А҆ка́ѳїстъ прпⷣбномꙋ паі́сїю ст҃ого́рцꙋ

Конда́къ а҃.

И҆збра́ннаго подви́жника и҆ сосꙋ́да а҆рѡма́тѡвъ бл҃гоꙋха́нныхъ, каппадокі́йское прозѧбе́нїе и҆ а҆ѳѡ́нскїѧ панагꙋ́ды все́льника, неꙋсы́пнаго ѡ҆ на́съ предста́телѧ воспои́мъ согла́снѡ. А҆́гг҃льскомꙋ бо житїю̀ подража́ѧ, трⷪ҇цѣ ст҃ѣ́й бл҃гоꙋгоди́лъ є҆сѝ, тѣ́мже зове́мъ тѝ:

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

І҆́косъ а҃.

А҆́гг҃лѡмъ подража́тель показа́лсѧ є҆сѝ во ᲂу҆дѣ́лѣ бцⷣы и҆збра́ннѣмъ, и҆ на́мъ хода́тай теплѣ́йшїй пред̾ бг҃омъ, паі́сїе ѻ҆́тче, тѣ́мже та́кѡ тѧ̀ ᲂу҆бл҃жа́емъ:

Ра́дꙋйсѧ, ст҃а́гѡ а҆рсе́нїа похвале́нїе:

ра́дꙋйсѧ, а҆ѳѡ́на великоиме́нное бл҃голѣ́пїе.

Ра́дꙋйсѧ, вы́шнѧгѡ жи́тельства ѻ҆́бразе:

ра́дꙋйсѧ, а҆сі́и ма́лыѧ ѻ҆́трасле.

Ра́дꙋйсѧ, въ фарасїѡ́тѣхъ приснопѣва́емый:

ра́дꙋйсѧ, и҆́нокꙋющихъ пра́вило.

Ра́дꙋйсѧ, вѣ́ры правосла́вныѧ ве́лїй храни́телю:

ра́дꙋйсѧ, цр҃ко́вныхъ ѻ҆ве́цъ просвѣти́телю.

Ра́дꙋйсѧ, каппадокі́и бжⷭ҇твеннаѧ розго̀:

ра́дꙋйсѧ, є҆лла́ды доброво́нное мѵ́ро.

Ра́дꙋйсѧ, земны́й а҆́гг҃ле, вѣ́стниче на землѝ:

ра́дꙋйсѧ, человѣ́че нбⷭ҇ный, пребыва́ѧй на нб҃сѝ.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ в҃.

Ви́дѧще, ꙗ҆́кѡ ѿ рꙋкѝ сщ҃е́ннагѡ а҆рсе́нїа въ фара́сахъ каппадокі́йскихъ, ѻ҆те́чествїи ст҃ы́хъ, кр҃ще́нїе прїѧ́лъ є҆сѝ, и҆ ꙗ҆́кѡ мл҃тва сегѡ̀ ст҃а́гѡ многопло́днꙋю тѧ̀ лѣ́торасль а҆сі́и ма́лыѧ и҆ є҆лла́ды ꙗ҆вѝ, тѧ̀ прославлѧ́емъ по достоѧ́нїю, бг҃ови пою́ще: А҆ллилꙋ́їа.

І҆́косъ в҃.

Разꙋмѣ́ѧ страда̑нїѧ и҆з̾ ѻ҆те́чествїѧ и҆згна́нныхъ, стра́нствꙋѧ и҆ печа́лꙋѧсѧ ѡ҆ до́ма роди́тельскагѡ разоре́нїи, въ вѣ́рѣ ᲂу҆крѣпи́лсѧ є҆сѝ и҆ бг҃оразꙋ́мїѧ прїѧ́лъ є҆сѝ свѣ́тъ ѿ бл҃года́ти бж҃їѧ, паі́сїе ст҃е. Сегѡ̀ ра́ди и҆ мы̀, взира́юще ны́нѣ на чꙋдеса̀ твоѧ̑, восклица́емъ тѝ такова̑ѧ:

Ра́дꙋйсѧ, і҆и҃совыхъ бл҃гослове́нїй стѧжа́телю:

ра́дꙋйсѧ, ᲂу҆дѣ́ла бг҃омт҃рнѧгѡ свѣти́ло.

Ра́дꙋйсѧ, кла́дезю многомꙋ́дрыхъ бл҃годѣѧ́нїй:

ра́дꙋйсѧ, кївѡ́те вы́шнѧгѡ дарова́нїй.

Ра́дꙋйсѧ, бж҃їѧ дх҃а бл҃гоѡти́шное сїѧ́нїе:

ра́дꙋйсѧ, добродѣ́телей несказа́нное бл҃гоꙋха́нїе.

