀: долгото́ю дні́й и҆спо́лню є҆го̀ и҆ ꙗ҆влю̀ є҆мꙋ̀ спⷭ҇нїе моѐ.

И҆ посе́мъ вы́шшимъ гла́сомъ пою́тъ:

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

Непоро́чнїи въ пꙋ́ть: А҆ллилꙋ́їа.

И҆ пое́тсѧ пе́рваѧ статїѧ̀ непоро́чныхъ, во гла́съ ѕ҃: въ концы́ же коегѡ́ждо стїха̀ пое́мъ: А҆ллилꙋ́їа.

а҃. Бл҃же́ни непоро́чнїи въ пꙋ́ть, ходѧ́щїи въ зако́нѣ гдⷭ҇ни. А҆ллилꙋ́їа.

в҃. Бл҃же́ни и҆спыта́ющїи свидѣ̑нїѧ є҆гѡ̀, всѣ́мъ се́рдцемъ взы́щꙋтъ є҆го̀. А҆ллилꙋ́їа.

И҆ про́чее ѱалма̀.

г҃. Не дѣ́лающїи бо беззако́нїѧ въ пꙋте́хъ є҆гѡ̀ ходи́ша. А҆ллилꙋ́їа.

д҃. Ты̀ заповѣ́далъ є҆сѝ за́пѡвѣди твоѧ̑ сохрани́ти ѕѣлѡ̀: А҆ллилꙋ́їа.

є҃. Дабы̀ и҆спра́вилисѧ пꙋтїѐ моѝ, сохрани́ти ѡ҆правда̑нїѧ твоѧ̑. А҆ллилꙋ́їа.

ѕ҃. Тогда̀ не постыжꙋ́сѧ, внегда̀ призрѣ́ти мѝ на всѧ̑ за́пѡвѣди твоѧ̑. А҆ллилꙋ́їа.

з҃. И҆сповѣ́мсѧ тебѣ̀ въ пра́вости се́рдца, внегда̀ наꙋчи́ти ми сѧ сꙋдьба́мъ пра́вды твоеѧ̀. А҆ллилꙋ́їа.

и҃. Ѡ҆правда̑нїѧ твоѧ̑ сохраню̀: не ѡ҆ста́ви менѐ до ѕѣла̀. А҆ллилꙋ́їа.

ѳ҃. Въ чесо́мъ и҆спра́витъ ю҆нѣ́йшїй пꙋ́ть сво́й; внегда̀ сохрани́ти словеса̀ твоѧ̑. А҆ллилꙋ́їа.

і҃. Всѣ́мъ се́рдцемъ мои́мъ взыска́хъ тебѐ: не ѿри́ни менѐ ѿ за́повѣдїй твои́хъ. А҆ллилꙋ́їа.

а҃і. Въ се́рдцы мое́мъ скры́хъ словеса̀ твоѧ̑, ꙗ҆́кѡ да не согрѣшꙋ̀ тебѣ̀. А҆ллилꙋ́їа.

в҃і. Бл҃гослове́нъ є҆сѝ, гдⷭ҇и: наꙋчи́ мѧ ѡ҆правда́нїємъ твои̑мъ. А҆ллилꙋ́їа.

г҃і. Оу҆стна́ма мои́ма возвѣсти́хъ всѧ̑ сꙋдьбы̑ ᲂу҆́стъ твои́хъ. А҆ллилꙋ́їа.

д҃і. На пꙋтѝ свидѣ́нїй твои́хъ наслади́хсѧ, ꙗ҆́кѡ ѡ҆ всѧ́комъ бога́тствѣ. А҆ллилꙋ́їа.

є҃і. Въ за́повѣдехъ твои́хъ поглꙋмлю́сѧ, и҆ ᲂу҆разꙋмѣ́ю пꙋти̑ твоѧ̑. А҆ллилꙋ́їа.

ѕ҃і. Во ѡ҆правда́нїихъ твои́хъ поꙋчꙋ́сѧ: не забꙋ́дꙋ слове́съ твои́хъ. А҆ллилꙋ́їа.

з҃і. Возда́ждь рабꙋ̀ твоемꙋ̀: живи́ мѧ, и҆ сохраню̀ словеса̀ твоѧ̑. А҆ллилꙋ́їа.

и҃і. Ѿкры́й ѻ҆́чи моѝ, и҆ ᲂу҆разꙋмѣ́ю чꙋдеса̀ ѿ зако́на твоегѡ̀. А҆ллилꙋ́їа.

ѳ҃і. Пришле́цъ а҆́зъ є҆́смь на землѝ: не скры́й ѿ менѐ за́пѡвѣди твоѧ̑. А҆ллилꙋ́їа.

к҃. Возлюбѝ дꙋша̀ моѧ̀ возжела́ти сꙋдьбы̑ твоѧ̑ на всѧ́кое вре́мѧ. А҆ллилꙋ́їа.

к҃а. Запрети́лъ є҆сѝ гѡ́рдымъ: про́клѧти ᲂу҆клонѧ́ющїисѧ ѿ за́повѣдїй твои́хъ. А҆ллилꙋ́їа.

к҃в. Ѿимѝ ѿ менѐ поно́съ поноше́нїе и҆ ᲂу҆ничиже́нїе, ꙗ҆́кѡ свидѣ́нїй твои́хъ взыска́хъ. А҆ллилꙋ́їа.

к҃г. И҆́бо сѣдо́ша кнѧ̑зи и҆ на мѧ̀ клевета́хꙋ, ра́бъ же тво́й глꙋмлѧ́шесѧ во ѡ҆правда́нїихъ твои́хъ: А҆ллилꙋ́їа.

к҃д. И҆́бо свидѣ̑нїѧ твоѧ̑ поꙋче́нїе моѐ є҆́сть, и҆ совѣ́ти моѝ ѡ҆правда̑нїѧ твоѧ̑. А҆ллилꙋ́їа.

к҃є. Прильпѐ землѝ дꙋша̀ моѧ̀: живи́ мѧ по словесѝ твоемꙋ̀. А҆ллилꙋ́їа.

к҃ѕ. Пꙋти̑ моѧ̑ возвѣсти́хъ, и҆ ᲂу҆слы́шалъ мѧ̀ є҆сѝ: наꙋчи́ мѧ ѡ҆правда́нїємъ твои̑мъ. А҆ллилꙋ́їа.

к҃з. Пꙋ́ть ѡ҆правда́нїй твои́хъ вразꙋми́ ми, и҆ поглꙋмлю́сѧ въ чꙋдесѣ́хъ твои́хъ. А҆ллилꙋ́їа.

к҃и. Воздрема̀ дꙋша̀ моѧ̀ ѿ ᲂу҆ны́нїѧ: ᲂу҆тверди́ мѧ въ словесѣ́хъ твои́хъ. А҆ллилꙋ́їа.

к҃ѳ. Пꙋ́ть непра́вды ѿста́ви ѿ менѐ и҆ зако́номъ твои́мъ поми́лꙋй мѧ̀. А҆ллилꙋ́їа.

л҃. Пꙋ́ть и҆́стины и҆зво́лихъ и҆ сꙋдьбы̑ твоѧ̑ не забы́хъ. А҆ллилꙋ́їа.

л҃а. Прилѣпи́хсѧ свидѣ́нїємъ твои̑мъ, гдⷭ҇и, не посрамѝ менѐ. А҆ллилꙋ́їа.

л҃в. Пꙋ́ть за́повѣдїй твои́хъ теко́хъ, є҆гда̀ разшири́лъ є҆сѝ се́рдце моѐ. А҆ллилꙋ́їа.

л҃г. Законоположѝ мнѣ̀, гдⷭ҇и, пꙋ́ть ѡ҆правда́нїй твои́хъ, и҆ взыщꙋ̀ и҆̀ вы́нꙋ: А҆ллилꙋ́їа.

л҃д. Вразꙋми́ мѧ, и҆ и҆спыта́ю зако́нъ тво́й и҆ сохраню̀ и҆̀ всѣ́мъ се́рдцемъ мои́мъ. А҆ллилꙋ́їа.

л҃є. Наста́ви мѧ̀ на стезю̀ за́повѣдїй твои́хъ, ꙗ҆́кѡ тꙋ́ю восхотѣ́хъ. А҆ллилꙋ́їа.

л҃ѕ. Приклонѝ се́рдце моѐ во свидѣ̑нїѧ твоѧ̑, а҆ не въ лихои́мство. А҆ллилꙋ́їа.

л҃з. Ѿвратѝ ѻ҆́чи моѝ є҆́же не ви́дѣти сꙋеты̀: въ пꙋтѝ твое́мъ живи́ мѧ. А҆ллилꙋ́їа.

л҃и. Поста́ви рабꙋ̀ твоемꙋ̀ сло́во твоѐ въ стра́хъ тво́й. А҆ллилꙋ́їа.

л҃ѳ. Ѿимѝ поноше́нїе моѐ, є҆́же непщева́хъ: ꙗ҆́кѡ сꙋдьбы̑ твоѧ̑ бл҃ги. А҆ллилꙋ́їа.

м҃. Сѐ, возжела́хъ за́пѡвѣди твоѧ̑: въ пра́вдѣ твое́й живи́ мѧ. А҆ллилꙋ́їа.

м҃а. И҆ да прїи́детъ на мѧ̀ млⷭ҇ть твоѧ̀, гдⷭ҇и, сп҃се́нїе твоѐ по словесѝ твоемꙋ̀: А҆ллилꙋ́їа.

м҃в. И҆ ѿвѣща́ю поноша́ющымъ мѝ сло́во, ꙗ҆́кѡ ᲂу҆пова́хъ на словеса̀ твоѧ̑. А҆ллилꙋ́їа.

м҃г. И҆ не ѿимѝ ѿ ᲂу҆́стъ мои́хъ словесѐ и҆́стинна до ѕѣла̀, ꙗ҆́кѡ на сꙋдьбы̑ твоѧ̑ ᲂу҆пова́хъ: А҆ллилꙋ́їа.

м҃д. И҆ сохраню̀ зако́нъ тво́й вы́нꙋ, въ вѣ́къ и҆ въ вѣ́къ вѣ́ка. А҆ллилꙋ́їа.

м҃є. И҆ хожда́хъ въ широтѣ̀, ꙗ҆́кѡ за́пѡвѣди твоѧ̑ взыска́хъ: А҆ллилꙋ́їа.

м҃ѕ. И҆ глаго́лахъ ѡ҆ свидѣ́нїихъ твои́хъ пред̾ царѝ и҆ не стыдѧ́хсѧ: А҆ллилꙋ́їа.

м҃з. И҆ поꙋча́хсѧ въ за́повѣдехъ твои́хъ, ꙗ҆̀же возлюби́хъ ѕѣлѡ̀: А҆ллилꙋ́їа.

м҃и. И҆ воздвиго́хъ рꙋ́цѣ моѝ къ за́повѣдемъ твои̑мъ, ꙗ҆̀же возлюби́хъ, и҆ глꙋмлѧ́хсѧ во ѡ҆правда́нїихъ твои́хъ. А҆ллилꙋ́їа.

м҃ѳ. Помѧнѝ словеса̀ твоѧ̑ рабꙋ̀ твоемꙋ̀, и҆́хже ᲂу҆пова́нїе да́лъ мѝ є҆сѝ. А҆ллилꙋ́їа.

н҃. То́ мѧ ᲂу҆тѣ́ши во смире́нїи мое́мъ, ꙗ҆́кѡ сло́во твоѐ живи́ мѧ. А҆ллилꙋ́їа.

н҃а. Го́рдїи законопрестꙋпова́хꙋ до ѕѣла̀: ѿ зако́на же твоегѡ̀ не ᲂу҆клони́хсѧ. А҆ллилꙋ́їа.

н҃в. Помѧнꙋ́хъ сꙋдьбы̑ твоѧ̑ ѿ вѣ́ка, гдⷭ҇и, и҆ ᲂу҆тѣ́шихсѧ. А҆ллилꙋ́їа.

н҃г. Печа́ль прїѧ́тъ мѧ̀ ѿ грѣ̑шникъ, ѡ҆ставлѧ́ющихъ зако́нъ тво́й. А҆ллилꙋ́їа.

н҃д. Пѣ̑та бѧ́хꙋ мнѣ̀ ѡ҆правда̑нїѧ твоѧ̑ на мѣ́стѣ прише́льствїѧ моегѡ̀. А҆ллилꙋ́їа.

н҃є. Помѧнꙋ́хъ въ нощѝ и҆́мѧ твоѐ, гдⷭ҇и, и҆ сохрани́хъ зако́нъ тво́й. А҆ллилꙋ́їа.

н҃ѕ. Се́й бы́сть мнѣ̀, ꙗ҆́кѡ ѡ҆правда́нїй твои́хъ взыска́хъ. А҆ллилꙋ́їа.

н҃з. Ча́сть моѧ̀ є҆сѝ, гдⷭ҇и: рѣ́хъ сохрани́ти зако́нъ тво́й. А҆ллилꙋ́їа.

