Канѡ́нъ ст҃и́телю хрⷭ҇то́вꙋ нїкола́ю чꙋдотво́рцꙋ
Молитвенное обращение о помощи, заступничестве и избавлении от бед.
Тропа́рь, гла́съ д҃:
Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀ ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ: ѻ҆́ч҃е свѧщеннонача́льниче нїко́лае, молѝ хрⷭ҇та̀ бг҃а, спасти́сѧ дꙋша́мъ на́шымъ.
Канѡ́нъ нїкола́а. Гла́съ д҃. Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̑ и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Па́стырю до́брый хрⷭ҇то́ва ста́да, ра́дꙋйсѧ, нїко́лае, ꙗ҆́кѡ мѵ́рѧнѡмъ ѻ҆те́цъ че́стенъ и҆ ᲂу҆чи́тель бы́лъ є҆сѝ: и҆ мнѣ̀ пода́ждь, ра́дꙋйсѧ тебѣ̀ приноси́ти.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Ро́ди земні́и стеце́мсѧ, ра́дꙋйсѧ приноси́ти ст҃и́телю, ра́дость бо прино́ситъ вселе́ннѣй неѡскꙋ́днѡ.
Сла́ва: И҆зба́вльшемꙋ трѝ воевѡ́ды ѿ ᲂу҆бїе́нїѧ непра́веднагѡ вопїе́мъ тѝ: ра́дꙋйсѧ, нїко́лае, застꙋ́пниче прибѣга́ющымъ под̾ кро́въ тво́й.
И҆ ны́нѣ: Бцⷣе дв҃о, ра́дꙋйсѧ, ра́дость ѿ а҆́гг҃ла прїе́мшаѧ, и҆ сп҃сѝ тебѐ велича́ющихъ.
Пѣ́снь г҃.
І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Никто́же прибѣга́ѧй под̾ кро́въ наде́жды твоеѧ̀, ѻ҆́ч҃е, то́щь ѿ тебѐ и҆схо́дитъ: но ра́дꙋйсѧ приносѧ́ тѝ, по́мощь прїе́млетъ, нїко́лае, ю҆́же и҆ мнѣ̀ пода́ждь, всебл҃же́нне.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
А҆́гг҃ли дивѧ́тсѧ твоемꙋ̀, прпⷣбне, те́пломꙋ застꙋпле́нїю, человѣ́цы же ра́дꙋютсѧ, прїе́млюще мл҃твами твои́ми и҆збавле́нїе ѿ напа́стей бѣсо́вскихъ: тѣ́мже ра́дꙋйсѧ, прино́симъ тѝ, нїко́лае прехва́льне.
Сла́ва: Шле́мъ, и҆ ѻ҆рꙋ́жїе непобѣди́мое на дїа́вола ты̀ є҆сѝ, хрⷭ҇тїа́нѡмъ же ᲂу҆твержде́нїе, и҆ і҆ера́рхѡмъ ᲂу҆добре́нїе, нїко́лае чꙋ́дне: ра́дꙋйсѧ, чꙋдотво́рче вели́кїй, ѡ҆бꙋрева́ємымъ ти́хое приста́нище.
И҆ ны́нѣ: Заче́нши зижди́телѧ своего̀, бцⷣе, родила̀ є҆сѝ творца̀ всѣ́хъ и҆ гдⷭ҇а, того̀ молѝ и҆зба́вити на́съ ѿ напа́стей: е҆ли̑ка бо хо́щеши, всѧ̑ мо́жеши, ꙗ҆́кѡ бл҃га́ѧ бл҃га́гѡ же роди́тельница.
Гдⷭ҇и, поми́лꙋй. [Три́жды.]
Конда́къ гла́съ г҃. Подо́бенъ: Дв҃а дне́сь:
Въ мѵ́рѣхъ, свѧ́те, свѧщеннодѣ́йствитель показа́лсѧ є҆сѝ, хрⷭ҇то́во бо, прпⷣбне, є҆ѵⷢ҇лїе и҆спо́лнивъ, положи́лъ є҆сѝ дꙋ́шꙋ твою̀ ѡ҆ лю́дехъ твои́хъ, и҆ спа́слъ є҆сѝ непови̑нныѧ ѿ сме́рти. сегѡ̀ ра́ди ѡ҆свѧти́лсѧ є҆сѝ, ꙗ҆́кѡ вели́кїй таи́нникъ бж҃їѧ бл҃года́ти.