Ра́дꙋйсѧ, лꙋчѐ сл҃нца пра́вды, ѿгонѧ́ющаѧ напа̑сти:

ра́дꙋйсѧ, и҆сто́чниче ст҃ы́й, врачꙋ́ѧй всѧ̑кїѧ стра̑сти.

Ра́дꙋйсѧ, цр҃и́цы нбⷭ҇ныѧ ᲂу҆го́дниче преꙋсе́рдный:

ра́дꙋйсѧ, ст҃ы́ѧ горы̀ во́ине добропобѣ́дный.

Ра́дꙋйсѧ, поста̀ и҆ мл҃твы дѣ́лателю неꙋсы́пный:

ра́дꙋйсѧ, стра́ждꙋщихъ и҆ печа́льныхъ застꙋ́пниче непосты́дный.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ г҃.

Си́лꙋ вы́шнѧгѡ, мч҃нки ᲂу҆крѣплѧ́ющꙋю, разꙋмѣ́ѧ и҆ житїє́мъ и҆́хъ внима́ѧ, ты̀ дꙋше́ю бл҃же́нною къ непреста́нномꙋ славосло́вїю всетворца̀ восходи́лъ є҆сѝ. Мы́ же сїѐ воспомина́юще, вопїе́мъ є҆мꙋ̀: А҆ллилꙋ́їа.

І҆́косъ г҃.

Оу҆слы́шавъ словеса̀ нбⷭ҇нагѡ жениха̀, ꙗ҆́кѡ то́й є҆́сть воскрⷭ҇нїе и҆ живо́тъ и҆ ꙗ҆́кѡ во вѣ́ки не ᲂу҆́мретъ вѣ́рꙋѧй въ него̀, неизрече́ннагѡ свѣ́та и҆спо́лнилсѧ є҆сѝ и҆ невѣ́рїѧ пре́лесть низве́рглъ є҆сѝ. Тѣ́мже твое́ю мꙋ́дростїю наꙋча́еми, бл҃года́рственнѡ воспѣва́емъ тѝ такова̑ѧ:

Ра́дꙋйсѧ, тене́та безбо́жїѧ прелетѣ́вый:

ра́дꙋйсѧ, ꙗ҆́вѣ хрⷭ҇та̀ ᲂу҆зрѣ́вый.

Ра́дꙋйсѧ, ѻ҆би́тели стомїо́нскїѧ ᲂу҆строи́телю:

ра́дꙋйсѧ, ко́ницкихъ є҆ретїкѡ́въ побѣди́телю.

Ра́дꙋйсѧ, ми́лостыни пото́че неисчерпа́емый:

ра́дꙋйсѧ, го́рнимъ сїѧ́нїемъ ᲂу҆крѣплѧ́емый.

Ра́дꙋйсѧ, горы̀ мѡѷсе́овы ѡ҆роше́нный са́де:

ра́дꙋйсѧ, пꙋсты́ни сїна́йскїѧ бл҃госѣ́нное дре́во.

Ра́дꙋйсѧ, ѻ҆би́тели великомч҃нцы є҆катері́ны предста́телю:

ра́дꙋйсѧ, въ мꙋ́дрости дѣ́вѣ се́й подража́телю.

Ра́дꙋйсѧ, ст҃ы̑мъ галактїѡ́нꙋ и҆ є҆пїсти́мїи совсе́льниче:

ра́дꙋйсѧ, а҆́гг҃льскимъ ликѡ́мъ на землѝ собесѣ́дниче.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ д҃.

Раче́нїе пла́менное къ бг҃омт҃ри, чистѣ́йшїй ѻ҆́тче, поне́же и҆мѣ̀, сїю̀ спобо́рницꙋ непрело́жнꙋю и҆ храни́тельницꙋ стѧжа̀. Тѣ́мъ и҆ мы̀, дарова́нїй твои́хъ жела́юще прїѡбщи́тисѧ, ѡ҆ тебѣ̀ пое́мъ: А҆ллилꙋ́їа.

І҆́косъ д҃.

Слы́шаша и҆́мѧ твоѐ земні́и концы̀, паі́сїе ст҃че, ты́ бо ꙗ҆́кѡ со́лнце блиста́ѧй во времена̀ послѣ̑днѧѧ и҆ правосла́вїе ᲂу҆твержда́ѧй и҆́менемъ гдⷭ҇а і҆и҃са хрⷭ҇та̀ ꙗ҆ви́лсѧ є҆сѝ. Мы́ же є҆диномы́сленнѣ па́мѧтꙋюще бг҃огла̑снаѧ ᲂу҆чє́нїѧ твоѧ̑, прино́симъ тѝ речє́нїѧ такова̑ѧ:

Ра́дꙋйсѧ, и҆зрѧ́днѣйшїй прест҃ы́ѧ люби́мче:

ра́дꙋйсѧ, богатотво́рный хрⷭ҇то́въ дароно́сче.

