Всено́щное бдѣ́нїе

На вели́цѣй вече́рни.

Прише́дъ і҆ере́й во хра́мъ ст҃ы́й, и҆ наложи́въ на себѐ є҆пїтрахи́ль, стоѧ̀ пред̾ црⷭ҇кими враты̀, глаго́летъ: Бл҃гослове́нъ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

И҆ ᲂу҆чине́нный чте́цъ глаго́летъ: А҆ми́нь. Сла́ва тебѣ̀, бж҃е на́шъ, сла́ва тебѣ̀. Цр҃ю̀ нбⷭ҇ный: Трист҃о́е. Прест҃а́ѧ трⷪ҇це: Ѻ҆́ч҃е на́шъ:

Возгла́съ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Чте́цъ: А҆ми́нь. Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды. И҆ ѱалмы̀ ѳ҃- гѡ часа̀. По не́мъ же ѿпꙋ́ста не быва́етъ, но глаго́летъ і҆ере́й нача́ло: Бл҃гослове́нъ бг҃ъ на́шъ:

И҆ чте́цъ: Прїиди́те, поклони́мсѧ: И҆ ѱало́мъ р҃г: Бл҃гословѝ дꙋшѐ моѧ̀ гдⷭ҇а, гдⷭ҇и бж҃е мо́й:

На бдѣ́нїи всено́щномъ дїа́конъ: Воста́ните!

Ли́къ: Гдⷭ҇и бл҃гословѝ.

Предстоѧ́тель возглаша́етъ си́це: Сла́ва ст҃ѣ́й, и҆ є҆диносꙋ́щнѣй, и҆ животворѧ́щей и҆ нераздѣ́льнѣй трⷪ҇цѣ, всегда̀, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

И҆ начина́етъ предстоѧ́тель, спою́щей и҆ про́чей бра́тїи:

Прїиди́те, поклони́мсѧ цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.

Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀ цр҃е́ви и҆ бг҃ꙋ на́шемꙋ.

Прїиди́те, поклони́мсѧ и҆ припаде́мъ є҆мꙋ̀.

[Ли́къ: Бл҃гословѝ дꙋшѐ моѧ̀ гдⷭ҇а: / Бл҃гослове́нъ є҆сѝ гдⷭ҇и. / Гдⷭ҇и бж҃е мо́й, возвели́чилсѧ є҆сѝ ѕѣлѡ̀: / Бл҃гослове́нъ є҆сѝ гдⷭ҇и. / Во и҆сповѣ́данїе и҆ въ велелѣ́потꙋ ѡ҆бле́клсѧ є҆сѝ. / Бл҃гослове́нъ є҆сѝ гдⷭ҇и. / Посредѣ̀ го́ръ про́йдꙋтъ во́ды. / Ди́вна дѣла̀ твоѧ̑ гдⷭ҇и. / Всѧ̑ премꙋ́дростїю сотвори́лъ є҆сѝ: / Сла́ва тѝ, гдⷭ҇и сотвори́вшемꙋ всѧ̑. ]

И҆ ѱало́мъ р҃г:

Бл҃гословѝ дꙋшѐ моѧ̀ гдⷭ҇а: гдⷭ҇и бж҃е мо́й, возвели́чилсѧ є҆сѝ ѕѣлѡ̀, во и҆сповѣ́данїе и҆ въ велелѣ́потꙋ ѡ҆бле́клсѧ є҆сѝ. ѡ҆дѣѧ́йсѧ свѣ́томъ ꙗ҆́кѡ ри́зою, простира́ѧй нб҃о ꙗ҆́кѡ ко́жꙋ. покрыва́ѧй вода́ми превы́спрєннѧѧ своѧ̑, полага́ѧй ѻ҆́блаки на восхожде́нїе своѐ, ходѧ́й на крилꙋ̀ вѣ́трєню. творѧ́й а҆́гг҃лы своѧ̑ дꙋ́хи и҆ слꙋги̑ своѧ̑ пла́мень ѻ҆́гненный. ѡ҆снова́ѧй зе́млю на тве́рди є҆ѧ̀, не преклони́тсѧ въ вѣ́къ вѣ́ка. бе́здна, ꙗ҆́кѡ ри́за ѡ҆дѣѧ́нїе є҆ѧ̀, на гора́хъ ста́нꙋтъ во́ды. ѿ запреще́нїѧ твоегѡ̀ побѣ́гнꙋтъ, ѿ гла́са гро́ма твоегѡ̀ ᲂу҆боѧ́тсѧ. восхо́дѧтъ го́ры, и҆ низхо́дѧтъ полѧ̀ въ мѣ́сто, є҆́же ѡ҆снова́лъ є҆сѝ и҆̀мъ. предѣ́лъ положи́лъ є҆сѝ, є҆гѡ́же не пре́йдꙋтъ, нижѐ ѡ҆братѧ́тсѧ покры́ти зе́млю. посыла́ѧй и҆сто́чники въ де́брѣхъ, посредѣ̀ го́ръ про́йдꙋтъ во́ды. напаѧ́ютъ всѧ̑ ѕвѣ́ри сє́льныѧ, ждꙋ́тъ ѻ҆на́гри въ жа́ждꙋ свою̀. на ты́хъ пти̑цы нбⷭ҇ныѧ привита́ютъ, ѿ среды̀ ка́менїѧ дадѧ́тъ гла́съ. напаѧ́ѧй го́ры ѿ превы́спреннихъ свои́хъ, ѿ плода̀ дѣ́лъ твои́хъ насы́титсѧ землѧ̀. прозѧба́ѧй травꙋ̀ скотѡ́мъ, и҆ ѕла́къ на слꙋ́жбꙋ человѣ́кѡмъ, и҆звестѝ хлѣ́бъ ѿ землѝ. и҆ вїно̀ весели́тъ се́рдце человѣ́ка, ᲂу҆ма́стити лицѐ є҆ле́емъ, и҆ хлѣ́бъ се́рдце человѣ́ка ᲂу҆крѣпи́тъ. насы́тѧтсѧ древа̀ польска̑ѧ, ке́дри лїва́нстїи, и҆̀хже є҆сѝ насади́лъ. та́мѡ пти̑цы вогнѣздѧ́тсѧ: є҆рѡді́ево жили́ще предводи́тельствꙋетъ и҆́ми. го́ры высѡ́кїѧ є҆ле́нємъ, ка́мень прибѣ́жище за́ѧцємъ. сотвори́лъ є҆́сть лꙋнꙋ̀ во времена̀, со́лнце позна̀ за́падъ сво́й. положи́лъ є҆сѝ тьмꙋ̀, и҆ бы́сть но́щь, въ не́йже про́йдꙋтъ всѝ ѕвѣ́рїе дꙋбра́внїи: скѵ́мни рыка́ющїи восхи́тити, и҆ взыска́ти ѿ бг҃а пи́щꙋ себѣ̀. возсїѧ̀ со́лнце, и҆ собра́шасѧ, и҆ въ ло́жахъ свои́хъ лѧ́гꙋтъ. и҆зы́детъ человѣ́къ на дѣ́ло своѐ, и҆ на дѣ́ланїе своѐ до ве́чера. ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ: и҆спо́лнисѧ землѧ̀ тва́ри твоеѧ̀. сїѐ мо́ре вели́кое и҆ простра́нное, та́мѡ га́ди, и҆́хже нѣ́сть числа̀, живѡ́тнаѧ ма̑лаѧ съ вели́кими. та́мѡ кораблѝ препла́ваютъ, ѕмі́й се́й, є҆го́же созда́лъ є҆сѝ рꙋга́тисѧ є҆мꙋ̀. всѧ̑ къ тебѣ̀ ча́ютъ, да́ти пи́щꙋ и҆̀мъ во бла́го вре́мѧ. да́вшꙋ тебѣ̀ и҆̀мъ, соберꙋ́тъ: ѿве́рзшꙋ тебѣ̀ рꙋ́кꙋ, всѧ́чєскаѧ и҆спо́лнѧтсѧ бл҃гости. ѿвра́щшꙋ же тебѣ̀ лицѐ возмѧтꙋ́тсѧ: ѿи́меши дꙋ́хъ и҆́хъ, и҆ и҆сче́знꙋтъ, и҆ въ пе́рсть свою̀ возвратѧ́тсѧ. по́слеши дх҃а твоего̀, и҆ сози́ждꙋтсѧ, и҆ ѡ҆бнови́ши лицѐ землѝ. бꙋ́ди сла́ва гдⷭ҇нѧ во вѣ́ки, возвесели́тсѧ гдⷭ҇ь ѡ҆ дѣ́лѣхъ свои́хъ: призира́ѧй на зе́млю, и҆ творѧ́й ю҆̀ трѧсти́сѧ: прикаса́ѧйсѧ гора́мъ, и҆ дымѧ́тсѧ. воспою̀ гдⷭ҇еви въ животѣ̀ мое́мъ: пою̀ бг҃ꙋ моемꙋ̀, до́ндеже є҆́смь. да ᲂу҆слади́тсѧ є҆мꙋ̀ бесѣ́да моѧ̀, а҆́зъ же возвеселю́сѧ ѡ҆ гдⷭ҇ѣ. да и҆сче́знꙋтъ грѣ̑шницы ѿ землѝ, и҆ беззакѡ́нницы, ꙗ҆́коже не бы́ти и҆̀мъ: бл҃гословѝ дꙋшѐ моѧ̀ гдⷭ҇а.

Со́лнце позна̀ за́падъ сво́й: положи́лъ є҆сѝ тьмꙋ̀ и҆ бы́сть но́щь. ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

І҆ере́й же, пред̾ ст҃ы́ми две́рьми ста́въ ѿкрове́нною главо́ю, глаго́летъ моли̑твы свѣти̑льничныѧ. И҆спо́лньшꙋсѧ же предначина́тельномꙋ ѱалмꙋ̀, глаго́летъ дїа́конъ є҆ктенїю̀ сїю̀:

Е҆ктенїа̀ вели́каѧ.

Дїа́конъ: Ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й, и҆ соедине́нїи всѣ́хъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ вели́комъ господи́нѣ и҆ ѻ҆ц҃ѣ̀ на́шемъ, свѧтѣ́йшемъ патрїа́рхѣ ,_ и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ ] , честнѣ́мъ пресвѵ́терствѣ, во хрⷭ҇тѣ̀ дїа́конствѣ, ѡ҆ все́мъ при́чтѣ и҆ лю́дехъ, гдⷭ҇ꙋ помо́лимсѧ.

Ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ гра́дѣ се́мъ [и҆лѝ_ ѡ҆ ве́си се́й, и҆лѝ ѡ҆ ст҃ѣ́й ѻ҆би́тели се́й _], всѧ́комъ гра́дѣ, странѣ̀, и҆ вѣ́рою живꙋ́щихъ въ ни́хъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ бл҃горастворе́нїи воздꙋ́хѡвъ, ѡ҆ и҆з̾ѻби́лїи плодѡ́въ земны́хъ, и҆ вре́менѣхъ ми́рныхъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ пла́вающихъ, пꙋтеше́ствꙋющихъ, недꙋ́гꙋющихъ, стра́ждꙋщихъ, плѣне́нныхъ, и҆ ѡ҆ спасе́нїи и҆́хъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Ли́къ: Тебѣ̀, гдⷭ҇и.

Возглаше́нїе: Ꙗ҆́кѡ подоба́етъ тебѣ̀ всѧ́каѧ сла́ва, че́сть, и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Та́же каѳі́смꙋ а҃, Бл҃же́нъ мꙋ́жъ: А҆́ще ᲂу҆́бѡ є҆́сть гдⷭ҇скїй пра́здникъ, и҆лѝ бг҃оро́диченъ, и҆лѝ ст҃а́гѡ вели́кагѡ, въ ни́хже пое́тсѧ полѷеле́й, пое́мъ стїхѝ ѱалмѡ́въ сїѧ̑:

Бл҃же́нъ мꙋ́жъ:

Бл҃же́нъ мꙋ́жъ, и҆́же не и҆́де на совѣ́тъ нечести́выхъ: А҆ллилꙋ́їа. Три́жды.

Ꙗ҆́кѡ вѣ́сть гдⷭ҇ь пꙋ́ть првⷣныхъ, и҆ пꙋ́ть нечести́выхъ поги́бнетъ. А҆ллилꙋ́їа. Три́жды.

Рабо́тайте гдⷭ҇еви со стра́хомъ, и҆ ра́дꙋйтесѧ є҆мꙋ̀ со тре́петомъ. А҆ллилꙋ́їа. Три́жды.

Бл҃же́ни всѝ надѣ́ющїисѧ на́нь. А҆ллилꙋ́їа. Три́жды.

Воскрⷭ҇нѝ, гдⷭ҇и, сп҃си́ мѧ, бж҃е мо́й: А҆ллилꙋ́їа. Три́жды.

Гдⷭ҇не є҆́сть сп҃се́нїе, и҆ на лю́дехъ твои́хъ бл҃гослове́нїе твоѐ. А҆ллилꙋ́їа. Три́жды.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

Е҆ктенїа̀ ма́лаѧ.

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Ли́къ: Тебѣ̀, гдⷭ҇и.

Возглаша́етъ сщ҃е́нникъ: Ꙗ҆́кѡ твоѧ̀ держа́ва, и҆ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

И҆ а҆́бїе, Гдⷭ҇и воззва́хъ, въ прилꙋчи́вшїйсѧ гла́съ:

Гдⷭ҇и, воззва́хъ къ тебѣ̀, ᲂу҆слы́ши мѧ̀. / ᲂу҆слы́ши мѧ̀ гдⷭ҇и.

Первы́й ли́къ: Гдⷭ҇и, воззва́хъ къ тебѣ̀, ᲂу҆слы́ши мѧ̀: / вонмѝ гла́сꙋ моле́нїѧ моегѡ̀, / внегда̀ воззва́ти мѝ къ тебѣ̀. / ᲂу҆слы́ши мѧ̀ гдⷭ҇и.

Вторы́й ли́къ: Да и҆спра́витсѧ мл҃тва моѧ̀, / ꙗ҆́кѡ кади́ло пред̾ тобо́ю, / воздѣѧ́нїе рꙋкꙋ̀ моє́ю, / же́ртва вече́рнѧѧ. / ᲂу҆слы́ши мѧ̀ гдⷭ҇и.