І҆́косъ: Воспои́мъ ны́нѣ ст҃и́телѧ пѣ́сньми, мѵ̑рскимъ лю́демъ па́стырѧ и҆ ᲂу҆чи́телѧ, да моли́твами є҆гѡ̀ просвѣти́мсѧ: се́ бо ꙗ҆ви́сѧ чи́стъ ве́сь, нетлѣ́ненъ дꙋ́хомъ, хрⷭ҇тꙋ̀ приносѧ̀ же́ртвꙋ непоро́чнꙋ, чи́стꙋ, бг҃ꙋ бл҃гопрїѧ́тнꙋ, ꙗ҆́кѡ ст҃и́тель ѡ҆чище́нъ и҆ дꙋше́ю и҆ тѣ́ломъ. тѣ́мже сы́й и҆́стиннѡ цр҃кве предста́тель и҆ побо́рникъ сеѧ̀, ꙗ҆́кѡ вели́кїй таи́нникъ бж҃їѧ бл҃года́ти.
Сѣда́ленъ, гла́съ и҃. Подо́бенъ: Премꙋ́дрости:
Возше́дъ на высотꙋ̀ добродѣ́телей, и҆ бжⷭ҇твенными ѿтꙋ́дꙋ, ѻ҆́ч҃е, ѡ҆зари́всѧ сїѧ̑нїи чꙋде́съ, пресвѣ́телъ вои́стиннꙋ ꙗ҆ви́лсѧ є҆сѝ мі́рови па́стырь, на́мъ въ напа́стехъ сы́й предста́тель непобѣди́мь: тѣ́мже, пресла́внѡ врага̀ побѣди́въ, лжꙋ̀ ѿгна́лъ є҆сѝ, и҆ человѣ́ки спа́слъ є҆сѝ ѿ сме́рти, нїко́лае, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Сла́ва, дрꙋгі́й сѣда́ленъ, гла́съ то́йже:
Рѣкꙋ̀ и҆сцѣле́нїй ѻ҆би́льнѣ и҆злива́ющꙋю и҆ и҆сто́чникъ тѧ̀ чꙋде́съ неѡскꙋ́дный показа̀, нїко́лае, ми́лости бе́здна: тѧ́жкими бо недꙋ́гами го́рцѣ дрꙋчи́мїи, и҆ ѕлоключе́ньми житїѧ̀ лю́тѣ мꙋ́чимїи, всѧ̑кїѧ скѡ́рби цѣле́бнꙋю вои́стиннꙋ ѡ҆брѣта́ютъ лѣчбꙋ̀, те́плое твоѐ защище́нїе. сегѡ̀ ра́ди вопїе́мъ тѝ: моли́сѧ хрⷭ҇тꙋ̀ бг҃ꙋ, прегрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
И҆ ны́нѣ, бг҃оро́диченъ: Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆бл҃жа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Пѣ́снь д҃.
І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
А҆пⷭ҇лѡмъ равнопрⷭ҇то́льне, ра́дꙋйсѧ, нїко́лае, ꙗ҆́кѡ а҆́рїевꙋ є҆́ресь посрами́лъ є҆сѝ, и҆ велїа́рѡва шата̑нїѧ низложи́лъ є҆сѝ, твои́ми мл҃твами: не преста́й молѧ̀ ѡ҆ рабѣ́хъ твои́хъ.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Ю҆́ношꙋ ѻ҆́наго ѿ рꙋкѝ а҆ми́ры срацы́нскагѡ и҆зба́вилъ є҆сѝ, роди́телємъ же є҆гѡ̀ ра́дость дарова́лъ є҆сѝ: тѣ́мъ тѝ съ ни́ми и҆ мы̀ ра́дꙋйсѧ прино́симъ, нїко́лае прпⷣбне.