Ра́дꙋйсѧ, сомл҃твенниче херꙋві́мѡмъ:

ра́дꙋйсѧ, є҆динонра́вниче серафі́мѡмъ.

Ра́дꙋйсѧ, забра́ло крѣ́пкое бг҃олю́бцєвъ:

ра́дꙋйсѧ, ᲂу҆́тваре преиспещре́ннаѧ цр҃кве.

Ра́дꙋйсѧ, чернори́зцєвъ ѡ҆гра́до и҆ ѻ҆те́чествїѧ хране́нїе:

ра́дꙋйсѧ, ко́ницы ѻ҆́трасле, стомїо́на же застꙋпле́нїе.

Ра́дꙋйсѧ, ло́зїе бг҃омт҃ре, бл҃говре́менный пло́дъ приносѧ́щее:

ра́дꙋйсѧ, вертогра́де и҆́стиннагѡ покаѧ́нїѧ бл҃гоꙋха́ѧй.

Ра́дꙋйсѧ, бж҃їими словесы̀ прорече́нїе:

ра́дꙋйсѧ, ꙗ҆́звамъ грѣ̑шничимъ ᲂу҆маще́нїе.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ є҃.

Бг҃опрїѧ́тнꙋ любо́вь ꙗ҆́кѡ стѧжа́вый, въ же́ртвꙋ себѐ сама́го бра́тїѧмъ ты̀ возложѝ, наро́ды же ѡ҆́крестъ живꙋ́щыѧ, бл҃гослове́нїемъ пречⷭ҇тыѧ ѿ ѻ҆би́тели стомїо́нскїѧ ѡ҆дѣлѧ́ше. Такова́гѡ себє̀ ѿверже́нїѧ ра́ди ны́нѣ со а҆́гг҃лы хрⷭ҇та̀ прославлѧ́еши, мы́ же па́мѧть твою̀ пра́здновати призыва́емїи, вопїе́мъ: А҆ллилꙋ́їа.

І҆́косъ є҃.

Ви́дѧще тѧ̀ дꙋ́шꙋ за бли́жнѧго полага́юща, бл҃же́нне паі́сїе, къ тебѣ̀ прибѣга́емъ: млⷭ҇тивъ бꙋ́ди на́мъ, и҆ предстоѧ̀ влⷣцѣ хрⷭ҇тꙋ̀, того̀ ᲂу҆молѝ, да ѿжене́тъ грѣхо́внꙋю тьмꙋ̀, ᲂу҆мы̀ помрача́ющꙋю, ѿ сла́вѧщихъ тѧ̀ моле́бными пѣ́сньми сицевы́ми:

Ра́дꙋйсѧ, бцⷣы бо́дренный пѣсносло́вче:

ра́дꙋйсѧ, панагꙋ́ды до́блественный ратобо́рче.

Ра́дꙋйсѧ, пꙋтево́днаѧ заблꙋ́ждшымъ ѕвѣздо̀:

ра́дꙋйсѧ, а҆ѳѡ́нскаѧ зовꙋ́щаѧ къ бг҃ꙋ трꙋбо̀.

Ра́дꙋйсѧ, ᲂу҆тѣше́нїе пла́чꙋщихъ:

ра́дꙋйсѧ, помо́щниче стра́ждꙋщихъ.

Ра́дꙋйсѧ, печа́льныхъ бжⷭ҇твенное ᲂу҆крѣпле́нїе:

ра́дꙋйсѧ, ѡ҆ и҆́ноцѣхъ неѡскꙋ́дное попече́нїе.

Ра́дꙋйсѧ, къ млⷭ҇тивѣй за ны̀ предста́телю:

ра́дꙋйсѧ, недꙋ́жныхъ безме́зднѣйшїй врачева́телю.

Ра́дꙋйсѧ, подвиза́ющихсѧ направлѧ́ѧй:

ра́дꙋйсѧ, и҆зрѧ́днѣ врата́рницꙋ бцⷣꙋ восхвалѧ́ѧй.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ ѕ҃.

Проповѣ́дникъ бг҃оно́сенъ є҆сѝ и҆ сто́лпъ вѣ́ры, да́ры дх҃а ст҃а́гѡ на́мъ и҆спроша́ѧй, тѣ́мъ и҆ мы̀ тебє̀ ра́ди, ста́рче преди́вный, немо́лчнѡ зове́мъ бг҃ꙋ: А҆ллилꙋ́їа.

І҆́косъ ѕ҃.