И҆ по чи́нꙋ стїхѝ: Положѝ, гдⷭ҇и, хране́нїе ᲂу҆стѡ́мъ мои̑мъ, и҆ две́рь ѡ҆гражде́нїѧ ѡ҆ ᲂу҆стна́хъ мои́хъ. не ᲂу҆клонѝ се́рдце моѐ въ словеса̀ лꙋка́вствїѧ, непщева́ти вины̀ ѡ҆ грѣсѣ́хъ. съ человѣ́ки дѣ́лающими беззако́нїе, и҆ не сочтꙋ́сѧ со и҆збра́нными и҆́хъ. нака́жетъ мѧ̀ пра́ведникъ млⷭ҇тїю, и҆ ѡ҆бличи́тъ мѧ̀: є҆ле́й же грѣ́шнагѡ да не нама́ститъ главы̀ моеѧ̀. ꙗ҆́кѡ є҆щѐ и҆ мл҃тва моѧ̀ во бл҃говоле́нїихъ и҆́хъ, поже́рты бы́ша при ка́мени сꙋдїи̑ и҆́хъ. ᲂу҆слы́шатсѧ глаго́ли моѝ, ꙗ҆́кѡ возмого́ша: ꙗ҆́кѡ то́лща землѝ просѣ́десѧ на землѝ, расточи́шасѧ кѡ́сти и҆́хъ при а҆́дѣ. ꙗ҆́кѡ къ тебѣ̀ гдⷭ҇и, гдⷭ҇и, ѻ҆́чи моѝ, на тѧ̀ ᲂу҆пова́хъ, не ѿимѝ дꙋ́шꙋ мою̀. сохрани́ мѧ ѿ сѣ́ти, ю҆́же соста́виша мѝ, и҆ ѿ собла̑знъ дѣ́лающихъ беззако́нїе. падꙋ́тъ во мре́жꙋ свою̀ грѣ̑шницы: є҆ди́нъ є҆́смь а҆́зъ, до́ндеже прейдꙋ̀.

Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ ко гдⷭ҇ꙋ помоли́хсѧ. пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщꙋ̀. внегда̀ и҆счеза́ти ѿ менє̀ дꙋ́хꙋ моемꙋ̀, и҆ ты̀ позна́лъ є҆сѝ стєзѝ моѧ̑. на пꙋтѝ се́мъ, по немꙋ́же хожда́хъ, скры́ша сѣ́ть мнѣ̀. смотрѧ́хъ ѡ҆деснꙋ́ю и҆ возглѧ́дахъ, и҆ не бѣ̀ зна́ѧй менє̀. поги́бе бѣ́гство ѿ менє̀, и҆ нѣ́сть взыска́ѧй дꙋ́шꙋ мою̀. воззва́хъ къ тебѣ̀ гдⷭ҇и, рѣ́хъ: ты̀ є҆сѝ ᲂу҆пова́нїе моѐ, ча́сть моѧ̀ є҆сѝ на землѝ живы́хъ. вонмѝ моле́нїю моемꙋ̀, ꙗ҆́кѡ смири́хсѧ ѕѣлѡ̀: и҆зба́ви мѧ̀ ѿ гонѧ́щихъ мѧ̀, ꙗ҆́кѡ ᲂу҆крѣпи́шасѧ па́че менє̀.

На і҃, стїхи̑ры: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.

Менє̀ ждꙋ́тъ пра́вєдницы, до́ндеже возда́си мнѣ̀.

На и҃: И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и, ᲂу҆слы́ши гла́съ мо́й.

Да бꙋ́дꙋтъ ᲂу҆́ши твоѝ, вне́млющѣ гла́сꙋ моле́нїѧ моегѡ̀.

На ѕ҃: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.

И҆́мене ра́ди твоегѡ̀ потерпѣ́хъ тѧ̀, гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.

На д҃: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.

Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

На в҃: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.

Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Сла́ва: Ст҃а́гѡ мине́и. И҆ ны́нѣ: Бг҃оро́диченъ. А҆́ще нѣ́сть ст҃а́гѡ: Сла́ва, и҆ ны́нѣ: Бг҃оро́диченъ.

Мл҃тва вхо́да:

І҆ере́й: Ве́черъ, и҆ заꙋ́тра, и҆ полꙋ́дне, хва́лимъ, бл҃гослови́мъ, бл҃годари́мъ и҆ мо́лимсѧ тебѣ̀, влⷣко всѣ́хъ: и҆спра́ви моли́твꙋ на́шꙋ, ꙗ҆́кѡ кади́ло пред̾ тобо́ю, и҆ не ᲂу҆клонѝ серде́цъ на́шихъ въ словеса̀ и҆лѝ въ помышлє́нїѧ лꙋка́вствїѧ: но и҆зба́ви на́съ ѿ всѣ́хъ ловѧ́щихъ дꙋ́шы на́шѧ, ꙗ҆́кѡ къ тебѣ̀, гдⷭ҇и, гдⷭ҇и, ѻ҆́чи на́ши, и҆ на тѧ̀ ᲂу҆пова́хомъ, да не посрами́ши на́съ, бж҃е на́шъ.

Возглаше́нїе: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Дїа́конъ: Бл҃гословѝ, влⷣко, ст҃ы́й вхо́дъ.

И҆ сщ҃е́нникъ, блгⷭ҇влѧ́ѧ вхо́дъ, глаго́летъ: Бл҃гослове́нъ вхо́дъ ст҃ы́хъ твои́хъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

Дїа́конъ глаго́летъ велегла́снѡ: Премꙋ́дрость, про́сти.

Творе́нїе сѡфро́нїа, патрїа́рха і҆ерⷭ҇ли́мскагѡ.

Ли́къ же: Свѣ́те ти́хїй ст҃ы́ѧ сла́вы, / безсме́ртнагѡ, ѻ҆ц҃а̀ нбⷭ҇нагѡ, / ст҃а́гѡ бл҃же́ннагѡ, і҆и҃се хрⷭ҇тѐ, / прише́дше на за́падъ со́лнца, / ви́дѣвше свѣ́тъ вече́рнїй, / пое́мъ ѻ҆ц҃а̀, сн҃а, и҆ ст҃а́го дх҃а, бг҃а. / досто́инъ є҆сѝ во всѧ̑ времена̀ / пѣ́тъ бы́ти гла́сы преподо́бными, / сн҃е бж҃їй, живо́тъ даѧ́й: / тѣ́мже мі́ръ тѧ̀ сла́витъ.

По вхо́дѣ же, положи́въ ѻ҆бы́чный покло́нъ, дїа́конъ, а҆́ще ли нѣ́сть дїа́кона, сщ҃е́нникъ, пое́тъ прокі́менъ днѐ.

Дїа́конъ: Во́нмемъ.

Сщ҃е́нникъ: Ми́ръ всѣ̑мъ.

Ли́къ: И҆ дх҃ови твоемꙋ̀.

Дїа́конъ: Премꙋ́дрость. И҆ прокі́менъ:

А҆́ще же є҆́сть сꙋббѡ́та ве́чера, глаго́летъ на гла́съ ѕ҃:

Гдⷭ҇ь воцр҃и́сѧ, / въ лѣ́потꙋ ѡ҆блече́сѧ.

Сті́хъ: Ѡ҆блече́сѧ гдⷭ҇ь въ си́лꙋ, и҆ препоѧ́сасѧ.

Сті́хъ: И҆́бо ᲂу҆твердѝ вселе́ннꙋю, ꙗ҆̀же не подви́житсѧ.

Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.

Въ недѣ́лю ве́чера, гла́съ и҃:

Сѐ ны́нѣ бл҃гослови́те гдⷭ҇а / всѝ рабѝ гдⷭ҇ни.

Сті́хъ: Стоѧ́щїи во хра́мѣ гдⷭ҇ни, во дво́рѣхъ до́мꙋ бг҃а на́шегѡ.

Въ понедѣ́льникъ ве́чера, гла́съ д҃:

Гдⷭ҇ь ᲂу҆слы́шитъ мѧ̀, / внегда̀ воззва́ти мѝ къ немꙋ̀.

Сті́хъ: Внегда̀ призва́ти мѝ, ᲂу҆слы́ша мѧ̀ бг҃ъ пра́вды моеѧ̀.

Во вто́рникъ ве́чера, гла́съ а҃:

Ми́лость твоѧ̀, гдⷭ҇и, / пожене́тъ мѧ̀ всѧ̑ дни̑ живота̀ моегѡ̀.

Сті́хъ: Гдⷭ҇ь пасе́тъ мѧ̀, и҆ ничто́же мѧ̀ лиши́тъ, на мѣ́стѣ ѕла́чнѣ та́мѡ всели́ мѧ.

Въ сре́дꙋ ве́чера, гла́съ є҃:

Бж҃е, во и҆́мѧ твоѐ спаси́ мѧ, / и҆ въ си́лѣ твое́й сꙋди́ ми.

Сті́хъ: Бж҃е, ᲂу҆слы́ши моли́твꙋ мою̀, внꙋшѝ глаго́лы ᲂу҆́стъ мои́хъ.

Въ четверто́къ ве́чера, гла́съ ѕ҃:

По́мощь моѧ̀ ѿ гдⷭ҇а / сотво́ршагѡ нб҃о и҆ зе́млю.

Сті́хъ: Возведо́хъ ѻ҆́чи моѝ въ го́ры, ѿню́дꙋже прїи́детъ по́мощь моѧ̀.

Въ пѧто́къ ве́чера, гла́съ з҃:

Бж҃е, застꙋ́пникъ мо́й є҆сѝ ты̀, / и҆ ми́лость твоѧ̀ предвари́тъ мѧ̀.

Сті́хъ: И҆зми́ мѧ ѿ вра̑гъ мои́хъ бж҃е, и҆ ѿ востаю́щихъ на мѧ̀ и҆зба́ви мѧ̀.

А҆́ще комꙋ̀ и҆́мать бы́ти бдѣ́нїе, и҆лѝ полѷеле́й, чтꙋ́тсѧ парємїѝ пра́здникꙋ и҆лѝ ст҃о́мꙋ.

Дїа́конъ: Премꙋ́дрость.

И҆ чте́цъ надписа́нїе парємїѝ.

И҆ па́ки дїа́конъ: Во́нмемъ.

И҆ чте́цъ глаго́летъ парємїю̀.

Глаго́летъ сщ҃е́нникъ: Ми́ръ тѝ.

И҆ чте́цъ: И҆ дх҃ови твоемꙋ̀.

Е҆ктенїа̀ сꙋгꙋ́баѧ.

Дїа́конъ: Рце́мъ всѝ ѿ всеѧ̀ дꙋшѝ, и҆ ѿ всегѡ̀ помышле́нїѧ на́шегѡ рце́мъ.

Ли́къ: Гдⷭ҇и, поми́лꙋй.

Гдⷭ҇и вседержи́телю, бж҃е ѻ҆ц҃ъ на́шихъ, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и, поми́лꙋй.

Поми́лꙋй на́съ, бж҃е, по вели́цѣй ми́лости твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ бра́тїѧхъ на́шихъ, сщ҃е́нницѣхъ, сщ҃енномона́сѣхъ и҆ все́мъ во хрⷭ҇тѣ̀ бра́тствѣ на́шемъ.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ ми́лости, жи́зни, ми́рѣ, здра́вїи, спасе́нїи, посѣще́нїи, проще́нїи и҆ ѡ҆ставле́нїи грѣхѡ́въ рабѡ́въ бж҃їихъ, бра́тїи ст҃а́гѡ хра́ма сегѡ̀ [а҆́ще во ѻ҆би́тели: ст҃ы́ѧ ѻ҆би́тели сеѧ̀ ].

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ плодоносѧ́щихъ и҆ добродѣ́ющихъ во ст҃ѣ́мъ и҆ всечестнѣ́мъ хра́мѣ се́мъ, трꙋжда́ющихсѧ, пою́щихъ и҆ предстоѧ́щихъ лю́дехъ, ѡ҆жида́ющихъ ѿ тебѐ вели́кїѧ и҆ бога́тыѧ млⷭ҇ти.

Ли́къ: Гдⷭ҇и поми́лꙋй, три́жды.

Возглаша́етъ сщ҃е́нникъ: Ꙗ҆́кѡ ми́лостивъ и҆ человѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Та́же: Сподо́би, гдⷭ҇и:

Ли́къ: Сподо́би гдⷭ҇и въ ве́черъ се́й без̾ грѣха̀ сохрани́тисѧ на́мъ. / бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, / и҆ хва́льно и҆ просла́влено и҆́мѧ твоѐ во вѣ́ки, а҆ми́нь. / бꙋ́ди гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. / бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ. / бл҃гослове́нъ є҆сѝ влⷣко, вразꙋми́ мѧ ѡ҆правда́нїємъ твои̑мъ. / бл҃гослове́нъ є҆сѝ ст҃ы́й, просвѣти́ мѧ ѡ҆правда́нїи твои́ми. / гдⷭ҇и, млⷭ҇ть твоѧ̀ во вѣ́къ, дѣ́лъ рꙋкꙋ̀ твоє́ю не пре́зри: / тебѣ̀ подоба́етъ хвала̀, тебѣ̀ подоба́етъ пѣ́нїе, / тебѣ̀ сла́ва подоба́етъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, / ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Е҆ктенїа̀ проси́тєльнаѧ.

Дїа́конъ: И҆спо́лнимъ вече́рнюю моли́твꙋ на́шꙋ гдⷭ҇ви.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Ве́чера всегѡ̀ соверше́нна, свѧ́та, ми́рна и҆ безгрѣ́шна, ᲂу҆ гдⷭ҇а про́симъ.

Ли́къ: Пода́й гдⷭ҇и.

А҆́гг҃ла ми́рна, вѣ́рна наста́вника, храни́телѧ дꙋ́шъ и҆ тѣле́съ на́шихъ, ᲂу҆ гдⷭ҇а про́симъ.

Ли́къ: Пода́й гдⷭ҇и.

Проще́нїѧ и҆ ѡ҆ставле́нїѧ грѣхѡ́въ и҆ прегрѣше́нїй на́шихъ, ᲂу҆ гдⷭ҇а про́симъ.

Ли́къ: Пода́й гдⷭ҇и.

До́брыхъ и҆ поле́зныхъ дꙋша́мъ на́шымъ, и҆ ми́ра мі́рови, ᲂу҆ гдⷭ҇а про́симъ.

Ли́къ: Пода́й гдⷭ҇и.

Про́чее вре́мѧ живота̀ на́шегѡ въ ми́рѣ и҆ покаѧ́нїи сконча́ти, ᲂу҆ гдⷭ҇а про́симъ.

Ли́къ: Пода́й гдⷭ҇и.

Хрⷭ҇тїа́нскїѧ кончи́ны живота̀ на́шегѡ, безболѣ́знены, непосты́дны, ми́рны и҆ до́брагѡ ѿвѣ́та на стра́шнѣмъ сꙋди́щи хрⷭ҇то́вѣ про́симъ.

Ли́къ: Пода́й гдⷭ҇и.

Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Ли́къ: Тебѣ̀, гдⷭ҇и.