Сла́ва: Трѝ воево́ды ѿ ᲂу҆бїе́нїѧ непра́веднагѡ, чꙋдотво́рче, сп҃слъ є҆сѝ, ꙗ҆́вльсѧ во снѣ̀ царю̀ бл҃гочести́вомꙋ, и҆ запрети́въ є҆мꙋ̀, и҆ ѿ ни́хъ ра́дꙋйсѧ, прїѧ́лъ є҆сѝ, нїко́лае: и҆ менѐ ᲂу҆крѣпѝ твои́ми мл҃твами.
И҆ ны́нѣ: Пребл҃гослове́ннаѧ бцⷣе, ра́дꙋйсѧ, ꙗ҆́кѡ є҆сѝ цр҃ѧ̀ всѣ́хъ прⷭ҇то́лъ, херꙋві́мѡвъ вы́шшїй: не закоснѝ, молѧ̀ своего̀ сн҃а и҆ бг҃а на́шего, ѡ҆ чтꙋ́щихъ тѧ̀ при́снѡ, съ нїкола́емъ бл҃же́ннымъ.
Пѣ́снь є҃.
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
А҆пⷭ҇лѡвъ тезоиме́нне, со а҆́гг҃лы равностоѧ́телю прⷭ҇то́ла влⷣчнѧ неѿстꙋ́пнѣ, а҆́рїа безꙋ́мновавшаго посрами́лъ є҆сѝ: сегѡ̀ ра́ди вопїе́мъ тѝ, нїко́лае, ра́дꙋйсѧ, ст҃и́телємъ ᲂу҆добре́нїе и҆ сто́лпе цр҃ко́вный.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Рꙋ́кꙋ мѝ да́ждь, нїко́лае, по́мощи, молѧ́сѧ ко гдⷭ҇ꙋ, зане́же бꙋ́рѧ потоплѧ́етъ мѧ̀ грѣхо́внаѧ: и҆ приведѝ къ ти́хомꙋ приста́нищꙋ покаѧ́нїѧ, ѻ҆́ч҃е, твои́ми мл҃твами.
Сла́ва: А҆́ще и҆ мно́гѡ беззако́нновахъ, нїко́лае, но не ѿстꙋпа́ю наде́жды покро́ва твоегѡ̀, всегда̀ ра́дꙋйсѧ, приносѧ̀ тѝ: ты̀ мѧ̀ и҆зба́ви ѿ всѧ́кїѧ ско́рби и҆ бѣды̀, е҆ли̑ка бо хо́щеши, всѧ̑ мо́жеши.
И҆ ны́нѣ: Ѻ҆́блаче превы́шшїй нб҃съ, ра́дꙋйсѧ, и҆ска́пающїй на́мъ ка́плю, бцⷣе всебл҃га́ѧ, пода́ждь ѿ бг҃а лю́демъ на́шимъ побѣ́дꙋ на ва́рвары, со і҆ера́рхомъ нїкола́емъ того̀ молѧ̀.
Пѣ́снь ѕ҃.
І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Дрꙋ́гъ хрⷭ҇то́въ и҆ вторы́й пе́тръ, ꙗ҆ви́лсѧ є҆сѝ, ѻ҆́ч҃е, ра́дꙋйсѧ, ꙗ҆́кѡ є҆сѝ сто́лпъ цр҃ко́вный, и҆ чꙋде́сный ѻ҆рга́нъ, дх҃омъ ст҃ы́мъ чꙋдодѣ́йствꙋѧй и҆ брѧца́ѧй: тѣ́мже, нїко́лае, ра́дꙋйсѧ прино́симъ тѝ всегда̀.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Оу҆слы́шавъ кѡнстанті́нъ цр҃ь бл҃гочести́вый во снѣ̀ прещє́нїѧ твоѧ҆, со а҆вла́вїемъ є҆па́рхомъ, ѡ҆ мꙋже́хъ ѻ҆́нѣхъ непра́веднѡ и҆мѣ́вшихъ поги́бнꙋти, вско́рѣ повелѣ̀ ѿпꙋсти́ти и҆̀хъ: тебѣ̀ же ра́дꙋйсѧ вопїѧ́ше, нїко́лае.