Возсїѧ́въ, ꙗ҆́кѡ лампа́да неꙋгаси́маѧ, свѣ́томъ трисл҃нечнагѡ бжⷭ҇тва̀, покаѧ́нїѧ наста́вникъ ꙗ҆ви́сѧ, паі́сїе ст҃е. Мы́ же твои́ми предста́тельствы свы́шнее ᲂу҆тѣше́нїе и҆ бл҃года́ти позна́нїе прїе́млющїи, сла́вимъ тѧ̀, вопїю́ще:

Ра́дꙋйсѧ, восписꙋ́ѧй хвалє́бнаѧ бг҃омт҃ри, ꙗ҆́кѡ славі́й и҆збра́нный:

ра́дꙋйсѧ, приноша́ѧй сле́зы хрⷭ҇тꙋ̀, ꙗ҆́кѡ мѵ́ро бл҃гоꙋха́нное.

Ра́дꙋйсѧ, помыслѡ́въ и҆сповѣ́данїю прилѣжа́вый:

ра́дꙋйсѧ, та́йнѣй ве́чери чи́стою дꙋше́ю прїѡбща́выйсѧ.

Ра́дꙋйсѧ, воздержа́нїѧ и҆ себє̀ ѿверже́нїѧ ѻ҆́бразе:

ра́дꙋйсѧ, крѣ́пкое ѡ҆ ве́си фове́рской предста́тельство.

Ра́дꙋйсѧ, сл҃нца хрⷭ҇та̀ маловѣ̑рнымъ провозвѣсти́вый:

ра́дꙋйсѧ, млⷭ҇тїю чл҃вѣколю́бца всѣ́хъ ᲂу҆довли́вый.

Ра́дꙋйсѧ, крі́не нбⷭ҇ный, ѡ҆ мі́рѣ мл҃твою бл҃гоꙋха́ѧй:

ра́дꙋйсѧ, вїно̀ сла́дкое, дꙋ́шы ра́достїю и҆сполнѧ́ѧй.

Ра́дꙋйсѧ, ѿкрове́нїѧ громогла́сное возвѣще́нїе:

ра́дꙋйсѧ, ᲂу҆тѣ́шителевы бл҃года́ти на на́съ и҆злїѧ́нїе.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ з҃.

Хотѧ́щꙋ тебѣ̀ сп҃сꙋ послѣ́довати, мч҃нческагѡ житїѧ̀ показа́лсѧ є҆сѝ ревни́тель, сохрани́въ несквє́рны дꙋ́шꙋ и҆ тѣ́ло любо́вїю бжⷭ҇твенною ко хрⷭ҇тꙋ̀. Сегѡ̀ ра́ди тѧ̀ ᲂу҆бл҃жа́емъ, согла́снѡ пою́ще бг҃ови: А҆ллилꙋ́їа.

І҆́косъ з҃.

Но́вое ѡ҆долѣ́нїе на неви̑димыѧ и҆ ви̑димыѧ врагѝ мл҃твою и҆ любо́вїю ѡ҆брѣты́й, всебл҃же́нне ѻ҆́тче, и҆ всеꙗ҆рꙋ́жїе смире́нїѧ взе́мъ, и҆стреби́лъ є҆сѝ бѣсѡ́вскїѧ ко́вы и҆ тща̑нїѧ, бг҃ови же бл҃года́рствєннаѧ возопѝ. Тѣ́мъ и҆ мы̀ прино́симъ тѝ сицева̑ѧ:

Ра́дꙋйсѧ, свѣ́та многобога́тное храни́лище:

ра́дꙋйсѧ, бл҃гоꙋтро́бїѧ хрⷭ҇то́ва вмѣсти́лище.

Ра́дꙋйсѧ, л҃алти́ри дв҃довы пѣ́нїе:

ра́дꙋйсѧ, ст҃а́гѡ а҆рсе́нїа ᲂу҆моле́нїе.

Ра́дꙋйсѧ, грѣ́шники и҆справлѧ́ѧй и҆ ѡ҆бодрѧ́ѧй:

ра́дꙋйсѧ, ми́лованїе ᲂу҆ бцⷣы и҆спроша́ѧй.

Ра́дꙋйсѧ, главо̀ подви́жникѡвъ вѣнцено́снаѧ:

ра́дꙋйсѧ, сѣ́не стра́ждꙋщымъ росоно́снаѧ.

Ра́дꙋйсѧ, же́зле тве́рдый претыка́ющымсѧ:

ра́дꙋйсѧ, є҆ле́е млⷭ҇ти и҆з̾ѧ́звлєннымъ.

Ра́дꙋйсѧ, ка́ющымсѧ сто́лпе и҆ ᲂу҆крѣпле́нїе:

ра́дꙋйсѧ, ᲂу҆трꙋждє́ннымъ ти́хостное ᲂу҆покое́нїе.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ и҃.