И҆ сщ҃е́нникъ возглаша́етъ: Ꙗ҆́кѡ бл҃гъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Сщ҃е́нникъ: Ми́ръ всѣ̑мъ.

Ли́къ: И҆ дх҃ови твоемꙋ̀.

Дїа́конъ: Главы̑ на́шѧ гдⷭ҇ви прикло́нимъ.

Ли́къ: Тебѣ̀, гдⷭ҇и.

Моли́тва главоприклоне́нїѧ.

Сщ҃е́нникъ: Гдⷭ҇и бж҃е на́шъ, приклони́вый нб҃са̀ и҆ соше́дый на спасе́нїе ро́да человѣ́ческагѡ, при́зри на рабы̑ твоѧ̑, и҆ на достоѧ́нїе твоѐ: тебѣ́ бо стра́шномꙋ и҆ чл҃вѣколю́бцꙋ сꙋдїѝ, твоѝ рабѝ поклони́ша главы̑, своѧ̑ же покори́ша вы̑ѧ, не ѿ человѣ̑къ ѡ҆жида́юще по́мощи, но твоеѧ̀ ѡ҆жида́юще ми́лости, и҆ твоегѡ̀ ча́юще спасе́нїѧ: ꙗ҆̀же сохранѝ на всѧ́кое вре́мѧ, и҆ по настоѧ́щемъ ве́черѣ и҆ въ приходѧ́щꙋю но́щь, ѿ всѧ́кагѡ врага̀, ѿ всѧ́кагѡ проти́внагѡ дѣ́йства дїа́вольскагѡ, и҆ ѿ помышле́нїй сꙋ́етныхъ, и҆ воспомина́нїй лꙋка́выхъ.

Та́же возглаша́етъ сщ҃е́нникъ: Бꙋ́ди держа́ва црⷭ҇твїѧ твоегѡ̀ благослове́на и҆ препросла́влена, ѻ҆ц҃а̀ и҆ сн҃а, и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Лїті́а.

Та́же и҆схо́димъ въ притво́ръ, пою́ще стїхи́рꙋ хра́ма и҆лѝ пра́здника, соверша́юще лїті́ю. Сщ҃е́нникъ же и҆ дїа́конъ съ кади́льницею и҆схо́дѧтъ вкꙋ́пѣ сѣ́верною страно́ю, пред̾и́дꙋтъ же и҆̀мъ со двѣма̀ лампа́дома: ст҃ы̑мъ же две́ремъ затворє́нымъ сꙋ́щымъ. Сла́ва, ст҃а́гѡ: И҆ ны́нѣ, бг҃оро́диченъ. И҆ по си́хъ глаго́летъ дїа́конъ, а҆́ще ли нѣ́сть дїа́кона, сщ҃е́нникъ, мл҃твы сїѧ̑:

Спасѝ, бж҃е, лю́ди твоѧ̑, и҆ благословѝ достоѧ́нїе твоѐ, посѣтѝ мі́ръ тво́й ми́лостїю и҆ щедро́тами, возвы́си ро́гъ хрⷭ҇тїа́нъ правосла́вныхъ, и҆ низпослѝ на ны̀ ми́лѡсти твоѧ̑ бѡга́тыѧ, моли́твами всепречⷭ҇тыѧ влⷣчцы на́шеѧ бцⷣы и҆ приснодв҃ы мр҃і́и: си́лою чⷭ҇тна́гѡ и҆ животворѧ́щагѡ крⷭ҇та̀: предста́тельствы чⷭ҇тны́хъ нбⷭ҇ныхъ си́лъ безпло́тныхъ: чⷭ҇тна́гѡ сла́внагѡ проро́ка, предте́чи и҆ крⷭ҇ти́телѧ і҆ѡа́нна: ст҃ы́хъ сла́вныхъ и҆ всехва́льныхъ а҆пⷭ҇лъ: и҆̀же во ст҃ы́хъ ѻ҆ц҃ъ на́шихъ, и҆ вселе́нскихъ вели́кихъ ᲂу҆чи́телей и҆ ст҃и́телей, васі́лїа вели́кагѡ, григо́рїа бг҃осло́ва и҆ і҆ѡа́нна златоꙋ́стагѡ: и҆́же во ст҃ы́хъ ѻ҆ц҃а̀ на́шегѡ нїкола́а, а҆рхїепⷭ҇кпа мѷрлѷкі́йскагѡ, чꙋдотво́рца: ст҃ы́хъ равноапо́стольныхъ меѳо́дїа и҆ кѷрі́лла, ᲂу҆чи́телей слове́нскихъ: ст҃ы́хъ равноапо́стольныхъ вели́кагѡ кн҃зѧ влади́мїра и҆ вели́кїѧ кн҃ги́ни ѻ҆́льги: и҆̀же во ст҃ы́хъ ѻ҆ц҃ъ на́шихъ всеѧ̀ рѡссі́и чꙋдотво́рцевъ, мїхаи́ла, петра̀, а҆леѯі́а, і҆ѡ́ны, мака́рїа, фїлі́ппа, і҆́ѡва, є҆рмоге́на, фїларе́та, і҆нноке́нтїа и҆ тѵ́хѡна: ст҃ы́хъ сла́вныхъ и҆ добропобѣ́дныхъ мꙋ́ченикѡвъ, преподо́бныхъ и҆ бг҃оно́сныхъ ѻ҆ц҃ъ на́шихъ, ст҃ы́хъ и҆ пра́ведныхъ бг҃оѻц҃ъ і҆ѡакі́ма и҆ а҆́нны, и҆ ст҃а́гѡ [(имя:gen), є҆гѡ́же є҆́сть хра́мъ, и҆ є҆гѡ́же є҆́сть де́нь], и҆ всѣ́хъ ст҃ы́хъ: мо́лимъ тѧ̀, многоми́лостиве гдⷭ҇и, ᲂу҆слы́ши на́съ грѣ́шныхъ, молѧ́щихсѧ тебѣ̀, и҆ поми́лꙋй на́съ.

Ли́къ: Гдⷭ҇и поми́лꙋй, м҃.

Е҆щѐ мо́лимсѧ ѡ҆ богохрани́мѣй странѣ̀ на́шей, бл҃гоче́стївыхъ лю́дехъ, властѣ́хъ и҆ во́инствѣ є҆ѧ̀, ѡ҆ держа́вѣ, побѣ́дѣ, пребыва́нїи, ми́рѣ, здра́вїи, спасе́нїи и҆́хъ, и҆ гдⷭ҇ꙋ бг҃ꙋ на́шемꙋ наипа́че поспѣши́ти и҆ пособи́ти во всѣ́хъ, и҆ покори́ти под̾ но́зѣ и҆́хъ всѧ́каго врага̀ и҆ сꙋпоста́та.

Ли́къ: Гдⷭ҇и поми́лꙋй, л҃.

Е҆щѐ мо́лимсѧ ѡ҆ вели́комъ господи́нѣ и҆ ѻ҆ц҃ѣ̀ на́шемъ, свѧтѣ́йшемъ патрїа́рхѣ ,_ и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ [и҆лѝ а҆рхїепⷭ҇кпѣ, и҆лѝ митрополі́тѣ ] , [а҆́ще во ѻ҆би́тели: и҆ ѡ҆ а҆рхїмандрі́тѣ, и҆лѝ и҆гꙋменѣ на́шемъ ]_ и҆ ѡ҆ все́мъ во хрⷭ҇тѣ̀ бра́тствѣ на́шемъ, и҆ ѡ҆ всѧ́кой дꙋшѝ хрⷭ҇тїа́нстѣй, скорбѧ́щей же и҆ ѡ҆ѕло́бленнѣй, ми́лости бж҃їи и҆ по́мощи тре́бꙋющей: ѡ҆ покрове́нїи гра́да сегѡ̀ и҆ живꙋ́щихъ въ не́мъ [и҆лѝ_ ве́си сеѧ̀ и҆ живꙋ́щихъ въ не́й: и҆лѝ ст҃ы́ѧ ѻ҆би́тели сеѧ̀ и҆ живꙋ́щихъ въ не́й _] : ѡ҆ ми́рѣ, и҆ состоѧ́нїи всегѡ̀ мі́ра: ѡ҆ бл҃гостоѧ́нїи ст҃ы́хъ бж҃їихъ цр҃кве́й: ѡ҆ спасе́нїи и҆ по́мощи со тща́нїемъ и҆ стра́хомъ бж҃їимъ трꙋжда́ющихсѧ и҆ слꙋжа́щихъ ѻ҆тє́цъ и҆ бра́тїй на́шихъ: ѡ҆ ѡ҆ста́вльшихсѧ и҆ во ѿше́ствїи сꙋ́щихъ: ѡ҆ и҆сцѣле́нїи въ не́мощехъ лежа́щихъ: ѡ҆ ᲂу҆спе́нїи, ѡ҆сла́бѣ, блаже́нной па́мѧти и҆ ѡ҆ставле́нїи грѣхѡ́въ всѣ́хъ преждеѿше́дшихъ ѻ҆тє́цъ и҆ бра́тїй на́шихъ, здѣ̀ лежа́щихъ и҆ повсю́дꙋ, правосла́вныхъ: ѡ҆ и҆збавле́нїи плѣне́нныхъ, и҆ ѡ҆ бра́тїѧхъ на́шихъ во слꙋ́жбахъ сꙋ́щихъ, и҆ ѡ҆ всѣ́хъ слꙋжа́щихъ и҆ слꙋжи́вшихъ во ст҃ѣ́мъ хра́мѣ се́мъ [а҆́ще во ѻ҆би́тели: во ст҃ѣ́й ѻ҆би́тели се́й ] рце́мъ.

Ли́къ: Гдⷭ҇и поми́лꙋй, н҃.

Е҆щѐ мо́лимсѧ ѡ҆ є҆́же сохрани́тисѧ гра́дꙋ семꙋ̀ [и҆лѝ_ ве́си се́й _], и҆ ст҃о́мꙋ хра́мꙋ семꙋ̀ [а҆́ще во ѻ҆би́тели: ст҃ѣ́й ѻ҆би́тели се́й ], и҆ всѧ́комꙋ гра́дꙋ и҆ странѣ̀ ѿ гла́да, гꙋби́тельства, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ, и҆ междоꙋсо́бныѧ бра́ни: ѡ҆ є҆́же ми́лостивꙋ и҆ благоꙋвѣ́тливꙋ бы́ти бл҃го́мꙋ и҆ чл҃вѣколюби́вомꙋ бг҃ꙋ на́шемꙋ, ѿврати́ти всѧ́кїй гнѣ́въ на ны̀ дви́жимый, и҆ и҆зба́вити ны̀ ѿ належа́щагѡ и҆ пра́веднагѡ своегѡ̀ преще́нїѧ, и҆ поми́ловати ны̀.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ и҆ ѡ҆ є҆́же ᲂу҆слы́шати гдⷭ҇ꙋ бг҃ꙋ гла́съ моле́нїѧ на́съ грѣ́шныхъ, и҆ поми́ловати на́съ.

Ли́къ: Гдⷭ҇и поми́лꙋй, три́жды.

Та́же помина́етъ, ꙗ҆̀же хо́щетъ, живы̑ѧ и҆ мє́ртвыѧ, та́йнѡ.

Та́же і҆ере́й: Оу҆слы́ши ны̀, бж҃е сп҃си́телю на́шъ, ᲂу҆пова́нїе всѣ́хъ концє́въ землѝ и҆ сꙋ́щихъ въ мо́ри дале́че: и҆ ми́лостивъ, ми́лостивъ бꙋ́ди, влⷣко, ѡ҆ грѣсѣ́хъ на́шихъ, и҆ поми́лꙋй ны̀. Ми́лостивъ бо и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

І҆ере́й глаго́летъ: Ми́ръ всѣ̑мъ.

Дїа́конъ: Главы̑ на́шѧ гдⷭ҇ви прикло́нимъ.

И҆ всѣ̑мъ прикло́ншымъ главы̑, мо́литсѧ сщ҃е́нникъ велегла́снѡ:

Влⷣко многомлⷭ҇тиве, гдⷭ҇и і҆и҃се хрⷭ҇тѐ бж҃е на́шъ, моли́твами всепречⷭ҇тыѧ влⷣчцы на́шеѧ бцⷣы и҆ приснодв҃ы мр҃і́и, си́лою чⷭ҇тна́гѡ и҆ животворѧ́щагѡ крⷭ҇та̀, предста́тельствы честны́хъ нб҃е́сныхъ си́лъ безпло́тныхъ, чⷭ҇тна́гѡ сла́внагѡ проро́ка, предте́чи и҆ крⷭ҇ти́телѧ і҆ѡа́нна, ст҃ы́хъ сла́вныхъ и҆ всехва́льныхъ а҆по́стѡлъ, ст҃ы́хъ сла́вныхъ и҆ добропобѣ́дныхъ мꙋ́ченикѡвъ, прпⷣбныхъ и҆ бг҃оно́сныхъ ѻ҆ц҃ъ на́шихъ, и҆̀же во ст҃ы́хъ ѻ҆ц҃ъ на́шихъ и҆ вселе́нскихъ вели́кихъ ᲂу҆чи́телей и҆ ст҃и́телей, васі́лїа вели́кагѡ, григо́рїа бг҃осло́ва и҆ і҆ѡа́нна златоꙋ́стагѡ, и҆́же во ст҃ы́хъ ѻ҆ц҃а̀ на́шегѡ нїкола́а, а҆рхїепⷭ҇кпа мѷрлѷкі́йскагѡ, чꙋдотво́рца: ст҃ы́хъ равноапо́стольныхъ меѳо́дїа и҆ кѷрі́лла, ᲂу҆чи́телей слове́нскихъ: ст҃ы́хъ равноапо́стольныхъ вели́кагѡ кн҃зѧ влади́мїра и҆ вели́кїѧ кн҃ги́ни ѻ҆́льги, и҆̀же во ст҃ы́хъ ѻ҆ц҃ъ на́шихъ всеѧ̀ рѡссі́и чꙋдотво́рцевъ, мїхаи́ла, петра̀, а҆леѯі́а, і҆ѡ́ны, мака́рїа, фїлі́ппа, і҆́ѡва, є҆рмоге́на, фїларе́та, і҆нноке́нтїа и҆ тѵ́хѡна: и҆ ст҃ы́хъ пра́ведныхъ бг҃оѻц҃ъ і҆ѡакі́ма и҆ а҆́нны, и҆ ст҃а́гѡ [(имя:gen), є҆гѡ́же є҆́сть хра́мъ, и҆ є҆гѡ́же є҆́сть де́нь], и҆ всѣ́хъ ст҃ы́хъ твои́хъ: бл҃гопрїѧ́тнꙋ сотворѝ моли́твꙋ на́шꙋ, да́рꙋй на́мъ ѡ҆ставле́нїе прегрѣше́нїй на́шихъ, покры́й на́съ кро́вомъ крилꙋ̀ твое́ю, ѿженѝ ѿ на́съ всѧ́каго врага̀ и҆ сꙋпоста́та: ᲂу҆мирѝ на́шꙋ жи́знь, гдⷭ҇и: поми́лꙋй на́съ и҆ мі́ръ тво́й, и҆ спасѝ дꙋ́шы на́шѧ, ꙗ҆́кѡ бл҃гъ и҆ чл҃вѣколю́бецъ.