н҃и. Помоли́хсѧ лицꙋ̀ твоемꙋ̀ всѣ́мъ се́рдцемъ мои́мъ: поми́лꙋй мѧ̀ по словесѝ твоемꙋ̀. А҆ллилꙋ́їа.

н҃ѳ. Помы́слихъ пꙋти̑ твоѧ̑ и҆ возврати́хъ но́зѣ моѝ во свидѣ̑нїѧ твоѧ̑. А҆ллилꙋ́їа.

ѯ҃. Оу҆гото́вихсѧ и҆ не смꙋти́хсѧ сохрани́ти за́пѡвѣди твоѧ̑. А҆ллилꙋ́їа.

ѯ҃а. Оу҆́жѧ грѣ̑шникъ ѡ҆бѧза́шасѧ мнѣ̀, и҆ зако́на твоегѡ̀ не забы́хъ. А҆ллилꙋ́їа.

ѯ҃в. Полꙋ́нощи воста́хъ и҆сповѣ́датисѧ тебѣ̀ ѡ҆ сꙋдьба́хъ пра́вды твоеѧ̀. А҆ллилꙋ́їа.

ѯ҃г. Прича́стникъ а҆́зъ є҆́смь всѣ̑мъ боѧ́щымсѧ тебє̀ и҆ хранѧ́щымъ за́пѡвѣди твоѧ̑. А҆ллилꙋ́їа.

ѯ҃д. Млⷭ҇ти твоеѧ̀, гдⷭ҇и, и҆спо́лнь землѧ̀: ѡ҆правда́нїємъ твои̑мъ наꙋчи́ мѧ. А҆ллилꙋ́їа.

ѯ҃є. Бл҃гость сотвори́лъ є҆сѝ съ рабо́мъ твои́мъ, гдⷭ҇и, по словесѝ твоемꙋ̀: А҆ллилꙋ́їа.

ѯ҃ѕ. Бл҃гости и҆ наказа́нїю и҆ ра́зꙋмꙋ наꙋчи́ мѧ, ꙗ҆́кѡ за́повѣдемъ твои̑мъ вѣ́ровахъ. А҆ллилꙋ́їа.

ѯ҃з. Пре́жде да́же не смири́ти ми сѧ, а҆́зъ прегрѣши́хъ: сегѡ̀ ра́ди сло́во твоѐ сохрани́хъ. А҆ллилꙋ́їа.

ѯ҃и. Бл҃гъ є҆сѝ ты̀, гдⷭ҇и: и҆ бл҃гостїю твое́ю наꙋчи́ мѧ ѡ҆правда́нїємъ твои̑мъ. А҆ллилꙋ́їа.

ѯ҃ѳ. Оу҆мно́жисѧ на мѧ̀ непра́вда го́рдыхъ: а҆́зъ же всѣ́мъ се́рдцемъ мои́мъ и҆спыта́ю за́пѡвѣди твоѧ̑. А҆ллилꙋ́їа.

ѻ҃. Оу҆сыри́сѧ ꙗ҆́кѡ млеко̀ се́рдце и҆́хъ: а҆́зъ же зако́нꙋ твоемꙋ̀ поꙋчи́хсѧ. А҆ллилꙋ́їа.

ѻ҃а. Бл҃го мнѣ̀, ꙗ҆́кѡ смири́лъ мѧ̀ є҆сѝ, ꙗ҆́кѡ да наꙋчꙋ́сѧ ѡ҆правда́нїємъ твои̑мъ. А҆ллилꙋ́їа.

ѻ҃в. Бл҃гъ мнѣ̀ зако́нъ ᲂу҆́стъ твои́хъ па́че ты́сѧщъ зла́та и҆ сребра̀. А҆ллилꙋ́їа.

Сла́ва: А҆ллилꙋ́їа. И҆ ны́нѣ: А҆ллилꙋ́їа.

По пе́рвой статїѝ, дїа́конъ:

Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же пра́веднїи ᲂу҆покоѧ́ютсѧ.

Ли́къ: Гдⷭ҇и поми́лꙋй.

Млⷭ҇ти бж҃їѧ, црⷭ҇тва нбⷭ҇нагѡ, и҆ ѡ҆ставле́нїѧ грѣхѡ́въ є҆гѡ̀, ᲂу҆ хрⷭ҇та̀ безсме́тнагѡ цр҃ѧ̀ и҆ бг҃а на́шегѡ про́симъ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

И҆ посе́мъ начина́емъ вторꙋ́ю статїю̀ на гла́съ є҃: на ко́емждо же концѣ̀ стїха̀ глаго́лемъ: Поми́лꙋй раба̀ твоего̀.

Ли́къ начина́етъ: За́пѡвѣди твоѧ̑: Поми́лꙋй раба̀ твоего̀:

Па́ки то́йже ли́къ:

ѻ҃г. Рꙋцѣ̀ твоѝ сотвори́стѣ мѧ̀: и҆ созда́стѣ мѧ̀, вразꙋми́ мѧ, и҆ наꙋчꙋ́сѧ за́повѣдемъ твои̑мъ. Поми́лꙋй раба̀ твоегѡ̀.

ѻ҃д. Боѧ́щїисѧ тебѐ ᲂу҆́зрѧтъ мѧ̀: и҆ возвеселѧ́тсѧ, ꙗ҆́кѡ на словеса̀ твоѧ̑ ᲂу҆пова́хъ. Поми́лꙋй раба̀ твоего̀.

И҆ про́чее ѱалма̀.

ѻ҃є. Разꙋмѣ́хъ, гдⷭ҇и, ꙗ҆́кѡ пра́вда сꙋдьбы̑ твоѧ̑, и҆ вои́стиннꙋ смири́лъ мѧ̀ є҆сѝ. Поми́лꙋй раба̀ твоего̀.

ѻ҃ѕ. Бꙋ́ди же млⷭ҇ть твоѧ̀, да ᲂу҆тѣ́шитъ мѧ̀, по словесѝ твоемꙋ̀ рабꙋ̀ твоемꙋ̀: Поми́лꙋй раба̀ твоего̀.

ѻ҃з. Да прїи́дꙋтъ мнѣ̀ щедрѡ́ты твоѧ̑, и҆ жи́въ бꙋ́дꙋ, ꙗ҆́кѡ зако́нъ тво́й поꙋче́нїе моѐ є҆́сть. Поми́лꙋй раба̀ твоего̀.

ѻ҃и. Да постыдѧ́тсѧ го́рдїи, ꙗ҆́кѡ непра́веднѡ беззако́нноваша на мѧ̀: а҆́зъ же поглꙋмлю́сѧ въ за́повѣдехъ твои́хъ. Поми́лꙋй раба̀ твоего̀.

ѻ҃ѳ. Да ѡ҆братѧ́тъ мѧ̀ боѧ́щїисѧ тебє̀ и҆ вѣ́дѧщїи свидѣ̑нїѧ твоѧ̑. Поми́лꙋй раба̀ твоего̀.

п҃. Бꙋ́ди се́рдце моѐ непоро́чно во ѡ҆правда́нїихъ твои́хъ, ꙗ҆́кѡ да не постыжꙋ́сѧ. Поми́лꙋй раба̀ твоего̀.

п҃а. И҆счеза́етъ во сп҃се́нїе твоѐ дꙋша̀ моѧ̀, на словеса̀ твоѧ̑ ᲂу҆пова́хъ: Поми́лꙋй раба̀ твоего̀.

п҃в. И҆счезо́ша ѻ҆́чи моѝ въ сло́во твоѐ, глаго́люще: когда̀ ᲂу҆тѣ́шиши мѧ̀; Поми́лꙋй раба̀ твоего̀.

п҃г. Занѐ бы́хъ ꙗ҆́кѡ мѣ́хъ на сла́нѣ: ѡ҆правда́нїй твои́хъ не забы́хъ. Поми́лꙋй раба̀ твоего̀.

п҃д. Коли́кѡ є҆́сть дні́й раба̀ твоегѡ̀; когда̀ сотвори́ши мѝ ѿ гонѧ́щихъ мѧ̀ сꙋ́дъ; Поми́лꙋй раба̀ твоего̀.

п҃є. Повѣ́даша мнѣ̀ законопрестꙋ̑пницы глꙋмлє́нїѧ, но не ꙗ҆́кѡ зако́нъ тво́й, гдⷭ҇и. Поми́лꙋй раба̀ твоего̀.

п҃ѕ. Всѧ̑ за́пѡвѣди твоѧ̑ и҆́стина: непра́веднѡ погна́ша мѧ̀, помози́ ми. Поми́лꙋй раба̀ твоего̀.

п҃з. Вма́лѣ не сконча́ша менѐ на землѝ: а҆́зъ же не ѡ҆ста́вихъ за́повѣдїй твои́хъ. Поми́лꙋй раба̀ твоего̀.

п҃и. По млⷭ҇ти твое́й живи́ мѧ, и҆ сохраню̀ свидѣ̑нїѧ ᲂу҆́стъ твои́хъ. Поми́лꙋй раба̀ твоего̀.

п҃ѳ. Во вѣ́къ, гдⷭ҇и, сло́во твоѐ пребыва́етъ на нб҃сѝ. Поми́лꙋй раба̀ твоего̀.

ч҃. Въ ро́дъ и҆ ро́дъ и҆́стина твоѧ̀: ѡ҆снова́лъ є҆сѝ зе́млю, и҆ пребыва́етъ. Поми́лꙋй раба̀ твоего̀.

ч҃а. Оу҆чине́нїемъ твои́мъ пребыва́етъ де́нь: ꙗ҆́кѡ всѧ́чєскаѧ рабѡ́тна тебѣ̀. Поми́лꙋй раба̀ твоего̀.

ч҃в. Ꙗ҆́кѡ а҆́ще бы не зако́нъ тво́й поꙋче́нїе моѐ бы́лъ, тогда̀ ᲂу҆́бѡ поги́блъ бы́хъ во смире́нїи мое́мъ: Поми́лꙋй раба̀ твоего̀.

ч҃г. Во вѣ́къ не забꙋ́дꙋ ѡ҆правда́нїй твои́хъ, ꙗ҆́кѡ въ ни́хъ ѡ҆живи́лъ мѧ̀ є҆сѝ. Поми́лꙋй раба̀ твоего̀.

ч҃д. Тво́й є҆́смь а҆́зъ, сп҃си́ мѧ: ꙗ҆́кѡ ѡ҆правда́нїй твои́хъ взыска́хъ. Поми́лꙋй раба̀ твоего̀.

ч҃є. Менѐ жда́ша грѣ̑шницы погꙋби́ти мѧ̀: свидѣ̑нїѧ твоѧ̑ разꙋмѣ́хъ. Поми́лꙋй раба̀ твоего̀.

ч҃ѕ. Всѧ́кїѧ кончи́ны ви́дѣхъ коне́цъ: широка̀ за́повѣдь твоѧ̀ ѕѣлѡ̀. Поми́лꙋй раба̀ твоего̀.

ч҃з. Ко́ль возлюби́хъ зако́нъ тво́й, гдⷭ҇и: ве́сь де́нь поꙋче́нїе моѐ є҆́сть. Поми́лꙋй раба̀ твоего̀.

ч҃и. Па́че вра̑гъ мои́хъ ᲂу҆мꙋдри́лъ мѧ̀ є҆сѝ за́повѣдїю твое́ю, ꙗ҆́кѡ въ вѣ́къ моѧ̀ є҆́сть. Поми́лꙋй раба̀ твоего̀.

ч҃ѳ. Па́че всѣ́хъ ᲂу҆ча́щихъ мѧ̀ разꙋмѣ́хъ, ꙗ҆́кѡ свидѣ̑нїѧ твоѧ̑ поꙋче́нїе моѐ є҆́сть. Поми́лꙋй раба̀ твоего̀.

р҃. Па́че ста́рєцъ разꙋмѣ́хъ, ꙗ҆́кѡ за́пѡвѣди твоѧ̑ взыска́хъ. Поми́лꙋй раба̀ твоего̀.

р҃а. Ѿ всѧ́кагѡ пꙋтѝ лꙋка́ва возбрани́хъ нога́мъ мои̑мъ, ꙗ҆́кѡ да сохраню̀ словеса̀ твоѧ̑: Поми́лꙋй раба̀ твоего̀.

р҃в. Ѿ сꙋде́бъ твои́хъ не ᲂу҆клони́хсѧ, ꙗ҆́кѡ ты̀ законоположи́лъ мѝ є҆сѝ. Поми́лꙋй раба̀ твоего̀.

р҃г. Ко́ль сладка̑ горта́ни моемꙋ̀ словеса̀ твоѧ̑: па́че ме́да ᲂу҆стѡ́мъ мои̑мъ. Поми́лꙋй раба̀ твоего̀.

р҃д. Ѿ за́повѣдїй твои́хъ разꙋмѣ́хъ: сегѡ̀ ра́ди возненави́дѣхъ всѧ́къ пꙋ́ть непра́вды. Поми́лꙋй раба̀ твоего̀.

р҃є. Свѣти́льникъ нога́ма мои́ма зако́нъ тво́й, и҆ свѣ́тъ стезѧ́мъ мои̑мъ. Поми́лꙋй раба̀ твоего̀.