Стра́ненъ бы́въ въ мі́рѣ, паі́сїе, гдⷭ҇а возлюби́въ и҆ стра̑сти твоѧ̑ ᲂу҆кроти́въ бж҃їею бл҃года́тїю, ны́нѣ ꙗ҆́коже зарни́ца ѡ҆блистава́еши ѡ҆ тебѣ̀ вопїю́щихъ немо́лчное: А҆ллилꙋ́їа.

І҆́косъ и҃.

Всѧ́къ къ тебѣ̀ притека́ѧй, ѻ҆́тче паі́сїе, ско́рѡ ᲂу҆тѣше́нїе ѡ҆брѣта́ше и҆ просѧ́й бл҃года́ти дарова́нїе прїима́ше. Сегѡ̀ ра́ди и҆ мы̀ сїѧ̑ восклица́емъ тѝ:

Ра́дꙋйсѧ, лꙋчено́снаѧ ѡ҆мрачє́ннымъ ѕвѣздо̀:

ра́дꙋйсѧ, ка́ющихсѧ наста́вниче и҆ главо̀.

Ра́дꙋйсѧ, а҆ѳѡ́нскїѧ бра́тїи тѧготы̑ взе́млѧй:

ра́дꙋйсѧ, всенепоро́чныѧ са́да бл҃гослове́нїе прїе́млѧй.

Ра́дꙋйсѧ, ѡ҆ бл҃госты́ни хрⷭ҇то́вѣ сладковѣща́нїе:

ра́дꙋйсѧ, мл҃твы ᲂу҆́мныѧ мѷроꙋха́нїе.

Ра́дꙋйсѧ, вселе́ннѣй сп҃си́телѧ провозвѣща́ѧй:

ра́дꙋйсѧ, пѣ́снь а҆рха́гг҃ловꙋ ко прест҃ѣ́й воспѣва́ѧй.

Ра́дꙋйсѧ, наде́жды, млⷭ҇ти и҆ любвѐ пла́меню:

ра́дꙋйсѧ, сострада́тельное ѡ҆мове́нїе во вра́жїей бра́ни.

Ра́дꙋйсѧ, є҆ле́омъ да́ра прⷪ҇ро́ческагѡ пома́занный:

ра́дꙋйсѧ, бл҃гоꙋтро́бїемъ ѻ҆ц҃ꙋ̀ нбⷭ҇номꙋ ᲂу҆подо́бивыйсѧ.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ ѳ҃.

Всѧ́комꙋ вне́млющемꙋ проповѣ́далъ є҆сѝ сло́во, а҆пⷭ҇лѡмъ ᲂу҆подоблѧ́ѧсѧ, раче́нїемъ же бжⷭ҇твеннымъ и҆ любо́вїю къ бли̑жнимъ просїѧ́лъ є҆сѝ на землѝ ꙗ҆́кѡ со́лнце, прославлѧ́ѧ ст҃ꙋ́ю трⷪ҇цꙋ: А҆ллилꙋ́їа.

І҆́косъ ѳ҃.

Виті́йство сꙋ́етное мі́ра сегѡ̀ презрѣ́лъ є҆сѝ, ѻ҆́тче, сле́зъ пото́ки ѿ дꙋшѝ мѷроточа̀, се́рдцемъ ѡ҆ человѣ́цѣхъ, стра́ждꙋщихъ дꙋше́ю и҆ тѣ́ломъ, болѣ́знꙋѧ. Сегѡ̀ ра́ди и҆ мы̀ ны́нѣ ѿ дꙋ́шъ на́шихъ пѣснопѣ̑нїѧ тѝ возсыла́емъ, въ смире́нїи вопїю́ще прилѣ́жнѡ:

Ра́дꙋйсѧ, є҆ѵⷢ҇лїа слꙋжи́телю неꙋтоми́мый:

ра́дꙋйсѧ, трисл҃нечнагѡ бжⷭ҇тва̀ свѣтопрїе́мниче неꙋгаси́мый.

Ра́дꙋйсѧ, по́стничества риста́лище соверши́вый:

ра́дꙋйсѧ, смире́нїемъ кра́йнимъ и҆ны́хъ предвари́вый.

Ра́дꙋйсѧ, во а҆ѳѡ́нской горѣ̀ вѣ́ры сїѧ́нїе:

ра́дꙋйсѧ, всест҃ы́ѧ сла́дкое воспѣва́нїе.

Ра́дꙋйсѧ, ᲂу҆чи́телю сла́вный дѣѧ́нїѧ же и҆ зрѣ́нїѧ:

ра́дꙋйсѧ, постигі́й велемꙋ́дрѣ бжⷭ҇твєннаѧ видѣ̑нїѧ.

Ра́дꙋйсѧ, пречⷭ҇тыѧ вертогра́да неѡсла́бный земледѣ́льче:

ра́дꙋйсѧ, ст҃ы̑мъ лꙋкїллїа́нꙋ, пантелеи́монꙋ и҆ є҆ѵѳи́мїи собесѣ́дниче.