Та́же начина́емъ стїхи̑ры стїхо́вны, и҆ пою́ще вхо́димъ въ хра́мъ.

А҆́ще же є҆́сть сꙋббѡ́та ве́чера, глаго́лемъ настоѧ́щыѧ стїхѝ:

Сті́хъ: Гдⷭ҇ь воцр҃и́сѧ, / въ лѣ́потꙋ ѡ҆блече́сѧ.

Сті́хъ: И҆́бо ᲂу҆твердѝ вселе́ннꙋю, / ꙗ҆́же не подви́житсѧ.

Сті́хъ: До́мꙋ твоемꙋ̀ подоба́етъ ст҃ы́нѧ / гдⷭ҇и, въ долготꙋ̀ дні́й.

Сла́ва, и҆ ны́нѣ, бг҃оро́диченъ.

Мл҃тва ст҃а́гѡ сѷмеѡ́на бг҃опрїи́мца:

Ли́къ: Ны́нѣ ѿпꙋща́еши раба̀ твоего̀, влⷣко, / по глаго́лꙋ твоемꙋ̀, съ ми́ромъ: / ꙗ҆́кѡ ви́дѣста ѻ҆́чи моѝ сп҃се́нїе твоѐ, / є҆́же є҆сѝ ᲂу҆гото́валъ пред̾ лице́мъ всѣ́хъ люде́й, / свѣ́тъ во ѿкрове́нїе ꙗ҆зы́кѡвъ, / и҆ сла́вꙋ люде́й твои́хъ і҆и҃лѧ.

Чте́цъ глаго́летъ Трист҃о́е. По Ѻ҆́ч҃е на́шъ:

Возглаша́етъ сщ҃е́нникъ: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Ли́къ: А҆ми́нь.

И҆ мы̀ ѿпꙋсти́тельный тропа́рь: въ сꙋббѡ́тꙋ ве́чера:

Бцⷣе дв҃о ра́дꙋйсѧ, / бл҃года́тнаѧ мр҃і́е, гдⷭ҇ь съ тобо́ю: / бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀, / ꙗ҆́кѡ сп҃са родила̀ є҆сѝ дꙋ́шъ на́шихъ. Глаго́лемъ три́жды.

Предлага́ютсѧ же на ᲂу҆гото́ванномъ столѣ̀ ра́ди бл҃гослове́нїѧ пѧ́ть хлѣ́бѡвъ, пшени́ца, и҆ два̀ сосꙋ̑да на сїѐ ᲂу҆стрѡ́енныѧ: є҆ди́нъ и҆спо́лненъ вїна̀ ѿ плода̀ ло́знагѡ, дрꙋгі́й же є҆ле́а. Дїа́конъ же кади́тъ ѡ҆́крестъ стола̀, и҆ і҆ере́а. І҆ере́й же взе́мъ є҆ди́нъ хлѣ́бъ, зна́менꙋетъ и҆́мъ про́чыѧ хлѣ́бы, и҆ глаго́летъ моли́твꙋ сїю̀ велегла́снѡ:

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

І҆ере́й: Гдⷭ҇и і҆и҃се хрⷭ҇тѐ бж҃е на́шъ, бл҃гослови́вый пѧ́ть хлѣ́бѡвъ и҆ пѧ́ть ты́сѧщъ насы́тивый, са́мъ бл҃гословѝ и҆ хлѣ́бы сїѧ̑, пшени́цꙋ, вїно̀ и҆ є҆ле́й: и҆ ᲂу҆мно́жи сїѧ̑ во гра́дѣ се́мъ, [и҆лѝ_ въ ве́си се́й, и҆лѝ во ст҃ѣ́й ѻ҆би́тели се́й _], и҆ во все́мъ мі́рѣ твое́мъ: и҆ вкꙋша́ющыѧ ѿ ни́хъ вѣ̑рныѧ ѡ҆свѧтѝ. ꙗ҆́кѡ ты̀ є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ всест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь. Бꙋ́ди и҆́мѧ гдⷭ҇не блгⷭ҇ве́но ѿ ны́нѣ и҆ до вѣ́ка. три́жды.

И҆ глаго́лемъ ѱало́мъ л҃г.

Бл҃гословлю̀ гдⷭ҇а на всѧ́кое вре́мѧ, / вы́нꙋ хвала̀ є҆гѡ̀ во ᲂу҆стѣ́хъ мои́хъ. / ѡ҆ гдⷭ҇ѣ похва́литсѧ дꙋша̀ моѧ̀, / да ᲂу҆слы́шатъ кро́тцыи, и҆ возвеселѧ́тсѧ. / возвели́чите гдⷭ҇а со мно́ю, / и҆ вознесе́мъ и҆́мѧ є҆гѡ̀ вкꙋ́пѣ. / взыска́хъ гдⷭ҇а, и҆ ᲂу҆слы́ша мѧ̀, / и҆ ѿ всѣ́хъ скорбе́й мои́хъ и҆зба́ви мѧ̀. / пристꙋпи́те къ немꙋ̀, и҆ просвѣти́тесѧ, / и҆ ли́ца ва̑ша не постыдѧ́тсѧ. / се́й ни́щїй воззва̀, и҆ гдⷭ҇ь ᲂу҆слы́ша и҆̀, / и҆ ѿ всѣ́хъ скорбе́й є҆гѡ̀ сп҃сѐ и҆̀. / ѡ҆полчи́тсѧ а҆́гг҃лъ гдⷭ҇нь ѡ҆́крестъ боѧ́щихсѧ є҆гѡ̀, / и҆ и҆зба́витъ и҆̀хъ. / вкꙋси́те и҆ ви́дите, ꙗ҆́кѡ бл҃гъ гдⷭ҇ь: / бл҃же́нъ мꙋ́жъ, и҆́же ᲂу҆пова́етъ на́нь. / бо́йтесѧ гдⷭ҇а всѝ ст҃і́и є҆гѡ̀, / ꙗ҆́кѡ нѣ́сть лише́нїѧ боѧ́щымсѧ є҆гѡ̀. / бога́тїи ѡ҆бнища́ша и҆ взалка́ша, / взыска́ющїи же гдⷭ҇а не лиша́тсѧ всѧ́кагѡ бл҃га.

Сщ҃е́нникъ къ наро́дꙋ глаго́летъ: Бл҃гослове́нїе гдⷭ҇не на ва́съ, тогѡ̀ бл҃года́тїю и҆ человѣколю́бїемъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

И҆ мы̀: А҆ми́нь.

И҆ начина́емъ шестоѱа́лмїе.

На ᲂу҆́трени.

И҆ начина́емъ шестоѱа́лмїе, со всѧ́кимъ молча́нїемъ и҆ ᲂу҆миле́нїемъ слꙋ́шающе: ᲂу҆чине́нный же бра́тъ со бл҃гоговѣ́нїемъ и҆ стра́хомъ бж҃їимъ глаго́летъ:

Сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. Три́жды.

Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Два́жды.

Ѱало́мъ г҃.

Гдⷭ҇и, что́ сѧ ᲂу҆мно́жиша стꙋжа́ющїи мѝ; мно́зи востаю́тъ на мѧ̀, мно́зи глаго́лютъ дꙋшѝ мое́й: нѣ́сть спⷭ҇нїѧ є҆мꙋ̀ въ бз҃ѣ є҆гѡ̀. ты́ же, гдⷭ҇и, застꙋ́пникъ мо́й є҆сѝ, сла́ва моѧ̀, и҆ возносѧ́й главꙋ̀ мою̀. гла́сомъ мои́мъ ко гдⷭ҇ꙋ воззва́хъ, и҆ ᲂу҆слы́ша мѧ̀ ѿ горы̀ ст҃ы́ѧ своеѧ̀. а҆́зъ ᲂу҆снꙋ́хъ, и҆ спа́хъ, воста́хъ, ꙗ҆́кѡ гдⷭ҇ь застꙋ́питъ мѧ̀. не ᲂу҆бою́сѧ ѿ тє́мъ люде́й, ѡ҆́крестъ напа́дающихъ на мѧ̀. воскрⷭ҇нѝ, гдⷭ҇и, сп҃си́ мѧ, бж҃е мо́й: ꙗ҆́кѡ ты̀ порази́лъ є҆сѝ всѧ̑ враждꙋ́ющыѧ мѝ всꙋ́е, зꙋ́бы грѣ́шникѡвъ сокрꙋши́лъ є҆сѝ. гдⷭ҇не є҆́сть спⷭ҇нїе, и҆ на лю́дехъ твои́хъ блгⷭ҇ве́нїе твоѐ.

А҆́зъ ᲂу҆снꙋ́хъ и҆ спа́хъ, воста́хъ, ꙗ҆́кѡ гдⷭ҇ь застꙋ́питъ мѧ̀.

Ѱало́мъ л҃з.

Гдⷭ҇и, да не ꙗ҆́ростїю твое́ю ѡ҆бличи́ши менє̀, нижѐ гнѣ́вомъ твои́мъ нака́жеши менє̀. ꙗ҆́кѡ стрѣ́лы твоѧ̑ ᲂу҆нзо́ша во мнѣ̀, и҆ ᲂу҆тверди́лъ є҆сѝ на мнѣ̀ рꙋ́кꙋ твою̀. нѣ́сть и҆сцѣле́нїѧ въ пло́ти мое́й ѿ лица̀ гнѣ́ва твоегѡ̀, нѣ́сть ми́ра въ костѣ́хъ мои́хъ, ѿ лица̀ грѣ̑хъ мои́хъ. ꙗ҆́кѡ беззакѡ́нїѧ моѧ̑ превзыдо́ша главꙋ̀ мою̀, ꙗ҆́кѡ бре́мѧ тѧ́жкое ѡ҆тѧготѣ́ша на мнѣ̀. возсмердѣ́ша и҆ согни́ша ра̑ны моѧ̑ ѿ лица̀ безꙋ́мїѧ моегѡ̀. пострада́хъ и҆ слѧко́хсѧ до конца̀, ве́сь де́нь сѣ́тꙋѧ хожда́хъ. ꙗ҆́кѡ лѧ̑двїѧ моѧ̑ напо́лнишасѧ порꙋга́нїй, и҆ нѣ́сть и҆сцѣле́нїѧ въ пло́ти мое́й. ѡ҆ѕло́бленъ бы́хъ, и҆ смири́хсѧ до ѕѣла̀: рыка́хъ ѿ воздыха́нїѧ се́рдца моегѡ̀. гдⷭ҇и, пред̾ тобо́ю всѐ жела́нїе моѐ, и҆ воздыха́нїе моѐ ѿ тебѐ не ᲂу҆таи́сѧ. се́рдце моѐ смѧте́сѧ, ѡ҆ста́ви мѧ̀ си́ла моѧ̀, и҆ свѣ́тъ ѻ҆́чїю моє́ю, и҆ то́й нѣ́сть со мно́ю. дрꙋ́зи моѝ и҆ и҆́скреннїи моѝ, прѧ́мѡ мнѣ̀ прибли́жишасѧ и҆ ста́ша. и҆ бли́жнїи моѝ ѿдале́че менє̀ ста́ша, и҆ нꙋжда́хꙋсѧ и҆́щꙋщїи дꙋ́шꙋ мою̀, и҆ и҆́щꙋщїи ѕла̑ѧ мнѣ̀, глаго́лахꙋ сꙋ́єтнаѧ, и҆ льсти̑внымъ ве́сь де́нь поꙋча́хꙋсѧ. а҆́зъ же ꙗ҆́кѡ глꙋ́хъ не слы́шахъ, и҆ ꙗ҆́кѡ нѣ́мъ не ѿверза́ѧй ᲂу҆́стъ свои́хъ. и҆ бы́хъ ꙗ҆́кѡ человѣ́къ не слы́шай, и҆ не и҆мы́й во ᲂу҆стѣ́хъ свои́хъ ѡ҆бличе́нїѧ. ꙗ҆́кѡ на тѧ̀, гдⷭ҇и, ᲂу҆пова́хъ, ты̀ ᲂу҆слы́шиши гдⷭ҇и бж҃е мо́й. ꙗ҆́кѡ рѣ́хъ: да не когда̀ пора́дꙋютъ ми́ сѧ вразѝ моѝ, и҆ внегда̀ подвижа́тисѧ нога́мъ мои̑мъ, на мѧ̀ велерѣ́чеваша. ꙗ҆́кѡ а҆́зъ на ра̑ны гото́въ, и҆ болѣ́знь моѧ̀ предо мно́ю є҆́сть вы́нꙋ. ꙗ҆́кѡ беззако́нїе моѐ а҆́зъ возвѣщꙋ̀, и҆ попекꙋ́сѧ ѡ҆ грѣсѣ̀ мое́мъ. врази́ же моѝ живꙋ́тъ, и҆ ᲂу҆крѣпи́шасѧ па́че менє̀, и҆ ᲂу҆мно́жишасѧ ненави́дѧщїи мѧ̀ без̾ пра́вды. воздаю́щїи мѝ ѕла̑ѧ воз̾ блага̑ѧ, ѡ҆болга́хꙋ мѧ̀, занѐ гонѧ́хъ бл҃госты́ню. не ѡ҆ста́ви менє̀, гдⷭ҇и бж҃е мо́й, не ѿстꙋпѝ ѿ менє̀. вонмѝ въ по́мощь мою̀, гдⷭ҇и сп҃се́нїѧ моегѡ̀.

Не ѡ҆ста́ви менє̀, гдⷭ҇и бж҃е мо́й, не ѿстꙋпѝ ѿ менє̀. вонмѝ въ по́мощь мою̀, гдⷭ҇и сп҃се́нїѧ моегѡ̀.

Ѱало́мъ ѯ҃в.