р҃ѕ. Клѧ́хсѧ и҆ поста́вихъ сохрани́ти сꙋдьбы̑ пра́вды твоеѧ̀. Поми́лꙋй раба̀ твоего̀.

р҃з. Смири́хсѧ до ѕѣла̀: гдⷭ҇и, живи́ мѧ по словесѝ твоемꙋ̀. Поми́лꙋй раба̀ твоего̀.

р҃и. Вѡ́льнаѧ ᲂу҆́стъ мои́хъ бл҃говоли́ же, гдⷭ҇и, и҆ сꙋдьба́мъ твои̑мъ наꙋчи́ мѧ. Поми́лꙋй раба̀ твоего̀.

р҃ѳ. Дꙋша̀ моѧ̀ въ рꙋкꙋ̀ твоє́ю вы́нꙋ, и҆ зако́на твоегѡ̀ не забы́хъ. Поми́лꙋй раба̀ твоего̀.

р҃і. Положи́ша грѣ̑шницы сѣ́ть мнѣ̀: и҆ ѿ за́повѣдїй твои́хъ не заблꙋди́хъ. Поми́лꙋй раба̀ твоего̀.

ра҃і. Наслѣ́довахъ свидѣ̑нїѧ твоѧ̑ во вѣ́къ, ꙗ҆́кѡ ра́дованїе се́рдца моегѡ̀ сꙋ́ть: Поми́лꙋй раба̀ твоего̀.

рв҃і. Приклони́хъ се́рдце моѐ сотвори́ти ѡ҆правда̑нїѧ твоѧ̑ въ вѣ́къ за воздаѧ́нїе. Поми́лꙋй раба̀ твоего̀.

рг҃і. Законопрестꙋ̑пныѧ возненави́дѣхъ, зако́нъ же тво́й возлюби́хъ. Поми́лꙋй раба̀ твоего̀.

рд҃і. Помо́щникъ мо́й и҆ застꙋ́пникъ мо́й є҆сѝ ты̀: на словеса̀ твоѧ̑ ᲂу҆пова́хъ. Поми́лꙋй раба̀ твоего̀.

рє҃і. Оу҆клони́тесѧ ѿ менѐ, лꙋка́внꙋющїи, и҆ и҆спыта́ю за́пѡвѣди бг҃а моегѡ̀. Поми́лꙋй раба̀ твоего̀.

рѕ҃і. Застꙋпи́ мѧ по словесѝ твоемꙋ̀, и҆ жи́въ бꙋ́дꙋ: и҆ не посрамѝ менѐ ѿ ча́ѧнїѧ моегѡ̀: Поми́лꙋй раба̀ твоего̀.

рз҃і. Помози́ ми, и҆ сп҃сꙋ́сѧ, и҆ поꙋчꙋ́сѧ во ѡ҆правда́нїихъ твои́хъ вы́нꙋ. Поми́лꙋй раба̀ твоего̀.

ри҃і. Оу҆ничижи́лъ є҆сѝ всѧ̑ ѿстꙋпа́ющыѧ ѿ ѡ҆правда́нїй твои́хъ: ꙗ҆́кѡ непра́ведно помышле́нїе и҆́хъ. Поми́лꙋй раба̀ твоего̀.

рѳ҃і. Престꙋпа́ющыѧ непщева́хъ всѧ̑ грѣ̑шныѧ землѝ: сегѡ̀ ра́ди возлюби́хъ свидѣ̑нїѧ твоѧ̑. Поми́лꙋй раба̀ твоего̀.

р҃к. Пригвоздѝ стра́хꙋ твоемꙋ̀ плѡ́ти моѧ̑: ѿ сꙋде́бъ бо твои́хъ ᲂу҆боѧ́хсѧ. Поми́лꙋй раба̀ твоего̀.

рк҃а. Сотвори́хъ сꙋ́дъ и҆ пра́вдꙋ: не преда́ждь менѐ ѡ҆би́дѧщымъ мѧ̀. Поми́лꙋй раба̀ твоего̀.

рк҃в. Воспрїимѝ раба̀ твоего̀ во бл҃го, да не ѡ҆клевета́ютъ менѐ го́рдїи. Поми́лꙋй раба̀ твоего̀.

рк҃г. Ѻ҆́чи моѝ и҆счезо́стѣ во сп҃се́нїе твоѐ и҆ въ сло́во пра́вды твоеѧ̀: Поми́лꙋй раба̀ твоего̀.

рк҃д. Сотворѝ съ рабо́мъ твои́мъ по млⷭ҇ти твое́й, и҆ ѡ҆правда́нїємъ твои̑мъ наꙋчи́ мѧ. Поми́лꙋй раба̀ твоего̀.

рк҃є. Ра́бъ тво́й є҆́смь а҆́зъ: вразꙋми́ мѧ, и҆ ᲂу҆вѣ́мъ свидѣ̑нїѧ твоѧ̑. Поми́лꙋй раба̀ твоего̀.

рк҃ѕ. Вре́мѧ сотвори́ти гдⷭ҇еви: разори́ша зако́нъ тво́й. Поми́лꙋй раба̀ твоего̀.

рк҃з. Сегѡ̀ ра́ди возлюби́хъ за́пѡвѣди твоѧ̑ па́че зла́та и҆ топа́зїа. Поми́лꙋй раба̀ твоего̀.

рк҃и. Сегѡ̀ ра́ди ко всѣ̑мъ за́повѣдемъ твои̑мъ направлѧ́хсѧ, всѧ́къ пꙋ́ть непра́вды возненави́дѣхъ. Поми́лꙋй раба̀ твоего̀.

рк҃ѳ. Ди̑вна свидѣ̑нїѧ твоѧ̑: сегѡ̀ ра́ди и҆спыта̀ ѧ҆̀ дꙋша̀ моѧ̀. Поми́лꙋй раба̀ твоего̀.

р҃л. Ꙗ҆вле́нїе слове́съ твои́хъ просвѣща́етъ и҆ вразꙋмлѧ́етъ младе́нцы. Поми́лꙋй раба̀ твоего̀.

рл҃а. Оу҆ста̀ моѧ̑ ѿверзо́хъ и҆ привлеко́хъ дꙋ́хъ, ꙗ҆́кѡ за́повѣдїй твои́хъ жела́хъ. Поми́лꙋй раба̀ твоего̀.

Сла́ва: Поми́лꙋй раба̀ твоего̀.

И҆ ны́нѣ: Поми́лꙋй раба̀ твоего̀.

По в҃-й статїѝ, дїа́конъ:

Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же пра́веднїи ᲂу҆покоѧ́ютсѧ.

Ли́къ: Гдⷭ҇и поми́лꙋй.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

И҆ па́ки начина́емъ тре́тїю статїю̀ на гла́съ тре́тїй:

И҆́мѧ твоѐ: А҆ллилꙋ́їа.

Па́ки то́йже ли́къ пое́тъ:

рл҃в. При́зри на мѧ̀, и҆ поми́лꙋй мѧ̀, по сꙋдꙋ̀ лю́бѧщихъ и҆́мѧ твоѐ. А҆ллилꙋ́їа.

рл҃г. Стѡпы̀ моѧ̑ напра́ви по словесѝ твоемꙋ̀, и҆ да не ѡ҆блада́етъ мно́ю всѧ́кое беззако́нїе: А҆ллилꙋ́їа.

И҆ про́чее.

рл҃д. И҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ̑. А҆ллилꙋ́їа.

рл҃є. Лицѐ твоѐ просвѣтѝ на раба̀ твоего̀ и҆ наꙋчи́ мѧ ѡ҆правда́нїємъ твои̑мъ. А҆ллилꙋ́їа.

рл҃ѕ. И҆схѡ́дища водна̑ѧ и҆зведо́стѣ ѻ҆́чи моѝ, поне́же не сохрани́хъ зако́на твоегѡ̀. А҆ллилꙋ́їа.

рл҃з. Првⷣнъ є҆сѝ, гдⷭ҇и, и҆ пра́ви сꙋдѝ твоѝ: А҆ллилꙋ́їа.

рл҃и. Заповѣ́далъ є҆сѝ пра́вдꙋ свидѣ̑нїѧ твоѧ̑, и҆ и҆́стинꙋ ѕѣлѡ̀. А҆ллилꙋ́їа.

рл҃ѳ. И҆ста́ѧла мѧ̀ є҆́сть ре́вность твоѧ̀: ꙗ҆́кѡ забы́ша словеса̀ твоѧ̑ вразѝ моѝ. А҆ллилꙋ́їа.

р҃м. Разжже́но сло́во твоѐ ѕѣлѡ̀, и҆ ра́бъ тво́й возлюбѝ є҆̀. А҆ллилꙋ́їа.

рм҃а. Ю҆нѣ́йшїй а҆́зъ є҆́смь и҆ ᲂу҆ничиже́нъ: ѡ҆правда́нїй твои́хъ не забы́хъ. А҆ллилꙋ́їа.

рм҃в. Пра́вда твоѧ̀ пра́вда во вѣ́къ, и҆ зако́нъ тво́й и҆́стина. А҆ллилꙋ́їа.

рм҃г. Скѡ́рби и҆ нꙋ́жди ѡ҆брѣто́ша мѧ̀: за́пѡвѣди твоѧ̑ поꙋче́нїе моѐ. А҆ллилꙋ́їа.

рм҃д. Пра́вда свидѣ̑нїѧ твоѧ̑ въ вѣ́къ: вразꙋми́ мѧ, и҆ жи́въ бꙋ́дꙋ. А҆ллилꙋ́їа.

рм҃є. Воззва́хъ всѣ́мъ се́рдцемъ мои́мъ, ᲂу҆слы́ши мѧ̀, гдⷭ҇и: ѡ҆правда̑нїѧ твоѧ̑ взыщꙋ̀. А҆ллилꙋ́їа.

рм҃ѕ. Воззва́хъ тѝ, сп҃си́ мѧ, и҆ сохраню̀ свидѣ̑нїѧ твоѧ̑. А҆ллилꙋ́їа.

рм҃з. Предвари́хъ въ безго́дїи и҆ воззва́хъ: на словеса̀ твоѧ̑ ᲂу҆пова́хъ. А҆ллилꙋ́їа.

рм҃и. Предвари́стѣ ѻ҆́чи моѝ ко ᲂу҆́трꙋ, поꙋчи́тисѧ словесє́мъ твои̑мъ. А҆ллилꙋ́їа.

рм҃ѳ. Гла́съ мо́й ᲂу҆слы́ши, гдⷭ҇и, по млⷭ҇ти твое́й: по сꙋдьбѣ̀ твое́й живи́ мѧ. А҆ллилꙋ́їа.

р҃н. Прибли́жишасѧ гонѧ́щїи мѧ̀ беззако́нїемъ: ѿ зако́на же твоегѡ̀ ᲂу҆дали́шасѧ. А҆ллилꙋ́їа.

рн҃а. Бли́з̾ є҆сѝ ты̀, гдⷭ҇и, и҆ всѝ пꙋтїѐ твоѝ и҆́стина. А҆ллилꙋ́їа.

рн҃в. И҆спе́рва позна́хъ ѿ свидѣ́нїй твои́хъ, ꙗ҆́кѡ въ вѣ́къ ѡ҆снова́лъ ѧ҆̀ є҆сѝ. А҆ллилꙋ́їа.

рн҃г. Ви́ждь смире́нїе моѐ и҆ и҆зми́ мѧ: ꙗ҆́кѡ зако́на твоегѡ̀ не забы́хъ. А҆ллилꙋ́їа.

рн҃д. Сꙋдѝ сꙋ́дъ мо́й и҆ и҆зба́ви мѧ̀: словесѐ ра́ди твоегѡ̀ живи́ мѧ. А҆ллилꙋ́їа.

рн҃є. Дале́че ѿ грѣ̑шникъ сп҃се́нїе, ꙗ҆́кѡ ѡ҆правда́нїй твои́хъ не взыска́ша. А҆ллилꙋ́їа.

рн҃ѕ. Щедрѡ́ты твоѧ̑ мнѡ́ги, гдⷭ҇и: по сꙋдьбѣ̀ твое́й живи́ мѧ. А҆ллилꙋ́їа.

рн҃з. Мно́зи и҆згонѧ́щїи мѧ̀ и҆ стꙋжа́ющїи мѝ: ѿ свидѣ́нїй твои́хъ не ᲂу҆клони́хсѧ. А҆ллилꙋ́їа.

рн҃и. Ви́дѣхъ неразꙋмѣва́ющыѧ и҆ и҆ста́ѧхъ: ꙗ҆́кѡ слове́съ твои́хъ не сохрани́ша. А҆ллилꙋ́їа.

рн҃ѳ. Ви́ждь, ꙗ҆́кѡ за́пѡвѣди твоѧ̑ возлюби́хъ: гдⷭ҇и, по млⷭ҇ти твое́й живи́ мѧ. А҆ллилꙋ́їа.