Сла́ва: Кораблю̀ ѻ҆́номꙋ потопа́ющꙋ въ мо́ри ты̀, ѻ҆́ч҃е, бы́л є҆сѝ ко́рмчїй: и҆ мнѣ̀ лю́тѣ ѡ҆бꙋрева́емꙋ ѿ помышле́нїй бѣсо́вскихъ, да́ждь ꙗ҆́дрило бл҃га́гѡ ра́зꙋма во ᲂу҆мѣ̀ и҆ въ се́рдцѣ, ꙗ҆́кѡ да всегда̀ ра́дꙋйсѧ приношꙋ̀ тѝ, нїко́лае прехва́льне.
И҆ ны́нѣ: Ра́дꙋйсѧ, пречⷭ҇таѧ дв҃о, ра́дꙋйсѧ, мі́рꙋ ᲂу҆твержде́нїе. ра́дꙋйсѧ, ꙗ҆́кѡ родила̀ є҆сѝ сн҃а, всѣ́хъ бг҃а: того̀ молѝ, бцⷣе пренепоро́чнаѧ, сп҃сти́сѧ дꙋша́мъ на́шымъ.
Та́же, чтѝ кондакѝ и҆ і҆́косы:
Пѣ́снь з҃.
І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, бл҃гослове́нъ є҆сѝ.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Ст҃е нїко́лае, ст҃и́телю хрⷭ҇то́въ ра́дꙋйсѧ, ты̀ бо є҆сѝ ра́дость всѣ̑мъ неизглаго́ланнаѧ, и҆ мнѣ̀ пода́ждь рꙋ́кꙋ по́мощи, да глаго́лю тѝ: ра́дꙋйсѧ, всебл҃же́нне.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Е҆гда̀ ᲂу҆слы́шаша воевѡ́ды ѿпꙋще́нїе и҆з̾ темни́цы повелѣ́нїемъ твои́мъ, взе́мше свѣ́щники принесо́ша тѝ со свѣща́ми, ве́лїимъ вопїю́ще гла́сомъ: ра́дꙋйсѧ, ѻ҆́ч҃е прпⷣбне, и҆збавле́нїе на́ше.
Сла́ва: Нѣ́когда ᲂу҆слы́шалъ є҆сѝ въ темни́цѣ свѧ҆занныѧ, ᲂу҆слы́ши и҆ менѐ, нїко́лае, ра́дꙋйсѧ приносѧ́ща тѝ, и҆ и҆схи́ти мѧ̀ ѻ҆гнѧ̀ гее́нскагѡ.
И҆ ны́нѣ: Мр҃і́е гпⷭ҇жѐ, мт҃и и҆зба́вителѧ, прїими́ мѧ̀, ка́ющагосѧ, и҆ прибѣга́ющаго под̾ кро́въ тво́й, ꙗ҆́кѡ да не престаѧ̀ вопїю̀ къ тебѣ̀: ра́дꙋйсѧ, бл҃года́тнаѧ бцⷣе приснодв҃о.
Пѣ́снь и҃.
І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
А҆пⷭ҇лѡвъ сопрⷭ҇то́льниче, со а҆́гг҃лы слꙋжи́телю ст҃ѣ́й трⷪ҇цѣ, нїко́лае прехва́льне, ра́дꙋйсѧ: и҆ мнѣ̀ да́рꙋй ра́дость мл҃твами твои́ми.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Ко́рмчїй ѡ҆бꙋрева́емыхъ, нїко́лае, ра́дꙋйсѧ: и҆ бꙋ́рю мои́хъ страсте́й, ꙗ҆́же ѿ прило́га бѣсо́вскагѡ, ᲂу҆ти́ши, ꙗ҆́кѡ про́чее не могꙋ̀ терпѣ́ти, но вопїю̀: ра́дꙋйсѧ, помо́щниче мо́й и҆ те́плый предста́телю.