Бж҃е бж҃е мо́й, къ тебѣ̀ ᲂу҆́треннюю: возжада̀ тебѐ дꙋша̀ моѧ̀, ко́ль мно́жицею тебѣ̀ пло́ть моѧ̀, въ землѝ пꙋ́стѣ, и҆ непрохо́днѣ, и҆ безво́днѣ. та́кѡ во ст҃ѣ́мъ ꙗ҆ви́хсѧ тебѣ̀, ви́дѣти си́лꙋ твою̀ и҆ сла́вꙋ твою̀. ꙗ҆́кѡ лꙋ́чши ми́лость твоѧ̀ па́че живѡ́тъ, ᲂу҆стнѣ̀ моѝ похвали́тѣ тѧ̀. та́кѡ бл҃гословлю́ тѧ въ животѣ̀ мое́мъ, ѡ҆ и҆́мени твое́мъ воздѣжꙋ̀ рꙋ́цѣ моѝ. ꙗ҆́кѡ ѿ тꙋ́ка и҆ ма́сти да и҆спо́лнитсѧ дꙋша̀ моѧ̀, и҆ ᲂу҆стна́ма ра́дости восхва́лѧтъ тѧ̀ ᲂу҆ста̀ моѧ̑. а҆́ще помина́хъ тѧ̀ на посте́ли мое́й, на ᲂу҆́треннихъ поꙋча́хꙋсѧ въ тѧ̀. ꙗ҆́кѡ бы́лъ є҆сѝ помо́щникъ мо́й, и҆ въ кро́вѣ крилꙋ̀ твоє́ю возра́дꙋюсѧ. прильпѐ дꙋша̀ моѧ̀ по тебѣ̀, мене́ же прїѧ́тъ десни́ца твоѧ̀. ті́и же всꙋ́е и҆ска́ша дꙋ́шꙋ мою̀, вни́дꙋтъ въ преиспѡ́днѧѧ землѝ: предадѧ́тсѧ въ рꙋ́ки ѻ҆рꙋ́жїѧ, ча̑сти ли́совѡмъ бꙋ́дꙋтъ. ца́рь же возвесели́тсѧ ѡ҆ бз҃ѣ, похва́литсѧ всѧ́къ клены́йсѧ и҆́мъ: ꙗ҆́кѡ загради́шасѧ ᲂу҆ста̀ глаго́лющихъ непра́вєднаѧ.

На ᲂу҆́треннихъ поꙋча́хсѧ въ тѧ̀, ꙗ҆́кѡ бы́лъ є҆сѝ помо́щникъ мо́й, и҆ въ кро́вѣ крилꙋ̀ твоє́ю возра́дꙋюсѧ.

Прильпѐ дꙋша̀ моѧ̀ по тебѣ̀, мене́ же прїѧ́тъ десни́ца твоѧ̀.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды, без̾ покло́нѡвъ. Гдⷭ҇и поми́лꙋй, три́жды. Сла́ва, и҆ ны́нѣ:

[Сщ҃е́нникъ же глаго́летъ мл҃твы ᲂу҆́трєннїѧ, стоѧ̀ непокрове́нъ пред̾ ст҃ы́ми две́рьми, та́йнѡ].

Ѱало́мъ п҃з.

Гдⷭ҇и бж҃е сп҃се́нїѧ моегѡ̀, во днѝ воззва́хъ, и҆ въ нощѝ пред̾ тобо́ю: да вни́детъ пред̾ тѧ̀ мл҃тва моѧ̀, приклонѝ ᲂу҆́хо твоѐ къ моле́нїю моемꙋ̀, ꙗ҆́кѡ и҆спо́лнисѧ ѕѡ́лъ дꙋша̀ моѧ̀, и҆ живо́тъ мо́й а҆́дꙋ прибли́жисѧ. привмѣне́нъ бы́хъ съ низходѧ́щими въ ро́въ, бы́хъ ꙗ҆́кѡ человѣ́къ без̾ по́мощи, въ ме́ртвыхъ свобо́дь: ꙗ҆́кѡ ꙗ҆́звеннїи спѧ́щїи во гро́бѣ, и҆́хже не помѧнꙋ́лъ є҆сѝ ктомꙋ̀, и҆ ті́и ѿ рꙋкѝ твоеѧ̀ ѿринове́ни бы́ша. положи́ша мѧ̀ въ ро́вѣ преиспо́днѣмъ, въ те́мныхъ и҆ сѣ́ни сме́ртнѣй. на мнѣ̀ ᲂу҆тверди́сѧ ꙗ҆́рость твоѧ̑, и҆ всѧ̑ во́лны твоѧ̑ наве́лъ є҆сѝ на мѧ̀. ᲂу҆да́лилъ є҆сѝ зна́емыхъ мои́хъ ѿ менє̀, положи́ша мѧ̀ ме́рзость себѣ̀, пре́данъ бы́хъ, и҆ не и҆схожда́хъ. ѻ҆́чи моѝ и҆знемого́стѣ ѿ нищеты̀, воззва́хъ къ тебѣ̀ гдⷭ҇и, ве́сь де́нь: воздѣ́хъ къ тебѣ̀ рꙋ́цѣ моѝ. е҆да̀ ме́ртвыми твори́ши чꙋдеса̀; и҆лѝ вра́чеве воскресѧ́тъ и҆ и҆сповѣ́дѧтсѧ тебѣ̀; е҆да̀ повѣ́сть кто̀ во гро́бѣ ми́лость твою̀, и҆ и҆́стинꙋ твою̀ въ поги́бели; е҆да̀ позна̑на бꙋ́дꙋтъ во тьмѣ̀ чꙋдеса̀ твоѧ̑, и҆ пра́вда твоѧ̀ въ землѝ забве́ннѣй; и҆ а҆́зъ къ тебѣ̀ гдⷭ҇и, воззва́хъ, и҆ ᲂу҆́трѡ мл҃тва моѧ̀ предвари́тъ тѧ̀. вскꙋ́ю гдⷭ҇и, ѿрѣ́еши дꙋ́шꙋ мою̀; ѿвраща́еши лицѐ твоѐ ѿ менє̀; ни́щъ є҆́смь а҆́зъ, и҆ въ трꙋдѣ́хъ ѿ ю҆́ности моеѧ̀, возне́съ же сѧ, смири́хсѧ, и҆ и҆знемого́хъ. на мнѣ̀ преидо́ша гнѣ́ви твоѝ, ᲂу҆страшє́нїѧ твоѧ̑ возмꙋти́ша мѧ̀. ѡ҆быдо́ша мѧ̀ ꙗ҆́кѡ вода̀ ве́сь де́нь. ѡ҆держа́ша мѧ̀ вкꙋ́пѣ. ᲂу҆да́лилъ є҆сѝ ѿ менє̀ дрꙋ́га и҆ и҆́скреннѧго, и҆ зна́емыхъ мои́хъ ѿ страсте́й.

Гдⷭ҇и бж҃е сп҃се́нїѧ моегѡ̀, во днѝ воззва́хъ, и҆ въ нощѝ пред̾ тобо́ю.

Да вни́детъ пред̾ тѧ̀ мл҃тва моѧ̀, приклонѝ ᲂу҆́хо твоѐ къ моле́нїю моемꙋ̀.

Ѱало́мъ р҃в.

Бл҃гословѝ дꙋшѐ моѧ̀ гдⷭ҇а и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀. бл҃гословѝ дꙋшѐ моѧ̀ гдⷭ҇а, и҆ не забыва́й всѣ́хъ воздаѧ́нїй є҆гѡ̀: ѡ҆чища́ющаго всѧ̑ беззакѡ́нїѧ твоѧ̑, и҆сцѣлѧ́ющаго всѧ̑ недꙋ́ги твоѧ̑: и҆збавлѧ́ющаго ѿ и҆стлѣ́нїѧ живо́тъ тво́й, вѣнча́ющаго тѧ̀ млⷭ҇тїю и҆ щедро́тами: и҆сполнѧ́ющаго во бл҃ги́хъ жела́нїе твоѐ: ѡ҆бнови́тсѧ ꙗ҆́кѡ ѻ҆́рлѧ ю҆́ность твоѧ̀. творѧ́й млⷭ҇тыни гдⷭ҇ь, и҆ сꙋдьбꙋ̀ всѣ̑мъ ѡ҆би̑димымъ. сказа̀ пꙋти̑ своѧ̑ мѡѷсе́ови, сыновѡ́мъ і҆и҃лєвымъ хотѣ̑нїѧ своѧ̑. ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ. не до конца̀ прогнѣ́ваетсѧ, нижѐ въ вѣ́къ враждꙋ́етъ. не по беззако́нїємъ на́шымъ сотвори́лъ є҆́сть на́мъ, нижѐ по грѣхѡ́мъ на́шымъ возда́лъ є҆́сть на́мъ. ꙗ҆́кѡ по высотѣ̀ нбⷭ҇нѣй ѿ землѝ, ᲂу҆тверди́лъ є҆́сть гдⷭ҇ь млⷭ҇ть свою̀ на боѧ́щихсѧ є҆гѡ̀. е҆ли́кѡ ѿстоѧ́тъ восто́цы ѿ за̑падъ, ᲂу҆да́лилъ є҆́сть ѿ на́съ беззакѡ́нїѧ на̑ша. ꙗ҆́коже ще́дритъ ѻ҆те́цъ сы́ны, ᲂу҆ще́дри гдⷭ҇ь боѧ́щихсѧ є҆гѡ̀. ꙗ҆́кѡ то́й позна̀ созда́нїе на́ше, помѧнꙋ̀, ꙗ҆́кѡ пе́рсть є҆смы̀. человѣ́къ, ꙗ҆́кѡ трава̀ дні́е є҆гѡ̀, ꙗ҆́кѡ цвѣ́тъ се́льный, та́кѡ ѡ҆цвѣте́тъ: ꙗ҆́кѡ дꙋ́хъ про́йде въ не́мъ, и҆ не бꙋ́детъ, и҆ не позна́етъ ктомꙋ̀ мѣ́ста своегѡ̀. млⷭ҇ть же гдⷭ҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀, и҆ пра́вда є҆гѡ̀ на сынѣ́хъ сынѡ́въ, хранѧ́щихъ завѣ́тъ є҆гѡ̀, и҆ по́мнѧщихъ за́пѡвѣди є҆гѡ̀, твори́ти ѧ҆̀. гдⷭ҇ь на нб҃сѝ ᲂу҆гото́ва прⷭ҇то́лъ сво́й, и҆ црⷭ҇тво є҆гѡ̀ всѣ́ми ѡ҆блада́етъ. бл҃гослови́те гдⷭ҇а всѝ а҆́гг҃ли є҆гѡ̀, си́льнїи крѣ́постїю, творѧ́щїи сло́во є҆гѡ̀, ᲂу҆слы́шати гла́съ слове́съ є҆гѡ̀. бл҃гослови́те гдⷭ҇а всѧ̑ си̑лы є҆гѡ̀, слꙋги̑ є҆гѡ̀, творѧ́щїи во́лю є҆гѡ̀. бл҃гослови́те гдⷭ҇а всѧ̑ дѣла̀ є҆гѡ̀. на всѧ́комъ мѣ́стѣ влⷣчествїѧ є҆гѡ̀, бл҃гословѝ дꙋшѐ моѧ̀ гдⷭ҇а.

На всѧ́комъ мѣ́стѣ влⷣчествїѧ є҆гѡ̀, бл҃гословѝ дꙋшѐ моѧ̀ гдⷭ҇а.

Ѱало́мъ рм҃в.

Гдⷭ҇и, ᲂу҆слы́ши мл҃твꙋ мою̀, внꙋшѝ моле́нїе моѐ во и҆́стинѣ твое́й, ᲂу҆слы́ши мѧ̀ въ пра́вдѣ твое́й: и҆ не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тсѧ пред̾ тобо́ю всѧ́къ живы́й. ꙗ҆́кѡ погна̀ вра́гъ дꙋ́шꙋ мою̀, смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ꙗ҆́кѡ мє́ртвыѧ вѣ́ка. и҆ ᲂу҆ны̀ во мнѣ̀ дꙋ́хъ мо́й, во мнѣ̀ смѧте́сѧ се́рдце моѐ. помѧнꙋ́хъ дни̑ дрє́внїѧ, поꙋчи́хсѧ во всѣ́хъ дѣ́лѣхъ твои́хъ, въ творе́нїихъ рꙋкꙋ̀ твоє́ю поꙋча́хсѧ. воздѣ́хъ къ тебѣ̀ рꙋ́цѣ моѝ, дꙋша̀ моѧ̀ ꙗ҆́кѡ землѧ̀ безво́днаѧ тебѣ̀. ско́рѡ ᲂу҆слы́ши мѧ̀ гдⷭ҇и, и҆счезѐ дꙋ́хъ мо́й: не ѿвратѝ лица̀ твоегѡ̀ ѿ менє̀, и҆ ᲂу҆подо́блюсѧ низходѧ́щымъ въ ро́въ. слы́шанꙋ сотворѝ мнѣ̀ заꙋ́тра млⷭ҇ть твою̀, ꙗ҆́кѡ на тѧ̀ ᲂу҆пова́хъ. скажѝ мнѣ̀ гдⷭ҇и, пꙋ́ть, во́ньже пойдꙋ̀, ꙗ҆́кѡ къ тебѣ̀ взѧ́хъ дꙋ́шꙋ мою̀. и҆зми́ мѧ ѿ вра̑гъ мои́хъ, гдⷭ҇и, къ тебѣ̀ прибѣго́хъ, наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й. дх҃ъ тво́й бл҃гі́й наста́витъ мѧ̀ на зе́млю пра́вꙋ. и҆́мене твоегѡ̀ ра́ди гдⷭ҇и, живи́ши мѧ̀, пра́вдою твое́ю и҆зведе́ши ѿ печа́ли дꙋ́шꙋ мою̀: и҆ млⷭ҇тїю твое́ю потреби́ши врагѝ моѧ̑, и҆ погꙋби́ши всѧ̑ стꙋжа́ющыѧ дꙋшѝ мое́й, ꙗ҆́кѡ а҆́зъ ра́бъ тво́й є҆́смь.

Оу҆слы́ши мѧ̀ гдⷭ҇и, въ пра́вдѣ твое́й, и҆ не вни́ди въ сꙋ́дъ съ рабо́мъ твои́мъ.

Дх҃ъ тво́й бл҃гі́й наста́витъ мѧ̀ на зе́млю пра́вꙋ.

Сла́ва, и҆ ны́нѣ: А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

Е҆ктенїа̀ вели́каѧ.

Дїа́конъ: Ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й, и҆ соедине́нїи всѣ́хъ, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Ли́къ: Тебѣ̀, гдⷭ҇и.

Ли́къ: А҆ми́нь.

И҆ а҆́бїе пое́тсѧ Бг҃ъ гдⷭ҇ь во гла́съ тропарѧ̀ днѐ:

Бг҃ъ гдⷭ҇ь и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.

Сті́хъ: И҆сповѣ́дайтесѧ гдⷭ҇ви, ꙗ҆́кѡ бл҃гъ, ꙗ҆́кѡ въ вѣ́къ ми́лость є҆гѡ̀.

Сті́хъ: Ѡ҆быше́дше ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ.