Ра́дꙋйсѧ, гла́съ бг҃оꙗ҆трокови́цы слꙋ́хомъ ᲂу҆слы́шавый:

ра́дꙋйсѧ, тꙋ̀, а҆́ки на і҆ерⷭ҇ли́мской і҆кѡ́нѣ, ꙗ҆́вѣ ᲂу҆зрѣ́вый.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ і҃.

Сп҃се́нїѧ соѻте́чественникѡмъ всѣ́мъ се́рдцемъ жела́ѧ, паі́сїе ст҃е, вели́чествїе и҆ те́плый застꙋ́пникъ каппадокі́и со є҆лла́дою ꙗ҆ви́лсѧ є҆сѝ, добродѣ́телей бо лѣ́ствицꙋ бг҃оꙋго́днѡ совершѝ, ко трⷪ҇цѣ ст҃ѣ́й непреста́ннѡ поѧ̀: А҆ллилꙋ́їа.

І҆́косъ і҃.

Стѣна̀ є҆сѝ вѣ̑рнымъ, ѻ҆́тче паі́сїе, а҆́гг҃льское бо житїѐ возлюби́въ, пѡ́двиги свои́ми неѿстꙋ́пнагѡ предстоѧ́нїѧ ст҃ѣ́й трⷪ҇цѣ дости́же. Сегѡ̀ ра́ди пѣ̑нїѧ бл҃года́рствєннаѧ возсыла́юще и҆з̾ глꙋбины̀ серде́цъ и҆ дꙋ́шъ на́шихъ, смире́ннѡ тѝ возглаша́емъ:

Ра́дꙋйсѧ, свѣщено́сче а҆ѳѡ́нскїй, бг҃оѧвле́ннѡ мі́рꙋ сїѧ́ѧй:

ра́дꙋйсѧ, краснопѣ́снивый гла́се, бж҃їе сло́во провозвѣща́ѧй.

Ра́дꙋйсѧ, многоча́дне, человѣ́чєскаѧ болѣ̑нїѧ и҆сцѣлѧ́ѧй:

ра́дꙋйсѧ, добропло́дне, заблꙋ́ждшихъ стєзѝ и҆справлѧ́ѧй.

Ра́дꙋйсѧ, ꙗ҆́кѡ ѕмїє́въ главы̑ мл҃твою сокрꙋша́еши:

ра́дꙋйсѧ, ꙗ҆́кѡ и҆ зра́комъ твои́мъ ны̀ ᲂу҆тѣша́еши.

Ра́дꙋйсѧ, неневѣ́стнѣй невѣ́стѣ ра́дованїе приноша́ѧй:

ра́дꙋйсѧ, къ црⷭ҇твїю нбⷭ҇номꙋ пꙋ́ть ᲂу҆глажда́ѧй.

Ра́дꙋйсѧ, ѳѷмїа́мъ дх҃а бж҃їѧ нарече́нный:

ра́дꙋйсѧ, ско́рѡ приводѧ́й къ серде́чномꙋ ᲂу҆миле́нїю.

Ра́дꙋйсѧ, мл҃твы і҆и҃совы и҆ средѝ мі́ра дѣ́лателю неꙋста́нный:

ра́дꙋйсѧ, бж҃їѧ мт҃ре ᲂу҆го́дниче бл҃года́рный.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ а҃і.

Пѣ́нїе зижди́телю и҆ приснодв҃ѣ съ пѡ́двиги мно́гими, и҆̀же въ нощѝ и҆ во днѝ, соплета́ше смире́ннѡ, ст҃е, бж҃їѧ дх҃а сосꙋ́дъ себѐ показꙋ́ѧ. Мы́ же трⷪ҇цѣ ст҃ѣ́й припа́дающе, тебє̀ ра́ди пое́мъ и҆ вопїе́мъ: А҆ллилꙋ́їа.

І҆́косъ а҃і.

Свѣ́тъ и҆ мѷроꙋха́нїе бл҃гоче́стїѧ, любвѐ, самоѿверже́нїѧ неисче́тнагѡ и҆ и҆сцѣле́нїй ꙗ҆влѧ́етъ ст҃а́ѧ па́мѧть твоѧ̀, бг҃онра́вне. Сегѡ̀ ра́ди потща́хомсѧ всѝ моле́бными гла̑сы тебѣ̀ возопи́ти:

Ра́дꙋйсѧ, ᲂу҆казꙋ́ѧй всѣ̑мъ вѣ̑рнымъ пꙋ́ть на нб҃са̀:

ра́дꙋйсѧ, ꙗ҆́кѡ ра́дости и҆сполнѧ́ютъ медотѡ́чнаѧ твоѧ̑ словеса̀.