Сла́ва: Ѽ коли́ка тꙋга̀ ѡ҆бдержи́тъ мѧ̀ ѿ стрѣлѧ́нїй бѣсо́вскихъ: и҆ ꙗ҆́звы терпѣ́ти мѝ нѣ́сть мо́щно, пла́стырѧ приложи́ти нѣ́сть врача̀: но ты̀ мѝ приложѝ пла́стырь, и҆ є҆ле́й мл҃твъ твои́хъ, нїко́лае, да зовꙋ̀ тѝ: ра́дꙋйсѧ, ѻ҆́ч҃е прпⷣбне.
И҆ ны́нѣ: Кꙋпино̀ неопали́маѧ, ра́дꙋйсѧ, ю҆́же мѡѷсе́й ви́дѣ на сїна́и, и҆ лѣ́ствице, ю҆́же і҆а́кѡвъ ви́дѣ, пребл҃гослове́ннаѧ бцⷣе приснодв҃о.
Пѣ́снь ѳ҃.
І҆рмо́съ: Всѧ́къ земноро́дный да взыгра́етсѧ дх҃омъ просвѣща́емъ, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чи́стаѧ приснодв҃о.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
Льсти́ваго стрѣлѧ̑нїѧ ѡ҆бдержа́тъ мѧ̀, и҆ стремлє́нїѧ грѣхѡ́внаѧ: но надѣ́ѧсѧ на покро́въ тво́й, къ тебѣ̀ прибѣга́ю, ѻ҆́ч҃е, ꙗ҆́кѡ да ѿжене́ши ѿ менѐ всѧ̑ ле́сти лꙋка́вагѡ, да зовꙋ̀ тѝ: ра́дꙋйсѧ, нїко́лае.
Припѣ́въ: Ст҃и́телю ѻ҆́ч҃е нїко́лае, молѝ бг҃а ѡ҆ на́съ.
А҆́рїа безꙋ́мновавшаго посрами́лъ є҆сѝ, пла́мень же є҆ресе́й ᲂу҆гаси́лъ є҆сѝ, воевѡ́ды въ темни́цѣ свѧ́занныѧ ᲂу҆слы́шалъ є҆сѝ, и҆ ѿ ни́хъ ра́дꙋйсѧ прїѧ́лъ є҆сѝ: и҆ мы̀ вопїе́мъ тѝ, нїко́лае: ра́дꙋйсѧ, всебл҃же́нне.
Сла́ва: А҆́грика ѻ҆́наго ᲂу҆слы́шавый, и҆ сы́на є҆гѡ̀ васі́лїа ѿ а҆ми́ры восхи́тивый, и҆ предста́вивый роди́телємъ здра́ва во є҆ди́нъ ча́съ ѿ срацы́нъ, и҆ мнѣ̀ молѧ́щꙋсѧ, и҆схи́ти недꙋ́гꙋщꙋю мою̀ дꙋ́шꙋ, и҆ грѣхѝ ѡ҆бложе́ннꙋю, ѿ ѻ҆гнѧ̀ гее́нскагѡ, нїко́лае.
И҆ ны́нѣ: Цр҃и́це, всѣ́хъ цр҃ѧ̀ ро́ждшаѧ и҆ носи́вшаѧ носѧ́щаго всю̀ тва́рь, сп҃сѝ мѧ̀, велича́ющаго тѧ̀, прест҃а́ѧ влⷣчце.
Свѣти́ленъ. Подо́бенъ: Жєны̀ ᲂу҆слы́шите.
Вели́каго а҆рхїпа́стырѧ и҆ і҆ера́рха всѝ, предсѣда́телѧ мѷрлѷкі́йскаго нїкола́а восхва́лимъ: мно́ги бо мꙋ́жы спасѐ, непра́веднѡ ᲂу҆мре́ти и҆мꙋ́щыѧ. и҆ царю̀ ꙗ҆влѧ́етсѧ со а҆вла́вїемъ во снѣ̀, рѣшѧ̀ непра́ведный сꙋ́дъ.