р҃ѯ. Нача́ло слове́съ твои́хъ и҆́стина, и҆ во вѣ́къ всѧ̑ сꙋдьбы̑ пра́вды твоеѧ̀. А҆ллилꙋ́їа.

рѯ҃а. Кнѧ̑зи погна́ша мѧ̀ тꙋ́не: и҆ ѿ слове́съ твои́хъ ᲂу҆боѧ́сѧ се́рдце моѐ. А҆ллилꙋ́їа.

рѯ҃в. Возра́дꙋюсѧ а҆́зъ ѡ҆ словесѣ́хъ твои́хъ, ꙗ҆́кѡ ѡ҆брѣта́ѧй коры́сть мно́гꙋ. А҆ллилꙋ́їа.

рѯ҃г. Непра́вдꙋ возненави́дѣхъ и҆ ѡ҆мерзи́хъ: зако́нъ же тво́й возлюби́хъ. А҆ллилꙋ́їа.

рѯ҃д. Седмери́цею дне́мъ хвали́хъ тѧ̀ ѡ҆ сꙋдьба́хъ пра́вды твоеѧ̀. А҆ллилꙋ́їа.

рѯ҃є. Ми́ръ мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна. А҆ллилꙋ́їа.

рѯ҃ѕ. Ча́ѧхъ сп҃се́нїѧ твоегѡ̀, гдⷭ҇и, и҆ за́пѡвѣди твоѧ̑ возлюби́хъ. А҆ллилꙋ́їа.

рѯ҃з. Сохранѝ дꙋша̀ моѧ̀ свидѣ̑нїѧ твоѧ̑ и҆ возлюбѝ ѧ҆̀ ѕѣлѡ̀. А҆ллилꙋ́їа.

рѯ҃и. Сохрани́хъ за́пѡвѣди твоѧ̑ и҆ свидѣ̑нїѧ твоѧ̑, ꙗ҆́кѡ всѝ пꙋтїѐ моѝ пред̾ тобо́ю, гдⷭ҇и. А҆ллилꙋ́їа.

рѯ҃ѳ. Да прибли́житсѧ моле́нїе моѐ пред̾ тѧ̀, гдⷭ҇и: по словесѝ твоемꙋ̀ вразꙋми́ мѧ. А҆ллилꙋ́їа.

р҃ѻ. Да вни́детъ проше́нїе моѐ пред̾ тѧ̀: гдⷭ҇и, по словесѝ твоемꙋ̀ и҆зба́ви мѧ̀. А҆ллилꙋ́їа.

рѻ҃а. Ѿры́гнꙋтъ ᲂу҆стнѣ̀ моѝ пѣ́нїе, є҆гда̀ наꙋчи́ши мѧ̀ ѡ҆правда́нїємъ твои̑мъ. А҆ллилꙋ́їа.

рѻ҃в. Провѣща́етъ ѧ҆зы́къ мо́й словеса̀ твоѧ̑, ꙗ҆́кѡ всѧ̑ за́пѡвѣди твоѧ̑ пра́вда. А҆ллилꙋ́їа.

рѻ҃г. Да бꙋ́детъ рꙋка̀ твоѧ̀ є҆́же сп҃сти́ мѧ, ꙗ҆́кѡ за́пѡвѣди твоѧ̑ и҆зво́лихъ. А҆ллилꙋ́їа.

рѻ҃д. Возжела́хъ сп҃се́нїе твоѐ, гдⷭ҇и, и҆ зако́нъ тво́й поꙋче́нїе моѐ є҆́сть. А҆ллилꙋ́їа.

рѻ҃є. Жива̀ бꙋ́детъ дꙋша̀ моѧ̀ и҆ восхва́литъ тѧ̀: и҆ сꙋдьбы̑ твоѧ̑ помо́гꙋтъ мнѣ̀. А҆ллилꙋ́їа.

рѻ҃ѕ. Заблꙋди́хъ ꙗ҆́кѡ ѻ҆вча̀ поги́бшее: взыщѝ раба̀ твоего̀, ꙗ҆́кѡ за́повѣдїй твои́хъ не забы́хъ. А҆ллилꙋ́їа.

И҆ по концѣ̀ а҆́бїе, на гла́съ є҃:

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Ст҃ы́хъ ли́къ ѡ҆брѣ́те и҆сто́чникъ жи́зни и҆ две́рь ра́йскꙋю, / да ѡ҆брѧ́щꙋ и҆ а҆́зъ пꙋ́ть покаѧ́нїемъ. / поги́бшее ѻ҆вча̀ а҆́зъ є҆́смь: / воззови́ мѧ сп҃се, и҆ сп҃си́ мѧ.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

А҆́гнца бж҃їѧ проповѣ́давше, / и҆ закла́ни бы́вше ꙗ҆́коже а҆́гнцы, / и҆ къ жи́зни нестарѣ́емѣй ст҃і́и, / и҆ присносꙋ́щнѣй преста́вльшесѧ, / того̀ прилѣ́жнѡ мч҃нцы моли́те, / долгѡ́въ разрѣше́нїе на́мъ дарова́ти.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Въ пꙋ́ть ᲂу҆́зкїй хо́ждшїи приско́рбный, / всѝ въ житїѝ крⷭ҇тъ ꙗ҆́кѡ ꙗ҆ре́мъ взе́мшїи, / и҆ мнѣ̀ послѣ́довавшїи вѣ́рою, / прїиди́те наслади́тесѧ, / и҆́хже ᲂу҆гото́вахъ ва́мъ по́честей / и҆ вѣнцє́въ нбⷭ҇ныхъ.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Ѡ҆́бразъ є҆́смь неизрече́нныѧ твоеѧ̀ сла́вы, / а҆́ще и҆ ꙗ҆́звы ношꙋ̀ прегрѣше́нїй, / ᲂу҆ще́дри твоѐ созда́нїе влⷣко, / и҆ ѡ҆чи́сти твои́мъ бл҃гоꙋтро́бїемъ, / и҆ возжелѣ́нное ѻ҆те́чество пода́ждь мѝ, / раѧ̀ па́ки жи́телѧ мѧ̀ сотворѧ́ѧ.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Дре́вле ᲂу҆́бѡ ѿ не сꙋ́щихъ созда́вый мѧ̀, / и҆ ѡ҆́бразомъ твои́мъ бж҃е́ственнымъ почты́й, / престꙋпле́нїемъ же за́повѣди, / па́ки мѧ̀ возврати́вый въ зе́млю, ѿ неѧ́же взѧ́тъ бы́хъ, / на є҆́же по подо́бїю возведѝ, / дре́внею добро́тою воз̾ѡбрази́тисѧ.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Оу҆поко́й бж҃е раба̀ твоего̀, / и҆ ᲂу҆чинѝ є҆го̀ [ю҆̀] въ раѝ, / и҆дѣ́же ли́цы ст҃ы́хъ гдⷭ҇и, / и҆ првⷣницы сїѧ́ютъ ꙗ҆́кѡ свѣти̑ла, / ᲂу҆со́пшыѧ рабы̑ твоѧ̑ ᲂу҆поко́й, / презира́ѧ и҆́хъ всѧ̑ согрѣшє́нїѧ.

Сла́ва: Трисїѧ́тельное є҆ди́нагѡ бж҃ества̀ бл҃гоче́стнѡ пое́мъ, вопїю́ще: / ст҃ъ є҆сѝ ѻ҆́ч҃е безнача́льный, / собезнача́льный сн҃е, и҆ бж҃е́ственный дш҃е, / просвѣтѝ на́съ вѣ́рою тебѣ̀ слꙋжа́щихъ / и҆ вѣ́чнагѡ ѻ҆гнѧ̀ и҆схитѝ.

И҆ ны́нѣ: Ра́дꙋйсѧ чⷭ҇таѧ, бг҃а пло́тїю ро́ждшаѧ во сп҃се́нїе всѣ́хъ, / є҆́юже ро́дъ человѣ́ческїй ѡ҆брѣ́те сп҃се́нїе, / тобо́ю да ѡ҆брѧ́щемъ ра́й, / бцⷣе чтⷭ҇аѧ, бл҃гослове́ннаѧ.

А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

По г҃-й статїѝ, и҆ по непоро́чныхъ тропарѣ́хъ, дїа́конъ:

Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же пра́веднїи ᲂу҆покоѧ́ютсѧ.

Ли́къ: Гдⷭ҇и поми́лꙋй.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

И҆ по возгла́сѣ пое́мъ настоѧ́щыѧ тропарѝ, гла́съ є҃:

Поко́й сп҃се на́шъ / съ пра́ведными раба̀ твоего̀, и҆ сего̀ вселѝ во дворы̀ твоѧ̑, / ꙗ҆́коже є҆́сть пи́сано, / презира́ѧ ꙗ҆́кѡ бл҃гъ прегрѣшє́нїѧ є҆гѡ̀, / вѡ́льнаѧ и҆ невѡ́льнаѧ, / и҆ всѧ̑ ꙗ҆̀же въ вѣ́дѣнїи и҆ не въ вѣ́дѣнїи, чл҃вѣколю́бче.

Сла́ва, коне́цъ: И҆ всѧ̑ ꙗ҆̀же въ вѣ́дѣнїи, и҆ не въ вѣ́дѣнїи, чл҃вѣколю́бче.

И҆ ны́нѣ, бг҃оро́диченъ: Ѿ дв҃ы возсїѧ́вый мі́рꙋ хрⷭ҇тѐ бж҃е, / сы́ны свѣ́та то́ю показа́вый, / поми́лꙋй на́съ.

Та́же, ѱало́мъ н҃.

Поми́лꙋй мѧ̀ бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. Наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. Ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши внегда̀ сꙋди́ти тѝ. Се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀ и҆ па́че снѣ́га ᲂу҆бѣлю́сѧ. Слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й. Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ. Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. Оу҆блажѝ гдⷭ҇и бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

И҆ канѡ́нъ, є҆гѡ́же краестро́чїе: Шестꙋ́ю припѣва́ю ѿше́дшемꙋ пѣ́снь. Ѳеофа́ново. Гла́съ ѕ҃.

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, / по бе́зднѣ стопа́ми. / гони́телѧ фараѡ́на ви́дѧ потоплѧ́ема / бг҃ꙋ побѣ́днꙋю пѣ́снь / пои́мъ, вопїѧ́ше.

Припев: Оу҆поко́й, гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

Въ нбⷭ҇ныхъ черто́зѣхъ всегда̀ до́блїи мч҃нцы мо́лѧтъ тѧ̀ хрⷭ҇тѐ, / є҆го́же ѿ землѝ преста́вилъ є҆сѝ вѣ́рнаго, / вѣ́чныхъ бл҃гъ полꙋчи́ти сподо́би.

Оу҆краше́й всѧ́чєскаѧ, живо́тное смѣше́нное, / посредѣ̀ мѧ̀ человѣ́ка, смире́нїѧ вкꙋ́пѣ и҆ вели́чества, созда́лъ є҆сѝ, / тѣ́мже раба̀ твоегѡ̀ дꙋ́шꙋ сп҃се, ᲂу҆поко́й.

Сла́ва: Раѧ̀ жи́телѧ, и҆ земледѣ́лателѧ въ нача́лѣ мѧ̀ ᲂу҆чини́лъ є҆сѝ, / престꙋ́пльша же твою̀ за́повѣдь и҆згна́лъ є҆сѝ. / тѣ́мже раба̀ твоегѡ̀ дꙋ́шꙋ сп҃сѐ, ᲂу҆поко́й.

И҆ ны́нѣ, бг҃оро́диченъ: И҆́же ѿ ребра̀ созда́вый є҆́ѵꙋ пре́жде на́шꙋ прама́терь, / и҆з̾ пречⷭ҇тагѡ твоегѡ̀ чре́ва въ пло́ть ѡ҆дѣва́етсѧ, / є҆́юже сме́рти крѣ́пость, чⷭ҇таѧ, разрꙋшѝ.

Пѣ́снь г҃.

І҆рмо́съ: Нѣ́сть ст҃ъ / ꙗ҆́коже ты̀ гдⷭ҇и бж҃е мо́й, / вознесы́й ро́гъ вѣ́рныхъ твои́хъ бл҃же, / и҆ ᲂу҆тверди́вый на́съ на ка́мени / и҆сповѣ́данїѧ твоегѡ̀.

Припев: Оу҆поко́й, гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

Зако́ннѡ пострада́ша твоѝ мч҃нцы жизнода́вче, / и҆ вѣнце́мъ побѣ́ды ᲂу҆краси́вшесѧ, / прилѣ́жнѡ преста́вльшемꙋсѧ вѣ́рномꙋ вѣ́чное и҆збавле́нїе подаю́тъ.

Наказа́въ пе́рвѣе мно́гими чꙋдесы̀ и҆ зна́меньми менѐ заблꙋ́дшаго, / напослѣ́докъ самаго̀ себѐ и҆стощи́лъ є҆сѝ, ꙗ҆́кѡ сострада́тель, / и҆ поиска́въ ѡ҆брѣ́лъ и҆ сп҃слъ є҆сѝ.