Сті́хъ: Не ᲂу҆мрꙋ̀, но жи́въ бꙋ́дꙋ, и҆ повѣ́мъ дѣла̀ гдⷭ҇нѧ.

Сті́хъ: Ка́мень є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла: ѿ гдⷭ҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ.

Пое́тсѧ же Бг҃ъ гдⷭ҇ь, четы́режды. Та́же глаго́летсѧ тропа́рь слꙋчи́выйсѧ два́жды, и҆ бг҃оро́диченъ въ то́йже гла́съ. И҆ а҆́ще слꙋча́тсѧ два̀ тропарѧ̑, всегда̀ пе́рвый глаго́летсѧ два́жды, та́же вторы́й, и҆ бг҃оро́диченъ.

Посе́мъ же ѻ҆бы́чное стїхосло́вїе.

По и҆сполне́нїи же стїхосло́вїѧ, є҆ктенїа̀ ма́лаѧ.

Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Ли́къ: Тебѣ̀, гдⷭ҇и.

Ли́къ: А҆ми́нь.

По в҃-мъ стїхосло́вїи.

Дїа́конъ: Па́ки и҆ па́ки:

Возглаша́етъ сщ҃е́нникъ: Ꙗ҆́кѡ бл҃гъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

А҆́ще ᲂу҆́бѡ є҆́сть недѣ́лѧ, и҆лѝ гдⷭ҇скїй пра́здникъ, и҆лѝ бг҃оро́диченъ, и҆лѝ пра́зднꙋетсѧ ст҃о́мꙋ, въ ни́хже пое́тсѧ полѷеле́й.

Полѷеле́й. Ѱало́мъ рл҃д.

Хвали́те и҆́мѧ гдⷭ҇не, хвали́те, рабѝ гдⷭ҇а. А҆ллилꙋ́їа, три́жды.

Стоѧ́щїи во хра́мѣ гдⷭ҇ни, во дво́рѣхъ до́мꙋ бг҃а на́шегѡ. хвали́те гдⷭ҇а, ꙗ҆́кѡ бла́гъ гдⷭ҇ь: по́йте и҆́мени є҆гѡ̀, ꙗ҆́кѡ добро̀: ꙗ҆́кѡ і҆а́кѡва и҆збра̀ себѣ̀ гдⷭ҇ь, і҆и҃лѧ въ достоѧ́нїе себѣ̀: ꙗ҆́кѡ а҆́зъ позна́хъ, ꙗ҆́кѡ ве́лїй гдⷭ҇ь, и҆ гдⷭ҇ь на́шъ над̾ всѣ́ми бо́ги: всѧ̑, є҆ли̑ка восхотѣ̀ гдⷭ҇ь, сотворѝ на нб҃сѝ и҆ на землѝ, въ морѧ́хъ и҆ во всѣ́хъ бе́зднахъ. возводѧ̀ ѻ҆́блаки ѿ послѣ́днихъ землѝ, мѡ́лнїи въ до́ждь сотворѝ, и҆зводѧ́й вѣ́тры ѿ сокро́вищъ свои́хъ. и҆́же поразѝ пе́рвенцы є҆гѵ́пєтскїѧ ѿ человѣ́ка до скота̀: посла̀ зна́мєнїѧ и҆ чꙋдеса̀ посредѣ̀ тебє̀, є҆гѵ́пте, на фараѡ́на и҆ на всѧ̑ рабы̑ є҆гѡ̀. и҆́же поразѝ ꙗ҆зы́ки мнѡ́ги и҆ и҆збѝ царѝ крѣ́пки: сиѡ́на царѧ̀ а҆морре́йска и҆ ѡ҆́га царѧ̀ васа́нска, и҆ всѧ̑ ца̑рствїѧ ханаа̑нска: и҆ дадѐ зе́млю и҆́хъ достоѧ́нїе, достоѧ́нїе і҆и҃лю лю́демъ свои̑мъ. гдⷭ҇и, и҆́мѧ твоѐ въ вѣ́къ, и҆ па́мѧть твоѧ̀ въ ро́дъ и҆ ро́дъ: ꙗ҆́кѡ сꙋди́ти и҆́мать гдⷭ҇ь лю́демъ свои̑мъ, и҆ ѡ҆ рабѣ́хъ свои́хъ ᲂу҆мо́литсѧ. і҆́дѡли ꙗ҆зы̑къ сребро̀ и҆ зла́то, дѣла̀ рꙋ́къ человѣ́ческихъ: ᲂу҆ста̀ и҆́мꙋтъ, и҆ не возглаго́лютъ: ѻ҆́чи и҆́мꙋтъ, и҆ не ᲂу҆́зрѧтъ: ᲂу҆́ши и҆́мꙋтъ, и҆ не ᲂу҆слы́шатъ: ниже́ бо є҆́сть дꙋ́хъ во ᲂу҆стѣ́хъ и҆́хъ. подо́бни и҆̀мъ да бꙋ́дꙋтъ творѧ́щїи ѧ҆̀ и҆ всѝ надѣ́ющїисѧ на нѧ̀. до́ме і҆и҃левъ, бл҃гослови́те гдⷭ҇а: до́ме а҆арѡ́нь, бл҃гослови́те гдⷭ҇а: до́ме леѵі́инъ, бл҃гослови́те гдⷭ҇а: боѧ́щїисѧ гдⷭ҇а, бл҃гослови́те гдⷭ҇а.

Бл҃гослове́нъ гдⷭ҇ь ѿ сїѡ́на, живы́й во і҆ерⷭ҇ли́мѣ. А҆ллилꙋ́їа, три́жды.

Ѱало́мъ рл҃є.

И҆сповѣ́дайтесѧ гдⷭ҇еви, ꙗ҆́кѡ бл҃гъ: ꙗ҆́кѡ въ вѣ́къ млⷭ҇ть є҆гѡ̀. А҆ллилꙋ́їа, три́жды.

И҆сповѣ́дайтесѧ бг҃ꙋ богѡ́въ: ꙗ҆́кѡ въ вѣ́къ млⷭ҇ть є҆гѡ̀. и҆сповѣ́дайтесѧ гдⷭ҇еви господе́й: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ чꙋдеса̀ вє́лїѧ є҆ди́номꙋ: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ небеса̀ ра́зꙋмомъ: ꙗ҆́кѡ въ вѣ́къ млⷭ҇ть є҆гѡ̀. ᲂу҆тверди́вшемꙋ зе́млю на вода́хъ: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ свѣти̑ла вє́лїѧ є҆ди́номꙋ: ꙗ҆́кѡ въ вѣ́къ млⷭ҇ть є҆гѡ̀: со́лнце во ѻ҆́бласть днѐ: ꙗ҆́кѡ въ вѣ́къ млⷭ҇ть є҆гѡ̀: лꙋнꙋ̀ и҆ ѕвѣ́зды во ѻ҆́бласть но́щи: ꙗ҆́кѡ въ вѣ́къ млⷭ҇ть є҆гѡ̀. порази́вшемꙋ є҆гѵ́пта съ пе́рвенцы є҆гѡ̀: ꙗ҆́кѡ въ вѣ́къ млⷭ҇ть є҆гѡ̀: и҆ и҆зве́дшемꙋ і҆и҃лѧ ѿ среды̀ и҆́хъ: ꙗ҆́кѡ въ вѣ́къ млⷭ҇ть є҆гѡ̀: рꙋко́ю крѣ́пкою и҆ мы́шцею высо́кою: ꙗ҆́кѡ въ вѣ́къ млⷭ҇ть є҆гѡ̀. раздѣ́льшемꙋ чермно́е мо́ре въ раздѣлє́нїѧ: ꙗ҆́кѡ въ вѣ́къ млⷭ҇ть є҆гѡ̀: и҆ прове́дшемꙋ і҆и҃лѧ посредѣ̀ є҆гѡ̀: ꙗ҆́кѡ въ вѣ́къ млⷭ҇ть є҆гѡ̀: и҆ и҆стрѧ́сшемꙋ фараѡ́на и҆ си́лꙋ є҆гѡ̀ въ мо́ре чермно́е: ꙗ҆́кѡ въ вѣ́къ млⷭ҇ть є҆гѡ̀. прове́дшемꙋ лю́ди своѧ̑ въ пꙋсты́ни: ꙗ҆́кѡ въ вѣ́къ млⷭ҇ть є҆гѡ̀. порази́вшемꙋ царѝ вє́лїѧ: ꙗ҆́кѡ въ вѣ́къ млⷭ҇ть є҆гѡ̀. и҆ ᲂу҆би́вшемꙋ царѝ крѣ̑пкїѧ: ꙗ҆́кѡ въ вѣ́къ млⷭ҇ть є҆гѡ̀: сиѡ́на царѧ̀ а҆морре́йска: ꙗ҆́кѡ въ вѣ́къ млⷭ҇ть є҆гѡ̀: и҆ ѡ҆́га царѧ̀ васа́нска: ꙗ҆́кѡ въ вѣ́къ млⷭ҇ть є҆гѡ̀. и҆ да́вшемꙋ зе́млю и҆́хъ достоѧ́нїе: ꙗ҆́кѡ въ вѣ́къ млⷭ҇ть є҆гѡ̀: достоѧ́нїе і҆и҃лю рабꙋ̀ своемꙋ̀: ꙗ҆́кѡ въ вѣ́къ млⷭ҇ть є҆гѡ̀. ꙗ҆́кѡ во смире́нїи на́шемъ помѧнꙋ́ ны гдⷭ҇ь: ꙗ҆́кѡ въ вѣ́къ млⷭ҇ть є҆гѡ̀. и҆ и҆зба́вилъ ны̀ є҆́сть ѿ врагѡ́въ на́шихъ: ꙗ҆́кѡ въ вѣ́къ млⷭ҇ть є҆гѡ̀: даѧ́й пи́щꙋ всѧ́кой пло́ти: ꙗ҆́кѡ въ вѣ́къ млⷭ҇ть є҆гѡ̀.

И҆сповѣ́дайтесѧ бг҃ꙋ нбⷭ҇номꙋ: ꙗ҆́кѡ въ вѣ́къ млⷭ҇ть є҆гѡ̀. А҆ллилꙋ́їа, три́жды.

[А҆́ще ᲂу҆́бѡ є҆́сть недѣ́лѧ блꙋ́днаго сы́на, и҆лѝ мѧсопꙋ́стнаѧ, и҆лѝ сыропꙋ́стнаѧ недѣ́лѧ припѣва́емъ же къ си̑мъ и҆ тре́тїй ѱало́мъ: На рѣка́хъ вавѷлѡ́нскихъ: со а҆ллилꙋ́їею кра́сною.]

А҆́ще же прилꙋчи́тсѧ пра́здникъ гдⷭ҇скїй, и҆лѝ бг҃оро́диченъ, и҆лѝ пра́зднꙋетсѧ ст҃о́мꙋ, въ ни́хже пое́тсѧ полѷеле́й, та́же глаго́лемъ велича́нїе со и҆збра́нными стїхѝ ѱалмѡ́въ. А҆́ще ᲂу҆́бѡ є҆́сть недѣ́лѧ пое́мъ:

Тропарѝ воскре́сны, пое́мыѧ по непоро́чнахъ, въ недѣ́лѧхъ всегѡ̀ лѣ́та, гла́съ є҃.

На є҆ди́номъ ко́емждо тропарѣ̀ глаго́лемъ:

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

А҆́гг҃льскїй собо́ръ ᲂу҆диви́сѧ, / зрѧ̀ тебѐ въ ме́ртвыхъ вмѣни́вшасѧ, / сме́ртнꙋю же, сп҃се, крѣ́пость разори́вша, / и҆ съ собо́ю а҆да́ма воздви́гша, / и҆ ѿ а҆́да всѧ̑ свобо́ждша.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Почто̀ мѵ̑ра съ ми́лостивными слеза́ми, / ѽ ᲂу҆ч҃нцы, растворѧ́ете; / блиста́ѧйсѧ во гро́бѣ а҆́гг҃лъ мѷроно́сицамъ вѣща́ше: / ви́дите вы̀ гро́бъ и҆ ᲂу҆разꙋмѣ́йте, / сп҃съ бо воскр҃се ѿ гро́ба.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Ѕѣлѡ̀ ра́нѡ мѷронѡ́сицы теча́хꙋ / ко гро́бꙋ твоемꙋ̀ рыда́ющѧ, / но предста̀ къ ни̑мъ а҆́гг҃лъ и҆ речѐ: / рыда́нїѧ вре́мѧ преста̀, не пла́чите, / воскрⷭ҇нїе же а҆пⷭ҇лѡмъ рцы́те.

Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.

Мѷронѡ́сицы жєны̀, съ мѵ́ры прише́дшѧ / ко гро́бꙋ твоемꙋ̀, сп҃се, рыда́хꙋ, / а҆́гг҃лъ же къ ни̑мъ речѐ глаго́лѧ: / что̀ съ ме́ртвыми жива́го помышлѧ́ете; / ꙗ҆́кѡ бг҃ъ бо воскр҃се ѿ гро́ба.

Сла́ва: Поклони́мсѧ ѻ҆ц҃ꙋ̀ / и҆ є҆гѡ̀ сн҃ови, и҆ ст҃о́мꙋ дх҃ꙋ, / ст҃ѣ́й трⷪ҇цѣ во є҆ди́номъ сꙋществѣ̀, / съ серафі́мы зовꙋ́ще: / свѧ́тъ, свѧ́тъ, свѧ́тъ, є҆сѝ гдⷭ҇и.

И҆ ны́нѣ: Жизнода́вца ро́ждши, / грѣха̀, дв҃о, а҆да́ма и҆зба́вила є҆сѝ, / ра́дость же є҆́ѵѣ въ печа́ли мѣ́сто подала̀ є҆сѝ: / па́дшыѧ же ѿ жи́зни къ се́й напра́ви, / и҆з̾ тебѐ воплоти́выйсѧ бг҃ъ и҆ чл҃вѣ́къ.

А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.

По непоро́чнахъ, и҆ по Бл҃гослове́нъ є҆сѝ гдⷭ҇и:

Дїа́конъ: Па́ки и҆ па́ки:

Возглаша́етъ сщ҃е́нникъ: Ꙗ҆́кѡ бл҃гослови́сѧ и҆́мѧ твоѐ, и҆ просла́висѧ црⷭ҇тво твоѐ, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Ѵ҆пакоѝ. Степє́нны гла́са. А҆́ще же прилꙋчи́тсѧ пра́здникъ гдⷭ҇скїй, и҆лѝ бг҃оро́диченъ, и҆лѝ пра́зднꙋетсѧ ст҃о́мꙋ, пое́мъ:

Степє́нна, гла́съ д҃. А҆нтїфѡ́нъ а҃, и҆́хже стїхѝ повторѧ́юще пое́мъ:

Ѿ ю҆́ности моеѧ̀ / мно́зи бо́рютъ мѧ̀ стра̑сти, / но са́мъ мѧ̀ застꙋпѝ, / и҆ сп҃сѝ сп҃се мо́й.