Сла́ва: Вельми́ тѧ просла́ви въ чꙋдесѣ́хъ гдⷭ҇ь, и҆ жи́ва и҆ по концѣ̀, і҆ера́рше нїко́лае: кто́ бо ѿ любвѐ вѣ́ры то́кмѡ ст҃о́е твоѐ и҆́мѧ призове́тъ, и҆ не а҆́бїе ᲂу҆слы́шанъ, те́пла тѧ̀ предста́телѧ ѡ҆брѣта́етъ;
И҆ ны́нѣ, бг҃оро́диченъ: Мꙋ́дрость ѵ҆поста́снꙋю, и҆ сло́во пресꙋ́щественное, и҆ врача̀ всѣ́хъ хрⷭ҇та̀ ро́ждши, дв҃о, гноє́нїѧ и҆ ꙗ҆́звы дꙋшѝ моеѧ̀ и҆сцѣлѝ лю̑тыѧ и҆ многовре́мєнныѧ, и҆ срⷣца моегѡ̀ стра̑стнаѧ помышлє́нїѧ ᲂу҆мертвѝ.
Мл҃твы ст҃и́телю нїкола́ю, а҆рхїепⷭ҇кпꙋ мѷрлѷкі́йскомꙋ. Мл҃тва а҃:
Ѽ всехва́льный и҆ всечтⷭ҇ны́й а҆рхїере́ю, вели́кїй чꙋдотво́рче, ст҃и́телю хрⷭ҇то́въ, ѻ҆́тче нїко́лае, человѣ́че бж҃їй и҆ вѣ́рный ра́бе, мꙋ́жꙋ жела́нїй, сосꙋ́де и҆збра́нный, крѣ́пкїй сто́лпе цр҃ко́вный, свѣти́льниче пресвѣ́тлый, ѕвѣздо̀ ѡ҆сїѧва́ющаѧ и҆ ѡ҆свѣща́ющаѧ всю̀ вселе́ннꙋю! Ты̀ є҆сѝ првⷣникъ, ꙗ҆́кѡ фі́нїѯъ процвѣты́й, насажде́нный во дво́рѣхъ гдⷭ҇а своегѡ̀: живы́й въ мѵ́рѣхъ, мѵ́ромъ ѡ҆бл҃гоꙋха́лъ є҆сѝ, и҆ мѵ́ро приснотекꙋ́щее бл҃года́ти бж҃їѧ и҆сточа́еши: твои́мъ ше́ствїемъ, прест҃ы́й ѻ҆́тче, мо́ре ѡ҆ст҃и́сѧ, є҆гда̀ многочꙋдє́сныѧ твоѧ̑ мо́щи ше́ствовахꙋ во гра́дъ ба́рскїй, ѿ восто́ка до за́пада хвали́ти и҆́мѧ гдⷭ҇не. ѽ преизѧ́щный и҆ преди́вный чꙋдотво́рче, ско́рый помо́щниче, те́плый застꙋ́пниче, па́стырю предо́брый, сп҃са́ѧй слове́сное ста́до ѿ всѧ́кихъ бѣ́дъ! тебѐ прославлѧ́емъ и҆ тебѐ велича́емъ, ꙗ҆́кѡ наде́ждꙋ всѣ́хъ хрⷭ҇тїа́нъ, и҆сто́чника чꙋде́съ, защи́тителѧ вѣ́рныхъ, премꙋ́драго ᲂу҆чи́телѧ, а҆́лчꙋщихъ корми́телѧ, пла́чꙋщихъ весе́лїе, наги́хъ ѡ҆дѣѧ́нїе, болѧ́щихъ врача̀, по мо́рю пла́вающихъ ᲂу҆пра́вителѧ, плѣ́нникѡвъ свободи́телѧ, вдѡ́въ и҆ сиро́тъ пита́телѧ и҆ застꙋ́пника, цѣломꙋ́дрїѧ храни́телѧ, младе́нцєвъ кро́ткаго наказа́телѧ, ста́рыхъ ᲂу҆крѣпле́нїе, по́стникѡвъ наста́вника, трꙋжда́ющихсѧ ᲂу҆покое́нїе, ни́щихъ и҆ ᲂу҆бо́гихъ и҆з̾ѻби́льное