Сла́ва: Ѿ текꙋ́щихъ непостоѧ́тельныѧ тлѝ, къ тебѣ̀ преше́дшаго, / въ селе́нїихъ вѣ́чныхъ жи́ти ра́достнѡ сподо́би бл҃же, / ѡ҆правда́въ вѣ́рою же и҆ бл҃года́тїю.

И҆ ны́нѣ, бг҃оро́диченъ: Нѣ́сть непоро́чна, ꙗ҆́коже ты̀ пречⷭ҇таѧ бг҃ома́ти, / є҆ди́на бо ѿ вѣ́ка бг҃а и҆́стиннаго зачала̀ є҆сѝ во чре́вѣ, / сме́рти разрꙋши́вшаго си́лꙋ.

Та́же, є҆ктенїа̀ ѻ҆бы́чнаѧ:

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же пра́веднїи ᲂу҆покоѧ́ютсѧ.

Ли́къ: Гдⷭ҇и поми́лꙋй.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

Сѣда́ленъ, гла́съ ѕ҃:

Вои́стиннꙋ сꙋета̀ всѧ́чєскаѧ, / житїе́ же сѣ́нь, и҆ со́нїе: / и҆́бо всꙋ́е мѧте́тсѧ всѧ́къ земноро́дный, / ꙗ҆́коже речѐ писа́нїе: / є҆гда̀ мі́ръ прїѡбрѧ́щемъ. / тогда̀ во гро́бъ всели́мсѧ, / и҆дѣ́же вкꙋ́пѣ ца́рїе и҆ ни́щїи. / тѣ́мже хрⷭ҇тѐ бж҃е, / преста́вльшагосѧ раба̀ твоего̀ ᲂу҆поко́й, / ꙗ҆́кѡ чл҃вѣколю́бецъ.

Сла́ва, и҆ ны́нѣ, бг҃оро́диченъ: Всест҃а́ѧ бцⷣе, / во вре́мѧ живота̀ моегѡ̀ не ѡ҆ста́ви менѐ, / человѣ́ческомꙋ предста́тельствꙋ не ввѣ́ри мѧ̀: / но сама̀ застꙋпѝ, и҆ поми́лꙋй мѧ̀.

Пѣ́снь д҃.

І҆рмо́съ: Хрⷭ҇то́съ моѧ̀ си́ла, / бг҃ъ и҆ гдⷭ҇ь, чⷭ҇тна́ѧ цр҃ковь / бг҃олѣ́пнѡ пое́тъ взыва́ющи, / ѿ смы́сла чи́ста ѡ҆ гдⷭ҇ѣ пра́зднꙋющи.

Припев: Оу҆поко́й, гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

Премꙋ́дрости бо́льшее ꙗ҆влѧ́ѧ позна́нїе, / и҆ є҆́же ѡ҆ да́рѣхъ, многосоверше́нныѧ влⷣко бл҃госты́ни, / мч҃нчєскїѧ ли́ки а҆́гг҃лѡвъ сочета́лъ є҆сѝ.

Неизрече́нныѧ сла́вы твоеѧ̀ / полꙋчи́ти сподо́би къ тебѣ̀ преста́вльшагосѧ, / и҆дѣ́же хрⷭ҇тѐ веселѧ́щихсѧ є҆́сть жили́ще, / и҆ гла́съ чи́стагѡ ра́дованїѧ.

Сла́ва: Пою́ща прїимѝ бж҃е́ственнꙋю держа́вꙋ твою̀, / є҆го́же ѿ землѝ прїѧ́лъ є҆сѝ, ча́до свѣ́та сего̀ содѣ́ловаѧ, / грѣхо́внꙋю мглꙋ̀ ѡ҆чища́ѧ многомлⷭ҇тиве.

И҆ ны́нѣ, бг҃оро́диченъ: Прїѧ́телище пречⷭ҇тое, хра́мъ всенепоро́чный, ковче́гъ всест҃ы́й, / дв҃ственное мѣ́сто сщ҃е́нїѧ, / тебѐ добро́тꙋ і҆а́кѡвлю влⷣка и҆збра́лъ є҆́сть.

Пѣ́снь є҃.

І҆рмо́съ: Бж҃їимъ / свѣ́томъ твои́мъ бл҃же, / ᲂу҆́тренюющихъ тѝ дꙋ́шы / любо́вїю ѡ҆зарѝ, молю́сѧ, / тѧ̀ вѣ́дѣти сло́ве бж҃їй, / и҆́стиннагѡ бг҃а, / ѿ мра́ка грѣхо́внагѡ взыва́юща.

Припев: Оу҆поко́й, гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

Ꙗ҆́кѡ всепло́дїе сщ҃е́нное, / и҆ ꙗ҆́кѡ нача́токъ человѣ́ческагѡ є҆стества̀, мч҃нцы, / просла́вленномꙋ прине́сшесѧ бг҃ови, / на́мъ сп҃се́нїе при́снѡ хода́тайствꙋютъ.

Нбⷭ҇нагѡ пребыва́нїѧ, раздаѧ́нїѧ дарова́нїй сподо́би гдⷭ҇и, / пре́жде ᲂу҆со́пшаго вѣ́рнаго раба̀ твоего̀, / подаѧ̀ прегрѣше́нїй и҆збавле́нїе.

Сла́ва: И҆́же є҆ди́нъ є҆стество́мъ животворе́цъ, / и҆́же бл҃гости вои́стиннꙋ неизслѣ́димаѧ пꙋчи́на, / сконча́вшагосѧ, црⷭ҇твїѧ твоегѡ̀ сподо́би ще́дре, / є҆ди́не безсме́ртне.

И҆ ны́нѣ, бг҃оро́диченъ: Крѣ́пость и҆ пѣ́нїе, и҆з̾ тебѐ влⷣчце мі́рꙋ рожде́йсѧ, / и҆ сп҃се́нїе бы́въ поги́бшымъ, и҆́же ѿ а҆́довыхъ вра́тъ и҆збавлѧ́ѧй, / вѣ́рою тебѐ бл҃жа́щыѧ.

Пѣ́снь ѕ҃.

І҆рмо́съ: Жите́йское мо́ре / воздвиза́емое зрѧ̀ напа́стей бꙋ́рею / къ ти́хомꙋ приста́нищꙋ твоемꙋ̀ прите́къ вопїю́ ти: / возведѝ ѿ тлѝ живо́тъ мо́й / многомлⷭ҇тиве.

Припев: Оу҆поко́й, гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

На крⷭ҇тѣ̀ пригвожда́емь, / мч҃ничєскїѧ ли́ки къ себѣ̀ собра́лъ є҆сѝ, / подража́ющыѧ стрⷭ҇ть твою̀ бл҃же. / тѣ́мже мо́лимсѧ тѝ: къ тебѣ̀ преста́вльшагосѧ ны́нѣ ᲂу҆поко́й.

Неизрече́нною сла́вою твое́ю, / є҆гда̀ прїи́деши стра́шнѡ сꙋди́ти мі́рꙋ всемꙋ̀ на ѻ҆́блацѣхъ, / бл҃говолѝ свѣ́тлѡ срѣ́сти тебѐ и҆зба́вителю, / є҆го́же ѿ землѝ прїѧ́лъ є҆сѝ вѣ́рнаго раба̀ твоего̀.

Сла́ва: И҆сто́чникъ жи́зни сы́й / мꙋ́жествомъ бж҃е́ственнымъ влⷣко, ѡ҆кова̑ннаѧ и҆зводѧ́й, / раба̀ твоего̀ къ тебѣ̀ вѣ́рнѡ ѿше́дшаго / въ сла́дости ра́йстѣй вселѝ.

И҆ ны́нѣ, бг҃оро́диченъ: Въ зе́млю возврати́хомсѧ, престꙋ́пльше бж҃їю за́повѣдь бж҃е́ственнꙋю, / тобо́ю же дв҃о, на нб҃о ѿ землѝ вознесо́хомсѧ, / тлю̀ сме́ртнꙋю ѿтрѧ́сше.

Та́же, є҆ктенїа̀ ѻ҆бы́чнаѧ:

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же пра́веднїи ᲂу҆покоѧ́ютсѧ.

Ли́къ: Гдⷭ҇и поми́лꙋй.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

Конда́къ, гла́съ и҃:

Со ст҃ы́ми ᲂу҆поко́й / хрⷭ҇тѐ, дꙋ́шꙋ раба̀ твоегѡ̀, / и҆дѣ́же нѣ́сть болѣ́знь, ни печа́ль, / ни воздыха́нїе, / но жи́знь безконе́чнаѧ.

І҆́косъ: Са́мъ є҆ди́нъ є҆сѝ безсме́ртный, / сотвори́вый и҆ созда́вый человѣ́ка, / земні́и ᲂу҆́бѡ ѿ землѝ созда́хомсѧ, / и҆ въ зе́млю тꙋ́южде по́йдемъ, / ꙗ҆́коже повелѣ́лъ є҆сѝ созда́вый мѧ̀ и҆ рекі́й мѝ: / ꙗ҆́кѡ землѧ̀ є҆сѝ и҆ въ зе́млю ѿи́деши, / а҆́може всѝ человѣ́цы по́йдемъ, / надгро́бное рыда́нїе творѧ́ще пѣ́снь: / а҆ллилꙋ́їа.

И҆ па́ки: Со ст҃ы́ми ᲂу҆поко́й хрⷭ҇тѐ:

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь / содѣ́ла а҆́гг҃лъ / прпⷣбнымъ ѻ҆трокѡ́мъ, / халдє́и же ѡ҆палѧ́ющее / велѣ́нїе бж҃їе, / мꙋчи́телѧ ᲂу҆вѣща̀ вопи́ти: / бл҃гослове́нъ є҆сѝ бж҃е ѻ҆тє́цъ на́шихъ.

Припев: Оу҆поко́й, гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

И҆зба́вльшїисѧ твое́ю кро́вїю мч҃нцы пе́рвагѡ престꙋпле́нїѧ, / ѡ҆кропи́вшесѧ же свое́ю кро́вїю, проѡбразꙋ́ютъ ꙗ҆́вѣ твоѐ заколе́нїе: / бл҃гослове́нъ є҆сѝ бж҃е ѻ҆тє́цъ на́шихъ.

Свирѣ́пѣющꙋю сме́рть ᲂу҆мертви́лъ є҆сѝ сло́ве живонача́льнѣйшїй, / въ вѣ́рѣ же ᲂу҆со́пшаго прїимѝ ны́нѣ воспѣва́ющаго, и҆ глаго́лющаго: хрⷭ҇тѐ, / бл҃гослове́нъ є҆сѝ бж҃е ѻ҆тє́цъ на́шихъ.

Сла́ва: Воѡдꙋши́вый мѧ̀ человѣ́ка вдохнове́нїемъ бж҃е́ственнымъ бг҃онача́льнѣйшїй влⷣко, / преста́вленнаго црⷭ҇твїѧ твоегѡ̀ сподо́би, пѣ́ти тебѐ сп҃се: / бл҃гослове́нъ є҆сѝ бж҃е ѻ҆тє́цъ на́шихъ.

И҆ ны́нѣ, бг҃оро́диченъ: Превы́шши всѧ́кїѧ тва́ри пренепоро́чнаѧ была̀ є҆сѝ, заче́нши бг҃а, / сокрꙋши́вшаго смє́ртнаѧ врата̀, и҆ верєѝ сте́ршаго: / тѣ́мже тѧ̀ чⷭ҇таѧ пѣсносло́вимъ вѣ́рнїи, ꙗ҆́кѡ бг҃омт҃рь.

Пѣ́снь и҃.

І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ. / и҆ пра́веднагѡ же́ртвꙋ водо́ю попали́лъ є҆сѝ: / всѧ̑ бо твори́ши хрⷭ҇тѐ, то́кмѡ є҆́же хотѣ́ти, / тѧ̀ превозно́симъ во всѧ̑ вѣ́ки.

Припев: Оу҆поко́й, гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

Крѣ́пкѡ по́двиги показа́вше, / побѣ́ды вѣнце́мъ ᲂу҆краси́стесѧ мч҃нцы хрⷭ҇тѡ́вы стрⷭ҇тоте́рпцы, зовꙋ́ще: / тѧ̀ превозно́симъ хрⷭ҇тѐ во вѣ́ки.

Сщ҃е́ннѣ житїѐ ѡ҆ста́вльшыѧ вѣ̑рныѧ, / и҆ къ тебѣ̀ влⷣцѣ преше́дшыѧ / прїимѝ, кро́тцѣ ᲂу҆покоева́ѧ, ꙗ҆́кѡ бл҃гоꙋтро́бенъ, / тѧ̀ превозносѧ́щыѧ во всѧ̑ вѣ́ки.

Сла́ва: Ны́нѣ въ землѝ кро́ткихъ / всѧ̑ водворѧ́тисѧ пре́жде ᲂу҆со́пшыѧ, сп҃се, бл҃гоизво́ли, / вѣ́рою ꙗ҆́же въ тѧ̀ ѡ҆правда́въ и҆ бл҃года́тїю, / тѧ̀ превозносѧ́щыѧ во всѧ̑ вѣ́ки.