Ра́дꙋйсѧ, и҆з̾ѻби́льнаѧ ѿ а҆ѳѡ́на рѣко̀, чꙋдесы̀ и҆скипа́ющаѧ:

ра́дꙋйсѧ, свѣтоно́снаѧ ѿ є҆лла́ды ѕвѣздо̀, вѣ̑рнымъ пꙋ́ть ѡ҆зарѧ́ющаѧ.

Ра́дꙋйсѧ, при́сное за ны̀ къ бг҃оꙗ҆трокови́цѣ хода́тайство:

ра́дꙋйсѧ, а҆́гг҃льскомꙋ житїю̀ прилѣжа́щымъ предста́тельство.

Ра́дꙋйсѧ, добродѣ́телей плодоно́снѣйшаѧ лозо̀:

ра́дꙋйсѧ, ѡ҆ мі́рѣ къ прⷭ҇то́лꙋ достига́ющаѧ слезо̀.

Ра́дꙋйсѧ, но́вый а҆пⷭ҇ле, къ вѣ́рѣ хрⷭ҇то́вѣ всѧ̑ призыва́ѧй:

ра́дꙋйсѧ, правосла́вїѧ гла́се, мнѡ́ги возсозида́ѧй.

Ра́дꙋйсѧ, дре́во всепло́дное, мт҃рїю нбⷭ҇ною напоѧ́емое:

ра́дꙋйсѧ, вѣ́рныхъ зна́мѧ, въ подсо́лнечнѣй распростира́емое.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ в҃і.

Бл҃года́ти бж҃їѧ и҆сто́чникъ тѧ̀ позна́хомъ, ѻ҆́тче, по ᲂу҆спе́нїи твое́мъ, въ не́мже ли́цы а҆́гг҃льстїи весе́лїѧ и҆сполнѧ́хꙋсѧ. Тѣ́мже и҆ мы̀, печа́льника ѡ҆ сп҃се́нїи на́шемъ ᲂу҆лꙋчи́ти сподо́бльшїисѧ, ра́дꙋемсѧ, взыва́юще: А҆ллилꙋ́їа.

І҆́косъ в҃і.

Пою́ще бе́зднꙋ чꙋде́съ твои́хъ и҆ терпѣли̑вныѧ твоѧ̑ по́двиги, ст҃е, ѿ серде́цъ тѝ сплета́емъ а҆́гг҃льскаѧ пѣснопѣ̑нїѧ, па́мѧть твою̀ почита́емъ бл҃гоговѣ́йнѡ и҆ вопїе́мъ такова̑ѧ:

Ра́дꙋйсѧ, наде́жды ѻ҆те́чествїю забве́нномꙋ проповѣ́дниче:

ра́дꙋйсѧ, го́рнѧгѡ со ст҃ы́ми кꙋпножи́тельства вѣ́стниче.

Ра́дꙋйсѧ, и҆згна̑ннымъ ѿ стра́нъ свои́хъ сла́вный ᲂу҆дѣ́лъ прознаменова́вый:

ра́дꙋйсѧ, къ черто́гѡмъ нбⷭ҇нымъ восхожде́нїе мнѡ́гимъ ᲂу҆каза́вый.

Ра́дꙋйсѧ, плѣне́нныхъ ѻ҆́тчинъ прорекі́й ѡ҆бновле́нїе:

ра́дꙋйсѧ, дѡ́льнѧѧ то́кмѡ мꙋ́дрствꙋющымъ вразꙋмле́нїе.

Ра́дꙋйсѧ, разꙋмѣ́нїѧ зна́менїй време́нъ и҆мы́й бл҃гослове́нїе:

ра́дꙋйсѧ, мі́рꙋ блиста́нїе, вѣ́ры немо́лчное возглаше́нїе.

Ра́дꙋйсѧ, а҆́ввы тѵ́хѡна рꙋ́сскагѡ до́брый ᲂу҆ченичѐ и҆ послꙋ́шниче:

ра́дꙋйсѧ, трапе́зы а҆́гнчи присноживо́тныѧ прича́стниче.

Ра́дꙋйсѧ, а҆пⷭ҇льски ꙗ҆вле́й ѡ҆бѣтова̑нїѧ:

ра́дꙋйсѧ, хрⷭ҇то́ва свѣ́та златоза́рное сїѧ́нїе.

Ра́дꙋйсѧ, прпⷣбне паі́сїе, ди́вный наро́да бж҃їѧ ᲂу҆тѣ́шителю.

Конда́къ г҃і.

Ѽ прпⷣбне ѻ҆́тче паі́сїе, но́вый цвѣ́те бл҃гоꙋха́нный, во времена̀ послѣ̑днѧѧ и҆зрасты́й, ᲂу҆молѝ хрⷭ҇та̀ бг҃а сп҃сти́сѧ дꙋша́мъ ѡ҆ тебѣ̀ воспѣва́ющихъ: А҆ллилꙋ́їа.