Ненави́дѧщїи сїѡ́на, / посрами́тесѧ ѿ гдⷭ҇а, / ꙗ҆́кѡ трава́ бо ѻ҆гне́мъ / бꙋ́дете и҆зсо́хше.

Сла́ва: Ст҃ы́мъ дх҃омъ / всѧ́ка дꙋша̀ живи́тсѧ, / и҆ чистото́ю возвыша́етсѧ, / свѣтлѣ́етсѧ трⷪ҇ческимъ є҆ди́нствомъ сщ҃еннота́йнѣ.

И҆ ны́нѣ, то́йже.

Дїа́конъ: Во́нмемъ.

Сщ҃е́нникъ: Ми́ръ всѣ̑мъ.

Ли́къ: И҆ дх҃ови твоемꙋ̀.

Дїа́конъ: Премꙋ́дрость. И҆ прокі́менъ:

Прокі́мны воскрⷭ҇ны.

Прокі́менъ, гла́съ а҃: Ны́нѣ воскрⷭ҇нꙋ̀, глаго́летъ гдⷭ҇ь, / положꙋ́сѧ во сп҃се́нїе, не ѡ҆биню́сѧ ѡ҆ не́мъ. Сті́хъ: Словеса̀ гдⷭ҇нѧ, словеса̀ чи́ста.

Прокі́менъ, гла́съ в҃: Воста́ни гдⷭ҇и бж҃е мо́й повелѣ́нїемъ, и҆́мже заповѣ́далъ є҆сѝ, / и҆ со́нмъ люде́й ѡ҆бы́детъ тѧ̀. Сті́хъ: Гдⷭ҇и бж҃е мо́й, на тѧ̀ ᲂу҆пова́хъ, сп҃си́ мѧ.

Прокі́менъ, гла́съ г҃: Рцы́те во ꙗ҆зы́цѣхъ, ꙗ҆́кѡ гдⷭ҇ь воцр҃и́сѧ: / и҆́бо и҆спра́ви вселе́ннꙋю, ꙗ҆́же не подви́житсѧ. Сті́хъ: Воспо́йте гдⷭ҇еви пѣ́снь но́вꙋ, воспо́йте гдⷭ҇еви всѧ̀ землѧ̀.

Прокі́менъ, гла́съ д҃: Воскрⷭ҇нѝ гдⷭ҇и, помозѝ на́мъ, / и҆ и҆зба́ви на́съ и҆́мене твоегѡ̀ ра́ди. Сті́хъ: Бж҃е, ᲂу҆ши́ма на́шима ᲂу҆слы́шахомъ, и҆ ѻ҆тцы̀ на́ши возвѣсти́ша на́мъ.

Прокі́менъ, гла́съ є҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, / ꙗ҆́кѡ ты̀ црⷭ҇твꙋеши во вѣ́ки. Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.

Прокі́менъ, гла́съ ѕ҃: Гдⷭ҇и, воздви́гни си́лꙋ твою̀, / и҆ прїидѝ во є҆́же сп҃стѝ на́съ. Сті́хъ: Пасы́й і҆и҃лѧ вонмѝ, наставлѧ́ѧй ꙗ҆́кѡ ѻ҆вча̀ і҆ѡ́сифа.

Прокі́менъ, гла́съ з҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, / не забꙋ́ди ᲂу҆бо́гихъ твои́хъ до конца̀. Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.

Прокі́менъ, гла́съ и҃: Воцр҃и́тсѧ гдⷭ҇ь во вѣ́къ, / бг҃ъ тво́й, сїѡ́не, въ ро́дъ и҆ ро́дъ. Сті́хъ: Хвалѝ дꙋшѐ моѧ̀ гдⷭ҇а, восхвалю̀ гдⷭ҇а въ животѣ̀ мое́мъ.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Сщ҃е́нникъ возглаша́етъ: Ꙗ҆́кѡ свѧ́тъ є҆сѝ бж҃е на́шъ, и҆ во ст҃ы́хъ почива́еши, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Дїа́конъ, дрꙋгі́й прокі́менъ:

Всѧ́кое дыха́нїе / да хва́литъ гдⷭ҇а.

Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆твержде́нїи си́лы є҆гѡ̀.

И҆ посе́мъ возглаша́етъ дїа́конъ: И҆ ѡ҆ сподо́битисѧ на́мъ слы́шанїю ст҃а́гѡ є҆ѵⷢ҇лїа гдⷭ҇а бг҃а мо́лимъ.

Ли́къ: Гдⷭ҇и поми́лꙋй, три́жды.

Дїа́конъ: Премꙋ́дрость, про́сти ᲂу҆слы́шимъ ст҃а́гѡ є҆ѵⷢ҇лїа.

И҆ сщ҃е́нникъ: Ми́ръ всѣ̑мъ.

Лю́дїе: И҆ дх҃ови твоемꙋ̀.

И҆ а҆́бїе: Ѿ ст҃а́гѡ є҆ѵⷢ҇лїа чте́нїе.

Ли́къ: Сла́ва тебѣ̀ гдⷭ҇и, сла́ва тебѣ̀.

Дїа́конъ: Во́нмемъ.

И҆ глаго́летъ сщ҃е́нникъ ᲂу҆́треннее є҆ѵⷢ҇лїе, а҆́ще слꙋчи́тсѧ недѣ́лѧ.

Ли́къ: Сла́ва тебѣ̀ гдⷭ҇и, сла́ва тебѣ̀.

По є҆ѵⷢ҇лїи, а҆́ще є҆́сть недѣ́лѧ, глаго́лемъ се́й тропа́рь.

Ли́къ: Воскресе́нїе хрⷭ҇то́во ви́дѣвше, / поклони́мсѧ ст҃о́мꙋ гдⷭ҇ꙋ і҆и҃сꙋ, / є҆ди́номꙋ безгрѣ́шномꙋ. / крⷭ҇тꙋ̀ твоемꙋ̀ покланѧ́емсѧ хрⷭ҇тѐ, / и҆ ст҃о́е воскресе́нїе твоѐ пое́мъ и҆ сла́вимъ: / ты́ бо є҆сѝ бг҃ъ на́шъ, / ра́звѣ тебѐ и҆но́гѡ не зна́емъ, / и҆́мѧ твоѐ и҆менꙋ́емъ. / прїиди́те всѝ вѣ́рнїи, / поклони́мсѧ ст҃о́мꙋ хрⷭ҇то́вꙋ воскресе́нїю: / се́ бо прїи́де крⷭ҇то́мъ ра́дость всемꙋ̀ мі́рꙋ. / всегда̀ бл҃гословѧ́ще гдⷭ҇а, / пое́мъ воскресе́нїе є҆гѡ̀: / распѧ́тїе бо претерпѣ́въ, / сме́ртїю сме́рть разрꙋшѝ.

И҆ чте́цъ н҃-й ѱало́мъ:

Поми́лꙋй мѧ̀ бж҃е, по вели́цѣй ми́лости твое́й и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ, ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ. слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й. не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀. возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. и҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. ᲂу҆бл҃жѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.

По н҃-мъ ѱалмѣ̀, а҆́ще є҆́сть недѣ́лѧ.

Сла́ва: Мл҃твами а҆пⷭ҇лѡвъ, / млⷭ҇тиве, ѡ҆чи́сти / мно́жєства согрѣше́нїй на́шихъ.

И҆ ны́нѣ: Мл҃твами бцⷣы, / млⷭ҇тиве, ѡ҆чи́сти / мно́жєства согрѣше́нїй на́шихъ.

Та́же, гла́съ ѕ҃: Поми́лꙋй мѧ̀, бж҃е, / по вели́цѣй млⷭ҇ти твое́й, / и҆ по мно́жествꙋ щедро́тъ твои́хъ, / ѡ҆чи́сти беззако́нїе моѐ.

Та́же: Воскр҃съ і҆и҃съ ѿ гро́ба, / ꙗ҆́коже проречѐ, / дадѐ на́мъ живо́тъ вѣ́чный, / и҆ ве́лїю млⷭ҇ть.

[А҆́ще ли недѣ́лѧ мытарѧ̀, и҆лѝ блꙋ́днагѡ, и҆лѝ мѧсопꙋ́стнаѧ, и҆ сыропꙋ́стнаѧ, и҆ въ про́чыѧ недѣ̑ли вели́кагѡ поста̀ пое́мъ тропарѝ: Покаѧ́нїѧ ѿве́рзи мѝ двє́ри жизнода́вче: ]

По цѣлова́нїи же є҆ѵⷢ҇лїа, глаго́летъ дїа́конъ:

Ли́къ: Гдⷭ҇и поми́лꙋй, в҃і.

Та́же глаго́летъ сщ҃е́нникъ возгла́снѡ: Ми́лостїю и҆ щедро́тами и҆ чл҃вѣколю́бїемъ є҆диноро́днагѡ твоегѡ̀ сн҃а, съ ни́мже бл҃гослове́нъ є҆сѝ, со прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

И҆ начина́емъ канѡ́ны: воскрⷭ҇нъ, крⷭ҇товоскре́сенъ, бцⷣы, и҆ мине́и. По г҃-й пѣ́сни твори́тъ сщ҃е́нникъ ма́лꙋю є҆ктенїю̀. Та́же сѣда́ленъ мине́и. По ѕ҃-й пѣ́сни є҆ктенїа̀. Конда́къ, и҆ і҆́косъ. И҆ чте́нїе въ сѷнаѯа́рїи.

На ѳ҃-й пѣ́сни дїа́конъ: Бцⷣꙋ и҆ мт҃рь свѣ́та въ пѣ́снехъ возвели́чимъ.

И҆ пое́мъ пѣ́снь прест҃ы́ѧ бцⷣы.

Ли́къ: Вели́читъ дꙋша̀ моѧ̀ гдⷭ҇а, / и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ.

Къ коемꙋ́ждо стїхꙋ̀ припѣва́емъ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

Ꙗ҆́кѡ призрѣ̀ на смире́нїе рабы̀ своеѧ̀, / се́ бо ѿ ны́нѣ ᲂу҆бл҃жа́тъ мѧ̀ всѝ ро́ди.

Ꙗ҆́кѡ сотворѝ мнѣ̀ вели́чїе си́льный, и҆ ст҃о и҆́мѧ є҆гѡ̀, / и҆ млⷭ҇ть є҆гѡ̀ въ ро́ды родѡ́въ боѧ́щымсѧ є҆гѡ̀.

Сотворѝ держа́вꙋ мы́шцею свое́ю, / расточѝ гѡ́рдыѧ мы́слїю се́рдца и҆́хъ.

Низложѝ си̑льныѧ со престѡ́лъ, и҆ вознесѐ смирє́нныѧ: / а҆́лчꙋщыѧ и҆спо́лни бла̑гъ, и҆ богатѧ́щыѧсѧ ѿпꙋстѝ тщы̀.

Воспрїѧ́тъ і҆и҃лѧ ѻ҆́трока своего̀, помѧнꙋ́ти млⷭ҇ти, / ꙗ҆́коже глаго́ла ко ѻ҆тцє́мъ на́шымъ, а҆враа́мꙋ и҆ сѣ́мени є҆гѡ̀ да́же до вѣ́ка.

По ѳ҃-й пѣ́сни, а҆́ще ᲂу҆́бѡ нѣ́сть недѣ́лѧ.

Ли́къ пое́тъ: Досто́йно є҆́сть ꙗ҆́кѡ вои́стиннꙋ, / блажи́ти тѧ̀ бцⷣꙋ, / приснобл҃же́ннꙋю, и҆ пренепоро́чнꙋю, и҆ мт҃рь бг҃а на́шегѡ. / честѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

А҆́ще ᲂу҆́бѡ є҆́сть недѣ́лѧ, по і҆рмосѣ̀ є҆ктенїа̀. Та́же дїа́конъ возглаша́етъ:

Дїа́конъ: Свѧ́тъ гдⷭ҇ь бг҃ъ на́шъ.

Ли́къ: Свѧ́тъ гдⷭ҇ь бг҃ъ на́шъ.

Дїа́конъ: Ꙗ҆́кѡ свѧ́тъ гдⷭ҇ь бг҃ъ на́шъ.

Ли́къ: Свѧ́тъ гдⷭ҇ь бг҃ъ на́шъ.

Дїа́конъ: Над̾ всѣ́ми людьмѝ бг҃ъ на́шъ.

Ли́къ: Свѧ́тъ гдⷭ҇ь бг҃ъ на́шъ.

Посе́мъ, а҆́ще ᲂу҆́бѡ є҆́сть недѣ́лѧ, воскрⷭ҇ный є҆ѯапостїла́рїй, и҆ ст҃а́гѡ, а҆́ще пра́зднꙋетсѧ, и҆ пое́тсѧ си́це:

Всѧ́кое дыха́нїе, въ прилꙋчи́вшїйсѧ гла́съ:

Ли́къ: Всѧ́кое дыха́нїе да хва́литъ гдⷭ҇а. / хвали́те гдⷭ҇а съ нб҃съ, / хвали́те є҆го̀ въ вы́шнихъ. / тебѣ̀ подоба́етъ пѣ́снь бг҃ꙋ. / хвали́те є҆го̀ всѝ а҆́гг҃ли є҆гѡ̀, / хвали́те є҆го̀ всѧ̑ си̑лы є҆гѡ̀. / тебѣ̀ подоба́етъ пѣ́снь бг҃ꙋ.

Чте́цъ, ѱало́мъ рм҃и: Хвали́те є҆го̀ со́лнце и҆ лꙋна̀, хвали́те є҆го̀ всѧ̑ ѕвѣ́зды и҆ свѣ́тъ. Хвали́те є҆го̀ нб҃са̀ нб҃съ, и҆ вода̀ ꙗ҆́же превы́ше нб҃съ, да восхва́лѧтъ и҆́мѧ гдⷭ҇не. ꙗ҆́кѡ то́й речѐ, и҆ бы́ша: то́й повелѣ̀, и҆ созда́шасѧ. поста́ви ѧ҆̀ въ вѣ́къ, и҆ въ вѣ́къ вѣ́ка: повелѣ́нїе положѝ, и҆ не ми́мѡ и҆́детъ. хвали́те гдⷭ҇а ѿ землѝ ѕмі́евє, и҆ всѧ̑ бє́здны: ѻ҆́гнь, гра́дъ, снѣ́гъ, го́лоть, дꙋ́хъ бꙋ́ренъ, творѧ̑щаѧ сло́во є҆гѡ̀: го́ры и҆ всѝ хо́лми, древа̀ плодонѡ́сна, и҆ всѝ ке́дри: ѕвѣ́рїе и҆ всѝ ско́ти, га́ди и҆ пти̑цы перна̑ты: ца́рїе зе́мстїи, и҆ всѝ лю́дїе, кнѧ́зи, и҆ всѝ сꙋдїи̑ зе́мстїи: ю҆́нѡши и҆ дѣ̑вы, ста́рцы съ ю҆́нотами да восхва́лѧтъ и҆́мѧ гдⷭ҇не: ꙗ҆́кѡ вознесе́сѧ и҆́мѧ тогѡ̀ є҆ди́нагѡ. и҆сповѣ́данїе є҆гѡ̀ на землѝ и҆ на нб҃сѝ, и҆ вознесе́тъ ро́гъ люде́й свои́хъ. пѣ́снь всѣ̑мъ прпⷣбнымъ є҆гѡ̀, сыновѡ́мъ і҆и҃лєвымъ, лю́демъ приближа́ющымсѧ є҆мꙋ̀.