И҆ ны́нѣ, бг҃оро́диченъ: Вси́ тѧ бл҃жи́мъ всебл҃же́ннаѧ, / ро́ждшꙋю сло́ва вои́стиннꙋ сꙋ́щаго бл҃же́ннаго, / пло́ть на́съ ра́ди бы́вшаго: / є҆го́же превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Бг҃а / человѣ́кѡмъ невозмо́жно ви́дѣти, / на негѡ́же не смѣ́ютъ чи́ни а҆́гг҃льстїи взира́ти: / тобо́ю же всечⷭ҇таѧ, ꙗ҆ви́сѧ человѣ́кѡмъ / сло́во воплоще́нно, / є҆го́же велича́юще, / съ нбⷭ҇ными во́и, тѧ̀ ᲂу҆бл҃жа́емъ.

Припев: Оу҆поко́й, гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

Наде́жда мч҃нкѡвъ ли́ки ᲂу҆крѣпѝ, и҆ къ твое́й любвѝ распале́ннѣ вперѝ, / бꙋ́дꙋщихъ си̑мъ предвоѡбрази́вши непоколеби́мый вои́стиннꙋ поко́й: / є҆мꙋ́же преста́вльшагосѧ бл҃же вѣ́рнаго сподо́би полꙋчи́ти.

Свѣ́тлагѡ и҆ бж҃е́ственнагѡ полꙋчи́ти сїѧ́нїѧ твоегѡ̀ хрⷭ҇тѐ, / вѣ́рою преста́вльшагосѧ бл҃говолѝ въ нѣ́дрѣхъ а҆враа́мовыхъ ᲂу҆покое́нїе, / ꙗ҆́кѡ є҆ди́нъ млⷭ҇тивъ семꙋ̀ да́рꙋѧй, и҆ вѣ́чнагѡ сподоблѧ́ѧй бл҃же́нства.

Сла́ва: Сы́й є҆стество́мъ бл҃гъ и҆ бл҃гоꙋтро́бенъ, / и҆ воли́тель млⷭ҇ти, и҆ бл҃гоꙋтро́бїѧ бе́здна: є҆го́же ѿ мѣ́ста сегѡ̀ ѡ҆ѕлобле́нїѧ / и҆ сѣ́ни сме́ртныѧ сп҃се преста́вилъ є҆сѝ, / и҆дѣ́же сїѧ́етъ тво́й свѣ́тъ, сего̀ ᲂу҆чинѝ.

И҆ ны́нѣ, бг҃оро́диченъ: Сѣ́нь ст҃ꙋ́ю чⷭ҇таѧ разꙋмѣ́емъ, / и҆ ковче́гъ, и҆ скрижа́ль тѧ̀ зако́на и҆ бл҃года́ти: / тобо́ю бо ѡ҆ставле́нїе дарова́сѧ, / ѡ҆правда̑ннымъ кро́вїю воплоще́ннагѡ и҆з̾ твоегѡ̀ чре́ва, всенепоро́чнаѧ.

Та́же, є҆ктенїа̀ ѻ҆бы́чнаѧ:

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же пра́веднїи ᲂу҆покоѧ́ютсѧ.

Ли́къ: Гдⷭ҇и поми́лꙋй.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

Начина́емъ самогла́сны і҆ѡа́нна мона́ха.

Гла́съ а҃: Ка́ѧ жите́йскаѧ сла́дость / пребыва́етъ печа́ли неприча́стна; / ка́ѧ ли сла́ва стои́тъ на землѝ непрело́жна; / всѧ̑ сѣ́ни немѡщнѣ́йша, всѧ̑ со́нїй прелє́стнѣйша: / є҆ди́нѣмъ мгнове́нїемъ, и҆ всѧ̑ сїѧ̑ сме́рть прїе́млетъ. / но во свѣ́тѣ хрⷭ҇тѐ лица̀ твоегѡ̀, / и҆ въ наслажде́нїи твоеѧ̀ красоты̀, / є҆го́же и҆збра́лъ є҆сѝ, ᲂу҆поко́й, ꙗ҆́кѡ чл҃вѣколю́бецъ.

Гла́съ в҃: Оу҆вы̀ мнѣ̀, ꙗ҆ковы́й по́двигъ и҆́мать дꙋша̀ разлꙋча́ющисѧ ѿ тѣлесѐ! / ᲂу҆вы̀, тогда̀ коли́кѡ слези́тъ, и҆ нѣ́сть поми́лꙋѧй ю҆̀! / ко а҆́гг҃лѡмъ ѻ҆́чи возводѧ́щи, бездѣ́льнѡ мо́литсѧ: / къ человѣ́кѡмъ рꙋ́цѣ простира́ющи, не и҆́мать помога́ющагѡ. / тѣ́мже возлю́бленнїи моѝ бра́тїе, / помы́сливше на́шꙋ кра́ткꙋю жи́знь, / преста́вленномꙋ ᲂу҆покое́нїѧ ѿ хрⷭ҇та̀ про́симъ, / и҆ дꙋша́мъ на́шымъ ве́лїю млⷭ҇ть.

Гла́съ г҃: Всѧ̑ сꙋета̀ человѣ́ческаѧ, / є҆ли̑ка не пребыва́етъ по сме́рти: / не пребыва́етъ бога́тство, ни сше́ствꙋетъ сла́ва: / прише́дшей бо сме́рти, сїѧ̑ всѧ̑ потреби́шасѧ. / тѣ́мже хрⷭ҇тꙋ̀ безсме́ртномꙋ возопїи́мъ: / преста́вленнаго ѿ на́съ ᲂу҆поко́й, / и҆дѣ́же всѣ́хъ є҆́сть веселѧ́щихсѧ жили́ще.

Гла́съ д҃: Гдѣ́ є҆сть мїрско́е пристра́стїе; / гдѣ́ є҆сть привре́менныхъ мечта́нїе; / гдѣ́ є҆сть зла́то и҆ сребро̀; / гдѣ́ є҆сть рабѡ́въ мно́жество и҆ молва̀; / всѧ̑ пе́рсть, всѧ̑ пе́пелъ, всѧ̑ сѣ́нь. / но прїиди́те возопїи́мъ безсме́ртномꙋ цр҃ю̀: / гдⷭ҇и вѣ́чныхъ твои́хъ бла̑гъ сподо́би преста́вльшагосѧ ѿ на́съ, / ᲂу҆покоѧ́ѧ є҆го̀ въ нестарѣ́ющемсѧ бл҃же́нствѣ твое́мъ.

Гла́съ є҃: Помѧнꙋ́хъ прⷪ҇ро́ка вопїю́ща: / а҆́зъ є҆́смь землѧ̀ и҆ пе́пелъ. / и҆ па́ки разсмотри́хъ во гробѣ́хъ, / и҆ ви́дѣхъ кѡ́сти ѡ҆бнаже́ны, и҆ рѣ́хъ: / ᲂу҆̀бо кто̀ є҆́сть ца́рь, и҆лѝ во́инъ, / и҆лѝ бога́тъ, и҆лѝ ᲂу҆бо́гъ, / и҆лѝ пра́ведникъ, и҆лѝ грѣ́шникъ; / но ᲂу҆поко́й гдⷭ҇и, / съ пра́ведными раба̀ твоего̀.

Гла́съ ѕ҃: Нача́токъ мнѣ̀ и҆ соста́въ зижди́тельное твоѐ бы́сть повелѣ́нїе: / восхотѣ́въ бо ѿ неви́димагѡ же и҆ ви́димагѡ жи́ва мѧ̀ соста́вити є҆стества̀. / ѿ землѝ тѣ́ло моѐ созда́лъ є҆сѝ, / да́лъ же мѝ є҆сѝ дꙋ́шꙋ / бж҃е́ственнымъ твои́мъ и҆ животворѧ́щимъ вдохнове́нїемъ. / тѣ́мже хрⷭ҇тѐ раба̀ твоего̀ во странѣ̀ живꙋ́щихъ, / и҆ въ селе́нїихъ пра́ведныхъ ᲂу҆поко́й.

Гла́съ з҃: По ѡ҆́бразꙋ твоемꙋ̀ и҆ по подо́бїю созда́вый въ нача́лѣ человѣ́ка, / въ раѝ поста́вилъ є҆сѝ владѣ́ти твои́ми тва́рьми: / за́вистїю же дїа́волею прельсти́всѧ, снѣ́ди причасти́сѧ, / за́повѣдей твои́хъ престꙋ́пникъ бы́въ. / тѣ́мже па́ки въ зе́млю, ѿ неѧ́же взѧ́тъ бы́сть, / ѡ҆сꙋди́лъ є҆сѝ возврати́тисѧ гдⷭ҇и, / и҆ и҆спроси́ти ᲂу҆покое́нїе.

Гла́съ и҃: Пла́чꙋ и҆ рыда́ю, / є҆гда̀ помышлѧ́ю сме́рть, / и҆ ви́ждꙋ во гробѣ́хъ лежа́щꙋю, / по ѡ҆́бразꙋ бж҃їю созда́ннꙋю на́шꙋ красотꙋ̀, / без̾ѡбра́знꙋ, безсла́внꙋ, / не и҆мꙋ́щꙋю ви́да. / ѽ чꙋдесѐ! / что̀ сїѐ є҆́же ѡ҆ на́съ бы́сть та́инство; / ка́кѡ преда́хомсѧ тлѣ́нїю; / ка́кѡ сопрѧго́хомсѧ сме́рти; / вои́стиннꙋ бг҃а повелѣ́нїемъ. / ꙗ҆́коже пи́сано є҆́сть, / подаю́щагѡ преста́вльшемꙋсѧ ᲂу҆покое́нїе.

Бл҃жє́нна, гла́съ ѕ҃.

Во црⷭ҇твїи твое́мъ, / є҆гда̀ прїи́деши помѧнѝ на́съ гдⷭ҇и.

Бл҃же́ни ни́щїи дх҃омъ, / ꙗ҆́кѡ тѣ́хъ є҆́сть црⷭ҇тво нбⷭ҇ное.

Бл҃же́ни пла́чꙋщїи, / ꙗ҆́кѡ ті́и ᲂу҆тѣ́шатсѧ.

Бл҃же́ни кро́тцыи, / ꙗ҆́кѡ ті́и наслѣ́дѧтъ зе́млю.

Бл҃же́ни а҆́лчꙋщїи, и҆ жа́ждꙋщїи пра́вды, / ꙗ҆́кѡ ті́и насы́тѧтсѧ.

Бл҃же́ни млⷭ҇тивїи, / ꙗ҆́кѡ ті́и поми́ловани бꙋ́дꙋтъ.

Разбо́йника раѧ̀ хрⷭ҇тѐ жи́телѧ, / на крⷭ҇тѣ̀ тебѣ̀ возопи́вша, помѧни́ мѧ, / предсодѣ́ѧлъ є҆сѝ покаѧ́нїемъ є҆гѡ̀, / и҆ менѐ сподо́би недосто́йнаго.

Бл҃же́ни чи́стїи се́рдцемъ, / ꙗ҆́кѡ ті́и бг҃а ᲂу҆́зрѧтъ.

Живото́мъ гдⷭ҇ствꙋѧй и҆ сме́ртїю, / во дво́рѣхъ ст҃ы́хъ ᲂу҆поко́й, / є҆го́же прїѧ́лъ є҆сѝ ѿ привре́менныхъ: / и҆ помѧни́ мѧ, є҆гда̀ прїи́деши во црⷭ҇твїи твое́мъ.

Бл҃же́ни миротво́рцы, / ꙗ҆́кѡ ті́и сы́нове бж҃їи нарекꙋ́тсѧ.

Дꙋша́ми влады́чествꙋѧй и҆ тѣлеса́ми, / є҆го́же въ рꙋцѣ̀ дыха́нїе на́ше, / ѡ҆скорблѧ́емыхъ ᲂу҆тѣше́нїе, / ᲂу҆поко́й во странѣ̀ пра́ведныхъ, / є҆го́же преста́вилъ є҆сѝ раба̀ твоего̀.

Бл҃же́ни и҆згна́ни пра́вды ра́ди, / ꙗ҆́кѡ тѣ́хъ є҆́сть црⷭ҇тво нбⷭ҇ное.

Хрⷭ҇то́съ тѧ̀ ᲂу҆поко́итъ во странѣ̀ живꙋ́щихъ, / и҆ врата̀ ра̑йскаѧ да ѿве́рзетъ тѝ, / и҆ црⷭ҇твїѧ пока́жетъ жи́телѧ, / и҆ ѡ҆ставле́нїе тебѣ̀ да́стъ, / ѡ҆ ни́хже согрѣши́лъ є҆сѝ въ житїѝ, хрⷭ҇толю́бче.

Бл҃же́ни є҆стѐ, є҆гда̀ поно́сѧтъ ва́мъ, / и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.

И҆зы́демъ и҆ ᲂу҆́зримъ во гробѣ́хъ, / ꙗ҆́кѡ на́ги кѡ́сти человѣ̑къ, / черве́й снѣ́дь, и҆ смра́дъ, / и҆ позна́емъ что̀ бога́тство, добро́та, крѣ́пость, бл҃голѣ́пїе;

Ра́дꙋйтесѧ и҆ весели́тесѧ, / ꙗ҆́кѡ мзда̀ ва́ша мно́га на нб҃сѣ́хъ.