бога́тство. Оу҆слы́ши на́съ молѧ́щихсѧ тебѣ̀ и҆ прибѣга́ющихъ под̾ кро́въ тво́й, ꙗ҆вѝ предста́тельство твоѐ ѡ҆ на́съ къ вы́шнемꙋ, и҆ и҆схода́тайствꙋй твои́ми бг҃опрїѧ́тными мл҃твами всѧ̑ полє́знаѧ ко сп҃се́нїю дꙋ́шъ и҆ тѣле́съ на́шихъ: сохранѝ ст҃ꙋ́ю ѡ҆би́тель сїю̀ [и҆лѝ_ хра́мъ се́й _] всѧ́кїй гра́дъ и҆ ве́сь, и҆ всѧ́кꙋю странꙋ̀ хрⷭ҇тїа́нскꙋю, и҆ лю́ди живꙋ́щыѧ, ѿ всѧ́кагѡ ѡ҆ѕлобле́нїѧ по́мощїю твое́ю. Вѣ́мы бо, вѣ́мы, ꙗ҆́кѡ мно́гѡ мо́жетъ мл҃тва првⷣнагѡ, поспѣшествꙋ́ющаѧ во бл҃го́е: тебе́ же првⷣнаго, по пребл҃гослове́ннѣй дв҃ѣ мр҃і́и, предста́телѧ ко всемлⷭ҇тивомꙋ бг҃ꙋ и҆́мамы, и҆ ко твоемꙋ̀, пребл҃гі́й ѻ҆́тче, те́пломꙋ хода́тайствꙋ и҆ застꙋпле́нїю смире́ннѡ притека́емъ. Ты̀ на́съ соблюдѝ, ꙗ҆́кѡ бо́дрый и҆ до́брый па́стырь, ѿ всѧ́кихъ врагѡ́въ, гꙋби́тельства, трꙋ́са, гра́да, гла́да, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ, и҆ во всѣ́хъ бѣда́хъ и҆ ско́рбехъ на́шихъ подава́й на́мъ рꙋ́кꙋ по́мощи, и҆ ѿве́рзи двє́ри милосе́рдїѧ бж҃їѧ: поне́же недосто́йни є҆смы̀ зрѣ́ти высотꙋ̀ нбⷭ҇нꙋю, ѿ мно́жества непра́вдъ на́шихъ: свѧ́зани є҆смы̀ ᲂу҆́зами грѣхо́вными, и҆ николи́же во́ли созда́телѧ на́шегѡ сотвори́хомъ, ни сохрани́хомъ повелѣ́нїй є҆гѡ̀. Тѣ́мже преклонѧ́емъ колѣ̑на сокрꙋше́ннагѡ и҆ смире́ннагѡ се́рдца на́шегѡ къ зижди́телю своемꙋ̀, и҆ твоегѡ̀ ѻ҆те́ческагѡ застꙋпле́нїѧ къ немꙋ̀ про́симъ: помозѝ на́мъ, ᲂу҆го́дниче бж҃їй, да не поги́бнемъ со беззакѡ́нїи на́шими: и҆зба́ви на́съ ѿ всѧ́кагѡ ѕла̀ и҆ ѿ всѧ́кїѧ ве́щи сопроти́вныѧ, ᲂу҆пра́ви ᲂу҆́мъ на́шъ, и҆ ᲂу҆крѣпѝ се́рдце на́ше въ пра́вой вѣ́рѣ, въ не́йже твои́мъ предста́тельствомъ и҆ хода́тайствомъ, ни ра́нами, ни преще́нїемъ, ни мо́ромъ, ни ко́имъ гнѣ́вомъ ѿ созда́телѧ своегѡ̀ ᲂу҆ма́лени бꙋ́демъ, но ми́рное здѣ̀ поживе́мъ житїѐ, и҆ да сподо́бимсѧ ви́дѣти бл҃га̑ѧ на землѝ живы́хъ, сла́вѧще ѻ҆ц҃а̀ и҆ сн҃а и҆ ст҃а́го дх҃а, є҆ди́наго въ трⷪ҇цѣ сла́вимаго и҆ покланѧ́емаго бг҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