Се́й конда́къ глаго́летсѧ три́жды.

И҆ па́ки чте́тсѧ і҆́косъ а҃-й, и҆ конда́къ а҃-й.

Мл҃тва.

Ѽ пречꙋ́дное и҆ бл҃гоꙋха́нное ст҃ы́ѧ горы̀ а҆ѳѡ́нскїѧ процвѣте́нїе и҆ люде́й правосла́вныхъ ᲂу҆тѣше́нїе, прпⷣбне ѻ҆́тче паі́сїе! Ты̀ прїѧ́въ ст҃о́е кр҃ще́нїе ѿ рꙋкꙋ̀ прпⷣбнагѡ а҆рсе́нїа, и҆́стиннымъ подража́телемъ тогѡ̀ любвѐ и҆ подвигѡ́въ ꙗ҆ви́лсѧ є҆сѝ. Во младе́нствѣ ѿ фара́съ до страны̀ є҆лла́дскїѧ пꙋтеше́ствовавый, до кончи́ны твоеѧ̀ по́двигъ дꙋхо́внагѡ стра́нничества сохрани́лъ є҆сѝ, ни къ чесомꙋ̀ сꙋ́етномꙋ не прилѣплѧ́ѧсѧ. Ѿ ю҆́ности по́стъ, мл҃твꙋ, дꙋхо́вное чте́нїе и҆ бдѣ́нїе возлюби́вый, кра̑йнїѧ по́двиги дꙋхѡ́вныѧ въ житїѝ и҆́ночестѣмъ ꙗ҆ви́лъ є҆сѝ. Въ чи́нѣ во́инстѣмъ досто́йнѣ ѻ҆те́чествїю своемꙋ̀ послꙋжи́вый и҆ сме́рти на по́ли бра́ни не ᲂу҆боѧ́выйсѧ, во́инствꙋ цр҃ѧ̀ нбⷭ҇нагѡ вчини́лсѧ є҆сѝ, тве́рдѡ и҆ небоѧ́зненнѡ пꙋте́мъ сп҃се́нїѧ и҆ дꙋхо́внагѡ возраста́нїѧ слѣ́дꙋѧ. Е҆щѐ ѻ҆́трокъ сы́й, мл҃твою крѣ́пкою бѣ́са невѣ́рїѧ и҆ сомнѣ́нїѧ посрами́вый и҆ преди́внагѡ видѣ́нїѧ сп҃си́телѧ сподо́бивыйсѧ, по́слѣжде да́ръ заблꙋ́ждшыѧ дꙋ́шы врачева́ти стѧжа́лъ є҆сѝ. Мнѡ́гїѧ скѡ́рби и҆ тѧ̑жкїѧ болѣ̑зни во всѧ́цѣмъ терпѣ́нїи понесы́й, всѣ̑мъ притека́вшымъ къ тебѣ̀ мꙋ́дрое назида́нїе и҆ ди́вное врачева́нїе преподава́лъ є҆сѝ. Сло́во бо твоѐ бы́сть жи́во и҆ дѣ́йственно ко вразꙋмле́нїю и҆ ᲂу҆тѣше́нїю. Сегѡ̀ ра́ди мо́лимъ тѧ̀, всебл҃же́нне ѻ҆́тче паі́сїе! Пода́ждь и҆ ны́нѣ твои́ми бл҃гопрїѧ́тными къ бг҃ꙋ мл҃твами дꙋша́мъ на́шымъ стра́ждꙋщымъ ᲂу҆тѣше́нїе и҆ ко и҆́стинномꙋ покаѧ́нїю наставле́нїе, въ мл҃твѣ и҆ трꙋдѣ́хъ терпѣ́нїе, ми́ръ и҆ любо́вь нелицемѣ́рнꙋю, и҆ во всѣ́мъ бо́дренное, ра́достное во хрⷭ҇тѣ̀ жи́тельство. Тѧ̑жкїѧ ра̑ны стра́ждꙋщихъ ди́внымъ пома́занїемъ бл҃года́ти бжⷭ҇твенныѧ и҆сцѣлѝ, да млⷭ҇тїю бж҃їею воста́нꙋтъ и҆ потрꙋ́дѧтсѧ во сла́вꙋ и҆́мене прест҃ы́ѧ трⷪ҇цы. Странѣ̀ на́шей ми́ръ, бл҃годе́нствїе и҆ ᲂу҆множе́нїе вѣ́ры и҆спросѝ, да вы́нꙋ сла́вѧтъ лю́дїе правосла́внїи бг҃а и҆ пречⷭ҇тꙋю бцⷣꙋ, твои́ми и҆ всѣ́хъ ст҃ы́хъ мл҃твами! А҆ми́нь.