Оу҆слы́шимъ, что̀ зове́тъ вседержи́тель: / ᲂу҆вы̀ и҆́щꙋщымъ зрѣ́ти стра́шный де́нь гдⷭ҇ень! / се́й бо є҆́сть тьма̀: / ѻ҆гне́мъ бо и҆скꙋша́ютсѧ всѧ́чєскаѧ.

Сла́ва: Безнача́льнымъ и҆ рожде́нїемъ же и҆ происхожде́нїемъ, / ѻ҆ц҃ꙋ̀ покланѧ́юсѧ роди́вшемꙋ, / сн҃а сла́влю рожде́ннаго, / пою̀ сопросїѧ́вшаго ѻ҆ц҃ꙋ́ же и҆ сн҃ꙋ, дх҃а ст҃а́го.

И҆ ны́нѣ, бг҃оро́диченъ: Ка́кѡ ѿ сосцꙋ̀ твоє́ю млеко̀ то́чиши дв҃о, / ка́кѡ пита́еши пита́телѧ тва́ри; / ꙗ҆́коже вѣ́сть, и҆сточи́вый во́дꙋ ѿ ка́мене, / жи̑лы вѡ́дныѧ жа́ждꙋщымъ лю́демъ, ꙗ҆́коже писа́сѧ.

Посе́мъ дїа́конъ глаго́летъ: Во́нмемъ.

Сщ҃е́нникъ: Ми́ръ всѣ̑мъ.

Ли́къ: И҆ дꙋ́хови твоемꙋ̀.

Дїа́конъ: Премꙋ́дрость, во́нмемъ.

Ли́къ пое́тъ прокі́менъ, гла́съ ѕ҃:

Бл҃же́нъ пꙋ́ть, во́ньже и҆́деши дне́сь дꙋшѐ, / ꙗ҆́кѡ ᲂу҆гото́васѧ тебѣ̀ мѣ́сто ᲂу҆покое́нїѧ.

Сті́хъ: Къ тебѣ̀ гдⷭ҇и воззовꙋ̀, бж҃е мо́й, да не премолчи́ши ѿ менѐ.

Чте́цъ: А҆по́столъ къ солꙋ́нѧнѡмъ, зача́ло с҃ѻ.

Бра́тїе, не хощꙋ̀ ва́съ не вѣ́дѣти ѡ҆ ᲂу҆ме́ршихъ, да не скорбитѐ, ꙗ҆́коже и҆ про́чїи не и҆мꙋ́щїи ᲂу҆пова́нїѧ. А҆́ще бо вѣ́рꙋемъ, ꙗ҆́кѡ і҆и҃съ ᲂу҆́мре и҆ воскр҃се, та́кѡ и҆ бг҃ъ ᲂу҆ме́ршыѧ ѡ҆ і҆и҃сѣ, приведе́тъ съ ни́мъ. Сїе́ бо ва́мъ глаго́лемъ сло́вомъ гдⷭ҇нимъ, ꙗ҆́кѡ мы̀ живꙋ́щїи ѡ҆ста́вшїи въ прише́ствїе гдⷭ҇не, не и҆́мамы предвари́ти ᲂу҆ме́ршихъ. Ꙗ҆́кѡ са́мъ гдⷭ҇ь въ повелѣ́нїи во гла́сѣ а҆рха́гг҃ловѣ, и҆ въ трꙋбѣ̀ бж҃їи сни́детъ съ нб҃сѐ, и҆ ме́ртвїи ѡ҆ хрⷭ҇тѣ̀ воскрⷭ҇нꙋтъ пе́рвѣе. Пото́мъ же мы̀ живꙋ́щїи ѡ҆ста́вшїи, кꙋ́пнѡ съ ни́ми восхище́ни бꙋ́демъ на ѻ҆́блацѣхъ, въ срѣ́тенїе гдⷭ҇не на воздꙋ́сѣ, и҆ та́кѡ всегда̀ съ гдⷭ҇емъ бꙋ́демъ.

Сщ҃е́нникъ: Ми́ръ тѝ.

А҆ллилꙋ́їа. Гла́съ ѕ҃:

Бл҃же́нъ, є҆го́же и҆збра́лъ и҆ прїѧ́лъ є҆сѝ, гдⷭ҇и.

Дїа́конъ: Премꙋ́дрость, про́сти, ᲂу҆слы́шимъ ст҃а́гѡ є҆ѵⷢ҇лїа.

Сщ҃е́нникъ: Ми́ръ всѣ̑мъ.

Е҆ѵⷢ҇лїе ѿ і҆ѡа́нна, зача́ло ѕ҃і.

Речѐ гдⷭ҇ь ко прише́дшымъ къ немꙋ̀ і҆ꙋде́ємъ: а҆ми́нь а҆ми́нь глаго́лю ва́мъ, ꙗ҆́кѡ слꙋ́шаѧй словесѐ моегѡ̀ и҆ вѣ́рꙋѧй посла́вшемꙋ мѧ̀, и҆́мать живо́тъ вѣ́чный, и҆ на сꙋ́дъ не прїи́детъ: но пре́йдетъ ѿ сме́рти въ живо́тъ. А҆ми́нь а҆ми́нь глаго́лю ва́мъ: ꙗ҆́кѡ грѧде́тъ ча́съ, и҆ ны́нѣ є҆́сть, є҆гда̀ ме́ртвїи ᲂу҆слы́шатъ гла́съ сн҃а бж҃їѧ, и҆ ᲂу҆слы́шавше ѡ҆живꙋ́тъ. Ꙗ҆́коже бо ѻ҆ц҃ъ и҆́мать живо́тъ въ себѣ̀, та́кѡ да́стъ и҆ сн҃ови живо́тъ и҆мѣ́ти въ себѣ̀: И҆ ѻ҆́бласть да́стъ є҆мꙋ̀ и҆ сꙋ́дъ твори́ти, ꙗ҆́кѡ сн҃ъ человѣ́чь є҆́сть, не диви́тесѧ семꙋ̀. Ꙗ҆́кѡ грѧде́тъ ча́съ во́ньже всѝ сꙋ́щїи во гробѣ́хъ ᲂу҆слы́шатъ гла́съ сн҃а бж҃їѧ: И҆ и҆зы́дꙋтъ сотво́ршїи бл҃га̑ѧ въ воскр҃ше́нїе живота̀, а҆ сотво́ршїи ѕла̑ѧ въ воскр҃ше́нїе сꙋда̀. Не могꙋ̀ а҆́зъ ѡ҆ себѣ̀ твори́ти ничесѡ́же. Ꙗ҆́коже слы́шꙋ, сꙋждꙋ̀: и҆ сꙋ́дъ мо́й пра́веденъ є҆́сть: ꙗ҆́кѡ не и҆щꙋ̀ во́ли моеѧ̀, но во́ли посла́вшагѡ мѧ̀ ѻ҆ц҃а̀.

Дїа́конъ: Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же пра́веднїи ᲂу҆покоѧ́ютсѧ.

Ли́къ: Гдⷭ҇и поми́лꙋй, три́жды.

Млⷭ҇ти бж҃їѧ, црⷭ҇тва нбⷭ҇нагѡ, и҆ ѡ҆ставле́нїѧ грѣхѡ́въ є҆гѡ̀, ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ про́симъ.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

И҆ по и҆сполне́нїи сегѡ̀ глаго́летъ пе́рвый ѿ сщ҃е́нникѡвъ, и҆лѝ а҆рхїере́й прилꙋчи́всѧ, мл҃твꙋ: Бж҃е дꙋхѡ́въ: велегла́снѡ, прише́дъ близ̾ ᲂу҆ме́ршагѡ. Та́кожде и҆ настоѧ́щїи сщ҃е́нницы всѝ.

Вѣ́домо же бꙋ́ди, ꙗ҆́кѡ глаго́лемꙋ коемꙋ́ждо проше́нїю ѿ дїа́кона, во є҆ли́кѡ глаго́летсѧ проше́нїе ѿ негѡ̀, глаго́летъ вышерече́ннꙋю мл҃твꙋ кі́йждо сщ҃е́нникъ, по чи́нꙋ своемꙋ̀ та́йнѡ близ̾ ᲂу҆ме́ршагѡ, и҆ возглаша́етъ: Ꙗ҆́кѡ ты̀ є҆сѝ воскрⷭ҇нїе:

Ны́нѣ же ѿ пе́рвагѡ сщ҃е́нника, и҆лѝ а҆рхїере́а, глаго́летсѧ велегла́снѡ мл҃тва: Бж҃е дꙋхѡ́въ: ꙗ҆́коже вы́ше рече́сѧ. По возгла́сѣ же быва́етъ цѣлова́нїе.

И҆ пое́мъ настоѧ́щыѧ стїхи̑ры, гла́съ в҃. Подѡ́бны: Е҆гда̀ ѿ дре́ва:

Прїиди́те, послѣ́днее цѣлова́нїе / дади́мъ бра́тїе ᲂу҆ме́ршемꙋ, / бл҃годарѧ́ще бг҃а: / се́й бо ѡ҆скꙋдѣ̀ ѿ сро́дства своегѡ̀, / и҆ ко гро́бꙋ тщи́тсѧ не ктомꙋ̀ пекі́йсѧ / ѡ҆ сꙋ́етныхъ, и҆ ѡ҆ многостра́стной пло́ти. / гдѣ̀ ны́нѣ срѡ́дницы же и҆ дрꙋ́зи; / сѐ разлꙋча́емсѧ. / є҆го́же ᲂу҆поко́ити, гдⷭ҇ꙋ помо́лимсѧ.

Ко́е разлꙋче́нїе, ѽ бра́тїе! кі́й пла́чь; / ко́е рыда́нїе въ настоѧ́щемъ часѣ̀; / прїиди́те ᲂу҆́бѡ цѣлꙋ́йте бы́вшаго вма́лѣ съ на́ми: / предае́тсѧ бо гро́бꙋ. / ка́менемъ покрыва́етсѧ, / во тьмꙋ̀ вселѧ́етсѧ, / съ ме́ртвыми погреба́етсѧ, / и҆ всѣ́хъ сро́дникѡвъ и҆ дрꙋгѡ́въ ны́нѣ разлꙋча́етсѧ: / є҆го́же ᲂу҆поко́ити, гдⷭ҇ꙋ помо́лимсѧ.

Ны́нѣ жите́йское лꙋка́вое разрꙋша́етсѧ торжество̀ сꙋеты̀: / дх҃ъ бо ѡ҆скꙋдѣ̀ ѿ селе́нїѧ, бре́нїе ѡ҆черни́сѧ, / сосꙋ́дъ раздра́сѧ, безгла́сенъ, нечꙋ́ственъ, ме́ртвенъ, недви́жимь. / є҆го́же посыла́юще гро́бꙋ, гдⷭ҇ꙋ помо́лимсѧ, / да́ти семꙋ̀ во вѣ́ки ᲂу҆покое́нїе.

Ꙗ҆ко́въ живо́тъ на́шъ є҆́сть; цвѣ́тъ, и҆ ды́мъ, и҆ роса̀ ᲂу҆́треннѧѧ вои́стиннꙋ. / прїиди́те ᲂу҆́бѡ, ᲂу҆́зримъ на гробѣ́хъ ꙗ҆́снѡ, гдѣ̀ добро́та тѣле́снаѧ; / гдѣ̀ ю҆́ность; гдѣ̀ сꙋ́ть ѻ҆чеса̀, и҆ зра́къ плотскі́й: / всѧ̑ ᲂу҆вѧдо́ша ꙗ҆́кѡ трава̀, всѧ̑ потреби́шасѧ. / прїиди́те ко хрⷭ҇тꙋ̀ припаде́мъ со слеза́ми.

Ве́лїй пла́чь и҆ рыда́нїе, ве́лїе воздыха́нїе, и҆ нꙋ́жда, / разлꙋче́нїе дꙋшѝ, а҆́дъ и҆ поги́бель, / привре́менный живо́тъ, сѣ́нь непостоѧ́ннаѧ, / со́нъ преле́стный: безвременномечта́ненъ трꙋ́дъ житїѧ̀ земна́гѡ. / дале́че ѿбѣжи́мъ мїрска́гѡ всѧ́кагѡ грѣха̀, да небє́снаѧ наслѣ́димъ.

Ви́дѧще предлежа́ща ме́ртва, / ѡ҆́бразъ воспрїи́мемъ всѝ коне́чнагѡ часа̀: / се́й бо ѿхо́дитъ ꙗ҆́кѡ ды́мъ ѿ землѝ, / ꙗ҆́кѡ цвѣ́тъ ѿцвѣтѐ, / ꙗ҆́кѡ трава̀ посѣче́сѧ, / вре́тищемъ повива́емь, / земле́ю покрыва́емь. / є҆го́же неви́дима ѡ҆ста́вивше, хрⷭ҇тꙋ̀ помо́лимсѧ, / да́ти семꙋ̀ во вѣ́ки ᲂу҆покое́нїе.