Ѱало́мъ рм҃ѳ: Воспо́йте гдⷭ҇еви пѣ́снь но́вꙋ, хвале́нїе є҆гѡ̀ въ цр҃кви прпⷣбныхъ. да возвесели́тсѧ і҆и҃ль ѡ҆ сотво́ршемъ є҆го̀, и҆ сы́нове сїѡ́ни возра́дꙋютсѧ ѡ҆ цр҃ѣ̀ свое́мъ: да восхва́лѧтъ и҆́мѧ є҆гѡ̀ въ ли́цѣ, въ тѷмпа́нѣ и҆ ѱалти́ри да пою́тъ є҆мꙋ̀. ꙗ҆́кѡ бл҃говоли́тъ гдⷭ҇ь въ лю́дехъ свои́хъ, и҆ вознесе́тъ крѡ́ткїѧ во сп҃се́нїе. восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. возношє́нїѧ бж҃їѧ въ горта́ни и҆́хъ, и҆ мечѝ ѻ҆бою́дꙋ ѻ҆стры̀ въ рꙋка́хъ и҆́хъ: сотвори́ти ѿмще́нїе во ꙗ҆зы́цѣхъ, ѡ҆бличє́нїѧ въ лю́дехъ: свѧза́ти царѝ и҆́хъ пꙋ́ты, и҆ сла̑вныѧ и҆́хъ рꙋчны́ми ѻ҆кѡ́вы желѣ́зными.

Ѿ здѣ̀ начина́емъ стїхи̑ры на ѕ҃: Сотвори́ти въ ни́хъ сꙋ́дъ напи́санъ: / сла́ва сїѧ̀ бꙋ́детъ всѣ̑мъ прпⷣбнымъ є҆гѡ̀.

Ѱало́мъ р҃н: Хвали́те бг҃а во ст҃ы́хъ є҆гѡ̀, / хвали́те є҆го̀ во ᲂу҆тверже́нїи си́лы є҆гѡ̀.

На д҃: Хвали́те є҆го̀ на си́лахъ є҆гѡ̀, / хвали́те є҆го̀ по мно́жествꙋ вели́чествїѧ є҆гѡ̀.

Хвали́те є҆го̀ во гла́сѣ трꙋ́бнѣмъ, / хвали́те є҆го̀ во ѱалти́ри и҆ гꙋ́слехъ.

На в҃: Хвали́те є҆го̀ въ тѷмпа́нѣ и҆ ли́цѣ, / хвали́те є҆го̀ во стрꙋ́нахъ и҆ ѻ҆рга́нѣ.

Хвали́те є҆го̀ въ кѷмва́лѣхъ доброгла́сныхъ. хвали́те є҆го̀ въ кѷмва́лѣхъ восклица́нїѧ. / всѧ́кое дыха́нїе да хва́литъ гдⷭ҇а.

А҆́ще є҆́сть недѣ́лѧ:

Сті́хъ: Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, / не забꙋ́ди ᲂу҆бо́гихъ твои́хъ до конца̀.

Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, / повѣ́мъ всѧ̑ чꙋдеса̀ твоѧ̑.

По стїхи́рахъ, Сла́ва, стїхи́ра є҆ѵⷢ҇льскаѧ.

И҆ ны́нѣ, настоѧ́щїй бг҃оро́диченъ:

Ли́къ: Пребл҃гослове́нна є҆сѝ бцⷣе дв҃о, / вопло́щшимъ бо сѧ и҆з̾ тебѐ а҆́дъ плѣни́сѧ, / а҆да́мъ воззва́сѧ, / клѧ́тва потреби́сѧ, / є҆́ѵа свободи́сѧ, / сме́рть ᲂу҆мертви́сѧ, и҆ мы̀ ѡ҆жи́хомъ. / тѣ́мъ воспѣва́юще вопїе́мъ: / бл҃гослове́нъ хрⷭ҇то́съ бг҃ъ / бл҃говоли́вый та́кѡ, сла́ва тебѣ̀.

Сщ҃е́нникъ: Сла́ва тебѣ̀ показа́вшемꙋ на́мъ свѣ́тъ.

Славосло́вїе вели́кое.

Ли́къ: Сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. хва́лимъ тѧ̀, бл҃гослови́мъ тѧ̀, кла́нѧемъ ти сѧ, славосло́вимъ тѧ̀, бл҃годари́мъ тѧ̀ вели́кїѧ ра́ди сла́вы твоеѧ̀. гдⷭ҇и цр҃ю̀ нбⷭ҇ный, бж҃е ѻ҆́ч҃е вседержи́телю, гдⷭ҇и сн҃е є҆диноро́дный і҆и҃се хрⷭ҇тѐ, и҆ ст҃ы́й дш҃е. гдⷭ҇и бж҃е, а҆́гнче бж҃їй, сн҃е ѻ҆ч҃ь, взе́млѧй грѣ́хъ мі́ра, поми́лꙋй на́съ: взе́млѧй грѣхѝ мі́ра, прїимѝ мл҃твꙋ на́шꙋ: сѣдѧ́й ѡ҆деснꙋ́ю ѻ҆ц҃а̀, поми́лꙋй на́съ. ꙗ҆́кѡ ты̀ є҆сѝ є҆ди́нъ свѧ́тъ, ты̀ є҆сѝ є҆ди́нъ гдⷭ҇ь, і҆и҃съ хрⷭ҇то́съ, во сла́вꙋ бг҃а ѻ҆ц҃а̀, а҆ми́нь.

На всѧ́къ де́нь бл҃гословлю́ тѧ, и҆ восхвалю̀ и҆́мѧ твоѐ во вѣ́ки, и҆ въ вѣ́къ вѣ́ка.

Сподо́би гдⷭ҇и въ де́нь се́й без̾ грѣха̀ сохрани́тисѧ на́мъ. бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки, а҆ми́нь.

Бꙋ́ди гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀.

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ. Три́жды.

Гдⷭ҇и, прибѣ́жище бы́лъ є҆сѝ на́мъ въ ро́дъ и҆ ро́дъ. а҆́зъ рѣ́хъ: гдⷭ҇и, поми́лꙋй мѧ̀, и҆сцѣлѝ дꙋ́шꙋ мою̀, ꙗ҆́кѡ согрѣши́хъ тебѣ̀.

Гдⷭ҇и, къ тебѣ̀ прибѣго́хъ, наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й: ꙗ҆́кѡ ᲂу҆ тебѐ и҆сто́чникъ живота̀, во свѣ́тѣ твое́мъ ᲂу҆́зримъ свѣ́тъ. проба́ви млⷭ҇ть твою̀ вѣ́дꙋщымъ тѧ̀.

Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды.

Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Ст҃ы́й безсме́ртный, поми́лꙋй на́съ.

Та́же высоча́йшимъ гла́сомъ: Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ.

И҆ по сконча́нїи славосло́вїѧ, глаго́лемъ тропарѝ по ѻ҆бы́чаю.

А҆́ще же є҆́сть недѣ́лѧ, глаго́лемъ тропа́рь воскрⷭ҇ный. Во гла́съ а҃, г҃, є҃ и҆ з҃, глаго́лемъ се́й:

Дне́сь сп҃се́нїе мі́рꙋ бы́сть, / пое́мъ воскре́сшемꙋ и҆з̾ гро́ба, / и҆ нача́льникꙋ жи́зни на́шеѧ: / разрꙋши́въ бо сме́ртїю сме́рть, / побѣ́дꙋ дадѐ на́мъ и҆ ве́лїю млⷭ҇ть.

Во гла́съ же в҃, д҃, ѕ҃ и҆ и҃, глаго́лемъ се́й:

Воскре́съ и҆з̾ гро́ба, и҆ ᲂу҆́зы растерза́лъ є҆сѝ а҆́да, / разрꙋши́лъ є҆сѝ ѡ҆сꙋжде́нїе сме́рти гдⷭ҇и, / всѧ̑ ѿ сѣте́й врага̀ и҆зба́вивый: / ꙗ҆ви́вый же себѐ а҆пⷭ҇лѡмъ твои̑мъ, / посла́лъ є҆сѝ ѧ҆̀ на про́повѣдь, / и҆ тѣ́ми ми́ръ тво́й по́далъ є҆сѝ вселе́ннѣй, / є҆ди́не многомлⷭ҇тиве.

Е҆ктенїа̀ сꙋгꙋ́баѧ.

Дїа́конъ: Поми́лꙋй на́съ, бж҃е, по вели́цѣй ми́лости твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй, три́жды.

Е҆щѐ мо́лимсѧ ѡ҆ бл҃же́нныхъ и҆ приснопа́мѧтныхъ созда́телехъ ст҃а́гѡ хра́ма сегѡ̀ [а҆́ще во ѻ҆би́тели: ст҃ы́ѧ ѻ҆би́тели сеѧ̀ ], и҆ ѡ҆ всѣ́хъ преждепочи́вшихъ ѻ҆ц҃ѣ́хъ и҆ бра́тїѧхъ, здѣ̀ лежа́щихъ и҆ повсю́дꙋ правосла́вныхъ.

Ли́къ: Гдⷭ҇и поми́лꙋй, три́жды.

Возглаша́етъ і҆ере́й: Ꙗ҆́кѡ ми́лостивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Е҆ктенїа̀ проси́тєльнаѧ.

Дїа́конъ: И҆спо́лнимъ ᲂу҆́треннюю моли́твꙋ на́шꙋ гдⷭ҇ви.

Ли́къ: Гдⷭ҇и, поми́лꙋй.

Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.

Ли́къ: Гдⷭ҇и, поми́лꙋй.

Днѐ всегѡ̀ соверше́нна, свѧ́та, ми́рна и҆ безгрѣ́шна, ᲂу҆ гдⷭ҇а про́симъ.

Ли́къ: Пода́й гдⷭ҇и.

А҆́гг҃ла ми́рна, вѣ́рна наста́вника, храни́телѧ дꙋ́шъ и҆ тѣле́съ на́шихъ, ᲂу҆ гдⷭ҇а про́симъ.

Ли́къ: Пода́й гдⷭ҇и.

Проще́нїѧ и҆ ѡ҆ставле́нїѧ грѣхѡ́въ и҆ прегрѣше́нїй на́шихъ, ᲂу҆ гдⷭ҇а про́симъ.

Ли́къ: Пода́й гдⷭ҇и.

До́брыхъ и҆ поле́зныхъ дꙋша́мъ на́шымъ и҆ ми́ра мі́рови, ᲂу҆ гдⷭ҇а про́симъ.

Ли́къ: Пода́й гдⷭ҇и.

Про́чее вре́мѧ живота̀ на́шегѡ въ ми́рѣ и҆ покаѧ́нїи сконча́ти, ᲂу҆ гдⷭ҇а про́симъ.

Ли́къ: Пода́й гдⷭ҇и.

Ли́къ: Тебѣ̀, гдⷭ҇и.

Возглаша́етъ і҆ере́й: Ꙗ҆́кѡ бг҃ъ ми́лости, щедро́тъ и҆ чл҃вѣколю́бїѧ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

І҆ере́й: Ми́ръ всѣ̑мъ.

Лю́дїе: И҆ дх҃ови твоемꙋ̀.

Дїа́конъ: Главы̑ на́шѧ гдⷭ҇ви прикло́нимъ.

Ли́къ: Тебѣ̀, гдⷭ҇и.

И҆ сщ҃е́нникъ глаго́летъ моли́твꙋ сїю̀ та́йнѡ:

Гдⷭ҇и ст҃ы́й, въ вы́шнихъ живы́й и҆ на смирє́нныѧ призира́ѧй, и҆ всеви́дѧщимъ ѻ҆́комъ твои́мъ призира́ѧй на всю̀ тва́рь: тебѣ̀ приклони́хомъ вы́ю се́рдца и҆ тѣлесѐ, и҆ мо́лимсѧ тебѣ̀: прострѝ рꙋ́кꙋ твою̀ неви́димꙋю ѿ ст҃а́гѡ жили́ща твоегѡ̀ и҆ бл҃гословѝ всѧ̑ ны̀: и҆ а҆́ще что̀ согрѣши́хомъ, во́лею и҆лѝ нево́лею, ꙗ҆́кѡ бл҃гъ и҆ человѣколю́бецъ бг҃ъ простѝ, да́рꙋѧ на́мъ мі̑рнаѧ и҆ премі̑рнаѧ блага̑ѧ твоѧ̑.

Возглаша́етъ: Твое́ бо є҆́сть, є҆́же ми́ловати и҆ спаса́ти ны̀, бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Дїа́конъ: Премꙋ́дрость.

Ли́къ: Бл҃гословѝ.

Сщ҃е́нникъ: Сы́й блгⷭ҇ве́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь. Оу҆твердѝ бж҃е, / ст҃ꙋ́ю правосла́внꙋю вѣ́рꙋ, правосла́вныхъ хрⷭ҇тїа́нъ, / во вѣ́къ вѣ́ка.

Сщ҃е́нникъ: Прест҃а́ѧ бцⷣе, спасѝ на́съ.

Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.

Сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

Сщ҃е́нникъ твори́тъ ѿпꙋ́стъ въ недѣ́лю:

Воскресы́й и҆з̾ ме́ртвыхъ хрⷭ҇то́съ и҆́стинный бг҃ъ на́шъ, моли́твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лѡвъ, и҆ ст҃а́гѡ [(имя:gen), є҆гѡ́же є҆́сть хра́мъ, и҆ є҆гѡ́же є҆́сть де́нь], ст҃ы́хъ пра́ведныхъ бг҃оѻц҃ъ і҆ѡакі́ма и҆ а҆́нны, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бла́гъ и҆ чл҃вѣколю́бецъ.

Та́же, многолѣ́тїе. И҆ чте́цъ глаго́летъ ча́съ а҃-й.