Мл҃тва в҃:
Ѽ всест҃ы́й нїко́лае, ᲂу҆го́дниче преизрѧ́дный гдⷭ҇нь, те́плый на́шъ застꙋ́пниче, и҆ вездѣ̀ въ ско́рбехъ ско́рый помо́щниче! Помозѝ мнѣ̀ грѣ́шномꙋ и҆ ᲂу҆ны́ломꙋ, въ настоѧ́щемъ се́мъ житїѝ, ᲂу҆молѝ гдⷭ҇а бг҃а дарова́ти мѝ ѡ҆ставле́нїе всѣ́хъ мои́хъ грѣхѡ́въ, є҆ли́кѡ согрѣши́хъ ѿ ю҆́ности моеѧ̀, во все́мъ житїѝ мое́мъ, дѣ́ломъ, сло́вомъ, помышле́нїемъ и҆ всѣ́ми мои́ми чꙋ́вствы: и҆ во и҆схо́дѣ дꙋшѝ моеѧ̀ помози́ ми ѻ҆каѧ́нномꙋ, ᲂу҆молѝ гдⷭ҇а бг҃а всеѧ̀ тва́ри содѣ́телѧ, и҆зба́вити мѧ̀ воздꙋ́шныхъ мыта́рствъ и҆ вѣ́чнагѡ мꙋче́нїѧ: да всегда̀ прославлѧ́ю ѻ҆ц҃а̀, и҆ сн҃а, и҆ ст҃а́го дх҃а, и҆ твоѐ млⷭ҇тивное предста́тельство, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Мл҃тва г҃:
Ѽ всебл҃гі́й ѻ҆́тче нїко́лае, па́стырю и҆ ᲂу҆чи́телю всѣ́хъ, вѣ́рою притека́ющихъ ко твоемꙋ̀ застꙋпле́нїю и҆ те́плою мл҃твою тебѐ призыва́ющихъ! Ско́рѡ потщи́сѧ и҆ и҆зба́ви хрⷭ҇то́во ста́до ѿ волкѡ́въ гꙋбѧ́щихъ є҆̀: и҆ всѧ́кꙋ странꙋ̀ хрⷭ҇тїа́нскꙋю ѡ҆градѝ и҆ сохранѝ ст҃ы́ми твои́ми мл҃твами ѿ мїрска́гѡ мѧте́жа, трꙋ́са, наше́ствїѧ и҆ноплеме́нникѡвъ и҆ междоꙋсо́бныѧ бра́ни, ѿ гла́да, пото́па, ѻ҆гнѧ̀, меча̀ и҆ внеза́пныѧ сме́рти. И҆ ꙗ҆́коже поми́ловалъ є҆сѝ трїе́хъ мꙋже́й въ темни́цѣ сѣдѧ́щихъ, и҆ и҆зба́вилъ є҆сѝ и҆̀хъ ѿ царе́ва гнѣ́ва и҆ посѣче́нїѧ ме́чнагѡ: та́кѡ поми́лꙋй и҆ менѐ, ᲂу҆мо́мъ, сло́вомъ и҆ дѣ́ломъ во тьмѣ̀ грѣхѡ́въ сꙋ́ща, и҆ и҆зба́ви мѧ̀ ѿ гнѣ́ва бж҃їѧ и҆ вѣ́чныѧ ка́зни: ꙗ҆́кѡ да твои́мъ хода́тайствомъ и҆ по́мощїю, свои́мъ же милосе́рдїемъ и҆ бл҃года́тїю, хрⷭ҇то́съ бг҃ъ ти́хое и҆ безгрѣ́шное житїѐ да́стъ мѝ пожи́ти въ вѣ́цѣ се́мъ, и҆ и҆зба́витъ мѧ̀ ѿ шꙋ́їѧгѡ стоѧ́нїѧ, сподо́битъ же десна́гѡ со всѣ́ми ст҃ы́ми во вѣ́ки вѣкѡ́въ. А҆ми́нь.