Прїиди́те внꙋ́цы а҆да́мѡвы, ᲂу҆ви́димъ на землѝ пове́рженнаго, / по ѡ҆́бразꙋ на́шемꙋ всѐ бл҃голѣ́пїе ѿлага́юща, / разрꙋше́на во гро́бѣ гно́емъ, червьмѝ, тьмо́ю и҆ждива́ема, земле́ю покрыва́ема. / є҆го́же неви́дима ѡ҆ста́вльше, хрⷭ҇тꙋ̀ помо́лимсѧ, / да́ти во вѣ́ки семꙋ̀ ᲂу҆покое́нїе.

Е҆гда̀ дꙋша̀ ѿ тѣ́ла и҆́мать нꙋ́ждею восхи́титисѧ стра́шными а҆́гг҃лы, / всѣ́хъ забыва́етъ сро́дникѡвъ и҆ зна́емыхъ, / и҆ пече́тсѧ ѡ҆ бꙋ́дꙋщихъ сꙋди́лищей стоѧ́нїи, ꙗ҆̀же сꙋеты̀, и҆ многотрꙋ́дныѧ пло́ти разрѣше́нїи: / тогда̀ сꙋдїю̀ молѧ́ще, всѝ помо́лимсѧ, / да прости́тъ гдⷭ҇ь, ꙗ҆̀же содѣ́ла.

Прїиди́те бра́тїе, во гро́бѣ ᲂу҆́зримъ пе́пелъ и҆ пе́рсть, и҆з̾ неѧ́же созда́хомсѧ. / ка́мѡ ны́нѣ и҆́демъ; что́ же бы́хомъ, / кі́й ᲂу҆бо́гъ и҆лѝ бога́тъ; и҆лѝ кі́й влⷣка; / кі́й же свобо́дь; и҆ не вси́ ли пе́пелъ; / добро́та лица̀ согнѝ, и҆ ю҆́ности ве́сь цвѣ́тъ ᲂу҆вѧдѝ сме́рть.

Вои́стиннꙋ сꙋета̀ и҆ тлѣ́нїе, / всѧ̑ житє́йскаѧ, ви́ды, и҆ безсла̑внаѧ: / вси́ бо и҆счеза́емъ, всѝ ᲂу҆́мремъ, / ца́рїе же и҆ кнѧ́зи, / сꙋдїи̑ и҆ наси́льницы, / бога́тїи и҆ ᲂу҆бо́зїи, / и҆ всѐ є҆стество̀ человѣ́ческое: / ны́нѣ бо, и҆̀же и҆ногда̀ въ житїѝ, во гро́бы верга́ютсѧ, / и҆̀хже да ᲂу҆поко́итъ гдⷭ҇ь, помо́лимсѧ.

Всѝ тѣле́снїи ны́нѣ ѻ҆рга́ны пра́здни зрѧ́тсѧ, / и҆̀же пре́жде ма́ла дви́жими бѧ́хꙋ, / всѝ недѣйстви́тельни, ме́ртви, нечꙋ́вственни: / ѻ҆́чи бо заидо́ша, свѧза́стѣсѧ но́зѣ, / рꙋ́цѣ безмо́лвствꙋетѣ, и҆ слꙋ́хъ съ ни́ми: / ѧ҆зы́къ молча́нїемъ заключи́сѧ, гро́бꙋ предае́тсѧ. / вои́стиннꙋ сꙋета̀ всѧ̑ человѣ́чєскаѧ.

Сп҃са́й надѣ́ющыѧсѧ на тѧ̀, / мт҃и незаходи́магѡ сл҃нца бг҃ороди́тельнице: / ᲂу҆молѝ мл҃твами твои́ми пребл҃га́го бг҃а, / ᲂу҆поко́ити, мо́лимсѧ, ны́нѣ преста́вльшагосѧ, / и҆дѣ́же ᲂу҆покоева́ютсѧ првⷣныхъ дꙋ́си: / бж҃е́ственныхъ бла̑гъ наслѣ́дника покажѝ, / во дво́рѣхъ првⷣныхъ, / въ па́мѧть, всенепоро́чнаѧ, вѣ́чнꙋю.

Сла́ва, гла́съ ѕ҃: Зрѧ́ще мѧ̀ безгла́сна, / и҆ бездыха́нна предлежа́ща, / воспла́чите ѡ҆ мнѣ̀ бра́тїе и҆ дрꙋ́зи, / срѡ́дницы и҆ зна́емїи: / вчера́шнїй бо де́нь бесѣ́довахъ съ ва́ми, / и҆ внеза́пꙋ на́йде на мѧ̀ стра́шный ча́съ сме́ртный: / но прїиди́те всѝ лю́бѧщїи мѧ̀, / и҆ цѣлꙋ́йте мѧ̀ послѣ́днимъ цѣлова́нїемъ: / не ктомꙋ́ бо съ ва́ми похождꙋ̀, / и҆лѝ собесѣ́дꙋю про́чее. / къ сꙋдїи́ бо ѿхождꙋ̀, / и҆дѣ́же нѣ́сть лицепрїѧ́тїѧ: / ра́бъ бо и҆ влады́ка вкꙋ́пѣ предстоѧ́тъ, / ца́рь и҆ во́инъ, бога́тый и҆ ᲂу҆бо́гїй / въ ра́внѣмъ досто́инствѣ: / кі́йждо бо ѿ свои́хъ дѣ́лъ, / и҆лѝ просла́витсѧ, и҆лѝ постыди́тсѧ. / но прошꙋ̀ всѣ́хъ и҆ молю̀, / непреста́ннѡ ѡ҆ мнѣ̀ моли́тесѧ хрⷭ҇тꙋ̀ бг҃ꙋ, / да не низведе́нъ бꙋ́дꙋ по грѣхѡ́мъ мои̑мъ, / на мѣ́сто мꙋче́нїѧ: / но да вчини́тъ мѧ̀, и҆дѣ́же свѣ́тъ живо́тный.

И҆ ны́нѣ, бг҃оро́диченъ, гла́съ то́йже: Мл҃твами ро́ждшїѧ тѧ̀ хрⷭ҇тѐ, / и҆ прⷣте́чи твоегѡ̀, / а҆пⷭ҇лѡвъ, прⷪ҇ро́кѡвъ, і҆ера́рхѡвъ, / прпⷣбныхъ, и҆ првⷣныхъ, и҆ всѣ́хъ ст҃ы́хъ, / ᲂу҆со́пшаго раба̀ твоего̀ ᲂу҆поко́й.

Та́же, Трист҃о́е. Прест҃а́ѧ трⷪ҇це: Ѻ҆́ч҃е на́шъ:

Сщ҃е́нникъ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Та́же, Со дꙋ́хи првⷣныхъ сконча́вшихсѧ, / дꙋ́шꙋ раба̀ твоегѡ̀ сп҃се ᲂу҆поко́й, / сохранѧ́ѧ ю҆̀ во бл҃же́нной жи́зни, / ꙗ҆́же ᲂу҆ тебѐ чл҃вѣколю́бче.

Въ поко́ищи твое́мъ гдⷭ҇и, / и҆дѣ́же всѝ ст҃і́и твоѝ ᲂу҆покоева́ютсѧ, / ᲂу҆поко́й и҆ дꙋ́шꙋ раба̀ твоегѡ̀, ꙗ҆́кѡ є҆ди́нъ є҆сѝ чл҃вѣколю́бецъ.

И҆ ны́нѣ: Е҆ди́на чⷭ҇таѧ и҆ непоро́чнаѧ дв҃о, бг҃а без̾ сѣ́мене ро́ждшаѧ, / молѝ сп҃сти́сѧ дꙋшѝ є҆гѡ̀.

Проше́нїе ѿ дїа́кона:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же првⷣнїи ᲂу҆покоѧ́ютсѧ.

Ли́къ: Гдⷭ҇и поми́лꙋй, три́жды.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

Дїа́конъ: Премꙋ́дрость.

І҆ере́й: Прест҃а́ѧ бцⷣе, спасѝ на́съ.

І҆ере́й: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

И҆ ѿпꙋ́стъ:

Воскр҃сы́й и҆з̾ ме́ртвыхъ, хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лъ, прпⷣбныхъ и҆ бг҃оно́сныхъ ѻ҆тє́цъ на́шихъ, и҆ всѣ́хъ ст҃ы́хъ, дꙋ́шꙋ ѿ на́съ преста́вльшагѡсѧ раба̀ своегѡ̀ , въ селе́нїихъ првⷣныхъ ᲂу҆чини́тъ, въ нѣ́дрѣхъ а҆враа́ма ᲂу҆поко́итъ, и҆ съ првⷣными сопричте́тъ, и҆ на́съ поми́лꙋетъ, ꙗ҆́кѡ бл҃гъ и҆ чл҃вѣколю́бецъ. А҆ми́нь.

А҆рхїере́й же и҆лѝ нача́льствꙋѧй і҆ере́й са́мъ глаго́летъ три́жды сїѐ:

Вѣ́чнаѧ твоѧ̀ па́мѧть, достобл҃же́нне и҆ приснопа́мѧтне бра́те на́шъ. Три́жды.

Дїа́конъ: Во бл҃же́нномъ ᲂу҆спе́нїи вѣ́чный поко́й пода́ждь гдⷭ҇и, ᲂу҆со́пшемꙋ рабꙋ̀ твоемꙋ̀ , и҆ сотворѝ є҆мꙋ̀ [є҆́й] вѣ́чнꙋю па́мѧть.

Та́же пѣвцы̀ пою́тъ три́жды: Вѣ́чнаѧ па́мѧть.

А҆́бїе же а҆рхїере́й, а҆́ще приключи́тсѧ та́мѡ бы́ти, и҆лѝ і҆ере́й чте́тъ мл҃твꙋ проща́льнꙋю велегла́снѡ:

Гдⷭ҇ь і҆и҃съ хрⷭ҇то́съ бг҃ъ на́шъ, и҆́же бж҃е́ствєннаѧ за́пѡвѣди ст҃ы̑мъ свои̑мъ ᲂу҆ч҃нкѡ́мъ и҆ а҆пⷭ҇лѡмъ да́вый, во є҆́же вѧза́ти и҆ рѣши́ти па́дшихъ грѣхѝ, и҆ ѿ ѻ҆́ныхъ па́ки мы̀ прїе́мше вины̑ то́йже твори́ти: да прости́тъ тебѐ, ча́до дх҃о́вное, а҆́ще что̀ содѣ́лалъ є҆сѝ въ ны́нѣшнѣмъ вѣ́цѣ во́льное и҆лѝ нево́льное, ны́нѣ и҆̀. при́снѡ, и҆ во вѣ́ки вѣкѡ́въ, а҆ми́нь.

И҆ та́кѡ взе́мше мо́щи ѿхо́димъ ко гро́бꙋ послѣ́дꙋющымъ всѣ̑мъ лю́демъ, пред̾идꙋ́щымъ же сщ҃е́нникѡмъ, и҆ пою́щымъ:

Ст҃ы́й бж҃е: Прест҃а́ѧ трⷪ҇це: Ѻ҆́ч҃е на́шъ: И҆ прѡ́чаѧ.

И҆ полага́ютсѧ мо́щи во гро́бъ: а҆рхїере́й же, и҆лѝ сщ҃е́нникъ, взе́мъ пе́рсть лопа́тою, крестови́днѡ ме́щетъ верхꙋ̀ моще́й, глаго́лѧ:

Гдⷭ҇нѧ землѧ̀, и҆ и҆сполне́нїе є҆ѧ̀ вселе́ннаѧ, и҆ всѝ живꙋ́щїи на не́й.

И҆ посе́мъ налива́етъ верхꙋ̀ є҆ле́й ѿ канди́ла, и҆лѝ сы́плютъ пе́пелъ ѿ кади́льницы, и҆ та́кѡ покрыва́ютъ ꙗ҆́кѡ ѻ҆бы́чнѡ гро́бъ, приглаго́лємымъ тропарє́мъ, гла́съ д҃:

И҆ ны́нѣ: Е҆ди́на чⷭ҇таѧ и҆ непоро́чнаѧ дв҃о, бг҃а без̾ сѣ́мене ро́ждшаѧ, / молѝ сп҃сти́сѧ дꙋшѝ є҆гѡ̀.

Проше́нїе ѿ дїа́кона:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шꙋ є҆гѡ̀, и҆дѣ́же првⷣнїи ᲂу҆покоѧ́ютсѧ.

Ли́къ: Гдⷭ҇и поми́лꙋй, три́жды.

Ли́къ: Пода́й гдⷭ҇и.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ глаго́летъ мл҃твꙋ сїю̀:

Дїа́конъ: Премꙋ́дрость.

І҆ере́й: Прест҃а́ѧ бцⷣе, спасѝ на́съ.

І҆ере́й: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

И҆ ѿпꙋ́стъ:

Та́же пѣвцы̀ пою́тъ три́жды: Вѣ́чнаѧ па́мѧть.